火煋人

曹仁超-投資者日記(31/10/2008)-短線客小心反彈將完 2008.10.31 10月30日，周四，期指結算日。恒指升1627.78，收14329.85；成交751.1億元。10月期指升1011點，收13719點，低水；11月期指升1517點，收14150點，一樣係低水。係未代表反彈市完成？短線客要小心。 從十五分鐘乾坤燭睇，阻力區（R）在14675點，即上升空間已極之有限【圖】。恒指在10676點完成1、2、3、4、5下跌浪，進入a、b、c調整浪，前浪頂在10月14日的17141.05，前浪底在10月10日14398點；依家呢個a、b、c浪，能否高出10月14日高點17141點而出現一浪高於一浪走勢，意味熊市完成？我老曹相信，由10月27日10676點開始的a、b、c反彈浪，最有可能在14398至17241點之間遇阻回落，仍然擺脫唔到一浪低於一浪走勢。 窪仔可以浸死人 科網股低潮在2003年聯儲局減息至1厘後結束，恐怕呢一次唔得，理由係2001年起減息潮令美國樓價開始向上。但呢次減息潮至今，美國仍搵唔到另一個泡沫的力量足以替代物業泡沫的地位。換言之，2007年11月開始向下的大趨勢，最近只因股價過分低殘而出現技術反彈（即俗語所講的熊腳）。 10月10日至14日，在三個交易天內，恒指上升了2744點或19％。呢次反彈由10月27日開始，可維持幾耐、升幅幾多？事後才知道。小心窪仔可以浸死人。 美國第三季GDP出現0.3%負增長，此乃2001年以來首次，估計第四季GDP亦係負增長而確認衰退。 8月15日奧巴馬支持率41%，麥凱恩42%，信貸壓碎出現後，奧巴馬支持率升至49%，拋離麥凱恩，證明衰退對執政黨不利，GE的CEO估計，呢次衰退期長達兩季到三季，即明年第一季GDP極有可能仍係負增長。 本月英國政府注資235億英鎊入HBOS及皇家蘇格蘭銀行，以該兩間銀行最近市價計，賬面虧損10％。周三英國財相戴理德已訂下守則，限制政府過分借貸，以免日後泥足深陷。英國政府稅收來源25％來自金融業，呢方面未來收入肯定萎縮。柏克萊已表示唔使政府幫手而自行集資65億英鎊；萊斯銀行除獲政府注資外，亦計劃向私人集資45億英鎊，透過發行新股集資，每股173.3便士（只略低於179.2便士市價），上述新股由政府包銷。HBOS市價88便士，已低於政府入股價113.6便士；皇家英格蘭成64便士，亦略低於政府入股價65.5便士。英國四大銀行股價進一步下跌，令未來集資方面更困難。10月份英國樓價較一年前回落14.6％，係1991年有調查以來跌幅最大的一個月（或較9月回落1.4％）。雖然10月8日銀行減息半厘，至4.5厘，而且英鎊匯價在10月份大跌，但仍未能吸引多D投資者入市買樓，依家已有10％樓按加入負資產行列；估計11月6日英倫銀行再減息半厘。 隆巴特利率（LIBOR）即倫敦銀行同業拆放利率唔係回落了咩？上述利率係全球銀行同業之間向對手收取的利率，今年4月起因銀行間缺乏互信，銀行同業唔願意向對手拆放資金（因知道對手持了唔少有毒債券），寧可保持現金在手。近日隆巴特利率回落，唔係代表信心恢復，而係各銀行可直接向央行拆放。作為央行，反正都係納稅人的資金，唔使理會對手係未安全，照樣拆放。因此，隆巴特利率回落唔代表基本問題解決，最後「有毒債券」一樣會吃掉銀行的資本。在呢段日子，各銀行仍努力出售高風險資產及令資產負債表去槓桿化（de-leveraging）。當人人銷售高風險資產（在會計上叫Level 3），加上國際會計公會要求高風險資產值「mark-to-market」，結果高風險資產價格一跌再跌，令銀行資產負債表愈來愈難睇，政府只有不斷注入資金去抵銷被「毒債」吃掉的銀行資本，形成政府注資沒完沒了。再加上銀行們努力去槓桿化，令銀行向非金融機構借出的資金愈來愈少，整個社會面臨信貸收縮。 美國政府的1600億美元注資計劃，主要對象係那D財政較佳的銀行，結果財政較差的銀行加快破產，美國境內銀行破產陸續有來。 今天垃圾債券利率較美國政府債券利率高出16％（去年6月只高出2.5％），係1986年以來最高，反映投資者仍擔心大量不履行合約出現（default），在咁的情況下，又點叫銀行界放心將資金借出去？ 兩房成為美國政府黑洞 房利美短期內須減值最少200億美元，令公司賬面值減半；減值後如須維持借出的款項，政府必須再注資。擔心兩房已成為美國政府兩個深不見底的黑洞！為確保兩房佔12萬億美元的住宅貸款擔保唔使及早收回，差唔多每年美國政府都必須注資、注資再注資。最近政府已急急注資1000億元入兩房，以應付燃眉之急。從上述睇，次按危機不但未解決反而在惡化。你說怎麼辦?! 歐洲央行11月6日估計再減息半厘，由3.75厘降至3.25厘，到時可能刺激美元匯價上升。今天美國減息後，原油價格急升7.6％或4.77美元，成67.5美元；銅價升12％，成2.0715美元一磅，都唔係良好訊號。 雷曼兄弟不但「累埋」兄弟，甚至害你全家，幾多無知散戶被迷你毒債券毒死？毒債券甚至較毒牛奶更毒，飲了毒奶最多生腎石，只要多飲水，總有「水落石出」的一天。反之「累埋」兄弟迷你毒債券卻可以令唔少人唔知點過埋下半世，認真可憐。 今次減息唔係好消息 中國人行擔心中國第四季GDP增長率少於8％，過去六星期三度減息。依家內地一年期貸款利率降至6.66厘，一年期存款利率降至3.6厘。跟住美國亦減息，相信日本、歐洲及英國短期內亦減息。今天人人皆知道減息唔係好消息，唔似2001年1月那陣時，太多人以為減息係好消息。只有最後一次減息才係好消息，由於中國未來仍會再減息，即呢次減息並唔係好消息。內地第三季公司業績認真麻麻，東方航空（670）、南方航空（1055）蝕得一塌糊塗；中遠太平洋（1199）不但第三季純利大減，同時宣布延遲擴張計劃以保留更多現金；中國銀行（3988）第三季純利仍升11.5％，但須為次按作大幅撥備；煤礦同鋼鐵廠面對煤價、鋼材價格下跌，第四季業績令人擔心。政府明年「保八」能否成功？目前言之過早。 沃頓商學院教授Jeremy Siegel認為，未來投資方向將由舊世界（歐、美）轉向新世界（中國、亞太區同非洲）。一如1990年資金離開日本奔向全世界一樣，未來（2010至2030年）中國、亞太區同非洲等佔全球GDP將由依家30％上升到55％；美國仍佔24％，歐洲及日本則大幅萎縮。 過去一年的熊市令美國退休基金失去5000億至2萬億美元市值，加上三分二美國人已無力供退休金，未來進入美股資金大幅減少期。退休人士面對更少蚊年退休，無法過舒適的退休生活，部分改為依賴社會保障計劃，大大加重政府財政負擔。2011年起該計劃亦因交稅人減少、支出大升而出現財赤，需要政府注資。從呢點睇，美國未來經濟前景殊不樂觀。《華盛頓郵報》報道，加州退休金在過去十二個月虧損670億美元或下跌60％，好多公務員因此唔夠蚊年在退休後火燒旗桿。International Herald Tribune報道，今年甚至最有錢的美國人，亦開始減少消費。本港阿一鮑魚酒家亦宣布推出特價套餐；本港有錢佬亦要食「套餐」？世界變矣。一直以來，美國人假裝好有錢，但在金融海嘯下原形畢露；日本人一直扮窮，日經平均指數出現十八年熊市，不過日本人仍有大把錢借畀別人去做利差交易。 《金融時報》報道估計，約4250億美元環球資金與日圓利差交易有關，一旦unwind，不但令國際金融市場受壓，同時可將日本經濟急速推向通縮。依家G7正努力去減慢日圓升值速度（另一偽裝？）！ 日本繼南韓後決定造數，今後日本公司賬目唔再反映真實數字。美國公司會否放棄造數？（去年國會曾下令美國證監會在2009年年初執行：所有金融機構賬目必須真實反映財政狀況。本周三美國證監會向公眾人士諮詢意見，問應否延期執行FAS 157法案（即投資項目以市值入賬）。依家唔少賬面值1美元的CDO，市值只有20美仙或更低，如按市值入賬，大量金融機構都唔符合資本充足比率，必須集資或收縮借貸。美國財政部已向各銀行注資2500億美元，但遠遠唔夠。美國眾議院金融服務委員會主席Barney Frank建議「靈活」處理FAS 157法案。現實真係太殘酷，都係戴番副面具做人好D。 大量散戶一二三齊齊入市 1930年代華爾街危機後，美國國會曾制訂一連串法案去阻止大蕭條再出現；上述法案自1990年起逐漸被取消。自由、自由！多少人假借自由之名而放蕩不羈？冇皇管的CDO市場自1990年起迅速發展，並帶來美國有史以來最長的繁榮期（1982年至今再冇出現連續兩季GDP負增長）。不受監管的金融業最終闖了大禍而累及全球，2007年11月起美股狂瀉，一如1929年10月，雖然政府已迅速行動，至今未能肯定可將美股股價穩定下來。股市進入Capitulation（即股價大跌及成交額大升後，出現反彈，吸引投資者入市。當購買力用光後，另一潮跌市又開始）。由於香港可能「溝上唔溝落；止蝕唔止賺」的諗法已普及，大量散戶至今仍持住唔少現金。本周一匯控（005）見75港元後，便一、二、三齊齊入市。Playing the Market係危險的行為，股市係最唔聽話的僕人、最好的主人。如你希望控制它，你的虧損可以係天文數字；如你聽佢的話，它又會大大獎賞你。過去幾多大戶希望控制佢而付出天文數字代價？呢次亦唔例外。 金融環球化環境下，已唔易搵到避難所；美股下跌不但拖低港股，連滬深A股亦難逃一跌。美股下跌後，到今年3月金價亦下跌，7月油價亦跟住下跌，雖然彼此有時差，但一樣難逃終極一跌！今時今日係未唔使再花時間去搵避難所，索性加入Cash is King行列，等候金融海嘯過去滿目瘡痍後，才加入重建行列？ 1990年日本地產泡沫、1997年7月香港樓市泡沫爆破後，跌幅都達到65％至75％。呢次美國、英國、西班牙、愛爾蘭樓市泡沫爆破，未來跌幅會幾多？如出現上述跌幅，會否摧西方銀行體制？西方人唔似日本人或香港人有高儲蓄率。香港更有強大中國做後盾，令香港豪宅2003年9月起再次形成泡沫。為應付樓市泡沫，美國為首的西方國家利率正一步步走向零，以協助供樓者。上述行為對日圓利差交易又帶來致命打擊，引發拆倉潮，令日圓匯價大升，結果又令日本經濟再陷衰退。家陣世界上只餘下30％GDP仍在增長，包括中國、亞太區及非洲。 過去一年全球金融市場變化之大、變化之快，令人措手不及。全球金融市場透過互聯網早已連在一起，變成一體化了。The click of a mouse可令百億美元計資金由倫敦流去紐約、巴黎；整個社會由2007年流動性過剩走向流動性不足，未因政府大量bailout銀行而停止，反而在加速。 面對次按危機，銀行發現多做多錯、少做少錯，唔做唔錯，咁就決定唔做，收回資金後唔再借番出去，只用作減少自己的負債（即de-leveraging）。在咁情況下，經濟復甦便遙遙無期，未來六至十八個月更可能出現Super crash（如各國政府決定停止注資銀行的話）。 今年9月聯儲局將資產負債表擴大6000億美元（即一下子上升70％），並向金融體系注入1700億美元，到底能否阻止通縮出現？兩股力量正在對抗：一、去槓桿化將引發通縮；二、聯儲局拚命注資去對抗通縮。最後結果係，銀行收緊信貸而引發通縮，抑或聯儲局拚命注資而引發新一輪通脹？木宰羊。自從1933年起美國從未出現通縮，金融體系信貸收縮只引發資產價格下降，例如2000至02年，相信呢次亦唔例外，估計只令引發資產價格下跌而非通縮，但經濟則陷於水深火熱中（人們同時感覺身家少了但物價貴了）。 在政治領袖錯誤引導下，人們傾向相信金融危機的出現，係資本家貪得無厭造成（一如毛澤東時代認為農民貧窮係因大地主剝削）。事實並唔係咁。貪念人人有（窮人貪念可能較資本家更強），並非壞事，我老曹常常強調做人係要貪，但要貪得其所，千萬不可貪勝不知輸。如果唔係貪念作怪，擁有1000萬元以上的人都唔會再投資、再工作，咁整個社會便會死氣沉沉。呢次金融危機出現，正正係政客們對經濟無知所造成，例如八十年代美國通過幫助窮人置業法案，造成今天唔使畀首期的置業計劃出現。九十年代通過銀行不得歧視窮人法案，造成銀行濫借資金畀窮人置業，然後將佢包裝成CDO擲出市場，不負責任。 政客的崇高理想，往往由資本家付鈔去完成；反過來如資本家攻擊政府政策（例如索羅斯當年攻擊英鎊匯價），卻被打成「國際大鱷」。士、農、工、商、兵，士永遠搞搞震，闖了禍便由商去做代罪羔羊，歷史永遠係咁。黑狗偷食，白狗當災（資本家永遠係社會上的白狗，政客永遠扮演社會上的黑狗），古今中外皆然，莫奈何。 [ 本帖最後由 羊仔 於 2008-10-31 10:24 編輯 ]

Share this:

火煋人

曹仁超投資者日記:最恐怖的10月 2008.11.1 10月31日，周五。恒指跌361.18，收13968.67，成交584.7億元。11月期指跌220點，收13930點。中信泰富（267）升 21％，見6.06元後停牌；交通銀行（3328）跌5.4％，收4.42元；國泰航空（293）跌5.5％，收9.33元；國航（753）跌3.7％，收2.07元；中石油（857）跌3.4％，收5.7元；利豐（494）跌13％，收15.2元。 今年10月恒生指數係十一年來最差一個月，但本周上升11％，又係去年8月以來升幅最大一周。 花旗推介新創建（659），估計2008�09年度獲利72仙，減少31.2％，P/E十點二倍，目標價9.2元；交通銀行估計今年每股獲利59.6仙，升 40.9％，P/E六點九倍，目標價5.6元；中信銀行（998）估計今年每股獲利40.8仙，升78.2％，P/E五點二倍，目標價3.3元；百麗國際（1880）估計今年每股獲利39.2仙，升6.8％，P/E十二倍，目標價6元；中海油田（2883）估計今年每股獲利68.1仙，升25.7％， P/E四點四倍，目標價6.86元。 滬深三百指數跌2％，收1663.66。 美國收緊信用卡發放 日本首相提出5萬億日圓（逾500億美元）刺激經濟計劃。日本銀行宣布減息0.2厘，但日經平均指數卻下跌5.01％，擔心日經平均指數繼續向1982年低位前進。本月日圓一度見90.93日圓兌1美元，其後反彈到98.73日圓，在利差交易拆倉下，日圓日後向80日圓兌1美元方向進軍（1994年曾見76日圓兌1美元）。日本經濟又再次步入衰退；10月份東京核心通脹只有1.5％（9月係1.7％），相信好快出現通縮。 澳元本月回落17％，見66.68美仙（兌日圓跌23％，見65.49日圓）；紐元回落13％；見58.57美仙（兌日圓回落19％，見57.52日圓）。9月30日至今CRB原材料指數跌 19％，係1956年以最大跌幅；原材料佔澳洲60％出口及佔紐西蘭70％出口，11月澳元及紐元下跌空間仲好大。必和必拓下跌4.5％及 Woodside Petroleum Ltd.下跌4.5％。10月份澳洲股市下跌14％，係1992年以來最差（1987年10月股災月，澳洲股市亦只下跌15％）。 中國可能延遲銅礦石入口。銅價今年7月每噸8940美元，至今已回落54％（其中35％跌幅在10月出現）。 鐵礦砂將面對七年來首次降價，估計減幅10％至20％。因為鐵礦砂已進入買家市場。 美元又再上升。兌歐羅、英鎊、瑞郎及日圓皆上升，未因美國GDP收縮0.3％及利率下降至1厘影響。 明年上半年中國GDP增長率將下調至7.2％。政府將努力保八。 英國消費信心10月份跌至負42點，係1974年以來最低。估計下周英鎊將減息半厘。 《紐約時報》報道，美國銀行界正逐步收緊信用卡發放及授信額；已經身負債務者將難以獲得信用卡服務，飽受次按危機衝擊地區，或屬於問題行業打工仔，信用額將大幅度降低。美國運通更將信貸利率由15厘提升到18厘。今年上半年美國信用卡提供商呆壞賬虧損達210億美元，估計未來一年半可達530億美元；家陣信用卡呆壞賬率已達5.5％。 多年來美元低利率及寬鬆貨幣政策下，一再透支美國經濟。資產價格在金融槓桿情況下非理性放大，令資產價格不斷膨脹而積聚無限風險。一旦泡沫破裂，便帶來災難性後果，資金鏈開始斷裂，引發金融危機及信用違約等一連串問題。 投資者要冷靜思考問題 展望未來，一、美國房價再下降10％至15％機會好大，即次按產品還會出現新問題，債務市場還將惡化；二、美國信用卡負債9000億美元，美國運通集團估計，無法償還貸款達20％。至於汽車及其他消費債務1.5萬億美元，無法償還消費貸款數字亦在上升。從呢點睇，明年經濟不但唔會好轉，反而在度惡化中。新興市場國家已成為新重災區，去年約7800億美元流向新興市場國家，今年大幅減少及唔排除資金從新興市場國家流走。未來三到六個月新興市場情況恐怕仍會惡化；資金回流美國造成今年7月起美元強勢。 今年對大部分投資者來講係危險一年；不單只係熊市出現，而係令投資者經常在錯誤時刻作出錯誤決定（do the wrong thing at the wrong time）。市場一下子便可以去到極端（例如金價、油價、匯價及股價），投資者在感情受莫大刺激下而作出非理性決定，再唔可以平心靜氣地思考問題。例如匯控（005）連2003年4月4日低位79.5元亦失守，回落到75元，在未思考完畢時又反彈到95元；在波幅咁大金融市場中，投資者往往成為犧牲者。唔少好公司及低P/E股買入後證明係陷阱。機構投資者在度大量減持，甚至在股價回落70％後仲減持，因為前景展望欠佳。佢地明白眼前低P/E只反映去年業績而唔係明年純利；唔少4厘息、5厘息甚至6厘息藍籌股，明年亦可能減少派息，呢D係經濟衰退下必然結果，令缺乏前瞻性投資者在今年損傷好大。 本周恒指10676點係未見底？在未經考驗前，請唔好肯定或否定乜野。唔好被低P/E吸引（去年度低P/E可能係明年高P/E），唔好被高息吸引（一旦企業減少派息，高息股可變成低息股）。論勢、論戰與論性而唔係價值投資法；當大勢向下之時，邊個能阻擋？股票市場如戰場，只有贏家同輸家，冇大戶同散戶。下月出版第三本書《論性》，投資結果原來由本身性格決定。 過去歷史低位必需Re-Test。10676點必須面對考驗，企得住再算。通常需要五至七星期。即五到七星期內恒指唔再創新低，10676點先算係強力支持；即最早明年1月，最遲明年3月先知道本周10676點係未見底（只有1987年 10月股災，Re-Test在三十四個交易天後便出現）。投資者唔使估底，只需等候Re-Test便可。如在五至七星期內恒指低於10676點，即最近幾天只係一次強力反彈。有了呢個武器，你便唔使加入估底行列。 去年夏季次按危機表面化，去年8月聯儲局開始向金融體系大量注資。人們初期擔心通脹，隨住去年11月美股回落，通縮漸漸成功攻城略地，向通脹陣地進行猛攻，形勢扭轉。政府不斷向金融體系注資及減息，但通縮節節進攻下，通脹節節敗退。 今天美元利率已降至1厘，美國第三季GDP出現0.3％收縮。展望第四季甚至明年第一季，估計美國GDP仍係負增長。單單9月份已有十五萬九千人失業，樓價仍在回落中，樓按申請人數減少，唔少人受金融海嘯影響而財富大減。聯儲局餘下武器只有1厘，點樣阻止二十一世紀呢場信貸收縮？一如1929年後美國政府無論做乜野，通縮仍出現；1989年日本政府將利率逐步降至零，一樣無法阻止通縮在日本出現；家陣美國政府面對同樣問題。 1929年9月道指由381.27回落到11月198.69，下跌47.88％後出現強力反彈；1930年4月見294.07，升幅達48％才再開始漫長熊市。 1989年12月29日日經平均指數由38957點回落到1990年4月5日27251點，回落30％後亦反彈至1990年6月8日33344點，上升22.5％，然後才開始漫長熊市。 拋空錢唔易賺 作為趨勢投資者你永遠唔可能在最低價入貨，只可以在股市見底後五到七星期先知道往往買貴10％（寧買當頭起）。根據趨勢投資法，去年11月起，你不但不應再持有30％股票，應該加入拋空行列。不過，拋空非一般人可以做到，因為人人有貪念，卻好少人冇恐懼感。拋空首要克服恐懼感先得（過去亦曾試過拋空，但晚晚訓唔著，因無法克服內心恐懼。拋空D錢我老曹冇資格賺）；而且拋空係賺唔到大錢，有邊個由去年11月至今一直拋空 ?! 第三季美國GDP 收縮0.3％，但新一代投資者已習慣軟著陸（例如1990至91年及2001年），以為呢次又係另一次軟著陸（只有一季GDP負增長），而唔信衰退來臨（連續兩季GDP負增長）。資深者如三藩市聯儲局主席Janet Yellen都憂心如焚，因為聯邦利率只有1厘，即政府已冇晒對付衰退武器，如第四季GDP仲係負增長，明年用D乜野去刺激GDP令佢恢復上升？估計失業率由家陣6.1％上升到7％、明年年底見8％。美國將出現戰後最長一次衰退期，甚至較1981至82年那次更長（共十六個月）。1990至91年及 2001年那次軟著陸只有八個月，擔心明年全年GDP都係負增長。經濟學者Victor Zarnowitz擔心明年宣布衰退後，唔知幾時才可宣布復甦；衰退已在眼前，復甦則遙遙無期；唔似2003年當利率降至1厘時，復甦已出現，當年美國樓價上升6％、2004年升7％及05年升12％，家陣美國樓價仍在回落中。雪茄伏承認依家情況較1980至81年仲差；當年只要成功控制通脹，經濟便可復甦，呢次卻需要重建人們對整個金融制度信心（一次不忠、百次不用）。投資者要幾多年先忘記呢次華爾街金融業欺詐與造假行為？美國立國之父華盛頓必痛心疾首──因為美國人已忘記「誠實」係最好策略。 今晚係Halloween，今年10月將成為歷史。對金融圈人士來講，今年10月係最恐怖月份；我地已進入Cash is King日子。欺詐同造假在金融市場隨處可見，過去華爾街金融界利用CDO搵盡全世界人笨，然後逃之夭夭，留低D蘇州屎畀各國政府清理。各國政府注入資金估計已達2萬億美元，至於全球受害者數目則數以億計。過去響噹噹品牌好似貝爾斯登及雷曼兄弟已令人神憎鬼厭，佢地名令人一世悔恨。在整個欺詐同造假事件中，政府又顯得無能為力，面對倒閉無辜市民又咁無助，今後叫佢地點再信人？信心一旦動搖，非三、兩個星期內可恢復，恐怕係以年為單位，直到新制度出現，可防止欺詐同造假再難出現為止。信心唔係由政府bailout金融機構可以解決。 次按幫了民主黨 世上冇免費午餐，家陣人人皆曉。次按危機後，世人先明白世上一樣冇絕對自由經濟。政府干預不但在共產及社會主義國家出現，同時在資本主義國家一樣存在；問題只係幾時干預、點樣干預及干預技巧。夏鼎基先生早在七十年代已講明，香港政府奉行政策係積極不干預。 次按危機令民主黨成為大贏家，不但有助奧巴馬勝出，同時令明年執政者干預，例如向底特律汽車工人提供250億美元貸款，以及向窮人發行500億美元協助支付債務，更加容易獲國會通過。近日7000億美元挽救方案、接管房利美及房貸美，國會內都冇出現巨大阻力。反而共和黨卻受到重大挫折，1980年由列根總統開始小政府、大市場政策，漸漸畀人背棄。在危機下行動取代理想；透過解放金融監管而引發超過四分一世紀經濟繁榮期，睇來已到完結篇，因上述決定令資產獲太多槓桿而價格出現狂升。令收入一向微薄銀行僱員不但成為投資界天之驕子，同時收入每年以數百萬美元計；次按風暴出現，代表呢個時代結束。 在紐約蝴蝶拍拍雙翼，引發全球金融海嘯。好似颶風形成，其實早已出現客觀環境，例如1999年起日圓利差交易；加上中國壓抑人民幣匯價，令中國產品出口增長率狂升，推動全球商品價格上升；再加埋美國樓價長達十二年上升期等。上述種種因素加埋，形成等候爆破客觀環境。當雷曼兄弟破產，便有如在火藥堆上點著火柴，一發不可收拾。 呢次金融海嘯波及面同嚴重程度與1929年華爾街危機開始時有好多相似之處。例如道指在十二個月內下跌40%及有更多跌幅在前面；不過，亦有唔同處，美國次按危機發生無耐，各國政府已推出解救措施，基本上防止了銀行系統倒閉危機及針對信貸緊縮問題而大量向金融體系注資，各國央行協調降息。反觀三十年代，各國在華爾街危機發生後，不但唔肯放寬貨幣政策，反而主張重返金本位，令銀根緊縮及大量銀行倒閉。 各國政府迅速行動及聯手放寬銀根應可阻止大蕭條出現，令全球唔會退回貿易保護主義時代。雖然大蕭條可避免，但呢次衰退卻非同小可；銀行雖無破產之虞，但企業倒閉卻繼續增加。政府希望銀行積極借貸，但面對實體經濟加速下滑，銀行家們亦恕難從命。由以前過量槓桿投資轉為去槓桿化過程需要較長時間，銀行審慎借貸亦會延長經濟下滑周期。 以日本為例，日經平均指數1990年起下滑，經過十年仲未搞掂，終於到1999年由政府向銀行注資，日本經濟四年後（2003年4月）才復甦。但期間日資銀行冇資本充足比率困擾，只係東京地價仍在下跌。以日本為借鏡，美國政府到今年10月先向各銀行注資，如果唔係，標普Case-Shiller房價指數未來一、兩年仲要下滑；加上美國儲蓄率接近零，汽車及信用卡債務很高，而銀行借貸受制於資本充足比率。最樂觀估計，美國最少需十季（兩年半）先重拾升軌，已較日本四年時間為短。咁樣計算，另一次復甦期要等到2011年先出現；睇來投資者要牛市出現仍需耐心等候。 金融危機兩大教訓 世界銀行高級副行長兼首席經濟學家林毅夫認為，家陣金融危機係上一個世紀大蕭條以來最嚴重一次；世界應吸取兩大教訓：一、不能為解決一個問題再創造一個更大問題。林毅夫認為，2000年美國互聯網泡沫破滅時，美國經濟就應該陷入衰退。如任由那次衰退出現將係好短，但2001年1月起美國聯儲局用減息刺激房地產價格上升，令互聯網泡沫破滅時，冇出現衰退，只有一季GDP負增長。房地產泡沫卻係更大泡沫，當2006年下半年破裂後，便開始引發次按危機，到此已一發不可收拾；二、金融創新有其需要，但衍生產品愈搞愈複雜，監管機構索性放手唔管亦唔合理；結果為地產市場泡沫造成推波助瀾作用。儘管美國政府今年已採取前所未有大規模金融救市措施，已無法阻止投資同消費貸款減少，步入衰退係必然結果。至於有幾嚴重及時間會幾長？家陣仲難以預料。對中國無直接影響，因中國金融機構購買美國次按產品唔多，但間接影響亦不應忽視，例如因美國需求減少而衝擊中國出口。依形勢睇，中國應加快拓展內需市場以填補出口增長放緩。 中國銀行國際金融研究所10月30日發布研究報告顯示，中國市場正由滯漲期轉入下行周期。估計房價平均再跌10％，最高可跌30％，要到2010年房地產周期先重新進入上升期。明年中國房地產市場可能出現個貸違約率上升潛在風險。經濟周期下行將使信用收縮，實力不足房地產公司可能出現資金鏈斷裂而形成銀行信貸風險。 家陣中國商業銀行房地產貸款佔全部貸款餘額五分一（部分分行高達40％），因此對房地產開發信貸不應一刀切，而係有保有壓。 最近中國政府推出救市措施，對恢復購房者信心及引導房市健康發展有實際意義，但消費者對後市降價預測卻冇幫助，購房者希望政府出台更多優惠措施心態，反而更增加觀望情緒。

Share this:

火煋人

曹仁超投資者日記:金融災難源自集體思考 2008.11.3 11月2日，周日。上周全球股市平均P/E一度跌至十點三倍（以歷史性純利計），即重返七十年代的P/E水平；國企股平均P/E九倍（去年10月二十七倍），印度股市十倍（去年9月二十五倍）。日經平均指數10月27日更跌至二十六年內新低，P/E只有十一點五倍，1990年P/E為八十倍……。問題係2008及09年上市公司純利仲可能較2007年跌40％至50％，今日的低P/E會否係明日的高P/E?! 1972年耶魯大學心理專家Irving L. Janis曾寫Groupthink一書，可解釋點解大部分專家今年都犯了致命錯誤，此所以我老曹一再強調遠離群眾。好多金融災難皆源自集體思考（當人人想法一樣，即人人都冇思考），2007年明知泡沫形成，但邊個敢睇淡？依家股市漸漸進入便宜區，但邊個敢睇好？股價往往由一個極端走向另一極端。 恒久熊出沒？ 美國最後、最大的泡沫叫地產泡沫，去年已經爆破，令雷曼兄弟垮掉、兩房被託管、AIG陷入破產危機中。Leuthold從事五十年投資業務的專家接受《巴隆氏》周刊訪問時警告，Perma-bear已經出現！人們只知BB熊、媽媽熊、爸爸熊，好少聽過「恒久熊」，因為只在日本股市出現過恒久熊。恒久熊分兩階段：第一階段一如正常熊市，例如2007年第四季經濟見頂回落引發熊市，到今年10月止，唔少人相信已反映未來經濟衰退，未來八至九個月實體經濟衰退，股市應上升。第二階段係因為呢次股市回落破壞了金融體系，產生流動性凍結環境，令牛市無法形成，例如三十年代美國及九十年代日本，令股市進入 Capitulation期（即每次反彈後帶來更大拋售），而令恒久熊出現。聽落真係幾得人驚！10月出現二十九年內最大單月跌市，只有1987年10月跌幅才較呢次大。10月份投資者從美股提走了750億美元（9月份560億美元），道指跌14％、標普跌17％、納指跌18％。全球股市已失去95000 億美元市值。 Happy Halloween。鬼節之後，恐怖片應該落畫啦，跟住係感恩節同聖誕節。恒生指數應由10月27日10676點開始出現a、b、c反彈浪，11月股市反覆向好的機會都幾大。「Get-rich-quick」心態好快又蔓延，將港股（尤其係極度低殘的二線股股價）再度推高，正是結了傷疤忘了痛。上周道指升 10％，係1982年以來升幅最大的一星期，好多時美股全年升幅亦不外如此。1929年道指急跌42％後，亦曾出現大反彈；2007年11月道指回落 42％後，會否一樣出現大反彈？10月11日VIX見103.41，只略低於1987年10月20日股災的172.79，上周五VIX才回落到62.9，係未代表未來日子一如1987年11月一樣，會出現大幅波動？ 10月份金價表現係二十八年內最差。年初至今金價回落14％（單係10月份跌18％）。白銀表現仲差，年初至今跌35％（10月份跌21％）。 澳元、紐元表現亦甚差。10月份澳元兌美元跌15％，見67.38美仙；兌日圓跌21％，見66.28日圓。紐元跌12％，見57.78美仙，係1984年以來最大跌幅；兌日圓跌19％，見57.78日圓。原因係材料價格下跌，令澳元及紐元繼續睇跌。加元10月份跌11％，為1950年來跌幅最大的一個月。原油出口佔加拿大總出口極大比重。上周五一加元只能兌82.88美仙（全周回升6.3％）。歐洲10月份通脹率跌至3.2％（9月份3.6％），估計11 月6日再減息。明年歐洲通脹率相信可低於2％而歐羅利率在明年3月中將見2.5厘，歐羅匯價繼續睇淡。日本央行10月31日決定減息0.2厘，令日圓匯價大幅回落，兌美元一度急挫5％，創1974年以來最大單日跌幅，結束了日圓兌美元近日升至十三年高點、兌歐羅曾見六年半高點的強勢。 掛勾理財產品生意淡薄 日圓強勢告一段落，可見2001年3月以來日本央行首次下調利率的威力，反映日本經濟面臨的通縮威脅不斷加大，亦反映風險偏好急速降溫（de-risk）。全球去槓桿化進度加快，加上資金離開新興市場的趨勢，令道指表現較恒指出色。美元再次被睇好，主因係去槓桿化及找尋避難所的心態上周五又再恢復。上月美元兌日圓回落7％、歐羅兌日圓回落16％，隨住歐羅明年利率走向2.5厘，估計大量資金將回流美元。 雷曼毒債券事件，令曾經風光一時的銀行掛勾理財產品面對嚴厲監管，監管當局已下發通知，要求本港各商業銀行對結構性理財產品進行全面自查。事實上，銀行的掛勾理財產品銷售成績在10月份較8月份減半，睇來掛勾性理財產品仍有一段日子「生意淡薄」，銀行來自呢方面收益大減勢必無法避免。外資銀行或金融機構減少發行亦係原因之一，加上雷曼事件對銀行造成負面影響，而且股市大幅滑落，唔少投資者資金被綁，令明年各銀行純利進一步睇跌。 上周六美國加州Freedom Bank成為今年內第十七間被接管的銀行。依家超過20％美國住宅業主已成為負資產，美國物業市場仍在惡化中。 美國將捨棄小政府大市場政策 美國2007�08年度財政赤字估計超過7500億美元；2008�09年度更大，估計達1萬億美元或等於2008年GDP 7％。下屆總統肯定會致力減少財赤。相信奧巴馬在11月5日宣布大選勝出，由於民主黨控制參眾兩院，共和黨已無力阻止，「小政府、大市場」政策漸被遺棄。 1980年列根總統上台，令美國從政府過分干預經濟中解放出來；二十八年後今天又再返轉頭—即大政府時代自2009年1月21日起又再開始。列根時代透過減稅刺激經濟復甦的時代結束，向富人抽重稅津貼窮人的時代又再開始。Invest correctly, you'll make millions. Make the wrong move. 好易一鋪清袋也。大選後的奧巴馬會否一如希臘神話中的Hercules？Hercules負責清理地獄的馬房（由於唔知幾多年已冇人打理，早已一塌糊塗），最後因工作不力而被罰將大石推上山，但每次大石推上山頂後，又由另一邊碌落山，只有重新再推過。 2003至06年，美國超過2％甚至 3％ GDP增長率來自樓價上升，係美國人將物業加按提款去消費所造成。依家冇了呢方面刺激，美國GDP未來點樣增長？家陣唔係經濟係未陷入衰退的問題，而係點樣令佢復甦？過去十二個月消費者只獲商業銀行貸款890億美元，其中650億美元係信用卡貸款。今年11月起美國商業銀行宣布減少信用卡貸款，因為壞賬率太高（今年第三季達4.1％，去年同期2.5％），未來美國消費者欲增加信用卡貸款去消費亦無能為力矣；加上過去十二個月股市蒸發12萬億美元市值，其中唔少係美國人的退休金，更何況美國富人中有75％係經營小企業，依家處境極之困難。今年第三季起美國經濟已陷入衰退，而復甦則遙遙無期。 奧巴馬上台後，只要唔延長美國減稅方案，明年12月31日止美國股息稅已自然上升20％、資本增值稅由15％上升到20％，上述兩點皆不利明年美股表現。唔少投資者趁2009年未來臨前，在2008年12月31日前減持，只有咁樣才可享受15％資本增值稅，此乃道指10月10日見7882點的背後理由。上周道指被過分拋售引發反彈，能否突破前高點即10月4日9794點？本周可留意。如升破9794點，11月短期可睇好。無論如何，2009年1月21日之後，美國再唔係投資者值得留戀的國家（英國亦一樣）。美股10月10日開始反彈，只因道指過分拋離200天線（11697點），如今向其靠攏而已。 利用匯控與恒指關係觀察熊市 恒生指數又點睇？家陣已拋離250天線（23395點）好多，亦可支持一次大反彈，例如接近或略破50天線（17756點），完成a、b、c反彈浪。另一方面，去年10月開始的下降通道今年9月失守（15500點）後出現大跌【圖】，至10月27日10676點係未見底？我老曹木宰羊。上次熊市結束前，匯控（005）在2002年10月7日見78元後反彈上2002年12月2日92.5元，再回落到2003年4月1日79.5元，唔再創新低，才結束港股上一次熊市。同期恒指2002年10月10日見8772點，反彈至2002年10月3日10246點，再回落2003年4月25日見8331點新低，才結束呢個熊市（即匯控較恒指先一步見底）。利用匯控與恒指之間的關係，即假設上周匯控75元已見底，反彈到100元以下將遇阻力再回落，如明年4月匯控股價仍不低於75元，港股熊市才有機會結束。我老曹上述分析，應可回應大部分人的疑問：10月27日恒指10676點見底未呢？ [ 本帖最後由 羊仔 於 2008-11-6 09:50 編輯 ]

Share this:

火煋人

曹仁超投資者日記:偏高偏低 見仁見智 2008.11.4 11月3日，周一。恒生指數升375.7，收14344.37；成交521億元，最高見14889點，同上阻力15000點好接近。11月期指升256點，收14186點。期指倒掛現象又出現，小心反彈市隨時結束。滬深三百指數跌0.61％，收1653.54。 10月最後一星期，道指總算反彈11.3％，收9325點。雖然係咁，整個10月道指仍跌14.1％，係1998年以來最差一個月。2008年首十個月道指跌29.5％，現水平算便宜？Contango Capital Advisors CEO George Feiger話，睇清楚2009年甚至2010年業績再講。大部分分析員估計，標普五百第四季純利將上升29％，2009年全年升15％，但資深分析員擔心2009年甚至2010年企業純利將走下坡。如2009年標普五百每股獲利70美元（而非一般分析員估計91.41美元），以上周五收市價計，明年P/E十三點七倍，只係過去三十年的平均P/E，唔見得特別偏低。Howard Silverblatt估計，明年標普五百每股獲利只有62.4美元，認為現水平股價非但唔偏低，而且係偏高。換言之，偏低偏高，睇你對2009年企業純利展望而定。如各位相信明年經濟復甦，現價係偏低；如各位認為明年經濟進一步惡化，現價係偏高。如把金融業剔除，標普五百家陣P/E係二十一倍，較過去六十年平均P/E的十七點八二倍高。1975年股市見底時，標普五百平均P/E七點二八倍，1982年最低潮P/E係六點八四倍。 香港零售業在今年「十．一」黃金周檔期，較去年同期下跌二至三成，其中中檔次的商品、衣服及鞋類更係重災區；高價商品的抗跌力相對較大。唔少零售商已開始向業主施壓要求減租。 電腦模擬難預知人性反應 AIG出事，證明風險models雖然在大學模擬電腦上可行，但在真實世界卻失敗。AIG利用呢D風險models去管理4000億美元CDS，結果出事，理由係人心有時理性、有時非理性。至於幾時理性、幾時唔理性，唔係電腦模擬可預知。 太陽陳挑戰我老曹提出的「三七分」（即30％股票、70％現金），佢話點解唔做空軍（拋空）？佢話，現代戰爭中，陸軍已唔重要，因為再唔係打陣地戰，而係依賴空軍。例如在伊拉克戰爭中，贏家係有空中優勢的美軍，因導彈可摧毀任何軍事防衛力量，乜野「三七分」已經冇用。 仲記得《奪寶奇兵》中那個揮舞大刀的武士，把刀舞得出神入化，不過Indiana Jones一拔槍就將佢打瓜！當世界進入隱形戰機時代，請唔好持住架坦克車去參戰（不然打死多過病死）。 本周美國好快就會有新總統，但舊問題一樣存在。至於蜜月期有幾長？木宰羊。我老曹只知道港股已進入a、b、c反彈浪（而非上升浪）。 澳元三個月期利率再跌19個基點，至5.62厘，從呢點睇澳元周二減息半厘機會好大，估計歐羅本周亦減息半厘。印度央行11月1日已減息；港元三個月期利率亦連跌三個交易天，至3.34厘（但9月16日前係2.12厘）。花旗估計，英鎊兌日圓仍有18％下跌空間，重見1995年低位129.37日圓（周一成158.62日圓）。南韓認為，呢次金融大海嘯較1997年嚴重，1997年南韓股市跌42％，南韓圜跌50％；至今韓股跌51％，韓圜跌28％。 2008年7月起各位要搞清楚一件事──美元並冇上升，只係其他貨幣轉弱！上述係Desmond Lachman（American Enterpuse Institute）的睇法。美國有40％次按債券由美國以外國家持有；加上英國房地產市場到2007年年中才回落（美國2006年年中），英國政府為挽救倫敦的大銀行而大量注資；歐洲各銀行持了唔少高風險投資……。上述種種因素引發今年下半年美元強勢（正確D講係其他貨幣弱勢）。美元今年7月起已係King of the Hill！10月份美元兌歐羅升11％（2008年7月至今升22％），唯一較美元強的貨幣係日圓，主因係利差交易拆倉。 明年歐美日同時衰退 日經平均指數今年跌56％，出口股如新力回落68％。日本銀行減息0.2厘，至0.3厘後，未來減息空間十分細。日圓強勢將令日本經濟重陷衰退，美元強勢亦傷害美國企業的海外投資收益，令海外投資變得冇吸引力，引發資金回流美國本土，令澳元、紐元、韓圜、巴西雷阿爾、南非蘭特無一不跌，東歐國家亦面對資金大量流失。明年我地將面對美國、歐洲、日本同時出現衰退，上一次三大經濟體系同時出現衰退係1973至74年。 根據Thomson路透社數據，美國標普五百2008年第三季純利估計已修正為負11.7％（4月1日估計上升17.3％，7月1日估計上升12.6％，10月1日修正為負4.3％，依家再修正為負11.7％），係2002年第二季純利復甦以來首次連續五季純利負增長。展望第四季，估計純利上升28.8％（7月1日估計升59.3％，10月1日改為46.7％；上周35.2％，現再修正為28.8％）。以第四季純利估計為基礎，未來標普五百平均P/E十一點一倍（過去五十二星期十三點三倍）。今年第三季美國GDP下降0.3％，估計第四季下降1％而確認衰退。消費信心跌至38，係十五年內最差；10月份失業率6.3％，係十四年內最高。聯儲局10月8日及29日分別減息半厘，似乎幫助唔大。 全球各個經濟體的中央銀行聯合行動，同時降低利率，作用係點？中歐國際工商學院教授許小年認為，減息行動（包括中國人民銀行）都係為了向全球金融市場送出一個訊號，就係在百年一遇的金融海嘯中，世界各國政府較以往更好地去協調政策，以緩和家陣震盪對國際金融體系的衝擊，穩定投資者信心大於實際作用。最後各國政府將不得不推出龐大財政救援計劃來消除不良資產，跟住係討論點樣加強監管，最後才談得上復甦。依家距離復甦日子仍十分遠！ 美經濟唔會係1929年翻版 展望未來，美國經濟唔會係1929年翻版。1924至29年9月道指上升380％，2003年4月至07年10月道指只上升91％。The bigger the party, the longer it takes to clear up the mess。2003年4月至07年10月美股party冇1924至29年那個大，未來跌幅亦唔及1929至32年咁深。但金融市場仍有55萬億美元CDS要清理，將令2009年道指升幅有限；加上2008年9月止每五個美國小業主中便有一個負資產，睇落明年美股可能幾悶，擔心日式經濟會在美國出現。2001年起聯儲局減息、白宮減稅，再透過CDS市場為美國金融業製造一個前所未見咁寬鬆的信貸市場，樓市出現泡沫，刺激2003年美國經濟復甦；美國人大量消費，又帶動全球經濟繁榮。2006年，美國樓價達到一般人無法負擔的水平，2006年下半年起美國樓價開始回落，2007年引發次按危機。最初好少人睇到問題的嚴重性，依家人人都知道一個GDP 80％來自消費的美國已進入減少消費期。 柏克萊銀行計劃出售70.5億英鎊的股份畀海灣投資機構（一旦成事該機構將佔柏克萊銀行32％股權），上周五柏克萊股價回落13％，見178.9便士。上述代價有40.5億英鎊發行可換股債券，30億英鎊係優先股。 法國第三大銀行法興第三季純利下跌48％，至1.83億歐羅（一年前11.2億歐羅），因撥備14億歐羅（其中4.47億歐羅同雷曼兄弟有關）；上月股價跌32％，10月29日股價一度見十年新低。 西班牙第三季GDP出現負增長，係十五年內首次下跌0.2％（或較去年第三季下跌0.9％），相信歐羅區經濟正進入收縮期。 對亞洲區而言，呢場金融風暴較1997年7月亞洲金融的風暴影響細，因正面吹襲的係美國唔係亞洲。1998年來自歐美的需求令亞太區出口興旺，經濟迅速復甦。但呢次唔同，歐美經濟必須從金融溶解（financial meltdown）中復甦過來，極唔容易。換言之，呢場風暴對亞洲區的影響雖然唔及1997年7月那場大，但復甦卻遙遙無期。 悔單情況打擊玩具商 1997年7月亞洲金融風暴發生期間，亞洲區貨幣紛紛貶值；人民幣雖不貶值，但國家提供17％出口退稅幫助出口商，形成中國出口迅速復甦，帶動GDP增長。呢次貶值的貨幣何止亞洲區國家？連歐羅亦貶值；但人民幣卻升值，更逐步減少出口退稅、收緊環保條例、推出新勞動法。中國（尤其珠三角地區）出口明年點樣恢復高增長？中華廠商會副會長兼內地事務委員會主席李秀恒認為，情況仍在惡化而非已開始改善。南韓、印度、東南亞國家貨幣紛紛貶值後，中國貨明年出口競爭力係點？經濟何時復甦？ 再過一個多月就係聖誕，往年呢D時候正在趕落貨，但今年聖誕禮品訂單減少三分一，唔少更「悔單」臨時取消。影響最大係玩具業，「悔單」約佔總訂單5%至8％；部分廠商已北上俄羅斯，為「悔單」的產品搵出路，希望及時把產品賣掉。 克拉斯穆爾佩佐夫博士認為，中國經濟亦擺脫不了衰退，但衰退過後，中國將漸漸成為世界三大經濟體系之一，與美國、歐洲鼎足三立。 中國股市從2007年的6100多點跌至最近的1600多點，初期上升主要係流動性過剩推高股價，但之後流動性變得不足，造成中國股市跌幅咁深。中國人行太遲抽緊銀根，亦太遲向經濟注入足夠流動性，造成中國股市狂升暴跌。例如2005年7月21日起人民幣開始升值，每天進入中國的資金多達20多億美元（折合逾百億人民幣），呢D資金都投入股市、房市，造成流動性過剩嚴重。到了2007年，中國又推出從緊貨幣政策，中國式窗口指導額度制管理推出後，2007年首九個半月市場已用了3.12萬億元，即最後兩個多月只有800億元。去年10月起流動性幾乎全部被綁住，銀行只進不出（或出得好少）。牛市有如一架上衝的飛機，發動機一下子停下來，便只有往下沉，而且一沉就沉了一年，股市失去七十幾巴仙市值。到今年最後一個半月，內地才下調儲備金率兩次、利率下降三次，提高了三千四百八十六種商品的出口退稅率。不過，下沉中的飛機唔可以一下子回升，何況外國經濟亦步入衰退期。 瘦死的駱駝比馬大 中國已動用財力回購在港上市的H股，令香港股票上周二開始止跌回升，透過刺激H股股價上升穩定A股股價，A股市場尋底已開始。同美國唔同，美國股市下跌係因為經濟發展已到強弩之末，呢場金融危機將導致經濟危機，美國政府動用了7000億美元救市，估計可穩定二至四個月，之後美國政府需要再取多7000億美元救市，估計再可穩定一至三個月，直到連推出7000億美元救市計劃都起唔到作用為止，情況有如1990年日本。反之，中國在呢場金融危機中，雖然出口增長率減少，但內需卻逐漸發展起來，最終令中國經濟可獨當一面，與美國、歐盟形成三分天下局面。 全國人大常委、財經委副主任吳曉靈認為，中國經濟正步入一個經濟周期下行區，就係中國GDP增長率由過去10％以上增長轉為8％甚至7％以下，但在全世界仍算係高速度，一旦適應了「中速跑」，中國經濟仍可以好起來。反而美國經濟在金融風暴後失業率不斷上升，估計由今年9月份6.3％上升到明年底的10％。 中產階級的日子同以前唔再一樣，例如不能再住三百方米的郊區大房、不能每天開高耗油的汽車上班。為應付高油價，佢地必須放棄大車，最後要放棄郊區大房子，因個人收入出現負增長，加上物價上升。事實上，過去十五年美國居民已開始回流大都市，金融危機只係加速此回流現象，令大都市人口不斷膨脹、郊區人口下降。年收入5萬至10萬美元的中等收入家庭中約40％感到須搬回大城市居住，收入更高的一些階層有16.7％感到有此需要。不過，瘦死的駱駝仍較馬大，美國中產階級即使節衣縮食後的開支，相較中國人而言仍十分奢侈。

Share this:

火煋人

曹仁超投資者日記:美國政策向左轉 2008.11.5 11月4日，周二。恒生指數升39.97，收14384.34；成交452.5億元。11月期指升223點，收14400點。 滬深三百今天跌1.57％，收1627.76。神華跌4.8％、萬科跌7.1％、中煤能源跌4.2％，海通證券跌停板。滬深三百指數今年內已下跌70％，係亞洲區表現最差的股市。 本港10月份住宅銷售連續四個月下降，較去年同期下降63％；單位換手率下降58.1％，只有四千七百一十九個單位。中原地產助理研究總監估計11月份仲差D。 10月紐約商業樓成交下跌61％，係2004年以來最差的一個月，估計寫字樓價格明年進一步下跌。 絕對權力令人絕對腐敗 花旗推介中鐵建（1186），估計今年每股獲利36.5仙，目標價12.1元。和電國際（2332）估計今年每股獲利28仙，減少4％，P/E三十倍，目標價10.2元。 麥格理在《2007年房地產市場前景報告》認為，雖然明年亞洲房地產市場前景欠佳，但證券市場的估值已消化明年資產價格及租金水平將大幅下滑的因素（炒定先也）。雖然估計明年零售物業租金將下降10%至15％、辦公室物業價格回落20%至30％、住宅跌價15%至20％，但地產股如恒隆地產（101）、長實（001）、領匯（823）、華潤置地（1109）、中國海外（688）、鷹君（041）、希慎（014）、嘉里建設（683）、信置（083）等已值得投資。乾貨輪租金指數跌71.9％，擔心船東收益陷入虧損。波羅的海乾貨輪租金指數由10月初的3025點急滑到10月底的851點，跌幅之大，令那D冇長期租約保護的船東好快陷入財務危機，家陣已經好難為新船搵租約。 照美國最新選情睇，11月4日奧巴馬可望成為美國新總統；同時，民主黨將成為國會大多數，即美國政策將向「左」轉。咁會帶來乜野改變？人們明白「絕對權力令人絕對腐敗」，為阻止上述情況出現，美國人較喜歡總統同國會由唔同黨派控制，例如民主黨總統必須面對共和黨控制的國會，以達致check and balance。擔心今次總統及國會皆由民主黨控制，左傾的自由民主思想將令右傾的共和黨無力招架（如民主黨在參議院取得六十票的話），只餘下高院成為唯一制衡力量。 情況有D似1932年羅斯福總統時代，高院無法阻止羅斯福在1933年3月5日下令關閉全國銀行以阻止擠提（事後令二千四百三十間銀行從此無法再開門），以及在4月4日宣布持有黃金為非法，美元唔再兌換黃金。總統及國會同在一黨控制下，高院係無力阻止總統違憲的。奧巴馬可能係美國首位黑人總統而其權力不受制衡！最近部分基督教經營的電台因唔准別人在大氣電波評論同性戀，奧巴馬已在互聯網上話呢D將不獲續牌。記者們形容奧巴馬係 secretive（守口如瓶者）、authoritarian（信奉權力者或權威主義）及control freak（凡事皆想控制者）。佢的政治理想係重新分配財富，分配財富到底係社會主義式、共產主義式、法西斯式或福利國家自由主義式？奧巴馬只係話「改變」，但冇具體資料讓人們知道佢想點改法。 六十年代甘總統向貧窮宣戰，其後稅收52％用作補貼貧窮，令到美國經濟由1966年起停滯不前，典型好心做壞事。 奧巴馬話只會向富人抽稅。何謂富人？到底係年收入25萬美元以上抑或年收入10萬美元以上？ 根據過去慣性，新總統上任前六十日，股市通常上升（即今年11月及12月美股上升機會較大），呢段日子叫做蜜月期。但以羅斯福為例，1932年11月大選勝利當天道指68點，1933年2月佢正式上任時指數50.16，大跌28.7％。 馬英九發緊夢 仲記得台灣今年選舉結果嗎？我老曹曾跑去台灣睇選舉，回港後第一篇文章係我老曹唔睇好馬英九上台後的台灣股市，不幸全中！至今兩岸政策無的放矢者多，有所作為者少。馬英九希望政經分開（即中國大陸畀台灣經濟好處，同時唔干涉台灣政治），可以講係發夢。馬英九希望台北成為區域金融中心，係發緊另一個夢（至今資金進出台灣仍有賴地下錢莊）。如今希望大陸同胞去台灣已經批出，就係每天一百七十三名大陸遊客訪台（香港每年有四千萬大陸客）；至於十二大基建，台灣政府財政赤字咁龐大，點樣上馬？ 今天的問題已經唔係會否出現衰退，而係呢個衰退到底係1929年式抑或1990年日式？《華爾街日報》報道，美國仲有一千八百間金融機構需要政府bailout。聯儲局策略制定者Jeffrey Lacker承認，美國已進入較高通脹的衰退期；至於衰退有幾深、有幾長仲未肯定，亦唔知道會否出現一個garden variety式衰退，只知呢個衰退同過去唔同。 自從1954年至今，美國衰退平均十七個月；呢次百年難得一遇的金融海嘯，會否一如1929年那次先衰四年（1929至33年），之後再出現四年停滯不前，然後再衰十七個月（1937至38年），前後共九年才完成？ 至於日式衰退，1990年起至今共十八年，仲係時好時壞。過去香港亦曾出現過一次garden variety式衰退：1997至98年急跌，1998年第四季起回升至2000年第一季，唔少人以為衰退已過去，然後又回落三年至2003年第二季，即既唔係V形、U形，甚至唔係L形，而係W形衰退。 中國明年GDP增長或低至5% 根據香港工業總會估計，中國珠三角一帶在明年1月前將有一萬七千五百間企業申請破產。中國銀行副行長朱民在第二屆中國銀行家高峰論壇上指出，當前中國工業企業利潤下降速度非常厲害，財政收入增幅更跌至 10％左右。歐洲、美國同日本出口比重佔整個中國出口71％，呢D地區經濟出現衰退，對中國出口影響好大。至於中國房地產已佔固定資產總投資26.2％，依家下滑速度亦非常厲害。以上海為例，去年銷售2462億元，今年至10月止只售出1200億元。最近政府推出好多措施，長遠有幫助，但對短期內抑制整個市場下滑幫助唔大。 中歐國際工商學院經濟學及金融學教授許小年在第二屆中國銀行家高峰論壇上認為，中國若轉為內需增長模式，明年GDP增長率可能降至7％甚至5％，因中國人消費需求受收入制約，在收入無法大升下，消費增長有限。過去三十年GDP增長率平均達10％以上恐怕再難維持，甚至7％增速亦難長期保持，未來可能只有5％。中國GDP增長三大火車頭──外需引擎已熄火，國內投資在減速，只剩下內需呢個引擎，點樣維持GDP快速增長？今年中國對美國出口扣除通脹增長率已接近零（2007年20％），明年扣除通脹率更係負增長。歐洲情況好D，但明年隨著歐羅匯價回落，亦唔見得樂觀。外貿呢個引擎已熄火，固定投資所佔比重去年已超過GDP 40％，今年增長率已由年初20％下跌到8月份的15％，依家仍然下滑緊。唯一增長的只有居民消費，去年佔GDP 35％，單靠消費增長，明年中國GDP增長率有幾多？更何況面對出口增長率及固定資產投資增長率放緩下，明年消費增長率可上升幾多？一旦中國GDP增長率低於7％，新增勞動人口點樣吸收？ 內地樓價料呈L形 財政部公布，11月1日起對個人首次購買九十平方米以下普通住房，契稅率改為 1％，並暫免徵收印花稅及土地增值稅。中國社科院金融研究所研究員易憲容認為，股市已將中國人的買房欲打得落花流水，在股市下跌80％後，你仲有蚊年買房咩？中國房地產指數系統副主任、中國研究院副院長陳晟話，「病來如山倒，病去如抽絲」，即使政策生效仍需要一大段時間累積，短期樓市調整格局難以扭轉，估計未來樓價呈現L形走勢，有排未好得番。 花旗最近探訪深圳、廣州、成都及重慶，認為深圳樓價距離見底仍遠，9月減價15%至20％後銷量未見改善；廣州情況亦差唔多。成都已略為回升，由地震打擊中恢復過來；重慶今年首九個月GDP升幅15.3％，估計未來仍可保持高增長。花旗比較上睇好成都及重慶、睇淡深圳及廣州。 謝國忠認為，中國經濟明年可能出現硬著陸（1998年中國GDP增長率只有7.8％，1999年7.1％）。如2009年GDP增長率少於7％，將係1998年經濟模式歷史重演。 1980 年1月中央機關刊物《紅旗》雜誌一篇署名蘇星的文章〈怎樣使住宅問題解決得快些？〉，提出中國住宅開始走商品化道路，最先係香港妙麗集團與特區房地產公司合作，深圳出地、對方出錢，共同開發羅湖小區。一年後中國第一個準商品房──東湖麗苑建成銷售，可以話係中國住房商品化的起點。1985年1月全國住房租金改革領導小組成立，其後升格為國務院住房制度改革領導小組。1988年第一次全國住房制度改革工作會議召開，宣布「房改」正式納入中央和地方改革計劃，分期、分批推行。同年4月鄧小平登上北京城前三門一座高樓，發表了以下觀點：不但新房子可以出售，老房子也可以出售；可以一次付款，也可以分期付款。住宅出售後，要按房價調整房租，使人們考慮到買房合算。同年中國第一幅土地以拍賣方式出售，就係日後建成的深圳東曉花園，單位每平方米1600元人民幣。其後「房改」加入唔少條文，但大方向不離鄧小平當年所發表的意見。 「房改」到底係潘多拉的魔盒，抑或為經濟帶來繁榮、居住條件改善的功臣？不但在中國引起爭論，在全球亦有好多見解。例如1997年第三季到2003年第二季在香港引發的負資產效應；1990年至今東京樓價下跌70％；2006年美國樓價回落，引發2007年8月次按危機，演變成今年的金融海嘯。歐洲唔少國家為防止住房炒賣，在房屋易手方面管制十分嚴格，例如葡萄牙及德國；有D又好寬鬆，例如英國（接近毫無限制）；有D又介乎兩者之間，例如法國。每個國家在呢方面都有唔同法例，例如美國有資本升值稅（高達35％，加拿大更高達 45％、澳洲28％），有D國家又限制外國人擁有物業（有D只可購買大廈式住宅，有D住滿一段日子才可購買）。有D國家物業在業主死後，子女自動成為新業主，有D國家卻收歸國有。點解咁複雜？皆因樓價升降所產生的財富效應威力好大。樓價除視乎供求因素、當地人均收入外，當地政府政策影響亦十分重要。例如 1985年4月1日生效的「每年賣地五十公頃」政策，便不斷推高本港樓價；1997年7月1日特區政府的「八萬五房屋政策」，又令樓價急瀉，直到2003 年9月推出「孫九招」才叫做穩定下來。其他如銀行的樓按態度，1973年前本港銀行係唔做樓花按揭的，只按樓價（已入伙）50％，其後才逐步降至30％首期（或以下）；最初只有七年分期付款，然後十五年，1985年起才改為三十年。點解咁多法例針對房地產？皆因樓價太高，大部分人吃不消；樓價唔升，又無法產生財富效應，令經濟增長率較慢（例如馬來西亞）。 按世界標準，每月供樓支出佔中產家庭收入25％至50％便算合理。以2007年香港人數收入25390美元計，一個普通家庭兩口子年收入52780美元（396000港元），每月供樓開支應係8251至16503元之間便算合理。高利率會削弱普通家庭的供樓能力，此乃樓價要回落的理由；在低利率期又會提升普通家庭的供樓能力，刺激樓價上升，其他如經濟景氣等。一般人亦可按上述標準，即供樓開支只佔每月收入25％不妨買樓，一旦佔每月收入50％（或以上）便不應買樓矣。 [ 本帖最後由 羊仔 於 2008-11-6 10:02 編輯 ]

Share this:

火煋人

曹仁超投資者日記:小心奧巴馬震盪 2008.11.6 11月5日，周三。恒生指數升455.82，收14840.16；成交633.7億元。11月期指升373點，收14773點，期指倒掛現象又出現。恒指由10月27日至今已上升35％，小心反彈市結束。由舊年10月從高往下望，好易感到股票便宜。但隨住企業收入減少，純利會否亦下降？如企業純利下降，股價又點能夠上升？如我地相信由1982年開始的超級大牛市在去年10月結束，我地便不大肯定股票現價算係便宜抑或昂貴，亦不能肯定10月份股市已見底，因為股市冇過去只有將來。 今天利豐（494）升8.8％、中海油（883）升5.8％、電盈（008）升27％、富士康（2038）升3.2％、中銀香港（2388）升17％、東亞（023）升10％，藍籌股普遍上升。 滬深三百指數上升3.91％，見1691.42，主要受外圍刺激造好。 股市同總統大選關係只有兩周 奧巴馬勝出的理由唔係政綱好，而係美國經濟實在太差，尤其係股市。呢點可由雷曼兄弟破產後奧巴馬民望急升證明，如大選在2007年舉行，奧巴馬一定輸……。美國大選的結果，不但奧巴馬勝出，同時民主黨控制兩院，出現總統、兩院由一黨控制的局面，好易走向獨裁政治，令美國大左轉。小心「奧巴馬震盪」出現！各位信唔信奧巴馬上台後可改變美國樓價同企業純利方向？ 情況有如今年4月馬英九上台時曾引起一連串樂觀情緒，六個月後台灣股市大跌。大氣候、小氣候不因人的主觀願望而改變。由1900年至今，過去百幾年歷史證明股市變化同總統大選的關係只有兩個星期，有D在大選前出現，有D在大選後出現，一旦超過兩個星期，一切恢復原貌。過去二十七次選舉中，每次由共和黨轉為民主黨，股市在兩個星期內平均升幅為零或-1％，小心美股開始回落！ 財長保爾森計劃向GE旗下CIT集團提供Bailout，係首次向非銀行金融機構提供擔保，十分危險，因為呢類機構可能持了唔少有毒債券。CIT係美國最大商業貸款者，今年已失去四分三市值，並連續六季出現虧損，而須向畢非德求助。CIT過去的貸款對象係中小企，由於中小企近年出現巨大虧損，拖累CIT業績。另一間GE Capital（由Fairfield與GE合組而成，係美國最大商業票據發行機構），仲有GE Money Bank Inc.及GE Capital Financial Inc.，都係工業界最大貸款者，截至9月30日止貸出款項共335億美元（部分受美國FDIC保障）。財長決定如GE出事亦Bailout，你點睇？依家呢類機構壞賬率3％，估計明年可上升至8％。上兩次衰退高峰期壞賬率超過10％，呢次壞賬率會有幾高？ 奧巴馬上台亦有一大優點，就係佢可以放手大幹，反正未來一、兩年衰野都可賴係上手總統留低，典型補鑊法（將原先冇咁爛的鑊的缺口進一步搞爛D才開始補）。奧巴馬可以在2009及2010年將美國經濟搞到一塌糊塗，在2011年才開始搞好，都仍有條件連任。估計部分金融機構高層可能被控告，甚至要坐監以洩民憤。殊仔政權11月5日起變成跛腳鴨，一切已無能為力。咁搞落去，遲早動搖全球投資者對美元信心，引發美元拋售潮（令黃金進入牛市第三期），到時先至恐怖。 根據奧巴馬的計劃，美國六千三百萬（富人）或佔交稅人士44％，在未來十年將失去大部分稅務優惠，年收入75000元到150000美元家庭（兩口子計）失去500美元稅務優惠、子女大學稅務優惠4000美元、樓按利息10％稅務優惠、撥錢入IRA 1000美元優惠。即係話，每個打工仔（年收入37500美元以上）明年稅務優惠將由家陣的555美元一年降至175美元，有子女攻讀大學者稅務優惠由1110美元降至175美元（奧巴馬上台後唔再延長稅務優惠已經做得到）。至於5％富人（依家交美國60.14％入息稅者）將面對龐大稅務壓力，包括資本升值稅、股息稅升上25％。 大選後美國愈來愈多限制 奧巴馬獲勝，代表全球同情窮人者的勝利。1982年美國透過貨幣政策一再阻止衰退出現；到了2008年，雖然透過大幅減息及退稅，亦無法阻止衰退降臨。奧巴馬勝出後計劃推出的政策，將阻止未來經濟繁榮來臨。2008年已出現少見現金存款跑贏各種投資，Cash is King時代係未已開始？例如中國生產商正面臨汰弱留強，將有數百萬計工人失業。佢地會靜靜地返鄉下耕田，還是令各城市治安惡化？美國消費出現十七年來首次下跌而且愈跌愈急。我地相信市場失去效率，而寄望公務員（或官）去挽救資本主義？大選後的美國將愈來愈多限制，以保護本地勞工。保護貿易主義正在抬頭，中國成為首要攻擊對象，因為美國人既無錢購買中國貨，政府亦限制中國貨入口，可能因此將世界經濟推向大衰退！Tax the rich亦將令美國人減少投資，導致美國經濟進入萎縮期。 惠譽估計，過去五年全球GDP增長率平均3.5％的時刻結束，2009年減弱到只有1％。信貸收縮、消費緊縮、企業投資減少，尤其係美國、歐洲及日本，三大第一世界的國家股市崩潰。貧窮國家亦因商品價格回落而受影響，雖然各國央行大幅減息，但作用極之有限。 達拉斯聯儲銀行總裁費希爾認為，美國信貸情況咁緊，明年美國GDP將出現零增長，但唔會出現通縮。CPI出現短期負增長唔奇（例如幾個月），全年CPI應該仍係正增長；利率好快會跌至半厘。 澳元周二再減息0.75厘，至5.25厘；澳洲開始進入自1990年初衰退後的另一段衰退期。澳元兌67美仙，係1983年浮動以來接近最低價，相信澳元仍有下跌空間，唔會因日圓減息0.2厘而停止。 英國近年經濟繁榮有賴全球金融市場，但國際金融市場迅速惡化，英國（尤其倫敦）前景令人擔心。在倫敦的花旗銀行估計，明年英國GDP將收縮1％，依家英鎊仍有4.5厘，估計未來將大幅減息去壓低英鎊匯價刺激消費。10月24日英鎊已跌至1.53美元（年初2.1美元），未來可能減稅。總之英國前景都幾麻煩。 馬來西亞明年GDP增長率改為3.5％，係2001年以來最低（前估計5.4％），財赤佔GDP 4.8％（前估計3.6％），因油價同棕櫚油跌價。馬來西亞出口主力係電子產品及原材料，而兩者前景皆唔樂觀。 Libor三個月利率雖然降至2.71厘（10月10日4.82厘），因全球政府共動用3萬億美元注入銀行及金融體系，令Libor回落，但有85％美國銀行過去三個月仍在收緊信貸，為1991年以來最緊，即利率雖然下降但更難借到錢。Libor關係住全球銀行及金融機構拆放的資金，涉及交易額達360萬億美元，並唔受任何國家監管。雖然各國央行注資可令利率下降，卻不能令信貸放鬆；信貸收緊反映面對的風險正在上升。 10月13日《財富》雜誌話有55萬億美元CDS影響全球53萬億美元GDP，家陣呢55萬億美元CDS市場在度迅速收縮，所產生的虧損入2008及09年賬。短期全球經濟仍無法擺脫信貸收縮的影響。 JP摩根大通、UBS及皇家蘇格蘭銀行（全球三大銀行）估計，明年全球金融危機進一步惡化，最樂觀估計復甦要到2010年才出現。 凱恩斯理論有錯誤之處 好多人把三十年代開始的美國經濟復甦歸功於凱恩斯。七十年代芝加哥大學研究結果得出結論，美國三十年代開始的經濟復甦，與凱恩斯理論無關！凱恩斯在1936年General Theory一書中認為，價格下跌由投資情緒改變引發（例如股市及樓價），而令商界投資減少，引發失業率上升，帶來經濟衰退。不過，政府可透過增加貨幣改變人們對資產及房價未來回報的預期，而重新刺激資產價格上升，帶動商界投資回升，失業率因此下降，經濟恢復繁榮。凱恩斯假設消費需求推動經濟向上，帶來就業率上升，因此政府應鼓勵消費、刺激企業增產、帶動就業，達致經濟繁榮。 據芝加哥大學研究所得，呢招在封閉社會可能可行，但在開放社會只會帶來入口上升、貨幣貶值，最終令利率上升，反過來壓抑資產價格回落及實質工資下降。七十年代就係最明顯例子。 最近一年，貝南奇不斷增加貨幣供應，一樣無法阻止樓價及股市回落。凱恩斯在暮年同佢的朋友Friedrich Hayek講，佢計劃重整自己的理論，修正過去錯誤，並同意創意（innovation）先至係創造財富的根源。政府的介入只會限制創意及降低創意質素，帶來經濟衰退；因為個人一定較政府更了解自己的需要，企業一定較政府更會管理資源，小政府一定較管制多多的大政府好，市場經濟一定較管制經濟好。只係過分自由才會帶來狂野，社會需要的係有彈性、恰如其分的監管，讓創意發揮最大功能，而不致引發金融溶解。 金融創新價值不應否定 1987年10月股災後，香港社會上唔少人士提出關閉期交所，當年我老曹大力反對，理由係期指交易有其存在功能，我地唔應該因為期交所監管不力而關掉佢。今天回望，香港如果冇期交所協助，香港國際金融中心地位可以建立咩？估唔到今天，當衍生產品出事時，又聽到呢類保守而智慧有限者的聲音。金融海嘯的出現唔係衍生產品本身有問題，而係政府缺乏監管。這有如冇交通規則之下，任由汽車在馬路上橫衝直撞的道理一樣，如因此否定汽車的功能，係未食古不化？銀行發展創新產品不但方向正確，而且應獲政府鼓勵及支持而非打壓，只係政府應制定有關法例去監管，而非愛理不理。 鐵娘子同列根相信佛利民的主張係對的，佛利民亦反對不受監管的資本主義。甚至克仔、貝理雅上任後，亦繼續跟隨列根及鐵娘子的路線，同時令九十年代及二十一世紀的英國及美國經濟繼續繁榮。人類不能因飛機失事而廢除飛機，而應在失事後搵出失事根源，改良飛機性能，令乘搭飛機變得更安全。同樣理由，衍生產品出問題後，應諗辦法改良而非全盤否定其價值。冇金融項目上的創新，何來1982年至今的經濟繁榮？ 第二次世界大戰後，德國Ludwig Erhard提出，在重建德國經濟的同時，亦要求企業對社會有更多責任，成為近年德國經濟繁榮的奠基者。不過，東、西德合併後，德國經濟增長進入放緩期，部分理由係西德企業須對東德負上社會責任，而令純利不前。德國2007年人均收入33800美元，仍未超過美國人均收入41640美元，反映要求企業承擔更多社會責任代價，可減慢企業賺錢的增長率。當企業負上社會責任，自然減少對利潤追求。Social Market Economy可否改良今天的資本主義？極富爭議性！ 奧巴馬獲選後，再唔係克仔式走中間路線，即加入「有民主黨特色的列根主義」。1992年佛利民的主張仍係主流，但今天在金融海嘯下早已人心思變，自由放任主義（Laissez-faire）人人知道唔可行，但同時要小心過猶不及所帶來的惡果。奧巴馬上台，係未噩夢的開始？

Share this:

火煋人

曹仁超投資者日記:Bailout與否俱有後遺症 2008.11.7 11月6日，周四。恒生指數跌1050.12，收13790.04；成交482.5億元。11月期指跌1043點，收13730點，期指仍然倒掛。滬深三百指數跌2.46％，收1649.78。 英倫銀行大手減息1.5厘，歐洲央行則減半厘，睇來英國同歐洲經濟俱杰過鑊粥也。 Denmark Lowers Benchmark Rate to 5%, Tracking ECB Cut (Update1) 今天國泰航空（293）跌14％，見8.08元；碧桂園（2007）跌16％，見1.22元；大新金融（440）跌19％，見17.88元；中遠太平洋（1199）跌16％，見5.9元；洛陽鉬業（3993）跌9.8％，見2.66元。中芯國際（981）中途停牌，公布發行新股，停牌前報0.155元。 窮則變未必變則通 香港消費者信心跌至四年內最低，只有88點（上半年109點），因今年恒指下跌逾半，加上10月份住宅銷售減少58.1％，創九年來最大跌幅。 瑞信董事總經理陶冬話，中國政府最好的救市方法就係讓全國房價下跌30%，成交量才會明顯上升。家陣成交量平均按年下跌40%至50%，國內大多數城市房屋庫存達十四個月，在咁的情況下，內地樓市又點樣好起來？ 國都證券房地產行業研究員鄒文軍表示，明年房價再下跌10%至15%係有可能的，即使政府再減息，都係改變唔到房產下行的趨勢。 中國社科院金融研究員易憲容認為，房地產市場調整只係開始，在房價回歸理性前，調整之路仍十分漫長；房價跌得愈快，調整日子愈短。 紐約Depository Trust and Clearing Corp研究顯示，AIG、MBIA、Ambac Financial等出事的理由係因為唔公布唔受監管的CDS業務（例如AIG去年8月才宣布持有4400億美元CDS，9月份已進入破產邊緣）。依家市值已降至47萬億美元的CDS市場，到底仲會產生幾多虧損？木宰羊。雷曼、華盛頓互惠、冰島銀行的虧損，有90％同CDS有關。 花旗推介合生創展（754），估計今年每股獲利1.15元，減少18.8％，P/E三倍，目標價9.87元。希慎興業（014）估計今年每股獲利93仙，升9.7％，P/E十三點五倍，目標價17.42元。 美國大選結束，情況一如1932年11月羅斯福總統（當選第一天股市便下跌），並冇蜜月期；但會否一如羅斯福當選時的情況，股市跌至佢上任時的2月才見底？當年道指由68點跌到50點，跌幅26.4％。如歷史重演，道指將由周三9654點下跌2546點，在7100點才企穩？上述純屬我老曹猜測，毫無數據支持。「Change」係奧巴馬的口號；所謂窮則變，係未變則通又係另一回事。 呢次出現blood in the street, but trouble in the market. 今天美國的情況有如第二次世界大戰後的英國，過去支配世界經濟、政治及軍事力量的地位隨住1946年來臨而漸走下坡。所有帝國在盛極之後都因軍費負擔日重而令經濟上無法負擔，最後債台高築。1946年美國取代英國，2008年相信世界走向三分天下──即美國、歐盟同中國。美國依家的最佳學習對象可能係 1990年至今的日本（點樣盛極而衰）！ 去年10月起美股在可見將來都係有反彈冇牛市。十八年後今天，日經平均指數失去72％市值、土地失去81％價值，呢D種叫做「資產負債表衰退」而非「商業周期」。銀行因股東資金減少（虧損）而被迫收緊信貸，企業借唔到錢，又點樣擴充？即使1998至 2005年零利率時期，企業面對低利率、緊信貸，一樣死火。政府為bailout各大銀行而令流動性崩潰，投資者只有拋售股票及物業套現去減債，以逃避破產命運。日本由1990至2002年十二年內失去15萬億美元資本（或等於日本三年GDP）；2007年美國GDP 14萬億美元，未來失去的資本會否高達42萬億美元？上述情況「無法改變」！ 五年揮霍十年清還 2003年起美國人進入冇明天式消費，五年揮霍必須十年時間才能清還。美國2008年才開始「窮則變」，同「變則通」距離仍很遠。香港人1995至97年三年揮霍，亦付出六年衰退去支付。 美國70％選民投奧巴馬一票，目的只係顯示對布殊的不滿，次按危機浮現、信貸壓碎、樓價下跌、股市出現熊市等等都係理由，而非因為奧巴馬係黑人。如奧巴馬任內搞唔好經濟，休想連任。美國人祈求經濟救世主降臨，由五年股市低點拯救美國股民，不成功便成仁，奧巴馬將成為美國人口中的bastard！ 美股去年11月起回落，經濟今年7月起走下坡，估計一直伸延到明年。由於消費佔美國GDP三分二，近期正迅速下滑；製造業方面如通用汽車10月份銷售額下跌 45％，9月份失業率達6.1％。奧巴馬接收的係一個5000億財赤（估計2008�09年度可達1萬億美元）的美國，奧巴馬有冇錢去改善美國醫療、教育、基建及環保？雖然資本增值稅由15％上升到28％，但2008年又有邊個咁威有資本增值？股息稅上升，又將進一步壓抑股價，令美股大跌。美國經濟肯定未到破曉時分。 You can't control the market, please control your portfolio. 如你投資組合內冇茄殊，都幾令人擔心。在2007年10月仍採取buy and hold，有如用穴居人的智慧在現代社會生活。 10月份美國ISM製造業指數見38.9（數字一旦低於41，代表進入衰退），係1982年以來最低；10月份Senior Loan Officer Opinion Survey（SLOOS）指出銀行信貸方面極之緊絀，兩者皆反映未來經濟陷入衰退。 銀行股係early cycle stocks（大市未見底，銀行股先見底；例如2002年10月匯豐見底，恒生指數2003年4月才見底）。假設今年10月匯豐75元係底部，恒指亦要到明年第一、二季才見底，急乜野？關鍵在銀行信貸，而唔係邊個做總統去決定股市方向。依家倫敦三個月Libor係2.71厘，雖然較10月10日4.8厘回落，但仍較聯邦基金利率的1厘高好多，代表銀根仍緊。 日本銀行減息0.2厘，無法阻止日圓利差交易拆倉。今年日圓兌美元上升14％、兌歐羅上升29％，估計未來將由98.02升上90日圓兌1美元，甚至80日圓兌1美元（1995年4月19日曾見79.75日圓兌1美元。當年我老曹去東京，發現成間酒店得二十二個客，我老曹與家人、外母已佔六個，通街空的士冇人搭，因此回港後決定沽售香港的物業，轉為投資倫敦）。如日圓重見80兌1美元，對日本經濟而言將係另一場災難。 政府多數低估bailout代價 自從英國政府推出bailout方案，令倫敦股市一度上升後， bailout已成為大部分投資者最歡迎的方案。翻查歷史，bailout並非乜野新方案，早在美國政府成立初期，首任財長Alexander Hamilton曾經向一間銀行提出發債畀政府作為抵押品，吸收資金去增加貸款。當年該銀行負責人William Duer接受上述條件，但美國立國後首次金融危機無法停止──此乃著名的「Panic of 1792」，美國政府債券價格大跌，政府又向銀行借錢去支持政府債券價格，結果引發銀行出現倒閉潮，最後William Duer（當年國會議員）宣布破產及被關入獄（被債權人控告）。四十五年後的1837年，美國總統Martin Van Buren面對Second Bank of the United States出現財政危機，總統拒絕bailout，銀行破產，存款人只能收回部分款項，銀行股東一無所有；銀行破產後亦引發美國經濟衰退，以當年規模媲美大蕭條。1897年美國財政部面臨破產（無法應付別人用美鈔換黃金），由JP摩根個人聯同其他銀行成立私人syndicate，借出6500萬美元價值的黃金畀美國財政部贖回美鈔，令美國政府逃過破產命運，但唔少參加該計劃的銀行因自己手上的黃金唔足夠而破產。1907年，同樣危機出現，唔少銀行已唔願意參加，JP摩根把邀請番來的銀行家關在自己的私人圖書館裏（East 36th街），直到凌晨五點各銀行家同意簽名為止，JP摩根才放佢地返屋企。到1914年，聯儲局成立，調控金融的責任由聯儲局負責。上述例子證明，無論 bailout或唔bailout，其實都有後遺症。 最近由Luc Laven及Fabian Valencia共同研究，1971年美元浮動匯率制度下在三十七個國家共四十二宗bailout事件，發現事發前政府皆低估為bailout所付出的數目（睇來呢次財長保爾森亦犯了同樣錯誤，例如AIG已一再要求增加撥款）。據兩位學者研究所得，平均bailout代價係該國GDP 13％。如上述結果有參考價值，美國政府呢次bailout代價應係2萬億美元，而非7000億美元。由於三十七個國家中發展中國家佔大多數，如只參考日本呢類已發展國家，bailout代價係GDP 24％，令日本經濟進入十年失落期。 Dunne及Henwood研究日本、南韓、挪威、瑞士已發達國家的bailout，發現呢D國家皆出現低通脹率、低債券息率、失業率較穩定，而危機後第三年股價才上升（日本更陷入通縮）。如參考前科，未來美國通脹率將回落，利率維持低水平，失業率唔會急升，而美股到2010年先至會回升！

Share this:

火煋人

曹仁超投資者日記:英鎊危機再現 2008.11.8 11月7日，周五。恒生指數在13273.09獲支持反彈，至14243.43收市，較上日升453.39；成交487.96億元。11月期指升 470點，收14200點仍較現貨指數低43點。技術上睇，恒指仍處a、b、c反彈浪內行走【圖】。太陽陳話呢次應該係一個似模似樣反彈，上望 16830點。過去策略係Sell on Rumour，今天恒指不跌反升，證明策略已轉為壞消息入貨。 本港銀行界減優惠貸款利率0.25 厘，11月10日生效，係今年3月以來首次。思捷環球（330）升9.5％，見43.8元，因歐洲央行減息半厘。聯想（992）跌12％，係2000年4 月以來最大跌幅一天，因邊際利潤由15％降至12.6％。馬鋼（323）升12％，見1.68元，鐵礦石明年可能降價15％。 滬深三百指數升1.7％，收1677.83。 過去三個月，美資銀行無論對消費者或商業機構都收緊信貸，消費信貸係1980年以來最緊。住宅貸款由7月份樓價75％降至10月份樓價70％。 英國10月份樓價較9月份跌2.2％（較一年前跌15.5％，跌幅已超過九十年代初期那段日子）；跌幅亦為1983年以來最大。依家英國樓價係中等收入家庭年收入五倍（為過去四年半最低，但平均水平應係三點六倍，即仍有下跌空間）。英倫銀行減息1.5厘後，Land Securities Group及British Land Co.股價仍分別跌4.1％及6.3％，睇來英國樓價仍未見底。 兩岸關係開始大大改善，睇睇以下措施：每星期有一百零八班包機來往海峽之間，唔少係每天飛一次，再唔係一星期只飛四天。台灣十一個港口與中國大陸六十三個港口貨物可互通而唔使抽稅，每月兩岸可直航貨運六十次。 日後台北飛上海只需三小時（經香港需七小時）。貨物互通可令台灣港口使用率大增，但香港成為受害者。國泰航空（293）失去部分台灣客，本港貨櫃碼頭亦將失去唔少貨運量；前者對國泰不利，後者影響最大係和黃（013）、九倉（004）等等。 投資股票11年仲係負回報 花旗估計，國泰今年每股虧損1.26元，目標價6.8元。太古（019）今年估計每股獲利2.38元，較去年減少58.7％，目標價50元。另推介遠洋地產（3377），估計今年每股獲利36.2仙，減少33.7％，P/E五點一倍，目標價5.1元。 太陽陳名句係十年黃金變爛銅。回顧1997年8月7日恒生指數16820點至今十一年有多，成績又點？1997年7月回歸後，投資股票亦係有波幅冇升幅；整整十一年啦，投資股票仍係「負回報」！ 民主國家經濟政策隨住民意方向左搖右擺，八十年代傾向減少監管，2008年又再次傾向加強監管，情況有如六十年代中期至七十年代。不幸事係，六十年代中期至七十年代係美國經濟停滯不前期，要到八十年代全球化及九十年代IT高速發展，帶動資訊科技革命推動經濟繁榮。可惜踏入2000年科網股泡沫爆破，為對抗科網泡沫爆破後遺症，美國2001年1月起減息，到2006年美國企業純利40％來自金融業，財富愈來愈集中在溫巴仙人口，已為社會埋下不穩定因素。可惜政府漠視上述情況，最後由市場調整引發危機，最初只係樓價回落，到去年變成次按危機，今年已演變成金融海嘯。呢次美國大選結果證明鐘擺又向「左」方向擺動。未來美股會否重演1966至82年情況？ 今天道指分析員仍假設明年企業純利平均上升13.8％，我老曹擔心明年道指企業純利係跌1％，淡友估計係跌21％。 普特朗認為，如銀行繼續收緊信貸，遲早引發類似1929年式大蕭條而非衰退。佢接受霍士新聞訪問時表示，擔心奧巴馬對上述問題處理能力較殊仔更差。 Oppenheimer 基金銀行股分析員Meredith Whitney認為，市場過去五年太習慣寬鬆信貸，主要係銀行將貸款證券化後在市場拋售結果，未來已冇呢隻歌仔唱。你仲以為銀行一如2007年之前，純利按年上升，令資本大增，然後進一步增加借貸能力嗎？今年銀行資本有賴政府大量注資，才令資產負債表好睇D。 未來一年信貸市場更緊張 柏克萊銀行分析員Jason Goldberg指出，上兩次信貸周期中，銀行股較信貸寬鬆期早一年見底。從呢點睇，未來一年信貸市場仍然愈來愈緊，因為銀行股仍在下跌中。 Vanguard集團創辦人Jack Bogle估計，呢個衰退仍算溫和，最短可維持一年半，但股價早已走在衰退之前。美股由一年前市值18萬億美元回落到上月底9.5億元，最近反彈至10萬億美元。由10月27日起反彈18％睇，佢相信熊市已結束。 Leuthold集團CEO Steve Luthold係有名大淡友，佢認為美股已見底，並進入牛市，理由係存款只能收1.5厘，投資股票隨時收6厘息。 股市仍熱鬧唔似熊市已死 凱恩斯曾話過──盲目樂觀者係那D只見眼前利益而唔理三七二十一者；保守者係那D只睇過去而不前瞻者。投資既要回顧過去，又要前瞻未來。雖然現實令人唔愉快，但投資者必須面對而非逃避。到底10月27日開始係熊市另一反彈抑或係轉好開始？只有Keep an eye on the market。 過去一年，分析事物最準確係Nouriel Roubini：一、佢在10月24日估計未來美國經濟衰退係L型。二、佢認為道指將由近日高位9600點再跌20-30％。三、佢認為2009年秋季美國經濟才見底。四、唔好投資商品、股票、物業，最吸引係日本政府債券，並建議在適當時刻放棄美元，改為持有歐羅。五、佢認為全球股市進入功能失調（dysfunctional）期。六、佢擔心情況較佢估計更壞（去年佢形容係金融列車出軌，即逐個車卡出事）。七、退休金損失30-50％，令退休人士大受困擾。八、經此一役，好多人從此唔再涉足投資，令大氣候改變。上述猜測會否應驗？唯有騎驢看書（走著瞧）。我老曹唔知股市何時見底。恒指由去年10 月至今年10月已回落三分二，P/E一度見七倍，會進一步創新低抑或在10月27日10676點見底回升？我老曹木宰羊，等佢行完a、b、c反彈浪後，再睇下一個浪點走。唔好扮先知，因世上無先知。1973年1月至74年12月6日道指跌45％，見577.6，當天成交只有一千五百五十萬股；1974年 11月底更有一天成交只有七百四十萬股。當年著名分析員Lucien Hooper接受《華爾街日報》訪問時話──投資者已唔再等候入市，大部分已離開了（哀莫大於心死）。1975年1月6日股市已上升10％亦冇人理會。牛市往往在熱鬧中死亡，熊市卻靜悄悄地死去。今天股市仍然如此熱鬧，唔似熊市已死。 根據Morningstar數字，9月份美國互惠基金被贖回560億美元，10月707億美元，形成呢兩個月基金被迫賤價拋售股票。 英國明年減息抗衰退 前天英倫銀行宣布減息1.5厘，隔夜錢回落到3厘（呢次減息幅度係五十年內所未見），初期英鎊匯價唔知點反映，一度升上1.6011美元，最後才回落到 1.5868美元。英國面對經濟衰退壓力，估計英鎊利率明年將降至2厘息去對抗衰退，會否令英鎊匯價重返1976年水平？當年在社會主義影響下，英國瀕臨破產，最後由IMF借出23億英鎊才度過危機。英鎊由去年11月2.1美元下滑，至今已跌了24％，貨幣策略師Lee Hardman同意英鎊前景令人擔心，BNP百利達分析員則擔心英鎊重返1992年9月索羅斯攻擊英倫銀行後水平。一旦鎊匯下跌，英國通脹率便上升，但因為樓價下跌壓力大，政府仍將利率降至2厘。小心英鎊出現另一次危機。 隨著美元進入低利率期，歐羅、英鎊、澳元、紐元、加元亦相繼跟隨，即全球將進入低利率期，1995年起日本透過零利率鼓勵利差交易，令圓匯由1995年4月79日圓一度回落至124日圓，不但為日本投資者賺取息差，同時贏了匯率差，協助日本出口企業獲利。去年8月次按危機壓力下，美元帶頭減息，令日圓利差交易進入拆倉潮。依家日本人利差交易在匯率上損失好大，引發資金回流日本推高日圓匯價，令日經平均指數今年10月創1990年熊市以來新低，並令日本經濟再次進入衰退。全球進入低息期，日圓會否重見80日圓？如重見 80日圓，對日本經濟而言將係另一場災難。今年超過三千間日本建築公司、四百二十五間地產公司申請破產，留下負債250億美元要處理。去年下半年開始銀行界已對日本地產項目收緊信貸，總貸款已由500億美元減少至80億美元。樓價下跌後，東京寫字樓租金回報率由過去2.5％上升到4％（次級者甚至有 5.5％）。唔少外資2003年進軍東京物業，但至今已無利可圖。 奧巴馬提出「改變」，並計劃未來四年增加開支1萬億美元在教育、退休及福利事業上，但錢從何來？美國同日本唔同，日本政府消費可增加至佔GDP 6％赤字仍然冇問題，因日本人儲蓄率至今仍佔GDP 19％（政府開支上升，來自日本人儲蓄，即荷包跌落肚兜），過去十八年日本投資者虧損15萬億美元，經濟仍可牚得住。美國人儲蓄率接近零，美國政府增加開支需要外資流入去支持。因此，日本政府可長期保持財赤佔GDP 6％，日圓匯價仍冇問題；美國政府財赤如一再擴大，最終必引發美元危機。 美國會否一如九十年代日本，進入「Balance Sheet Recession」？當Marcus Aurelius成為羅馬帝國統治者之後，亦進行一連串改變，可惜野蠻人已壯大，並一再挑戰羅馬帝國統治權。羅馬軍隊疲於奔命，加上國庫日漸空虛，最後羅馬帝國解體。1978年中國改革開放政策來得及時，雖然當年中國經濟上一窮二白，但政治上仍係強勢領導。今天美國人同美國政府已負債纍纍，狂野派對開得太耐（如Change在2001年出現，美國仍有得救），呢次改變會否來得太遲？在資產負債表衰退壓力下，美國能否頂得住？當資產價格回落，負債必須減少或撥備。以1997年第四季香港太古城住宅為例，一千呎市值1100萬元，業主借銀行770萬元都冇問題。但當樓價跌30％變成770萬元時，負債仍係 770萬元，問題開始浮現，供樓者必須努力減少其他開支去減債，不然將面對銀行清盤壓力。未來樓價每下跌多一D，壓力便增加一DD，最終引發負資產效應，直到2003年9月本港樓價止跌回升為止。日本政府到1995年已將利率降至接近零去幫助供樓業主，另增加政府公共開支到財赤佔GDP 6％危險水平，結果又點？美國家陣情況肯定較1990年日本或1997年後香港差，未來點樣應付呢個資產負債表衰退所帶來壓力？ 近日美國物業亦吸引外資。吸收了東京物業經驗，相信未來美國房地產投資價值亦有限。 IMF 主要經濟家Olivier Blanchard將2009年GDP增長率由上月估計3％修正為2.2％（即IMF首次公開認為明年將踏入全球性衰退，因IMF認為GDP升幅不足 3％係衰退）。美國GDP由增長0.1％改為負0.7％、歐羅區由增長0.2％改為負0.5％、日本由增長0.5％改為負0.2％；新興國家由增長 6.1％改為5.1％，中國由9.3％改為8.5％。展望明年，我地將面對美國、歐洲、日本三大經濟體系同時出現衰退，你說怎麼辦?! 唔係人人可做畢非德 當然，如果你擁有畢非德咁財富，你可以將手上現金分為三份，第一份今時今日投入，第二份明年今日投入，第三份2010年下半年才投入，在股價一再下跌後仲係買、買、買。上次畢非德由1975年一直買至1985年（買足十年），問題係你有冇上述財力及耐性?!所以話，唔係人人可以做畢非德。 格拉咸在1932年年中才開始在《福布斯》寫文章，其後被封為價值投資法鼻祖。格拉咸1976年逝世，佢最出名弟子畢非德在1960年開始投資，今天成為世界首富，令價值投資法世界知名。值得注意事係──格拉咸在1932年年中開始推介股份時，正值美股大熊市結束日子；畢非德全力出擊日子係1974 年（另一美股熊市結束期），佢在1974至84年大量收集廉價美國股票，到2007年10月美股大牛市結束之前，自然表現出色。 格拉咸主張大部分人應投資，投資第一項係保本、第二項才係爭取合理回報。佢老人家並唔反對別人投機，但必須遵守三大條件：甲、明明投機，卻自以為係投資。乙、冇足夠知識及技巧卻學人投機。丙、用你輸唔起錢去投機。各位有冇犯上述三點？ 發達十法： 一、創立一間成功企業； 二、成為大企業CEO； 三、成為超級巨星如劉德華、張學友； 四、取得奧運金牌，如體操明星李寧、短跑冠軍劉翔； 五、嫁個有錢人； 六、成為知名藝術家如張大千……； 七、用別人錢從事投機行為（OPM）； 八、寫世界出名小說如《哈利波特》； 九、做房地產生意而懂得把握機會； 十、學會管錢，例如森池兄。今天唔少人先至發覺原來唔少投資銀行係唔識管錢，只知道分花紅；可惜大部分人在金融海嘯發生後才知道。 [ 本帖最後由 羊仔 於 2008-11-10 09:47 編輯 ]

Share this:

火煋人

曹仁超-投資者日記-零利率解決唔到問題 2008.11.10 11月9日，周日。上周泰國股市上升12.4％，台灣股市跌2.6％，理由不詳。 10月份美國零售數字可能係2001年經濟衰退以來最差一個月，甚至有可能係四分一世紀以來最差一個月（11月14日公布）。跌幅最大係汽車。通用汽車（美國最大汽車生產商）10月份銷量減少45％及福特減少30％。11月6日起美國唔少商場已開始聖誕大傾銷；估計今年係2002年以來銷售情況最差o既一個聖誕節。密芝根大學消費信心指數11月跌至56.3，係1980年以來最低。入口產品因美元強勢而便宜了4.4％。 海灣股市受油價下跌影響，跌幅正在擴大。Emaar地產（全中東最大地產公司）已跌至四年內新低；杜拜財務市場指數上周五收2666.64，係2005年2月以來最低。 英國財長正在研究減稅刺激經濟！ 道指短期走勢未明 道指9月底至今形成敏感三角形【圖】，短期動向未明，RSI下降軌一度失守，但又迅速重返下降軌之下。道指由去年10月15日14118點跌到今年10月10日7882點後，可唔可以進入上落市？ 道指出現接近1000點回落後，周五出現「奧巴馬反彈」。迪士尼宣布，第三季純利下降13％；Morton牛扒屋話唔夠客；《華爾街日報》指出，美國人正從高風險投資、奢華嗜好、高級餐廳及名貴產品市場撤退，走向節儉！美國人終於明白節儉係美德，甚至的士乘客亦正在減少。 最新一次o既Keeneland名種馬拍賣，營業額較去年同期減少52％，馬價平均下跌37％。 o係一片利淡消息中，美股上周五上升係因為指數已拋離200天線太多，出現技術性反彈。估計整個11月都係咁，即股市短期對壞消息反應麻木。 o係熊市中，連大學o既Endowment基金回報率亦下跌。麻省Liberal Arts大學及緬恩州Colby大學宣布，由6月30日至今冇了25％市價；衛斯理公會o係Middletown 大學宣布延期興建科學大樓，以節省1000萬到1500萬美元開支；康奈爾大學宣布凍結招聘新人及所有新項目；甚至哈佛、耶魯及普林斯頓大學亦感受到壓力。耶魯及普林斯頓大學把70％資金投資o係對沖基金、私人基金、房地產項目上、石油及天然氣項目；哈佛保守D，但亦有57％投資上述項目。過去十年，哈佛Endowment基金每年投資回報13.8％、耶魯16.3％、普林斯頓14.9％及史丹福14.2％；同期機構投資者年回報率6％；而標普五百指數只上升3％。不幸o既事係自6月30日起，上述三大名校Endowment基金平均蝕了25％。地產信託基金回報係負35％、對沖基金回落20％及新興市場基金回落45％。今年下半年連大學方面o既捐獻基金亦投資失利。 穩定帶來唔穩定，奢華之後係節儉。今天已唔係去Morton牛扒屋o既時候，而係叫Pizza外賣；我老曹係Economic Cycle Research Institute讀者，堅信盛衰循環理論。上周五Weekly Leading Index係負24.6％，代表乜o野？即各位準備迎接一次極速o既經濟放緩（或衰退）。10月份美國失業率6.5％，美國銀行估計，明年第三季失業率可達7.7％，即未來一年美國失業率仍在上升。通用汽車公布，第三季蝕42億美元，截至9月30日止，現金得162億美元，只夠捱埋今年第四季。10月全國汽車銷量下降32％，係二十五年內最差，希望政府挽救。自2004年至今，通用汽車共蝕了730億美元，如佢破產，約有二百五十萬人失業，通用汽車股價今年下跌82.5％，家陣每股只值4.36美元，係1950年至今最低位，前景極之令人擔心。上周六Franklin銀行成為美國今年內第十八間破產o既銀行，呢間銀行有51億美元資產，其中37億美元係存款。FDIC已宣布接管，25萬美元以下o既存款者獲保障。家陣美國有問題o既銀行多達一百一十七間，估計o係2013年前仲有唔少銀行倒閉。估計FDIC虧損可達400億美元。連股聖畢非德旗下巴都郡亦出現連續第四季純利下降。呢次純利下跌77％，至10.6億美元（每股682美元，去年同期每股獲利2942美元。來自衍生產品蝕了10.1億美元，估計第四季情況將進一步轉壞，因10月股市及債市皆大跌）；今年內巴郡股價回落20％。 阿特蘭大聯儲銀行主席Dennis Lockhart估計，明年上半年前美國經濟仍在放緩及美元利率將降至半厘。英倫銀行行長金格警告，全球零利率時代將降臨。零利率政策最先由日本銀行採用但無法阻止日本經濟下滑。依家美國同英國已係負利率（利率低於CPI增長率），但無法阻止兩國經濟下滑。相信好快美國進入半厘利率時代，英國進入2厘利率時代。零利率係未可以解決資產負債表衰退困難？從日本過去o既經驗答案係No。反而迫銀行進入低利率及高借貸風險率時代，令銀行索性減少借貸（即收縮銀根）。高盛證券倫敦分析員Jim O'Neill認為，各國央行迫商業銀行減息，結果反而加速經濟走向通縮，情況好似九十年代日本銀行。o係低利率及高借貸風險壓力下，銀行只會加速去槓桿化o既速度，反而不利經濟復甦。 無法刺激消費 一個正常經濟衰退期需時二點五年至三年，何況呢次係金融風暴？去年10月至今股市只下跌十三個月，短期反彈隨時出現，至於見底？似乎仲太早。以供應管理協會（ISM）指數睇，如高於60點即代表經濟復甦，低於50點代表經濟放緩，低於40點代表嚴重衰退快來到。上周五指數係38.9，o係1982年9月以來最低，睇來並唔係幾時復甦，而係美國經濟正在迅速惡化。去年美國汽車銷售共一千七百萬輛，根據《金融時報》估計，每個美國成年人擁有一部車計，年需求亦只有一百五十萬部。點解去年賣了一千七百萬輛？理由係廉價財務或消費者浪費造成。美國人平均五年換一部車，去年唔少人未夠四年便換車；今年已搵唔到任何理由換車，引發汽車業大衰退。由於長期生產過剩，點去處理過剩o既生產力？不但汽車業及房屋係咁，大部分日用品亦係咁，因此甚至降至零利率亦無法刺激美國消費者再增加消費。o係咁o既情況下，美國呢次衰退可維持幾耐？相信較1981�82年及1973�74年更長（甚至把利率降至零）。 二十國財長及央行年會11月8日o係巴西聖保羅開幕，中國人行行長周小川預測，明年中國GDP升幅8％至9％之間。 瑞銀估計，中國明年GDP增長率只有7.5％（或更少）。政府已計劃增加鐵路項目投資及大量興建低成本住宅，去減慢明年GDP下降速度。中金公司首席經濟學家哈繼銘估計，明年中國GDP只有7.3％增長率。駐香港o既麥格理分析員Paul Cavey對明年中國GDP增長率表示極之憂慮，因依家中國GDP增長下滑速度愈來愈快，未來六個月似乎無法阻止下滑。渣打銀行中國研究部Stephen Green認為，中國黃金歲月突然停止，估計明年中國GDP增長率只有7.9％。上周中國政府已要求出席秘魯o既財長急急回國商討對策，估計短期內中國將公布刺激經濟方案。德國銀行o既馬俊表示，如果冇刺激方案，明年中國GDP增長率將下滑到只有6％，係極之危險水平。 全球患上「美國病」 上周五內地銀行向媒體表示，明年貸款投向以鐵路、基建及大宗商品為重點，房地產業仍將面臨較為嚴峻o既融資難題。進入今年8月，房價調整已在全國蔓延，多個城市房價已跌回一年前水平。去年大幅上漲o既深圳房價亦開始下跌，奧運之後加上全球經濟衰退逐漸表面化，大家均承認房地產市場寒冬將至，開發商盼望政府救市。由9月15日開始六年來首次降低存款準備金率；加上三次減息，但至今成效有限，仍無法阻止房價及銷量下降。 金融海嘯下，香港及澳門樓市都頂唔住。中原城市領先指數上周末為63.45，較上月降6％，即房價已回落30％；依家中原城市領先指數已重返去年11月25日63.33o既水平。其中以西九龍「四小龍」擁有o既四個中檔樓盤跌幅最大，其次係貝沙灣。 澳門樓價今年4月至今跌幅大約30％。例如濠庭都會，最近成價每方米2萬元（去年12月係3萬元）；壹號湖畔依家成價每方米5萬元，去年12月6.2萬元。 美國次按危機已演變成國際金融海嘯，並席捲全球，中國亦無法避免。中國o既海外投資、進出口貿易、金融保險證券、房地產、旅遊及GDP增長率無一不受波及。中國面對海外投資價值暴跌必須撥備；進出口貿易o既資金回收上有困難及訂單減少情況下，明年貿易順差將大大收窄，影響中國勞工就業情況。最近中國政府已降低出口關稅去應付，但收效未見；至於對金融、保險及證券業衝擊只要睇睇滬深三百指數跌幅已可知一二。房地產面對海外投資機構拋售、抽離資金及美國地產危機對中國人購買意欲影響正在浮現。雷曼兄弟已把亞雷投資51％股份出售畀光大控股（165），仍在為24.5％股份搵新買家；與資本策略（497）共同持有o既SH Fortress Ltd，以4.16億元人民幣價格拍賣。另外，亦為手上o既資本策略股份找尋買家。其他外資公司亦紛紛減持中國房地產項目，令內地房地產面對重大壓力。 全世界都得了「美國病」，不但國家欠債，連政府、企業及個人都欠債。例如冰島人平均欠債額已超過美國；南韓家庭負債率亦超過美國（韓國央行11月2日宣布，截至今年6月止，韓國家庭應償還年貸款利息達49.9萬億韓圜，佔可支配收入9.8％。韓聯社表示，韓國每戶家庭平均負債3960萬韓圜係歷史上最高）。戰後至今六十多年，全人類都學曉借錢買樓可致富，但日本人自1990年至今借錢買樓卻損失慘重；香港人1997年下半年借錢買樓者，到2003年年中亦好慘，最近五年先叫做透透氣，但今年下半年起本港樓價又再次出現較大幅度回落（今年上半年本港樓價除豪宅外，大部分樓價仍未見1997年上半年水平）。當人人相信一套理論之時，呢套理論往往出錯（群眾常常作出錯誤決定）。2006年後美國人亦開始後悔買樓；2007年後英國人亦開始後悔買樓；2008年起中國人亦加入後悔買樓行列。隨住戰後嬰兒步入退休潮，各國樓價一個接一個進入回落潮。 金價低於700美元可收集 黃金後市又點睇？今年3月由每盎斯1036美元回落，到底係牛市結束，定係牛市中另一次調整市？1973�74年美股大跌後，聯儲局大量提供資金，刺激道指o係1975年回升。八年後美國通脹率達18％、失業率11％及利率21.5厘。擔心2007�08年甚至明年上半年美股o係度重演1973�74年（共二十三個月）o既歷史。由去年11月起計，美股下跌已超過十二個月，估計熊市明年年中完成，然後進入復甦。未來將出現惡性通脹、高利率及高失業率期。黃金價格如低過700美元應開始收集。 隨住陳江會談後，兩岸將由小三通轉為大三通。三通概念已炒了好耐，最終落實，而最受惠係廈門貨輪港口及機場。估計廈門港口將取代日本石恒港及香港中轉站地位，而帶動福建省GDP增長。無論海運、物流、旅遊、房地產、高科技及金融服務業都受惠。航空方面，相信上海航空、南方航空（1055）及中國國航（753）受惠，因每周兩岸直航班次增加三倍，但對本港航空業影響唔大（因本港國際機場已無法應付不斷上升o既新需求）。 不過，澳門方面影響就好大，過去有44％台灣客取道澳門作為中途站，而澳門至今航空運量仍唔夠。兩岸直航班次大增後，估計明年兩岸直航客約二百四十萬人次，最大受惠者係上海機場，因35％台灣客居住o係長三角地區。海運方面，估計香港失去6％直運貨量及7％轉運貨量，令港珠澳大橋興建價值大減。大三通對香港經濟影響好細，反而澳門經濟卻係雪上加霜。

Share this:

火煋人

曹仁超投資者日記:波浪理論等同事後孔明 2008.11.11 11月10日，周一。恒生指數升501.2，收14744.63，成交607.1億元。即月期指升537點，收14737點。匯控（005）為美國次按再撥備43億美元，但有足夠資本應付而唔使英國政府幫手。2003年匯控收購Household後，一度成為次按最大貸款戶，但因及早止蝕，所受影響在可控制水平；今年股價只回落11％，係六十九間歐洲大銀行中表現第二出色銀行；理由係佢吸收存款能力強勁，而唔使好似皇家蘇格蘭銀行、HBO及萊斯銀行等，要出售370億英鎊股份畀英國政府去增加股本。今年第三季匯控業績已較去年同期更出色，第一級資本比率（Tier one）高達8.9％，超過國際標準8％水平。 內地又見政策市 中國鋁業（2600）宣布，把氧化鋁售價由每噸2900元人民幣下調至2600元人民幣，今天股價升19％；中鐵建（1186）升20.2％、建設銀行（939）升7.6％、安徽海螺（914）升31.4％及中石油（857）升8.2％。不過，聯想（992）跌13.5％，因摩根士丹利睇淡。 由去年10月30日恒指31958點回落到今年3月18日 20572點，總共下跌11386點，反彈至今年5月5日26387點，上升5815點，升幅係前跌幅51％。呢次由今年5月5日回落到10月27日 10676點，下跌15711點，如反彈前跌幅31.8％約5000點，上望15676點（最少升幅）。如反彈前跌幅50％，可見18531點。10月 27日至今恒指已上升35％。 特區政府提供100億元（特別信貸保證計劃）為中小企信貸作出擔保，中小企可獲50萬元循環貸款，其中70％由政府擔保，信貸計劃12月推出，為期兩年；另一貸款計劃貸款額達1200萬元，由政府擔保50％。上述計劃周三交立法會審批，如通過，12月可實行以協助本港中小企解決資金周轉困難。 用波浪理論分析大市，今年3月18日20572點係浪1；5月5日26387點係浪2；10月27日 10676點係浪3，依家行緊浪4，估計在15767至18681點之間任何一點完成，然後再行浪5（即終極一跌。細波浪分析由今年7月24日23369 點起計，到10月27日已完成1、2、3、4及5下跌浪，家陣在a、b及c反彈浪）。我老曹1978年起學習波浪理論，到1997年前放棄，因發現波浪理論事後解釋幾好，但用佢推算未來，就錯漏百出。初期以為自己學藝未精，後來發現國際級波浪大師Prechter亦錯得離譜；咁樣我老曹只用作印證已發生的事，唔再用來預測未來。 七十及八十年代係我老曹最醉心走勢時刻。例如GANN（江恩理論）、ARIMA、TORGUE（扭力走勢）及 Cycle Timing（循環理論）等都曾經研究過，甚至較偏門的走勢分析如Square Root of Sharpe及Stone's and Okham's Ratio亦有研究，但1997年後反璞歸真，重新相信基礎分析，另配合各種各類技術分析；最常用係Cycle Timing。基礎分析有如力與健，任何功夫如無氣力及健康身體，一切皆枉然。技術分析已集各派武功取其優，一如李小龍的截拳道，做到後發先致。旺市莫估頂、淡市莫估底，搵到頂或底後先攻擊。例如去年10月見頂後，11月先睇淡，因為太早睇淡及太早睇好都係死罪。請唔好再扮先知。 滬深三百指數今天升7.38％，收報1801.67，創下七周來最大升幅。三百間成分股中有四分一漲停，主力有鋼鐵廠、水泥廠及機械股，只有兩間下跌，屬典型政策市。政策市通常只會支持三幾天，小心大升後又再回落。 奧巴馬上台後，對美國經濟是禍是福？透過增加稅收去擴大政府開支，如果上述方法成功的話，又點解釋1990年到依家日本經濟的停滯期？分配財富同創造財富，自古兩難存：鼓勵創造財富必帶來社會兩極化；著重分配財富，經濟又往往停滯不前。奧巴馬亦跳唔出呢個框框。 英倫銀行上周四減息一厘半後，未來世界各大銀行的減息消息再不能引起太大刺激啦。 日本政府上周五宣布，放寬本地銀行資本負債比率。根據國際會計標準，日本銀行必須把未兌現虧損60％由Tier one核心資本中扣除。如果係咁，可引發日本另一次信貸收縮。上周日本政府批准銀行在2012年3月前可以唔遵守國際會計標準入賬，以及毋須把虧損按市值入賬，令周一日經平均指數上升。 能源股未來最傷 本周有二十一隻標普五百成分股公布今年第三季業績，其中兩隻係道指成分股，擔心業績公布令投資者失望。根據Thomson路透統計，今年第三季標普五百企業純利上周五估計數字係負增長13.9％（對上一周係負11.7％）；金融業負 107％（上周係負94％）。至11月7日止已有四百二十二間企業公布業績，59％較預期高、10％同預期近接及30％較預期低。對第四季純利展望估計可上升24.7％（7月1日時估計可上升59.1％）。較對上周前估計升28.8％又降低。第四季P/E為十一倍（前四季平均P/E十三點三倍）。標普五百指數中，有四百二十二間公司已公布第三季業績，純利平均減少14％，係連續第五季減少；呢個情況只在2001至02年曾出現。業績仲未包括雷曼兄弟破產所帶來的衝擊，因為公布時已接近9月底，衝擊大部分在10月份才出現。分析員估計，今年第四季純利只上升25％（之前估計上升47％）及明年第一季只上升 6％（一個月前估計上升25％）。明年純利上升13％的機會相信好微（如衰退出現）。根據MKM Partners分析員Michael Darda統計，在衰退期分析員純利前景估計通常高估30%至35％。參照過去情況，Darda估計，明年標普五百純利應該回落13％，而唔係上升 13％。Ablin Harris Private Bank分析員相信，大部分分析員仍假設明年經濟會出現V形反彈，但佢相信隨住油價回落，明年企業純利進一步下跌的機會好大。今年最傷的行業係金融服務業，未來應係能源股。大部分投資者希望透過政府強力干預去阻止經濟進一步下滑，能否成功呢？以三十、七十及八十年代熊市P/E見底時都係單位數去睇，依家明年P/E估計仍高達十三倍；加上企業邊際利潤2006年第三季見頂，但家陣正在收窄。P/E十三倍唔算貴，亦唔見得便宜。 惠譽估計，明年第一世界GDP收縮0.8％，係第二次世界大戰後最嚴峻一次收縮期，引發金屬及石油需求增長率及價格下降；而且流向新興市場的資金亦大減。近日聯儲局、英倫銀行、歐洲央行及IMF倡導減息，希望減少短期流動性收緊壓力。雖然係咁，但面對的衰退，相信係1980年至今最嚴峻一次。那D愈依賴外資流入的新興市場所受影響較大，對外資依賴度唔高者所受的影響較少；其次係對商品依賴度細的新興市場所受影響應唔及對商品出口依賴度高的國家。甚至中國亦無可避免受影響。惠譽估計，明年中國GDP增長率只有7.2％，係近十年內最低，但已係全球最高GDP增長率國家。中國政府宣布，推出4萬億元人民幣刺激經濟方案，相等於去年中國GDP 16％或2006年中央及本地政府全部開支。項目包括房產、農業、基建、醫療、社會福利及向資本開支上升的公司退稅，以維持明年GDP增長率有8％，以壯本周六中國參加G20會議時的聲威；呢個方案較美國政府年初推出1680億美元刺激經濟方案大三倍，何況1680億美元只佔美國GDP 1％，而中國呢個方案卻相等於中國GDP 16％。甚至較日本550億美元方案大十一倍。中國政府呢次真係財大氣粗。摩根士丹利認為，如冇刺激經濟方案，明年中國GDP增長率可能回落到只有5％至 6％，將引發好多問題，有了刺激方案可令明年GDP增長率保持在8％至9％之間，同時可確立中國在美國及歐盟之外的另一股勢力。1998年面對亞洲金融風暴，中國政府亦大力增加投資對抗境外需求減少，家陣面對相同問題，中國照辦煮碗。有人建議中國政府取消（或降低）增值稅，可令企業開支每年減少1200億元人民幣一年，大大刺激內需。 中國經濟學家常修澤表示，擴大內需有兩個方向：一個係消費性內需；一個係投資內需。前者較後者難度要大，因為城鄉老百姓收入唔大幅提高，點樣增加消費？去年佔六億人口的農民年收入只有4000多元人民幣，點樣增加內需？至於投資內需主要來自政府及企業，4萬億元人民幣刺激經濟方案主要係基建設施、環保及創新型投資，對消費性內需唔一定有利。 中國擴大內需有難度 中國內需市場好細，消費只佔 GDP 36％（美國超過70％），投資反佔42％；投資主要係服務出口需求。點樣擴大只佔GDP 36％消費性內需去抵銷出口方面的增長率萎縮？去年大量資金湧入中國，炒人民幣升值，刺激A股及樓價暴升，今年無論A股及樓價皆暴跌。去年雙盈餘（貿易及資金淨流入盈餘），造成流動性泛濫，央行曾大量發債及提升存款保證金率兼加息，仍無法全部吸收過剩資金，而引發資產價格膨脹。今年外貿盈餘減少，流入資金亦大減；加上美元至今年6月前貶值，令中國外匯儲備相對冇咁值錢。全球流動性進入退潮期，未因各國刺激方案推出而改變方向。 日本政府好擔心通縮重臨；如唔包括新鮮食品，估計未來一年核心通脹率已降至零，而唔係先前估計1.6％。美林證券日本分析員Takuji Okubo估計係負0.4％。通縮令日本自1999至2005年經濟不前，由於日本利率已接近零，無法再利用減息對付通縮，而近日日本匯價一升再升，擔心 2003至08年上半年的經濟增長期又告一段落。大和證券分析員Teizo Taya擔心類似情況將在美國出現；日本經濟陷入通縮背後理由係日本工資甚至在企業獲利上升期無增長，以便同中國及其他鄰近國家競爭；呢個情況令日本人消費欲下降，企業為了刺激營業額上升，只有推出低價產品去競爭市場，引發通縮。 全球GDP齊萎縮 全球經濟正步入衰退期，最大理由係銀行Tier one資本在萎縮中。在金融危機發生前，全球金融機構Tier one資本約5萬億美元，其中美國同歐洲佔3.3萬億美元，去支持一個43萬億美元的借貸市場。今年如全部投資按市價入賬（mark to market），全球金融市場Tier one資本將減少85％，引發去槓桿化。雖然大金融機構不斷向外集資甚至政府向銀行注資，仍無法填補過去一年金融機構Tier one資本虧損。金融危機前，美國同歐洲金融機構借貸比率係Tier one十三倍，家陣已超過二十六倍，即金融危機前槓桿比率早已偏高；加上世界經濟進入每增加4至5元信貸，才可刺激GDP增長1元；換言之，世界必須每年增加10%至15％信貸，才可令GDP增長2％到3％。唔好話信貸收縮，甚至信貸無增長，世界GDP已面對萎縮期。在金融危機中，已知虧損1.7萬億美元，已入賬7000億美元，即未來仍有9000億到1萬億美元虧損要入賬（今年唔少政府批准銀行可不按市值入賬）。各金融機構透過集資及政府注資，依家 Tier one資本大約23萬億美元，即年底槓桿比率仍超過十八倍，大大超過國際結算銀行公會要求（十二倍）或以下，即借貸市場仍要萎縮37％先合格（已假設金融機構在未來唔再虧損）。第一世界國家至今仍無法擺脫信貸收縮，咁那D新興國家能否背道而馳（Decouple）呢？去年10月Decouple論好流行，我老曹去年已指出，一旦衰退，新興市場所受影響較第一世界有過之而無不及（因為當有錢人唔食鮑翅時，窮人往往冇飯食）。今天第一世界在去槓桿化之時，自然減少資金流向新興國家，甚至將資金由新興國家抽回；加上第一世界國家家庭及企業負財富效應亦大大影響新興工業國產品出口，家陣已波及原材料及能源生產國。 [ 本帖最後由 羊仔 於 2008-11-11 10:09 編輯 ]

Share this:

火煋人

曹仁超投資者日記:刺激經濟方案杯水車薪 2008.11.12 11月11日，周二。恒指14000點一度失守，收報14040.9，下跌703.73，成交543.8億元。即月期指冇咁好彩，下跌767點，收報13970點，期指倒掛現象又再出現。太陽陳來電話：「恐怕反彈已完成，投資者對後市宜多D戒心。」真係語重深長，但幾令人洩氣。 花旗推介中國海外（688），估計今年每股獲利7角，升23.7％，P/E十四點三倍，目標價16.08元；冠君產業（2778）估計今年每股獲利11仙，減少 90.2％，P/E十五點三倍，目標價2.54元；駿威汽車（203）估計今年每股獲利28.4仙，減少1.5％，P/E五點四倍，目標價2.1元；遠洋地產（3377）估計今年每股獲利36.2仙，減少33.7％，P/E六點一倍，目標價5.39元。 今次好難復甦 4萬億元人民幣刺激方案令滬深三百指數只上升一天，今天又回落1.13％，收1781.36。中國10月份出口只上升19.2％（9月上升21.5％），入口上升15.6％，外貿盈餘上升，至352億美元，因原材料跌價及入口需求下降。 拉斯維加斯金沙集團計劃集資21.4億美元，宣布暫停澳門威尼斯人賭場擴建，另計劃向一中資銀行借入7億美元作為興建上述項目。截至6月止，該公司負債資產比率達80％危險水平，停牌前股價再跌6.3％，收報7.5美元，較去年最高價回落92％。呢場豪賭原來最大輸家係賭場。 1997年7月2日亞洲金融風暴，當時MSCI指數304.8至1998年9月1日低潮MSCI指數124.8，跌幅59.1％，共三百零四個交易天；當年P/E下跌至九點四倍。今天面對全球金融海嘯，亞洲區情況應該唔會較1997�98年那次差。一來風暴唔在亞洲而在北美洲；加上中國及印度經濟已冒起，令亞太區對北美洲同歐洲依賴唔及當年咁大，因此宜趁低吸納。呢個係摩根士丹利公司的分析，各位點睇？ 全球衍生產品泡沫爆破，去年10月前在本港大量出售的 Accumulators，包括股票、外牚同商品，殺傷力逐漸浮現。Synthetic CDO被包裝成高息債券，透過銀行及保險公司出售畀投資者（部分銀行及保險公司自己都有購買）．所引發的殺傷力亦好大（呢D債券唔係只有雷曼迷你債券）。對港人財富所帶來的破壞唔會較1997�98年亞洲金融風暴細。 仲有日圓利差交易，當全球其他貨幣皆走向零利率時代，資金回流日本及美國所產生的威力亦好大。 AIG、房利美、房貸美、通用汽車及美國政府能否無止境地提供信貸而唔使付出代價？今年第四季財政部計劃借出5500億美元，明年第一季3600億美元（仍在上升中）。 一個月票據與三十年債券利息差在拉闊，兩年同十年債券息差高達2.47厘，過去只在1992及2002年出現過，兩次都在經濟衰退快結束期因短期利率急跌結果；呢次唔同，卻係十年期利率上升結果，因擔心政府發債去支付bail out。 2003 年8月兩年期債券與十年期債券利率高出2.74厘，理由係聯儲局剛完成十三次減息，投資者估計復甦而大量借入兩年期債券作投資之用。不過，呢次今年第三季 GDP收縮0.3%（彭博估計，第四季GDP將收縮0.8%）；高盛證券估計，明年美國GDP將收縮2%，假設未來十八個月在經濟復甦環境下，令兩年期債券利率降至1.33厘，十年期債券卻升上3.83厘。即係代表信貸收緊，財赤上升，分析界首次猜測零利率在美國出現，經濟進一步向下。 呢個形勢對奧巴馬上任不利，估計佢上任後，明年美國經濟將進一步惡化，資產負債表衰退繼續，美國呢次面對的唔係一次普通性周期衰退，而係一次資產負債表衰退，情況同九十年代的日本接近，因為金融機構失去太多資本而收縮信貸，呢個衰退很難復甦。 金價650美元有支持 好多人都唔信會出現通縮，美國只在1929至33年曾出現過，因消費減少令價格下跌。今年10月通用汽車銷售減少45％，豐田汽車在美國銷售亦減少26％， 10月份美國因就業人口減少二十四萬（連續十個月回落）人會唔會引發美國通縮？第二次世界大戰後，美國每次衰退，政府便大印鈔票，戰後一代從來唔知咩係通縮？只有日本人同港人在1990及97年後先真正經歷過CPI負增長，美國人就從來未經歷過真正的通縮。 油價今年由150美元急跌至60美元、銅價由6月時每噸8900美元跌至3800美元及鋁價由每噸3000美元跌至1900美元；再加上減債及失業率高企，甚至在政府大印鈔票下，明年美國CPI出現負增長機會好大。 美國明年將獲一位新總統去處理老問題，不幸的現實係大氣候與小氣候，不會因人的主觀願望而改變。去年10月至今唔知幾多次投資者希望尋底，但一次又一次底部失守；家陣道指最低係今年10月10日7882點，並在此形成上升三角形。最終能否建立底部而上升定係經一個多月上落市後，失守7882點？要事後才知道。 金價已回落前升幅50％，在640至650美元之間有強大支持，除非回落前升幅61.8％才可見550美元。我老曹傾向相信在640至 650美元守住，因為美國政府正進入1萬億美元財政赤字期（甚至上升到1.4萬億美元財赤）。過去投資銀行槓桿比率達到1比40，即每100元投資中只要出現2.5元損失，投資銀行便失去全部股東資金。2007至08年投資銀行點止每100元投資損失2.5元？紐約市長彭博估計，未來有十四萬金融從業員失業。工業亦唔見得好，10月份通用汽車銷售額下降45％、福特下降30％、日本本田汽車下降25％及豐田下降23％。美國三大車廠要求政府注資250億美元，唔係就宣布破產。FedEx及DHL已齊齊宣布減少在美國的業務而裁員九千五百人，理由係呢D業務一直處於虧損狀態。德銀指出，通用汽車及福特汽車股價真正價值接近零，如政府肯注資則每股約值1美元。10月份美國失業率6.5％係1994年以來最差，估計明年可上升到9％（1981�82年美國失業率達11％）。 早幾個月前，美國政府決定注資挽救AIG，本周二公布所需資金1525億美元（分析家指出仲未夠）。新挽救方案包括財政部認購 400億美元AIG優先股及提供600億美元貸款。房利美剛公布第三季蝕了290億美元，要求財政部年底前再注資。截至9月30日止，資產淨值只有94億美元（7月1日414億美元），如政府唔注資，年底將陷入負資產。周一收報72美仙（去年11月14日47.82美元）；房貸美周一收報88美仙（去年 11月14日44.19美元），短期內公布第三季業績，估計亦要財政部再注資。房利美手上未售出接管返來的物業共六萬七千五百一十九間（三個月前五萬四千一百七十三間），你說怎麼辦？ 中國政府上周末宣布4萬億元人民幣刺激經濟方案（相等於2006年16％ GDP）；再加上寬鬆貨幣政策支持2009及2010年中國GDP保持8％增長。中國希望以內需代替出口，成功與否，木宰羊。長久以來中國一直推行國富民窮政策，點樣擴大內需？4萬億元人民幣聽落好似好多，在美國只係挽救一間AIG已動用1850億美元（1.3萬億元人民幣）；再加上房利美同房貸美已相等於4萬億元人民幣。換言之，中國刺激經濟方案真係杯水車薪而已；請唔好再相信Decouples論，因為全球經濟早已一體化。波羅的海乾貨輪指數更嚇人，一下子便跌至829點，即三個月內下跌93％。 三方法避免自我 滅 摩根士丹利CEO麥克接受CNBC訪問時承認過去的槓桿比率係31比1，家陣已降至20比1，但唔少歐洲大金融機構仍然處於40比1；換言之，去槓桿化早已成為不可阻止的大趨勢。 格蛇上周五在多倫多午餐例會上表示，世界經濟已進入嚴重衰退，美國GDP在今年第四季將明顯下跌！美國樓價在見底前再跌5%至10％，估計最快明年上半年才見底。過去習慣經濟見底後便復甦，但佢唔肯定呢次經濟見底後立即復甦；可能牛皮一段日子後又再回落，但佢唔打算再預測，因為在呢方面一無所知。 作為投資者應避免走上自我毀滅之路，其中包括：一、明白呢次危機係無可避免，係必然會發生，問題只係遲與早；二、唔好估底。估底係失敗投資者遊戲，成功投資者唔會參加。短期超賣必然出現反彈，博到又點；三、要有耐性。通常熊市較估計中長，千祈唔好感情用事。在金融海嘯中，人們會拋售一切可變錢的項目。 投資者一動不如一靜 金融海嘯的威力由9月15日開始橫掃全球，各國政府互相合作欲挽狂瀾。政府的能力相較金融海嘯威力，就好似怒海中一葉輕舟，完全唔受控制。股市、牚價及商品價格波幅之大，我老曹一生未經歷過。一位持帆船老手（唔係練乙錚先生）同我老曹講，駛帆船出海，如遇上順風順水真係一種享受；一旦驚濤駭浪，根本上無法控制那艘帆船，執番條命都算你好彩。家陣D投資者如在怒海中行走的帆船，一樣係咁無助。請唔好在咁極端的情況下作任何決定，因為你唔係股聖畢非德。股聖那艘係巨型航空母艦，你只在持隻小帆船。小心大部分金錢在博反彈中冇了。過去的數字證明，一般人預測股市成績往往較風水佬睇流年更差，如你仍相信預測，不如搵蘇民峰好過。 有台灣經營之神之稱的王永慶死後留畀子女一封信，佢認為，財富雖然係每個人都喜歡的東西，但它並非與生俱來，亦唔係任何人可帶走的東西。它係人經過努力後可能累積或多或少的財富。生命終結時只有歸還社會，無人可以例外。我地應視財富為上天的託付，必需妥善管理及支配，因為冇人可真正擁有它。 王永慶出身貧困家庭，經努力後有所成。佢對社會作出實質的貢獻，而認為不枉此生；佢希望子女亦能充分了解財富真正意義，為企業而努力經營及造福社會，不忘奉獻而唔係只以私利為追求目標，才能有宏偉的見識及胸襟，發揮智慧力量而不負生命的意義。 呢幾個月來，我老曹最大的感動係在金融海嘯中，相信讀者們亦面對唔多唔少的損失，但大家仍關心農家女技術訓練學校。有D更透過我老曹的秘書美寶小姐取得農家女內地銀行戶口直接捐款往北京；有D信賴我老曹，把善款存入個人支票戶口，因我老曹另一筆來自天地圖書公司版稅（即前五本著作，仍有銷路），12月收到後，連同各位呢幾個月內的捐款，一齊捐上以節省捐費。捐款有大至10萬元（早已代捐上），亦有小至200元；一切隨心。能夠捐助10萬元的讀者們，恭喜你，呢D代表你有能力，願上天祝福你同你的家人；至於捐助200元者，更加祝福你，可能你自己生活仍未到豐足階段，但已開始關心較自己不幸的人。呢顆善心日後必獲得報酬。我老曹出版的新書《論性》，便是深入探討性格對投資成敗的影響。上周五來自農家女學校校長的好消息，今年創校十周年籌款活動中，獲善款共 50萬元人民幣，其中唔少來自港澳同胞的牚款。認真多謝各位支持。每個國家及民族，都有自己獨特的哀傷，亦有自己美麗的一面。過去百年歷史，中華民族哀傷事多，美麗事少；作為港澳人士，我地冇能力減少中華民族過去的哀傷，卻有能力為佢加添一分美麗。幾十年來，港澳人士為祖國所提供的各式各樣捐款，正好為中華民族哀傷的面孔添上一分美麗的笑容，令國內貧窮人士破涕為笑。呢D亦係王永慶先生的遺願。 [ 本帖最後由 羊仔 於 2008-11-12 10:00 編輯 ]

Share this:

火煋人

曹仁超投資者日記:中國應擴大消費而非基建 2008.11.13 11月12日，周三。恒生指數跌101.81，收13939.09，成交472.4億元。即月期指跌208點，收13762點，低水，後市繼續睇淡。 Tontine Associate LLC宣布，由於旗下兩大對沖基金Tontine Capital Partners下跌77％，以及Tontine Partners下跌77％，所以把兩者清盤；主因係商品價格大跌。公司仍繼續營運二十五個基金，涉及資金70億美元。基金公會估計，今年約有七百個基金需清盤，較去年上升27％。 G20會議隨時變口水會 英鎊兌美元至今跌22％及兌歐羅跌11％；周二見1.5388美元（去年11月見2.116美元）。上一次相同跌幅，令英國在1992年擺脫衰退，但呢次卻不行，主因係貿易夥伴如歐盟及美國一樣陷入經濟衰退。睇來要到2010年英國經濟才能由呢次英鎊貶值中受惠。10月份英國製造業經理指數出現近七年來最大收縮（出口佔英國GDP 40％，製造業佔GDP 15％）；理由係英國必須同低生產成本的國家競爭市場，令電器產品出口大減，雖然藥品出口大增，但唔少英國產品早已在英國以外地區生產，所以未因呢次英鎊匯價回落受惠；反之，CPI卻因英鎊貶值，令入口成本大升推高未來的通脹率。 殊仔邀請二十個國家阿頭出席11月15日峰會，代表全球GDP 90％及包括十個新興經濟國，但奧巴馬唔想在殊仔任內出席呢個G20會議，令G20峰會大為失色；加上每個國家代表只有十五分鐘發言時間，恐怕變了口水會。在1992年，代表民主黨的克仔擊敗對手老殊後，迅速通過《訊息高速公路法案》，引發互聯網經濟井噴。互聯網及IT產品業發展亦改變了金融同投資業運作方式，例如網上銀行及網上投資等，大量新的金融工具被開發出來。到2000年，代表共和黨的殊仔上台後，對貨幣及財政政策採取寬鬆態度；2003年輪到金融及投資業出現井噴。衍生金融產品透過互聯網推廣成為高增長行業，但不幸地導致今年的金融海嘯。奧巴馬提出的改變，又將帶來乜野？高盛前投資銀行家塔伯特出了本書《奧巴馬經濟學》；指出奧巴馬強調係公平，佢認為共和黨在稅收政策上過分討好富人，咁樣雖然帶來2003至07年的金融空前繁榮，但同時引發出今年金融海嘯。因此佢主張管制金融利益集團而唔係扶持；至於點樣幫助因呢場金融海嘯而失去屋企的窮人？奧巴馬主張增加教育、公共衛生等開支及窮人福利，令佢地有能力去自力更新。其他如環境保護及能源方面的策略，似乎只停留在批評，而未能提出可行的解決方案。 奧巴馬能否成功解決金融海嘯所帶來的影響？根據紐約大學教授魯賓尼在11月11日的最新發言，佢持否定態度。佢擔心美國將經歷一次較1974�75年或1981�82年更嚴重的衰退，估計一直到明年年底，失業率升至9％及GDP下降4％。相信V形反彈唔會出現，U形（十八至二十四個月）已成最樂觀估計。出現日式L形衰退機會亦唔大，但 2010年復甦，而GDP只上升1%至1.5％，最多係2.5%至2.75％。因奧巴馬所繼承的係五十年來最嚴重的一次衰退，財赤高達1萬億美元及去槓桿化高速進行，引發信貸壓碎。數以百萬計美國家庭將陷入負資產，甚至引發通縮。利率降至接近零，仍無法阻止金融資產下跌。歐洲、英國、加拿大、日本及澳紐受美國影響較大，中國GDP增長率明年將降至6％，已係全球中最好一個。估計所有第一世界國家明年CPI升幅少於1％。 恐難再成救經濟妙藥 中國10月份出口只上升19.2％（9月份21.5％；去年全年25.7％），入口上升15.6％（9月份21.3％；去年全年21.3％）。入口往往走在出口之前，即代表明年中國出口增長率進一步減弱，相信係最近政府提出4萬億元人民幣刺激方案背後的理由，希望增加內需（加快基建項目投資）去保持2009 及2010年GDP 8％增長。剛結束的廣州秋交會，十七萬四千五百個買家只落315.5億美元訂單，較去年減少15％。利好消息係10月份CPI升幅只有4％（9月份 4.6％，2月份8.7％），代表中國仍有減息空間。 10月份全國發電量按年下跌0.46％，係1999年以來首次衰退。今年1至9月全國發電量升9.9％及用電量升9.67％，一D高耗電量省份如廣東、山東及江蘇最先出現負增長，亦係近十年少見；9月發電量只升3.4％，10月更出現負增長；例如中法合資東風雪鐵龍公司宣布裁員一千名員工；奇瑞汽車、長安福特及江淮汽車等傳出裁員消息。沿海地區工廠倒閉，導致民工失業返鄉潮已唔係咩野新聞，而係每天發生的事。政府估計，加大鐵路投資可創造八十萬個職位，但相對製造業裁員潮只係杯水車薪。 過去三十年，基建項目投資年增長率平均20％，較GDP升幅大一倍，過去三十年新建超級公路三萬里，估計到2020年達五萬三千里（美國亦只有四萬七千里。美國接近所有成年人有車牌，中國只有十分一人有車牌，中國公路係未已進入overbuild？有D窮省份超級公路因冇車行，農民用來曬榖物）。去年中國出口1萬億美元產品，佔全球總出口量 9％，在呢個水平下，未來中國出口增長率有幾多？呢次中國動用4萬億元人民幣投資微利房、水利、能源及機場，其中7000億元人民幣興建新鐵路。中國家陣已係世界第四大經濟實體，大量投資基建可令中國在硬件上漸漸追上美國、日本同歐洲。 明年1月1日生效的增值稅轉型改革： 一、企業新購進設備時唔再採用退稅方法，而一如原材料咁採用直接抵扣，並在全國推行，取消地區及行業限制，以鼓勵新投資； 二、房屋建築物汽車遊艇等不動產不能抵扣。生財工具如新機器、機械及生產設備才可扣稅。上述不限進口或國產，一律採直接抵扣； 三、過去小規模納稅人按工業及商業分別適用6％及4％徵稅率，明年起一律改為3％，將大大減少中小企業稅務負擔； 四、增值稅由1994年訂為13％，明年提升到17％，令礦產品成為唯一面對加稅行業；金屬及非金屬礦產價值稅一律由13％恢復到17％，以保護資源。 自鄧小平1978年提出開放改革政策後，每次中國面對經濟增長放緩，政府就大力投資基建，其後經濟便復甦。投資基建似乎成為對抗經濟衰退的靈丹妙藥，往往藥到病除。呢次中國振興經濟方案，係未另一次靈丹妙藥？如睇睇日本1990年至家陣亦大力投資基建項目，包括興建海底隧道至北海道或跨海大橋到海中心孤島，卻不能振興日本經濟。過去三十年中國一直處於基建不足的情況下，當道路建成及交通發達，自然帶動經濟向上。因此過去每遇經濟衰退，由國家帶動的投資基建項目，全國經濟好快又好起來；反之，日本基建已相當發達，1990年再投資基建變成浪費資源，例如係未值得花幾千億美元興建通往北海道的海底隧道？或花幾十億美元興建跨海大橋通往海中心孤島？依家中國應擴大的唔係基建項目，而係消費。中國人消費只佔GDP 40％（美國80％、日本68％、台灣73.3％及香港90％），中國問題係儲蓄率太高，消費不足。由1990年起，中國人消費佔GDP比重不但冇上升，反而一直下降，呢個情況不但產生大量外貿盈餘，令人民幣升值打擊出口，同時造成流動性過剩，引致去年的股市大牛市最後變成大熊市。 真正問題係消費 消費、投資及儲蓄三方面都要均衡。開放改革三十年後的中國係未應鼓勵投資而壓抑消費？咁樣做好易走上日本之路。中國人過分強調節儉係美德，在農業社會係正確，但在工業社會係唔正確。如人人節儉，產品便滯銷、工廠裁員及社會出現不景氣；反之，產品暢銷、工廠大量擴充及社會出現繁榮。 大摩的亞洲區總裁羅奇認為，美國人需要增加儲蓄，而中國人同日本人需要增加消費，才可挽救呢場金融海嘯。 內地專家建議提高個稅起徵點，可拉動消費性內需。「十一．五」規劃將個稅起點由800元調高到家陣的2000元。今天月入2000元點可以算係富人？應該大幅提高到5000元先合理。 中央財經大學稅務系黃樺教授表示，依家消費者購買一套房產證未滿五年出售要徵收5％營業稅，以及個人賣房所得淨收入要繳納20％個人所得稅，呢個係令內地二手房無法活躍的理由，未來應下調以刺激二手房交投，從而活化房地產買賣。 一個經濟繁榮期一般可維持三點四至三點七年，一個衰退期可維持十三點一個月至十八點五個月（只有在大蕭條期才維持四十三個月），由去年10月起計至今，已有十三個月衰退期，有三分一機會恒生指數在10月27日見底；最大機會恒生指數在明年3月或4月見底，即共衰退十八點五個月。 令經濟再度繁榮的方法係投資回報超過利息回報，令工商界重新借錢投資，直到通脹率上升，令利率升至某一水平，工商界決定唔再借錢投資為止。點解去年9月至今減息，但股市去年10月反而回落？就係因為企業獲利率急跌，包括開支上升及消費者減少消費。所以話第一次減息係出貨訊號，最後一次減息先係入貨訊號（但邊次係最後一次？木宰羊）。 彭博訪問五十九位經濟學家後得出的結論係，佢地估計今年第四季GDP下降3％，明年第一季GDP下降1.5％，擔心呢次衰退係近七十年內最後一次，較1990年那次長，甚至較1981�82年那次長。 估計明年標普五百獲利不但唔會上升15％而係回落15％，令標普五百指數在未來再下跌20％或更多（極限35％）。金融市場虧損將達1萬億至2萬億美元。不但次按受影響，連Prime Mortgages亦受影響，例如商業樓宇、信用卡、汽車貸款及學生貸款。換言之，今年11月起未來六個月，股市仍係下跌機會大過上升。商品價格再回落 20％，金價可見650美元，美元在明年年初開始回落（由強轉弱），但未來半年Cash is King。 1929年9月道指381.17，要到1954年11月先升穿，共二十五年；1966年1月18日道指升穿1000點，要到1982年11月先再升穿，前後共十六年；去年10月開始回落的道指，到幾時先打和？ 美國要重建信用 作為分析員最好對幾何（geometry）有D認識，以便了解那D圖案所象徵的意義，亦應該有D玄學根基，以便了解人類內在的小宇宙。唔少佛教寺內供奉的曼陀羅便是用得道高僧的舍利子造成。今天美國經濟核心就係信用（credit）；透過信貸可產生林林總總的金融產品，推動美國經濟向上；換言之，信用對美國經濟好似曼陀羅對佛教。今天全人類都質疑美國的credit，因而產生信貸危機，主因係過去CDO唔列入資產負債表內而唔受監管。理論上，要重建金融信心，首要項目就係令全人類對美國credit重新信任，而唔係由政府Bailout或向大銀行注資。因為credit先係整個西方金融制度的曼陀羅。 人無信不立，國無信不張。一個人冇了信用必一事無成，一個國家冇了信用，社會必亂七八糟。列根成功的地方便是在八十年代重建全球對美元信心。明年的奧巴馬能否重建全球對美國的credit？Mark to market會計制度係未痛苦？答案係，但有助重建世人對美國企業的信心。從兩年債券與十年債券息差睇來，美國經濟前景繼續令人擔心。美國房地產市場第一隻鞋已掉落來，幾時第二隻鞋再跌埋落來。

Share this:

火煋人

曹仁超投資者日記:富人變窮人 2008.11.14 　　11月13日，週四。恆生指數跌717.74，收13221.35（最低曾見12943點），成交517.9億元。即月期指跌664點，收13098點。 　　花旗推介和黃（013），估計今年每股獲利3.67元，減少48.9％，O十一點二倍，目標價57.6元；騰訊控股（700）估計今年每股獲利 1.348元人民幣，升48.5％，O三十三點三倍，目標價75元；港交所（388）估計今年每股獲利4.07元，減少19.2％，O十五點六倍，目標價 125元；威高（8199）估計今年每股獲利0.464元人民幣，升47.9％，O十六點六倍，目標價12元。 　　滬深三百指數升4.01％，收1874.08。 美國第二隻鞋開始跌 　　9月份美國7000億美元挽救計劃聽落係幾驚人的數字，至今已動用3500億美元，財長保爾森要求國會再增加撥款，並答應唔再收購有毒債券，而改為支持消費金融；呢個消息令道指週三回落4.7％，收8282.66。依家財政部得番600億美元（欲動用其餘款項必須國會批准）。百思買（Best Buy）發出盈利警告，美國經濟中第二隻鞋開始下跌。通用汽車已跌至第二次世界大戰（1943年）時價位，每股2.76美元。如政府唔挽救，今年內將破產！房利美及房貸美亦向政府伸手；情況好似D初生嬰兒想飲奶，但母親卻冇奶水畀BB 飲。估計今年第四季美國GDP收縮係最嚴重一季。第三季美國售樓者中，有三分一係蝕本離場。樓價已連續第七季下跌（第二季蝕本離場佔23.7％）。估計第四季將進一步惡化，情況一直伸延到明年第二季。 　　環球對沖基金響10月份蝕衛1000億美元。日本第二大銀行瑞穗計劃發行3000億日圓（32億美元）優先股去增加資本；呢個消息令股價跌5.2％。日本銀行宣佈，經濟進一步惡化並計劃將利率由0.3釐減至0.25釐。澳洲聯邦銀行宣佈，呆壞賬可能上升一倍，令股價跌4.1％。 　　六個月前全球擔心通脹上升，當金價由1036美元回落時，我老曹擔心通縮冇人信；家嚇人們擔心衰退，甚至擔心通縮，金價一度跌穿700美元（我老曹估計，支持位在630至650美元，並重建基礎），油價由147美元跌到56美元。 　　倫敦一流餐館白菌售價已下跌84％、靚紅酒售價下跌65％及龍蝦售價下跌52％；同期英鎊匯價下跌25％。去年英國家庭債係個人收入165％，較上一次衰退（九十年代初期）高出50％，倫敦高級餐館的餐牌已出現通縮！星巴克股價已回落75%，Coach股價下跌三分二及Tiffany股價亦下跌一半，呢次唔係貧者愈貧，而係富人變窮人。 　　英國第三季失業率5.8%，較第二季升0.4個百分點，估計到2010年英國將有二百七十萬人失業，失業率達8%。英倫銀行計劃再減息半釐。 　　加拿大打算響12月9日減息半釐到1.75釐，各國央行正步日本銀行後塵，走零利率路線，投資市場已變成流動性陷阱（Liquidity Trap），放多多錢入去都被吸乾。 　　信心危機？No。類似九十年代日式資產負債表衰退（balance sheet recession）。隨住資產價格下降，金融機構必須集資或出售資產，唔係就減少貸款。一切皆響理性情況下進行，並冇出現非理性行為，股市出現過度拋售又出現正常反彈。 　　依家不但投資股市要take shelter，投資日圓及美元以外的外幣亦需take shelter，甚至投資黃金亦一樣要take shelter。換言之，全球已進入由資產價格下跌而引發衰退的時代。 未來的三大問題 　　展望未來三大問題：How low、 How bad及How long？通常一個經濟衰退期維持三年。一個大跌市（指股市）則長達十三點一個月至十八點五個月（即股市見底後，經濟仍衰退），如果呢次係十三點一個月，即今年10月27日見底。如果係十八點五個月，即仲有六個月，熊市響明年3月或4月見底；反之，經濟衰退（或一般人感到復甦）需時三年，即2010年年底大部分人先感受到經濟正在復甦，例如失業率下降或樓價又再止跌回升。響明年3月至2010年10月，恆指響25%至35％波幅內上落，直到經濟真正復甦時才大幅上升。如出現資產負債表衰退，明年3月股市有一次似樣反彈後又再下跌。 　　熊市中最大的苦楚係眼見自己的投資化水，唔少人連計算自己手上投資值幾多錢的勇氣都冇。新投資者可能只經歷過1997年亞洲金融風暴，未經歷過1981至82年主權回歸時的大跌市，更加唔好講1973至74年超級大熊市，恆生指數可以大跌91.5％（1981年7月，恆指由1810點跌到82年12月676點，跌幅高達62.65％；1997年8月至98年8 月，恆指由16820點跌到6544點，跌幅61.09％；最近一次熊市，恆指由2000年3月18397點跌到03年4月8331點，跌幅 54.71％；今次熊市由2007年10月31958點跌到08年10月27日10676點，跌幅66.9％，已超過過去多次熊市跌幅，只係唔及1973 至74年那個熊市）。1973至74年係香港全民皆股民的日子，情況同去年10月前情況接近。 　　Capital Economics分析員Paul Ashworth估計，未來兩年美國銀行仍將虧損4500億美元，相等於家嚇股東資金45%。各銀行必須進一步注資，唔係就引發資產負債表衰退，被迫出售資產及減少銀行貸款；佢估計，未來兩年美國銀行將減少10%總貸款及集資3500億美元。1933年美國通過銀行法成立聯邦存款保險公司，保證商業銀行內存款，同時禁止商業銀行包銷證券及做股票經紀，呢D業務只由投資銀行（俗稱iBank）負責。呢道防火牆由1980年起逐步拆除，九十年代更將貸款包裝成衍生產品，響市場上出售，例如CDO。2000年再通過Commodity Futures Modernization Act，把CDO期貨化。2004年美國證監取消證券公司資本與負債比率中12比1的限制（即1元資金只可以有12元貸款），令證券公司負債上升至資本三十至四十倍，結果在去年爆煲。 兩種資本主義 　　自由資本主義係佛利民主張，鐵娘子及列根總統上台後成為英格魯及亞美利加體系，即主張小政府大市場、開放市場容許自由競爭、政府最好少干預及減稅等。萊茵式資本主義（第二次世界大戰後響德國萊茵河一帶髮展出來）強調企業必須對社會負責，係英美式自由資本主義外另一種資本主義。兩者最大分別係英美式自由資本主義由阿當史密斯開始，認為人係理性，只要訂下公平、公正及公開的市場規則（例如法律、制度及規範），人為衛追求個人利益最大化而推動經濟增長，政府只需執行法紀（law and order）便足夠。戰後德國認為，如缺乏警員維持秩序，往往容易形成擠塞及失控，甚至進入無政府狀態，因群體係非理性。響十字路口，每個駕車者都希望爭取空間通過。如冇交通管制，遲早出現交通意外而唔相信無形之手（市場）可自動調節。政府就好似交通燈，必須執行任務，令企業完成對社會的責任。即市場必須透過政府有形之手去維持效率而非依賴無形之手，以免令市場失控。 　　呢次到底係政府監管出問題，定係自由資本主義出問題？響信貸膨脹的刺激下，1970年賣2.3萬美元的物業、1980年賣6.22萬美元、1990年賣9.73萬美元及2000年賣14.73萬美元，到2006年賣 22.19萬美元，較1970年上升九倍。地產泡沫響2006年中爆破。 　　進入九十年代，美國人已忘記儲蓄的重要性；去年儲蓄率跌至負數。如要重返八十年代10%儲蓄率，即美國人每年消費要減少1.3萬億美元。展望未來，全球政府對金融監管愈來愈嚴；各位正面對1973至74年以來最大一場資產拋售潮。 　　日本前經濟計劃廳部長大田弘子批評政府日前推出2萬億日圓（200億美元）挽救經濟計劃，唔足夠令日本經濟復甦。 　　家嚇日本企業稅率40.7％，已接近全球最高。日本製造業效率很好，但服務業生產力卻較美國低30％；大部分仍停留響小本經營或家庭式操作，形成日本國內消費既昂貴又非物有所值。各位如到日本旅行會發現，無論旅館、餐室及商店大部分仲停留響小本經營（或家庭式操作）。我老曹1980年首次踏足日本的情況就係咁；1995年情況亦一樣，估唔到今年9月日本仲係咁。唔少食肆由兩夫婦加幾個人手經營，並冇集團化及連鎖化；類似美國麥當勞或星巴克的集團少之又少；類似美國連鎖式經營的酒店亦唔多見。可以話日本響製造業方面極之先進，但服務業方面仍停留響七十年代，連大型連鎖式超級市場亦唔多見。好多旅遊區好似香港上海街咁，只得細商店，冇大型連鎖店。 　　日本經濟另一缺點係企業之間的股權互控。起源響1952年有人欲收購三菱不動產；為衛保護三菱不動產公司的控制權，三菱集團旗下十一間公司紛紛購入小量三菱不動產股份，但加埋後令收購者無法獲得足夠控制權，收購因而告吹。六十年代日本股市開始對外資開放，為防止日本企業控制權落入外資手裡，日本企業流行互控。到1989年日經平均指數見頂時，差唔多所有上市企業股份超過一半由其他日本企業持有，即外資根本無法收購日本任何一間企業。 中國企業要出去闖 　　結果產生兩大問題：一、企業優先照顧圍內公司。例如豐田、本田及日產汽車都持有自己供應商或商業上合作夥伴部分股份，好容易形成小圈子，削弱企業與企業之間互相競爭條件；二、一旦股市回落，手上所持有股份便要減值。例如去年日經平均指數跌10％，令企業因互控而賬面蝕衛4440億日圓；今年3月到9月再蝕3300億日圓。到2004年日本企業超過20％股份仍由其他日本公司持有，一旦股市回落，好容易引發全面性衰退。甚至自己公司業務唔跌，但因為持有第二間公司股份要減值，純利一樣大跌。 　　透過互控的確可阻止外資敵意收購。呢D對整體日本經濟係好定壞？過去十八年日本經濟停滯不前係線同外資無法進入日本市場有關？響經濟發展初期例如五十及六十年代的日本，適度的保護係需要；到衛八十年代，日本企業已長大，但仍然大量保持互控，只令日本企業無法適應環球性競爭，種下九十年代日本經濟走向衰退的種子。九十年代我老曹話「日本經濟要衰退十八年」，結果響今年10月已應驗。展望將來仲搵唔到日本經濟可以再強大起來的依據。 　　中國應吸收日本教訓：一、對中小企業不應提供過分保護。好似小孩子，響長大過程中畀佢吃D苦頭及捱D風浪（千金難買少年窮），千祈唔好提供溫室。溫室內的孩子係長唔大；二、阻止企業之間互控，以免形成保護層及小圈子而無法達致全面性競爭。改革開放三十年來，提供適當保護係應該；今天中國經濟孩子已三十歲，應有足夠能力應付外面風浪，就畀佢地到全世界去闖（包括闖禍）。只有咁樣，中國先有真正跨國大企業。 　　1907年經濟危機後，英國從全盛期走向衰落。去年金融海嘯後，美國係線同樣由全盛期走向衰落？美國戰後嬰兒潮一代人已到退休年齡，佢地對醫療及社會福利的依賴，可令聯邦政府面臨破產威脅。美國正走上 1907年英國的舊路，佢地的信用體系已面臨被摧毀。雖然仲有一段日子，美國仲係全球最大經濟體（好似英國急速衰落期響第二次世界大戰後先出現），但 2008╱09年度美國財赤將超過 1萬億美元，響伊拉克同阿富汗軍費開支高達2000億美元；加上國債已有10.5萬億美元；反之，中國有如1907年的美國，雖然響全球危機中一樣受打擊，中國宣佈2010年投資4萬億元人民幣改善基建，情況亦同二十世紀初期的美國好相似。 　　中美勢力響此消彼長下，好似二十世紀初期的英美勢力。來自WTO的紅利，中國已用得七七八八，出口市場已難繼續擴大；加上歐美日經濟走下坡，中國必須拓展內需市場才能繼續長大。好似三十年代的美國大蕭條，不但冇摧毀美國經濟，反令美國響第二次世界大戰後雄霸全球。 　　1780年工業革命響英國開始，到1900年英國國力已雄霸全球，進入大量消費期；1907年美國接力進入電氣化時代。汽車及飛機各種電器及電子產品出現，令美國漸漸雄霸全球。三十年前中國走改革開放路線後世界又再改變，美國人盡情消費，中國人努力生產。

Share this:

火煋人

曹仁超投資者日記:反彈可維持到12月初 2008.11.15 　11月14日，週五。恆生指數升321.31，收13542.66；成交447.35億元。即月期指升484點，收13582點，代表短期後市睇好。道指形成雙底【圖】。恆指由5月5日26387點跌到10月27日10676點，下跌15711點，如反彈前跌幅三分一即5237點，恆指重見 15913點機會存在；由5月5日至10月24日曆時五個月，回升一個多月亦唔奇；理論上，呢次反彈可維持到12月初。短期股市繼續完成a、b及c反彈浪。 　　滬深三百指數升3.71％，收1943.65。法新社今天用「到東方去」標題，估計紐約市未來兩年有十萬五千人失業，其中四萬人係金融業人員，佢地都計劃到中國或印度發展。其中一萬人更係響紐約從事金融工作的華人，均計劃回中國找差事。中國金融機構亦計劃前往倫敦及華爾街招攬金融人才，包括中國主權投資基金、招行及工行等。西方媒體估計，到2010年上海將成為國際金融中心其中一員。 　　德國宣佈，第三季GDP下跌 0.5%（第二季下跌0.4%），確認係衰退；上月商業信心跌至五年底位。歐盟今天公佈，第三季經濟下跌0.2%（第二季下跌0.2%），確認歐盟區進入衰退。擔心呢次係1973至74年以來，另一次美國、日本同歐洲三大經濟實體同時陷入衰退。 　　中國10月份工業生產上升8.2%（今年3 月上升17.8%）。其中石油及鋼鐵產量更下跌17%；電力出現近十年內首次回落。花旗銀行分析員認為，呢次中國工業增長率放緩速度，較十年前亞洲金融風暴那次仲快，如冇刺激方案，明年GDP增長率恐怕會下降到5%。依家多了四萬億元人民幣刺激方案，希望中國政府保八成功。 牛市出現前的特徵 　　過去五個月乾貨輪租金指數下跌88%，令到全球最大船隊Mitsui O.S.K Lines LTD計劃把一百艘運鐵礦砂船中的七艘拆掉。船租已跌至每天3966美元（6月份每天23.39萬美元），估計明年中國入口鐵礦石將減少，係1999年起首次減少，擔心明年全球有20%乾貨輪投閒。 　　估計週末G20會議冇料到，令美元同日圓又再上升。見97日圓兌1美元，相信好快見95日圓。 　　世上永遠存在相反意見，家嚇最多人問的係10月27日恆指係未熊市底？一個熊市通常可維持十三到十八個月。去年10月至今已十二個月有多。根據Ned Davis Research資料，牛市開始時必出現以下三點其中一點：一、在五十個交易天內，道指反彈最少30%；二、在一百五十五個交易天內，道指最少上升 13%；三、Value Line Geometric指數最少上升30%。 　　由10月10日道指7882.51起計，如在12月份道指升穿10276點，唔排除道指牛市出現。如12月份道指無力重返10276點以上，美股將繼續尋底。 　　美國上市的金沙集團去年10月股價係144美元，今天只值5美元。艾德森財富一度僅次於股聖畢非德同蓋茨，過去一年冇了300億美元，家陣身家估計只有20億美元。全球超級富豪響過去十二個月身家皆大縮水。 　　澳門特區政府經濟財政司司長譚伯源估計，澳門博彩運營今年第四季及明年初出現負增長的機會好大，但有信心保持每月收益70億澳門元水平。六家營運商可維持基本生存空間，至於艾德森10月底從家族資產中拿出4.75億美元協助拉斯維加斯金沙集團，令人懷疑該公司能否持維經營落去。金沙去年底負債高過90億美元，家陣情況相信更差。 澳門博彩業好麻煩 　　澳洲皇冠集團去年12月15日14.27美元上市，至今跌到6.38美元，跌幅高達57.4％。 　　美國的永利由去年10月29日168美元，跌到近日44.76美元，下跌73％。 　　美高梅由去年10月10日100.5美元，跌到近日10.77美元，跌幅接近90％。 　　本港上市的新濠（200），由2006年12月18日的24.5元，最低係今年10月20日0.96元，跌幅達96％。 　　銀河娛樂（027）由去年10月2日9.56元，跌至今年11月7日0.5元，下跌94%。 　　2001年澳門原先只有十一間賭場。2004年金沙娛樂場開業，淨係該娛樂場的賭桌數目已係以前十一間加起來的總和。其後大量大型賭場落成，家嚇多達三十一間，除美高梅金殿外，每間都進行大型擴張計劃。 　　2003至07年赴澳的內地客亦以每年90％速度上升。今年6月起，廣東居民赴澳簽證被收緊為一月一簽；7月改為兩月一簽；8月改為停留時間由十四天改為七天；9月持赴港簽證內地客唔可以赴澳；10月再改為三月一簽。形成內地客今年6月到澳門旅遊開始下降，6月較5月減少12.3％；不但係咁，連香港及台灣客亦下降（今年8月數字較去年同期減少6.1％及13.2％）。中台加強直通後，擔心台灣客再急跌。 　　銀娛與新濠天地合作的Mega Resort原先計劃明年上半年落成，家嚇已計劃延遲六個月甚至一年。銀娛上半年收益53.92億元，較去年同期減少9.4億元；澳博（880）來自博彩收益亦由去年上半年162億元，下降至今年上半年155億元。 　　1962年澳娛首次獲博綵牌照後，將博彩客由港澳伸展到印尼、日本、新加坡、台灣及泰國。除大大拓展海外賭客比例外，亦在十多個國家建立旅遊辦事處推廣澳門。 　　2001年政府發三個賭牌，吸引大量外資投資酒店業及娛樂場所，但博彩客對象主要係內地客，除內地客外，未見開拓其他客源。相信係中央政府今年6月起將逐步收窄赴澳簽證的理由。 　　今年對投資者來講，肯定係Tough Market；股價已at a deep discount。在熊市中忍耐係金，唔尋底係聰明做法。全球經濟進入衰退期，唔少國家政府採取刺激方案，包括日本七年內第一次減息，其他如澳洲、印度、中國及南韓皆減息。由減息到經濟復甦通常需時六個至十八個月（甚至更長），中國GDP增長率亦由去年11.7%下降到今年9%，明年估計只有7%（政府正努力保8而推出4萬億元人民幣刺激方案，相等於去年GDP 16%）。美國同日本刺激方案已太多，無法一一數清楚；英國亦大幅減息。 美停止印債 　　五十四位分析員估計，美國第四季GDP下降3％，復甦最快在明年下半年才出現。加州大學的Sung Won Sohn認為，刺激方案有幫助，但不能解決困難。MFR企業的Joshua Shapiro認為，我地開始unwind信貸泡沫及資產泡沫，呢個泡沫已存在多年，又以最近五年（2003至07年）為最。1990至2006年金融業佔美國GDP比重上升超過一倍；去年二十一萬二千美國人收入高達800億美元，其中四萬五千個紐約打工仔支付全國30%入息稅（紐約50%入息稅來自1％打工仔，其中絕大部分從事金融業）！一旦出現調整，需時幾耐及幅度係點？ 　　偉大的美國製債機器開始進入停止期。最先壓碎的可能係美國汽車工業，其次係石油工業。油價已由今年7月11日147.27美元一度跌至56美元，今年7月人人預測油價可見200美元之時，佢卻開始大幅回落並出現十七年內最大跌幅。OPEC宣佈減產後略為回升，因為至今仍冇人相信低油價時期來臨，全人類仍未接受信貸泡沫及資產升值泡沫已爆破！德國已連續兩季GDP負增長，確認衰退；結束由 1996年起的擴張期。今年第四季相信美國、英國同日本可確認衰退。美林分析員John Thain認為，呢次唔係1987、1998或2001年，最低限度係1974年甚至更差。美國同英國消費者的財富突然蒸發掉，百思買（Best Buy） COO Brian Dunn表示，從事零售業四十二年，從未見過美國零售業咁差。10月份同店銷售減少7%，估計今年聖誕較去年同期減少15%。摩通CEO戴蒙在一個銀行會議中表示，佢相信呢個衰退好深，至於有幾深便不知道。佢估計，第四季信用卡壞賬率達5%，明年初達6%、然後上升到7%。不但次按繼續在明年有虧損，連主按亦開始虧損。有人估計，美國銀行業明年在次按市場虧損達4250億美元及主按達3000億美元；銀行業在明年仍唔會放寬信貸。 今年遊戲規則係搶錢 　　美國現任期交所主席Brooksley Born在1998年領導CFTC時，認為缺乏監管的期交所合約遲早危及美國經濟。 1998年律師出身的Born與另一位Dan Roth發生監管者之爭，因當年格蛇及財長魯賓支持放寬政策最後Born辭職，國會批准期貨合約唔受監管。成交額在2000年初合約值由100萬億美元上升到6月份684萬億美元。現年68歲的Born已離開華盛頓及出任期交所主席；加上上月出任CFTC主席的Walt Lukken亦主張加強監管；證監主席考克斯在9月份亦主張加強監管。聯儲局計劃最先監管依家只餘下33萬億元市值的CDS市場；再加上House Financial Service Committee主席Barney Frank亦傾向加強監管，相信美國未來大方向已係加強監管。六十年代出身史丹福大學法律系的Born當年已係極之出色的女性，在1998年長期資本管理公司出事時，佢認為係「wake-up call」，應該加強監管啦。1998年9月呢個見解係少數，主流意見仍係減少監管，直到今年雷曼兄弟出事，加強監管才漸成為主流。美國亡羊補牢係未遲了點D呢？ 　　雖然貝南奇以研究三十年代華爾街大危機出身，但一樣無法阻止負債之鍾（debt clock）unwind。雖然各國政府聯手注資，但債券市場仍然萎縮。保爾森瘋狂注資亦多多都唔夠，信貸危機仍然持續發展。家嚇環境仍係 Disinflation，估計可維持到明年上半年；如明年下半年經濟仍無法復甦，恐怕我地將進入通縮期。在通縮期股票平均O只有七倍，因為冇通脹幫助下，企業純利只會減少而唔再增長。今年遊戲規則好似TVB過去曾玩的搶錢遊戲，即Money, Money, Money！ 　　人性弱點係產生危機最大的理由。我老曹同意德國經濟學者的理論（個人私利如唔受政府監管，最終會闖禍）。呢個次按危機起源於1990年逐步取消監管的結果。過去因利率上升才結束樓價上升週期，但呢次利率下跌卻無法結束樓價下跌週期。受過分貪念影響，在2006年美國樓價已被推向極端，情況好似1990年的日本。美國財赤已存在四十六年，美國負債超過60萬億美元係去年美國GDP四倍（家庭負債15萬億美元、金融業負債17萬億美元、地方政府負債3.5億美元、非金融企業負債22萬億美元及政府負債11萬億美元）。美國點還債？過去四十五年全人類儲蓄作為美國人消費之用。呢個遊戲仲可玩幾耐？甚至美元進入零利率又可支持幾耐？1982年美國失業率一度達10.7％，進入蕭條前期。幸好1982年第四季起美股止跌回升。高盛估計美國失業率由家嚇6.5％回升到去年年底 8.5％，會唔會在2010年出現類似1982年的情況？ 　　英國New Court的Simon Ward估計，英國利率明年見2釐，GDP負增長1.3％，2010年恢復上升1.7％。 右手賺錢左手make money　　我老曹認為二十五歲前應努力學習，包括讀書及投資技巧。二十五歲到五十五歲係黃金三十年，右手應努力賺錢，左手應努力make money。唔少人只懂運用右手賺錢，例如由月入1萬餘元到10萬元。由於唔識同時用左手make money，在面對退休之年，手上所剩下的財富唔夠自己過舒適退休生活。過去四十多年，香港經濟高速成長，每年令資本增值15％並不苛求；即1967年1 萬元到去年變成267萬元；成績好一D年增長率達20％，即1萬元投資到去年可變成1224萬元。成績更好的亦大有人在。 　　如你同時係運用左手的高手，年紀漸大後、一般亦開始進入charity生涯。charity唔係一次性捐款行為，而係協助某機構達致某D目標，例如協助非牟利機構，為社會提供服務及減少貧窮因素。當然救急扶危亦重要，例如四川地震之後救援工作或中國雪災之後的支援；不過，真正改變貧窮的唔係呢D工作，而係向人投資，包括提供技術、制度、醫療及教育援助，從基本層面上改變導致貧窮因素，呢D先係charity。至於救急扶危只係一項施捨，冇長久意義；例如捐助100元畀慈善機構去買D月餅送畀老人亦係好事，但基本上你冇改變乜野。今年8月微軟主席蓋茨捐助500萬美元畀Techno Serve為發展中國家企業提供設備去創造就業機會，就更加有意義。另一機構叫做Bridgespan，來自Bain & Co顧問公司的分支，佢唔係協助慈善機構而係追查慈善機構金錢用途，包括overhead方面開支。例如有D慈善機構話營運開支只佔總捐款13％至 22％，調查後卻發現佔總捐款17％至35％。透過佢地的追查，捐款者知道邊D慈善機構在運用善款方面最有效率，邊D營運開支佔捐款比重太大。調查亦發現，連續性每年唔受限制用途捐款，較一次性大筆捐款能產生更大效益。慈善機構依賴較多人捐較低數字的銀碼，較依賴一、兩個知名人士大筆捐的善款來源更可靠。今年已有唔少大人物削減捐款數字；反之，普通人每月捐款卻冇減少。 　　作為普通人，成立自己慈善機構並唔容易（因財力及物力太小），最好係加入已成立並有良好業績的機構。唔使一次過大筆捐款，而係持續性（例如每月數百元）捐款，咁樣做對呢個機構幫助最大。 　　五十五歲或以上的人，右手工作遲早要停低，左手則應繼續make money。亦係應該開始charity日子，利用charity取代打工賺錢，可以令人好忙而不知老之將致。自私D講，從事charity乃令自己心境保持青春及愉快不二良方，正係多有多做、少有少做。找一間慈善機構理念同你相近者，作為恆久的捐助者。可以係每月一百幾十，保證令你身心愉快。例如資助貧窮小孩上學去，每當收到佢地的成績表之時，已可令你快樂一整天。 　　請好好運用你的右手，從過去搵錢打工轉為慈善事業，以免右手因少勞動而變得不靈巧。 [ 本帖最後由 羊仔 於 2008-11-18 10:19 編輯 ]

Share this:

火煋人

曹仁超投資者日記:口水大會洋洋大觀 2008.11.17 11月16日，周日。二十國領導人在華盛頓召開金融海嘯同世界經濟峰會，一如估計只係口水大會，講就洋洋大觀，做就冇一個國家肯承擔。 有人認為金融海嘯係由投資者貪心引發。貪心值得原諒，世人誰不貪？只要貪得其所便可。但愚蠢卻不值得原諒，各位不妨睇睇那D衍生產品合約的條件（例如贏就贏粒糖，輸就輸間廠），我老曹實在唔明白點解仲有咁多人肯簽個名落去？除了士刁拔之外，真係無法解釋者也。 呢個情況，有如1997年那年特區政府八萬五房屋政策，當年大家已見到日本政府1990年房屋政策變成又藍又黑，但我地可愛的白眉董伯伯，仍然舂個頭落去。 保爾森日式方法救市 今年另一個可愛的傻瓜叫保爾森，佢已睇過日本股市過去十八年雞毛鴨血，仍然採用「日式方法」救市，期望阻止全球信貸收縮。睇來今後金融市場再冇派對（開心日子）矣。 今年3月金價回落後，我老曹曾提出通縮論，但信的人唔多。七個月後今天，各國政府官員及學者都擔心明年美國進入通縮。1982至2007年整整二十五年信貸膨脹面臨結束，甚至有人開始質疑1971年尼克遜總統的浮動匯率制度能否繼續落去。過去一年美國股票市場蒸發25萬億美元市值，美國物業市場蒸發4萬億美元市值，保爾森計劃動用7000億美元去阻止信貸收縮，你話效果如何？雖然政府不斷向銀行注資，但信貸危機仍未消除。道指上周五重返8497點，雖然我老曹相信10月10日起的反覆向上的力量仍未完成，後市道指仍有機會升上9000點或以上，呢個a、b、c反彈浪才告完成，因估計12月6日美元再減息半厘。但10月10日道指7882點，到底係2001年9月、2002年7月抑或係02年10月（見底）？我老曹相信見底的日子，可能係2009年3、4 月。過去一年全球股市均面對Margin Call！ 美國10月份零售額下降2.8％，係連續五個月下跌，Circuit City已申請破產。美國10月份入口更下跌4.7％，因美國消費者財富被蒸發20萬億美元，美國消費信心進入1980年以來最低點。流動電話銷售下跌 5.5％（9月份跌4.8％）；汽車跌幅最大，連入油站亦宣布銷售下跌13％（部分因油價下跌，以銷量計下降1.5％）。美國貿赤進一步減少，9月份原油入口成本平均每桶104美元，11月平均65美元，下跌了三分一，令11月貿赤有可能降至400億美元，即2003年以來最細，刺激美元進一步升值。何況全球資金正回流日本及美國，例如南韓圜兌美元已貶值33％，仲有印度盧比、菲律賓披索、印尼盾等，甚至新台幣、泰銖及新加坡元都在貶值，估計上述趨勢維持到2009年年中，到時美元再面對貶值潮，因美國2008�09年度財赤超過1萬億美元，支出大增而稅收大減。 FDIC主席Shiela Bair計劃利用7月份接管銀行Indy Mac，向二百二十萬個樓按者提供低息貸款（以佔佢地收入31％為上限），以便業主仍可在負資產的住宅內繼續住落去，而免被收樓令政府每年支出244億美元，相信可令一百五十萬個家庭繼續捱下去。依家已有七百五十萬個家庭陷入負資產，樓價每下降5％便額外增加二百萬個。上述情況一如1997年之後，本港銀行向負資產業主提供援助（減每月供款，大家齊齊捱）。到2008年，本港80％負資產家庭因此而脫離負資產行列，拖長來供，希望有一天可脫離負資產行列。睇來美國負資產業主仍有排捱，五年又似，十年都似。 費城聯邦銀行主席Charles Plosser在匹茲堡經濟會議上話，道指如再跌快夫巴仙，8000點失守，將進一步引發衰退恐慌。佢估計明年第四季GDP將較今年第四季再跌2％。在能源及商品價格下跌壓力下，明年通脹率唔再令人擔心，反而一連串因規管收緊所產生的信貸收縮現象更令人憂慮。 英國拋股買樓者增 英鎊本周跌6％，見1.4734美元，係今年內新低；兌歐羅跌5.6％，成85.95便士兌1歐羅；兌日圓跌7.6％，成142.28日圓。近期那D購入 50萬英鎊或以上市值物業的業主，資金來自大量拋售股票者較一年前增加26％；購入市值75萬英鎊或以上市值物業的家庭，資金來自拋售股票者較一年更增加 35％。雖然依家供樓貸款利率只有6.81厘（一年前7.14厘），但賣股買樓現象漸漸出現。政府宣布一年豁免印花稅，令首次買樓者受惠，但那D市價 125000英鎊至175000英鎊物業交投在8月份只有三千八百宗（7月份四千二百宗），未見回升。 日本經過十九年衰退，街上再出現老人扒手及小偷，因為政府大幅削減福利及醫療補貼，令唔少六十五歲或以上的老人到店舖內偷野，去年佔上述犯罪率18.9％（1978年只佔3.1％）。今天有五分一日本人已係六十五歲或以上，為美國兩倍、中國三倍，估計到2050年佔日本總人口40％以上。2006年起日本政府打算每年減少2200億日圓社會福利，至2011年止，以減少政府每年財赤。2001年依賴社會福利的日本家庭三十萬，去年已升到一百一十萬，未來仍在上升。日本再次進入扒手及小偷大量湧現的時代，真係人又老、錢又冇，唔少日本老人晚景好可憐。 過去十九年，日經平均指數由1989年12月38957點下跌到1992年8 月14194點時，唔少知名分析員以「淡市不出三年」為理由，認為日股熊市完成而推介。其後日經平均指數升至1994年6月21573點又回落，1995 年7月重返14295點，因為冇跌穿1992年8月14194點，引來另一批睇好者，理由係「雙底」，而將日股推高至1996年6月22750點；但到 1998年10月又回落到12787點，熊市已死論又出現，而將日股推高至2000年4月20833點，可惜又一次令人失望。2003年5月日經平均指數跌至7603點才回升，並在2007年2月見18300點；2008年10月28日日經平均指數再創新低，見6994點。十九年熊市，美國投資者一而再、再而三認為日股熊市已死，結果再次令人失望。上述情況未來會否在美國股市重演？ 1990至2007年日本GDP平均每年仍增長2％（同期美國1.8％、德國1.6％）。日經平均指數表現咁差，理由係八十年代日本股市同地產炒爆了。同樣理由，今年本港住宅最高峰期，普通住宅樓價（唔計豪宅）一樣未能超過1997年第三季，理由係1997年第三季本港普通住宅樓價早已炒爆了。 日本第二次世界大戰後，透過通商產業省（Ministry of International Trade and Industry，簡稱MITI）協助生產商、零件供應商、銀行及貿易商組成相互關係（透過互相控股），在政府官員努力下，建成今天仍然存在的強大出口產業。韓戰爆發及越戰期間，由美國政府領導下的盟軍最高司令（Supreme Commander of the Allied Powers）認為，協助日本經濟發展可阻止共產主義思想擴散。1950年韓戰期間，來自美國政府的訂單佔當年日本總出口27％，並批准日本加入關貿組織（GATT）成為臨時會員（當年英國曾反對），以及將管治日本權力交回日本國會。當越戰在1975年結束時，日本已成為全球第二大經濟實體，僅次美國。 1980年日本GDP達13650億美元。日本由1950年韓戰爆發到1980年，經歷三十年經濟高速成長期；在MITI領導下，政府故意壓低日圓匯價、利率，並向消費者抽重稅，以便資金流向策略性工業，例如造船業、鋼鐵業、電力、汽車、電子產品等，再透過保護主義阻止外國貨入侵日本消費市場。大量公路、機場、港口、高速火車等亦在呢個時候建成。 1978年中國實施改革開放政策，並在1979年獲美國MFN（最惠國地位）。越戰結束後，美國與中國關係愈來愈好，美國唔再協助日本，例如1973年起要求日圓升值，並要求開放日本消費市場。日本政府雖同意，但奈何國內反對力量十分大，至今日本消費市場仍未全面向外開放。面對日圓升值壓力，八十年代開始日本資金唔再集中在策略性工業上，但消費市場又無法發展起來，形成八十年代至1990年資金集中在股票市場及房地產市場，最後以炒爆收場。1995年日本政府又設法誘導資金流向海外，形成大量日圓利差交易存在，透過資本出口賺取利息，同時壓抑日圓匯價去維持日本GDP增長。今天日本面對全球大減息及資金回流，大大打擊日本出口事業。 從日本發展史回望近代中國。1978至2007年的中國，係未1950至80年的日本？日本因為不讓日圓大幅升值及開放本土消費市場，造成八十年代日本股市及樓價狂升，帶來近十九年經濟呆滯期，中國又如何？ 美國消費亞洲生產模式難再 2008 年將盡，2009年點睇？我老曹上周五為新城財經台協辦的香港經濟峰會2009開記者招待會。去年港股直通車無法落實，我老曹對2008年的睇法已傾向偏淡；今天則擔心過去由美國消費、亞洲生產帶動全球經濟上升的模式已無法持續。加州大學工商管理與經濟學教授勞拉．泰森認為，呢次經濟衰退期較過去我地所面臨過的更長、更嚴重。去年11月佢曾預計美國房地產危機會演變成金融危機，再由金融危機向實體經濟蔓延，從而導致經濟衰退，家陣一一應驗。呎次佢獲邀出任奧巴馬的顧問團成員，可以向新任總統提供乜野意見？佢同意大摩亞洲主席羅奇的睇法──美國人應加強儲蓄，亞洲人則應增加消費。但點樣將上述諗法落實？一旦美國消費需求下降，對依賴出口的新興市場如馬來西亞、台灣及中國大陸等地區首先帶來各種動盪，例如股市崩潰、樓價下跌，又點樣增加消費？正是未見其利先見其害。 摩根大通中國研究部主管龔方雄認為，去年9月至今全球財富已蒸發50萬億到60萬億美元，相等於全球一年GDP。依家外國向金融市場注資約3萬億美元，只及蒸發掉財富的二十分一，未能將資產縮水的底部填平，又點樣刺激消費？ 根據國際結算銀行公會公布，今年6月止全球衍生產品市值684萬億美元，係全球GDP的十二倍，超過66％係利率合約、9％係外匯合約，依家市場仍在萎縮，所產生的信貸收縮壓力十分大。換言之，今天大部分人已睇到問題所在，但搵唔到妥善解決之法，老鼠拉龜。

Share this: