發新話題
打印

曹仁超 - 投資者日記

投資者日記 - 大小非押後解禁延長熊市 2008年08月09日(星期六) 8月8日,周五。恒生指數跌218.99;成交639.46億元。8月期指跌309點,收21737點,低水;9月期指跌294點,收21683點,出現期指倒掛現象,擔心周一港股亦好唔得幾多。東方航空(670)跌7%,收2.14元;聯想(992)升3.2%,見5.41元,因第一季獲利升65%。 花旗推介聯想,估計今年度每股獲利4.9美仙,升164.4%,P/E十三點八倍,目標價8元。中國神華(1088)估計今年每股獲利1.295元人民幣,升25.4%,P/E十七點二倍,目標價為30元。 滬深三百指數跌4.74%,收2591.46,創六星期來最大跌幅,因為中央政府在奧運開幕前並冇宣布救市措施,令市場大感失望。國航大跌至8.69元、南方航空跌至6.76元,為1月28日以來最大跌幅。中信證券挫4.6%,收21.39元;海通證券跌8.2%,收21.52%。 由失望走向絕望 B股跌幅更達8.36%,創近五個月來最大當日跌幅;滬深兩市本周分別下跌14.17%及11.7%。B股周五跌幅僅次於今年3月18日當天下跌9.08%單日最大跌幅。本周B股指數已下跌14.17%,大量B股跌停板,跌幅超過9%亦有十九隻,跌幅超過8%有十六隻。滬市成交2.698億元,較上日升141%,深市2.085億元,較周四多156%。在奧運開幕前B股出現大拋售,反映投資者漸由失望情緒走向絕望。 百仕通第二季虧損1.5億元,中投公司去年參股至今,賬面虧損近11億美元。中國成立主權基金一開始便有2000億美元,依家仍處於摸著石頭過河期。請給中投多點時間。 中化國際公布七億四千萬股限售股8月12日起全流通,上述公布令其周四接近跌停板。由今年6月三一重工宣布限售股全面解禁,亦令該股價下跌,所有宣布皆令流通股逃唔出一跌。另一批上市公司大股東承諾自願繼續鎖定兩年解禁股,上述公布雖然減少近期大小非流出市場,但同時將壓力延長多兩年。以浙富及西儀為例,依家流通股分別只有二千八百六十四萬股及五千八百四十萬股;明年8月浙富有四千六百零四萬股上市,到2011年有六千一百三十五萬股;至於西儀今年11月6日增加一千四百六十萬股,明年8月再增一千一百七十九萬股,2011年則有二億多股限售股上市。 去年11月5日上市中石油家陣流通股四十億股,2010年11月5日可增至一千五百七十九億股;今年3月上市中國鐵建依家流通股為二十四億五千萬股,2011年將係七十八億三千萬股。上市公司大股東本月願鎖定大小非全面解禁期延長兩年,反而不利牛市誕生! 2006年6月限制大小非解禁,係造成2007年10月前大牛市部分理由,踏入今年面對大小非大量解禁而引發大熊市。部分上市公司大股東自願限售兩年,令人擔心所造成結果只係延長熊市,而非令牛市提早降臨。 日本第二季GDP下降2.3%,由第一季GDP已下跌0.6%,即日本經濟又一次陷入衰退。1990年至今日本一再努力由出口導向型經濟轉為內需,利率更由1990年6月6.25厘降至最低零利率(依家係半厘),可惜日本各大銀行1990年在房地產貸款及股票互控上虧損很大,失去貸款能力。在信貸收縮下,雖然1990年至今日本政府已多次刺激經濟,表現最好算係2003年4月至07年2月,透過出口中國而令經濟復甦(中國採購大量半製成品,加工後再出口)。隨著日圓升值,出口增長放緩,去年第二季起GDP增長率又再減慢,今年出現連續兩季GDP負增長,而成為OECD國家中最先陷入衰退國。值得思考問題係,日本到2015年將有四分一人口達六十五歲或以上,日本嚴重缺乏十八歲到六十五歲工作人口;一億二千八百萬日本人中,只有2%在海外出生(日本人甚至歧視在外國出生日本人)。如日本仍唔肯開放市場接受外地勞工入口,日本有可能勞動人口不足而再次陷入長期經濟衰退。 全球航空公司進入收縮期 今年第四季估計全球航空公司將減少五千九百七十萬個座位,較去年同期減少7%,結束五年來航空公司擴充期,理由係高企燃料費。上一次航空界收縮期由2001年開始,為期三年,共減少5%載客能力及7%飛行航線。Official Airline Guide估計,未來十年全球航空業將減少五千架飛機,估計新飛機訂單只有七百四十四架(2001年那次美國所受影響最大,共減少13%載客能力,相信呢次亦唔例外)。 今年3月當金價升穿1000美元時,忽然產生大量黃金長線好友,令過去幾個月唔少人在金價回落期中吸納。投資需求急升取代消費需求急降(印度今年黃金需求急降),依家大量黃金落入投資者手中,將阻礙金價日後上升。 澳洲小麥7月份因雨水充足,估計收成較原先估計二千三百二十萬噸為多,可能達二千三百七十萬噸,而令到全球小麥跌價。 雅典奧運之後,雅典股市2004年8月20日起將由2225.16上升到去年11月9日5346點,三年內上升140%【圖】!滬深A股會否一如雅典股市,在未來三年上升140%,而非內地分析界估計咁熊市一直伸延到2011年? 商品價格近期急跌,後市點睇?JP摩根天然資源基金由2003年5000英鎊升到近期19450英鎊;但上月至今CRB商品指數急跌10%,為1980年以來最急,甚至油價亦由147美元跌至118美元。德銀分析員認為,商品周期已見頂,建議客戶獲利回吐,認為長期而言油價只值60到80美元、金價只值650美元一盎斯;銅價、鉛價甚至糧食價亦回落。歐洲最大退休基金BGI在2006年大量投資石油、金及銅,唔少大機構亦加入,去年只小量投資,踏入今年更減持。Capital Economic分析員Paul Ashworth認為,依家商品情況同九十年代後期納指表現接近,已唔能夠用傳統評估法去分析。 家陣睇好最佳藉口係新興亞洲市場需求、低利率及美元貶值,完全忽視美國經濟正步入衰退,歐洲情況亦好唔到幾多!樓市泡沫爆破引發次按危機,下一個泡沫爆破應該係商品。M&G Global Basics基金經紀Graham French認為,天然資源股升幅已跟唔上商品價格,係時候減持商品 ,即使唔係牛市結束,亦逃唔出一次大調整。商品市場同其他市場並冇分別,只係投機味更濃而已。easy money及大量信貸推動下,商品出現大牛市並非由實際需求推動,情況有如九十年代納指泡沫,一旦熊市來臨,甚至最好科網股亦難逃一跌,我地生活在達摩克利斯之劍下(Damoclean sword),好容易產生不穩定需求。礦務公司面對有限度競爭,自然瘋狂抬價,一旦發現需求非想像中咁大,又可以突然令需求消失!唔少人以1967至79年上次商品大牛市作藍本,而認為依家商品牛市未死;世界事物係未咁簡單?上一個牛市壽命十二年唔代表2001年開始商品牛市同樣有十二年壽命,如果只有七年(即2008年7月)結束又點? 知之為知之 不知為不知 你知道2a-7 puts係乜野?我老曹就木宰羊 。Citadel InvestmentsDan Johnson曾在一次投資會議上問AIG管理層,公司回應話不便討論。周三收市後,AIG公布在2a-7 puts市場提供保險而虧損53.6億美元! 恒生銀行(011)柯清輝認為,次按債券咁複雜,睇唔明,所以恒生冇玩!「識就話識、唔識就唔識」,既然自己唔識便玩少瓣。唔知道2a-7puts係乜,可以唔玩。可憐AIG已虧損好大,周四股價一天之內下跌16%,收24.23美元。 花旗與美國證監會達成協議,以73億美元向四萬個個人投資者及慈善基金買回auction-rate證券,依家只有1000萬美元資產;亦答應協助機構投資者處理手上120億美元同類證券。美林亦宣布以票面值購回100億美元auction-rate證券,但明年1月才實行;聽講瑞銀及美國銀行好快亦同監管者達成類似協議。 英國第三大銀行柏克萊上半年淨收入28億英鎊,較去年同期減少35%,但較分析員估計17.1億英鎊為多。 未來投資必須謙卑 全球銀行股係未已出現最惡劣日子?GMOLLC公司主席Grantham係最先提出Perma-bear理論者。佢過去不但準確估計2000年科網股泡沫爆破(在兩個月前已提出),亦準確估計美國樓市泡沫引發次按危機。依家該公司管理資產達1260億美元,認為信貸危機最少維持兩年半,因為未來樓價仍會回落。佢認為,中國GDP增長率明年仍會放緩而令全球原材料價格下跌,未來投資方面仍要謙卑(humble),不可過分自信。 過分自信投資者往往買賣次數太多、賺錢太少。未來投資策略:一、唔借錢投資。二、分散(例如將資金分成十注,每次動用一注);三、消費不能超過個人收入;四、唔好希望自己跑贏大市。 [ 本帖最後由 羊仔 於 2008-8-11 09:25 編輯 ]


Share this:

TOP

投資者日記 - 美國人難再舉債度日 2008年08月11日(星期一) 8月10日,周日。美元強勢令油價重見115美元。商品價格回落,南非蘭特亦大跌,因加息至12.3厘。道指上周升3.6%、標普五百升2.8%;原油價格則跌8%、銅價跌7%、金價跌6%。商品價格係未7月見頂回落? 舊年8月出現次按危機後,悲觀者曾認為今年世界經濟會出現大衰退、樂觀者則認為除美國外,其他國家可以decouple(唔受美國樓市影響)。一年過去了,除日本今年出現連續兩季GDP負增長,美國去年第四季GDP亦修正為負增長,意大利第二季GDP負增長0.3%,德國有機會在今年第二季GDP出現負增長。 不過,全球經濟既冇出現大衰退,其他國家亦無法出現decouple,唔似1973至74年及1981至82年因油價高企而引發全球經濟大衰退。有人認為引發1973至74年及1981至82年全球大衰退係由於美國過緊貨幣政策,而非高企油價。去年9月起美國將利率減到今年4月2厘,成功阻止了全球經濟大衰退出現。 如上述分析正確,就有另一問題出現:1974年通脹回落令利率下降,引發1975年經濟復甦;1982年通脹率回落、利率下降,亦令經濟在1983年復甦。今年商品價格由7月起大幅回落,可令第四季美國CPI升幅收窄,但第四季美國能否再減息?冇大幅減息刺激,又點樣jump start美股、刺激經濟復甦?道指120個月平均線係1566點,估計呢次只係由7月15日起浪B反彈,阻力在12845點。 戰後嬰兒想退休唔想供樓 1973至74年美國出現衰退後,日本同西德成為世界經濟增長新引擎(三頭馬車理論),令全球經濟再繁榮。1981至82年衰退後,中國成為美國廉價貨最大來源,美國CPI升幅大減、利率下降,引發資產升值潮,令美國再次成為世界經濟增長大引擎。未來世界經濟增長大引擎由誰擔當?美國、歐洲受制於樓價回落期,已無力再做引擎;日本進入人口老化期,自顧不暇;中國GDP太細,無法拖動全球經濟。根據以往經驗,油價見頂唔代表從此天下太平,何況現水平油價下跌空間已有限。 房利美第二季虧損23億美元或每股2.54美元,亦減少派息,令上周五股價跌9%,收9.05美元。房利美大部分虧損來自Alt-A貸款,主要來自四個州(加州、佛州、內華達州及阿里桑那州)。Alt-A貸款較次按好,但唔及prime貸款。Alt-A貸款只佔房利美總貸款10%,卻佔其第二季虧損50%。從呢點睇美國樓按貸款仍在惡化,明年房利美及房貸美係未仲捱得住?仍存疑問。 戰後美國利率由低水平逐步上升到1981年。經過三十五年利率上升期,1980年三十年期債券有15厘息一年亦冇人夠吉士買,因為人人相信利率將不斷向上。1981年到2003年人們經過二十二年利率回落期,新一代又相信利率只跌不升,因此搏命借錢買樓,2004年7月開始利率向上升,仍無法阻止美國人買樓,直到2006年7月利率升至5.25厘,美國人搶貴樓行為才停止。 2007年8月次按危機爆發令短期利率下降,但戰後嬰兒步入退休期,唔似1980年代至2006年佢地步入三十五至五十歲,不但買第一層樓,同時有興趣買第二間屋用來度假。2007年起戰後嬰兒發現房屋並唔係「儲蓄」,佢地只想退休唔想供樓,卻面對生活費上升而樓價卻下跌,情況一如九十年代日本人,甚至較日本更差,因為美國家庭負債率相等於2007年美國GDP 140%,今年才回落到100%(但卻係因為斷供)【圖】。美國人再無法過舉債度日生活矣,因為:一、借得太多,已無力還債;二、美國人步入退休期,失去賺錢能力。不但美國係咁,英國情況更差,而且仲有歐洲。 商品牛市七年壽命機會大 近期油輪租金回落。石油生產商大量拋售石油期貨合約去鎖死利潤(雖然油價已下跌15%),金價、銅價、鋁價亦偏軟,但仍較一年前高5%、14%及23%。如美國人開始減少消費,將令失業率上升及GDP失去增長動力(甚至負增長)。 根據TIPS(Treasury Inflation Protected Securities)顯示,未來五年美國通脹率係向下而非向上。十年TIPS利率只有2.18厘,甚至較一般債券利率仲低(正常十年期債券息率3.94厘)。證明呢次商品牛市只有七年壽命機會極大。 美國汽車業進入掙扎求存期,唔少甚至可能破產。美國商場開始人流減少,餐廳生意亦開始差,因為美國人已經開始節衣縮食。 過去美國人無論買乜野,只要透過銀行發行CDO(Collateralised-Debt Obligations)便可支付。信貸咁容易獲得,理由係銀行將CDO賣畀投資者便可收番資金,唔少CDO更獲三A評級。2005年5月起連三A評級CDO價格亦開始回落,當時大部分人仍唔為意。到去年夏季,CDO價格狂瀉20%,引發更大拋售,結果才發現呢個市場好少人肯承接,令CDO價格一落千丈。就在此時,核數師要求CDO必須按市價入賬,銀行因CDO跌幅太大,連資本充足比率亦出現問題,除撥備外更須集資;到今年CDO市場已接近死亡。過去十年透過發行CDO集資購買資產遊戲無法再玩落去,未來美國資產價格又點樣再升值?! 贊助奧運推廣品牌非人人有效 呢次通脹係未同1968到80年一樣(1980年3月美國CPI升幅達14.8%)?當年推動CPI上升主要係勞工成本上升,但1980年至今美國勞工成本(扣除通脹率)卻回落30%,理由係新興工業國冒起,令美國工序大量外判,從而令美國企業1982至2007年純利一直上升,亦令美國溫巴仙人口收入佔GDP比重不斷上升(造成貧富兩極化)。依家同1981至82年唔同,當時商品價格回落,令美國進入減息周期;今次商品價格回落,美國利率卻減無可減。就算油價回落到100美元一桶,仍然係高油價,只要油價在100至120美元牛皮,美國經濟便無法復甦。 今年起中國經濟進入軟著陸期,估計明年GDP增長率降至9%(今年為9.8%);CPI升幅5%,出口增長率大減,但內需未能完全取代,引發A股進一步回落(雖然A股長遠而言睇好,但太早入市係死罪)。 今年奧運營銷報告指出,六十二個北京奧運贊助商中,90%企業奧運營銷至8月1日止未獲成功,只有10%企業取得較好營銷效果,佢地分別係強生、可口可樂、伊利牛奶、Visa、聯想、百威及金龍魚七家。其中又以強生、可口可樂和伊利牛奶成為最大贏家,品牌美譽上升60%;其他品牌美譽上升者有長城葡萄酒、UPS、阿迪達斯、松下、通用電氣、麥當勞、中移動、三星、皇朝傢俬、海爾、中國網通、亞都、中國銀行、青島啤酒等,較經常性營銷效果略好,其他品牌成績一如常規營銷。 換言之,利用奧運去增加品牌美譽唔係人人都得(大部分唔得)。而2004年雅典奧運一百四十四家奧運合作夥伴中,只有唔到30%企業在奧運項目上賺錢。贊助奧運大部分係蝕錢生意! 美消費料進入負增長期 截至今年3月止日本人外匯孖展戶口開戶數目較對上年度升92%,家陣已達一百二十三萬戶。佢地共拋空6960億日圓(63億美元),較一年前升13%。估計9月份,日圓兌1美元可見110,年底見112。估計明年3月底孖展戶口可過一百七十九萬個,拋空日圓將達9060億日圓。 英鎊已跌至二十一個月內低位,見1.9146美元,因為被接管住宅單位較六個月前增加41%。BNP百利達倫敦分行分析員估計英鎊可見1.85美元。今年英鎊兌美元跌3.3%、兌歐羅跌6.1%。 12月期金見864.8美元,較7月31日跌6.3%。UBS AG估計,金價短期內可見850美元,因金價已連升七年,恐怕今年3月見頂。12月玉米價格跌4.4%,見5.182美元,上周跌了11%。11月大豆價格跌4.7%,見11.805美元,上周回落14%。連橙汁價格上周亦回落4.7%。 美元過去六年跌34%,係刺激商品價格上升部分理由。小心近期美元止跌回升。 畢非德認為,自己投資策略係85%葛拉咸同15%費雪。葛拉咸價值投資法透過畢非德而聲名遠播,費雪則較少人知。1958年費雪寫了Common Stocks and Uncommon Profits,佢自1950年代便持有摩托羅拉,到2004年過身前仍未賣出。摩托羅拉曾帶畀佢唔少歡樂時光,但近年股價則不敢恭維矣。 Oppenheimer分析員Meredith Whitney指出,未來十二個月到十八個月美國消費將進入負增長期。Cheap Credit is a Thing of the Past!過去大量借錢畀冇還錢能力家庭去買樓的日子已成過去。 [ 本帖最後由 羊仔 於 2008-8-11 09:35 編輯 ]


Share this:

TOP

投資者日記 - 中國慎防地產泡沫 2008年08月12日(星期二) 8月11日,周一。恒生指數跌25.87,收21859.34;成交575.89億元。8月期指升64點,收21804點;9月期指升37點,收21720點,期指倒掛現象未見消除。 美國經濟的回落期估計伸延到明年(今年下半年GDP估計只得0.7%升幅),未來十二個月出現衰退的機會高達51%(4月份曾估計高達70%)。估計今年的CPI上升4.3%,利率估計在明年3月前唔會上升,仲係2厘。 工業股否極泰來? 7月份中國的外貿盈餘上升4%,至253億美元,係四個月來首次回升,主因係內地工廠產品報價上升10%,開始將上升的成本轉嫁畀買家,搞到出口上升26.9%,至1367億美元;入口上升33.7%,至1114億元。高附加值產品好似電子產品的需求仍上升,政府再次增加紡織品的出口退稅,加上原材料價格下跌,工業股係未到了否極泰來時刻? 上海期銅跌至八個月內最低,10月合約報56940元人民幣;新加坡3月期銅報每噸7375.5美元。銅價下跌,代表全球經濟進入了放緩期。 滬深三百繼續下跌5.2%,收2456.81。中國鋁業、江西銅業、雲南鋁業、紫金礦業、山東黃金及中金黃金亦跌停板。A股已跌至二十個月內的低點;中信證券下跌8.6%,因上半年利潤只升了13%;北辰實業、東方航空及北京城建下跌10%。 滬深A股約六百隻股份跌停板,佔上市股份40%;跌幅超過5%的約一千四百隻。雖然國資委主任李榮融表示,國有股在相當長的時間內唔會大量減持,但投資者信心已冇晒,令A股P/E首次跌穿二十倍,漸同香港國企指數的P/E睇齊。 Thomson Reuters公布,今年1月1日分析界對標普五百今年第二季業績估計係升4.7%,4月1日改為負2%,7月1日改為負11.5%,8月11日再改為負22.1%;理由係AIG每股蝕了51美仙,以及房利美每股蝕了2.54美元。至8月8日止已公布業績的公司共四百四十九間。66%較估計中好、10%和估計接近及24%較估計中差;能源純利升18%、科技升16%及必需品消費升15%;最差係金融負94%,其次係非必需消費負57%。 皇家蘇格蘭銀行上半年蝕了8.02億英鎊,係1960年代至今首次出現虧損,亦係英資大銀行少見的虧損。上半年供股集資120億英鎊後,仲要為信貸撥備59.3億英鎊。不過,市場反應唔差,股價升3.2%,見240.5便士,相信最惡劣的日子已成為過去。去年佢與富通銀行及西班牙Banco Santander聯手收購荷蘭ABN Amro銀行,卻撞正美國次按危機,令三大銀行都冇蝕錢。天有不測之風雲,人生真係無常。 唔會有奧運後效應 7月16日開始的股市上升,只係另一反彈而唔係熊市結束;7月中開始油價大幅回落,只代表經濟衰退步伐漸近,而唔係另一繁榮期開始。在熊市中,散戶可以採取持盈保泰的策略,靜待熊市三期的來臨;亦可在熊市中Keep your feet wet(保持30%資金在股票市場炒上炒落,以便春江水暖鴨先知);我老曹策略係後者,唔係點知熊市結束?世上無先知,只有事後孔明;奧運效應已證明了唔存在,依家又有人推銷的奧運後效應亦係唔存在。奧運只係體壇盛事,既冇前效應亦冇後效應。雖然北京為了奧運而投資一、二千億元人民幣在配套設施上。由於北京過去的配套設施不足,依家只因利乘便;相對於全國基建項目的開支仍唔算多,股市既冇奧運前效應,應該亦冇奧運後效應。運動歸運動,經濟歸經濟。 美國紐約大學斯特恩商學院經濟學教授努里爾.魯比尼指出,今次次按危機美國付出的代價可能達到3萬億美元,相當於美國GDP的20%以上。雖然已發出了重大危機爆發的訊號,但至今大家仍未能真正認識危機的嚴重性,依家破產仍局限在金融業,距離第二階段仲有距離,未出現大規模的企業破產及失業率上升。過去二十五年,美國經濟在信貸泡沫滋養下,增長日子已一去冇回頭。個個希望炒股炒地產發達,家陣美國五千一百萬間住宅中有八百萬間已資不抵債,已失去自己的房子,如樓價跌幅擴大到30%,將有二千一百萬個家庭冇了間屋,到時就真係大災難。 強項係捕捉大浪 入了行四十年,我老曹發現賺大錢機會大部分唔係來自揀股(stock picking)而係來自大浪(Big Wave)。1969到73年我老曹矇查查咁賺了50萬元,理由唔係我老曹曉揀股,而係咁 遇上恒生指數由不足100點升到1774點的大浪。1974年7月至12月我老曹輸畀森池兄的理由先係揀股經驗唔足;我老曹當年買和記企業,由7元跌至1元令我老曹那50萬元變了10萬元;森池兄卻買和記地產,因為有15厘股息跌幅只得10%,令1974年12月佢的身家幸保不失。依家森池兄更係揀股專家,接近鳳凰無寶不落,而我老曹仲醉心在捕捉大浪(強調有智慧不如趁勢;寧買當頭起、莫買當頭跌;止蝕唔止賺等)。 捕捉大浪係我老曹的強項;至於揀股則係我老曹的弱項(相信同自己的性格有關,我老曹欠缺森池兄的精挑細選性格)。但過去的成績亦唔錯,例如逃過了1981-82年的大跌市;1984年7月《聯合聲明》草簽限制港府每年賣地五十公頃,我老曹認為三個政府(中、英及港)逼港人買樓發達;又好似1987年10月股災我老曹亦能逃過。1989年六四事件後才重新入市;1997年投資英國,最近賣埋最後一間物業;2001年睇好黃金、資源股及貨幣(如澳、紐及加元),以及去年10月在港股直通車謠傳下再度減持港股。 1984年買樓,甚至唔識揀,到了1997年亦可賺十五倍;反而在1997年下半年買樓,任你點醒,2003年4月最少蝕了50%;1990年曾勸王增祥先生放棄日股,因為「勢」不在「我」;去年10月我老曹放棄在英美的投資,因為上升趨勢完成。 1801至1831年英國鋼鐵及煤產量每年上升5%,到1900年英國係全球最大的工業國;依家仲有乜野係英國生產的?1890年美國由農業走向工業,1929年美國貨漸行銷全球,依家除了高科技產品外仲有幾多工業製品在美國生產?1978年中國走改革開放路線,去年中國成為世界工廠;然後……每一個國家都有佢的工業黃金三十年,但希望永遠高速增長係冇可能。英國、美國、日本及中國都冇可能。工業完成黃金三十年後,經濟便逐步走向大量消費期,英國及美國都係咁;日本人因為1990年前在物業及股票市場蝕了太多,搞到消費市場無法壯大,形成了依家唔生唔死的局面。 由1801到2000年整整二百年,英國及美國在發明、科學、製造業及金融業等一直領先而獲得全球驚人的財富;不過,隨之而來係財富減少期,最先係英國(第一次世界大戰後已開始),依家係美國(科網股泡沫爆破後開始)。中國工業黃金三十年已結束,正過度到內需型經濟後,進入另一繁榮期。英國由1800年開始到第一次世界大戰爆發,繁榮期約一百三十年先退位讓賢由美國取代;美國繁榮期由1890年開始到2000年見頂,約一百一十年;中國1978年開始至依家只行了三十年,即最少仲有七十年繁榮期?未來唔係無風無浪而係波濤洶湧;如各位像我老曹一樣,相信大浪理論,便應「任憑風浪起,穩坐釣魚船」。未來投資宜集中在東方而唔係西方。 中國的困難係點樣化解製造業頭上的「達摩克利斯之劍」?人民幣升值、取消或減少出口退稅、中外企業稅制統一為25%、新勞動合同法保障產業工人的最低工資、嚴格執行環保條例及中央三農政策等都係合理措施。只係咁樣一來中國製造業必須告別廉價優勢,進入產業升級期。九十年代的台灣及東南亞就係避唔開「達摩克利斯之劍」,而令經濟從此冇進步。1978年開始的中國改革開放政策,提供了三低一高的有利環境(即低勞動成本、低地價及低稅率,從而產生了高利潤)畀製造業。1989年六四事件後,中國政府為了迅速恢復經濟繁榮,更任由人民幣貶值;令台灣、南韓、東南亞及日本廠商亦入來。2003年加入WTO後,全世界的廠商都來了,令中國的製造業出現了過分擠逼,大魚吃小魚的生態出現;內地資源不勝負荷,只好向外入口,帶動了全球原材料價格上升。到今年中國已漸接近惡性通脹的邊緣,CPI唔受控制咁上升。今年起人行及早實施銀根緊縮政策及人民幣升值兼加息,在通脹洪峰下,依家都仲未有造成廣泛泛濫(A股由去年10月起大跌;內地房地產價格亦步入回落期)。 品牌不是用廣告建立 我地要搞清楚,唔少成本係企業本來就要承擔的,只係中國政府為了刺激GDP增長而冇嚴格執行。例如工人的人工、福利及環保;出口退稅原先係應付1997年亞洲金融風暴的臨時措施,結果此一措施卻維持了十年先修正。外資企業15%(內地企業35%)亦係唔公平競爭,已實施了三十年。最初的目的只係為了吸引外資,依家外資太多要逐步取消,亦係正常。 八十年代香港棄製造業而萬馬奔騰咁走向房地產,作為一個城市的後遺症已咁多(例如1997年7月房地產泡沫爆破後的六年衰退),再睇睇英、美依家的苦況,以及1990年日本房地產泡沫爆破的後遺症。中國如果任由上述的事件在境內重演一次,真係非常士刁拔(1990年的日本係無知;1997年7月的香港係士刁拔、去年的美國係故意。如中國政府繼續任由內地房地產賺取較其他行業更高的利潤真係好士刁拔,冇得救)。任何國家或民族唔可能只靠房地產升值去發達,日本、香港、英、美及中國都唔得;樓價太高對國家或地區長期經濟發展必造成重大隱憂,此乃我老曹一直反對香港實施聯匯制度的理由。可惜香港政府至今仲執迷不悟。 買樓可以發達?如果你用黃金在公元前429年在羅馬置業(當年羅馬帝國進入全盛期),拿住一千年後仍未歸本;跟住係歐洲社會進入黑暗時期。而我老曹阿爺那輩在戰後返番中國發展,只留低我老曹父親在香港守業,家族所付出的代價亦唔想提(因睇錯大方向係投資上的死罪)。 依家中國製造業缺點係冇自己的品牌(甚至未能成為世界品牌;因缺乏原創技術,一切核心技術都係入口)。冇R&D支持下,中國品牌點樣打入世界市場?唔少人仲話品牌係用廣告建立的。廣告固然重要,但建立品牌背後的力量係R&D,廣告只係輔助性質。有了自己的品牌,產品邊際利潤才可提升,才可化解「達摩克利斯之劍」。台灣及東南亞國家九十年代起經濟唔可以再創新高,就係台灣及東南亞國家的品牌無法打入國際市場,理由係佢地相信廣告創造品牌;反而南韓卻能建立國際品牌,理由係在強大的R&D下出現了創新技術。最終中國經濟可唔可以逃出台灣及東南亞的框框,好似蠶蛹化蝶,更加精彩?就睇呢幾年矣。


Share this:

TOP

投資者日記 - 商品牛市玩完 2008年08月13日(星期三) 8月12日,周二。恒生指數跌218.45,收21640.89;成交700.52億元。8月期指跌315點,收21489點;9月期指跌300點,收21420點。期指倒掛現象繼續存在而且在擴大中。 紫金礦業(2899)挫5.8%,收4.52元;招金礦業(1818)跌9.5%,收5.75元;江銅(358)挫5.1%,收10.5元。因金價跌2.6%至802.27美元,呢個價係去年12月21日以來最低;銅價再跌1.4%,收每噸56420元人民幣。 李寧品牌將揚威海外 國家統計局主管的《中國信息報》近日發表題為〈2008年第二季度經濟述評:市場不支持高房價〉的文章,受呢篇文章影響,香港中資地產股好似遠洋地產(3377)、北辰(588)、富力地產(2777)、中國海外(688)、華潤置地(1109)及上海復地(2337)皆有唔同程度的跌幅。 滬深三百跌0.52%,收2444.16。 中國人民銀行前年至今共發行三組奧運紀念金銀幣,發行價8000元(人民幣.下同),2006年第一組(兩枚金幣及四枚銀幣)一度炒至22000元,依家已跌至16000元;2007年發行一組,市價只得10000元。其他好似奧運火炬接力紀念章、歷屆奧運火炬金銀條、純金奧運十二生肖、奧運金銀玉及奧運五福娃如意等都在度跌價。甚至最近發行的奧運鈔票,唔少投資者亦在過度炒作時被套住。奧運仲舉行緊,有關的產品因過去炒得太高而回落。 中國政府的宏觀調控首要任務已由「防過熱、防通脹」,轉為「一保、一控」。8月1日起調整部分紡織品及服裝等商品的出口退稅,係2006年下調出口退稅以來首次回調。過去內地普遍受三率兩價(匯率、利率及出口退稅率;勞動力價格及原材料價格)因素影響,令工業股跌完可以再跌。踏入今年8月客觀形勢改變緊!商務部部長陳德銘表示,國家對勞動密集監管業所遇到的困難已表示關注,並同企業界及國際社會發出了一個訊號!不過,仍係有保有壓,除「一保、一控」外,另取消兩高一監產品的出口退稅,即高耗能及高污染的產品仍係政府力壓。近期央行亦向商業銀行發出指令,在信貸方面可加大對中小企業的支持,全國性商業央行在信貸規模基礎上調5%;地方性商業銀行可上調10%。人民幣已連續十個交易天走低,創出人民幣匯率改革以來最大一次貶值。 換言之,國家對製造業的態度已出現變調。由從前的打壓改為穩定政策,適時微調。隨住通脹率漸受控制,中央再次出手防止經濟出現大幅下滑,包括進一步提高個人所得稅的起點,同時又降低了儲蓄存款利息稅去鼓勵消費,以便中國經濟在降溫過程中,GDP增長率唔好大起大落。 1972年的奧運會成就了Adidas品牌;1984年的奧運會成就了Nike品牌;今年北京奧運會否成就了李寧品牌?李寧(2331)2004年6月28日在香港上市,計劃2018年成為世界第五大體育用品品牌。今次的奧運會,李寧企業係中國、西班牙及瑞典運動員的獨家供應商。產品在中國市場佔有率10.5%(Adidas 15.6%及Nike 16.7%),估計李寧起飛燃點奧運主火炬後,中華民族的自豪感大增,令李寧品牌最低限度在內地可同外國品牌有得爭!李寧唔止在1984年洛杉磯奧運會上一人拿了三枚體操金牌(至今內地無人能破);佢更係商業奇才,將名氣換成財氣,創立了自己的品牌令中國人人嚮往,成為少數以品牌取勝的公司;李寧品牌下一步能否揚威海外?有人話呢次點火行動最少值四十億美元。 油價確認熊市 美元由弱轉強,國際油價由7月11日的147.27美元回落到114.45美元,跌幅達22%;中國A股市場大跌至近期新低,可能係反映中國經濟減速;只有印度Sensex及香港國指7月份上升6.64%及5.01%;菲律賓上升4.76%算係表現唔錯,其餘都冇乜表現。前景展望係美國房利美及房貸美在新會計法規下需集資750億美元,而美國政府唔願注資,令股價在8月份再暴跌。 俄羅斯股市跌幅已超過20%同時只得八倍P/E,盧布亦大幅回落,外資正由俄羅斯股市大撤退。今天因宣布撤軍而令股市及盧布匯價反彈,但已發出熊市訊號。 7月中美國證監會禁止拋空到8月13日到期,會唔會引發新的拋售潮?美國金融危機根深蒂固,令股市唔可能忽然間變成牛市。主因係金融業本身受房地產影響而產生極緊的信貸,呢一個因素令其他行業亦好極有限(金融業有經濟脊骨的稱號)。所謂分散投資(包括地區及唔同行業)最終亦避唔開金融業下陷所產生的信貸收縮影響。William Fries(管理178億美元的Thornburgh International Value Fund基金經理)認為,今年下半年通脹率慢慢咁上升,經濟慢慢咁放緩,情況好似水刑(water torture)咁,投資者D資金慢慢咁流失。減少承擔風險夜晚可安心睡覺! 尼日利亞事件、伊朗核武可能引發以色列與伊朗衝突、颶風警告、委內瑞拉動亂、土耳其油管事件,以及俄羅斯揮軍入侵格魯吉亞(兩大產油國),但油價由147.25美元回落到114.45美元,跌幅超過20%,可以確認係熊市。在上述的新聞刺激下,油價仍無法大升;美國汽油價格回落到每加侖3.81美元!美國係全球最大的石油消費國,根據國際能源機構(IEA)的數字,今年起美國對石油的需求在度下降緊;好多人認為石油需求缺乏彈性,其實唔係,例如美國人改用慳油汽車或唔用車坐集體運輸工具,以及冬季唔好將室內溫度保持在二十五度,已可令石油再次出現供過於求。1980至2000年石油供過於求15%,可令油價由45美元跌至10美元。需求上升下又升到147美元;家陣石油已供過於求2%,係未再次進入油價回落期? 中國生產商利潤有暗湧 7月份英國通脹率升4.4%,較英倫銀行的目標通脹率2%,高出超過一倍;英國7月份樓價指數回落到83.9(4月係94.7),係1978年以來跌幅最大的一季,理由係面對信貸收縮;零售業銷量下降,加上估計10月份CPI可升上4.9%,令英國無法減息。 中國7月份CPI升6.3%,係第三個月回落(6月係7.1%),中國GDP增長率連續四季下降,證明中國經濟進入冷卻期。中國通脹率相信已見頂;估計到今年第四季可跌至4.5%;中國生產價格指數估計今年第三季見頂,但生產商同時面對世界經濟增長放緩,利潤亦無法回升。 日本7月份批發物價指數升幅係二十七年新高,上升7.1%(6月上升5.7%)。面對燃料及原材料上半年大幅上升,更多企業執笠。不過,日本銀行無條件加息,因第二季GDP下降2.3%。日本造紙宣布9月起紙價上升10%。 摩根士丹利同意回購Auction-Rate債券約45億美元,最遲在9月30日開始。 黃金、白金及白銀跌至七個月內低點,令商品價格進入了熊市。金價由3月17日的1032.7美元至今已回落了22%;白金及白銀較高價回落了36%及33%。標普GSCI指數由7月3日至今回落了21%【圖】,確認商品價格進入熊市。因此,早應減持資源股同能源股,今年上半年GSCI升41%,踏入7月3日至今回落了21%,引發熊市訊號;愈來愈多訊號證明商品牛市已死!澳洲最大的黃金生產商Newcrest Mining Ltd、日本最大的鎳礦公司Sumitomo Metal Mining、南韓最大的鋼鐵廠Posco及全球最大的礦公司BHP Billiton股價都係咁跌。 1971年我老曹第一次跟位大馬主朋友入馬場,佢話畀我老曹知佢隻馬贏梗,我老曹用了500元(當年月薪只得1500元)買Win,結果佢隻馬跑第二,跑第二買Win係冇錢賠的,從此我老曹就唔再賭馬,因為我老曹感覺唔到娛樂性,加上要花太多精神在揀馬上,甚至跑第二而買Win都冇錢分。過去一直同呢位大馬主保持聯絡,直到1997年佢問我老曹借錢,禮拜六要我老曹到銀行等佢;銀行經理同我老曹傾計時問我等邊個,當佢知道係等某某,佢話呢個大馬主近日財政有問題,小心借出去的錢冇得還,於是我老曹離開銀行,從此冇了呢位朋友。不過,佢的揀馬方法我老曹應用在股市上又幾有用。 六招揀股�馬策略 一、唔好場場賭;有心水先賭,冇心水就唔好賭。 二、跑第一叫Win、跑第二叫Place及跑第三叫Show,其他唔使理。跑馬的目的係一場馬中點樣揀出第一、二及三;股票亦一樣,要買就買龍頭股,其他唔使理。 三、揀贏出的馬難,揀會輸的馬容易;一場馬如能剔除50%跑唔出的馬,你便贏梗。其實買股票何嘗唔係咁呢?森池兄亦經常在恒指成分股中揀其中一半投資;策略就係來自呢位大馬主。 四、大熱唔買、大冷唔買。賠率少於一點二倍唔買,賠率大過一點五倍唔買;因為大冷經常跑唔出,大熱亦經常倒灶,最好買半冷門(即中價股)。 五、孖T唔買、三T唔買及過五關者唔買,因為贏面極低。上述只係博彩唔係分析;換言之,期指、期權及衍生工具贏面不及股票。 六、Do your Homework。例如睇晨操、研究馬匹的狀態、品種及脾性等,唔同的場地及天氣往往有唔同的結果。 上述六招賭馬法係未有用,唔清楚,因為1971年第一次輸錢後我老曹便冇了興趣,反而將賭馬的策略用在買股票上,卻發現幾有用。 今天傳媒紛紛患上政治狂躁症,保持獨立思考及頭腦冷靜愈來愈重要。 電視機上觀眾往往問分析員某股短期點睇?我老曹常發笑。正確的答案係:「如果我知,都唔使上電視啦!」又或者係:「甚至我知,點解要免費話畀你知?」唔炒短線者係幾十年經驗纍積的結果,其中95%同分析市場心理技術有關,係唔會免費教人的。正係會考狀元年年有,股市炒手最難求。 我老曹從來唔信散戶在短線中有出色的表現,一如未經訓練者又點樣在奧運中拿金牌的道理一樣。 [ 本帖最後由 羊仔 於 2008-8-13 09:43 編輯 ]


Share this:

TOP

中國要學星巴克 2008年8月14日 (星期四) 8月13日,周三。恒生指數跌347.57,收21293.32;成交693.16億元;8月期指跌282點,收21203點;9月期指跌284點,收21136點。 今天工商銀行(1398)跌5.4%,收5.25元,因瑞信降低評級;建行(939)跌6.1%,收6.2元;港交所(388)跌3.1%,收103.5元;聯通(762)跌4.3%,收14.8元;國美(493)跌5.2%,收3.27元;利福國際(1212)跌8.6%,收10.42元。投資組合進入熊市,蝕錢係無可避免的事。我老曹去年10月已經採用三七分,即30%投資至今損失唔少,70%資金擺在銀行亦只能收2.5厘息(美元存款為主)。在熊市唔係表現勇氣的時候。 為發債簽對賭協定 環球資金正由金磚四國(BRIC)回流番美國,今年標普五百指數只回落12%,同期滬深A股回落54%、印度回落25%、俄羅斯回落21%及巴西回落15%。美國減息七次,至2厘;巴西加息1.75厘,至13厘;印度加息1.25厘,至9厘;俄羅斯加息1厘,至11厘;人民幣多次收緊存款保證金率。 滬深三百開始企穩,昨天升0.02%,收2444.67。 聯儲局調查報告顯示,今年第二季80%美國境內的銀行收緊貸款標準(4月份調查時只得60%),相信係5月開始股市又再回落的理由。本周一摩根士丹利所發行的債券,穆 將佢降級,由Aa3降至A1令大摩股價下跌6.1%;房利美跌3.7%、房貸美跌4.1%、JP摩根跌9.3%及UBS跌6.2%,令股市又再出現拋售。根據Meredith Whitney在《新財富》雜誌估計,未來兩個月超過二十五個金融機構仲要集資! 《上海證券報》追查碧桂園(2007)今年2月與美林簽署一紙對賭協定,因而累到碧桂園冇了4.428億元。那時碧桂園以19.5億港元融資作為抵押品,合約2013年才到期;如股價上升美林就賠錢,股價下跌碧桂園就有損失。呢份對賭協定作用係為碧桂園發行可換股債券,可惜2月15日至8月12日公布業績時碧桂園股價跌了36.67%,形成碧桂園賬面蝕了4億多元。唔少上市公司為了發行可換股債券而簽了上述文件者(例如某紙品廠及某造紙廠),隨住熊市來臨,呢D協議紛紛變成上市公司業績虧損。 《上海證券報》亦報道了國家稅務總局及海關總署打算重新開徵黃金增值稅,呢個建議畀黃金行業大力反對,仲在度爭拗緊。1994年稅制改革後,黃金增值稅採取優惠政策好似金礦、冶煉生產及銷售等免稅,對配售黃金採取即收即退(即表面上收但即刻退番);進口黃金原料就實行零關稅。令十四年來黃金增值稅係名存實亡。如果奧運之後重新開徵番黃金增值稅,業界認為對佢地呢行打擊好大。 1989年六四事件後中國GDP增長率一度回落到4%;1997年亞洲金融風暴後中國GDP亦回落到6.5%。去年10月起A股回落,相信今年中國經濟開始進入軟著陸期。當年化解六四事件壓力係利用人民幣貶值;化解1997年亞洲金融風暴係推出出口退稅。相信2010年中國的內部消費可取代出口,成為中國經濟向上的另一增長動力,問題係今明兩年呢段青黃不接期又點? 唔好重量唔重質 今年上半年上游企業(原材料生產者)利潤上升64%、中游企業(原材料加工者)蝕了8%及下游企業利潤上升32%;其中飲食業獲利上升41.4%,但公用事業卻負增長68%。下半年又點?估計石油及天然氣獲利仍升47%及煤礦升13.7%;內地房地產面對壓力因上半年銷售額減少7%,下半年進入減價促銷期;CPI今年2月升幅8.7%見頂後回落;食物價格4月見頂回落。由於今年工資升幅較大,中國CPI今年仍保持住高增長(例如5%)。因此,整體貨幣政策仍係從緊,個別行業從寬。今年全年出口增長率估計19%及入口增長率27%;下半年人民幣升幅減慢,估計年底見6.6兌1美元。今年上半年出口升幅最大係機械上升35.9%,其次係電子升16.9%,第三係紡織品升15%,其他產品升幅收窄。估計下半年機械出口升幅收窄,反而電子及紡織品仍可保持上半年的升幅。 估計A股熊市三期極有可能在明年出現,至於係邊一季仍要觀望,因影響因素好多,例如油價由147.25美元回落到100美元,定係反覆向上重見200美元? 星巴克1999年只有二千間咖啡店,到去年已超過一萬間;並以每天開五點五間的速度增長。結果令管理層犧牲了品質而搏命追求量的增長,在好多唔應該開店的地方亦開店,唔應簽的貴租約亦簽了,甚至連麥當勞亦唔請的小伙子一樣照請,因擴充太快唔夠人用。過去錯誤的決定係造成今天(或將來)唔愉快局面的原因。終於星巴克痛定思痛重新收緊番標準,將唔合規格的咖啡店執笠。管理層重新將注意力放番落品質上而唔係數量上,最終結束了長達三十七年的擴張期,努力將經營重點由提升服務達到從前開業時的標準。 中國由1998年至去年連續十年GDP保持10%以上的速度增長,大量低收入農民變了製造業生產員工,終於中國亦面對勞工唔夠、原材料漲價及美國需求增長率放緩的問題;一如星巴克,中國唔應該再強調GDP增長率而係服務質素,唔好再建造全球最大的商場而人流不足,以及唔好再生產蝕本貨。今天全球十大商場有七個在中國(其中四個較美國商場仲大)。佢地唔係起在地價便宜的美國,好似Alberta的West Edmonton Mall(美國人要駕車去買野),而係起在地價昂貴的北京。去年中國GDP中49%與製造及出口業有關(美國係20.5%、英國18.2%及日本26.2%),中國點樣由製造業轉型到內部消費而唔引發經濟放緩?銀行收緊信貸,令地下錢莊收取15到20厘息的貸款,今年呢次軟著陸都好驚險萬分。 氣候有春、夏、秋及冬;月有圓缺;人往往希望百尺竿頭更進一步(到百尺竿頭仍唔收斂,往往跌進深淵)。以工廠為例,永遠擴充的結果係必然有一天面對客源不足而要低價搶客,跟住係蝕本咁爭客去保持市場佔有率,最後就執埋笠。 中國未來五年點樣適應每年GDP只上升8%?更加唔好諗如果有一年GDP增長率只有6.5%(例如1998年)。中國製造業面對生產力過剩,甚至減價搶客,營業額升幅仍然有限。 農產品今年豐收 OECD國家今年起每天石油需求減少六十萬桶(減幅最大係美國達2%),今年石油新需求來自新興工業國,令今年全球石油需求每天仍升八十萬桶(原先估計係一百萬桶),今年新增產量每天一百萬桶;明年每天一百二十萬桶;去年8月到今年7月油價上升唔係因需求增加而係資金由股市流向金市及油市造成,理論上油價今年7月已見頂的機會好大。去年12月美國通過限制私家車石油效率法案(係1975年以來另一次),由家陣每加侖行17哩標準到2020年每加侖最少行27.5哩,以及汽油內含乙醇量到2020年上升五倍(歐洲標準由家陣每加侖行35哩上升到45哩)。中國部分城市如上海及北京對四驅車抽重稅率去提升汽車用油效率;印度、印尼、馬來西亞及台灣正逐步減少對汽油的補貼10%到30%,估計奧運之後中國亦加入。IEA估計,如果各國減少汽油補貼可令全球每天減用四十萬桶油;如中國取消汽油補貼,中國耗油量可減少10%令全球減少3.5%的需求,石油立即進入供過於求期。 農產品方面又點睇?過去兩年惡劣天氣令澳洲、俄羅斯及烏克蘭等小麥減產。美國水浸及乙醇計劃亦刺激食品價格上升,超過兩年農作物全球失收在過去四十年只發生過三次,有理由相信今年起豐收,令供應緊張的農產品紓緩下來(天氣難測,今年係未大豐收,年底先至肯定)。 金屬極受全球經濟景氣的影響,其次係能源價格(例如南非電力不足引致金屬減產),中國過去大搞基建令全球金屬價格上升,假設明年全球GDP增長率唔及今年,有理由相信明年金屬價格冇能力創新高。 債券又點?1981年9月30日美國十年期債券見15厘係從來未見過的高息;其後債券價格平均每年上升9%(未計利息收入)亦係二百年內少見。2003年6月十年期美國政府債券見戰後最低利率3.1厘後又點?長達二十二年的債券牛市係未在2003年6月結束? 美元升反為衰退先兆 美匯指數已升穿下降軌,但未超越前浪的78點,所以未能確認美元轉勢,短期在74點到78點牛皮,如升穿78點,美元可睇好,反之只係牛皮市【圖】。過去三年美元兌日圓回落27%及兌歐羅回落33%,今年7月起係未美元轉強?美元回升顯示美國步入衰退的機會極大,令美國人由全球抽番資金回國減債。呢次油價暴跌唔係因供應上升而係需求下降,亦反映經濟走向衰退。 戰後國際貨幣體系以每盎斯黃金兌35美元為基礎,各國自訂與美元的匯價,叫做布列頓森林體系。呢個體系係1971年8月15日由尼克遜總統宣布廢除,各國貨幣匯價可自由浮動亦可繼續同美元掛勾;1976年再簽訂浮動匯率制合法化,各國貨幣必需逐步走向自由浮動唔可以長期同美元匯價掛勾,1976年後各國貨幣匯價出現更大的波動;1987年10月G7聯手逼日圓升值及2005年要求人民幣升值就係來自1976年的協議。 自1971年美元同基金脫勾後,全球通脹率唔受控制,今年美元購買力只得1971年的4%(即1971年100萬美元身家,今時今日相等於2500萬美元),可見貨幣貶值的速度真係幾驚人。 另外,多謝各位支持,研討會廣告刊出兩天內所有入場券已被訂購一空;遲來的電話已無法滿足。多謝大家仁慈的心,協助苗圃為內地籌建學校而慷慨捐款,我老曹代表受惠者向大家鞠躬。 [ 本帖最後由 羊仔 於 2008-8-14 09:27 編輯 ]


Share this:

TOP

次按燒到中國身上 2008年8月15日 (星期五) 8月14日,周四。恒生指數升99.39,收21392.71;成交611.54億元。8月期指升134點,收21337點;中國海洋石油(883)升7.5%,收11.2元;中國鋁業(2600)升6.8%,收6.8元;中國龍工(3339)升14%,收6.89元,因德銀推介。 花旗推介港交所(388),估計今年每股獲利4.68元,減少19.1%,P/E二十二點八倍,目標價137.8元;恒隆地產(101)今年每股獲利1.75元,升241.9%,P/E十三點五倍,目標價34.34元;安徽海螺(914)估計今年每股獲利2元,升29.6%,P/E十七倍,目標價42元。 滬深三百微跌0.05%,收2443.51。 美國7月份銀行接管物業大升三倍,即係話美國房地產在度惡化緊,其中內華達州最差、加州第二差及佛州第三差。 日本又面對衰退威脅 波羅的海乾貨指數連跌二十三個交易天,係2005年第三季以來最差。高盛估計,明年再回落40%,2010年再跌47%,因為乾貨輪周期見頂。雖然一連跌了二十三個交易天,依家租金仍較二十年平均價高出兩倍。 美元一個月內上升6%,挑戰美匯指數去年12月的78點高位;呢個係2002年2月美元開始回落時所形成的下降軌阻力,由個年起計,兌歐羅跌幅超過50%,估計美匯指數在78點爭持。7月份美國零售業減少,係五個月內首次。唔包括汽油的7月份零售減少0.2%,減幅最大係汽車,減少2.4%。 日本第二季GDP收縮0.6%,再次面對衰退威脅。日本建屋商Urban Corp因無力清還23.5億美元負債而申請破產,令日本銀行股回落。日本樓市泡沫爆破後十八年仍有餘震,影響之下Tokyu Land跌5.3%;NTT Urban Development Co.跌6.1%、Urban跌48%,至32日圓,以及Kansai Urban Bank因擔心貸出的60億日圓無法收番而跌10%,至52日圓。 歐洲第二季GDP跌0.2%,歐羅匯價高企令歐羅區經濟陷入不景氣。 英國面對滯脹,估計CPI短期仍企在5%,然後明年跌到2%。英鎊有減息壓力而令英鎊急跌。英倫銀行警告,明年英國的GDP可能冇升幅,甚至出現一季或兩季的負增長。柏克萊跌7.1%、萊斯銀行跌6.2%、皇家蘇格蘭銀行跌6.4%、Enterprise Inn.跌11.2%、馬莎跌10.1%、DSG跌15%、ITV跌10.1%及Punch Taverns跌11.2%。倫敦West End租金在度回落緊。酒吧、寫字樓及商店係英國最昂貴的物業,今年下半年亦面對租金回落(價格早就跌了)。 8月14日中國海關總署發布分析報告指出,今年首六個月中國貨對美國出口增速首次降至單位數,上半年出口1167.9億美元,增長8.9%,低於總體外貿出口21.8%,較去年同期低9個百分點,係七年內首次得單位數增幅。其中廣東省跌8個百分點、江蘇省跌22.9百分點,上海及浙江回落7.6及8.7個百分點。四大地區對美國出口佔中國出口美國總值75.7%,其中服裝係負4.8%增長、手機負28%增長、塑膠負28%及玩具負5%增長。美國已成為中國第二大出口市場,可見次按危機對中國出口美國的影響好大。 聯儲局要諗計 中國上半年石油存量六百萬公噸,產品存量最少四百萬公噸,因政府要求較高的存量;下半年需求估計較上半年升6.7%略少。估計全年的需求上升4.8%,因油價高企及中國GDP增長率放緩;IEA估計,中國下半年石油需求將增加6.2%,需修訂;相信下半年需求只有4.5%增長,較IEA估計每天少十二萬五千桶。令全球下半年新增需求由每天九十六萬桶,降至每天八十四萬桶。上半年中國石油入口升13.6%,如非增加存量,估計入口只上升6.9%。理由係中國石油儲存設施新起好,為了應付奧運而將存量上升到足夠應付十五天的消耗。如上述的估計正確,年底油價應在每桶100到110美元。今天油價止跌回升、金價反彈及道指回落,因8月8日止原油庫存減少四十萬桶,汽油庫存減少六百四十萬桶。 至今為止,全球金融機構已為次按撥備5000億美元,估計仍需撥備10000億美元。上述虧損可令消費(C)及投資(I)減少;美國政府今年5月退稅後,7月份的財赤已超過1000億美元,全年財赤接近10000億美元,未來進一步退稅的條件唔存在;即政府財政政策(G)亦無法刺激經濟。無論從C、I及G角度睇,再次引發通脹力量真係好有限。因美元購買力下降而引發成本推動通脹(例如2003年至今年上半年透過美元貶值而產生的通脹),未來亦必須由貝南奇發明新方法,才可抵銷15000億美元呆壞賬所引發的通縮壓力,聯儲局已透過TAF(Term Auction Facility)向銀行提供二十八天到三十五天的短期貸款,數目已達8100億美元去保持銀行的償付能力(solvent)。另外,聯儲局又創造了TSLF(Term Securities Lending Facility),令銀行可以用難流通的證券作抵押,向聯儲局換取資金。TAF加TSLF令聯儲局已提供15000億美元信用貸款畀美國各大金融機構,但仍然無法阻止金融業下沉,未來聯儲局仲有乜野新方法? 經濟「單料銅煲」好麻煩 7月8日美國財長保爾森中東之行,相信係受到以科威特為首的中東國家放棄本國貨幣與美元掛勾的影響,至於佢答應了乜?從最近美元走勢係未有一D啟示? 美國樓價已跌了20%,過去五年入市的三分一物業買家已變了負資產;如樓價再跌10%,後果真係唔敢諗;熊至今未去冬眠,仲在度搞破壞。格蛇話美國樓價明年上半年見底,理由係新供應減少及到了可負擔的水平;真係咩? 全球經濟由樓價到消費信心及商業景氣到零售數字;美國、歐洲、日本、中國及印度的麻煩在度逐漸浮現。工業活動通常較信貸情況慢九個月左右,即今年下半年起先浮現,因來自美國、加拿大及歐洲的訂單在度減少緊。下半年對原材料的需求減弱,無論能源及原材料價格,宜利用每次的反彈作出售之用。日本極有可能已進入衰退期,佢的造船廠訂單已面對取消;越南及南韓正以加息對付通脹,甚至在土耳其君士坦丁堡的建築機械需求亦在度下降。 近月股市方面因油價及原材料價格回落或有一定的支持作用,但今年下半年上市公司業績肯定唔及去年下半年,明年上半年上市公司的業績亦肯定唔及今年上半年,即係股市反彈後仍有回落的壓力。 事實證明在經濟環球化的環境下只有延遲(Delay)而冇分道揚鑣(Decoupling),美國次按危機慢慢在歐洲及日本感覺到,至於中國的反應更激烈,出口放慢遠超過美國,因中國經濟49%活動由出口相關業務推動,仍係「單料銅煲」式經濟(即熱得快、冷得快)。唔似美國及歐洲等成熟經濟已係多元化,任何行業對整個經濟影響力都唔會好大。 以香港為例,1973�74年出口不景,股市一落千丈;1981�82年出口不景,對股市影響力已減弱了好多,今天出口只係香港經濟其中一環。香港經濟已由七十年代的過分依賴出口有關行業,漸漸走向多元經濟,唔再係「單料銅煲」式經濟。 熊二遊戲唔易玩 展望下半年,石油及原材料價格因需求減少而回落,低潮在明年上半年。股市底部可能同過去唔同,例如唔同行業在唔同時間內見底,形成了參差底機會好大。工業股唔少已由2003年起回落,經過五年回落期唔排除在今年下半年尋底;內地零售股仍在上升周期;原材料股可能在明年上半年先見底;內地銀行股同地產股要睇人民銀行的決定。 大戶出貨未必係壞消息,億萬富豪Carl Icahn今年7月增持自己係大股東的房屋建築公司WCI Communities 14.5%,該股7月29日每股市值1.31美元,四天後下跌至59美仙,跌幅達54.9%;呢間公司在上周一宣布破產,億萬富豪在一個月內冇了1.13億美元身家。因大戶入貨而唔用腦袋分析,肯定係連恤衫都輸埋(Lose your shirt)。 熊市二期遊戲規則叫做Hit and Run。在唔穩定時間做唔穩定的投資,並唔係叫你投資自己唔識的項目,而係唔可以長期拿住(buy and hold)。只有牛市一期才可採用買入後拿住的策略。一般散戶係未識得捉熊腳?如果唔識都係持盈保泰好。因為Hit and Run遊戲中,85%投資者都係輸家,你可唔可以成為個15%! [ 本帖最後由 羊仔 於 2008-8-15 10:44 編輯 ]


Share this:

TOP

投資好似奧運奪金 2008年08月16日(星期六) 8月15日,周五。恒生指數跌232.13,收21160.58;成交489.6億元;8月期指跌316點,收21021點;9月期指跌316點,成20951點。令人討厭的期指倒掛現象仍然在。 今年證明對 Traders而言係極難賺錢的一年;VIX(Market Volatility Index)亦失準。相信係2002年後首次面對咁的惡劣環境,通常在事情轉好之前表現往往更壞,情緒走向極端事前好難捉摸,當愈來愈多人認為股市難玩 時,極有可能引發惡性拋售,一般散戶在呢段日子最好持盈保泰,至於有虧損者大多賴股市難玩;踏入熊市二期係孖展客大量減少借貸的日子,形成股市成交額漸 減。加上7月及8月乃傳統暑假,投資者亦趁機會放假。 熊市二期仲未完 熊市一期通常在非理性亢奮期出現,例如去年10月30日恒指31958點;一般跌幅大而且急,主要由獲利回吐造成。差唔多所有股票皆跌只有極少數例外。成 熟市場好似英美,熊市一期通常只有三個月左右,例如今年1月見底;香港呢類半成熟市場,拋售潮長一點,但好少超過六個月,今年3月18日完成熊市一期,進 入熊市二期。 熊市二期特色係投資者認為熱門股已拋售過分,加上經濟本身仲未轉壞,令資金大量流向熱門股,引發熊市中最大一次的反彈,例如今年3月18日至5月5日 26387點,反彈幅度達28.27%;熊市二期反彈另一特色係集中在熱門股,二線股反彈幅度反而好有限;在正常的情況下,熊市二期內有三次到六次反彈, 時間較熊市一期長。我老曹認為,3月18日起熊二至今未完成,熊二較大部分人估計的仲長。 牛熊市乃道氏理論,只係好簡單咁分成三期而冇其他附件。由於比較主觀,後人加了其他方法去協助分辨牛熊市。方法有:一、指數如下跌20%或以上係熊市機會 高達75%。利用上述的理論,恒指在去年12月跌穿25566點(由高峰回落20%),便確認係熊市;二、移動平均數法。即50天線移動平均數跌穿250 天(在外國係200天),亦係另一確認熊市的方法,準確度達80%;三、波浪理論法,即一浪低於一浪。如恒生指數跌穿前浪(3月18日20572點)才確 認。呢個係家 仍有人認為唔係熊市的理由;四、三分一法,即2003年4月至去年10月恒指升幅三分一失守。由2003年4月25日恒指8331點升到去 年10月30日31958點,一旦恒生指數低於24083點,便確認係熊市;五、根據P/E理論。牛市通常在P/E二十二倍以上結束、熊市通常在P/E八 到十二倍才結束。熊市三期另一現象係熱門股下跌,二線股唔跌(因熊市二期中二線股係咁跌,到了熊市三期佢地跌無可跌)。換言之,熊市三期恒指P/E只有八 到十二倍,同時熱門股係咁跌而二線股唔跌先係入市時機。呢個情況依家都未出現,因此仲係熊市二期。 熊市有幾長?最短三個月(例如1987年10月到88年1月),最長十三年零四個月(例如日本1990年1月到2003年4月),要事後先知。 花旗推介工商銀行(1398),估計今年每股獲利38.5仙,升57.5%,P/E十二倍,目標價6.3元;長江基建(1038)今年估計每股獲利 2.39元,升13%,P/E十五點一倍,目標價40.5元;阿里巴巴(1688)估計今年每股獲利28.4仙,上升23.3%,P/E二十九點八倍,目 標價11.25元;國壽(2628)估計今年每股獲利64仙,減少53.4%,P/E三十七點三倍,目標價30元。富力地產(2777)今年每股獲利 1.25元,升19%,P/E九點三倍,目標價23.64元;美維控股(3313)估計每股獲利3角,升74.9%,P/E六點二倍,目標價2.42元。 中證監再發功 年屆七十八歲的著名經濟學家吳敬璉教授對浙江中小企業講話:當前中國經濟發展中面臨的難題,在短期內解決係冇可能的。可能兩或五年亦解決唔到;日本 1990年至今仍無法從經濟危機的陰影中走出來,所以浙商應做好長期作戰準備。人民幣匯價上升、工業原材料漲價及勞動力成本上升所造成的困局,兩年甚至五 年仍冇法解決;只有提高科技含量、唔好急功近利、唔好睇到乜野好就做乜、唔好盲目跟風的關鍵係做專做精,以及唔好盲目追求大才可成功。 中國經濟剛完成出口及製造業黃金三十年,幾時進入內需繁榮期?要慢慢觀望。 滬深三百指數升0.17%,收2447.61。 中國證監會發言人8月15日就大小非減持問題回應記者時話,將會再出三招去穩定股市。一、引入二次發售機制,完善大宗股份減持市場約束、減震及訊息披露制度;二、可發行可換股債券;三、對國有股份建立實時監測系統、進行申報核實及確定等相應技術準備。 滬深A股由去年10月至今累計跌幅61%,好多投資者虧損累累,加上大量資金流出新興市場及近期大小非解禁壓力唔少。除此之外,中國南車IPO下周上市,恐怕又再引發新一輪的拋售壓力。 1992年內地交易所重開之時係唔歡迎外國股份掛牌,直到今年8月6日上述條例先改變。紐約證券交易所希望成為首間在上海上市的外資企業,匯豐同渣打亦希 望返去上海掛牌(解放前在上海掛牌)。外資到上海掛牌可能令去年10月開始的A股熊市延長,因為投資者在比較之下可能將資金用作吸納外來股票而減持A股。 內地依家仍禁止資本自由出入、限制外匯買賣及阻止拋空,對外資企業在上海上市仍有一定唔方便。 金價見788.65美元及白銀見12.65美元。金價由3月17日的1032.7美元至今跌了17%;白銀由21.355美元至今跌了40%;標普GSCI指數7月3日至今跌了21%,代表商品價格已進入熊市。 英鎊跌至1.8561美元,較7月31日跌6.4%,係二十二個月新低。 亞洲區外匯亦回落。菲律賓披索跌2.2%,見45.31兌1美元;新台幣跌到31.4兌1美元,呢個係2月25日以來最低;新加坡元本月亦跌了3.5%;馬幣回落1.4%,見3.346兌1美元。資金從四面八方流番去美國。 1966至82年美股熊市共十六年;1990至2003年日經平均指數熊市超過十三年;香港1967年股市起步到1973年見頂後亦上落好幾次,另一牛市在1983年先正式起步,呢段上落市亦長達十年(1986年才打破1973年的高點)。 上次商品熊市由1980年開始,在2000年結束時亦長達二十年。呢次牛市係未在今年7月結束?要事後先知。 投資者切戒大口 美元兌歐羅升到五個半月內新高,見1.4762美元兌1歐羅,即係今年2月21日以來最高,但仲未肯定美元牛市係未重臨。因為美匯指數上阻力78點未破, 未出現一浪高於一浪的訊號。畢非德、羅傑斯、格羅斯及索羅斯一直公開話睇淡美元,只有索羅斯在今年6月轉左(唔係睇好,只係唔睇淡)。美元低潮在今年3月 經過一輪折騰後,7月份至轉勢,至今上升6%。以2002年到今年3月美匯指數回落38%計,至今升幅達6%可能只係熊市另一隻腳。美國銀行在8月14日 建議客戶獲利回吐。 終於全人類從decoupling的笑話中醒番,發現只係Delay。由日本到歐洲及由越南到四大金磚國,遲早受次按危機影響而唔可以分道揚鑣。為避開美股回落而轉投其他國家股市者發現自己損失仲大,7月份起資金回流(由全世界返番美國)令美元需求大增。 美國去年第四季GDP出現負增長,歐洲及日本今年第二季都係一樣;美國7月份CPI上升5.6%,係十七年內最大升幅,再加埋中國經濟軟著陸;除了中東及北非受惠高油價外,全球經濟無晒樂土。德銀估計,今年全球GDP上升3.7%及明年上升3.2%,即係明年較今年仲差。 歐洲央行對CPI的態度較美國聯儲局更為鷹派,7月份歐羅區CPI上升4.25%仲唔肯減息。第二季歐洲GDP出現負增長的國家:德國負0.5%、法國負0.3%及意大利負0.3%。英國仍上升0.2%,但擔心第三季GDP出現負增長。 根據麥當勞包指數,歐羅較美元最少偏高50%;加上美元轉弱已六年(2002年起計),各位如果唔同意我老曹的美元強勢論,亦應該學索羅斯咁保持中立,而 唔係好似其他世界名人咁做LAZY BOY。投資唔係一勞永逸的事而係好似每天起床漱口刷牙的例行公事,每天必需花十五分鐘或以上睇睇數據,諗諗大方向有冇改變唔係乜都唔理。同時切戒大口 (Big mouth),講野過了頭而收唔番。無論你係畢非德、羅傑斯或索羅斯,你的見解同我老曹見解差唔多(Your opinion is as good as mine),直到事後證明邊個準確為止。世上無先知,更加冇股神(衰神就供應過剩)。 美國人今年暑假歐遊歸來發現歐洲消費勁貴,令歐羅由7月15日1.6038美元開始回落!十年河東、十年河西。 所有銀行資產負債表都係一邊係資產,另一邊係負債。只要資產大過負債便叫有償債能力(Solvent),反之叫冇償債能力。做到呢點的方法有:一、資產同 負債不斷咁上升;二、資產及負債唔升;三、資產跌價及負債減少。依家歐美各大銀行的處景係資產跌價但負債冇減少;為防止銀行陷入冇償債能力,另一方法係增 加股本(供股或發行新股),咁樣股數便漸增,每股獲利能力漸減,令每股市價下調。TAF(Term Auction Facility)還債期雖然由二十八天改為八十四天,上述公布只係將短期負債轉為中期負債,仍然係負債並唔係資本,而TAF息率較貼現率2.25厘及聯 邦基金利率2厘高;作為銀行自然免得過當然唔借TAF。要動用TAF的銀行財政狀況起碼唔健康。 7月鋼材價熱軋鐵平均每噸1106美元,上升56美元;Rebar 957美元,上升56美元;鋼桿1095美元,上升35美元。8月仍有上升壓力,估計每噸可再升10到30美元。至於9月起便唔明朗,估計未來三至六個月 鋼材價每噸可跌番80美元,即鋼材價有機會在今年第三季見頂,因明年煤及鐵礦石供應量上升,踏入第四季鋼鐵廠開始放出明年期貨合約。 中國工廠及地產投資,加上5月四川地震後重建,令中國7月份市區固定資產投資升27.3%,至72200億元人民幣(上半年升26.8%),即中國固定資 產投資在7月份仍全速進行,政府有大量的外匯儲備去支持增長,唔使理會出口增長率放緩。估計呢次中國經濟軟著陸需時較估計的長。 長期鍛鍊唔好偷懶 全球六十六億人口中,超過二十億在上周五晚上睇北京奧運開幕典禮,籌備七年費用3億美元,超過一萬五千人參加演出及歡迎來自二百零四個國家超過一萬一千個 運動健兒,向全世界展示一個現代化的中國,亦係改革開放政策落實三十年後的中國,雖然仲係窮但朝氣勃勃。二十一世紀係中國人的!去年10月起,滬深A股進 入內地股市重開以來最大的一個熊市。一如美猴王被困煉丹爐七七四十九日,受盡痛苦同折磨,先至煉成銅皮鐵骨及金睛火眼變成齊天大勝。1929到32年美國 華爾街危機後,到1937年一個全新的美國由大蕭條中冒起,準備日後管治全世界。鄧普頓1935年開始投資美股,當年佢的名句:「牛市在最悲觀的日子誕 生、在懷疑期長大、在樂觀期成熟、在亢奮期死亡!」接近九十五歲的鄧普頓在生日前過身,留下上述的不朽名句。我老曹亦經歷過香港多次最悲觀的時刻,例如 1967年離開學校到社會做野時,唔少親戚及朋友去移民。我老曹因父親早死,冇錢到外國讀書兼移民,被人地批為在香港死梗;1974年香港出現有史以來最 大的一個熊市又以為我老曹死梗。經歷過呢兩次大難不死,反而養成不怕死的性格。在社會上學習精英致富之道,唔好學習佢地的生活習慣;學習企業家精神,而唔 係佢地的風流艷史。 投資利潤可以無限大,但虧損15%要止蝕,極限係20%。唔使怕波幅,波幅愈大,機會愈多。世上冇一帆風順的致富法,卻有點樣將驚濤駭浪生存法。唔好將1 萬元變成2萬元,呢個係小孩子遊戲,諗諗點樣將1萬元變成100萬元,甚至1000萬元。年輕人應有冒險精神,但在出發前先好好裝備自己。如果連太平山頂 亦未上過,又點可以爬喜馬拉雅山?切忌志大才疏,欲登喜馬拉雅山前必先鍛鍊自己;世界上充滿機會(1967年唔少親戚及朋友話香港冇機會而去了多倫多,事 後證明佢地係錯;1982年D同學話香港冇機會又證明係錯;1989年連至愛的親朋亦話香港冇機會,同樣證明佢地係錯)。平均每個月出現二至五次機會,問 題係你要把握得到。例如7月份拋空石油期貨,你話可以賺幾多?如果你冇長期鍛鍊又點樣在奧運奪金?Come On , Don't be a lazy boy! 投資愈後生開始愈好。二十三歲開始每月投資2500元到六十五歲已擁有1000萬元。生活量入為出,投資要睇中長線。搵個良好的投資顧問(唔係股票經 紀),多做運動、唔食煙、每天飲八杯水……月有圓缺、人有悲歡;牛市中保持平常心,熊市中持盈保泰。男仔約會女仔然後一齊使錢;慢慢買佢地負擔唔起的野而 陷入借貸,債上再加債最後連借錢畀佢地的金融機構都因呆壞賬太多而執笠。解決的辦法得一個──量入為出,開始儲蓄。只係咁樣一來全世界金、銀、銅、鐵及石 油都要跌價,全球經濟陷入衰退。Meredith Whitney係去年預見次按危機出現的分析員,佢家 正預見上述的情況將出現。未來銀行倒閉事件較Jack and Jill roll down the hill仲多。CNN報道加州過去十二個月出售的二手樓中,有63%係蝕本,以及拉斯維加斯60%要蝕本,最差係Merced 74.9%賣樓者係蝕本賣出。格蛇話樓價今年年尾見底?只係佢一廂情願的想法。 T Boone Pickens今年八十歲。1951年佢在地理學系畢業後加入Phillips石油公司;1956年同人地借了2500美元做資本而搵到自己第一口油 井;1981年佢的Mesa石油公司係全球最大的私人石油公司。今天佢已富甲一方,去年只係私人捐款數目已達2億美元,估計佢今天財富達數百億美元。證明 成功同開始時有幾多資本係冇關,而係有幾多智慧。 [ 本帖最後由 羊仔 於 2008-8-19 09:35 編輯 ]


Share this:

TOP

美次按後遺症有排搞 2008年08月18日(星期一) 8月17日,周日。Nymex原油價格下試200天移動平均線(110.18美元),如果跌穿唔係乜野好消息,只係代表經濟進一步放緩;三十年期債券利率已跌穿200天移動平均線(4.513厘),代表後市利率易跌難升;金價早在8月5日跌穿200天平均線(890.9美元),上周再失守阻力區796.5美元,有能力下試另一支持區729.5美元。 本周注意力在油價110.18美元攻防戰,支持區在108.23美元,如果守穩可反彈上試120.73美元;反之會下試78.4美元。 歐羅兌美元200天線(1.523美元)在8月8日失守,下一支持位在1.4174美元;美元兌日圓支持位在108.85日圓,阻力在113.88日圓。 道指200天移動平均線(12470點)已成上升阻力,下一支持位200周移動平均線(11722點)在上周亦失守,後市真係幾麻煩。 A股點會死 北京奧運基礎建設費用400億美元,分四年搞掂,中國政府在過去四年每年用在北京奧運費用只及全國GDP 0.3%;因此,既冇奧運前效應亦冇奧運後效應。北京人口佔全國人口1.1%及佔全國GDP 3%,所以亦冇溢出效應(Spillover effect)。何況去年至今人行已十次調升存款準備金率及六度調升利率,家陣銀行存款準備金率上調到17.5%歷史新高,引發企業獲利減少、A股暴跌及房地產泡沫爆破;加上去年10月美國次按危機,令中國工業利潤成長率今年上半年得21%(去年同期係43%)。政府管制價格令煉油部門、發電廠及唔少公共建設部門都出現蝕錢,盈利率下滑必然衝擊A股,政府選擇唔救市,畀A股O由偏高跌番去合理水平。由於中國股市槓桿投資操作唔多,私人投資者亦好少借錢,甚至大企業亦未必需要在股市籌集資金,除了投機性買入者損失慘重外,對整個社會衝擊唔大(2006�07年暴升,帶來去年10月後暴跌 )。何況中央政府有足夠工具阻止股市同房地產進一步下跌,例如減息及放寬銀根,政府至今仍冇咁做目的係約束上市公司肆無忌憚圈錢行為、向唔負責任上市公司Say No去增加證監會稽查力量、防止內幕交易成為主流及解決大小非減持壓力;情況好似1973�74年港股,冇呢次熊市洗禮,香港投資者亦唔會咁快成熟。呢D大小非流通股利用十股送三股對價便取得流通權,甚至唔使對價亦能流通,徹底破壞了市場估值體系。上述問題可以拖得一時,但唔可以拖一世,只好承認現實畀佢地流通,以及畀滬深A股痛痛快快咁跌一次,先係走向市場化正確方法。限售股與流通股同股唔同權及同股唔同價問題遲早要解決;市場不應要求限制大小非流通,點解唔痛痛快快一次過解決晒D問題?!香港1973�74年股市曾下跌93%亦死唔去,何況係滬深A股至今跌幅只係60%? 8月13日出台最新貨幣信貸及外匯儲備數字,證明了熱錢由中國境內流出,股市繼續面對衝擊係無可避免、人民幣匯價受壓及房地產亦避唔到,滬深股市開始由深秋走向寒冬。銀河證券首席分析員左小雷今年2月估美元下半年走強及熱錢流出中國,加上本周一開始大小非加快減持,衝擊波好大。不過,只要捱過寒冬,春天仲會遠咩? 1980年起全球化一直為世界經濟提供巨大紅利,令各國克服國內資源及市場錯配問題,實現資源在全球範圍內最優配置。隨著全球化深入及瓶頸漸露,過去唔少國家擁有大量低成本勞動力供應及大量廉價資源時代已結束;反而全球流動性過剩變成國際游資到處投機炒作,令貿易保護主義又重新抬頭。全球化黃金時代結束及惡果逐漸浮現,摩根士丹利6月出台報告擔心潮流開始逆轉;長達二十五年歡樂時光進入告別篇。美元由全球股市及房地產市場回流番美國,估計至10月都係美元強勢期;黃金在1032.7美元見頂,金價下跌21.89%;白銀在21.36美元見頂,價格已回落33.62%,熊市訊號已十分清晰。各位可嘗試捉住下跌中刀,上述唔係我老曹所好,個人意見仲係利用每次反彈作減持(如各位仍持有大量貴重金屬、資源股同能源股話)。事關美匯指數仲未升穿78點,仍有爭拗。 點填萬億美元呆壞賬? Jeremy Grantham(基金管理人)去年首先用慢動作火車相撞去形容呢次次按危機。一年過了去呢個慢動作火車相撞影響慢慢浮現;一卡接一卡開始出軌,危機由一個國家傳到另一個國家;第一卡出軌當然係美國,去年第四季出現GDP負增長;依家係歐洲同日本,今年第二季GDP負增長;今年第三季最大可能性係英國GDP出現負增長。各金融機構已公布撥備達5000億美元,估計仲有10000億美元呆壞賬等候公布。全球有冇足夠資金去填補呢方面損失? 過去GDP高增長金磚四國,GDP增速亦出現放緩(軟著陸只係衰退另一代名詞)!上述情況不但在中國及印度出現,在巴西同俄羅斯亦出現,因原材料價格開始回落。美林證券北美洲分析員David Rosenberg估計,由美國次按所引發衰退在明年年中前唔可能完成。歷史話畀我地知,標普五百在經濟見底前四個月回升,即美股最少回升四個月,美國經濟先有可能見底。在美國金融股未見底前,全球經濟唔可能回升。 再睇睇十年期債券與三十年按揭利率關係。去年5月兩者相差係1.37厘,家陣係2.53厘,過去平均數係1.68厘。即依家為樓按搵買家較一年前要畀多D息,代表買家唔願購買樓按債券,在咁情況下,樓價點樣見底?雷曼兄弟打算賣出400億美元商業樓去改善資產負債表,如無法在市場出售,就打算分拆上市。5月15日至今雷曼股價回落63%,同期標普五百金融分類指數只回落20%。雷曼總共蝕了80億美元,已集資130億美元;手上物業去年11月市價520億美元,今年5月份只值400億美元;樓按證券5月31日約值294億美元。上述出售可令雷曼兄弟第三季進一步撥備。 寧買當頭起 今天花旗股息有7.2厘;美國銀行股息有8.9厘(如不減息話)。美國各銀行股係未見底?美國金融股情況加上油價高企,令今年港股忽上忽落,極之難玩,當然仍有人在今年內賺到錢,但我老曹就冇呢個本事。格蛇猜測明年上半年美國樓價見底,我老曹回答係your opinion is as good as mine !唔少人指責樓市泡沫由格蛇一手造成,搞到佢面對好大群眾壓力;因此,作出上述預測係情有可原,但可信性唔高。在佢做聯儲局主席十九年,證明了佢預測能力極低;例如1996年非理性亢奮,道指卻由6000點升上10000點;1999年千年蟲事件,成為二十一世紀第一個國際笑話。2006年第四季格蛇曾說:「Most of the negatives in housing are probably behind us.The fourth quarter should be reasonably good,certainly better than the third quarter.」但美國樓價2006年11月至今不但冇止跌回升,反而一直跌到今年8月。既然2006年11月佢預測錯誤,點解我地要信呢次佢會預測正確? 有智慧不如趁勢,勢起時加入,勢盡時退出(寧買當頭起,上升15%時不妨加入;莫買當頭跌,回落15%時不妨退出)。 1980年至今美國住宅貸款上升一百多倍,由10億美元升到今天超過10000億美元,其中有幾多住宅貸款將變成呆壞賬?National Association of Realtors公布,第二季全美樓價回落7.6%,被銀行接管住宅樓較一年前上升三倍。加州Sacramento區樓價已回落36%、佛州Cape Coral及Ft.Myers回落33%。瑞信估計,全美8.4%樓按者無力供款而變成呆壞賬。 黃金都唔保值 美國7月份CPI上升5.6%,係1991年1月以來最大升幅,但金價卻失守800美元。邊個話黃金可保值?歐羅見1.4721美元,由7月15日1.6038美元至今已回落8.21%,唔係因為美國經濟好轉而係歐洲經濟在度轉壞。美元一如其他野一樣由供求決定;當分析界睇淡歐羅時,佢地被迫睇好美元。德國銀行估計明年歐羅區陷入衰退,以及GDP增長率由先前估計0.8%降至0.1%。明年第一季前歐羅將減息1厘;反而美元唔會減息,上述係睇好美元理由。白金較黃金22%跌幅更大,已達39%;鈀金跌幅更達到50%,上述唔會係技術性調整而係貴金屬已見頂訊號。商品價格見頂主因係全球經濟前景由穩步向前變成增長減速,甚至出現衰退,令商品供求關係逆轉,由供不應求變成供過於求。因經濟前景較為悲觀,各類商品需求消費趨向疲軟,形成生產商唔急於補充存貨,商品便一下子由供應緊張變成寬鬆。投機資金因此大量流出期貨市場,令大量投機基金被迫主動斬倉或蝕錢出局。 貴金屬同基本金屬由地下開採需時,今天回收技術不斷提升,已淡化金屬稀缺特性,例如白金接近100%回收。 上周滬深A股跌5.95%,成交創二十一個月新低,其中地產板塊普遍下滑。媒體報道,7月份社保基金新開二十四個交易賬戶,市場人士期望社保基金入市。雖然第二季GDP仍升10.1%,主要來自政府投資基建項目,但人行警告經濟仍會進一步放緩,令人民幣跌至6.87兌1美元。 [ 本帖最後由 羊仔 於 2008-8-19 09:45 編輯 ]


Share this:

TOP

教大家乜叫對沖 2008年08月19日(星期二) 8月18日,周一。恒生指數跌229.91,收20930.67;成交452.2億元;8月期指跌122點,收20899點;9月期指跌114點,收20837點。港股下跌主因係受A股下跌拖累;其次係香港GDP升幅由第一季7.3%急跌至第二季4.2%,見五年內新低,反之第二季CPI升幅卻達5.7%。一如中國經濟一樣,進入下行周期。今天富士康(2038)急跌24%,收5.84元,係2005年2月以來最大跌幅,今年恒指回落25%,富士康下跌67%。信和置業(083)亦下跌4.9%;新世界(017)跌6.2%。 滬深三百下跌5.48%,收2313.4;上海A股下跌5.33%、深圳A股下跌5.92%。中信證券跌8.7%、海通證券跌10%、潞安環能跌9.2%、山東黃金跌8.6%及中國神華跌5.2%。上周六中國證監會六條救市措施,周一開始實施,不但未能令股市止跌,反而擴大跌幅,創二十個月新低,近五百隻股份跌停板,98%股份下跌,上升股份只得三十五隻。 內地基建隨時減速 外需大幅度下滑引發中國經濟增速放緩,估計今年第一產業升幅只有3.5%,第二產業今年第一季較去年第一季下跌,主因受雪災影響;第二季逐步改善又受到煤電油運供應緊張瓶頸約束;第三季面對歐美訂單減少。甚至第三產業增幅亦只有10.6%,較去年低2個百分點。外需下滑及內需面對通脹壓力,無法大幅上升;未來如外需繼續下滑,依家政府大量投資基建項目亦需減速,以免搞到尾大不掉。因為投資基建項目目的,係為了加強出口競爭能力。如果出口增幅持續下滑,明年基建投資亦需減慢先得。 另一個令人擔心係由深圳開始樓按斷供潮暗湧,正向其他大城市擴散。家陣全國只有深圳及東莞樓價較去年8月高峰回落三分一,其他城市情況唔算嚴重。 國務院宣布,今年8月20日起焦炭出口暫定稅率由25%上升到40%;煉焦煤出口稅由5%上升到10%、煙煤出口稅10%、鋁合金出口暫定稅15%,擔心煤炭股及鋁股受壓。 浙江省政府8月17日宣布重大建設行動計劃,2010年起滬杭磁懸浮列車開始興建,滬杭客運專線明年開始興建,滬杭磁懸浮全長199.434公里;其中城際線(長三角區聯絡線)長164.577公里、上海機場聯絡線34.857公里,浙江段長103.553公里,設嘉興及杭州兩車站,總投資220億元人民幣,2014年建成,今年至2012年計劃完成投資65億元,今年開始沿線各市政府負責做好土地預留、規劃選址及環境評估前期工作。 內地食用油價一路下滑,本周每噸9400元,下調了40元(較月初已下跌2000元,跌幅達17.54%)。內地食用油市場已由去年供不應求到依家供過於求。 英國8月份樓價較一年前下跌4.8%,平均每個單位售229816英鎊,因缺乏借貸渠道,倫敦跌幅更達5.3%,將大大影響英國第三及第四季GDP增長率。 花旗推介和黃(013),估計今年每股盈利4.1元,較去年減少43%,P/E十七倍。目標價94元。 次按做教材 我地成日聽到對沖(Hedging)呢個字,但唔少人仲唔知對沖係乜,只知係同時買入及拋空某D股份;為增加大家對對沖認識,我老曹就以去年次按危機為例,解釋對沖運作。 去年8月次按危機出現,聯儲局為金融體系注入資金以免情況惡化;9月開始到今年4月聯儲局把美元利率由5.25厘降到2厘,面對上述情況身為對沖基金經理應該點做? 一、假設次按危機惡化,歐美銀行股同金融股股價必然大幅下跌。第一個做法自然係拋空歐美銀行股同金融股。假如次按危機冇估計中差,銀行股同金融股反因聯儲局減息而上升咁點辦?基於以上假設,去年9月對沖基金不但大量拋控歐美金融股同銀行股,同時買入了大量中國內地銀行股同金融股。理由係:甲、如果次按危機惡化,歐美金融股必首當其衝,內地金融股必係受影響最少者,跌幅自然唔及歐美金融股。如拋空歐美金融股,買入中國內地金融股,只要歐美金融股跌幅大過內地金融股已可賺大錢;乙、如果美國減息令全球金融股上升,唔受次按影響內地,金融股升幅一定較歐美金融股大。因此,對沖基金去年9月起便在歐美建立空倉,在香港建立好倉。此乃9及10月港股內地金融股突然大升理由。今年7月14日美國證監處立例禁止「裸空」至8月13日止,對沖基金被迫在呢段日子補回去年9月拋空美國金融股,同時拋售在香港上市內地金融股,面對巨大外資拋售內地金融股壓力加上「外資」大量流出(因平倉),造成7月15日港股下跌。上述對沖行動叫做跨境對沖,即同時拋空歐美金融股及吸納香港上市內地金融股,亦係最常見對沖行為。 二、次按危機出現,聯儲局減息必然引起美元匯價回落,商品價格上升。進取型基金經理去年9月大手拋空歐美金融股並將資金用作購買商品期貨(尤其係原油)。呢類對沖行為叫做跨行業對沖,但風險極大,因一旦睇錯市可以兩頭輸。如果睇對就左右逢源賺到笑,形成資金在去年9月由股市流向商品期貨。上述對沖行為亦因美國證監立法阻止無貨拋空而被迫平倉,形成歐美金融股股價急升,相反原材料價格尤其係期油就急跌。 去年9月對沖基金拋空歐美金融股,買入本港上市內地金融股;進取對沖基金拋空歐美金融股,呢D買入商品期貨行為,叫做建立長短倉。今年7月14日至8月13日受法例所限而平倉叫做Unwind。Unwind引發香港內地金融股、油價及商品價格受壓,而美元急升,相信Unwind到8月13日已完成,但唔代表對沖基金從此睇好歐美金融股(記住只係平倉)或睇淡內地金融股(都係平倉),更加唔代表睇淡商品期貨及睇好美元(兩者都係平倉)。進入本周,大部分對沖基金position應該係square(中文好難譯,意思係空倉及好倉皆唔多)。下一步點,則謀定而後動,估計全世界金融市場開始靜番落來;明白對沖行為後,可較了解近期一連串發生事,而唔係咩睇好美元、睇淡期貨等。 只在香港進行較小規模對沖行為,例如去年9月起拋空內房股,買入本港地產股。因為內地人行一再抽緊銀根及加息,內地房地產遲早下跌;去年9月起香港因追隨美元減息,香港房地產必上升。上周五內地官員講話及人民幣匯價連跌十一個交易天,睇來內地利率再上升機會唔高,內地銀行存款準備金率再上調機會唔大;反之香港卻有加息壓力。本周開始自然買番內房股,沽售本港地產股平倉。呢段日子內房股跌幅較本港地產股大好多,亦係賺到笑。上述係十分粗簡對沖行為,但一般散戶做唔到,因無法借貨拋空,但最低限度亦應該知道人地在度做緊乜,唔好一見買盤便以為睇好、一見沽盤便以為睇淡咁無知。 美元反彈好似玫瑰 上月美國新建房屋下跌9.9%,至九十九萬間,係十七年內最少;上月美國生產商價格指數估計升0.5%;今天期油回升1%,見114.95美元;芝加哥期貨市場估9月份美國加息機會只有14%,令金價升1.4%,見798.95美元;美元回升一如玫瑰(玫瑰雖美,卻長滿刺)。唔好太早肯定D乜野。 近期熱錢令越南經濟滑向危機邊緣。今年6月6日越南國家銀行發出通告指出,外匯自由市場只能買進外匯而不能將外匯賣畀個人,要賣只能賣畀國家,違規者嚴懲。令過去兩個月越南大部分外匯代理店生意蕭條,因只能同遊客買入外匯然後賣畀國家。越南股市曾一瀉千里、越南盾大幅貶值、通脹持續攀升及外貿逆差迅速擴大(越南股市由去年10月10日1110.78,回落到今年6月20日364.32,在國家加強管制後,局面總算穩定落來)。過去十年越南經濟保持年率7.5%增長,特別係去年更達到8.48%歷史性新高;加上政府在吸引外貿方面採取極為寬鬆及優惠政策,引致國際熱錢不斷咁增加,去年信貸升幅更高達53.8%。國內唔少大企業更將資金投入股市及房地產造成股市及樓價急升,今年熱錢飽食遠飛,引發了去年10月到今年6月下跌狂潮。6月6日政府推出一連串政策後,7月份通脹率較6月上升1.13%,係今年內最低升幅,總理阮晉勇要求加大宏調令明年CPI升幅回落番7%到8%之間,到時經濟下滑危機先算受控制。 中韓均有熱錢流走 南韓經濟亦面臨股市低迷、韓圜匯率下跌及通脹壓力加大;南韓又一次面對海外熱錢大規模加速撤離。7月共賣出6.2萬億韓圜(61.1億美元)股票及2.7萬億韓圜(26.6億美元)短期債券,韓圜兌美元下跌7.7%。8月4日政府大量拋售美元支持本國貨幣(7月外匯儲備已連續四個月下滑至2475億美元,學者指出其中2000億美元短期必須償還外債,即係真正可用外匯只有500億美元)。面對國際資本市場1萬億美元對沖基金,擔心政府拋售美元行動支持唔到幾多日;雖然8月7日同時宣布加息到5.25厘。 7月16日1美元兌6.8128元人民幣,至今已回落到6.8649元人民幣,代表國際熱錢7月16日起亦從中國撤出,賺取升值利潤。中國政府擁有全球最多外匯,自然唔使擔心,加上中國政府在呢方面作出準備,尤其係汶川大地震後,已準備國際熱錢流出。只係樓市及股市因熱錢流出而雙雙低迷。國際熱錢好可能有了新投資戰場而結束在中國暴利之旅;從呢點睇,內地股市及樓市繼續有下調壓力。 北京奧運會正如火如荼咁進行;投資市場在度講奧運低谷效應。雖然我老曹已一再指出,北京奧運只係運動會同經濟無關,唔應該有奧運前效應亦唔應該有奧運後效應。1984年洛杉磯奧運、1988年漢城奧運、1992年西班牙巴塞隆拿奧運、1996年亞特蘭大奧運、2000年悉尼奧運及2004年雅典奧運都冇後奧運效應。 6月份中國電力消耗只上升8%,咁樣計中國GDP增長率放緩速度好快(中國電力消耗乘1.2係中國GDP增長率),隨著城市人收入升幅放緩及股市產生負財富效應,擔心今年第四季開始內地消費升幅亦減弱,令內地銀行股、電訊股及零售股前景蒙上陰影,但呢D皆同奧運後無關。 日本第二季GDP出現負2.4%增長。Nikko Citigroup分析員Kiichi Murachima估計,第三季GDP又回升令今年全年GDP上升0.8%;明年GDP上升0.6%。最快明年下半年日本GDP先有較穩定增長。呢種時好時壞GDP增長率係1990年後日本經濟特性,令日本經濟衰退淺而長。理由係日本原材料接近全部入口,加上境內消費力弱令日本產品無法加價,一旦原材料價格上升,企業純利便走下坡;原材料價格回落,企業純利又回升,形成日本經濟1990年起時好時壞。 [ 本帖最後由 羊仔 於 2008-8-19 09:58 編輯 ]


Share this:

TOP

中國經濟半冷半熱 2008年08月20日(星期三) 8月19日,周二。恒生指數下跌446.3,收20484.37,成交484.65億元。8月期指跌544點,收20355點;9月期指跌556點,收20281點。東亞銀行(023)跌3.9%、信置(083)跌5.3%及中國鋁業(2600)跌3.1%。 花旗推介長江基建(1038),估計今年每股獲利2.4元,升13%,P/E十四點七倍,目標價40.5元;亦推介平安保險(2318),估計今年每股獲利1.98元,減少24%,P/E二十一點七倍。 美國飲食業出事 今年7月15日的道指係未熊市「中途島」?美國經濟衰退在去年第四季已開始,明年年中前都好難結束;衰退結束前,上市公司純利只佔美國GDP 7%而唔係依家的14%。美國過去每年起屋量係一百四十五萬間,只有2003年至去年上升到每年二百萬間,較平均數高出30%,樓價每年上升20%,更連升六年,理由係2001年1月起開始減息。上一次樓價見頂係1988年,1989年出現信貸壓碎(credit crunch),令大量S&L(儲蓄及貸款機構)出問題,令1990及91年出現消費減少。呢次2006年7月樓價見頂,去年8月出現次按危機,今年下半年先開始出現消費減少,相信明年情況無法扭轉。美國儲蓄率已由今年第一季0.3%,上升到第二季2.6%,估計仲會上升。 美國方面調查顯示,38%消費者未來九十天會減少出外用膳,10%會增加。增加外出用膳費用者只佔5%,43%話會減少出外用膳消費,睇來美國飲食業正進入不景氣。 滬深三百升1.52%,收2348.47。招商銀行升3.2%、上海電力升10%漲停板,因高盛估計中國政府下月上調電價、粵電力亦升5%及華電國際升5.8%。 央行8月15日首次表態,建議畀民間借貸機構合法定位,推出放貸人條例,畀小額貸款公司及民間錢莊陽光化規範化,唔再係地下錢莊而係民間借貸組織。作為紓解中小企業及三農資金困難,打破商業銀行正規金融機構壟斷市場的格局,相信放貸人條例出台後,民間借貸利率將降低。個人小額擔保貸款由最高的二萬元提升到五萬元;小企業擔保貸款由最高的一百萬元提高到二百萬元,利率係人民銀行公布的貸款利率上浮三個百分點。小額擔保貸款政策由2002年開始,到今年5月全國發放小額擔保貸款175億元,中央及地方政府貼息19.37億元。相信放貸人條例出台後小額貸款需求可大幅增長。 美國爆發次按危機後雖然聯儲局大幅減息,美元大幅貶值但衰退仲陰魂不散。歐美日經濟紛紛出現GDP負增長,令世界經濟下行。對高度依賴外貿的中國,出現加入了WTO七年內出口增幅首次下滑,下半年到明年上半年將係中國最困難的時期。過去中國由出口、投資基建及消費三頭馬車而行,但真正拉動經濟仲係出口。依家危機係出口增長率放緩。中央政策已由「兩防」轉為「一保一控」:一、確保全年經濟仍能平穩增長(例如增加紡織品、服裝出口退稅及商業銀行信貸額);二、繼續控制物價過快上漲。估計第三季GDP升幅10.2%。中國經濟既要防止經濟滑坡出現,亦要防止通脹惡化。中國私人消費佔GDP 36%(唔似美國咁佔70.2%),可唔可以抵擋得住佔GDP 49%的出口及投資增長率下滑影響? 點刺激消費? 中國希望刺激內需,但每二十個成年人中只有一個有信用卡(唔係預付卡),點樣刺激消費?中國工業發展已面臨能源與供需缺口,石油2010年供需缺口一億二千萬至一億七千萬噸;天然氣及煤炭缺口三百億立方米及五億噸;另一方面,環境制約亦日益顯現,中國經濟增加值分別較美國、日本及德國低22.99%、22.12%及11.69%;加上產品缺乏知識產權及專利少,只憑工資夠平此一中國特有王牌。隨住沿海地區工資水平上升及熟練工人缺乏,此一優勢自2004年起已慢慢減少,但中國出口產品2004年後價格仍迅速下跌,製造業能給的利益已按年減少。因為科技創新能力弱、品牌建設不足、物流支持唔夠、基礎設施依然薄弱及缺乏熟練技工與營銷管理人才,到今年已危機四伏,中國製造業仲可以向前行幾遠? 以勞力士表為例,一隻已可賣2萬幾元;反之,中國自己的品牌機械表一隻只能賣200元。分別在邊?有時甚至唔係生產技術、產品款式甚至材料而係營銷能力;中國產品就係無法賣出好的價格!不但手表係咁,其他產品一樣係咁,永遠停留在薄利多銷的水平,中國產品幾時先能夠跳出呢個框框? 中國鐵路網絡計劃在2020年前增加一倍;超級公路增加75%;城市內道路增加66%;機場增加70%;港口增加280%。咁多基建項目上馬但出口增長率放緩,最後結果會點? 俄羅斯反對美國在東歐布防禦導彈,尤其在波蘭及捷克引入愛國者導彈系統,擺明係針對俄羅斯。呢次入侵格魯吉亞因佢的總統薩卡什維利首先派兵入侵欲脫離佢的南奧塞梯及申請加入北約。俄羅斯擺明唔畀面美國,目的係向波蘭及其他國家施壓。如果美國以保護歐洲為名到波蘭境內建立導彈防禦系統,歐洲局勢將好複雜。各位唔好忘記俄羅斯今天擁有2250億美元美國政府債券,如果在市場拋售……。 金價由今年3月17日1032.7美元,回落到8月15日772.98美元已完成前升幅50%調整,理論上進入支持區。至於可唔可以完成前升幅61.8%,即下試730美元?冇人知。技術上睇,金價在730至773美元之間重建基礎有機會進入黃金第二上升階段(第一階段係長達二十一年熊市結束,各國政府增加貨幣供應,孕育了黃金牛市)。值得注意係白金走在黃金之前,例如去年9月已創新高、今年2月見頂回落及7月已大幅下降,都走在金價之前,如白金價止跌回升,可重新睇好黃金。如果美沖指數升穿78點就另計。 油價又點睇?今年5至7月出現油價上升,而石油股下跌的現象,呢個係今年7月我老曹認為油價見頂的理由;踏入8月情況又對對相反,即油價下跌,而石油股牛皮。擔心108美元將係呢次油價的底,油價在度重建緊基礎! 1969年黑龍江珍寶島事件,中俄發生軍事衝突。基於敵人的敵人就係朋友理論,尼克遜總統1972年訪華,開始聯華抗蘇政策!1989年六四事件及蘇聯解體後上述政策先停止。1998年俄羅斯發生債務危機,美國提供援助令兩國關係又再轉為友好。呢次俄羅斯入侵格魯吉亞,未來美俄關會點發展?亦將影響美國同中國的關係。 夏日戀情太短暫 滬深A股由2005年11月16日847.49升上去年10月17日5891.72,調整61.8%係2774點,無論你點分析,內地已進入熊市。在熊市中有反彈,但在熊市完結前不宜入市。去年10月的Boom正改變成Bust,歐美日GDP有機會出現衰退(連續兩季GDP負增長),中國GDP絕對唔會出現負增長。不過,佢的GDP增長率如果由11%放緩到8%,對股市影響超過OECD國家GDP連續兩季負增長!道理好簡單,有錢人冇了1億元只會唔開心;中產階級冇了1000萬元便節衣縮食減少消費;中下階層家庭冇了100萬元已有人想自殺。 中國的問題係上萬間工廠面對破產威脅,可令接近一千萬工人失業;政府則拚命增加基建投資去令GDP保持增長。形成GDP保持高增長,股市卻狂瀉。中國同出口有關的行業佔全國GDP 49%已陷入不景氣,另外51%如基建及服務業等卻過熱。中國的問題係「半邊經濟過冷、半邊經濟過熱」,你話點搞? 7月15日至8月13日美國證監限制「裸空」,令道指由7月15日10827點升上8月11日11867點,升幅達9.6%。恒生指數受外國對沖基金平倉影響,只由7月16日20988點升上7月24日23369點,升幅達11.34%,呢個夏日戀情實在太短暫(只維持一星期)。 五窮六絕七翻身的7月只有一星期升市便玩完,由此可見博反彈幾難玩。香港由7月24日起及美國由8月11日起又再受制於熊市,至於香港有幾多人可以在7月16日至24日反彈中贏錢?聽講只得無線電視藝員葉翠翠。 全球股市資金變不足 去年10月股市進入Secular bear market,在熊市初期做bargain hunters代價往往係蝕多D。至於採用buy and hold策略的人就唔知家陣心情係點?在次按危機壓力下,全球六十五萬億美元的CDS(Credit Default Swapes)有幾多會出問題?專家估計數字高達15000億美元(至今已公布4865億美元),最終應引發通縮而唔係通脹。根據Trim Tabs Adviser的數字,去年8月次按危機至今年7月止共有1470億美元資金由股票基金流失,令全球股市由流動性過剩逐步走向資金不足。 道指完成7月15日至8月11日的反彈後,新一輪金融股拋售潮又再開始。房貸美及房利美繼續令人擔心。摩根士丹利8月5日已通知客戶暫停home-equity credit lines(即用住宅做抵押的客戶,唔可以再獲新的借貸),加上唔少大金融機構必須向客戶回購Auction Rate Securities。過去各大金融機構共出售3300億美元Auction Rate Securities,如果全部回購,大金融機構未來借貸能力又點? 7月16日《華爾街日報》「Heard on the street」專欄分析雷曼兄弟公司市值只得90億美元,去年12月賬面值232億美元(已加入6月份增資數字),市價只及賬面值39%,點解咁平?如果為公司1610億美元Level 2資產減值5%,再為413億美元Level 3資產減值25%,雷曼極有可能要撥備190億美元;咁樣一來雷曼資產淨值只得40億美元,依家市值90億元變成唔係平反而係賬面值一倍!今年7月15日起美國金融股反彈只係投資者仍以去年12月賬面值評估今天市值而以為平了,其實係貴。 投資就係在困難日子買入財政健康的公司,唔係在繁榮日子買入管理不善的公司。 各位認為今天美國房地產財政健康咩?各位認為美國金融業管理良好咩?7月15日起道指由10827.71開始的上升係平倉定係睇好呢?


Share this:

TOP

接管兩房利與弊 2008年8月21日 (星期四) 8月20日,周三。恒生指數升446.89,收20931.26,成交623.31億元;8月期指升513點,收20868點。9月期指升494點,收20775點。 滬深三百指數升7.85%,收2532.94。 花旗推介中國海外(688),估計今年每股獲利7角,升23.7%,P/E十六點二倍,目標價16.08元;和電國際(2332)估計今年每股獲利28仙,減少3.7%,P/E三十五點五倍,目標價13.35元;安徽皖通(995)估計今年每股獲利44.3仙人民幣,升34%,P/E十倍,目標價6.3元;希慎(014)估計今年每股獲利94仙,升11.3%,P/E二十三倍,目標價25.38元;嘉里建設(683)估計今年每股獲利2.22元,減少52.8%,P/E十五點八倍,目標價58.9元;騰訊控股(700)估計今年每股獲利1.348元,升48.5%,P/E四十二點五倍,目標價75元;中國石化(386)估計今年每股獲利40.9分人民幣,下跌37.2%,P/E十六點七倍,目標價11.28元。 美銀行去邊度借錢 今天係傳出港股直通車消息一周年。去年8月20日恒生指數由上周五(8月17日)收市20387點升上21595點收市,其後一直上升到10月30日的最高位31958點。呢個上升裂口終於在本周二補番;滬深三百指數今天大幅反彈,但仍處熊市,冇數據支持內地熊市已完成。相信恒指繼7月16日之後出現另一隻腳(熊市二期有好多隻腳)。有人認為股市開始進入熊三,我老曹認為有排都未到。熊市二期往往在你冇信心時反彈及充滿信心時回落,令你對自己的判斷力冇晒信心為止,家陣距離上述的日子仲遠。在熊市二期每次指數創新低係入貨訊號而唔係出貨訊號。作為投資者最需要係耐性,呢次次按危機所造成的傷害及復元期要較大部分人估計的長。 IMF前首席經濟學家羅戈夫認為,未來執笠的唔係中小型銀行而係一間大型銀行;根據Dealogic的資料,美國十大銀行在8月份到期債券270億美元、9月520億美元、10月230億美元、11月200億美元及12月860億美元。即8至12月美國十大銀行要應付的到期債券有2080億美元。上周美國各商業銀行每天同聯儲局借入177億美元。未來錢由邊度來? 中國依家有超過五萬個地產發展商,過去幾年透過大量貸款去買地;家陣寒冬已在深圳及東莞出現。有幾多個中小型地產商捱唔過呢次寒冬?五十年代香港亦有接近一萬個中小型地產發展商,1964年銀行擠提潮再加上1967年香港暴動,數目減少到過千。七十年代初期,上市地產公司數目過百間;經過1974年石油危機,以及1982年主權回歸危機後,本港地產發展業務已集中在十大地產發展商身上。今天生存落來的地產商就係當年過萬間公司遭淘汰後的強者。上述的淘汰賽正在中國開始,估計最終能壯大成為大企業的唔多。 政治上有D人物出現後改變對經濟大方向,例如1933年羅斯福的新經濟政策(New Deal)令美國經濟進入凱恩斯時代;戴卓爾夫人及列根總統又帶來供應學派;1978年鄧小平的改革開放政策改變對全球經濟面貌;其他好似卡達總統委任雪茄伏出任聯儲局主席亦治好對六十年代因越戰而引發的美國通脹,格蛇接手後蕭規曹隨直到2001年「九一一.慘劇」後,先放棄呢個政策令通脹率死灰復燃。 今年3月金價回落理由係今年上半年印度黃金入口減少47%,引發對一次較大的中期性調整。未來炒上理由相信在房利美及房貸美被接管而引發的信心危機。1968年前金價每盎斯35美元係受制於美國政府;同年3月大量兌現黃金,美國政府慢慢控制唔住金價。1974年12月黃金可以在美國境內自由買賣時,金價已係每盎斯200美元,然後又大幅回落到1976年8月的100美元。因為1975年起通脹率漸受控制;1976年8月到1980年1月金價再由100美元升上850美元共十二年。 2230億美元債券到期 2001年金價由252美元起步【圖】,到今年3月見1032美元,技術上睇最低可見735美元先完成調整。會唔會好似1976年8月到1980年1月咁狂升到850美元先完成整個牛市,即黃金牛市在2013年先結束,高位在2000美元,理由係美國政府的財赤變成收支赤字,外資必需每天吸納20億美元先至可以穩定美元匯價。 房利美有1200億美元債券在9月30日到期;房貸美有1030億美元債券在9月30日到期,兩房短期內要借到2230億美元支付上述的債券先可逃過被接管的命運。JP摩根資產管理日本公司計劃減持兩房債券。 周二房貸美優先股(票面5.57厘)成交15.3厘(6月30日成交7.77厘);房利美優先股(票面5.5厘)成交16.4厘,6月30日成交7.83厘。換言之,9月30日前兩房可能被接管。 鄧普頓資金管理公司主席Mark Mobius認為,商品只進入調整期,除非中國及印度陷入經濟衰退,商品牛市先死亡;否則遲早將商品價格推至新高。Royal London Asset Management分析員Robert Talut認為,未來五年供求雙方都好大,形成商品價格將大上大落,再唔係以前的直線上升。 中國每年有二千五百萬人口由農村搬向城市;每年有一千五百萬中國人進身中產階級。由農村搬向城市令收入上升三倍;每年新增一千五百萬中產人口令消費行業保持興旺。 四川災後重建未來三年需要三億七千萬公噸水泥,以及三千七百萬噸鋼鐵(去年中國全國出產水泥十三億三千萬噸,鋼鐵四億八千萬噸),費用大約一萬億元人民幣,地震移平對四川二千九百萬方米建築物,上述因素保證未來三年內地水泥廠及鋼鐵廠開足工。中國已成為全球最大資源需求國,佢支持住油價、鐵礦沙價、煤價、水泥價甚至銅價。如果由咁的角度睇,今年3月金價及7月油價回落可能只係大調整而唔係熊市開始。 難論未來商品價 從另一角度睇,1999年科網股市值佔美國所有上市公司總市值6%。科網股泡沫爆破卻可令美國股市一直跌到2002年10月;去年8月次按只佔美國證券化按揭貸款14%,爆破後威力會點?科網股令美股回落對兩年半,次按危機結果又會係點? 2006年第三季美國收支赤字係8440億美元(以年率計)相等於GDP 6%,即每天需34億美元資金淨流入才可抵銷。2006年第三季美國房地產改變方向,一年後引發次按危機。美國消費者自1994至去年連續十四年每年消費上升3.5%(反而收入每年只上升3.2%),令儲蓄率跌至零以下,係大蕭條後首次有咁長上升周期,理由係樓價上升及股市反覆上升。美國樓價2006年第三季及美股今年11月改變方向,而今年第二季起消費升幅放緩,呢個調整期又要幾耐? 商品價格今年7月見頂回落定係調整後再升?唔係依家下結論的日子,只好見步行步。 樓價隨時崩潰 美國周二公布,7月份新屋建造較一年前減少11%只有九十六萬五千間,獲批新合約減少17.7%只有九十三萬九千間。房利美再跌2.3%,收6.01美元;房貸美跌5%,收4.17美元;AIG跌5.9%,收20.32美元;雷曼兄弟跌13%,收13.07美元;零售股Saks跌8.3%,收10.29美元。美股新一輪跌市由8月11日開始,房利美及房貸美股價已下跌91%及92%,後者更係1989年以來最低。美國12萬億美元房貸中,42%由兩房擔保即5萬億美元;其中3萬億美元由美國大金融機構擁有;其餘外資擁有(包括中國政府)。兩房CDS利率較國債高3.3厘,即每1000萬美元負債每年要多付33萬美元利息,如果政府接管可令美元匯價受壓及金價又再上升;如果唔接管可引發美國樓價大崩潰。 Case-shiller房屋指數另一研究員Karl Case的資料,住宅投資如果佔GDP 5.5%便快見頂,少過GDP 3.5%便快見底。2006年美國人在住宅投資佔GDP 5.5%,今年第二季已下降到3.1%,Karl Case認同格蛇明年上半年美國樓價見底論。反之,Oppenheimer分析員Meredith Whitney接受CNBC訪問時話,未來買樓者需真正付20%首期,令唔少人失去做業主的資格;加上Countrywide唔再借錢畀人買樓,房利美及房貸美的樓按利率已升對唔少(雖然聯儲局減息3.25厘),去年銀行提供9000億美元做房貸,但今年只能提供1000億美元;所以佢認為樓價應進一步回落。 英國投資者拋空英國七大上市建房公司,例如Barratt Development、Persimmon、Boris Home及Redrow Plc等,金額達8.65億英鎊,相等於上述七間公司市值的19%,係未又有D過分睇淡? 今年7月英國二千個最大慈善基金捐款較去年7月前少對6.55億英鎊,只得88億英鎊。五分一英國人承認今年捐款唔及去年。


Share this:

TOP

聯儲局出術幫美股 2008年8月22日 (星期五) 8月21日,周四。恒生指數下跌539.2,收20392.06。成交557.36億元;8月期指下跌487點,收20381點。 東亞銀行(023)跌5.2%、中信銀行(998)跌2.6%、長江實業(001)跌2.8%、富士康(2038)跌11%及利豐(494)跌3.7%;新上市的南車(1766)較招股價升1.2%,收2.63元;電盈(008)跌4%,收4.8元。 滬深三百回落3.51%,收2443.98。萬科下跌5.2%,收7.07元、保利下跌5%,收14.31元、交通銀行、工商銀行及平安保險皆下跌;中信證券升3.7%及海通證券升4.7%,因市場猜測政府准佢地承銷非流通股。滬深兩市有八成七的股份下跌;五大救市傳聞又偃旗息鼓。 美國三十年固定利率樓按6.37厘,係六年內最高。去年8月開始財長保爾森努力壓低樓按利息,希望阻止樓價回落,但努力漸漸失敗。今天30萬美元樓按,月供1879美元(去年5月係1739美元),令申請樓按者減少34%。7月份銀行接管斷供樓為一年前的三倍。 2006年8月保爾森同布殊會面,力陳場外交易衍生工具遲早影響成個美國經濟。其後布殊請佢做財長,聯同證監會、期交監管機構及聯儲局去諗辦法阻止呢樣野出現,但已經太遲。次按危機在去年8月出現後一直在度惡化;今年7月11日房利美及房貸美股價已較高位回落75%,保爾森立即同總統開會,在7月13日宣布周一開始禁止「裸空」。政府利用拋空者平倉支持股市上升去購買時間;美股果然由7月15日起至8月11日上升,但對兩房股價幫助唔大。股價由7月11日低位反彈後,近日又再急跌;雖然保爾森一再強調兩房唔使被接管,但最後結果會係點? 保爾森救唔救到火? 保爾森為了做財長,賣了所持的三百二十三萬股高盛收番5億美元而獲免稅優惠(上述法例的目的係吸引有錢人出任公職),其後再賣埋高盛基金(持有香港上市工商銀行〔1398〕)再收番2500萬美元。佢在任內成功游說中國加快人民幣升值。最終決定佢做財長成敗仲係房利美及房貸美係未可以逃過被政府接管的命運?今年9月30日更係重要時刻,佢可唔可以在四十日內諗出妥善方法?你問我,我問邊個。保森爾雖然係最佳救火隊長,但次按危機呢場火可唔可以撲熄定係愈燒愈旺冇得救?非我等平凡之輩今天能預知。 花旗推介中國中鐵(390),估計今年每股獲利20.5仙,升143.2%,P/E二十四點九倍,目標價7.2元;中國電信(728)估計今年每股獲利27仙,減少10.3%,P/E十二點九倍,目標價4.4元。 美股夏日戀情早在8月11日結束,港股則更短,在7月25日已結束,然後進入熊的歲月。恒指已創今年新低,依家爭拗係金價可唔可以在今年3月見頂及油價係未今年7月見頂?高盛估計美國CPI在8月見頂(5.5%),9月回落到5.4%。 房利美股價跌25.6%,見4.47美元,係1981年10月以來最差;房貸美一度見2.84美元,收市報3.27美元,跌21.6%,情況繼續惡化。美國樓按信貸已陷入一片混亂,情況係第二次世界大戰結束後最差。在長實業績公布時有記者問李實發,次按危機幾時完?佢冇答呢個問題,次按危機要結束後我地先知佢完了,但有D名人名句值得思考。 去年8月次按危機出現時,索羅斯曾說:“The growth of securitization has truly altered the global economy.One negative consequence is that financial markets are starting to shape the destiny of the real economy,not the other way around.佢即係話債務證券化徹底改變了全球經濟,依家負面因素係金融市場開始塑造真實經濟而唔係服務真實經濟。家陣真實經濟已被金融市場牽住鼻子走而唔係反映投資者對前景展望。近期索羅斯又點睇,佢在7月時話:“Credit conditions have been relaxed to such an extent that I wonder how they could be relaxed any further.意思係1982至2007年信貸市場咁寬鬆,佢感到疑慮因為呢個市場到底可以再寬鬆幾多? 索羅斯認為1982年至去年世界經濟繁榮建基在信貸逐步寬鬆,依家已咁寬鬆,未來點進一步寬鬆?如果信貸唔可以再寬鬆落去,經濟點樣可以再增長落去? 今年起我地面對的係一個過度發展(overdevelop)環境,進入一個需求不足(Under demand)的社會。前景展望好似2006年美林分析員David Rosenberg話齋,樓市見頂時所寫The Elusive Bottom(唔知個底在邊)時段,超過五年過度建造(2003至去年),每年二百萬個單位而唔係過去平均每年一百四十五萬個後,那底在邊?過去美國每二十五年樓價先升一倍,2002到06年五年內美國樓價卻升了125%。你信唔信明年第一季樓價便可見底?格蛇請勿胡言亂語。近日CDO市值有如斷線紙鳶,歐美經濟正陷入九十年代日本的情況。即次按先行,然後係樓按(樓價跌幅大於20%),然後係整個金融體系;唔好以為問題止於次按(Sub prime),JP摩根CEO Jamie Dimon認為「Prime looks terrible!」,今天連主按亦好恐怖。 美國證監會希望再用停止「裸空」去阻止美股下跌。唔好意思證監先生,空倉客已在7月15日至8月13日完成平倉;再立例停止「裸空」,因為市場內已極少人「裸空」唔可以再挾空倉了。I.O.U.S.A.本周四在美國四百個大城市同時上演,由畢非德、Pete Peterson、Dave Walker、William Nickanen及Bill Novelli等在影片中話畀美國人知,家陣美國經濟情況係點壞,佢地必需醒醒,唔好再醉生夢死,以為借錢消費可以發達。 受摩根大通龔方雄報告刺激,上證綜指前天上升7.63%,但今天又跌番落來。中央政府年初講明未來五年GDP增長率目標係8%,依家係10.4%,會唔會咁快刺激經濟?人行話明今年通脹率目標係4%,依家仲係6.5%,會唔會咁快放寬銀根?大行報告可信性係點?各位不妨睇睇: 一、今年年初各大行對今年股市點睇?8月止各大行睇法同實際情況有冇出入? 二、大行推介的股份同恒生指數比較,情況係點?到底跑贏大市定係跑輸大市? 三、有幾多次大行的假設,事後證明係錯的? 四、大行有冇因應局勢改變而改變自己的策略?定係一本通書睇到老? 五、大行有冇叫客戶行使止蝕紀律,或反而叫客戶溝落? 六、大行自己股價表現係點?連大行股價表現亦較大市差,點解佢地畀的意見可以毫不考慮就信? 我老曹無意貶低大行報告,只係話畀大家知,Your opinion is as good as mine,對大行一樣有效。 格羅斯(美國債券大王)管理1300億美元資產的Total Return Fund擔心受樓市影響下,美國今年第四季及明年第一季GDP出現負增長(即係確認衰退)。 唔識就唔好投資 哈佛大學350億美元捐獻基金(Endowment Fund)今年上半年升值9%。家陣呢隻基金17%投資商品包括森林。今年美國九十個捐獻基金中只有20%仲有錢賺,平均係蝕3.1%。哈佛今年仲賺9%(過去十年每年平均賺15%)認真好野。證明了出色者無論投資市況係點,表現都係出色。 好多人以為富貴險中求。五十年代後期至1969年呢十三年內,股聖畢非德同別人合作投資,平均每年增值30%。到1969年因為再搵唔到值得投資的項目,所以決定結束呢個partnership而將D錢分了。佢自己分到2500萬美元,之後收購一間上市紡織廠巴郡再將佢變成自己的旗艦。股聖一生投資的格言係Selling risk and complexity,buying caution and Simplicity。佢從來唔從事高風險及複雜的投資項目,只係小心謹慎咁揀項目,愈簡單愈好。 有人問股聖咩野係風險?佢的回答係風險就係做緊D自己都唔識的野(Risk comes from not knowing what you're doing!)。去年的Accumulator文件一大疊,我老曹曾花了兩個鐘都睇唔明(可能我老曹知識水平差),所以決定唔玩,部分朋友卻唔睇就簽個名落去;今年佢地話畀我老曹知蝕了過千萬元(部分蝕得仲勁),問我老曹有冇方法解救?我老曹連Accumulator係乜都唔識又點有資格教人!好似那D CDS亦係極之複雜的野,至於有幾多銀行職員真係識,我老曹唔知,只有恒生銀行(011)的柯清輝最坦白,佢話唔識就唔好玩。 投資唔係冒風險而係小心謹慎;複雜項目如果自己都唔識就唔好玩,因為賺錢其實好簡單。貪心同士刁拔只係一線之隔。點解你會做士刁拔的事?理由係貪心,世上冇真正士刁拔的人只有貪心的人。例如利用過度槓桿希望一朝發達或過度借貸希望maximization returns者。不過,去年10月開始全球去槓桿化及減少借貸,令衍生市場成交額下降,大金融機構唔夠營業額;去年10月起我地已由貪心的年代進入小心的年代。 通脹將見頂 油價由7月份回落25%;金價由3月份1032美元回落超過20%。相信可見的將來通脹率將見頂,我地面對的世界,將唔係滯漲而係GDP停滯不前。唔係商品價格提高而係滯銷;PNC Financial Services首席經濟學家Stuart Hoffman認為,今年7月份美國CPI好差,但距離見頂的日子唔遠!兩房救援問題、雷曼兄弟及其他金融機構財政狀況則好令人擔憂。在房市泡沫爆破及次按危機下,未來經濟唔係滯脹而係停滯不前。我老曹愈來愈擔心歐美進入九十年代的日式經濟。 中學時期物理學老師都會出呢條難題畀大家:浴缸容量六十加侖已裝滿水,水由水喉以每分鐘「X」加侖速度注入,但同時以「Y」速度流走。請問要幾多時間浴缸的水先至全部流走?我老曹曾認為出此問題的人一定係白癡,點解一方面開水喉、一方面又畀D水流走?關了水喉唔係水流走得更快咩?今天發覺貝南奇同我地正在度玩緊呢個遊戲。因股價由P/E決定,A股市價幾多?以每股賺1元,P/E十倍計,市價10元。如A公司純利每年以20%速度上升,同樣今年賺1元,我地願意畀20元購買,理由係A公司增長率(G)高。今年A公司受環境影響純利只上升10%,即由每股賺1元上升到每股賺1.1元,A股股價便由去年20元跌至今年11元(因今年我地只願畀十倍P/E去購買低增長率的股份)。換言之,一旦A公司純利升幅由去年20%下降到今年10%,A股價便由20元跌至11元,下跌45%。呢個就係經濟增長率放緩的代價。 決定幾多倍P/E,除了G外,便係R(利率)。例如中國GDP增長率由11%下降到未來8.5%。假設純利升幅由去年20%下降到今年10%,理論上股價要跌番45%(由二十倍P/E下降到十倍P/E),如利率同時由5.25厘降至2厘,跌幅61.9%,利率因素又令今年P/E向上(因10萬元放在銀行每年過去收息5250元,你的投資欲自然下降,今年10萬元放在銀行每年只收息2000元,你的投資欲自然上升)。如利率下降61.9%,理論上可將P/E倍數推高31%。今年利率降至2厘後,每股純利1元,公司雖然純利上升10%,你唔會只畀十倍P/E而係十三點一倍P/E。今年股價唔係由20元回落到11元,而係只回落到14.4元。雖然純利升幅放緩同時利率下降,低增長率壓力部分被抵銷了。 功效已見底 美國企業40%純利來自美國以外的地區,利率下降令美元匯價下跌,令40%來自美國以外地區的純利因此上升多20%。令今年純利升幅唔係由20%降至10%,而係由20%降至14%(因來自海外地區純利因美元下跌而上升)。咁樣P/E只由二十倍降至十四倍,因每股盈利由1元上升到1.14元,令股價只由20元回落到15.96元。再加上利率因素,今年股價甚至可以見20.75元,即與去年高價接近。 換言之,當企業純利升幅下降,聯儲局透過減息令美元匯價回落;兩大因素可令股市唔跌(除非純利增長率唔係由20%降至10%,而出現負增長,先可令股市下跌。例如1974年美國企業純利下降40%,雖然利率大幅下降,但P/E仍由1973年十四倍回落到1974年12月六倍,因企業純利出現負增長,引至美股1974年大跌)。 今年透過減息及美元匯價下跌,而令美股P/E仍可企在十五、十六倍之間(一如浴缸水流失之時,你無法阻止水流失便放水入浴缸。雖然流入速度唔及流走速度,但可延遲浴缸冇水時間)。 去年9月至今年4月透過減息及美元匯價回落,令美股P/E只由去年二十二倍只下降到十五、十六倍。如明年經濟復甦企業純利升幅回升,更冇問題。點解今年5月起股市又再跌?因為擔心明年經濟同今年一樣,企業純利只上升10%。明年冇減息及美元匯價回落因素支持,美股P/E將由家陣十六倍下調到明年十倍的話,未來美股便有25%以上下跌空間。 上述原理亦係滬深A股跌幅咁大的理由。A股去年純利升幅達50%,令P/E達四十五倍。今年純利升幅降至20%,令P/E由去年10月四十五倍降至目前二十倍。即去年每股賺1元的公司每股可以值45元(P/E四十五倍),今年每股賺1.2元就只值32元,跌幅只應該係28.8%,但同期利率上升及人民幣匯價升值;結果令跌幅擴大到60%。如明年純利升幅連20%都冇,令P/E由目前二十倍走向十倍的話,除非明年中國大幅減息去抵銷上述壓力,唔係A股下調壓力仲好大。 依家利率上升不但只有金磚四國,仲有中東、南韓及拉丁美洲等,即大部分新興國家仲未成功控制通脹率。呢D國家不但需面對美國及歐洲經濟增長放緩,同時亦面對國內通脹壓力,即貨幣面對外升內貶的問題(人民幣兌美元升值,在國內購買力卻下降)。形成了新興國家股市跌幅反較OECD國家大。 [ 本帖最後由 羊仔 於 2008-8-23 09:39 編輯 ]


Share this:

TOP

小心非理性悲觀 2008年8月23日 (星期六) 8月22日,周五。滬深三百指數跌1.6%,收2404.93;兩市總成交539億元人民幣,較周四銳減30%。中國鐵建及興業銀行跌幅都超過4%,東航、國航、南航受油價上升影響,股價下調。媒體報道,「二次發售」細則仍在研究中,學界認為「二次發售」同大宗交易市場相類似,只係換湯不換藥,不能解決「大小非」解禁限售股套現的預期,對整個市場大大利淡。 工行純利三年倍增唔容易 工行董事長姜建清2005年上任,今年上半年工行獲利上升57%,達645億元人民幣,已超過匯控(005),成為全球最賺錢的銀行,認真了不起,上任三年已令工商銀行純利倍增(工行唔係銀行仔,咁大間銀行純利上升一倍並唔容易)。請記住,在惡劣環境下吸納優質企業乃投資成功之道。中國加油! 日本央行22日公布7月份貨幣政策會議記錄顯示,日本經濟正面臨GDP增速放緩及通脹上升的雙重風險。今年第二季GDP較第一季下降0.6%,較去年同期下降2.4%;7月份CPI上升7.1%,創下1981年1月以來最大升幅。 花旗集團CEO到上海為當地花旗零售網點揭幕時表示,次按危機不但影響美國,而且更蔓延到全球。 英國第二季GDP同第一季比較維持不變,較去年第二季比較只升0.2%。CPI過去四個月平均升幅4.4%,超過政府目標2%一倍。英國經濟正式進入滯脹期(GDP停滯不前,CPI繼續上升)。 我老曹1967年剛在社會做事,已發夢做百萬富翁。今天如果只有100萬元,存入銀行收1.5厘,即每日開支只有41元,點樣生活?1967年一盎斯黃金35美元,即今天的841美元;今天100萬元購買力只相等於1967年的41600元!呢個係幾得人驚的事實。 去年8月20日港股直通車傳聞,令恒生指數在十星期內上升55%,然後再用十個月時間將上述升幅抹掉,我地又再重返恒指20000點水平。假設冇直通車傳聞,今天恒指合理水平就係20000點。上述傳聞令投資者出現非理性亢奮後,理論上亦會引發非理性悲觀,各位宜小心。 去年8月美國次按危機爆發,一年後今天次按危機不但未受控制,反而在擴散,今年8月客觀形勢較去年8月更差。面對房利美及房貸美股價大幅下跌,兩房作擔保的52000億美元房貸債券點樣處理?7月30日保爾森已獲國會授權可購買兩房所發的債券,去增強投資者對兩房的信心,估計短期內保爾森會運用此權力,協助兩房解決9月30日2000多億美元債券到期的問題,藉此逃避被接管的命運。美國大選之後,將由新總統決定兩房的命運。 奧巴馬開始提出佢競選總統的政綱。佢希望將資本增值稅由依家15%提升到28%;佢唔希望延長2001至03年殊仔的減稅方案(2010年到期),並取消10.2萬美元FICA收入上限,即年收入10.2萬美元的美國人日後要多付7%稅,以及取消殊仔的股息稅減免措施……。換言之,奧巴馬如上台及實施佢的政綱,未來四年美國政府稅收可增加8500億美元,再加上提升最低工資法案對中小企業的打擊……。美國老左派思想抬頭去改變貧富懸殊情況,絕對不利投資者。 自古至今有兩大想法:一、左傾者認為透過政府向富人抽稅、補貼窮人,去減少貧富懸殊(所謂不患寡而患不均);二、右傾者認為透過減稅、鼓勵投資,讓富人創造更多財富,財富多了,人人分享到那份財富都增大了,雖然貧富差距大了,但窮人生活仍較以前好過。過去前者叫社會主義,後者叫資本主義,到今天已很難真正劃分。前者著重公平分配,後者著重創造財富。 隨著全球20�80兩極化,世界思潮似乎重返公平分配的機會愈來愈大。 1990年9月11日老殊出兵中東,將伊拉克軍隊從科威特境內趕走時在國會發表演說。佢強調一個「新世界」正在誕生——“A world where the rule of law supplants the rule of the jungle.A world in which nations recognize the shared responsibility for freedom and justice.A world where the strong respects the rights of the weak!我老曹在電視機前曾為佢呢篇演詞鼓掌!上述正是中國人的尚武精神。「武」者「止戈」也,打仗目的就係為了停止戰爭;執行「法治」、對抗「森林法則」、阻止弱肉強食。打仗目的就係為了自由與公義,令強者尊重弱者的權利。 全人類重回森林法則時代 可惜2001年「九.一一慘劇」之後,殊仔派兵入侵阿富汗、攻打伊拉克,完全違背上述精神。今天俄羅斯亦以強凌弱,世界再次重返「森林法則」時代。2001年9月11日拉登炸毀的唔係美國人的Twin Tower,而係美國人「為自由而戰、為公義而戰、為阻止強者欺負弱者而戰」的信念。今年8月的俄羅斯只係步美國政府的後塵,以壓倒性軍力入侵格魯吉亞,將全人類重新推回森林法則時代——即強者為王。 1978年由鄧小平開始改革開放政策,加上鐵娘子及列根領導下,全球開創了New World Order,所有國家都參與(少數例外係北韓及古巴),共建一個自由及公義世界,呢個世界係奉行法治而非強者為王)。但呢個環境只維持二十年光景;踏入二十一世紀拉登有如《黑夜之神》戲中的小丑,炸毀了美國的信念,令美國呢個自以為是蝙蝠俠露出人性弱點,以壓倒性軍力攻打阿富汗同伊拉克報復。到今年8月俄羅斯又向全球顯示強者為王的森林法則,甚至北約、美國都莫奈之何。 1978至2001年9月係人類歷史上短暫的光輝,抑或2001年9月至2008年8月係舊世界的反擊戰?未來世界到底係自由與公義的法治,抑或係強者為王的森林法則時代?我老曹實在木宰羊。但金價2001年9月開始復甦,今年8月進入上升第二波還是技術反彈?倫敦ETF上周持金量回升到一百八十萬盎斯,代表金價一旦低於800美元一盎斯便見需求回升。我老曹建議大家可逢低吸納,但見高莫追(金價上升反映人類對未來的恐懼,加上巴基斯坦家陣的局勢,可能再次觸發印度人買金)。 紐約大學經濟系教授Nouriel Roubini認為,美國樓市正進一步惡化,最終可令美國過萬間地區性銀行其中三分一(超過三千間)出事,因為仍有1萬億美元呆壞賬仍未曝光。美國銀行在今年7月份共接管七萬七千二百九十五間住宅,較2005年1月增加184%(2005年1月係美國最少住宅被接管的月份)。住宅銷售更跌至十年新低,依家樓價較去年7月再跌7.6%,由223500美元跌至206500美元;銀行次按撥備已達5100億美元。哈佛大學教授估計,將有一間大型美國銀行在短期內倒閉。 1992至2007年美國CPI平均升幅2.6%,今年7月升幅5.6%;PPI升幅更達9.8%,估計8月CPI仍進一步上升。7月份失業率5.7%係四年新高。去年第四季GDP出現負增長,估計今年第四季及明年第一季GDP亦係負增長,即係官式衰退。有人告訴我老曹,如果佢行路似隻鴨、叫聲似隻鴨,咁佢應該係隻鴨,唔使「官方」公布!對投資者而言,衰退早在2007年11月開始,只係等官方承認而已。 任何事物皆相對性 牛市充滿樂觀,熊市充滿憂愁,此乃無可改變的現實。當年阿虫請食飯,共同研究點樣振興香港經濟,席間我老曹曾話「港人有咁耐風流,有咁耐折墮!」點知阿虫在公開場合亦口沒遮攔,結果畀市民臭罵。我老曹從此唔敢再講呢句話。 只係任何事物皆為相對性而非絕對性,1997至2003年的憂愁,帶來2003到07年的歡樂,2007年11月又開始哀愁的日子。 今天已冇人同我老曹爭拗係未熊市,大部分人都認同香港股市已進入一個Secular bear market,雖然有反彈卻冇上升。在熊市中賺錢如逆水行舟,我老曹一向主張在熊市中宜持盈保泰,至於博反彈最好留畀專家,如自己技癢,最多只動用全部資金30%。 跌穿前低點唔代表熊三來臨 美股由7月15日至8月11日的夏日戀情結束(香港的夏日戀情更短,只有一星期,7月15日開始,7月22日已結束)。隨之而來的係三次打風,吹到本港投資者人仰馬翻。至於金屬及能源超級牛市係未已在今年3月及7月結束,抑或維持十三年,有待下回分解,今年港股贏家係那D肯Sell in May and go away者。熊市第一期由2007年10月30日31958點開始至2008年3月18日20572點結束,跌幅35.62%。熊市二期中最大一次反彈係5月5日26387點,然後進入漫長熊市二期下跌浪(一浪低於一浪)。最近跌穿3月18日低點20572點,唔代表熊三來臨,只代表熊市二期浪頂係5月5日26387點,在可見將來恒指再無法升穿26387點。熊市二期變幻莫測,除了出現最大一次反彈(3月18日至5月5日)有一定可預測性外,其餘波浪再無法預測了。呢段日子,我老曹通常行使「忍」字訣。 美國由1982到2007年長達二十五年的財富創造期係未到了告別篇,一如1997年7月香港?當年我老曹撫心自問,過去三十年由只有5000元身家的窮小子變成今天的小富,到底係自己努力的成果,還是時勢造英雄?當年我老曹曾提出「黃金三十年」論,但有幾多人聽得入耳(不然亦唔會有咁多家庭陷入負資產的深淵)。我老曹認為,「三分努力、七分天意」,1968年如非誤打瞎撞入了股票呢個行業,又如非父親早死令自己陷入少年窮,1967年可能已去了加拿大讀大學。1969年如非自己冇錢拍拖希望寫稿賺外快,便唔會認識山木兄…。1997年如非面對人生交叉點,而作出投資倫敦的決定,便逃唔過一劫,2000年又何來資金投資黃金、資源股及其他?2007年9月面對港股直通車的消息又再出現困惑,四大銀行點解只有中國銀行有份?全國咁多大城市點解只係天津?中央政府點樣控制內地資金淨流出?港股直通車壓力下,A股豈不是將大跌?再加上美國次按危機爆發,我老曹便決定「三七」分(即70%改持現金,只留30%股票)。到底係另一次幸運抑或係分析時勢的眼光?我老曹亦搞唔清楚。今天的擔憂(二十五年美國財富創造期結束),係未杞人憂天? 成為「策略投資者」 1997年起我老曹已放棄價值投資法(Value Investing),理由係咁多大行研究,自己仲有乜真知灼見?因此唔再相信Buy and hold策略。其後漸漸相信動力投資法(Momentum Investing),背後理念係相對強勢(Relative Strength)便擇肥而食。當金價跑贏股市、當資源股跑贏大市時,只買強勢項目(外國叫牛眼投資法)。2006年6月起內地A股轉弱為強,便投資紅籌、國企;2007年10月內地A股轉強為弱,便放棄紅籌、國企。賺快錢唔賺慢錢,賺大錢唔賺小錢(Fast and big,not slow and small),賺錢速度太慢及太小,寧可唔賺。賺快錢及賺大錢的力量來自知識與分析,when to buy,what to buy,How much to risk,when to sell.(何時買入、買什麼、風險多大、何時沽出。)如今我老曹已成為「策略投資者」。 [ 本帖最後由 羊仔 於 2008-8-23 10:11 編輯 ]


Share this:

TOP

中國股民唔識過冬 2008年8月25日 (星期一) 8月24日,周日。上周房利美及房貸美跌幅達52%,因為市場認為由政府接管係鼻哥窿擔遮之事。 Byron R.Wien係Pequot Capital Management的主要投資策略員。佢1965年成為證券分析員,曾經係摩根士丹利主要策略員,2005年年底先加入家陣的公司。佢認為市場環球化後,投資策略應改變,仲話1945到1970年代,美國無論在經濟、政治及軍事上都係世界領袖;七十年代開始日本同西德冒起,令世界經濟漸變成三頭馬車;八十年代中國、跟住係印度同其後的金磚四國。日本成為最先進入GDP年增長率難超過3%的國家,之後係歐洲,家陣係美國;未來五年甚至十年,美國GDP增長率再難超過每年3%了。1982到2007年美國透過金融服務,帶來再膨脹時代,今年起取而代之係低增長、低P/E、低利率及較高通脹率;情況有D似1966至82年的美國。未來美國經濟甚至可能只係停滯不前,連通脹率都唔高,因經濟放緩最終令CPI增幅下降。估計後市油價在100至115美元上落;原材料價因中國及印度需求大而無法大跌,進入了高價牛皮。美國因次按危機令消費需求下降,經濟停滯不前,結果係好又好唔到去邊、壞又壞唔到去邊,進入了Lazy(懶惰)、Hazy(迷惘)甚至有D Crazy(癲癲地)的時期。 貝南奇騙唔到人 7月美國房屋銷售跌至十年新低,可供出售新屋及二手樓共五百四十三萬五千間(6月份係五百三十九萬間),估計地產業衰退可伸展到明年,同期出現資金不足及借貸唔易,令樓按利率上升,加上薪金收入加幅有限,在可見將來認為樓價可上升係不切實際的諗法。今年3月新屋銷售五十二萬六千間,係1991年以來最低,估計8月份係五十二萬五千間;二手樓銷售估計係四百九十一萬間,好接近6月份的數據(十年低位);上月新屋建築較一年前少11%,係十七年內最低。 1997年7月之後,無論股票或物業市場,再唔係投資者的天堂,變成Rentier的遊樂場。股票市場或物業市場早已唔再存在投資者(Investors),取而代之的係贏家同輸家。贏家及輸家同投資者最大的分別係佢地都係冇耐性的人,令長線投資唔受歡迎(Buy and hold policy已行唔通),炒賣由中短線取代。例如1997年7至8月如果你唔減持股票及房地產,事後證明你係輸家。1998年年底前應重新投入科網股,然後在2000年減持;2003年年中又重新買入股票及房地產;去年10月股市見頂,今年第二季起樓價受壓。衍生產品、期指、期權及牛熊證充斥市場,早就令金融市場變成戰場。用的係聰明炸彈,即必須命中目標,以及在最短時間內將敵人殲滅,再唔係由士兵們寸土必爭。市場需要的投資策略再唔係點樣在三十年內致富,而係點樣在三、五年內發達(甚至三、五年亦好長,最好係三、五個月)。 2000年美國科網股泡沫爆煲後,格蛇利用過去二十年出任聯儲局主席所建立的威信,在2001年「九一一.慘劇」後首次唔遵守雪茄伏的戒條——即利率唔再高過CPI 2厘。初期大家睇唔清,2003年美國仍可以出現經濟復甦但CPI唔升的局面。格蛇知道騙人一時易、騙人一世難,由2004年6月起將利率逐步推高到2006年5.25厘,可惜貝南奇在去年9月到今年4月又將利率降至2厘。呢次大家唔再受騙,結果今年CPI大升及GDP增長率大跌。 美國政府好難頂 貝爾斯登事件後係兩房,聯儲局點樣應付呢個困局?過去唔少主權基金曾大量投資在有問題的金融機構上,點知愈買愈平;呢次連韓國發展銀行亦計劃入股雷曼兄弟,令雷曼兄弟上周五的股價止跌回升;道指亦上升。假設韓國發展銀行願意以雷曼賬面值50%收購,不但令雷曼上周五上升15%,收報15.78美元,因家陣市價只係雷曼賬面值37%(或真正淨值48%)。韓國銀行收購雷曼後,後者唔使被迫賤賣資產,對市場有利;雷曼貸款主要同樓按有關,係美國四大投資銀行中最細那間,至今股價由高位回落了80%。 股聖畢非德認為兩房Game Over,已冇絲毫投資價值,家陣仍能生存的理由係因為聯邦政府支持。佢過去曾係兩房大股東之一,2001年起開始減持。今天房利美股價較高峰時回落了95%(一年前市價70美元);房貸美股價亦回落了91%。房利美今天市值只得52億美元,房貸美就得20億美元。前者在三十年代由羅斯福總統下令成立,目的係協助振興經濟;後者在1970年成立,目的係協助美國經濟從越戰打擊中復甦。股聖最高峰時曾持住房貸美8.5%,但2001年起兩房的投資策略令佢感到不安。上周五房利美股價先跌10%後反彈,最終升3.09%,見5美元;房貸美再跌11.08%,見2.81美元。上周五穆 投資公司將兩房債券進一步降級,由A1降至Baa3,財政狀況由B減降至D+。兩房最終會唔會步Indy Mac後塵?甚至貝南奇亦承認金融風暴未過,因為樓價回落至今未見底。正常的情況下美國每年有八十萬個住房新買家,理由係結婚、離婚及子女長大等因素。2006年一年房地產交易量達七百萬間,其中二百萬間係新屋,可見情況係幾咁唔正常。2005至07年共有一千四百萬人買樓,其中一半左右樓價首期係利用另類方法支付,例如先買後畀錢或首兩年只畀利息,兩年後先正式供樓;估計其中三百五十萬人因無力供樓而放棄。未來點樣消化呢三百五十間房屋,甚至未來五年美國將新屋建築量降至每年八十萬間或以下(較2006年建屋量少50%)? 如兩房go under,5萬億美元房貸壓力將落在聯邦政府肩上;政府如果唔承擔,美國銀行業便遭殃,甚至FDIC亦頂不住。Institutional Risk Analytics(呢間公司責任係分析各銀行健康狀況)執行總裁Chris Whalen估計,今年8月到明年7月將有一百間銀行被接管,大部分係中小型,涉及總資產8500億美元。FDIC只有500億美元資金,接管Indy Mac已用了200億美元,日後接管8500億美元資產,需850億美元或以上資金(假設10%係呆壞賬),即FDIC需額外500億美元注資先可應付。新總統首要任務係向FDIC注資或取消對10萬美元存款保證。到時如果政府同時須為5萬億美元房貸作擔保,你話點頂?今天地區性銀行好似Key Corp、National City等發債,市場要求利率係12厘到15厘。甚至財政狀況良好的銀行好似摩根大通咁,最近佢發6億美元優先股,利率亦要8.75厘;富國銀行發16億美元優先股,利率8.85厘;雷曼兄弟11至13厘;美林11至12厘;摩根士丹利9至10厘;花旗9.5厘至10.5厘;兩房15厘。在高息壓力下,點樣發債集資?美國金融風暴不但未見平息,反而愈打愈大,一如上周的鸚鵡颱風,須由八號改掛九號風球。投資者們請振作起來,因為最困難的日子仲在前面! 金價低位見幾多? 上周五貝南奇為2厘利率辯護,佢認為7月份CPI升幅5.6%係短暫情況。上周本欄已解釋聯儲局點樣利用減息去支持股市平均P/E在十四至十五倍之間(如企業純利增長率再跌,家陣的P/E仍會下降)。 過去六年(2002至07年)美元匯價跌幅超過40%,係造成金價在今年3月升穿1000美元,以及油價今年7月見145美元的理由。如果美元止跌回升,可令金價、油價及CPI增長率回落。反之,如果美國CPI增長率保持在5%至7%水平,美元匯價將進一步回落及商品價又再狂升。未來油價每桶見80美元定係止跌回升?彭博訪問了二十九位分析員。其中十六位(佔55%)話會升;七位(佔24%)話變化唔大;其餘就睇跌。最後邊一個方向先對?我地不妨由另一角度去睇問題:通脹(唔係CPI)代表流通貨幣增加。1972至82年美國K上升87.6%及L上升141.5%;美元供應迅速增加,最終令CPI大升。過去十年美國K上升30.3%及L上升87.6%,升幅唔及1972至82年。美國收支赤字在2006年佔GDP 6.2%時最高,今年(美林估計)約5%,明年再減少至3.5%。即美國收支赤字佔GDP比重在下降中,而CPI係落後指數。換言之,貝南奇估計CPI短期見頂有一定數據支持,佢的發言上周五令油價跌了6美元,係2004年12月以來最大一天跌幅,10月期油見114.59美元;白金每盎斯跌17.6美元;小麥跌3.4%;銅價跌1.4%。至今為止未能肯定金價由今年3月及油價由今年7月回落,係調整市定係牛市結束。 金價曾由1974年12月200美元回落到1976年8月100美元,到1978年先重返200美元,然後在1980年1月見850美元。呢次金價由今年3月1030美元回落,最低可見幾多?775美元定係730美元,有人甚至話見641.5美元先完成調整,然後一如1976年8月至80年1月,進入黃金上升第二波。 《星期日電訊報》報道,中國人行入股英國保誠投資,成為二十五大機構投資者之一;同時購入Old Mutual(英國第三大保險公司)股份,睇來中國資金繼續走出去。 上周大行報告披露4000億元(人民幣.下同)救市計劃,相信係3700億元經濟刺激方案的誤傳;其中包括新增支出2200億元及減稅計劃1500億元。新增支出如社保支出450億元、農業460億元、科技教育380億元、公共建設350億元、國企補貼80億元、能源及大宗商品入口補貼280億元等。減稅計劃包括提高個人所得稅起點、出口退稅及中小企業退稅等。救市不如救經濟。1998年9月香港特區政府曾動用千億港元救股市,因巧遇俄羅斯危機美國減息,令港股止跌回升(同期新加坡政府並冇救市,但新加坡股市一樣上升。證明港股上升理由係美國減息而唔係特區政府救市)。其後香港經濟點?未一樣要衰到2003年上半年先復甦!政黨當年批評特區政府救市唔救人。2003年下半年香港經濟受惠於中央政府一連串振興香港經濟的方案,好似CEPA及自由行,加上2003年4月起美國經濟復甦。2003年下半年香港雖然冇救市計劃,但港股升完可以再升。 救經濟方向正確 中央政府呢次出招穩定經濟而唔救市,方向係正確(只要經濟好,股市遲早好。反之,經濟差,股市遲早跌)。作為政府,應救經濟唔係救市。中國證監會負責人表示小非解禁今年7月底止已達56%,未來利用積極方法協助大小非逐步變成全流動,同時對市場造成干擾愈少愈好。 去年10月滬深A股P/E點解咁高?係由供求唔平衡造成。去年10月A股股價唔係反映公司業績而係反映供應不足,情況好似1973年3月港股或1989年12月日股。隨著供應量上升,股價唔再反映供求因素而係公司業績因此大跌。1973年3月香港政府採取不干預政策,令恒指在二十二個月內跌幅91%;日本政府1990至2003年再三干預,但日股跌了十三年,跌幅80.5%。長痛定短痛好?香港選短痛,在二十二個月內畀股市跌個痛快;日本選長痛,就跌足十三年,至今股市仲死氣沉沉。滬深三百至今見回落十個月,跌幅達61%。你又點睇?!目前滬深三百平均P/E十七倍唔算貴,但同各國比較絕對唔平,即短期或有反彈,但相信未見底。 A股無論係二次發售機制或發行可換股債券交換,都唔可以解決大小非的問題,唯一作用係減慢市場下跌速度,卻無法保證市場持續上漲。至於經濟刺激方案又係遠水救唔到近火,短期A股下跌壓力仲好大。滬深三百肯定進入了隆冬,但大部分投資者卻冇心理準備過冬,唔少仍著住泳褲,咁點樣捱過呢個冬季?內地散戶仲未學曉止蝕唔止賺,更加唔識溝上唔溝落,在跌市初期不但未止蝕(例如跌15%要止蝕、跌20%便不用再問理由全止蝕)。在過去十個月跌市中甚至溝落;至於咩野係三七分,唔少內地散戶連聽都未聽過。 冬季過後一定係春回大地,只著泳褲的散戶們點樣捱過呢個寒冬?去年唔少人相信奧運效應而唔賣股票。今年8月8日奧運開幕,滬深三百卻由2719點回落到8月19日的2273點,跌幅達16.4%,上周五收報2404點。周日奧運閉幕後,周一滬深A股又點?大家最後會明白,奧運只係體育盛事,同股市關係唔大。 面對能源價格、原材料價格、人民幣匯價、工資及通脹率上升等多項不利因素,加上去年8月美國次按危機,中國經濟今年可能由快速增長進入增長減速的拐點,整體面對結構性調整,由出口導向轉為內需刺激。呢段青黃不接期需時幾耐?謝國忠估計未來十二個月出口佔中國GDP比重將一直下降。國家信息中心經濟預測部首席經濟師祝寶良認為,企業投資下半年增速會放緩,但政府投資下半年會加速,因為唔少大型基建上馬。 消費方面,耶魯大學管理學院金融經濟教授陳志武認為,如果要擴大內需,政府應學習美國政府退稅,同時削減增值稅及增加社會保障。 至於油價方面,未低於80美元前,對中國經濟幫助唔大,因為中國境內汽油售價仍低過80美元。奧運之後成品油價、電價及煤價加快同國際能源價格接軌,將令CPI居高不下。換言之,經濟春天肯定會來,但著泳褲的人有幾多個可以捱過寒冬又係另一回事。


Share this:

TOP

炒奧運幣苦過DD 2008年08月26日(星期二) 8月25日,周一。恒生指數升712.73,收21104.79;成交556.15億元,8月期指升809點,收21190點;9月期指升813點,收 21113點。過去出現的期指倒掛現象今天消失,恢復番正常情況,即期指較現貨略高(只能略高理由係因為9月有唔少股份派息除息,對期指持家不利)。 工商銀行(1398)升4.3%,收5.34元,里昂推介目標價6.25元;建行(939)升3.7%,報6.19元,因半年純利587億元人民幣;網通 (906)升4.2%,報21元;中遠太平洋(1199)升4.5%,報10.64元,因上半年利潤升11%;平安保險(2318)升4.9%,報 53.9元,外傳佢在度洽購廣州商業銀行;兗州煤業(1171)升5.7%,報12.34元,因上半年利潤升一點六倍。 油價下跌的真正原因 花旗推介和黃(013),估計今年每股獲利4.39元,較去年減少38.8%,P/E十六點一倍,目標價94元;亦推介長江實業(001),估計今年每股 獲利8.83元,減少9.1%,P/E十一點四倍,目標價13.7元;大連港(2880)估計今年每股獲利21仙,與去年接近,P/E十六倍,目標價 5.9元;上海電氣(2727)估計今年每股獲利25.1仙,升5.8%,P/E十點五倍,目標價4元;工商銀行估計今年每股獲利38.6仙,上升 58%,P/E十一點六倍,目標價6.3元;國壽(2628)半年純利下降31.9%,至158億元人民幣。 滬深三百指數微跌0.18%,收2400.55。因內地股市重挫,午後國壽、中國平安及工商銀行股價下挫;十七天的奧運結束了,2006年推出的奧運金銀 紀念幣更由奧運進入最後倒數時的每套30000元人民幣,下跌到最近16000元人民幣,第二批推出更跌至11000元人民幣,第三批市價10000元人 民幣。炒奧運金銀紀念幣者,家陣真係苦過DD。 港幣奧運紀念鈔亦由每張280元跌至138元,澳門幣奧運紀念鈔跌幅更由400元澳門幣跌到90元澳門幣。奧運人民幣紀念鈔跌幅最少只下跌30%,市價係每張1000元人民幣。情況有D似1997年香港回歸紀念金銀幣,香港回歸後亦跌到七個一皮。 炒奧運紀念幣者全部跌眼鏡,至於內地股市又點?期待中的奧運後效應周一未有現身。 近日印尼煤礦股股價大跌,例如Bumi Resources由去年6月至今回落36%(印尼係全球最大的煤出口國),係未代表煤價已見頂? 油價亦由7月份每桶147美元急跌,商品價格亦大幅回落,係未代表全球GDP由高增長期進入低增長期?根據Thomson Reuters估計,標普五百未來P/E只得十二點九倍(7月中一度見十一點六三倍),上述P/E只有1988年出現過(即股災後)。1968年至家陣過 去三十年美股平均P/E係十八點三五倍,點解美股近期P/E會咁低?上述低P/E過去只有在高利率期才出現,但今年4月起利率只得2厘,令人擔心依家低 P/E正正反映世界經濟陷入低增長期,呢個先係油價及原材料價格下跌的背後真正理由。 中國靠內需保GDP增長? 2002年開始回落的美元,踏入今年7月係未開始止跌回升?外匯專家認為,依家美元匯價最少偏低30%;1995至2001年美元亦曾經轉強。美國銀行分 析員認為,美元弱勢在今年7月結束,因美國人唔再向海外投資,反而將資金調回美國,全球資金正回流美國。英鎊見1.84美元係2006年7月以來最低;歐 羅見1.47美元(上周一度觸及六個月低位1.463美元)。股聖畢非德話佢過去雖然睇淡美元,但冇拋空美元,股聖一言令周一美元上升如虎添翼。 中國向世全界呈現最豪華的奧運會,令人有D奢侈感覺。相信呢個係任何國家(或人)脫貧後必有的心態(誇富心態),可以話在無可厚非。隨著國家(或人)漸漸 習慣富有,呢個心態自然收斂。1973年我老曹結婚擺酒時亦筵開七十席,家陣望番轉頭,連我老曹亦奇怪當年點解會咁戇居?依家出席人地的誇富宴時,間中亦 會由心裏面笑出來;人必須經一事、才長一智。 最豪華的奧運會結束後,又返番去經濟;中國未來經濟的確有D令人迷惘。由出口導向型經濟轉為內需,最成功係香港;只因八十年代巧遇中國改革開放政策,令香 港製造業成功轉入內地,香港經濟改為服務珠三角製造業為主;反觀台灣九十年代經濟轉型,至今仲未算成功。中國經濟最大王牌(廉價成本)慢慢冇埋,可唔可以 透過內需長期保持中國GDP 8%或以上高增長?依家中國已面對能源危機、資源短缺及熟練工人供應唔足,加上人民幣升值,歐美日等國家GDP陷入低增長期,中國出口增長率肯定進入拐 點,可唔可以利用內需去取代出口增長率,而達到長期GDP「保八」的目標? 貧富差距拉大 改革開放三十年,中國整體經濟富起來,卻先出現其他資本主義國家的貧富差距擴大問題;近年由胡錦濤提出三農政策目的係減少貧富間差距以免造成社會不安。 過去大家相信教育可以改變社會上貧富差距;第二次世界大戰後美國情況的確係咁,但到了1980年代的美國、1990年代的日本及1997年後的香港,教育 雖然愈來愈普及,但社會上貧富差距不但未見改善,反而係進一步惡化。根據哈佛大學Goldin及Katz研究,美國1947至70年代後期,教育普及令中 產階級冒起,各人的收入不平衡係減少了,但七十年代後期開始,收入差距又再拉闊;不但行業之間的差距拉闊,甚至同一行業好似律師咁,一流律師收入同一般律 師收入可以有天淵之別。就以1997至2001年為例,美國最高收入10%人口收入上升49%;反之,50%中產階級人口收入同期只上升13%。即財富同 收入愈來愈集中在最高收入10%的人口手中。 普及教育的確曾令社會人口人均收入普遍增加,例如美國今年(扣除通脹)人均收入係1900年的六倍。隨著普及教育完成,社會又返番去過去情況:即收入及財 富漸漸集中在10%人口手中。依家成為一個律師後,收入只係一般,除非你係十分出色的律師。依家成為股票分析員收入亦一般,除非你係一位好出色的分析員。 再睇中國的情況更令人擔心,因為中國未完成全民普及教育;即國民人均收入未全面提升前,卻一早出現了貧富差距兩極化。上述的情況過去在東南亞國家及拉丁美 洲亦出現,最終可引起社會不安。反而美國、日本及香港雖然亦貧富差距擴大,由於人均收入普遍已達一定水平,社會仍比較上安定。 小心駛得萬年船 今天在美國、日本及香港接受大學教育甚至碩士及博士,亦不能保證閣下可以成為高收入人士,隨非你係出類拔萃。美國最高收入10%人口收入升幅係大部分人收入升幅的三倍,咁樣落去10%最高收入人口同大部分人收入比較,差距自然愈來愈大,最終引發經濟不景氣。 去年係危機年(crisis),今年係投資者小心謹慎年(caution)。 Jeremy Grantham去年首先用慢動作火車相撞去形容次按危機;換言之,過去一年發生的事好似物理定律,例如火車司機企圖重新控制火車,其後因衝擊力令車卡一 個接一個互相碰撞甚至出軌。在經濟層面上,信貸突然收緊令銀行一間接一間出問題,然後阻礙經濟活動令企業純利增長放緩。情況就好似車卡,最先係後面一卡撞 上來;然後再後面一卡撞上後面一卡,然後再撞上來。每次碰撞後以為危機已過了,結果又有一卡撞上來令股市又再跌至低位。 去年第四季最先係美國GDP出現負增長,今年第二季出現GDP負增長係歐洲及日本,第三季極有可能係英國。 七十年代後期最先係鐵娘子結束了英國政府大量開支時代,令通脹率慢慢受控制;其後引入貨幣學派,令英國進入一段低通脹經濟擴展期,擔心隨住貝理雅首相下台 而結束。美國由雪茄伏出任聯儲局主席開始,八十年代列根出任總統解決美國滯脹問題,美國經濟重新恢復高增長。克仔任內再令美國赤字收窄,到殊仔上任利用財 赤,令美國經濟在2000年後繼續增長,但到了家陣已千瘡百孔。貝爾斯登出事後房利美及房貸美又面對壓力。7月15日起美國證監會禁止「裸空」令油價急 跌,以及KBW商業銀行指數回升37%(仍較去年高價低47%),下一步又係點?Resolution Investment Management Ltd.的Stuart Thomson認為,信貸壓碎(credit crunch)不但未過去而且在度惡化。高盛證券分析員Binit Patel認為,佔全球GDP一半國家已面對一場衰退,自貝爾斯登事件十年期債券息率由3.31厘升上3.87厘,估計年底見4厘,因各銀行都在度增持現 金;銀行與銀行間之互信好低。奧巴馬強調改變(change),明年起美國經濟肯定出現大改變,問題係變好定變壞?小心駛得萬年船,今年作為投資者請記住 呢句話。 世事改變速度實在快得驚人;去年10月經濟仲係過熱,今年未到9月已寒風陣陣,美國經濟面對三個頂頭風──樓市、信貸及高油價;大部分美國金融股去年至今跌幅由50%至90%。 中國、印度、巴西及俄羅斯合稱金磚四國,佢地每年可產生七千萬個中產階級人口(美國人口只有三億、歐盟略超過三億、日本一億二千八百萬),即全球中產階級 人口正以年率10%速度增加。正在度將全世界變成一個極大消費市場,上述仲未計東歐、中東及東南亞的中產階級人口亦在度湧現。可唔可以抵銷歐美日及英國的 經濟低增長期?1990年起日本GDP進入低增長期,並冇影響其他國家。今年起美國同歐洲GDP進入低增長期影響卻好大,因歐美係其他新興市場最大出口對 象,情況有D似1997年7月亞洲金融風暴,因美元轉強,削弱了亞洲地區出口競爭力一樣。 油價終於由7月18日的147美元回落,美國經濟三股頂頭風其中一股已減弱;至於信貸危機相信在9月底前兩房問題應有定案;最後只餘下樓市呢股頂頭風。最 終問題必須解決,作為投資者需要的係耐性,例如1982年9月中國政府宣布,在1997年7月收番香港主權、到1984年7月中英雙方簽訂聯合聲明,時間 上總共二十三個月。 1997年7月亞洲金融風暴到1998年9月東南亞亦開始解決,需時十四個月。 2000年3月科網股泡沫爆破到2002年10月納指止跌回升,需時三十一個月。 去年11月開始的次按危機,最終必須解決。問題係要幾耐,同埋點樣收科。 冬天來到,春天仲會遠咩?如大家已及時止蝕、冇溝落,唔係只著條泳褲過冬季,便可以耐心地等;可能係明年第一季,又可能再長一D,但春天一定會番來;反之,只有一條泳褲就凍死都未天光。


Share this:

TOP

發新話題