火煋人

不聾不啞 不配當家 2008年09月13日（星期六） 9月12日，周五。恒生指數跌35.82，收19352.90，成交577.7億元。9月期指跌37點，收19305點。建設銀行（939）跌2.1％，收5.61元。工商銀行（1398）跌2％，收4.8元。新鴻基地產（016）升4.6％，報95.5元， 滬深指數微升。中國石化升3.1％，報8.97元；海螺水泥跌9.7％，報22.54元；上海電力漲5.4％，報3.74元。 花旗推介冠捷科技（903），估計今年每股獲利8美仙，升1.9％，P/E四點一倍，目標價4.5元；哈爾濱動力（1133）今年每股獲利90.7仙，減少19.3％，P/E六點一倍，目標價7元。 認清「兩房」的「政府贊助」身份 房利美1938年由羅斯福總統下令成立，目的係協助美國經濟由大蕭條中復元。1968年政府為減少財赤將佢上市，理論上已經唔係國企，但為了增加吸引力而 創造了個新名詞叫「政府贊助」（Government-Sponsored Entities），簡稱GSE。1970年為協助二手按揭市場，再成立房貸美，亦同樣畀佢GSE地位。一般人搞唔清GSE代表乜野，唔少投資者視佢係國 企，形成「兩房」可以亂借唔受任何監管。賺錢那陣歸管理層分紅同派息，蝕本就要納稅人負擔，漸漸連外國政府都投資「兩房」債券（因誤會係國債）。 唔該忘記房利美同房貸美吧，2010年起每年佢地將減少貸款業務10％，即十年後美國經濟已經冇「兩房」存在；從呢點睇，美國樓價長線會點？ 前聖路易儲備銀行行長普爾估計，政府在「兩房」託管事件入面損失估計達3000億美元，即明年政府需要再注資。 雷曼兄弟又係另一回事，公布第三季虧損39億美元，被收購的美國五大投資銀行只剩低三間，即高盛、美林同大摩，由此可見風險管理業務風險有幾大。情況有如 貝爾斯登；聯邦政府為了減少衝擊，安排JP摩根大通收購，政府同意承擔的290億美元有可能虧損；估計雷曼兄弟情況比貝爾斯登好DD，只係資金周轉出現困 難，唔使接管（Bailout），只需搵其他人收購（Buyout），以便恢復外界對佢的信任。家陣雷曼市值已落到只有30億美元；由舊年2月到依家，雷 曼股價下跌91％，股東共失去400億美元市值。 WaMu要極速集資逃厄運 雷曼之後，Washington Mutual又點樣？呢隻股一度跌至1.75美元的十八年內低位，先至反彈上3美元收市。呢間公司問題唔在眼前，而係美國樓價再跌10%至15％，咁呢間 公司在2009、2010，甚至2011年怎辦？佢必須同時間競賽，即集資速度要比樓價下跌速度快，先至可以逃過厄運……。但在依家咁的環境下，又點樣集 資？ 2000年科網股泡沫爆破，代表1982年開始的牛市死亡。2001年透過再膨脹令死灰在2003年復燃，到舊年10月第二次死亡。依家美國消費者已負債 纍纍，接近冇得救，但任由「兩房」破產，全球金融制度會崩潰。保爾森只有擔起責任，在禮拜一曾經令人人歡喜，最開心應該係債王格羅斯因此獲利17億美元。 諗深一層，上述情況代表美國還債開始，外資持有太多美元同美債，如果美國政府唔支持「兩房」，佢地將會在市場上狂拋「兩房」債券。 從呢點睇，通縮漸戰勝通脹，因為全球需求進入回落期；美國人一步步走向還債期。 繼「兩房」後，金融市場在度評估美國財政部仍可收養幾多個孤兒？不幸事件係S&P/ Case-Shiller指數今年上半年10個月移動平均線已跌穿50個月平均線【圖】，確認美國樓市牛市死亡。同股市唔同，股市50天線跌穿200天線 確認牛市死亡日子後，通常有一次大反彈（好似今年3月到5月），但樓市係冇的。 「兩房」受託管後，將成為日本人口中的殭屍公司（Dead Man Walking Co），即永遠唔會產生利潤的公司。令人擔心的企業有Fifth Third Bank，股價已由60美元跌至14美元，公司宣布減息75％；Washington Mutual股價由40美元跌至3美元，4月份宣布每股派息減到1美仙；National City股價由40美元跌至5美元，4月份宣布每股派息減為1美仙；通用汽車金融（GMAC）股價由80美元跌至11美元，7月份宣布唔派息；福特汽車信 貸（Ford Credit Co.）股價由60美元跌至4美元，9月宣布唔派息；Wachovia股價由60美元跌至15美元，宣布每股派息減少90％至5美仙。上述公司繼雷曼兄弟 之後，都在度等緊美國財政部收養。 投資四忌 獲取財富五道 投資四大忌：一、在牛市中過分保守。二、在熊市中過分進取。三、Time the market。四、錯信股票經紀或投資顧問。為針對上述缺點，在牛市中記住七三分（70％資金投入股市），在熊市中三七分（30％資金投入股市），唔好尋 頂同埋尋底。唔好信人只可信自己。Get wise, Get wealthy and get healthy。人年紀大了應該聰明了、富有了同時保持健康，上述方法可以防止你太進取或者太保守，亦唔需要Time the market。 一旦熊市形成，減持至30％股票，雖然有所損失，但仍然有70％現金在手，令你安心快樂。牛市形成，則改為70％投資股票，仍有30％現金在手，可令人聰明及有智慧，不但心平氣和，同時可安享自己的消閒時間。中秋已到，朋友，你快樂嗎？ 獲取財富之道：A、記住資產分配程式（Asset Allocation Model），牛市七三分、熊市三七分。B、嚴守止蝕唔止賺。虧損15％要注意，虧損20％便止蝕。C、唔好過分分散、唔好過分集中，最多持十隻八隻，最 少持四隻、五隻股份已經足夠。D、時間在自己那一邊，如用五年、十年、二十年，而唔係希望一朝發達。E、如非專業，每天花二十分鐘在自己投資分析上面已經 足夠，唔好一曝十寒（心情唔好便唔理），亦唔可以埋頭埋腦（我老曹朝十晚十係因為我老曹有份工，明年退休後，每日只花二十分鐘就已足夠）。 眼見自由黨同劉皇發的事件，令人嘆氣，俗語有謂：不聾不啞、不配當家；作為當家最好有點聾、有點啞，但眼睛唔能夠盲。搞到今日咁的田地，有人聽得太多或者講得太多，但就睇得太少。 到今日，你仲相信價值投資法咩？何謂物有所值？大家不妨參考會計技巧。 同樣一項資產，以唔同入賬方式，可以產生唔同結果。 會計入賬技巧 問你服未 一、將上述資產列入「Held-to-Maturity」，即持有至到期，就列入資產負債表內，在到期前無論該資產升跌都唔影響盈虧賬（Profit and Loss Statement），甚至到期日亦只係令資產升值或撇賬。 二、將它列入「Held for trading」，作短期買賣之用，就必須按會計日市值入賬，如升值就產生盈利入「未實現盈利」，如跌價就入「未實現虧損」。如上述資產冇市價就列入 Valuing Level 3 assets（透過估值反映價值），至於估值本身更加係一項藝術。 三、第三種入賬方式係入「Available-for-Sale」作出售用途。上述資產既唔入資產負債表，亦唔入盈虧賬，而入equity A�C。可以睇晒成本年報都搵唔到，又可以突然出現，總之任由公司領導層喜歡；一般只會在股東資金欄內出現。 唔單止咁，仲有唔同會計制度可供選擇。 A、International Accounting Standard （IAS），即國際認可會計標準（美國上市公司仲未採用）。B、金融業會計標準（Financial Accounting Standards Board所發Statement 159，目的係增加金融業透明度，簡稱FASB Statement 159），由近期美資金融機構大量出事，各位亦知道美國金融機構透明度有幾高。 經過呢次事件後，美國上市機構頭六百間將在2010年首先採用IAS標準。不幸的事係近日資本市場正面對信貸危機，上述做法將加快那D被 「inflated」資產負債表去槓桿化（de-leveraging），以便2010年透明度增加時，冇咁多衰野曝光。此時此刻收緊會計制度，明年的美 股又點睇？ 今年起美國已進入失落新世代（Lost Decade），情況有如1990年日本，亦曾經在1979至86年拉丁美洲出現，或美國1910至20年。投資者在金融市場損失巨大，美國人必須削減開 支，未來唔係滯脹（1996至80年先至係滯脹），而係物價基本上穩定，但因股價同樓價不斷萎縮，情況又好似1997年第二季後的香港，我地亦曾進入失落 新世代。Oppenheimer & Co分析員Meredith Whitney認為，金融危機一個接一個而來，大量信貸失去，前景令人擔心。

Share this:

火煋人

「殭屍公司」逐間爆 2008年09月16日（星期二） 9月15日，周一。聯儲局宣布會繼續提供貸款去令金融市場平靜落來。因巴克萊同埋美國銀行放棄收購雷曼兄弟，周一雷曼已申請破產保護令，同時宣布繼續為證 券同埋資產管理等業務搵買家。有一百五十八年歷史的雷曼目前負債超過6130億美元，正式申請破產。雷曼1850年成立，上周股價急跌77％，在周一宣布 破產。International Swaps and Derivatives Association（ISDA，有二百一十八間銀行會員）宣布應付方法，主因係聯儲局已經唔肯承包雷曼的呆壞賬。 萬億美元Alt-A貸款危危乎 又一個周日，又一大件事。上周六本欄已列出「殭屍公司」名單，繼雷曼之後未來又係邊間？AIG情況迅速惡化，股價較高峰下跌79.2％，正尋求注資。今年 第一季虧損78.7億美元、第二季虧損53.6億美元，上周五股價跌31％，公司計劃出售ILFC（飛機租賃公司）同埋出售投資業務畀私募基金百仕通。目 前AIG有1萬億美元資產，但股東資金只有780億美元。Washington Mutual第二季虧損45億美元，其中34億美元來自住房；股價一度見十八年內最低的1.75美元，相對舊年8月23日高位足足回落96％。穆 同埋標 普雙雙將呢間公司的債券評級降至「垃圾債券」，而呢間公司所發的商業票據（CD）的利率，反映呢間公司有清盤危險。 八月十五係中秋，有人快活有人愁；雷曼同AIG股東認真愁，持住美林股票的股東就快活過神仙。美國銀行宣布以總值500億美元收購美林證券，平均每股29美元，較9月12日收市價17.05美元為高。 次按危機已爆發，Alt-A樓按問題又點解救？上述樓按條件係首三年只畀利息，息率係6.25厘，第四年起利率升上9.6％。2006年所發行的Alt- A貸款已經有16％過期六十日仲未還款。三百萬個Alt-A樓按者涉及資金1萬億美元，超過次按總數8550億美元。超過70％ Alt-A按揭者唔係誇大自己入息，就係高估樓價，在樓價上升期梗係冇問題啦，但當樓價回落期又係另一回事。Wachovia有上述貸款1220億美元、 Washington Mutual有530億美元，未來日子壓力十分之大。 S&P�Case Shiller指數由2006年至今跌幅已經超過15％，部分城市好似邁阿密、拉斯維加斯、鳳凰城等跌幅已達30％，估計最終跌幅50％。隨住「兩房」唔 再提供廉價貸款，有人估計未來樓按利率可能高達9厘至10厘，而唔係依家的三十年期固定利率5.93厘。 呢次美國政府發「更優先股」，令「兩房」360億美元優先股市值大跌70％到80％，目前25美元票面值優先股市值只有1.5美元至2.5美元，因為唔派 息，影響之下，美林同埋Wachovia的優先股有14厘息（1美元票面只值60美仙）、AIG有14厘，甚至JP摩根大通亦只有9厘。雷曼兄弟上周五優 先股有27厘，可換股優先股有23％。 格蛇認為舊年開始的次按危機，在一個世紀之內只發生一次，未來會有更多公司破產。 新加坡投資公司擔心全球經濟已陷入九十年代的日式通縮漩渦之中。債券通縮（debt deflation）同埋去槓桿化（deleveraging）引發日本的地產同埋股市價格回落；舊年至今美國金融機構虧損超過5000億美元，信貸同埋 股票市場失去11萬億美元市值；美國樓價回落令到超過十間大貸款機構出事，其中最大件事係房利美同埋房貸美。 高盛估計半個世界經濟已面對衰退威脅；UBS分析員相信明年全球經濟出現衰退機會超過25％。日本GDP 今年第二季負增長3％，歐羅區更加係負0.2％。 準備面對樓股「失落年代」重臨 今日台灣、印度同歐洲股市跌幅在4％至5％；UBS股價回落7.2％、麥格理回落10％、澳洲Centro Properties Group回落31％成72澳仙，因唔少債券9月30日到期。金礦股Lihir Gold升15％成2.09澳元。油價跌穿每桶100美元，因為擔心全球經濟衰退而減少用油；出現金升油跌的現象。 1990年日本股市、樓市泡沫爆破的歷史經驗並冇阻止1997年第三季香港股市、樓市泡沫爆破出現；同樣冇阻止舊年英、美樓市、股市泡沫爆破出現。日本政 府遲遲（或拒絕）解決本身的問題，引發「失落十年」的日股在2003年4月先至見底。香港政府決定維持聯匯制度，令本港樓市衰落六年半，美國優點係舊年8 月爆發次按危機後已迅速處理，但需時幾耐？事後先至清晰。只係雷曼兄弟需要出售資產已經達6000億美元。 8月份美國有三百九十萬間住房未能售出，係1982年以來最多，相等於十一點一個月供應量，高出2005年高峰期四點六個月的二點五倍。8月份被接管住宅三十萬三千八百七十九間，較一年前升27％，亦相對前最高接管紀錄，即係今年5月二十七萬三千零一間多12％。 Thomson路透社估計今年第三季標普五百成分股純利係負增長1.6％，呢個係2002年第二季以來第一次連續五季純利負增長，原因係對雷曼兄弟純利評 估由每股負2.49元改為每股負5.46元，即係金融項目係負增長5.9％、能源升59％、消費品負7％。換言之，今年第三季純利唔少依靠能源股支牚，如 果將能源股同金融股剔除，今年第三季純利升幅估計係3.1％。 中國人民銀行決定下調貸款基準利率0.27厘，存款準備金率除工商銀行、農業銀行、中國銀行、建設銀行、交通銀行、郵政儲蓄銀行外，其餘下調一個百分點；汶川地震重災區更下調2個百分點。但存款利率唔減。上述決定對目前樓價支持有限，但對第四季的銀行純利就有不利影響。 大陸「三假」樓市炒家累死銀行 深圳樓市愈來愈多買樓的人變成「負翁」，跟住係斷供潮。過去一手樓違規貸款花樣百出，二手樓亦一樣，唔少人利用陰陽購房合同拉高房價，向銀行騙取更高額的 貸款，接近「零首付」或「低首付」。唔少地產機構同評估公司同銀行有長期合作關係，銀行一般都隻眼開、隻眼閉，反正幾個月後炒樓的人已經拋售手上幾層樓獲 利。如果依家真係要供，而房價較去年最高17350元一方米下跌已超過30％，一D炒樓的人決定「斷供」，估計涉及銀碼已超過1000億元人民幣。 銀行面對「假價格、假身份、假首付」三假情況下都唔知點算好。唔少炒樓的人唔單止係「零首付」或「低首付」，而且係「假身份」（身份證係借番來的），銀行 手上的資料好多都係「假」的。舊年各銀行搶客，對房貸政策執行唔嚴、審查唔嚴，依家面對「斷供」都幾頭痕。今年6月止，銀行的住房不良貸款準備金只佔總貸 款0.63％，在不良貸款率大幅上升壓力下，仲可唔可以應付到？舊年違規房貸，今年又點樣應付？ 8月內地樓價只係比去年同期上升1％，即今年9月起中國樓價較一年前正式進入回落期！萬科上海八大項目趁中秋節之際促銷，其中萬科金色雅築樓價較一個月前 減價30％，變成減價標杆角色。事實上，減價早已經在7、8月開始，只係萬科將呢個消息公開化。8月18日內環長壽區中遠兩灣城二十九個套房成交價 13842元一方米，較上半年21049元下跌7207元，跌幅34.2％。大華錦繡華城五套房售12079元一方米，較上半年17740元跌 31.56％。 以前係暗中減價，依家係明降。好似金地發展為迎接萬科減價戰，在三林板塊8月初仲賣18000元一方米，9月一下子減到14000元一方米，減幅22％。 由於萬科在三林板塊有五個項目、存貨二百萬方米；金地只係有兩個項目總體三十萬方米，金地大幅減價令到萬科處境尷尬。三林板塊在浦東，在2006年年底前 樓價以8000元一方米出售，都仲有錢賺，舊年一下子推高到18000元，今年9月減價30％後仲有好大的利潤空間，估計萬科將繼續減價迎戰金地。 SOHO中國（410）潘石屹認為，中國住宅市場已下滑到災難邊緣。土地收益佔唔少城市財政收入一半，依家招拍掛地塊之言不斷流傳，影響地方政府財政收 入，唔少地方政府已經將土地大幅降價求售，好似武漢每畝土地減價到482.45萬元。D人在度擔心萬科事件引發的蝴蝶效應一發不可收拾。我老曹相信中國樓 市在明年仍然係調整期，但唔會大跌；中央已經開始放寬銀根，加上中國經濟仍處高增長期，需求量仍十分旺盛。 A股見底要解決一件事 世界經濟一體化，上海樓價以當地人均收入計仍係偏高，但同香港、紐約、倫敦比較仍係偏低，長遠來講「此消彼長」十分正常，估計資金大方向係從紐約、倫敦及香港流向上海，形成上海樓價抗跌能力特強。 環渤海園係度形成，令天津樓價亦有一定的抗跌力；比較擔心係深圳、廣州同埋珠海的樓，短期仍有震盪，估計明年先至見底回升。 我老曹唔認同大摩所發表的「大陸房市可能崩潰論」，估計減價25％至30％後，仍有10％到15％下調空間，明年下半年樓價應可企穩回升。 8月份中國工業生產上升12.8％（7月14.7％）；電力連續第五個月以5.1％速度上升；水泥增產1.5％（7月6.3％）；中國鋁業（2600）宣布減產10％；有色金屬銅、鉛、錫、鎳價都在度下跌。 金價由1030美元回落，其後跌穿875美元後，在735美元重獲支持回升。換言之，在735至800美元之間可以吸納黃金ETF。 A股熊市已經長達十一個月（1973�74年港股熊市二十二個月），滬深指數累計下跌了65％（1973�74年恒指跌幅91.5％），P/E十五點○七 倍（1974年12月恒指P/E六點七倍），市淨值二點四八倍（1974年12月恒指市淨值一倍）。呢次A股熊市主角係大小非（香港係1973年一股送六 股或一股拆為十股後增加股票供應量），內地93％股民今年出現虧損，幅度在60％以上（當年香港冇呢方面的統計數字）。 明年股改限售股解禁，市值17285億元，首發限售股解禁市值20988億元；2010年股改限售股解禁市值大降至4080億元，首發限售股解禁為市值高 達30369億元。即2009及2010年係股改限制股及首發限售股解禁高峰期。在上述壓力之下，政府點樣救市？會唔會重演1973�74年香港的超級大 熊市事件？只有時間先至可以話畀各位知。JP摩根數字上半年一千六百一十九間內地上市公司純利上升16％；舊年同期上升49％。四大內地銀行上半年純利上 升38％至81％，因息差擴闊，明年上半年四大銀行純利升幅肯定收窄。 假期過後，滬深三百指數2000點在減息消息協助下仲可唔可以守得住？從4000點開始有人話個市見底，然後係3500點、3000點、2500點、2000點，依家都證明唔係，相信市場真正見底係「大小非」流通股完全成為流通股過程之後。 [ 本帖最後由 羊仔 於 2008-9-17 10:58 編輯 ]

Share this:

火煋人

滿街鮮血忌亂博反彈 2008年09月17日（星期三） 　　9月16日，周二。恒生指數跌1052.29，收18300.61，成交884.19億元。9月期指跌1072點，收 18233點，低水。跌幅係今年內第三大（今年1月22日一日之內下跌2061點），冇乜值得大驚小怪；何況18000點只係重返舊年上半年水平，今時今 日客觀環境肯定比起舊年上半年差。 用火水去救火?愈救愈火 　　日本銀行注資25000億日圓入資本市場，但日經平均指數仍跌 4.95%，Mizuko金融跌停板、Aozora銀行跌16%。南韓股市回落6.1%，Mirae Asset及Haruko證券跌15%停板。台灣股市跌4.9%，金融分類指數跌6.8%。比起其他地方股市，香港股市算係咁。 　　保爾森 9月發行「更優先股」收購「兩房」，唔單止令「兩房」優先股大跌，亦都令其他企業所發的優先股回落。業界估計9月7日至今，銀行要為優先股撥備最少850 億美元，Envision Capital Management主席認為呢次政府係用火水去救火，結果愈救愈火。過去唔少企業可透過發行優先股集資，經政府呢次發行「更優先股」後，連優先股亦冇人 信，令各企業集資更困難，上述亦都係雷曼兄弟破產部分理由。雷曼事件令倫敦隔夜錢上升3.33厘見6.44厘，雖然歐洲、英倫銀行及瑞士國民銀行第二日注 資，但短期利率仍然急升。 　　AIG在美股開市前再跌38%，成2.97美元，即總市值由2006年年底1900億美元跌至130億美元，估計第三季撥備300億美元。 　　Washington Mutual債券被標普降為垃圾級，又令到股價曾急跌逾兩成。 　　花旗推介港交所（388），估計今年每股獲利4.07元，較舊年減少19.2％，O十九點九倍，目標價125.1元；華潤置地（1109）今年每股獲 利 0.5元，升71.9％，O十四點五倍，目標價17.11元；中華煤氣（003）今年每股獲利0.7元，減少56.1％，O二十六倍，目標價20元；冠捷 科技（903）估計今年每股獲利8美仙，增長1.9％，O四點一倍，目標價4.5元；興達國際（1899）今年每股獲利26.8仙，升11.4％，O四點 八倍，目標價2.1元。 　　中原地產領先指數9月7日較一個禮拜前跌1.44％，係三十三星期內最低，代表港島區物業較一個禮拜前跌 2.61％、九龍區物業跌1.09％、新界東跌0.09％、新界西跌0.68％。至9月11日止成交量七千二百四十七宗，係1996年以來最低。花旗估計 未來本港住宅樓價有20％回落空間（我老曹唔同意上述分析，因為本港缺乏住宅樓供應量），但同意未來十二個月本港樓價進入調整期。 　　滬深三百回落3.72%，險守2000點。通常第一次減息係壞消息，唔適宜入市（如非經濟惡劣，何需減息？），例如2001年1月本港減息，股市要到2003年4月先至改變方向。中國今年9月減息，何時好轉？恐怕亦有排等。 過分槓桿化惹禍上絕路 　　在美國如果你唔能夠Go Big（例如「兩房」）便Go First（最先申請破產，好似貝爾斯登）；如果你唔夠大，又唔最先申請破產以便政府接管，就只有Go Broke（自己申請破產保護令，好似雷曼兄弟）。貝爾斯登被接管前有90000億美元衍生產品，其中40％由JP摩根大通持有，虧損由政府承包，有人認 為JP摩根收購貝爾斯登係JP摩根自救之道，政府在呢件事上吃了大虧。「兩房」如破產，可影響美日及中美兩國關係，美國政府負擔唔起，只有硬食。 　　至於雷曼兄弟6300億美元資產中有幾多係呆壞賬？AIG資產10000億美元，內裏有幾多係呆壞賬？擔心破產事件有如三水佬睇走馬燈；加上各國主權 基金亦決定謀定而後動，唔再有瞬時衝動（高盛及JP摩根大通正在度協助AIG集資750億美元，不過穆 同標普已降AIG評級）。AIG員工超過十萬，在 超過一百個國家銷售保險生意，周二穆 將AIG信用由Aa3降為A2，標普將評級由AA-降至A-，惠譽將AA-降至A，今年內股價跌幅超過90%。 　　周一標普五百金融股分類指數跌9％，或由舊年10月至今失去12700億美元市值。 　　對沖基金Seabreeze Partners Management主席Doug Kass批評美國金融市場過分槓桿化係出事因由，每1美元股本槓桿比率高過30美元，只要資產值回落4％便可令股本消失。你話幾危險！Wachovia周 一跌25％係另一間令人擔心的銀行，德銀分析員Mike Mayo認為，德銀持有太多Alt-A按揭。Alt-A市場約10000億美元，為超過三百萬樓按者提供三年低息貸款（免供），到第四年起就要付高息，較 次按市場8550億美元更大。金融機構在次按市場虧損已達5000億美元，大量Alt-A按揭明年起到期，明年虧損有幾大？此一市場最大貸款銀行係 Wachovia，高達1220億美元，其次係Washington Mutual 530億美元……。能夠提供的忠告──Take Shelter或Cover up，今時今日保護資本（protect your capital）對比點樣獲利（profit from the market）更為重要。 下個復甦期2010年 　　Stijn Claessens, M. Ayhan Kose同埋Marco E.Terrones在今年8月5日為IMF所寫的文章：在宏觀經濟中衰退（Recessions）乃商業或金融周期。衰退期中同時出現信貸壓碎 （credit crunches），將會加深衰退幅度，如同時出現樓價爆破（House price busts）將延長衰退期。例子一係1990年日本；例子二係1997年第三季香港；美國會唔會係例子三？舊年10月起美國呢次衰退期應較2000年科網 股泡沫爆破幅度更深，日子更長。上一次股市回落期由2000年1月14日至02年10月10日，跌幅38.75%。如上述理論正確，下一個復甦期在 2010年而唔係明年。 　　假設未來美國樓價再回落10％至15％，美國七千八百萬個屋主財政情況會點？依家約有一半仲在度供樓，至今樓按中只有2.75％貸款變成呆壞賬、 6.4％延期供款。舊年物業買賣85％來自二手樓，未來二十年退休人士比較在職人士人口比例較2006年上升67％，即係舊年呢次樓價見頂，唔應該係短期 頂而係長期頂。因1946至64年出生的戰後嬰兒，七十年代開始加入社會工作，引發1970年起的置業潮，令美國中產階級大量湧現。2006年係第一批戰 後嬰兒達到六十歲，2011年係最後一批戰後嬰兒達六十五歲；即2011年至2029年，退休人士人口將係2006年同期三倍，而年輕人士人口卻接近冇 變。大部分人在二十五至四十五歲前置業；1970年係首批戰後嬰兒開始置業，明年將係最後一批（即1964年出生，到四十五歲先至有能力置業者）。未來美 國置業人口將大幅下滑，未來二十三年美國樓價將不斷走下坡。 　　若有一百人在唔同年歲，有幾多人置業同埋賣樓？原來最多人在三十至三十四歲置業，一百人中有三點六人，其後走下坡。反之六十九歲起賣樓人士大增，年紀 愈大愈多人賣樓【圖】。此乃為何年輕人社會樓價必反覆上升，反之老人社會樓價必反覆回落。美國社會舊年起步入老人社會，一如1990年起日本。 　　在倫敦雷曼兄弟佔用金絲省碼頭一百萬呎樓面，雷曼倒閉一定影響倫敦金絲雀碼頭的樓價！佢地在紐約更佔用了二百七十萬呎樓面。 　　倫敦同紐約肯定係受害者。在華爾街的Thomas Pink百貨公司，男性衫居然可賣450美元（3500港元）一件，實在太折墮啦。 　　依家一個周末已經有一萬一千位金融從業員失業（倫敦二萬人，因雷曼兄弟二萬五千位員工主要在紐約同倫敦返工）。美國銀行收購美林後，亦開始裁員！ 　　2006年5%紐約打工仔從事金融業，其收入佔全城四分一（或600億美元），真係有咁耐風流有咁耐折墮。 雷曼爆煲麻煩對對開始 　　人人都話自己嚴守紀律；我老曹問你地在熊市中，你有冇三七分（即只動用30％資本）？有冇遵守止蝕唔止賺，即投資項目一旦由高峰回落15％便睇睇，跌 幅達20％宜立即止蝕。在熊市中博反彈乃專業行為，一般散戶係唔適宜玩，你既非專業又學人去博反彈？打電話畀我老曹問某隻股點睇係冇用，因為我老曹都唔 知。上述三大熊市戒條如果你守唔住，冇人幫到你。第四戒條係追隨趨勢不可猜測走勢，呢一條連唔少專家都犯，不然大行又點會破產？ 　　雷曼兄弟破產，的確滿街鮮血（Blood in the Street），但呢個唔係入市的時機，因為麻煩正開始（Trouble in the Market）。呢次唔係1989年「六四」事件，而係金融市場第二次大爆炸同埋beggar thy neighbour貿易政策開始。舊年8月最先係美國透過美元貶值同減息，將次按虧損擴散到其他國家；今年7月英國照辦煮碗，透過英鎊貶值，將英國樓按虧 損向其他國家擴散。 　　舊年起英國長達三十二年樓價上升期結束，時間較香港1967至97年那次仲長。七十年代中期戴卓爾夫人上台開始減稅，包括減入息稅、企業稅、印花稅、 VAT……。其次亦係英國戰後首次出現強勢政府領導，令煤礦工人罷工在軍隊干預下停止。令英國經濟由戰後長期受制於工會中解放出來，結束工資推動物價上升 漩渦，減慢CPI升幅令到利率回落，樓價開始上升。過去三十二年英國樓價雖然亦有回落的日子，但大方向係向上。1992年保守黨在馬卓安領導下宣布英鎊加 入ERM，卻受到索羅斯攻擊而大幅貶值，令英國消費水平較歐洲低，更多資金流向英國。工黨上台後唔少人擔心工會勢力又再上升，原來連工黨亦認同戴卓爾夫人 的自由經濟政策……。 [ 本帖最後由 羊仔 於 2008-9-18 09:41 編輯 ]

Share this:

火煋人

黃金唔係避難所 2008年09月18日 (星期四) 9月17日，周三。恒生指數跌663.42，並以17637.19收市（全日最低），成交762億元；9月期指跌527點，收17698點，高水。多日內低水現象今天扭轉，唔排除周四港股反彈。事關由舊年10月30日31958點跌到今年3月18日20572點，下跌11386點或35.62％，反彈至5月5日26387點，如回落35.62％即9399點，即支持位係16988點（容許3％出錯率），此乃17000點有支持理由（N理論）。繼跌穿今年3月18日重大支持位後，另一重大支持位在今年9月底出現，估計在17000點附近。 花旗推介大成生化（809）估計今年每股獲利40仙，減少1.2％，P/E六點四倍，目標價4.95元；維達國際（3331）估計今年每股獲利13仙，上升24.6％，P/E十八點一倍，目標價3.3元。 滬深三百指數跌3.57％，收1929.14。由舊年10月17日5891.72起計，至今累計跌幅達67.25％，滬深三百呢類新興市場熊市跌幅十分驚人，往往跌幅達到80％或以上先至會結束，所以熊市莫估底；由第一次銀行減息到股市止跌回升，需時幾耐？香港係二十八個月，美國係二十二個月，中國需要幾多時間則木宰羊。 恒指仲未係熊三 在熊市二期捉熊腳係極之專業行為（75％散戶無法做到）。有人認為依家已經係熊三（熊三恒指P/E係六倍到十二倍）。以P/E來睇似乎已進入熊三，但家陣恒指純利水分太多（唔少上市公司純利來自物業重估），雖然恒指P/E已低於十二倍，但我老曹認為仲未係熊三，如剔除物業重估純利，恒指P/E仍然在十二倍之上，未進入熊三最低要求。 當然有人可以Long又賺，Short又賺，認真了不起（真係唔明白咁高本領點解仲要賣文為生？），至於我老曹今年大部分日子只係識持盈保泰做觀察者（observer），今年睇住貝爾斯登出事，之後係「兩房」，然後係雷曼兄弟、美林證券同AIG，跟住係Washington Mutual同埋Wachovia……。佢地D員工可能一如AIG保險從業員（一覺訓醒，發現自己變成公務員）。我老曹更擔心市場會在明年爆煲。 上月新屋動工減少6.2%，約八十九萬五千間，係1991年1月七十九萬八千間以來最少，比去年8月減少33.1%。 第二季收支赤字1831億美元，較第一季1756億美元上升，美國經濟情況仍在轉壞中。 聯邦儲備局最終動用850億美元去挽救AIG（美國最大保險集團），正正係不救不救還需救，因市場上已經冇救火隊，只剩得政府。AIG股價跌94％，或由市值1800億美元跌至108億美元，政府注資850億美元後可佔擴大股本79.9％，希望牚得住1萬億美元資產貶值10％（約1000億美元）啦。 周一為穩定金融市場，聯儲局向銀行體系注資500億美元，先至將隔夜錢利率由3.75厘㩒低至2厘；周二再注資700億美元，將一開市升上3.5厘的隔夜錢又再㩒低……；歐洲央行注資700億歐羅（998億美元）、日本銀行注資25000億日圓（240億美元）、英倫銀行注資200億英鎊（360億美元），仲有瑞士、澳洲等。今天日本銀行再注資3萬億日圓（293億美元）、澳洲注資42.85億澳元（34.5億美元）……。環球央行今個禮拜已注資超過2000億美元去阻止信貸危機進一步惡化，問題係捱得幾耐？繼8500億美元次按市場爆破後（至今各金融機構已公布虧損5000億美元），第二個原子彈已投下，就係市值1萬億美元的市場，過去曾經為三百萬樓按者提供三年低息貸款兼免供，到第四年卻要負擔9厘息！ CDS市場蒸發12000億 樓按明年起陸續到期。1929年華爾街危機後，令貸款出現大量呆壞賬，引致數千間銀行倒閉，最後出現大蕭條。今日美國有FDIC（Federal Deposit Insurance Corp.），加上有問題銀行只有百幾間，所以影響唔係好大。但次按市場同埋Alt-A市場，前者市值8500億美元，後者1萬億美元，最後仲有CDS（Credit-Default Swaps）市場市值62萬億美元。過去雷曼兄弟同埋AIG係CDS莊家之一（market maker）；依家一間宣布破產，另一間被政府接管。CDS莊家少了兩大戶，咁CDS市場又會點？柏克萊銀行2月份曾作評估：一間金融機構如持有二者萬億美元CDS，一旦市場唔活躍，可產生360億至470億美元市值蒸發。如按今年2月柏克萊銀行計算標準，CDS市場只因缺乏莊家已可蒸發12000億美元市值，你話點算好？CDS十幾年前開始發展，最初係協助銀行對沖貸款損失，漸漸成為投機者天堂，過去七年呢個市場增長一百倍。直到2005年9月，在紐約聯儲銀行總裁Timothy F.Geithner要求下，先至由十七位dealers聯合起來成立一間結算所，開始管理呢個市場，因為聯儲局要求Chicago-based Clearing Corp.先獲銀行牌照，以便聯儲局可以接手呢個市場，結果係不了了之。所以今日的CDS市場仍然係依賴銀行之間互信；依家雷曼兄弟破產、AIG被政府接管，未來CDS市場會點樣？如流通性下降而貶值12000億美元的話，各金融機構會受到極大打擊，仲有幾多間可以牚得住？ 退休金畀人偷走了 歷史正在度製造中，由舊年10月開始的股票市場、外匯市場、黃金市場同油價市場相信都成為將來歷史的一部分；真係一波未平、一波又起，災難接二連三發生。 債券大王格羅斯認為環球信貸仍然在度壓碎之中，而且繼續惡化。 Oppenheimer &Co.分析員認為，只要樓價下滑情況仲在度惡化，信貸壓碎就會持續下去。 邊個偷走了你的退休金？過去存款4至5厘息真係好容易賺，依家只有2厘。過去樓價平均每年上升7％，但2006年10月至今美國樓價卻回落15％；股市舊年10月至今跌幅已經超過25％……。數以百萬計的美國人發現自己突然間要面對高通脹同埋低收入（存款利息大減），同埋要面對資產最少失去了25％價值……。Top Stock Insights策略員Ian Wyatt接受《巴隆氏》訪問時話：過去二十年自己的職責係為個別人士提供投資顧問服務，但今年卻發現愈來愈多美國人的退休金畀人偷走了！過去四年美元貶值50％，再加上接二連三災難，退休人士手上的資產已所餘無幾。至今天為止，股市回落期仍未夠一周年，跌幅不單止已將舊年升幅抹晒，今天道指已經重返1999年水平（十年升幅唔見了）。甚至連黃金都唔係資金避難所！只係9月份已經回落5％。至於資源股更跌到一塌糊塗。過去股市與商品價格背馳的現象在今年亦消失，尤其係今年7月15日起，期貨價下跌速度之急，超過一半商品至今跌幅超過20％。 金價由2001年2月16日的253.85美元起步，今年3月17日對對完成三浪向上（第一浪升至2003年，然後調整到2004年年底，第二浪升至2006年初接近700美元先至調整，第三浪在今年3月17日見1032.7美元後，進入A、B、C下跌浪）。估計今年9月11日金價736.7美元係浪A反彈上浪B，最低浪C應跌穿736.7美元先至完成大調整。如果調整前升幅係38％，金價可見740美元，9月11日低點736.7美元係最小調整幅度，如調整前升幅50％，金價可見644美元，如調整前升幅61.8％，金價最低可見553美元。後市展望有三分一機會金價最低係736.7美元，即9月11日的低點。最大可能（A、B、C浪）金價在不久將來見644美元，最淡可見553美元，我老曹重新強調一次，現水平黃金唔係資金避難所，只係另一類投資項目。 金融危機令原材料需求增長放緩。IMF估計今年第四季美國GDP增長率只有1％，然後漸漸回升到明年的1.5％，歐羅區今年第四季GDP增長率更加只有四分三％，明年1.5％，甚至新興市場今年第四季GDP增長率高於6％，明年7％，結果係全球今年第四季GDP上升3％，明年4％，上述情況令原材料價格有下調空間。 次按危機下，「向鄰國乞食」金融政策在舊年8月由美國開始，美國財政部秘書Lany Summers認為，自由貿易令過去二十年全球經濟高速增長，同樣因素亦在度引發衰退。因為唔少國家佢地出口那陣講自由貿易，入口那陣講保護自己國民市場。美國出入口加起來佔GDP 29％，在來自亞洲、中東、拉丁美洲國家的產品有大量湧入美國的壓力，但呢D國家同時又保護自己市場，唔准第二D國家產品自由進入，造成貿易不平衡，最終引發全球經濟衰退。 財富縮水低P/E時代來臨 1786年工業革命在英國發生，人類首次開啟創造財富的秘密，就係發明、科學同埋製造；隨之而來係現代航運業同埋通訊業。透過發明同埋科學，我地可以生產賣到錢的東西；再透過航運同埋通訊，我地可以將賣到錢的東西賣到全球！我地用資本建立工廠；吸納勞工為我地做事，再將自己的想法、念頭透過發明同埋科學變成產品、行銷海外，賺取巨大財富。 漸漸經濟發達國用資本去賺取利潤，再唔係建立工廠。透過銀行存貸去賺取利潤，透過股市、外匯市場去賺取更大利潤……。最近一百年美國在呢方面更成為火車頭。八十年代開始新興國家人民努力工作，拚命出口，賺取以美國為首先進國家的錢，然後再將金錢借番畀美國為首的先進國，購買自己生產的產品，令全球經濟繁榮。2003年至舊年，上述流轉速度比七十年代初期快幾倍，但上述做法大大違反創造財富的方式，終於次按危機在舊年出現，美國同埋先進國人民在金融市場出現巨額虧損，未來再冇金錢向新興國家購買出口產品，擔心一次全球性經濟萎期今年已開始。 根據「The Millionaire Next Door」估計，舊年美國有九百二十萬個家庭擁有100萬美元財富（包括自住物業），新「百萬富翁」產生，升幅係2004年21％、05年11％、06年8％，同埋07年2％。舊年第四季同埋今年第一季美國失去財富數字係2萬億美元，雖然係咁，美國人仍然擁有70萬億美元資產同埋14.5萬億美元負債；即係美國人財富由1981年10萬億美元到2006年57萬億美元，或平均每年上升7.2％，估計由舊年開始每年財富增長速度降至2.5％及3％。為期最少十五年。上述情況可以令美股P/E不斷下降，如歷史有參考價值，未來五年至七年情況仍然係咁，即係低P/E時代來臨。

Share this:

火煋人

下一站……19000點 2008年09月19日（星期五） 9月18日，周四。恒生指數最低見16283.72，收市17632.46；成交1022.2億元，典型惡性拋售。16283點拋離250天移動平均數24694點達34％，可見投資者幾咁歇斯底里。 「阿公」救市支持中期反彈 如無意外，16283點又係熊市二期內另一隻十分重要的熊腳，證明Buy in September分析正確（舊年10月30日恒指31958點拋離250天21548點48.3％，係牛市見頂期；呢次恒指只拋離250天線34％，未足以證明係熊三）。50天移動平均線在3月19日那日跌穿250天線24014點，確認股市進入熊市那日開始出現熊市二期中最大的一次反彈（在5月完成）。 由舊年10月30日至今剛好完成N形下跌走勢；理論上，恒指可上望50天移動平均線，家陣在21262點，但正在度回落中，短期大市有條件回升到19300點至21000點之間任何一點；我老曹再強調一次，在熊市二期博反彈乃極之專業行為，75％散戶做唔到。如果呢次係金融海嘯，必定來得快去得快。 9月19日起，內地證券交易印花稅改為單邊徵稅；匯金今天將入市買入工行、建行及中行股份，中央終於出手救市。 法國巴黎銀行Erwin Sanft告訴記者，下月有一個經濟刺激計劃，包括提高退稅率、放鬆價格管制、上調銀行貸款配額。 瑞銀將中國股市評級由「中性」改為「增持」，摩根大通認為可「提振股市信心」，以依家估計純利，未來P/E十二倍計仍不算太便宜，但可支持一次中期反彈。 聯儲局連同各國央行共注資2470億美元去穩定股市，令倫敦銀行同業拆息由5厘高位重返2厘正常水平。 黃金亦一樣由今年3月1038美元回落到735美元，下跌303美元，如反彈前跌幅31.8％，可見831美元（此乃最少的升幅）如反彈前跌幅50％，可見886.5美元，上述高點今天亦跌穿，極限係反彈前跌幅61.8％，見922美元。估計呢次黃金浪B在886美元至922美元之間完成，係唔係今年的892美元就唔清楚，然後進入浪C（應該低於735美元）。 今天香港股市表現令人失望，已進入第七天回落，曾經跌過1353點，證明本港分析員唔夠班！最惡劣的跌幅達7.7％（前六個交易天跌15.2％，即總共下跌22.9％）。太多不學無術的分析員充斥市場，係港股表現如此非理性理由；各位如因此而失去你的恤衫（lose your shirt），唔怪自己又可以怪邊個？今日9月期指收市升71點，收17760點，高水，進一步確認大市短期轉勢，睇來係另一次創造中的破壞。根據達爾文進化論，適者生存乃天道。 次按危機舊年8月發生，漸漸變成金融危機，美國政府宣布注資AIG變成美元信心危機。財長保爾森事前講明唔救，忽然改變主意去救，即係代表情況比估計中壞，影響之下連高盛同埋大摩的股價亦出現急跌。救火隊員勇於救火，最後犧牲自己生命的事件會唔會出現？保爾森呢次唔救又救事件開始動搖全人類對美元的信心，引發金價急升（比原先估計升上840美元水平的升幅仲要大，最高價接近900美元，雖然係咁，上述仍然係浪B反彈，唔代表後市金價可以睇好，因為金價已完成1、2、3、4、5上升浪，進入A、B、C下跌浪同埋熊市確認訊號出現）。 通貨膨脹率8月份進入退潮，通貨收縮開始浮現出來。上述已令十年期債券利率見3.4厘，何況「兩房」所發或擔保的5萬億美元債券，2010年起進入每年減少10％。美國人開始由往日的浮誇重返腳踏實地的日子，任何國家、民族、甚至個人都唔可以靠炒發達。炒可能令你賺取第一桶金，好似已故恒生銀行的善伯同埋何添先生，第一桶金來自炒金，然後腳踏實地去經營恒生銀行，先至有輝煌成就，因為長炒必輸。 Donald Coxe係Harris Investment Management主席，今年6月才開始買賣的Coxe Commodity Strategy Fund虧損10％，係呢間公司旗下過去二十年表現最差的基金。今個禮拜一佢接受外界訪問時話，政府有意在7月份引發金融股上升去減少信貸危機壓力，但救唔到「兩房」，亦冇辦法阻止雷曼兄弟破產，卻成功令油價由7月11日的145.18美元回落，主要係引發槓桿unwind。上述行為可以引發通縮！情況有如九十年代初期，當年亦因銀行股回落，政府努力去挽救，反而引發信貸收縮。今日「兩房」已被託管、雷曼申請破產、AIG獲政府入股；GM及福特金融已經唔能夠向買車者提供信貸；Alt-A按揭問題同埋63萬億美元的CDS溶解（Meltdown），代表商品牛市結束。或者仍有人相信油價下跌有利經濟，呢次油價下跌理由唔係供應上升，而係需求減少。鋁、鐵、鎳、鋅、銅價都在度下跌；反映商品需求的波羅的海乾貨輪指數亦形成雙頭破頸走勢，船租價格正在大幅滑落。此乃Donald Coxe旗下基金虧損10％後，作出止蝕的理由。 2003年至舊年的美股繁榮係透過再膨脹，呢次泡沫去年10月已爆破，大部分投資銀行亦應該為自己過去的行為付出代價。 衍生工具玩死了雷曼 唔單止美國係咁，英國情況仲差，北岩銀行已被接管，英國房地產一樣進入回落期。 摩根大通估計中國央行下月再減息，協助中國經濟軟著陸。 德銀表示將減少CDS方面交易。 1997年7月至2003年4月係本港中產階級財富大轉移期，唔少中產家庭一生從此改變。舊年11月至今係超級富豪財富大轉移期，唔少從事衍生工具投資的大戶都受到重創（唔少上市公司今年上半年報告中顯示衍生工具虧損以億元計），所謂Private-equity,Hedge fund ,Pension fund……。愈複雜的結構性產品，虧損愈大。全球超級富豪如畢非德亦損失20％以上財富，水平較差者失去50％以上身家者比比皆是。大部分結構性投資工具（structured investment vehicles）唔單止可以逃避資產負債表審查，因為off balance-sheet，同時亦可以逃避監管機構的法眼。可惜逃唔過上帝的耳目，當審判日來臨，人人現形。貝爾斯登被收購、雷曼兄弟破產、美林控制權易手、AIG被接管係未引爆CDS信心？我老曹真係木宰羊。 紐約大學經濟學家Mark Gertler認為，呢次係美國三十年代大蕭條後最嚴重的一次，而且向全球擴散，好似歐洲同英國，甚至日本同埋中國。冇人再信分道揚鑣（decouple）論，而係一如2003年的沙士疫症在迅速擴散中。投資者資金大量湧去Money Markets同埋T-Bills，由此可見恐慌程度。 高盛經濟學家Jan Hatzius估計，舊年金融機構撥備4080億元同埋集資3670億美元，仍然唔足夠。因為去槓桿化（deleveraging）已經開始，情況比九十年代初期Saving and loan虧損仲要大。好似AIG今年6月30日止涉及的CDS金額高達4460億美元，今年下半年虧損幾多？聯儲局舊年有8000億美元國庫券，上周為止只剩低4800億美元，其中2000億美元已用作「有條件證券抵押」，真正即時能夠動用資金係2800億元，今個禮拜再撥出850億美元去挽救AIG，即係家陣聯儲局可動用資金少於2000億元。今個禮拜再向市場注資1000億美元，即係下個禮拜開始聯儲局可動用資金已經唔足1000億元，面對63萬億美元市值的CDS，1000億美元可以做到D乜？從呢點睇局面只係暫時穩定落來，問題仍未徹底解決。 大摩宣布打算同Wachovia合併令股價回落24％，見21.75美元，典型兩個醉酒佬互相依靠站立，但可企幾耐？Wachovia銀行涉及大量ARM（adjustable-rate mortgages），上述係由2006年在收購Golden West Financial留落來的蘇州屎，如果同大摩成功合併，亦只係難兄難弟。Washington Mutual亦搵緊老竇睇數；據講富國銀行同埋花旗集團都表示有興趣。 1998年雷曼兄弟首次協助紐約聯儲銀行挽救長期資本管理公司（LTCM），理由係九十年代已經同八十年代唔同，令贏了諾貝爾獎金的人都冇辦法應付。今時今日雷曼兄弟居然自己犯了十年前LTCM的相同錯誤。突然之間那D衍生工具，好似SIV、CDO、MBS表現同典型的歷史價格變動情況唔同（modeling historical price movements），令雷曼陷入破產局面。任你擁有全球最一流金融計算人才，但天氣同人心一樣，事前難測，一如LTCM十年前一樣自以為搵到必賺的方程式，結果卻陷自己落入財務危機中。以過去所知去預測未來係永遠唔通，因為投資者情緒往往由一個極端走向另一個極端。佢地如果唔係對未來充滿憧憬，就係變得十分悲觀，好似1981年美國政府三十年債券有成14厘息，一般人都唔肯投資，今日卻賤價拋售股票去買3.5厘息的債券，而三十年代股票有10厘息亦都冇人投資。 銀行營運「變種」累事 現代金融業務令銀行漸由傳統存貸業務，走向不穩定性經營模式，好似美國的投資銀行高盛證券、摩根士丹利、美林、雷曼兄弟等。佢地透過資產證券化、槓桿作用去拓展新興金融產品，達致四兩撥千斤目的。係順境時利潤極大，一旦金融市場流動性同埋信用度逆轉，佢地即刻應付唔來。最初開始的次按危機亦因此急速演變成信貸危機、貨幣危機、投資銀行危機。唔少銀行業務已經同金融衍生交易結合一體化，令存款保險機制未能發揮作用，結果愈係金融自由化的地區受到的影響就愈大，愈係國際化、網絡化的銀行，純利影響亦最大。因此愈來愈多利潤唔係來自傳統借貸，而係透過推銷衍生產品同埋發行某D槓桿工具去賺錢，大大增加金融系統脆弱性。 資產證券化及金融產品槓桿化往往可以引起市場內互動作用同埋迅速擴散，形成對「流動性」過度敏感。傳統監管同埋資本充足比率的約束能力在信心危機下完全失去效力。 從貝爾斯登、房利美同埋房貸美、雷曼兄弟到AIG，證明金融機構的會計核算並唔可靠，因為高槓桿比率下的「資本充足比率」約束明存實亡，令整個國際金融體系穩定性變得更加脆弱，甚至可以話係不堪一擊。美國次按危機早在舊年4月發生，當時新世紀金融公司出事，理由係美國房價回落，我老曹已預測會引發金融海嘯，但大部分人不以為意，繼續炒賣股票，任由房地產市場回落（舊年4月，聯邦基金利率為5.25厘，一直維持到9月先至減息），房貸出事漸由新世紀金融公司破產擴散到全球性金融機構，引發舊年10月股市拋售潮。 聯儲局雖然急急減息，結果反令油價急升，令信貸進一步緊縮，美國住房價格進一步下滑，情況有如滾雪球，愈滾愈大。九十年代好多華爾街金融大機構對住房抵押貸款發生興趣，將佢證券化、打包同埋推出擔保證券（CDS）金融衍生產品，在市場出售。只要房價繼續走高，房產一再增值，就一定有還款來源（新債抵舊債）。房貸證券化，大量資金進入物業市場，推動房價向上，反過來令CDS更為吸引……。直到2004年，聯儲局開始加息，在十八個月內加息十七次，利率由1厘升上5.25厘，房價先至開始回落。抗風險力弱，低收入的人群開始無力還款，房貸違約事件上升，結果令CDS吸引力下降，大大減少新資金進入房市，最後引發次按危機，到今天已經變成信心危機。 作為兒童的父母，無論你係富有抑或貧窮，必需分清楚何為需要、何為奢侈。作為父母有責任滿足自己未成年子女的需要，千祈唔可以令未識賺錢的兒童養成奢侈習慣，否則你就要幫佢培育未來的搵錢興趣。 當你自己賺到錢那陣可以奢侈，但唔應該用父母的錢去過奢侈生活，以免失去賺錢的動力。 東亞銀行（023）、明興水務（402）、環能國際（8182）、智庫媒體（8173）停牌。 [ 本帖最後由 羊仔 於 2008-9-19 09:41 編輯 ]

Share this:

火煋人

細價股下周發力 2008年09月20日（星期六） 9月19日，周五。恒生指數升1695.27，收19327.73，成交1245.73億元；9月期指升1709點，收19469點，高水。代表下周一股市繼續睇好。 全球央行再放水，好耐冇見o既「水浸」局面又再出現。歐洲一開市，德銀及瑞信升15%，而澳洲麥格理升38%，全球銀行股全面上升；英國HBOS及萊斯銀行升30%､柏克萊升21%､愛爾蘭銀行升42%及UBS在蘇黎世升23%。 在香港，工商銀行(1398)升16%。恒生國企指數一天之內升近16%，創下1998年2月2日以來最大漲幅。 美國又有救市新方案 滬深三百指數升9.34%，見2073.11，重返2000點之上，唔少股份升10%停板。政府在第四季同明年初推出大規模減稅計劃，估計後市短期睇好。 保爾森同聯儲局主席著手組成新機構，作為向金融機構收購呆壞賬之用，涉及資金8000億美元，令各金融機構透過出售呆壞賬而獲再注資(呢個方法在2000年初中國亦曾使用，令內地四大銀行獲重新注資後上市。2001年日本政府亦用此法協助日本銀行股)。 呢次金融風暴起源於八十年代中在紐約引入芝加哥期權(options)及期貨(futures)發展金融衍生工具產品開始，到了九十年代初期，摩通(依家係摩根大通銀行)設計CDS(credit default swap)，呢種產品係導致貝爾斯登被接管､AIG被政府注資及雷曼兄弟宣布破產o既理由。 呢種產品最先o既目的係對沖，其後令金融機構用作寬鬆貸款，然後將佢包裝成OCDS推出市場。結果令大量資金進入樓市，在樓價上升時CDS好安全(好少人斷供)。其後AIG亦插手呢個市場，令佢迅速擴大。隨住美國樓價在2006年第三季起回落，估計未來跌幅大及漫長，因此9月18日起股市回升只係大熊市中o既浪B(跌市中o既唯一上升浪)，而唔係樓市回落o既結果。 1989年美國政府成立Resolution Trust Corp去挽救S&L危機，事後證明好成功。不過，家陣咁o既情況較二十年前難，可唔可以好似九十年代解決S&L危機咁一樣解決CDS問題？唔好咁樂觀，但已為全球股市帶來希望。 周三美國VIX已高出60天移動平均線好多，歷史上當呢個情況一旦出現，代表未來三個月股市可反覆上升。 在紐約交易所上市o既股份有80%低於200天移動平均線，呢個情況出現亦代表中期底部出現。 加上股票平均息率高出聯儲局息率(2厘)，過去六十年數據在呢個時候入市賺錢機會好大。 標普五百指數已見五十二周內最低位，咁代表股市過分偏低。由去年10月9日至今標普五百指數已回落24%，相等於過去九次衰退期平均數。 我老曹估計，恒生指數應在17000點附近出現強力反彈(周四恒指最低見16300點)。今天證明呢個分析正確。一次中期性(估計長達三個月)上升開始，下周升幅最大應係細價股！因為細價股近日已浴血(Bloody)，估計未來日子升幅可超過100%。通常在強勢美元下，細價股往往有較出色表現。美元今年7月16日起轉強，未來細價股應跑贏大企業股。 南韓圜今年貶值16%及印度盧比回落15%，今年外資沽出較買入多320億美元南韓股票及86億美元印度股票，令南韓外匯儲備在五個月內減少8%，至2432億美元；印度減少7.4%，至2800億美元；泰國減少5%，至1010億美元；證明資金從亞太區抽走。 管理280億美元o既Gamco Investors Inc. CEO Mario Gabelli認為，淡友已發了狂；周四開始大夾倉！紐約Attorney General Andrew Cuomo開始調查有冇唔合法拋空情況存在；所有在證券投資上管理1億美元以上資產o既對沖基金及投資者，必須每天公布拋空情況及唔准再裸空。Attorney General Richard Blumenthal亦開始調查市場內虛假謠言。德州Attorney General Greg Abbott已去信畀全美國大基金：德州教師退休基金及德州顧員退休基金，要求佢地停止供應股票界人地拋空。分析員估計，今年標普五百純利下跌6%，明年卻有能力令純利回升34%。 金融市場內不可細膽 在去年10月AIG市值1788億美元，依家只值54.6億美元，跌96.95%；房利美市值648億美元，依家只值4.5億美元，跌99.3%；Wachovia市值983億美元，依家只值194.4億美元，跌80.22%；Washington Mutual市值344億美元，依家只值8億美元，跌97.6%；National City市值164億美元，依家28億美元，跌83%；Countrywide Financial市值111億美元，依家係零；雷曼兄弟市值344億美元，依家得8億美元，跌97.6%。二十五隻金融股股價由去年10月至今蒸發o既財富已接近1萬億美元，由此可見呢次熊市o既殺傷力。 周四收市後英國監管機構下令阻止銀行股拋空，引發周五歐洲銀行股股價狂升。周四美國證監會亦下令阻止所有股份「裸空」，令美股急升；中國政府自己入市買三大銀行，令A股及港股造好；呢次英美中三國聯手救市；加上港股已完成A､B､C下跌浪，進入中期性上升浪。好戲仲在後頭。 好肯定周四我地又面對另一次恐慌性拋售。1987年10月停市引發股災或1989年六．四事件，但1988年香港經濟並冇陷入衰退；1990年情況亦一樣，甚至2000年科網股泡沫爆破，美國亦只出現一季GDP負增長(2001年第三季)。呢次次按危機除了令去年第四季GDP出現負增長外，至今美國GDP仍保持增長。美國樓市回落可唔可以好似科網股咁「Contain」即斯人獨憔悴？美國經濟受「九．一一慘劇」襲擊下亦只出現一季GDP負增長，證明呢次由1982年開始o既經濟增長期，的確幾頑強。 中國國歌歌詞「不願做奴隸的人們，冒著敵人的炮火前進」。今天中國人已不用冒著敵人炮火前進，但金融市場一樣槍林彈雨，如你被敵人o既炮火嚇親，你就唔適宜在金融市場生存，及早退出吧！金融市場內冇大戶同散戶之分(近期各位唔見國際超級大戶，一樣輸到反肚咩)，只有贏家同輸家。要贏便必需好好裝備自己，因槍炮無情，要贏就要信自己分析能力(毛澤東話：「冇深入了解及調查，冇發言權。」)我老曹過去每天工作時間係朝十晚十，周六及周日亦返工；因為我老曹知道每一個正確決定背後就係深入了解及調查，唔好人云亦云。不過，時間催人老，個人體力已不能繼續負擔上述工作時間，日後將慢慢減少個人工作量。另一方面，可以教大家o既睇市方法亦搵唔到其他新工具，只要大家遵守過去我老曹所訂o既規則，用三十年時間成為小富問題唔大。我老曹1968年入證券行至今足足四十年，見過o既風風浪浪亦算唔少，相信由去年10月至今年9月18日已完成A､B､C下跌浪，今年9月18日起進入熊市二期中第一個1､2､3､4､5上升浪(即長期睇淡，但中期睇好，而熊市二期大上升浪中浪B由於投資者信心受到嚴重傷害，整個浪B上升過程，必舉步為艱，因散戶已成為驚弓之鳥)。至於升幅及日子有幾多要事後先知，相信結束日子係當半桶水分析員又再推銷「牛市」重臨論。 全球蒸發4.6萬億美元 美國明年步入Alt-A按揭市場爆破期，同時信用卡負債已達9150億美元，兩大市場都較次按8500億美元為大，2000年股市都幾悲觀。呢個浪B可唔可以維持到聖誕節前? 從「大浪」去睇，去年10月恒指32000點回落，今年9月18日16000點乃大跌浪中o既「A」浪，今年9月18日起o既上升浪1､2､3､4､5乃大浪中浪「B」。大家小心點玩。呢個上升浪由通脹漸漸受控制開始，一如颱風中o既風浪有一段平靜日子，然後再刮風。 老布殊在1990年代曾動用1500億美元去挽救S&L，家陣保爾森亦照辦煮碗，因為就快大選，大家都唔想經濟局面搞得太差。如何在風眼中搵食便各顯神通了。 估計去年10月至今年9月18日，全球被蒸發財富約4.6萬億美元。聯儲局話投資銀行蝕了1000億美元､穆 估計2200億美元以及高盛估計係4000億美元；對沖基金損失估計達10000億美元；美國､英國及歐洲等物業業主估計蝕10000億美元，其餘由各投資者承擔。 全球冇了4萬億美元財富後，則經濟影響力係點？相對於美國股票､物業及債券總值50萬億美元，呢D損失似乎又唔算得D乜。記得2001/02年英隆事件後，2003年全球經濟唔係一樣可以復甦咩？去年10月至今年9月只不過係另一次財富大轉移而已。 ------------------------------------------ 由於中央政府推出大規模減稅計劃，所以曹仁超「估計後市短期睇好」。 曹仁超在中､短期睇好股市表現，理由有1)VIX;2)大部分美國股票低過自己O既200天移動平均線;3)股票息率高過聯儲局息率，吸入「好息」之徒入市 九次衰退O既平均數來睇跌得多定少，mark2et 有所保留，主因係只得九次數據，太少。 曹仁超在9月18日講17000點有支持 有人認為淡友已經發了狂。mark2et 反而認為係監管機構發了狂！又再一次唔畀人拋空！對上一次唔畀人拋空係7月中o既事。「巧合地」環球股市在7月中開始升。對上一次唔畀人拋空在8月12日終止。「巧合地」環球股市在8月中開始跌。世事有無咁多巧合？邊度仲有自由市場？！ 只有一季GDP係負數並唔代表無衰退……衰退並唔係只睇GDP正抑或負。 周四的確係恐慌性拋售。由當日恒指最低點計，周五收市升了接近兩成。個別股分升幅更大。你當時有無入市？(好似曹仁超口問) 曹仁超過去所訂o既(部份)規則 曹仁超話而家係跌市中o既B浪，預計完結o既時候，會有「半桶水分析員又再推銷『牛市』重臨論」 Resolution Trust Corporation 解決了3,940億美元資產(Wikipedia)。計入通脹(美國勞工部)，即而家o既7,127億美元，距離8,000億美元不遠。當時o既S&L危機同而家o既次按X流動性危機，邊個嚴重D？ [ 本帖最後由 羊仔 於 2008-9-22 09:24 編輯 ]

Share this:

火煋人

美國救市反害經濟 2008年09月22日 (星期一) 9月21日，周日。上周五道指升368.75或3.4％，上周四已升3.9％，全因美國財政部大量向金融機構購買呆壞賬，重建番投資者信心；另外，證監會阻止七百九十九隻金融股沽空，令美股連升兩天。 上周四及周五大市上升係夾倉，至於可維持幾耐則木宰羊（3月份那次係兩個月）。做美國納稅人真係慘，華爾街大亨炒衍生工具賺大錢時冇得分錢，蝕了就要佢地承擔；係典型「輸打贏要」。有人戲言1978年係中國放棄共產主義，今年係美國放棄自由經濟制度。美國政府大量接管破產企業下，有一天美國國有企業數目較中國仲多！政府最先為貝爾斯登提供290億美元保證、之後用2000億美元入股房利美及房貸美，以及再以850億美元Bridge Loan去協助AIG；從市場買番50億美元Mortgage、為挽救Money Market Funds信心及成立類似RTC機構。估計政府要取出8000億美元去成立類似RTC機構，以及提供4000億美元畀存款保證公司去保護Money Market Funds投資者。Money Market Funds在9月17日畀投資者兌現8920億美元，財政部宣布用500億美元去保證Money Market Funds及回購房利美、房貸美及Federal Home Loan Banks所發行貼現票（家陣2.25厘）。呢個市場一向係銀行短期資金來源，一旦信心動搖，令客戶取番Money Market Funds，立即令短期銀根抽緊。 金價決定通脹或通縮 老布殊在1989年成立RTC，目的係向美國儲貸機構（S&L）購入呆壞賬。結果係向七百四十七間機構購入5200億美元資產及後來以2940億美元全部售出，納稅人負擔1250億美元虧損。RTC在1995年結束。 貝南奇曾發誓坐直升機擲銀紙去阻止通縮在美國出現，呢次保爾森卻係坐波音747去燒銀紙，呢種行為令美股周四及周五上升，但後遺症係好大。人們再次動搖對美元信心，油價重返100美元及金價由735美元一度升上900美元，甚至資源股股價在周四及周五亦狂升。 歐羅由7月15日兌1.6038美元，回落到9月11日兌1.3882美元。如反彈31.8%可見1.4567美元；如反彈50%可見1.496美元；如反彈61.8%可見1.5214美元。我老曹相信歐羅呢次上升只係反彈唔係轉勢；美元中期展望繼續睇好。 依家投資者面對兩大問題：一、去年10月至今，資產價格約跌去40000億美元市值，本身可引發通縮。二、聯儲局及美國財政部瘋狂注資，本身係通脹。最後係通縮戰勝通脹定係通脹戰勝通縮？在黃金市場正打緊一場硬仗。如金價升穿922美元代表通脹重臨（因美國政府用超過10000億美元去bailout）；如金價跌穿735美元代表雖然美國政府大量注資，仍敵唔過資產價格萎縮，通縮戰勝通脹（好似1990至2003年日本）。 中央銀行將「有毒債券」變為「接近現金」，希望投資者繼續投資、商家佬繼續做生意，以及消費者繼續消費。一切好似冇發生過，希望避過「負債通縮」（debt deflation）去阻止大蕭條重演。乜可以咩？格蛇早就話過聯儲局唔係魔術師，佢唔可以變走「有毒債券」。 2003年上半年沙士危機時，有位老朋友問我老曹借錢以應付「銀行供樓催促」。在我老曹開出支票後，呢位朋友說：「近日睇了唔少佛經。明白『有』即係『冇』、『冇』即係『有。』我老曹幽佢一默：「你似乎應該搵張立兄打救，唔使找我借錢。」「有」、「冇」好似好哲學，但在現實世界卻係，1997年前我老曹賣晒香港樓去買倫敦樓，到2003年上半年我老曹仍擁「有」財富。呢位朋友1997年10月買入香港樓兼借錢供樓，到2003年如無力供樓便立即變成負資產。 三種人有機會背「毒債」 「有毒債券」所產生虧損一定有人去承擔。一、正常情況下由持有人承擔；二、金融機構承擔；三、如兩者承擔唔起，就由政府承擔（即納稅人）。以10000億美元計（IMFKen Rogoff估計）即平均每個美國家庭承擔90萬美元「有毒債券」。美國政府突然增加10000億美元負債後，擔心美元「債券」出現較大幅度回落（即長債利率上升）。 美國8月份新屋及二手樓銷售跌至年率五百四十五萬間，較7月份減少1.2%；耐用品訂單亦下跌1.8%。有足夠訊號見到美國經濟已進入放緩期，未因財政部大量bailout而改變。2006年第三季樓價開始回落，令貝爾斯登被接管、雷曼兄弟破產及AIG獲政府注資850億美元，呢個係代表經濟擴張期結束，消費者亦唔會因財政部大量bailout而增加消費。客觀經濟環境在度轉壞，股市呢次中期性反彈又可維持幾耐？9月26日密芝根大學將公布9月份消費信心指數，估計仍會上升（因油價回落），而支持股市短期向上。 樓市危機已成為兩大黨激辯項目。奧巴馬向共和黨大事攻擊，認為危機由佢地一手製造。麥凱恩則強調共和黨正在努力挽救經濟及阻止樓價進一步下跌。 短期而言因限制「裸空」令股市引發夾倉而大升（上一次由3月18日到5月中，共兩個月）。呢D日子香港人亦曾經歷過，就係1998年9月特區政府動用1000億港元救市，令港股上升但經濟繼續惡化，立法會成員過去批評政府上述做法係救市唔救人。家陣美國政府照辦煮碗，典型救市唔救人。 延長衰退期 Bailout或不bailout仍冇法阻止信貸壓碎，以日本為例，大量bailout只能阻止金融資產價格直線下降，穩定銀行業務，但同時亦令衰退延長。美國經濟唔會因為大量bailout 而再次進入信貸寬鬆期，只會延長經濟衰退期。 例如物業信貸第二季增長率只有3.5%（去年第三季增長率9.1%）係1970年以來升幅最少。樓價下跌亦令消費減少及儲蓄率上升，上述呢個係十七年內從未出現。物業價格下跌亦令能源及原材料價格見頂而金融資產價值大幅回落。去槓桿化（Deleveraging）日子將會深及長，不因大量bailout出現而改變。美國政府負債未來五至十年將大幅上升，情況好似日本政府，最終令長債利率上升，短債利率偏低，對債券不利及令金融資產價格繼續回落（短期反彈，長期睇跌），令美國經濟陷入長期扁平增長期。 過去二十五年全球負債上升五倍，明年起進入減債期，呢個行為由美國總統大選後開始，因現任財長保爾森在新總統上台後一定換人。信貸收縮最終必令商品價格大幅回落。 有人認為五十、六十及七十年代世界經濟繁榮，係建基於日本及歐洲戰後重建；八十、九十年代及二十一世紀世界經濟繁榮，建基於共產國家一個個加入自由經濟制度。未來經濟衰退由美國次按危機引發，此乃大氣候，唔會因人主觀願望而轉移。 中原地產廣州番禺區一家門店經紀（不願透露真姓名）話，一個月前舖面已開始放假，部分員工實行每周返工一天，其實上班都冇用，因為客戶與業主加起來都唔夠舖面經紀多。2008年3月業主曾以每平方米9000元放盤，直到8月都冇賣出，附近一D小區單位已跌至6000元左右，業主乾脆收回鎖匙唔賣。唔少地產中介行經紀都在度放長假，每月只取千幾蚊底薪唔係辦法，有辦法早已轉行，聽講部分門店就來關門。 上海樓市刮淡風 香港1997年下半年至2003年上半年有唔少地產中介企業曾受嚴重影響，關門關門，被收購被收購，最終留下大型中介企業只得三間，中原係其中一家。 廣州中原地產市場部總監李粵湘接受訪問時話，中原策略──擴張到出現虧損為止，依家公司已停止擴張。 美聯物業（1200）今年2月執行董事兼中國部行政總裁郭應龍表示，計劃把內地門店由五十二間增到一百間，利用淡市擴充。半年後今天，美聯物業廣州區域董事劉志忠表示，家陣唔係擴張時機，但美聯唔會減少門店。 滿堂紅廣州分公司總經理孔少石表示，今天地產中介公司已從年初二百餘間減至七、八十家，滿堂紅及中原在東莞店面已減少50%以上。 上海情況亦好唔到幾多，在靜安一間房產中介行指出，過去一個金牌經紀一個月已能賺佣金20萬元，家陣全間店舖加埋先有12至14萬元。不過，亦有人淡市擴充，就係21世紀不動產。佢在中秋節前後，一口氣在新天地、淮海中路、龍茗路、東川路及羅香路開五間新店，但幾間新店人氣好少，未能改變整體慘淡景況。睇來上海中介行亦要提早放「寒」假。

Share this:

火煋人

美國經濟下跌風險好大 2008年09月23日 (星期二) 9月22日，周一。恒生指數升304.47，收19632.2；成交916.34億元。9月期指升169點，收19638點。 匯控（005）升2％、中海油（883）升6％，以及恒生國企指數升2.5％，重上10000點之上，收10227.38。 滬深三百指數升6.49％，收2207.61；MSCI亞太指數升8％，報117.36。澳洲限制拋空股票，令Fortescue Metals Ltd.一天之內升25％。 花旗推介長江實業（001），估計今年每股獲利8.83元，較去年減少9.1％，P/E十一點二倍，目標價137.01元；新奧燃氣（2688）估計今年每股獲利63.9仙，升26.3％，P/E十三點一倍，目標價14.05元；更大力推介SOHO中國（410），估計今年每股獲利21.6仙，較去年減少55.1％，P/E十一點三倍，目標價5.5元。 野村以2.25億美元購入雷曼兄弟亞洲區業務（其中5000萬美元係商譽），呢個部門員工二千九百四十人，今年上半年營業額14億美元。 投資銀行獨立時代結束 高盛及摩根士丹利轉型後，係未投資銀行獨立時代的終結？因納入銀行後將受美國銀監會監督，例如資本充足比率等，再唔可以好似以前咁大槓桿去做野。以後不但受銀監會監管，亦受財政部及美國聯邦保險公司監管，高盛及大摩放棄自由接受監管的目的係換取公眾人士對佢地的信心。 戰後自由世界奉凱恩斯理論為經濟界神明，在政府大力扶助下，五十及六十年代自由世界經濟又的而且確欣欣向榮，但到了七十年代美國因大量流失美元被迫同金價脫勾，引發全球惡性通脹。其後以佛利民為首的貨幣學派獲鐵娘子及列根欣賞；同凱恩斯理論剛相反，佛利民主張「放寬管制，著重市場機制」。英國同美國經濟在八十及九十年代又再欣欣向榮，佛利民又成為經濟界泰斗。放寬管制亦有敗筆，就係經濟泡沫一個接一個出現；例如1994年墨西哥危機、1997年亞洲金融風暴、1998年長期資金管理公司出事、2000年科網股泡沫爆破，以及2006年下半年美國樓價開始滑落，引發去年8月次按危機更席捲全球。今年財長保爾森上台後，美國金融政策出現一百八十度改變，政府不斷接管或挽救大企業，令自由經濟政策已經名存實亡。 鄧小平一早講「白貓黑貓論」。世上冇永遠係對的理論，一切因時制宜。我老曹相信太極圖（即陰盛則陽衰、陽盛則陰衰；循環不息）。戰後政府過分干預經濟，引發了七十年代惡性通脹；1980年起政策過分寬鬆，又引來大量經濟泡沫。家陣美國國會、華爾街甚至美國選民，都在度爭論保爾森動用超過10000億美元救市係未洽當（Zogby Interactive上周六、日調查結果係，46％選民支持、46％反對及8％未表態。70％同意如唔挽救帶將來嚴重後果，只有24％仍認為問題唔大；84％擔心另一間投資銀行或金融機構將會倒閉，9％認為已見底；民主黨在呢件事件中獲42％支持，共和黨只有25％；46％認為奧巴馬有能力解決呢個難題，41％認為麥凱恩更佳；71％認為政府日後應收緊樓按貸款條款，亦有23％反對；82％反對政黨、總統候選人及國會議員接受金融機構金錢上捐款「游說」）。接受訪問人士共二千三百三十一位，並在9月19日及20日進行。 大選後（無論邊個出任）美國國策將由列根總統時代開始走向自由放任返回加強管制。呢次證監會禁止七百九十九隻金融股拋空，保爾森動用7000億美元去防止金融體系meltdown（如唔足夠將無限量支持，包括汽車分期、學生貸款計劃、信用卡及任何有問題資產）。好少人反對，可見美國人正在度背棄「自由經濟制度」。 美元睇法有分歧 美元因上述消息回落，見1.4473歐羅及106.3日圓。保爾森估計，呢次行動令美國國債增加6.6％，至11.31萬億美元。咁大量增加美元供應（超過1萬億美元）會唔會重新刺激原材料價格上升？標普GSCI商品指數過去三天上升8.4％、原油升6.8％、小麥及銅升3.6％；CRB指數在保爾森公布當天亦上升2.4％。分析員估計，消費品價格會因此上升4.5％，高盛策略員Allison Nathan更估計，未來十二個月內GSCI商品指數可再升17％（該指數由6月份至今回落了26％）。International Foreign Exchange Concepts Inc.（全球最大的貨幣對沖基金）主席John Taylor管理110億美元資金，估計美元將崩潰。不過，其他分析員認為，年底可見1.43美元兌1歐羅及每美元兌108日圓，認為美元回落日子好短暫；呢方面的代表係德銀的Adam Boyton，佢認為6月至今美元已上升7.2％，消化一段日子後美元再上升，因為明年美國GDP可上升1.5％、歐洲只上升1.1％及日本1.15％。美國成為OECD國家中表現最好國家之一；加上美元利率僅次於日本；反之，歐羅及英鎊卻有大減息空間。美國政府增加超過10000億美元供應後，會唔會重新引發商品價格上升，並刺激CPI指數上升，而引發美元崩潰？定係美元匯價繼續上升？美匯指數由2002年初121點下跌到今年3月71點，跌幅41％，其後一直在低位震盪，並在7月15日歐羅見1.6038美元歷史高位，最近次按危機進一步惡化，雷曼兄弟破產、美林被收購及AIG注資850億美元，保爾森欲動用超過10000億美元救市，但美元一直未有轉弱。 樓市回落拖累股市 道指去年10月至今跌幅超過26％，即市值40000億美元被蒸發了，納指跌幅亦令16000億美元市值冇了，兩者加埋相等於美國GDP 36％。呢個損失仍唔及2000年3月9日至2001年3月20日，納指由5046點跌至2000點以下，市值冇了40000億元，加上道指後，兩市總損失接近60000億美元，相等於當年GDP一半以上，但2001年亦只係出現一季GDP負增長。 諾貝爾經濟學獎得主斯蒂格茲在9月15日表示，呢次金融危機唔會係另一次1929年，因為有更多工具及貨幣政策應付。從美元匯價走強，可見到全球願意共同承擔呢次次按危機；加上歐洲情況唔見得較美國好，如歐羅減息，因利差減少反而有利美元匯價。技術面睇美匯指數仍在上升通道內運行，至今未低於50天移動平均線。短期或有震盪，但中期仍然睇好。 家陣的經濟形勢到底係通脹風險大，定係經濟下滑風險大？我老曹擔心後者大於前者。去年8月至今年4月美國減息兼增加貨幣供應，令美元匯價下跌，的確曾刺激商品價格上升，並令美國CPI增長率上升。今年7月15日開始，美元已結束六年零四個月的貶值期（美匯指數累計跌幅42％）；油價由148美元大跌至91美元，到近日才重返100美元；金價由1035美元回落到735美元，亦反彈到900美元；有色金屬、其他貴金屬如白金、鈀金及白銀更出現顯著跌幅。如全球不景氣出現明顯影響能源及原材料需求，價格將由依家的高位回落。 在美國同英國，樓市回落拖垮了股市；在中國就剛相反係股市回落拖垮樓市；香港樓市因政府大量減少土地供應仍可穩定，但在股市回落壓力下，今年4月至今亦出現交投淡靜。甚至鋼鐵產品價格，雖然巴西要求鐵礦砂出口價加價，但中國鋼鐵產品價格，已出現連續第八周回落。如經濟景氣下滑令消費需求放緩，企業亦唔易加價，我老曹認為，「經濟下滑風險已明顯高於通脹」。去年11月美股回落時，唔少人認為全球可出現Decouple（即其他國家可同美國分道揚鑣）。去年曾大力反對Decouple理論，反而擔心當有錢人唔食鮑翅、中產階級唔飲紅酒時，窮人可能冇飯食。事實證明美股至今只回落26.3％（道指由去年10月11日14198點，回落到今年9月18日10459點）；港股回落49％（恒指由去年10月30日31958點，回落到今年9月18日16283點）；滬深三百跌幅69.38％（由去年10月17日5891點，回落到今年9月18日1804點）。 內地製造業四面楚歌 美國增加10000億美元資金後果會點？相較於投資者在金融市場56000億美元的虧損，我老曹仍然相信7月18日起美元匯價開始轉強，8月份起美國CPI增長率開始回落。最令人擔心反而係中國經濟（唔係美國）；因中國經濟過分依賴出口，大多數出口工業製品及消費品又缺乏議價能力；在人民幣加快升值壓力下，部分原先外銷商品已被迫轉為內銷，以減少人民幣升值壓力。明年恐怕中國內需市場增長率亦減慢（因股市下跌69％，後遺症漸浮現），明年將係中國製造業內外交困年：一、全球經濟發展明顯放緩，次按危機漸變成信心危機，令中國出口面對好大壓力；二、內地市場經過今年拓展後，進一步的拓展空間好有限；加上從緊貨幣政策令好多中小企業借貸無門，已陷入虧損或唔蝕唔賺的狀態。如壓力再加強，將引發大倒風。今年1至8月中國服裝業出口增長率只有3.4％及塑料製品負3.9％；而工業生產8月份較去年同期下降12.8％增幅（部分係奧運效應）。即係三頭馬車中其中出口一瓣已死火。至於消費及投資亦進入下行區（即低增長）。股民損失慘重，加上雪災、水災、地震及從緊貨幣政策，雖然最近貸款利率下調0.27厘，存款準備金率回調至15％，但樓市仲係面對緊縮措施壓力下，中國GDP增長率正由雙位數轉為單位數，明年必須努力「保八」（8％GDP增長率）先得。 參考1990年至今日本政府亦不斷向金融系統注資，令日本政府家陣成為OECD中最大負債國，但日圓匯價並冇崩潰，日本境內通脹率仲未失控。 倫敦、紐約及香港係世界三大金融中心，組成時間鏈為全球提供二十四小時金融服務。貝爾斯登出事、雷曼兄弟破產及美林被收購等，令倫敦及紐約豪宅價格滑落。過去十二個月紐約上市金融股冇了37％市值；倫敦上市金融股冇了25％市值；倫敦金融從業員人口減少10％（四萬二千人）；紐約減少13.5％（六萬四千人）；加上今年分紅唔及去年，令金融從業員收入減少50％（因花紅佔工資較大比重）。紐約12％就業人口從事金融業，佔全市薪金收入30％。金融從業員過去係紐約100萬至300萬美元住宅的主要買家，今年第二季曼哈頓區住宅交投已減少22％；倫敦100萬英鎊或以上住宅交投第二季更減少46％（較便宜者只減少9.2％）。大量150萬至2000萬英鎊豪宅不但冇買家，連租客亦大量減少。家陣影響最少係香港，但大量豪宅亦面對有價冇市及買賣兩閒局面。雖然華盛頓計劃提供過萬億美元資金畀銀行周轉，但負債纍纍的消費者面對自己工作崗位岌岌可危，早就冇了消費興趣。Thomson路透社最新第三季上市公司純利升幅估計改為負0.3％（今年7月1日估計可升12.6％），將出現連續五季純利負增長，係繼2001年第一季至2002年第二季後第二次出現連續五季純利負增長！早兩個星期估計純利係負增長1.6％，家陣修正為負0.3％，咁樣唔係代表睇好D，而係因為雷曼兄弟宣布破產唔計，以及AIG再唔係標普五百成分股，撇除呢兩隻後，令估計純利跌幅少一D。估計第三季金融業獲利177億美元，較去年同期減少55％。 Bridgewater對沖基金上周話，美國史上唯一一次減息接近零同時增加貨幣供應但仍無法阻止GDP下滑係1930年代。我老曹亦見過一次，就係1990至2003年日本利率接近零，日本銀行大量增加貨幣供應，但日本GDP增長率似有若無。我老曹唔擔心美國重演當年的事件，只擔心陷入日式衰退。因為Bailout不能解決問題，只係將難題轉由美國納稅人去承擔；結果一如日本政府家陣每年稅收一半以上用作支付利息，令GDP從此無法再增長。 曹仁超明天開始休假，「投資者日記」暫停，10月6日再與各位讀者見面。

Share this:

火煋人

投資者日記:畢非德早了入市 2008.10.6 10月5日，周日。度假番來，港股已面目無非。上周股聖畢非德以50億美元入股高盛，以及30億美元認購GE優先股（10厘息及可在五年內用每股22.25美元認購新股，消息公布後GE跌至21.57美元）；佢做最大股東富國銀行宣布以150億美元市值新股收購美聯銀行；加埋7000億美元挽救方案通過，唔少人問9月18日恒指低位16283點係未熊市見底？ 我老曹認為，依家係熊市二期，港股仍未進入熊三。恐怕股聖亦犯了過早入市毛病（好似1974年7月我老曹所犯錯誤一樣）。法興分析員James Montier認為，如我地面對流動性危機，7000億美元挽救方案係有用；但我地家陣面對係清償債務問題及槓桿危機，相信作用唔大。 上周五美國公布職位減少十五萬九千個，係連續九個月就業機會減少，標普五百指數較去年高峰已回落30％。9月份係2003年4月至今唯一的一個月冇新股上市；基金持現金比率已升至31％（超過2002年高峰30％）。 波羅的海乾貨輪指數今年第三季下跌66％（9月下跌53％），代表全球貨運量將出現大幅回落！中國唔少鋼鐵廠在奧運前停業去改善北京空氣質素，但家陣仲未重開；人們相信10月5日會重開。如周一仲唔重開就大件事（因房地產走下坡令中國境內鋼鐵需求下降）！中國GDP增長率正在度迅速下降，美國次按危機對中國經濟打擊大過美國（如有錢人冇了1億元仲可笑哈哈、中產唔見了1000萬元已苦口苦面、窮人損失100萬元會去自殺）。 緊記淡市莫估底 上周跌幅最大係日本達8.89％，最細係馬來西亞只有0.49％（香港下跌5.16％），周一內地A股恢復交易唔知情況會係點？ 歐洲央行上周保持利率不變仲係4.25厘，雖然8月份CPI升幅已降至3.8％及第二季GDP收縮0.2％。 通常9月同10月係最惡劣的月份，相信今年都係。恒指9月18日16283點相信係熊市二期中另一隻腳。 3月17日金價見1032.7美元時，我老曹開始擔心通縮，但冇人信。今年7月油價由145美元回落，我老曹睇油價將低於100美元，更成為別人笑話。至於7月睇好美元，唔少人更以為我老曹傻了！即係話到依家仲係好少人相信通縮時代已開始！上述理論由世界知名評論員Richard Russell（道氏理論通訊作者，我老曹七十年代便開始睇佢評論學野）提出，當今世界經濟最大威脅唔係通脹而係通縮。三十年代美國通縮期利率低至一厘，羅斯福宣布金價由20美元一盎斯提升到35美元及持金屬非法，仍無法引發通脹。九十年代後期日本將利率降至零（依家係0.25厘），日本一樣冇通脹（最近去日本玩，酒店房租同1994年那時差唔多！） 我老曹在9月7日「持續創富，持續關愛」曹仁超投資分享會上發表演辭中：「認為最大可能係恒指在17428點結束，最悲觀睇法係恒指重返牛市一期高位。」事後被各報引述，變了「曹仁超認為恒指18000點有支持」，證明大部分投資者仲好樂觀。恒指在9月18日見16283點，我老曹認為，另一反彈將出現，並預測高位可見19500點（由於事後已唔在香港，冇進一步跟進）。 在熊市中決定止蝕壓力好大；因此我老曹主張一旦發現熊蹤，就必須嚴守三七分（即只動用30％投資資金）。千祈唔好溝落，9月18日低位只適合林森池兄呢類專業投資者博反彈，一般散戶寧可錯失機會亦唔好忘記三七分，以免一旦走唔切，就愈綁愈實。唔好忘記淡市莫估底。君不見五大投資銀行無一不敗北咩，你又想點？ 救市治標不治本 金價見730美元後，我老曹估計，反彈可令金價重返880至920美元，然後再創新低！呢次金價由9月11日736.7美元，最高在9月29日925.1美元，上周五收市報835.5美元，估計仍會下跌。 美國國會通過7000億美元挽救方案，後市係點？穆 公司估計，垃圾債券唔履行合約率將由家陣2.7％在未來十二個月升上7.4％，令市場疲於奔命。信貸壓碎（credit crunch）由去年8月開始，唔似在今年10月結束；以科網股泡沫爆破為例，股市由2000年1月14日跌至2002年10月10日，需時兩年零三季，跌幅38.77％。呢次地產泡沫爆破，無論時間及跌幅仍唔及科網股，你信唔信咁順攤？新方案係美國財政部可立即動用2500億美元向銀行等金融機構購買住房抵押貸款支持證券等不良資產，獲總統批准可動用另外1000億美元，至於餘下3500億美元需國會批准才可動用。分析員指出，呢個挽救方案好似為機器加油，令整體運行暢順，但次按危機根源係樓價下滑，大批已買樓者無力償還貸款；呢個方案在呢方面無法提供幫助；換言之，只係另一個治標唔治本方案。 《巴隆氏》專欄作家Jonathan Laing指出，私人存款只收到2厘息，但大企業貸款最少要支付9到10厘。如上述情況持續落去，必引發衰退；情況好似1921年8月道指由63.9一直升到1929年9月381.17，上升四點九倍後泡沫爆破，邊個都救唔番，美國經濟擺脫衰退係第二次世界大戰爆發消化美國過剩生產力開始。 1977年由卡達總統通過Community Reinvestment Act（CRA）鼓勵銀行向低收入群貸款買樓；1994年克仔為刺激人民置業進一步延長CRA。到了2004年唔少銀行已提供零首期置業計劃；2005年格蛇向國會提出警告要求阻止「兩房」介入次按貸款市場，並由麥凱恩等三位議員提出方案，卻被共和黨議員奧巴馬、希拉莉及以多德為首民主黨議員反對而告吹，令美國物業貸款質素繼續惡化。可以話次按危機係由民主黨一手造成，依家卻反過來指責共和黨要承擔責任。政治就係咁奇怪。亦證明奴役之路由愛心鋪出來；當年卡達總統為協助窮人置業方案卻引來去年次按危機。根據Case-Shiller指數截至今年6月30日止，美國二十個大城市平均樓價已由2006年高峰回落15.9％，相信家陣已回落20％。估計明年仍再回落10％（即由高峰共回落30％）。 上周愛爾蘭國會通過向愛爾蘭所有銀行存款（約6000億美元）提供擔保。即所有愛爾蘭銀行如出事，存款將由政府保證冇問題。愛爾蘭只得六百萬人，其挽救方案已高達6000億美元；反觀美國人口三億多，7000億美元挽救方案係未足夠？由於愛爾蘭政府上周起保證所有該國銀行存款安全性，形成資金大量流向愛爾蘭。 美國企業純利升幅由八十年代初期年率10％，到去年第三季達40％而支持去年高P/E。因金融服務業進入高槓桿期，去年8月起進入去槓桿化（deleveraging），上市企業純利由高增長期重返低增長期，未來P/E將愈來愈低，甚至出現單位數。上述亦唔係7000億美元挽救方案可改變。根據今年8月5日IMF經濟學家Stijn Claessens、M. Ayhan Kose及Marco E. Terrones研究所得，過去各國所發生商業及經濟周期，以樓價回落影響最深及最長，較其他因素所引發調整期長。即由去年8月開始調整期，極有可能較2000年1月至02年10月次更長。今年9月低位極有可能只完成調整期三分一！今年各讀者都知道我老曹曾一再批評主權基金及各大基金太早入市。上周Texas Pacific Group公布，蝕了13億美元，理由係今年4月認購Washington Mutual部分70億美元集資計劃。連管理500億美元Texas Pacific Group亦犯了太早入市毛病，更何況一般人呢？ 美國變社會主義 1990年至今日本銀行業為樓市泡沫而付出沉重代價；去年起美國同樣面對信貸嚴重收縮問題，陷入九十年代日式衰退。展望未來：一、全球財富萎縮後遺症；二、金融機構仍排晒隊去增加資本；三、資產價值繼續回落；四、市場面對資金短缺，因大量金錢被蒸發；五、至今為止出事仍係金融機構，未見大企業出事（大企業市值可能唔及金融機構，但影響人數較大）。 雖然恒指P/E已進入八至十二倍（熊市三期水平），但面對問題仍一籮籮，例如中國正由低檔次生產中心進入高檔次製造業中心。紡織、玩具及成衣等低檔次工業面對淘汰，同時高檔次製造業又未大量出現；青黃不接期令珠三角一帶經濟大受打擊；加上環保受注重，唔少行業必需停產或搬遷以清潔河道及土地；人民幣升值壓力及工資上升壓力，估計中國在明年前甚至2010年仍未能完成經濟轉型期。 美國大選後新總統將面對41萬億美元積務危機（「兩房」5.4萬億美元；銀行房地產貸款、汽車貸款、信用卡貸款及商業貸款20萬億元；商業樓按貸款2.6萬億美元；人壽公司及地方政府7萬億美元；五千間銀行及100間S & L有問題貸款3萬億美元），只要其中5％出問題，情況已較今年更惡劣。何況救市猛藥已用得七七八八，後遺症卻在明年浮現。法國國際廣播電台指呢個7000億美元挽救方案為有美國特色社會主義。美國已放棄1997年亞洲金融風暴時自己主張──減少政府開支及債務，以及任由樓價下跌建議；美國已改行社會主義。 1978年起中國跨越社會主義紅線走向資本主義，今年美國跨越資本主義紅線走向社會主義，驅走了自由經濟！中國政府救市用行政手段例如改變市場遊戲規則；美國政府救市更直接注資。到底邊個更社會主義？ 呢次危機形成係降低房貸門檻，出現唔正當零首期按揭代價。情況同八十年代日本雷同；與1997年前香港相似，相信結果都係一樣（日本用了十三年時間去清理呆壞賬，香港用了六年半；估計美國最快亦要三年）。 [ 本帖最後由 羊仔 於 2008-10-17 11:14 編輯 ]

Share this:

火煋人

投資者日記:美救市計劃係陷阱 2008.10.7 10月6日，周一。恒生指數回落878.64，收16803.76，成交萎縮至473.28億元；10月期指收16720點，跌985點；11月期指跌962點，收16685點，即期指倒掛現象繼續，相信10月份有機會下試9月18日低位。至於美股，一開市便殊殊聲落，道指中段更跌逾500點， 120個月線確認失守，似乎正在營造大型頭肩頂【圖】。 上世紀三十年代「九．一八」事變，日本軍隊大舉入侵中國，引發八年抗日戰爭。今年9 月18日恒生指數最低見16283點時，我老曹著意見只係熊市二期中另一隻腳，而唔係熊三；除了可博短期反彈（我老曹因為早已決定去日本玩而冇行動）外，並唔值得改變投資策略：過去策略係：一、熊市中以持盈保泰為主；二、熊市中只能三七分（最多投入30％本金）。 熊市要識避難 面對9 月18日恒指低見16283點，勇敢著投資者如森池兄主張入市吸納，然後坐到佢升為止。我老曹自小怕死，當面對艱難時刻便走佬，因決定離開香港兩星期。我老曹唔係那D「國難當前、投筆從戎」著人。1951年父母帶同我老曹離開上海，走來香港避難；1997年我老曹沽清的香港著物業（除了自住那間）．把資金逃去倫敦，近三年又沽清倫敦物業。大人物可以奮勇抗敵（我老曹一向尊重抗敵英雄），小人物只管逃命。最近去了一次吉隆坡，發現那邊普通住宅樓價亦的度回落，即吉隆坡亦唔係避難所，呢次逃命，不知何處是吾家，都真係幾惆悵也。 經過大跌後（例如今年3月18日恒指見20572點）必有反彈，今年3月係熊市二期中最強力反彈，日後所有反彈幅度皆唔及3月18日；9月18日著反彈，事後證明係弱而短，而唔係強而長。擔心下跌浪A、B及C變成熊市正常浪，即1、2、3、4及5。9月18日可能唔係浪C而係浪3，浪4反彈後再創新低才完成浪5（上述走勢九十年代的日經出現）。 熊市策略應找掩護（Take Cover）或避難（Take Shelter），以保本為主，賺唔賺錢已唔重要。我老曹的鼠年出生，一向膽小如鼠；加上今年本命年及犯太歲，時刻提醒自己小心駛得萬年船──今年諸事不宜。 7000 億美元挽救計劃相對美國63萬億美元CDO市場只係杯水車薪，何況次按風暴已蔓延到歐洲及英國。繼愛爾蘭之後，德國政府亦宣布為德國所有銀行存款提供擔保；英國財長周一開會後估計亦有類似行動及估計周五英鎊減息（Thomson路透向六十二位分析員調查，四十九位認為本周五減息0.25厘）。歐洲及英國將較美國早一步陷入衰退（連續兩季GDP負增長），並向日本蔓延。美國FDIC向銀行存款提供保證由10萬美元升至25萬美元。香港金管局家陣只擔保10 萬港元已同全球趨勢脫節，為避免類似東亞銀行（023）事件重演，金管局所提供著擔保，應提升到100萬港元，以免香港存款流向德國、愛爾蘭、英國同美國，加重香港著信貸收縮壓力。 高盛估計，明年美國失業率可升至8％，利率減至半厘！ 德國政府已向Hypo Real Estate注資300億歐羅。 法巴宣布，購入富通比利時銀行75％，代價82.5億歐羅！富通最大錯誤係去年以242億歐羅收購荷蘭銀行資產而蒙受極大損失。 根據MSCI世界指數，二十三個已發展國家股市平均回落28％，即股市損失高達20萬億美元（未計發展中國家或地區）。標普五百企業第三季純利減少5.6％，已經係連續第五季回落，今年金融股回落了35％（破產公司唔計）。 墨西哥披索上周下跌4.2％，因擔心美國經濟陷入衰退影響墨西哥產品出口（9月份回落6.3％係1998年以來最差，由8月4日至今回落12％）。 巴西股市上周下跌12％係六年內最差，亦因擔心美國經濟陷入衰退。 冰島克朗9月29日至今回落14％，因三大銀行出現危機，需要政府支持。 9月份25％美國企業認為，已很難借入九十天期資金（去年12月係14％）；仍打算招聘人手公司只佔16％（去年9月係24％）；打算裁員佔22％（去年9月係16%）。睇來美國的明年進入衰退著機會愈來愈大。 滬深三百指數的國慶後回落5.12%，收2128.7，下跌114.96。 信趨勢好過價值投資法 上證綜指過去十八年有三次較大跌幅，第一次係1993至94年由1558.95回落到325.89，的五季內下跌79%；第二次係2001年第二季由 2245.44回落到2005年第二季998.23，共十六季，跌幅55.54%；第三次係去年第四季由6124點開始至家陣最低見1802.33，跌幅 70.57%，跌幅唔及1993至94年那次，時間唔及2001至05年長，相信第四季仍要下調。 CRB指數（代表十九種原材料）上周回落 10.9%，係1956年以來最大跌幅。其中油價下跌12.2%，至93.88美元，係2004年12月3日以來最大跌幅。美元三個月利率的新加坡見 4.27厘，的香港見3.81厘亦係去年12月10日以來最高，呢D數字話畀大家知危機未過去。 股聖畢非德係最成功著價值投資法代表，經常搵出價值偏低股份去投資而未來純利又能夠保持增長者，簡稱係Economic Value Added（EVA），即企業經濟增長而令市值增加，聽落容易，但點樣評估EVA都係一門好深著學問。由於EVA無法評估高科技股，令股聖著信徒唔涉足高科技產業而錯過九十年代科網股熱潮（當然亦因此避過科網股泡沫爆破）。至於管理良好公司評估方法更難，股聖更強調資金回報率（Return On Equity），而唔係P/E，再加上ROA（Return On Assets）、ROC（Return On Capital Employed）及FCFE（Free Cash Flow To Equity）等。換言之，你想學股聖必須有森池兄著專業知識先得。最後結果變成股聖買乜，佢著信徒亦買乜，產生所謂畢非德效應，忘記八十年代股聖睇好白銀而睇錯市一役，以及去年投資鐵路股三個月後賣掉著歷史。呢次入股高盛、通用電氣及富國銀行收購美聯是對定錯？要日後先知。通用電氣上周股價回落15％，收21.57美元，係1997年10月以來最低，未因股聖入股而上升。 價值投資法（最出名係股聖）呢種方法，令我老曹1974年7月以7元開始買和記（因股價由43元回落），結果由7元一直買到2元，共吸入十萬股和記。1975年初和記股價跌至1元，我老曹50萬元資本變了10萬元。好在當年匯控（005）宣布挽救和記計劃，唔係和記破產，我老曹就一無所有。從此我老曹再唔信價值投資法，改信趨勢（Trends）。今年房利美、房貸美、貝爾斯登、雷曼兄弟、美林、AIG、Washington Mutual及美聯等紛紛出事，甚至花旗、大摩及高盛等百年老店都要人地注資，證明價值投資法唔可信。美國政府7000億美元挽救計劃英文叫做 Troubled Asset Relief Program（簡稱TARP），我老曹因英文水平低經常串錯字；串錯為TRAP（陷阱）。呢個挽救計劃係未投資者另一個陷阱?!最近去東京（住1994 年那年同樣酒店，發現酒店住客多了，但早餐水準差了，典型將貨就價），見到日本人較1994年older, wiser but poorer（年紀大了、通街老人及聰明了不再迷上股票，但窮了。例如通街ＸＸ牛肉飯或ＸＸ拉麵，已成為日本人主食。至於松板牛肉及神戶牛柳，一般日本人已食唔起）。九十年代日本政府一再推出挽救經濟措施，但日經要到2003年4月先出現牛市。美股在TARP計劃下又點？大選後奧巴馬上台，會唔會好似三十年代羅斯福咁，向富人抽稅？令美國經濟陷入十年八載半死唔活期？黃金歲月已的去年10月結束。呢次挽救計劃係未代表美國呢個經濟病人已進入ICU（深切治療室），再唔係食兩粒阿斯匹靈就冇問題著小病；即使救得番，復元期亦好長。 內地樓市冷清 9月21日聯儲局已批准高盛及大摩改為銀行控股公司，代表投資銀行再不能獨立生存，必須依附的常規存貸銀行上；代表金融業純利高增長著時代終結，重返常規存貸業務。過去投機者貪婪行為下而推出大量金融創新工具著時代終結，證券化借貸方式將告別金融舞台；美國五大投資銀行，一間（雷曼）破產、兩間（美林及貝爾斯登）被收購及兩間改為銀行。美國最大保險集團AIG為房貸CDS付出沉重代價，美國第四大銀行美聯因涉足次按而被收購。美國最大基金公司Washington Mutual亦極之麻煩。美國「兩房」被政府託管。美國金融危機已過了嗎？答案係仲有四千間中型銀行財政未健全。 溫州一千二百五十九家企業已停工倒閉，佔調查總數8.1％。以往常見著拉閘限電今年再冇出現，主因係下調壓力超過年初想像；依家工業已處於緊急運行狀態中，以往溫州有鞋都之稱，產品60％出口國外及40％內銷，家陣唔少工廠只留番看守人員。的原材料價上升、出口退稅率下調、勞工成本上升及物流費用上漲下，10多元一個鞋底上半年仍有1元左右利潤，但家陣連1％利潤都冇。溫州最大鞋企過去員工二萬人，家陣得番五千人；再加埋人民幣升值及控制污染成本上升，已捱唔到落去。有D走到成都、重慶、蘇北及江西；有D就半停工；有D索性關門算數（家陣工人帶薪休息，每月仍需支付600元生活費）。 集裝箱漂洋過海最少需一個月時間，去年9月係趕貨期，今年9月卻冷清清，今年聖誕訂單有唔少應該冇了。 義烏市過去自豪係中國襪子名城，但今年唔再樂觀，工業產值及外貿出口增幅皆雙雙下降，部分企業已達到破產關閉著地步，老闆出走或自殺新聞已令人麻木。溫州民間借貸利率已升至5分息（50厘），典型飲鴆止渴。 永嘉雲光泵閥製造公司創辦人朱吉光已服毒自盡；一新製藥公司掌門人鄭亞津已自縊身亡；金烏集團董事長張政建因無法支付高利息而逃往海外；杭州南望集團老總一夜間不見了；嘉興旭萊服飾公司創辦人失蹤。人人都話火鳳凰，家陣的火中燒死著老闆一籮籮，浴火之後重生著鳳凰有幾多隻？則木宰羊。例如溫州打火機企業已由 2003年一千間跌到2006年得六百間，家陣只有一百間，估計明年只有三十至四十間（死亡率達96％），火鳳凰只係傳說。 中國人行發言人說：「從未發布中國2000億美元助美救市消息。」只係同國際金融組織密切溝通與合作，共同抵禦金融危機。 黃金周已過去，青島樓市仍難回春；睇多買少著情況未變。「十一」黃金周最少有二十多間地產開發商的各媒體刊出廣告，吸引唔少人睇樓。四天過去成交量並唔樂觀，例如市北區祥雲花園9888元一方米，另加九七折即9500元，售樓員卻說：「如肯買可提供9200元一方米特價」，仍引唔到一般人買樓著興趣；的昇平路著昇平新城二期，現樓每方米5320元（但一期舊業主願以低於公司售價出售）；湖畔雅居更低至4750元一方米；青島廣寧房地產信息諮詢有限公司邱經理說：「黃金周購房者平靜得可怕」；睇來「九金十銀」已成為歷史。 黃金周淡市行情依然，令好多開發商煩惱。上海市場大部分人亦只睇唔買，場面熱鬧，但成交冷清；展覽館門前人山人海，觀眾要等半小時才能入場，但成交方面只係發展商預期著40％。銷情以合生（754）著城邦經濟型別墅最好，成交近二十套；其次係萬科著金色里程，已售出60％。至於四季花城及花園小城等銷售率約30％到50％，藝泰安邦及新宏國際更出現零成交。消費者的買漲唔買跌心理下減價促銷又死，保價亦一樣；蘇州樓盤托斯卡納提出唔減價保證，10月及11月周邊樓價低於合同價10％，公司將支付差價；上海碧云瑞庭則保證六年後原價回購，以加強業主信心；四川開發商以每方米8000元銷售酒店度假公寓，並保證每年回報率8％及二十天免費度假；紅星美凱龍更推出十年保證，每年收益 10％；太倉更對出售商舖包租五年，每年回報9％；碧云瑞庭保證所售酒店度假公寓，十年每年回報7.5％。上述保證及日後能否兌現，天曉得，只係反映家陣發展商急於套現著心態。北京情況更差，9月份已簽約量平均每天唔夠一百套，創近三年新低。國慶長假連睇樓著人都唔多。 記熟九大投資守則 內地大學生平均月入2000元人民幣，如非父母幫助點買樓？家陣最便宜著房子月供1500元，供完樓後物業管理費、水電煤、生活開支、娛樂及教育費冇著落。以兩口子月入4000元計，供樓已佔總收入著37.5％，超過正常水平30％以上。 中國三十七個大城市房價泡沫最大係溫州，其次係上海、杭州、北京、深圳、寧波、廣州、廈門、南京及天津。十大城市供樓支出皆佔大學生（兩人計）總收入30％以上，估計仍有下調幅度。 ERA房地產聯盟公布年度調查報告，十九個歐洲國家中英國、愛爾蘭及西班牙已進入拐點；德國、法國、奧地利、意大利及瑞典進入萎縮；塞浦路斯、保加利亞、羅馬尼亞、捷克及土耳其陷入停滯。 去年歐洲最貴房地產係盧森堡，平均房價46.2萬歐羅，最便宜係安卡拉7.5萬歐羅。 美國7000億美元挽救計劃，改變唔到景氣周期規律，只係將問題向後拖延，大摩亞洲區董事長羅奇更認為，情況可能比日本及香港更差，因美國消費佔GDP 72％；加上美國人低儲蓄率，必須經過一段長期休養生息期先能重返繁榮。 我地出生後開始學習生命著守則（The Rules Of Life）；好多時來自我地著父母（有其子必有其父母），有時亦從其他人身上學習（三人行必有我師），有D係透過嘗試及錯誤先學曉（例如我老曹1974年著經驗同教訓）。只要牢牢記住唔再重犯，我地便可生活愉快。 其中三人（股聖、Dennis Gartman及Puggy Pearson）都係投資界泰斗，他們訂下九大守則，投資者只要遵守便「麥克、麥克」。 前三條由股聖所訂。一、唔好輸錢。一旦面對虧損便設法減少損失（我老曹將佢改良為止蝕唔止賺）。 二、股票市場設計係將金錢由經常性買賣者手中轉到有耐性投資者戶口中。平時遠離證券行，唔好經常炒出炒入。 三、投資者需要的是氣質（Temperament）而唔係智慧。例如獨立思考、對自己有信心而唔係過分自信及控制個人情緒（我老曹改為有智慧不如追逐趨勢）。 另外三條由Gartman所訂。一、屋內永遠唔會只有一隻蟑螂。正係福無雙至，禍不單行。去年8月次按危機後，至今金融機構接二連三出現問題，證明永遠屋內唔會只有一隻蟑螂。 二、的牛市中可長線持有，熊市中只宜拋空（我老曹改為牛市中不妨做好友，一旦熊市來臨便持盈保泰，因我老曹冇膽拋空）。 三、只有基礎分析與技術分析一致先入市，投資集中優質股，入市時機用技術分析。 最後三條由Puggy Pearson所訂。一、20�80定律。無論的賭場或期指市場，贏家只佔20％，輸家佔80％。要成為20％少數，必須明白Top Down或Bottom Up策略（何謂Top Down？例如去年10月股市見頂後便保持睇淡，直到出現一浪高於一浪為止；何謂Bottom Up？即股市見底後便保持睇好，直到出現一浪低於一浪為止）。利用Pearson著方法，各位唔使經常問我老曹熊市幾時完？的恒指一再出現新低環境下只宜 Top Down。 二、學會管錢。好似賭錢咁，冇理由鋪鋪買，只有形勢最有利時先賭，同時限注（例如熊市中，只動用30％資金，牛市中才動用70％資金）Keep It Simple；唔好賭你輸唔起著錢，賭錢時要輕鬆而唔係搏殺；明白風險與回報關係。一如沙蟹，當形勢有利時去盡D，形勢不利時要識投降（唔好忘記止蝕沽盤）。 三、了解自己，嚴守紀律。大部分人賭錢往往輸死而唔會贏死。理由係贏錢時縮，輸錢時賭氣。成功賭徒及成功投資者便相反，就係贏錢時去盡D，一旦輸錢便縮。 上述三位都係當今投資泰斗，值得各位學習。只要善用九大方法，保證你六十歲退休時富有 [ 本帖最後由 羊仔 於 2008-10-17 11:23 編輯 ]

Share this:

火煋人

投資者日記:道指確認步入超大熊市 2008.10.8 10月7日，周二。是日重陽假期香港冇市。通常底部唔會係一個，而係兩個或三個，即10月份內恒指如不低於16200點，另一次反彈市隨時出現，但唔好忘記熊市投資策略。 另一方面，隔夜拆息與三個月同業拆息利率差仍在擴大，代表未來仲係好麻煩。即10月份股市繼續極之難玩。 全球股市回落，美元成為熱門期貨，除日圓外，兌其他貨幣皆上升。兌歐羅更出現自1999年以來最大一周升幅，估計買家來自瑞士至南韓都有，令歐羅一度見1.3472美元、日圓則升上100.4日圓、瑞士法郎見1.1471兌1美元，以及英鎊見1.7383美元。 過去唔少日本資金外流做利差交易（Carry Trade）。例如借日圓持歐羅及持澳元係最流行套息行為。今天澳洲宣布減息1厘，係1992年以來最大一次減息（分析家事前估計減息半厘），令澳元見 72.25美仙；由7月16日兌98.49美仙至今，澳元已回落27％。英倫銀行10月9日開會，估計亦會宣布減息0.25厘；日本保持利率不變，今天日經10000點一度失守，見9916點，收市前重返10000點之上，係2003年12月以來首次跌穿10000點。摩根士丹利估計，日本經濟再次陷入衰退，並估計年底前減息0.25厘；今天豐田汽車跌5.9％，因產品80％出口受日圓強勢影響；聲寶跌9.2％，因公司估計2008�09年度純利減少 41％。 道指10000點失守，花旗股價下跌9.5％及美聯跌7.7％。銀行股仲係拋售對象，理由係過去十幾年最賺錢生意（收服務費）收入日後將大減，重返傳統借貸業務，只能賺息差，即未來數年銀行純利都係低增長（甚至倒退）。 至於恒生指數，相信9月18日低位附近有一定支持力度。 通縮機會大於通脹 今年美國GDP 14萬億美元；美國政府負債9.6萬億美元，其中4.2萬億美元由社會保障基金及公務員服務金持有，即外界所佔約5.4萬億美元，相等於美國今年GDP 38％，呢個數唔算多。如歐洲同日本經濟進入衰退，明年美國進入衰退機會好大，因標普五百企業50％以上利潤來自海外；標普五百至今已回落35％（1973�74年回落48％、2000至02年回落49％），戰後熊市標普五百平均跌幅31％，即家陣跌幅已超過平均數。 依家問題係銀行與銀行間缺乏互信，唔願向同業貸款，情況好似1907年（因1906年三藩市發生大地震引發）。其後由摩通出面作中間人（銀行借錢畀摩通，再由摩通借畀各銀行，而漸漸恢復信貸），家陣呢個位置由聯儲局或各國央行擔當。有錢在手銀行寧可低息買入聯儲局國庫券，由聯儲局吸收資金後再借錢畀需要資金銀行，情況有D似2003年香港沙士事件，雖然平均每十萬人只有二十六人感染，但因互相猜疑而令香港整個經濟停落來。當年北京旅遊業收入減少80％，以及中國 2003年第二季GDP出現負5％增長。最後由中國政府批出自由行，令香港同中國經濟迅速恢復。好多人以為係自由行計劃帶旺香港經濟，非也；自由行只令香港同中國人對沙士戒心消除，恢復正常經濟活動。近日歐洲各國政府向銀行存戶提供保證，希望能恢復銀行與銀行間互信。 根據國際結算銀行數字，去年12月底歐洲銀行欠8000億美元；雷曼兄弟破產後，歐洲銀行已唔易再借到美元，紛紛補倉，形成美元利率在倫敦一度高見6厘。本周一仍企在3至3.5 厘。信貸壓碎在歐洲出現，因唔少歐洲銀行槓桿比率達到1比50，睇來只有政府大幅注資，歐洲銀行才能渡過危機。 今年如果你損失慘重，我老曹建議你暫時離開香港到外地行陣，便可發現銀行危機處處都有，非香港獨有。根據IMF經濟學家Luc Laeven及Fabian Valencia統計，1970至2007年全球三十七個國家共出現一百二十四次銀行危機，最後皆由政府挽救。結果係大同小異，即銀行股東損失慘重，銀行存款戶損失有限。不過，擠提一旦出現，銀行為了自保唔願向同業提供拆放，引發信貸收縮，後遺症係未來三到六個月後經濟增長放緩，甚至出現衰退！ 美林證券分析員David Rosenberg認為，TARP（Troubled Asset Relief Program）未來可引發通脹，建議持金；從1990至2003年日本經驗，信貸壓碎後果係通縮，當年日本銀行一再減息到接近零，政府一再推出挽救經濟方案亦未令日本通脹率回升。TARP最後會令美國經濟陷入通脹危機定係通縮？在去槓桿化（Deleveraging）壓力下，信貸或流動資金漸變得稀少而影響投資，令股市、樓市及債市收縮，我老曹相信前景係通縮大於通脹。 過去AIG為歐洲銀行3000億美元CDS提供擔保。自從AIG自己出問題後，各歐洲銀行手上3000億美元CDS冇保險，需要為上述投資撥備，引發銀行存款戶信心動搖，過去由AIG所作擔保現改由各國政府提供保證，唔知係未有效？ CDO市價入賬引爆次按 1929 年華爾街危機後，1933年美國國會通過Glass-Steagall法案，阻止商業銀行從事投資銀行業務；呢個法案在1990年先取消，結果令大證券行及大銀行開始投資銀行業務。美林槓桿比率高達四十倍、高盛二十八倍及雷曼三十倍。除上述因素外，各銀行更冇將大量衍生工具產品在資產負債表上列出，呢個數目達到65萬億美元，在美國樓價上升期，當然一切都平安。1929年華爾街危機出現，理由係當年股市缺乏監管；在危機之後，1934年美國建立證券交易委員會並通過法例，令美國金融監管體系日漸完善。1990年起政府放寬監管，大量金融業創新產品出現，隨住時間過去，產品設計愈來愈複雜，衍生產品層出不窮而且環環相扣，令人眼花繚亂，現存監管制度及法律唔係跟唔上形勢發展，就係無法了解呢類新衍生產品，終於到了去年8月，危機又一次爆發。美國財長保爾森今年3月31日公布改革方案，將對美國金融監管體制進行大力闊斧改革，以迎合新形勢，可惜已經太遲，因為2006年第三季起樓價開始回落，令上述衍生項目出事，各銀行都需要清理呢類衍生產品；上述係著名評論員Richard Russell認為未來美國進入通縮理由。 再參考日本情況。 1987年在美國同西歐國家壓力下，日圓面對大幅升值壓力；日本央行大幅減息去抗拒，結果不但令日本房地產及股市出現泡沫，由於日本房地產較美國貴好多，亦令日本企業大量投資美國房地產。到1992年日本美國房地產投資蝕了接近7000億美元，相等於八十年代日本對美國出口盈餘總額（即八十年代日本來自外貿盈餘在1990至92年美國房地產投資上輸晒）。1992年起國際清算銀行通過《巴塞爾協議》，要求全球銀行資本充足率在8％以上。日本銀行一向資本充足率偏低，被迫在海外拋售資產去補充資本，引發日本市場信貸緊縮（家陣全球銀行資本充足比率已提升到12％），令日本經濟從此一蹶不振，陷入十多年衰退。 呢次次按危機在去年8月爆發，部分理由係國際會計師公會要求去年12月起所有CDO價值要Mark to Market（按市價入賬）；並有一年寬限期。今年美林將手上1美元賬面值CDO按市價入賬，只得25美仙！即大部分CDO市價只得賬面值25％；按上述比例入賬，令各金融機構出現重大虧損。銀行更要集資去滿足國際清算銀行要求，維持資本充足比率在12％，情況有D同1992年日本各銀行面對問題。 以日本1990至2003年為例，政府採取措施後，股市平穩及反彈；過了無耐第二波又來，政府採取更強大措施，股市又再平穩及反彈；過了無耐第三波又來，而且更可怕。那D在第一波冇跌低金融機構在第二波跌低；能逃過第二波者在第三波跌低。一直到2003年4月先算企穩，共花了十四年時間。呢次美國又點？槓桿交易及衍生產品過度擴張情況較1990年日本有過之而無不及。在投資者貪婪與逐利壓力下，各金融機構被迫加入非理性競爭，形成劣幣驅逐良幣現象（穩健銀行因純利升幅小而受壓；相反，進取金融機構成為投資者至愛），加上大量美國頂級大學畢業生，為各大行設計分散風險產品，忘記了投資者非理性一面；形成大量表面上風險唔大產品一旦面對衝擊，就變得不堪一擊，而產生骨牌效應。 美國同日本唔同，日本影響局限在本土，外國唔受影響；美國同全球各國關係太多，令次按危機無法Decouple，更向歐洲、英國、日本及中國擴散（香港亦不能例外）。道指連120個月移動平均數支持點（10624 點）亦失守，呢條線係1982年10月美股牛市開始時所形成長期上升軌，2002年10月及03年4月曾一度接近而守住，但在今年10月呢條上升軌正式失守，代表1982年10月起牛市死亡，明年出現衰退已無可避免。長達二十五年道指牛市在今年10月份確認結束，進入超大熊市！ 再睇日經去年2月26日18300點見頂，成為最先出現跌市股市；今天10000點曾失守，代表日股跌市將持續落去。

Share this:

火煋人

投資者日記:道指如反彈15%疑似見底 2008.10.9 10月8日，周三。恒生指數跌1372.03，收15431.73，成交777.7億元。10月期指跌1432點，收15288點。今天跌幅係本年內第二大（1月22日一天之內下跌2000幾點）。 　　日經失守10000點，跌9.38％，因日圓升至99.96日圓兌1美元；澳元大幅回落，過去一個月日圓上升24.12％，較1999年1月上升21.79％更大，那D沽空日圓持澳元者損失慘重。 　　印尼股市跌停，MSCI亞洲指數跌5.7％。豐田汽車跌6.7％、本田跌6.2％、鈴木汽車跌11％、Alumina在澳洲跌10％、中國鋁業（2600）跌19.76％、必和必拓跌5.4％、力拓跌5.7％及中海油（883）跌14.24％，全球汽車股同資源股大幅回落。日立建築跌 9.6％，SOHO中國（410）跌7.46％，即建築股同內房股亦面對壓力。 　　高盛跌7.3％，見115美元；而通用電氣跌5.05%，收20.3美元，確認股聖畢非德太早入市。 　　日本Mitsui O.S.K Lines跌8.6％，因波羅的海指數今年由高峰下跌75％，令全球航運股受壓。 　　美國聯儲局、歐洲央行、加拿大、瑞典及瑞士齊齊宣布減息，希望穩定股市。 　　美股期指在歐洲升2.6%，估計可引發一次短期反彈。 　　2002年10月10日道指見7141點，到11月時已上升25.3%，其後回落；在2003年3月12日見7397點回升，形成一浪高於一浪，牛市重臨。 　　1998年10月8日道指略低於7400點，在聯儲局挽救計劃出台後，11月24日見9458點，升24.8%。 　　1990年10月11日道指見2344點，1991年2月19日見2955點，升26.1%。 　　上述三次熊市見底後，都在首十個交易天道指回升15%。換言之，未來日子內如道指有能力回升15%，大市有機會見底；相反，如反彈幅度少於15%，擔心後市又再回落。 內地房產商難關到 　　未來幾個月係內地房地產商最難捱的日子，今年年底及明年年初將係一道難過的關，捱得過的生存落去機會就大增。 　　以日本為例，1990年樓價回落後，到2003年下半年先好轉，但今年已有五間日本上市的地產企業執笠（去年有四家），即兩年有九間；因規模唔大，未引起公眾人士的注意。上述九間日本地產公司都在2000年前後上市；日本地價今年3月先開始跌；東京跌1％至3％，而偏遠地區跌10％。香港、新加坡、美國及歐洲資金近年大量投資日本地產，並預計日本未來有十至十五年好景，但今年3月起已回落。最近一間破產公司Urban Corp的資本190.73億日圓，在1964年成立，今年9月13日退出股市，呢間有四十五年歷史的日本房地產開發公司，因日本國內建築法案修改，銀行唔肯貸款畀佢而出現資金周轉不靈。 　　內地房地產公司至今仍未真正受過考驗，大部分係未經歷過冬天的初生之犢，唔似香港房地產公司久歷風霜，前者面對淘汰賽，唔知有幾多間將在年底或明年初執笠。 　　IMF上周修正美國呆壞賬數字，由4月份估計的9450億美元，上調到13000億美元；即美國政府7000億美元挽救計劃只能滿足其中50％。 　　債券大王格羅斯認為，美國仍須減息1厘。 　　前列根經濟顧問Martin Feldstein認為，政府挽救計劃不能阻止美國樓價下跌！ 　　CNN訪問結果顯示，60％美國人相信明年經濟將陷入衰退。 　　今天香港金管局宣布，貼現窗減1厘息，希望對銀行同業拆放有幫助。 戒執便宜貨心態 　　假後歸來，金融市場變得愈來愈凶險，作為評論員只有實話實說，唔使再用糖衣（Sugarcoating）。美國康州對沖基金董事劉震認為，我地又回番 2000年；當科網股泡沫爆破時，已有人形容美國進入失落十年。世界銀行行長佐利克對呢場金融危機睇得好悲觀，而且認為愈窮的人就愈係無力防備；即中國同印度股市跌幅肯定較美國同英國更大！總部在紐約的一間對沖基金共同始創人兼首席運營官認為，太多套利對沖基金因政府限制裸空，只好齊齊清倉！政府介入，變相加快股市回落。聯合國全球經濟監測部主任洪平凡認為，依家冇任何措施可以扭轉美國經濟方向。好多OECD國家的GDP已陷入零增長或負增長，新興國家GDP增長率也明顯減弱。美國繼次按危機後，仲有商業房地產貸款、汽車貸款及信用卡貸款問題仲未暴露。洪平凡認為，美國經濟以金融為核心，一旦產生金融危機，情況就好似心肌梗塞，在血液唔流通情況下，自然大大降低整個市場經濟效率。第二季GDP仍上升3.3％有賴減稅刺激，第三季又點？未來又點？ 　　瑞銀10月6日將明年全球GDP增長率由2.8％下調至2.2％（當全球GDP升幅少於2.5％，代表全球經濟衰退）。瑞士信貸全球自營交易總監Tianhua Zhu認為，明年油價可見70美元或更低。佢同瑞銀股票交易策略員Ben Zhang認為，明年美國經濟陷入大衰退可能性愈來愈高。市場下滑速度加快，每個人都想將資產出售，自然加快市場下滑速度。估計聯儲局好快把利率降至半厘，如投資者認為美國國債係唯一安全投資產品，佢地寧願收半厘息都唔肯投資，信貸市場一樣無法重新活躍起來。 　　呢次次按危機早在去年3月已爆發，只係貝南奇懵盛盛冇發覺而錯過最佳的救市期，任由佢滾大後變成金融海嘯。1990年起，影子銀行透過將信貸資產證券化，予買樓者提供過度流動性，令傳統銀行信貸出現根本性改變──信貸證券化結果造成唔負責任的濫借行為，令房價愈推愈高，衍生產品交易更無限放大。一旦房價下跌房貸變成負資產，令證券化信貸產品迅速在市場拋售，產品鏈斷裂引發市場恐慌，唔少金融機構承受唔住而破產或被收購。投資者的貪婪已變成恐慌，正在度摧毀金融市場根基（即信心），並引發金融海嘯。 　　作為投資者應切戒執平貨心態；點解通街平貨？往往係買入後先發現係次貨（資產有問題），跟住要進一步減值，減值後的平貨變成貴貨！例如Washington Mutual係美國最大存貸銀行，在呢次次按危機下，資產變壞速度可以咁快，更何況那D非銀行金融機構。 　　全球經濟衰退（GDP升幅少於2.5％）代表咩？歐羅區、日本及美國GDP增長率估計只有0.7％至1.2％；中國明年GDP增長率8％。上市大企業明年純利可能較今年減少15%。如呢個情況出現，擔心道指及恒指O跌至單位數（純利負增長係必然結果）。 股聖變大閘蟹 　　股聖投資高盛證券及通用電氣優先股，家陣兩間公司股價已低於認購價。股聖亦要試陣大閘蟹滋味，九月圓臍十月尖，呢個月應食雌蟹不宜食雄蟹。 　　繼次按風暴後，係ARM及Alt-A Mortgage Loans開始重新安排供款利息（80％ ARM首三年只供象徵性利息，三年後即明年起供樓利率按市場利率計算），估計有更多樓按在明年斷供！明年恐怕係另一風雨飄搖年，你話怎麼辦？ 　　英國政府計劃動用資金500億英鎊入股皇家蘇格蘭銀行（RBS）、柏克萊、HBO及萊斯TSB等銀行。周二RBS跌39％，見90便士；HBO跌 42％，見94便士；柏克萊跌9％，見285便士；萊斯跌13％，見225便士。繼接管B&B後，英國政府可能需進一步接管銀行，估計下一間應該係HBO（如萊斯拒絕收購的話）。 　　西班牙撥出300億歐羅去協助西班牙銀行，最高可達500億歐羅及對存款保證由2萬歐羅提升到10萬歐羅。 　　冰島向莫斯科求助40億歐羅去支持克朗（今年兌歐羅貶值40％），周二見180.49克朗兌1歐羅，收市見150.16克朗，一天內冇了12.9％市值。各國政府支持自己銀行的結果，會唔會演變成外匯風暴?! 　　家陣處境係差唔多全球股市皆下跌，差唔多所有資產皆跌價，少數例外係美元及美國國庫債券。甚至金價今年3月至今亦形成下降軌；今天連持現金的投資者亦恐慌（因擔心存款銀行財政唔穩陣）。過去冇行使止蝕盤或採納三七分的投資者，處境真係令人同情，但可做的事已好有限。黃金投資者宜逢高沽（因未來係通縮，唔係通脹）。至於銀行存款戶，我老曹相信本港上市銀行絕大部分安全；至於外國銀行因冇研究，冇深入了解，無發言權。因為本港銀行資本充足比率達15％或以上（唔少更高達18％），係全球最穩健的金融機構。 　　英國經濟及企業研究中心（CEBR）預測，明年英國失業人口增加三十五萬人，其中三分一（約十一萬人）來自金融業，令失業人口達二百萬人，創十一年內新高（去年7月至今年6月，倫敦金融業已裁員一萬六千人，估計今年7月至12月再裁員一萬九千人，明年再裁員四萬人）。 　　英國財政部宣布接管當地最大地產貸款公司Bradford & Bingley。 　　歐洲各銀行及金融機構紛紛出問題。法巴控制富通銀行；德國政府注資Hypo Real Estate。G7本周末開會將研究對策。 　　今年9月大幅波動的股市唔係1987年10月的股市。1987年10月係電腦程式引發沽售（人嚇人、嚇死人），呢次卻由次按危機引發；未來調整期將以年為單位，全球金融業將同家陣唔一樣！不過，所有烏雲都有銀色的邊，熊市二期有好多隻腳，捉腳行動係專業投資者先做得到，一般散戶只能等。在熊市中85％股份皆回落，能夠買中那15％上升股份的機會好有限（事後孔明者多、事前先知一個都冇）。 美國示範自由經濟害處 　　在牛市中，盲的都可以賺錢（去年上半年我老曹番去上海，發現那D盲人腳底按摩師都炒股票）。在熊市中，只有極少數人賺到錢，專家成績唔會比普通人好。 　　美國商場空置率已升到2001年以來最高，七十九個一流商場空置率達6.1％（上一季6％）；非核心地區商場空置率8.4％（上一季8.1％），係1994年以來最高；美國整體商場空置率8％（上一季7.8％），美國零售業亦開始走下坡。 　　全球經濟肯定放緩甚至衰退！上述非7000億美元挽救計劃可以改變。熊市投資策略係安全第一。正係留得青山在，哪怕冇柴燒？ 　　油價由20美元升至今年7月147美元，如調整升幅50％，可見84美元。 　　諾貝爾經濟學獎得主美國經濟學家約瑟夫．斯蒂格利茨本月5日對墨西哥《改革報》預言，美國經濟將面臨較長衰退期；美國股市正出現自由落難（Free Fall）或呆跌。 　　柏克萊銀行前總裁哈威爾．阿莫同日在墨西哥蒙特雷大學發表演說時估計，華爾街危機持續到明年夏季，對美國經濟所造成的負面影響將持續到2010年第一季。 　　摩根士丹利亞洲區主席羅奇認為，中國GDP增長速度將放緩，出口進一步走軟，估計明年GDP增長率下降到8％。 　　德意志銀行副董事長科赫．韋瑟亦認為，中國由過度依靠出口增長轉為內需增長環境下，保持GDP繼續上行曲線壓力好大，必須進行結構轉型；例如社會保障制度、養老制度、教育投資、能源及資源節約。 　　澳洲《悉尼先驅晨報》10月4日文章認為，美國世紀終結並陷入危機。二次大戰後美國肩負領導全球時代，將轉移成為多國領導，其中包括歐盟及中國，成為鼎足三立。 　　民主政府被證明好多時只係一團糟及非常混亂。上述已非東南亞國家或南美洲政府的現象，而係美國。歐盟式集體領導將成為另一模式，其次係中國政府式的領導。美國呢次經驗向全球顯示過分自由經濟的害處；即政府必須制訂框框去限制某方面的自由，去防止意外事故！大選後美國國會將批准成立US Government Banking Restructuring Trust，為期十二年（至2020年）。即明年起政府可隨時入股銀行，去解決唔可以換為現金的問題（illiquid but solvent mortgage-backed securities held by the banks），藉此整頓成個美國金融業；中國亦要制定策略去應付過熱、社會不穩定、貪污、污染及中小型企業債券危機，以及令經濟由出口增長導向改為內需增長導向；歐盟則研究點樣加強國與國之間的合作，以應付跨國性危機。全球經濟會唔會因此出現日式失落十年？暫時唔清晰。 四個問題唔識解決 　　家陣有幾個問題：一、資產價格回落可令金融機構迅速由獲利轉為虧損；二、如銀行唔及時增加資本，因資本充足比率唔夠，隨時引發存款戶提走資金；三、在不景氣中增加股本，金融機構必須賤賣資產，進一步打擊整個行業；四、結果又重返第一個問題。點樣打破呢個惡性循環？我老曹都木宰羊。去年8月至今年7月金融機構欲增加資本，仍可向主權基金（例如新加坡及中東海灣國家）集資；今年下半年仍可向股聖等集資或金融機構互相合併。如情況進一步惡化，明年資金由邊度來?!家陣美國經濟最大危機係陷入cascading debt-deflation spiral（資產迅速跌價，引發還債壓力而產生的通縮漩渦）。 　　摩通中國證券市場部董事總經理兼主席李晶認為，中國政府無法承受樓市大跌，因佔全國固定資產投資四分一及10％就業，估計好快採取措施重振低迷樓市。該行另一位中國區董事總經理龔方雄表示，隨住全球商品價格及資源價格下跌，明年5及6月中國CPI可能出現負增長。 　　北京大學中國經濟研究中心教授宋國青認為，8月開始中國經濟已走向通貨收縮期。 　　中國物流與採購聯合會公布，9月製造業採購經理指數（PMI）51.2％，重返50％以上（8月係48.4％）。咁即係話中國經濟仍未進入下行態勢。花旗銀行宏觀經濟分析師彭程認為，經過7及8月份下行，9月份只係反彈，依家的國際形勢仍在惡化，中國出口形勢仍將面對嚴峻考驗。瑞銀本周一已將明年中國 GDP增幅由原先8.8％下調至8％。摩根士丹利估計，由家陣到明年年底，中國將減息五次，每次0.27厘，一年期貸款利率由7.2厘降至5.85厘。明年CPI升幅只有2.5％，GDP升幅8.2％。 　　在家陣惡劣的環境下，仲有三位讀者向農家女技術學校援助，第一位係麥先生及麥太捐助10萬港元；另一位係曾太以其兒子名字捐3000元；最後一位黃先生捐助1000元；上述款項現已代匯上北京，其善心可嘉。 [ 本帖最後由 羊仔 於 2008-10-17 16:39 編輯 ]

Share this:

火煋人

投資者日記:誤買毒債值得同情 2008.10.10 10月9日，周四。恒生指數升511.51，收15943點，成交608.7億元。10月期指升637點，收15925點。技術上睇周五港股上升機會仍大，後市有條件重返16000點以上；相信只係一次反彈，而唔係熊市見底。 花旗集團認為，中國減息不利內地銀行業，但可刺激股價上升，另推介江蘇寧滬（177），估計今年每股獲利33.7仙，升4％，P/E十一點八倍，目標價6 元；中通服（552）估計今年每股獲利27.1仙，升26.3％，P/E十點五倍，目標價7元；第一太平（142）估計今年每股獲利7美仙，升 23.6％，P/E六點八倍，目標價4.6元。 根據Thomson路透報道，美國連續九個星期冇新股上市，係1980年以來首次咁長時間冇新股上市。9月份全球只有二十二隻IPO，集資2.377億元，係1990年11月以來最少的月份。 澳元下跌有利經濟 八國聯手齊減息，因為各國政府擔心全球金融業Meltdown。日本仔Unwind利差交易，不但刺激日圓匯價上升，亦令全球冇了廉價資金供應（1990年至今，日本係全球最大廉價資金來源）。IMF估計，全球明年經濟將陷入衰退（即GDP升幅少於2.5％），因金融危機令美股投資者蝕了14000億美元。日本仔Unwind利差交易後，澳元係最傷，但對澳洲經濟係好事；今年我老曹原本計劃去大堡礁睇珊瑚，因澳元太貴而取消。澳元跌番後，明年可帶埋太太到澳洲睇珊瑚。SCG估計，未來1英鎊可兌3澳元（希望佢的分析冇錯，因為唔少港人有子女在澳洲留學讀書，澳元回落可減少負擔）。 今年10月已係深秋，紅葉從樹上落下，股價亦一樣。聯儲局決定直接向美國企業提供貸款，呢樣係大蕭條後首次；聯儲局自己擔當銀行一職，令美國銀行股股價進一步下跌。美國商業票據上月減少40％，因私人基金流走5000億美元，政府注入3800億美元（來自iMoney Net Inc.資料），本周二最少有一間公司發行兩星期商業票據（7厘息），甚至GE亦要出5厘息（過去只要2厘到3厘）。睇來麻煩仲未減少。 經濟策略改變係代表大方向改變，例如三十年代羅斯福總統的New Deal，為資本主義引入社會主義的福利制度；七十年代後期英國的鐵娘子主義及八十年代初期的美國總統列根引入貨幣主義（Monetarism），成功控制通脹後，再透過減息及增加貨幣供應，帶來八十年代至家陣的繁榮。踏入2000年，科網股泡沫爆破，能源及商品價格狂升；加上2006年樓價回落引發去年次按危機，無論英國或美國政府早已變成跛腳鴨。隨住「兩房」被託管、雷曼兄弟破產及7000億美元挽救計劃未能令股市穩定落來，相信美國大選後經濟策略又唔一樣。愈來愈肯定由1982年起透過減息，增加貨幣供應、刺激股市同樓價上升、擴大信貸及製造消費需求，達致經濟繁榮的貨幣政策玩完。未來會唔會出現羅斯福總統式的New Deal（即向富人抽重稅補貼窮人）？明年美國大選後可明朗。 日本日興資產管理公司大中華區總裁宮里啟暉認為，華爾街金融危機已席捲歐洲及全球其他地區。對金融市場所造成的破壞，迫使各國政府加強對金融機構監管，搵出風險所在並推出法律去約束金融機構經營活動。對創新金融產品市場而言，無疑係一個打擊，代表成個金融業將會經歷二至三年寒冬期。 金融危機損壞了融資渠道，已對其他行業產生影響。美國政府自 1990年起過度自由經濟模式，到二十一世紀已漸失控，監管力度唔夠，對幾十萬億的虛擬經濟監管不足，搞到次按危機爆發，家陣仲無法準確預測其影響。能夠預見的問題係：一、銀行為規避風險而緊縮銀根，令全球進入信貸緊縮期；二、金融危機對日本亦有影響，因日本金融機構持住唔少來自美國的金融衍生產品。今後日本投資者唔再信賴呢D機構，亦導致日本金融股價大幅下跌。呢種情況非日本獨有，只係較其他國家嚴重，因資金回流日本，令日圓急升加快日本經濟下滑。 金融市場迷失方向 美元減息令利差交易利潤大減，導致資金回流日本，不但影響日本產品出口，同時亦令日本海外利息收入同投資收益大減（日本已唔只係出口大國，亦係一個投資大國）；加上日本人口老化甚至減少，無法擴大內需，以及日本政府債台高築等，亦無法再投資刺激經濟。 展望未來，美國八十年代開始的貨幣政策下的市場經濟模式再次受到質疑，短期內又冇新模式出現及取代，國際金融市場會有一段日子將迷失方向。 呢次次按危機，2005年不履行合約率5％，但到了去年已升至13％，今年更達到25％。更嚴重的係呢D次按債券透過CDS，即有公司提供擔保，例如 AIG、「兩房」及唔少銀行，令人有放心購買的感覺。家陣不但不履行合約率急升，同時提供擔保的公司自己都破產，引起銀行存款戶恐慌而提款；而且銀行間缺乏互信，令股市出現急速下滑。 英倫銀行宣布，提供2000億英鎊去改善流動性，然後動用500億英鎊注入有問題銀行，另為2500億英鎊中長期債券提供擔保；即英倫銀行共動用5000億英鎊，規模較美國的7000億美元挽救計劃更大。 匯控（005）一級資本比率7.7％，佢話唔使政府資金亦可達到8％水平；巴克萊的比率6.3％；皇家蘇格蘭銀行、萊斯及HBOs的比率略低於6％，估計政府只要250億英鎊便能令呢D銀行的一級資本比率達8％安全水平。 與英國唔同，美國政府係向銀行購入不良資產；反之，英倫銀行係直接注資各銀行換取股份。即英倫銀行有機會賺錢（如日後股價上升）。不過，成個金融市場進入去槓桿化（Deleveraging），即未來金融業size較家陣細！在過程中出現痛楚係無可避免，為減少痛楚，英倫銀行已宣布減息半厘。 2003 至07年投資者受貪婪推動而作出大量幾傻的決定，尤其在房地產方面，似乎肯定樓價只升不跌；有錢的投資者則透過對沖基金經理，提供大量流動資金畀貪婪投資者去做傻事。今年突然之間恐慌成為主導，成個市場開始Unwind，有冇連埋BB將沖涼水倒掉？唔少優質股股價已較高峰時回落50％；野草燒盡後，土地又再肥沃，一旦春回大地，又再野花處處，周而復始，循環不息。 歐美注資作用好短 去年一百萬單倒閉事件中，只有六十二萬單同次按有關；未來十八個月共有二百萬單次按貸款須重新安排，到時會唔會出現三百萬單倒閉？由信貸推動的經濟繁榮期由1982年開始，去年10月結束。我地面對的唔係和暖的冬季，而係零下二十七度的嚴寒。黃金歲月已結束，寒冷歲月由去年11月起已開始，何況未來將愈來愈凍。可憐唔少投資者只有一條泳褲，點樣頂住零下二十七度的嚴寒？美國房地產泡沫爆破所產生的金融黑洞，正在度吞食一切，7000億美元挽救計劃又算得咩？更何況美國金融危機已迅速向歐洲蔓延，在歐洲造成另一個黑洞。歐美兩大經濟體系已佔全球GDP一半，更何況日本至今經濟仲係唔生唔死。 美國的銀行同歐洲的銀行互相之間唔再信任，造成資金唔流暢，情況好似一個患心肌梗塞的人，如果唔及時醫治，最終導致死亡。家陣單靠各國央行注資及減息，好似採用緊氧氣筒呼吸，咁可以頂幾耐（或股市反彈可以維持幾耐？本周澳洲央行減息1厘，澳洲股市上升一天）？中國GDP亦由去年年底11.9％增長率走向明年8％，低於過去三十年平均年增長率9.8％（台灣由 1958至91年保持三十三年平均年增長率9％後，1992年起大幅回落；到去年，在過去十五年平均每年GDP平均增長率只得4.5％）。中國係未走上台灣之路？再睇睇泰國持續三十一年高增長後、印尼持續二十九年高增長後，以及馬來西亞持續二十七年高增長的情況。1997年亞洲金融風暴後，泰國及印尼過去十年GDP年增長率只得2.7％；馬來西亞好D仲有4.5％。中國經過連續三十年GDP增長率平均9％後，明年保8%增長率亦有問題。中國經濟改革研究基金會國民經濟研究副所長王小魯等人估計，中國未來平均年增長率為6.21％；世界銀行高級副行長林毅夫等估計係7.08％。儘管結果唔同，但相同點係中國經濟高增長期係去年結束，另一問題係去年中國人均GDP亦只有2000幾美元，在咁低收入下，如未來GDP進入低增長期，中國所面對的壓力，等同1997 年東南亞國家面對亞洲金融風暴一樣。 人民銀行10月8日宣布減息0.27厘，存款準備金減少0.5％，係一個月內第二次調低；同時個人所得稅中儲蓄存款利息稅率由去年8月15日20％下調至5％後，呢次免收。即中國亦步入免利息稅期，對明年經濟幫助有幾多？ 目前三個月、六個月、一年、二年、三年及五年存款利率為3.15％、3.51％、3.87％、4.41％、5.13％及5.58％；六個月、一年、一至三年及三至五年貸款利率係6.12％、6.93％、7.02％及7.29％。五年以上係7.47％，睇來幫助唔大。 為期五天深圳房地產秋交會閉幕，秋交會期間全深圳市共成交三百一十七套一手住房。 上海秋季房展亦閉幕，一連四天上海共成交住房八百二十一套，較兩年前下降40％。 三方面出現問題 內地房地產已感到秋意；對發展商來講卻係秋風秋風愁煞人。 其他主要城市房地產市場交易一樣低迷，包括北京、天津、重慶及杭州。北京交易量較去年同期下降44.9％、天津下降66.43％、重慶下降83.55％及杭州下降64.95％。踏入10月首七個交易天成交量令發展商完全失望。 由於我老曹一直冇同讀者推介迷你債券，實在唔想多講野，但隨住事情發展，又有不吐不快之感；我老曹批評證監在審批過程中實在疏忽（可能鬼子佬中文唔好），呢 D產品明明係票據（Notes）點解批准各銀行以債券（Bonds）名稱出售？如果標明迷你票據，而唔係迷你債券，係未會有咁多人受騙？第二應批評金管局實在監管不力。請問各銀行推銷呢D產品職員中，有幾多人已考到財務策劃師牌照？任由冇財務策劃師資格的職員向銀行客戶推銷金融產品，就好似醫管局任由非醫生人士在本港行醫一樣；第三批評本港各銀行作風，呢D產品推銷對象應係資深的投資者（即有100萬美元或以上），而唔係一般散戶，呢類連推銷者自己都唔太明的產品，又點可以向一般散戶推介？可以話銀行係濫用客戶對銀行的信任。請問銀行內有幾多職員向客戶推介時，用了等同定期存款呢句說話？職員無知因佢地唔係財務策劃師，但銀行客戶值得同情，好似飲牛奶人士唔一定知道牛奶有毒的道理一樣。 莎士比亞早在十六世紀曾話過：「唔受監管的自由就係狂野。」馬克吐溫在炒股失敗後亦話：「太多人假借自由之名而行不義。」自由經濟唔係冇皇管，1990年起美國政府逐步放寬對銀行監管原本係好事，但到二十一世紀濫發衍生產品時，仍唔管住佢，而任由市場走向就係狂野。我老曹一向信奉自由經濟（第一篇為《信報月刊》寫的文章就係介紹無形的手），但反對唔受任何監管的自由。在自由之上必須嚴格執行「法律與秩序」（先有Law and Order才有Liberty，如果唔係就變成放蕩主義）。 我地不能指責投資者因對產品唔認識而要負上責任；一如我地不能指責飲奶者對牛奶唔認識而飲了毒奶的道理一樣。迷你債券苦主值得同情與支持，但佢地亦不應犯法，應循法律途徑追回自己損失而唔係採用任何非法手段，相信公道自在人心。在外國，呢類產品係唔可以向散戶（少於100萬美元流動資產者）推銷；而非財務策劃師亦唔可以向別人推銷財務產品。希望銀行界今後唔好為了佣金，而濫用客戶對銀行的信任。商譽得來不易，失去卻好快。 希望政府及銀行界同迷你債券苦主盡快達成大家可接受的協議，以免影響香港作為世界三大金融中心的地位。

Share this:

火煋人

投資者日記:萬四漸見支持 2008.10.11 10月10日，周五。日本第二大地產公司三菱地產跌9.1％，因New City Residence Investment Corp破產，該公司負債高達1124萬億日圓（11.3億美元）；大和生命亦宣布破產。 恒生指數一度見14398點，十分接近9月7日研討會我老曹所講的最差估計（詳情請參閱10月份《信報月刊》），收市14796點，跌1146.37，成交693.7億元。10月期指跌992點，收14933點，高水，進一步證明14000點有支持。 美國通用汽車股價跌至五十八年內最低，福特汽車跌至二十六年最低，因9月份美國汽車銷售減少27％，係1991年以來最大跌幅。通用汽車跌31％，見4.76美元；福特跌22％，見2.08美元。通用汽車票據家陣有34厘息，福特22厘息，但投資者擔心冇息派。 道指短期下跌空間小 花旗放棄收購美聯銀行，讓了畀富國銀行，收市後美聯銀行升36％，富國銀行升3％。技術上睇，道指亦進入支持區。 美國經濟已進入財富破壞期，去年11月至今美國人共失去6萬億美元的財富！ 1979 至95年聯儲局貨幣政策跟足貨幣學派的策略（monetarism），即貨幣供應唔會大於經濟增長；上述政策1995年2月起改變，貨幣供應年增長率達 9%，GDP同期增長率只有5.3%，但通脹未被引發，主因係同期美國以互聯網及手機科技為主，而上述項目好容易外判，因此並冇引發通脹。但2001年起不但美國經濟增長依賴房地產，其次係各國亦跟隨美國貨幣供應上升，而且速度大於GDP增長率，因此引發全球性通脹。 1995年2月道指在 3953.54，1995年第一季美國GDP為7.298萬億美元；估計今年第三季14.45萬億美元，即較1995年第一季上升98%，以此計算，道指合理水平應在7829點。換言之，道指在7800點便合理，依家道指仍偏高10%左右，即道指8000點可作中長線投資，短期下跌空間已不足10%。 花旗推介恒鼎實業（1393），估計今年每股盈利67.8仙，升82.9%，P/E二點八倍，目標價3.5元；神華（1088）估計今年每股獲利1.423 元，升37.8%，P/E九點一倍，目標價19.3元；中煤能源（1898）估計今年每股獲利71.5仙，升39.4%，P/E七點一倍，目標價6.3 元；兗煤（1171）估計今年每股獲利1.791分人民幣，升173%，P/E二點九倍，目標價6.75元；巨騰（3336）估計今年每股獲利59仙，升 44.6％，P/E五倍，目標價4.2元；聯想（992）估計2008�09年度每股獲利4.2美仙，減少14.5％，P/E九點七倍，目標價4.9元；李寧（2331）估計今年每股獲利68.6仙，升51.9%，P/E十六倍，目標價23元。 滬深三百指數跌4.43%，見1906.96。十一黃金周已過，深圳秋季房地產交易會上每日成交只有六十三套，秋交會期間全市一手房成交只有三百一十七套；二手房更慘不忍睹。金融危機已殃及中國樓市，一線城市全面淪陷；京、滬、深、穗住宅成交量都降至冰點，成為有史以來最冷的「黃金周」。高盛估計，國內房屋庫存需要二十二個月才能消化。中信證券調查指出，消費者心目中的合理房價為當前房價低25%。 紐約大學Nouriel Roubini 教授10月9日又有發言，佢認為美國及先進國家金融制度正面對系統性溶解（meltdown）。最先係影子銀行系統（例如股票經紀及非銀行貸款公司、 SIV、對沖基金、money market等），依家大致上已完成，家陣開始受壓的係銀行系統。銀行借入短期資金，放出長期資金（例如向客戶借入一年期以內的存款，借出十五年或以上的貸款），已面臨周轉危機。 環球衰退後天下三分 美國、英國、歐羅區、加拿大、日本、澳紐等先進國家共佔全球GDP 55％，今年夏季開始已面對信貸壓碎（credit crunch），相信明年春季前引發經濟衰退。至今為止未見分道揚鑣（decouple）出現，新興市場經濟所受影響較先進國經濟更大，尤其係那D有較大收支赤字或較大財政赤字的國家，經濟更加脆弱。四金磚國更面對硬著陸，貿易增長率大幅減弱，恐怕不但只引發衰退，更加係金融危機。 危機的形成來自高槓桿比率的資產泡沫，不但在房地產，而且在金融機構過度借貸下產生的股市泡沫、對沖基金泡沫、信貸泡沫、商品期貨泡沫，令人擔心上述泡沫同時爆破，將引發自大蕭條以來最大一次去槓桿化。「衰退號」列車剛剛離站，未來到底係短而淺的V形衰退，定係長而深的U形而且維持兩年或以上？甚至係日式的L形長達十三年的衰退？仍未能預計。 今年3月貝爾斯登被300億美元收購後，股市出現反彈，但只維持八星期；7月份「兩房」被託管，股市反彈四星期；但到雷曼兄弟破產、AIG被接管，即使推出7000億美元挽救計劃，股市亦反彈乏力，因為信心已崩潰！就算10月6日七國聯手減息，亦只有小部分地區股市反彈。依家股市肯定超賣（但超賣唔係睇好的理由），因為我地正面對一個系統性崩潰及環球性衰退，將會大大改變家陣的經濟政策及領導權（例如日本估計未來將出現三分天下，即由美國、歐盟及中國取代美國一國獨大）。 一如今年2月Nouriel Roubini教授估計，金融系統進入分十二階段的溶解期，依家完成第九階段（影子銀行系統出大問題），進入第十階段（股市狂瀉反映全球面對大衰退）；第十一階段係資金乾涸，衍生市場成交銳減，令銀行同業拆息高企，大量企業倒閉，相信今年12月至明年1月發生；最後引發賤賣資產、信貸收縮，令市價較基本價值還便宜，大量margin call出現，以及大量企業被金融機構切斷「信貸線」（企業根本上借唔到蚊年），整個金融系統溶解期才完成。社會進入銀行唔信企業拒絕貸款期；企業為本身「有毒投資」作大幅撥備……至此，經濟進入低潮，然後有問題銀行合併或被收購，無問題的銀行增加資本，另一經濟上升期又開始。 美元利率去年 9月開始回落；太陽去年10月開始從華爾街回落。呢回唔係《日落巴黎》（戲名），而係「日落紐約」，擔心下一步係日落倫敦甚至香港，因為近幾十年無論紐約、倫敦及香港經濟皆過分向房地產、商品期貨及金融業傾斜，當地產，金融、商品期貨同時爆煲下，自然出現日落，一如2000年科網股泡沫後硅谷出現下沉的道理一樣。呢次歐洲央行減息，係2001年9月11日以來首次。 各位要記住以下三招：一、追隨市場趨勢，學習Top down及Bottom up技巧，當股市向下時，努力減少虧損及增加手上現金。二、急急止蝕，任何時間如回落15％必須考慮止蝕，如回落20％便唔使再問理由止蝕（有人用5％及 10％止蝕，我老曹唔同意，因為太敏感好易震出）。三、反彈如小於15％可以不理。上述三招已可保閣下平安。 當惡性拋售完畢，基金經理會自分辨邊D企業純利係十分脆弱（例如銀行業內的非利息收入、地產股中來自物業重估、公司投資的股票收益等等）。反之，如果企業純利十分鞏固，甚至在衰退期一樣可以存在，日後呢類股份的股價自然可以反彈。 持100%現金做空軍有心理包袱 太陽陳來電批評我老曹過去的「三七分」策略。既然確認係熊市，點解仲持住30％股票而唔做「空軍」？在邏輯思維上，太陽陳的批評絕對正確，但感情方面人人有包袱，持100％現金然後做空軍，又有幾多人可做到？我老曹接納太陽陳的批評，但唔會改變依家的「三七分」策略（事實上家陣已變成八二分，因去年10月份 30％資金購入的股票依家已跌了40％，變成只佔全部資金20％）；至於做空軍係極之專業的行為，相信好少散戶可以過心理呢一關。 各國向金融系統注資令貨幣供應上升，點解我老曹卻睇通縮？因為貨幣流速（L Velocity）在度減慢。即貨幣由甲轉到乙、再由乙轉到丙的速度放緩，呢種影響力更大於貨幣供應上升。情況有如退潮令近岸的船隻大部分擱淺（海水冇減少，只係流走了）。去年11月起我地面對流動性資金退潮，情況同2001至07年初相反，當年在漲潮下，百物遲早升值。 油價回落，OPEC 將於11月18日開會決定會否減產？機會唔大（或明減實加），因為俄羅斯及其他產油國亦需要現金。例如委內瑞拉國有化工業股需60億美元，伊朗所需資金更大，仲有阿聯酋、科威特今年在股票投資上虧損3500億美元。估計明年油價跌穿80美元、見75美元的機會好大。 英國人在Icesave Internet bank有三十幾萬個戶口，英國政府為上述戶口提供5萬英鎊保證，因此英國政府打算控告冰島政府，要求賠償損失！冰島四大銀行外債超過1000億美元，冰島一年GDP只有140億美元，過去依賴外債去維持每年GDP 5％增長。而冰島政府外匯儲備少於30億美元，擔心冰島政府將成為首個破產的政府（各位唔好以為政府就唔會破產！）。 瑞信相信，加元將於10月29日減息半厘，12月9日及1月20日再減息至只有1.5厘，因加國經濟已步向衰退。 上海銅價、鋅價跌停，分別報43890元人民幣及11825元人民幣。 截至9月底止，估計全球共拋空45000億美元。各國央行為支持本土銀行及股市，已動用17000億美元，由此可見美元短缺的情況，如非美國聯儲局近日大量提供美元，擔心美元匯價升幅更大。估計未來幾年全球各主要大銀行仍需6750億美元去增加資本（因歐洲銀行為投資項目撥備50％以上，必須擴充資本）。過去幾年有人空美元持歐羅、空美元持英鎊、空美元持……家陣引發平倉潮。美元兌歐羅7月至今上升15％仍未足夠，瑞信估計第四季美元升幅仍十分大。 全球齊齊減息，令日圓利差交易unwind，造成日圓強勢；估計2009年日圓利差交易額大幅下降，將令歐羅、瑞郎、澳元、紐元及英鎊面對好大沽售壓力，擔心各國貨幣兌日圓明年仍貶值，令日本經濟重陷衰退。 以大型頭肩頂結束美國光榮歷史 信貸危機至今只出現十四個月，而股市只下跌十二個月，標普五百跌幅已達38％（戰後平均熊市跌幅31％），1973至74年跌幅為48％，2000至02年跌幅為49％。未來下跌空間仲有幾多？有一百五十八年歷史的雷曼亦破產，全國最大證券公司美林則被美國銀行收購，全球最大保險集團AIG要政府注資，仲有乜野衰野未浮現？美股由2000年起正形成一個大型「頭肩頂」，估計在7500至8000點附近獲支持，然後再形成右肩，去結束美國過去一百年的光榮歷史（一如第一次世界大戰前結束英國的光榮歷史一樣）。未來世界唔再係一國獨大，而係鼎足而立（美國、歐洲同中國）。在美國，投資股票及物業可發達的最後一次由1982年開始、2007年結束共二十五年，未來一如1990年後日本走下坡。過去一年如你冇Take shelter或Cover up，今天又可以怪邊個?!過去一年唔少藍籌股跌幅由30％到60％不等。展望2009年我地將進入衰退期，呢次衰退期有幾耐？冇人事前可知道（日本 1990年那次係十三年、香港1997年那次係六年）。 美股連跌七個交易天，對標普五百而言係1996年以來跌幅最大、為時最長的下跌日子，金融股已跌至近十二年低位！財長保爾森更警告會有更多銀行破產！取消裸空後，周四美股又再狂瀉，股市漸漸進入非理性拋售，係未接近底部？讓市場自己話你知。經過呢輪惡性拋售後，投資者元氣大傷，日後復甦需時。 美國陷衰退機會近九成 經濟分析員認為，美國將陷入衰退，BNP百利達分析員Brian Fabbri認為，「We're in the middle of a very dark tunnel, each day we see another crack in the system!」五十二位分析員估計，2008年第四季及2009年第一季美國GDP將出現負增長，未來十二個月出現衰退機會高達89％（上月調查認為只有60％）。下屆總統1月上任首要任務係刺激經濟，如奧巴馬獲選，將採用高稅政策去支持政府開支，形成明年上半年經濟仍受打擊，屆時才係股市低潮。 High Frequency Economics主要分析員Carl Weinberg接受彭博訪問時話，面對美國經濟即將陷入衰退，貝南奇手上的武器就係減息及向銀行系統注入資金。標普五百指數由去年10月至今跌幅已達 38％、道指跌幅已超過30％。減息半厘後，貝南奇仲可以從佢的帽中拎出幾多隻小白兔？Discover Financial Services每月向超過一萬五千位成年人調查佢地的消費習慣，發現9月份消費者開支指數較8月份下降2.2％，5.5％受訪者認為今年9月較去年9月更差。沃爾瑪公布9月份銷售只較去年同期升2.4％；中價零售商J.C. Penney公布9月份銷售較去年同期減少12.4％。 美負資產家庭或倍增 The Boom Years Are Over！股票市場十二個月前已見頂，美國零售業今年第三季銷售才減少，理由係美國人在股票市場失去接近5萬億美元市值，再加上物業市場跌價。《華爾街日報》估計，依家每六個物業擁有者中有一個係負資產！美國約有七千五百五十萬個家庭擁有自住物業，即家陣約有一千二百萬個家庭陷入負資產狀況，而樓價仍繼續回落。由於過去八年美國人收入並冇上升，理論上樓價亦不應上升，但事實並非如此，理由係利率下降加上信貸寬鬆，所以樓價2002年起一直上升，雖然 2006年第三季開始回落，但仍較2000年高出20％。穆 的Economy.com估計，如樓價重返2000年水平，美國物業擁有家庭三個中將有一個係負資產！ 忽然之間，美國證監會認為自己應該做D野的，所以決定阻止別人裸空，令對沖基金經理急急平倉，股市在7月份反彈。平倉後基金只有拋售所持優質股（因為不能透過拋空低質股去對沖），結果8月份股市又回落。9月份投資者認為既然對沖基金亦唔准拋空，點解仲要持對沖基金？引發了9月份新一輪拋售期。今天美國證監唔准裸空的行為取消，不但未能阻止股市下跌，反而進一步推跌股市。拋空在美國一向合法，忽然之間變成唔合法；至今人人莫名其土地堂？John K. Galbraith在佢的The Great Crash, 1929中咁樣描述：在跌市中總要搵D代罪羔羊，拋空者就因此成為被指摘對象。 兩位UCLA經濟學家研究指出，1929年後美國衰退期長達十五年（日本1990年起股市回落期共十三年）2007年11月起的美國衰退期又點？UCLA經濟系副主席擔心美國呢次衰退會否長達十至十五年？ 2008 年歡迎大家進入「梅菲」市場。梅菲博士認為，「anything that can go wrong, will go wrong.」（任何事物可能出錯者，最後都會出錯）。2007年11月起股市有如拿破崙從莫斯科撤退，沿途受到俄羅斯軍隊攻擊，愈來愈多人希望退出股市，令任何一次反彈都唔長久。唔少人希望自己今年Sell in May（如去年10月冇出貨的話），可惜時光不能倒流。 熊市只完成三分一 Bert Dohmen係美國知名的股市評論員，去年寫了一本書叫Prelude to Melt down，預測全球金融業解體……今天的情況一如佢估計。我老曹認識Bert Dohmen已係1990年的事，1989年六四事件後，呢位鬼佬居然在1990年去北京旅行睇睇中國情況，順道經香港。在朋友介紹下，我老曹充當佢的嚮導，帶佢欣賞香港夜景，佢太太係西班牙人。我老曹招呼佢兩個到香港知名西班牙餐廳Amigo，而且談笑甚歡，大家不約而同睇好中國同香港經濟前景（1990年那年唔少人睇淡），我老曹亦因此成為佢的投資通訊的讀者。1997年亞洲金融風暴，我老曹亦將香港的情況講佢知，協助佢了解香港的情況，並進一步增加彼此了解。 十五個月前Bert Dohmen寫了一篇「don't listen to all the Pied Pipers of Wall Street」（唔好再聽信華爾街大行的吹笛人），我老曹亦有同感，去年8月起我老曹亦在香港叫大家小心！佢從事分析業三十一年（我老曹比佢老資格少少，共四十年）。我老曹今年放假前，曾問佢對後市點睇？佢話：「It's only the 3rd inning.」（如你有玩美式棒球，便知道一場賽事共有九個inning），即家陣只係第三局，熊市只完成三分之一。 Bert Dohmen今年聲名大噪，你經常可以在CNBC、Neil Cavuto Show、Louis Rukeyser's Wall Street Week及CNN Moneyline睇到佢。佢接受華爾街及商業周刊等訪問時風頭幾勁，唔知有冇忘記我老曹呢位在1990年認識的香港朋友，以及當年曾請佢飲的紅酒（當年賣6000港元一枝，然今時今日幾萬蚊都買唔到也）。

Share this:

火煋人

投資者日記:熊市中三個建議 2008.10.13 10月12日，周日。過去一年證明追隨趨勢大勝價值投資法。在股市中賺錢或蝕本最重要係Timing，而唔係評估股值有幾多？幾時買入及賣出較該股值幾多錢更重要。各位忘記了英隆事件咩？在泡沫期，英隆價值一再上升；一旦泡沫爆破，英隆可以一文不值。入市首辨大市方向，例如到底係Top Down定係Bottom Up！2003年4月開始Bottom Up，到了去年10月結束，然後進入Top Down期。今年3月入市博反彈，如忘記Sell in May亦幾麻煩！恒指14000點係另一個良好博反彈期，但熊市有排未完。Bargain Hunting（趁低吸納）係極之專業行為，要有森池兄智慧先得。如你只係一般散戶，最好採用小心駛得萬年船策略，只動用本金30％去玩陣。在熊市中保本為上、賺錢次要，因次按風暴仍未過去，家陣壞賬率已高達23％（2001年8％；上述資料來自雅虎新聞）。甚至摩通CEO戴蒙對前景仲係悲觀，認為未來大趨勢係向下，反彈只係微波（Curve）。 要有捨得思想 道指在2002年10月10日見7197.49，上升至9000點然後再回落到2003年3月12日7416.64才孕育牛市；今年10月10日道指見7882點後，可唔可以同樣孕育牛市？面對道指7800點，我地可以做乜？我老曹冇水晶球，但建議如下：一、如去年10月前你已賣出全部股票，依家不妨將30％資金重投股市；二、如你早已將30％資金投入股市，睇來除了觀望外，可以做麼已唔多，不如拉將凳仔坐定定睇「投資者日記」啦。當市場出現恐慌性拋售，理性分析如孤兒（冇人理）咁可憐。你可以話個市癲了，但1974年 7月至12月我老曹理性分析曾面對冷漠，從此我老曹學到一件事——在熊市中最大責任係保本。一如太陽陳指出，在熊市中最好100％現金，然後做空軍（我老曹做唔到，因為仲有感情包袱）；三、在熊市中希望係最差投資策略，例如希望大市反彈後才減持，希望那樣或呢樣。在熊市中應有佛家思想——捨得。請放棄紅塵、遁跡空門。就算唔做空門弟子亦要戒貪、真及癡。 在熊市中，入市容易離市難。控制你可控制事，例如止蝕唔止賺及溝上唔溝落；管理你不能控制事。熊市當前，只有Cover Up或Take Shelter。唔好畀Wishful Thinking左右你投資分析，例如今年3月入市博反彈，到5月冇及時離開英雄，家陣已去了浩園！恒指14000點做唔做救火隊？睇你有冇水而定（水頭充足者無妨，唔係就未搞）。投資者有種特性叫做齊齊攬住死，死了罷就，止蝕則死都唔制。恒指在14000點反彈，恐怕亦係小飛俠式反彈（高極有限）。 標普五百指數連續八個交易天下跌，係1996年以來最長下跌日子；至今標普五百指數由去年10月高位跌幅已超過40％，以及只有十七倍P/E。周五約30億股易手係1988年第三大成交量日子。能源指數兩天回落19％及油價今年內首次跌穿80美元。摩根士丹利上周五回落22％，至十二年內低價9.68美元；高盛回落12％，至88.8美元，因穆 重新評估大摩A1長債可能影響公司所發行2000億美元債券，但短期債券仍獲Prime 1評級；高盛1750億美元長債Aa3評級改為負面，短期長債仍獲Prime 1。倫敦同業拆放利率高企4.82厘，升0.07厘；不過，上周五花旗回升9.1％，見14.11美元、美國銀行升6.3％，見20.87美元，以及摩通升14％，見41.64美元。不過，美斯百貨跌13％，見9.92美元，以及CBS跌20％，見8.1美元，睇來零售股受壓。分析員估計，標普五百指數第三季純利減少7.5％（其中金融股純利減少74％），市場擔心1930年代情況出現，我老曹認為，出現九十年代日式衰退機會更大。 美國陸續有銀行出事 過去三十天澳元兌日圓回落20％，以及紐元兌日圓回落16％，因澳洲上周減息1厘，引發利差交易unwind；一星期內由81.48日圓回落至65.41日圓，跌14％；紐元由69.76日圓回落58.74日圓，跌10.3％。加元10月3日至今回落10％，係1979年1月以來最大跌幅，上周五回落 5.4％，見1.2125加元兌1美元，出現連續七個交易天回落。油價跌11％，見77.09美元（今年7月11日仲係147.27美元），令加元冇了吸引力。上周加拿大TSX指數回落18％。加元10月8日宣布減息0.25厘，下次開會日期係10月21日，估計仍會減息。 日經平均指數上周回落24％、澳洲ASX200指數回落16％、恒生指數回落16％，以及新加坡海峽時報指數回落15％，在一星期內MSCI亞太指數回落17.8％或冇了6萬億美元市值。 全球金融市場風聲鶴唳，除日圓進入牛市外無一幸免。美國Meridian Bank及Main Street Bank上周又被接管，即今年內美國共十五間銀行倒閉，令FDIC疲於應付。8月FDIC公布，有問題銀行共一百一十七間，即陸續有來。 美國地方政府債券已回落四周，家陣三十年期利率5.71厘，較聯邦政府債券利率高出1.57厘。令人擔心美國地方政府Munis好快出事，相信最先係加州，佢已計劃向聯邦政府借70億美元。 全球金融市場面對兩大壓力：一、缺乏短期資金（依家主要依賴各國央行提供）；二、去槓桿化。 贖回基金拖累道指 9 月美國互惠基金被贖回722億美元、股票基金435億美元及債券基金238億美元。10月至上周五互惠基金被贖回493億美元，其他方面數字未出。富達旗下管理基金今年平均損失32％，最出名麥哲倫基金跌44％。上述情況令投資者大量贖回基金，令道指上周五最低見7882點。 分析家估計，美國第四季及明年第一季GDP出現負增長（即衰退），係分析家首次公開估計衰退將出現。 美國外貿赤字收窄3.5％，因原油、汽車、電腦及電視入口減少，令入口減少2.4％及出口減少2％。IMF估計，明年OECD國家GDP增長率只有0.5％，係1982年以來最細，美元4月至今已上升12％。 英國富時一百指數上周五回落8.9％，收3932點，全周共回落21％，係1987年10月以後最大跌幅。英國同美國上周股票市場冇了40000億美元市值。HBOS回落19％（一度跌28％）、皇家蘇格蘭銀行回落25％及巴克萊回落14％，傳涉及持有雷曼兄弟股份；匯控（005）宣布由其他地方調來 7.5億英鎊注入英國支行，去增加一級資本比率。在正常情況下，一級資本比率係在9％至10％叫做健康。資本充足比率在7％至7.5％已足夠；皇家蘇格蘭銀行需投資100億英鎊才可將一級資本比率提升到10％（花旗集團分析）；巴克萊動用50億英鎊才達10.5％水平。匯控在香港大把水，調D水去英國已搞掂。其他英國銀行可能要政府注資。 今年3至4月，海外投資者借內地樓市低迷之際，四處尋覓優質項目。當時本報評論員認為佢地太早入市。家陣雷曼已破產，而雷曼在2006年開始進軍中國房地產並持有鴻隆控股（1383）13％及綠城中國A股7.44％（最近公布已減少至6.65％）。摩根士丹利更早在2003年起進軍中國及本港物業，近期亦由買家轉為賣家。九金十銀不再，中國房地產出現近年最冷黃金周。甚至香港《文匯報》亦認為今年10月內地房產已跳過深秋，直達寒冬。 廣州房管局官員認為，廣州房價大跌可能性唔大，因今年政府唔再供應限價房地塊。今年土地供應只有二點五平方公里，而唔係計劃中四平方公里。 內地新政策活化農村經濟 上海試驗農村土地轉包、出租及入股方式，令農民可以在市場上自主或委託流轉土地。去年上海農戶承包地流轉面積達一百三十四萬三千畝，佔延包總面積53.7％。三種形式為轉包、出租及入股，其他包括互換係希望能防止地方政府變相侵佔農民承包土地，使土地流轉在陽光下進行。 《南方都市報》認為，農村土地使用權證改革，可喚醒農村30萬億元人民幣資產。令農民有資產作抵押向銀行借錢完善土地管理，亦可明晰農村耕地及住宅地分野。給農村居民發房產證及土地使用證；家陣中國有七億三千萬農民，人均住宅三十方米，平均造價住宅係每方米600至800元，價值13萬億至18萬億；耕地十八億畝，以每畝6000到16000元計，約值20萬億元。上述政策可將農村經濟搞活。 中國國家統計局公布，第三季度全國企業景氣指數128.6，較第二季下降8.8；較去年同期下跌16.1。上市公司景氣145.6，較上季回落18.5，其中工業企業較去年同期下降17.63％。剔除石油加工及電力則上升36.27％。 旅遊業營業額上升15.46％及利潤上升3.2％；發電行業利潤下降93.6％。上海商品房9月成交量下降74％、深圳下降3％、蘇州下降6％及廣州下降16％，「九金」情況並未出現。

Share this: