發新話題
打印

曹仁超 - 投資者日記

投資者日記 (21/06/2008) - 續 現階段投資事倍功半   近代思想係政府對經濟唔係唔干預,亦唔係管制,而係適當時刻作適當干預,去減少上下波幅。唔係一個完全自由市場,亦唔係一個全管制型市場,而係介乎兩者之間。干預目的係產生一個更好後果,而唔係影響經濟運行。情況就如有人入屋打劫,你係咪希望呢個時候警察及時趕到?而平常時間你當然唔希望警察你屋內行來行去。假設金融市場係你私人住宅、政府係警察,平時我地唔想警察行來行去,但有賊時候,我地又希望警察可即時出現。Minsky研究過去美股二百多年歷史,皆充滿Boom & Bust,聯儲局出現亦超過九十五年面對Boom & Bust,所發揮作用亦只係逐步改善中,努力減少波幅而已。   對美股已超過三十年經驗摩根士丹利亞洲區CEO羅奇認為,呢次滯脹亞洲區發生,並向全球輸出。1980年出入口佔全球GDP比重21%,2008年已佔全球GDP比重達32.5%;1980年來自亞洲區產品及服務遏抑OECD國家通脹,1983年起全球經濟繁榮。呢次CPI上升壓力主要新興國家,由於OECD國家更依賴入口貨,所以佢地同時接受輸入通脹。反之,亞洲及發展中國家正面臨七十年代OECD國家相同問題──即成本及工資推高產品價格。亞太區國家正陷入滯脹期,投資情緒進入低潮,再唔係2003年4月至07年10月段日子,投資係順水推舟,事半而功倍;去年11月起至今進入逆水行舟時段,所以事倍而功半。投資者好多時迷失方向,呢段日子油價上升,原材料價格上升亦未能推高石油股股價同原材料股股價,理由係信貸萎縮中及流動性減少中。仍能呢段日子賺錢投資者十中無一。   越南金融領域近期出現好多唔穩定現象,例如惡性通脹、股市大跌及越南盾貶值,情況好似1997年泰國,其後引發亞洲金融風暴。冇人認為中國會步越南後塵,中國不但人口十三億(越南八千四百萬),外貿有盈餘(越南赤字),更重要係中國外儲備已達17000億美元,人民幣在升值(越南盾在貶值)。但中國CPI升幅亦好大,人行正全面控制物價,而股市跌幅亦在擴大中。 外資好壞參半   越南今年通脹率22%至25%,要到2010年先至重返單位數,中國家CPI仲係單位數。值得警惕係去年8月美國次按危機發生後,美國、歐洲同日本都向銀行注資,初期資金向新興市場走(因美元貶值),然後又抽回番國內,一進一出好容易搞到亞洲國家金融市場動盪,甚至引發金融危機。至今為止,美國、歐洲同日本央行並冇抽緊銀根。因為無論美國、歐洲同日本CPI升幅仍唔算高,唔需急於抽緊銀根去對付,反而亞洲大部分國家卻要提高存款準備金率及加息去壓抑通脹,對股市及房地產造成不利影響。越南加息後仲係負利率,中國依家仲係負利率,咁代表可見將來銀根仲會再抽緊而唔係放鬆。   越南2006年加入WTO後,一下子將外資持有上市公司股票上限放寬到49%,形成外資大量湧入,加速越南發展速度,同時亦推高資產價格產生資產泡沫。2006年吸收FDI已達400億美元,去年越南GDP只有700億美元,點樣消化大量湧入外資?內需大幅上升自然搞到進口大增,造成巨大貿赤。外資唔係外儲備,冇健全監管體系下可以變成雙刃劍,有利亦有弊。 印度適時喊停   印度都有類似問題。去年10月印度政府宣布限制外資活動,令股市一度暴跌9.2%。印度證券交易委員會(SEBI)要求參與憑證方式持有印度股票海外投資者十八個月內清倉,原因係去年9月一個月內外資流入印度股市已達32億美元,係去年全年流入三分之一。如果唔阻止,印度股市短期可狂升然後暴跌。印度政府反應好快,去年10月已落限制令,睇2008到09年首季流入股市外資只有乖乖咁撤出印度股市。   中國對資本項目管制比較嚴格,例如外資只能投資B股,投資A股則採配額制度。唔似越南股市,2006年6月28日至07年3月12日越南VN指數暴漲五倍,市值由唔足10億美元猛增至150億美元。去年底開始大幅回落60%,可以話操之過急。2006年6月28日胡志明市證券交易中心開始交易時只得兩隻股票,到家已達一百五十多隻,另河內開設第二家證券交易所,上市企業只得二十多家,一下子O升破七十倍。   換言之,越南、印度及中國股市升降因素並唔相同,但產生後果卻接近。越南外貿赤字過分依賴外資流入去填補,一旦外資減少流入便出問題;印度政府係擔心股市被外資再炒上而先下手為強,逼使外資2008到09年第一季減持印度股票;中國股市升降純供求關係改變,近日中國股市已面對恐慌性拋售,出現十連陰後反彈一天又再跌。2007年首三季投資者爭先恐後地入市,?家又失去理智加入拋售行列。鐘擺理論內地上演(由一個極端走向另一個極端)。股市從來唔理性,合理估值從來冇股市內發生過,所以無從分析。後市展望?直到恐慌性拋售完畢後為止。


Share this:

TOP

投資者日記 (24/06/2008) - 美熊未完 6月23日,周一。恒生指數跌30.64,收22714.96;成交596.8億元。6月期指低水,跌50點,收22660點。中國鋁業(2600)跌5.7%,收9.73元。洛陽鉬業(3993)跌8.3%,收7.08元,大摩降低其評級。長城汽車(2333)跌6.9%,見5.65元。 航油提價航空股雪上加霜   花旗推介中化化肥(297),估計今年每股獲利32仙,升48.5%,O十八點二倍,目標價7.6元。亦推介中糧控股(606),估計今年每股獲利0.5元,上升53.9%,O十點七倍,目標價6.7元。   滬深三百指數低收,跌2.1%,收2789.94。金融股續跌,因央行表示將採取更嚴格的措施去抑制通脹,令招行、中國平安等股價下跌。中國鋁業亦因半年獲利可能減半而令股價大跌。銅價升至5月高點,今年內銅價上升27%,部分理由係美元匯價下跌6.3%。   摩通downgrade兗州煤業(1171),估計今年每股獲利1.06元,升61%,O十一點五倍,目標價14.6元,因政府6月19日起限制煤價至今年底。此外,摩通認為,大幅提升航空油價,對內地航空股係雪上加霜,對中國國航(753)、東航(670)及南方航空(1055)皆不利。其中影響最大係南方航空,因80%燃油來自內地;國航有關比例只佔50%,另外50%一早已係國際市價。   四川地震及今年削減黃金周假期的日子,皆不利澳門賭博業。5月份澳門旅客只升22%,約二百五十八萬七千一百四十七人次(中國旅客升30%)。來自內地的旅客中,42.5%係自由行,約佔六十五萬八千四百五十四人;升幅最大係東南亞旅客,上升64.5%;即日離開者佔總人數53.7%或一百三十八萬八千四百八十二人(大部分係港客)。上述情況對銀河娛樂(027)、新濠國際(200)及信德(242)皆不利,尤其賭業邊際利潤已因回佣太多而下降。過去三十天新濠股價跌27%、信德跌21%、銀娛跌6%。   7月1日起內地加電費4.86%,加上控制煤價,對電力股有利,令華能電力(902)、大唐發電(991)、華電國際(1071)、華潤電力(836)受惠,下半年業績看好。   零售油價加17%至25%,對中石化(386)較中石油(857)有利,摩通認為應睇好中石化而非中石油。   麥格理認為,中國政府容許電費及油價上升,代表政策上的改變,即接受較高CPI升幅,相信好快會放寬銀根。該行推介工商銀行(1398),目標價7.1元、中國銀行(3988)目標價5.4元、建設銀行(939)目標價8.7元;華潤置地(1109)目標價21.86元、合景泰富(1813)目標價9.1元、瑞安房地產(272)目標價10.1元、中國海外(688)目標價18.74元。   五窮、六絕、七翻身。我老曹亦希望國企、紅籌股在7月份能夠翻身。   台北《工商時報》報道,最快本周台灣會開放讓證券商可透過第三國分支機構投資大陸券商。外傳元大金控可能購買最多三分一大陸同業權,26日如獲行政院同意便可宣布,此乃繼富邦金控透過香港富邦銀行投資中國的另一家(如成事實的話)。台灣不乏資金,但苦無投資項目,如兩地開放,即台資可直接投資中國內地企業,亦容許中國內地企業投資台灣企業,就係典型win-win情況。國共之爭已係六十年前的事,真係阿爺時代的事。美國可以向越南開放、越南亦向美國開放,點解台灣同大陸之間仲係扭扭擰擰?到底點搞! 印度面臨雙赤危機   印度股市跌至十個月內最低,因油價上升,投資者從新興市場撤退。印度盧比匯價本季已下跌6.5%,瑞銀認為仍須進一步回落。雷曼兄弟估計,印度收支赤字將擴大到GDP 3%(2008年1.4%),情況有D似1991年,其後盧比在三年內回落42%。印度成為四金磚國中唯一貨幣回落的國家;反之,巴西雷阿爾今年升10.8%、中國人民幣升6.3%、俄羅斯盧布升4.2%。理由係巴西同俄羅斯都係石油或牛肉、咖啡的出口國,而中國去年外資盈餘2620億美元,手上外匯儲備16800億美元。印度去年外貿赤字134億美元,財政赤字已等於2007╱08年度GDP 9.1%(上年度6%),雙赤危機令市場擔心印度會繼越南之後……。德銀資產管理繼續拋售印度盧比,估計可見43.4兌1美元。 印度SENSEX今年已跌三分一,大摩估計年底可見13324點;如債券孳息率升上9厘,指數可見12355點;如因此令企業純利升幅少於9%,可見10000點。睇落印度股市將進入「幾麻煩」的時期。   從O角度睇,美股牛市2000年第一季結束,當年標普五百O高達三十倍。根據Vitality Katsenelson的著作Value Investing,佢認為每個熊市結束前O都會重返平均O以下。美股平均O只有十五點二倍,但家陣標普五百O仍高達二十一點八倍,即美股熊市未結束。   另一理論係,美國GDP平均每年以5.5%速度上升(包括通脹率在內),但1982至2006年美國國民財富卻以年率7.2%上升,由10萬億美元升上57萬億美元,因此有理由相信,2007年起有一大段日子美國國民財富增長率只有2.5%至3%(包括通脹),即美國進入低增長期。   1982年美國牛市開始的另一理由係當年O低至只有十倍。八十年代、九十年代企業獲利上升速度加快,但股價上升速度更快,令O上升。   2002年10月至07年股市及股價上升係基於企業純利上升,因此令O仍下降。展望未來,美國企業純利升幅減慢,加上O進一步下降,後市美股將加快回落。在下一個熊市結束期,標普五百指數O必須在十五點二倍或以下【圖】。 冇600萬美元唔好輕言退休  畢非德精於選股而成為世界首富,今時今日能否繼續透過揀到一流股份、長線持有致富成疑。反之,鄧普頓今年已九十六歲,佢在第二次世界大戰開始時購入十隻股份,每隻一百股,第二次世界大戰結束時,佢購入的股份其中三分一已破產,雖然係咁,佢整個投資組合仍升200%。其後佢成立鄧普頓基金,漸漸成為全球最大的基金,然後賣掉,只為自己投資。鄧普頓的投資理論好簡單,就係買入五年平均O較股市平均O低的股份,賺錢的留下,蝕本一、兩年的便賣掉(止蝕唔止賺)。最後鄧普頓基金成為全球最大基金。   你計劃退休咩?恭喜你。根據Medicare計算:六十五至八十歲呢段日子,在美國單係醫療開支費用便達22.5萬美元(175.5萬港元),而且未計日後通脹。上述開支閣下有冇計算在內?《巴隆氏》計算所得,退休後如要安享晚年,積蓄不能少於500萬美元(3900萬港元),最好係600萬美元(4680萬港元)。可以講,退休係幾昂貴的事!上述已經假設閣下到六十五歲才退休,如要提早退休,費用更大!當然,閣下未必真正需要500萬至600萬美元才退休,只係退休後必須慳儉一D,有病睇公家醫院唔好幫襯私家醫院,少去遊埠及唔好亂使錢。我老曹希望告誡年輕人,唔好郁D就話退休(除非你擁有600萬美元以上財產)。 [ 本帖最後由 羊仔 於 2008-6-24 11:41 編輯 ]


Share this:

TOP

投資者日記 (25-06-2008) - 殺死信差不能阻止災難   6月24日,周二。恒生指數跌258.94,收22456.02;成交591.7億元。6月期指跌197點,收22463點;7月期指高水,跌225點,收22480點。阿里巴巴(1688)跌7.9%,報10.66元,因德銀將未來十二個月目標價由17.82元下調至14.78元;阿里巴巴今年股價已回落61%(同期恒指回落19%),IPO價13.5元。裕元(551)升2.6%,收20.2元,因花旗及大摩推介,加上公司半年獲利升21.8%。TCL多媒體(1070)跌4.7%,收30.5仙,公司計劃集資12.1億元,預備發行四十三億九千萬股新股,每股27.5仙;TCL母公司將因供股計劃,令其對TCL多媒體持股量由39.5%升上56.3%。 中巴明年鐵礦石談判舉步維艱  滬深A股反彈2.22%,收2851.92。保利地產漲停,收13.88元;金地集團升7%,收9.29元;寶鋼跌7.8%,收9.06元;中集集團升5.8%,收11.63元。   北京市政協委員王華民《中國證券報》撰文表示,政府應考慮從國家外匯儲備及股票印花稅中出資設立股市平準基金救市,買入銀行、保險、石化、公用事業和航空等大藍籌股。台灣政府九十年代亦設立平準基金。香港特區政府1998年8月入市大大賺一筆後變成盈富基金(2800)賣畀市民,賺左一筆,部分撥入外匯基金。過去八個月內地股市失去1.2萬億美元的市值,今年滬深三百指數跌47%,係全球二十個市值最大股票市場中跌幅最大。6月第三個星期,新開證券投資賬戶較今年第一星期減少一半,只有二十六萬五千三百三十一個;反之,去年10月一天就增加三十萬個。依家中國投資賬戶共一億一千八百四十萬個。   美國銀行估計,中國上調燃油價格後,將加快人民幣升值3.3%,以壓抑CPI上升速度。   花旗推介中國鐵建(1186)、中交建(1800)及中國中鐵(390)。亦推介裕元工業(551),估計2007╱08年度每股獲利32美仙,升53.2%,O八倍,目標價22.5元。深圳高速(548)估計今年每股獲利31.3仙,減少4.2%,O十二點四倍,目標價5.3元。   中國寶鋼集團同意多畀80%至96%購買鐵礦砂,令澳洲力拓股價升至新高,見139.19澳元,BHP見45.36澳元(亦獲相同價格)。澳洲第三大鐵礦砂生產商Fortescue Metal更急升8.5%,見12.71澳元。今天無論日本、南韓及中國鋼鐵股皆下跌。今年2月中國寶鋼集團與巴西淡水河谷公司達成鐵礦石加價65%和71%後,呢次又同澳洲力拓達成協議(可追溯至今年4月1日)。PB粉礦加價79.88%、楊迪粉礦加價79.88%、PB塊礦加價96.5%,即澳洲所出售的鐵礦石價,較今年2月達成協議的巴西鐵礦石價高出20%或以上;明年巴西鐵礦石談判將舉步維艱。   中國今年入口鐵礦石價最低升幅65%(巴西)、最高96.5%(澳洲),令每噸鋼成本上升123元人民幣或以上。最受影響係家電(因冇能力將產品加價),其次係汽車行業。例如空調,今年夏季至今溫度唔算高,內地已出現滯銷;汽車股汽油價一升再升壓力下,亦唔樂觀;仲有係建材漲價而房價唔漲的問題。   油電價同步上調,可令6月份CPI升幅多0.4%,再加上鋼鐵產品漲價,7月份CPI亦唔樂觀。國家發改委宣布,對種糧農民、漁業、林業進行補貼;此外,7月1日起城市低收入人口每人每月補貼15元、農村10元。對出租車亦增加財政補貼,並宣布液化氣、天然氣及貨客鐵路價格暫時不作調整。 為政治理由扭曲經濟規律   中歐國際工商管理學院經濟學家許小年認為,政府並冇解決問題關鍵——成品油價格應該市場化,以便同國際價格接軌,而唔係由行政部門作價格指導;而根本性對策係放開價格、收緊銀根。上述理論的經濟學上完全正確,但政府點解唔咁做?就係因為負擔唔起政治代價!上述情況並非中國政府特有,連美國政府亦一樣,全球政府為政治理由而扭曲經濟規律,最終付出更大代價。過去幾星期貝南奇口口聲聲話對抗通脹,但周四美元加息四分一厘的機會接近零,即使8月5日加息機會亦跌至只有48%,擔心油價遲早升穿140美元一桶。息口2厘,甚至較核心通脹率2.3%仲低,點控制通脹?今年美國收支赤字已接近GDP 5%,睇我地正進入商品價格上升、股市回落期。   油價上升、樓價回落,令OECD三十個成員國對石油需求增長率下降(2007年佢地佔全球石油需求57%)。至於伊朗問題,如以色列真係轟炸伊朗核設施,唔排除將油價短暫推上200美元。我地已經歷五窮、六絕,7月能否翻身?極受伊朗局勢左右。   紐西蘭今年第一季GDP估計收縮0.3%,如第二季仍收縮,將係OECD國家中首個進入衰退期。上述環境將令紐元進入減息期,玩紐元者宜小心。   經濟及社會研究所估計,愛爾蘭今年GDP可能回落0.4%(去年升5.3%),係1983年以來首次陷入衰退。愛爾蘭透過加入歐盟,令利率下降、房地產價格上升,失業率跌至去年的4.6%,加上向歐盟成員國出口令製造業一片好景。經過二十五年繁榮期後,今年出現衰退機會好大,估計今年失業率上升至6%(最近5.4%),明年7.1%;明年財赤佔GDP 3.9%(超越歐盟要求的3%),而要收緊銀根。   日本短觀指數6月份再跌3點(係連續第三季下跌,3月份係11點),主要係製造商信心大幅回落。油價上升、原材料價格上升,令今年首季製造業純利回落速度為2002年以來最快,出口美國亦出現連續八個月回落。 [ 本帖最後由 羊仔 於 2008-6-25 14:00 編輯 ]


Share this:

TOP

投資者日記 (25-06-2008) - 續 越南限制黃金入口   越南宣布限制黃金短期入口,去阻止越南人買金保值。越南今年上半年估計貿赤上升三倍到170億美元(去年同期52億美元、全年124億美元)。越南2008年第一季入口三十六點八噸黃金,較去年同期升71%;其中金條佔三十一點五噸,升110%;估計第二季達四十五噸(去年全年入口黃金七十噸)。   英國當局想逼拋空者減少拋空,上述特殊舉動反令美國對沖基金Harbinger大量拋空英國最大樓按公司HBO,令該股跌破招股價275便士。其他著名拋空者有英國最大基金Lansdowne Partners,過去幾年曾長期拋空Northern Rock銀行(去年被政府接管)。老虎環球管理基金則大量拋空Bradford & Bingley、英國第二大基金Julian Robertson and GLG Partners亦拋空B&B 4.14%。全球大基金並冇因為英國政府限制拋空者所持合約而改變態度,繼續大量拋空英國金融股!殺死信差並不能阻止災難發生,限制拋空亦無法阻止股市回落。   香港股市跌幅最大一次係1973至74年,當年香港拋空係非法的,冇人拋空反令股市下跌90%。近年香港合法拋空的工具好多,反而再冇出現股市回落90%的情況。各位應明白,跌市的理由唔係有人拋空,而係投資者情緒去到極端。   6月22日鳳凰衛視「經濟制高點」播出《中國股市累跌之因》,走訪經濟學家謝國忠。謝國忠認為,中國已進入熊市,而且唔係一個簡單的熊市,而係泡沫崩潰後引發的一個大熊市。呢類熊市短期之內要有一個好強的支持點並唔容易。中國市淨率(唔係好準)大概三倍左右(全球係二點二倍),市盈率大概係十七、十八倍(全球係十五倍)。中國熊市仲有一段路要走,要改變一個泡沫崩潰後的大熊市局面幾乎唔可能。   中國股民依家好痛苦,老是期望股市好快有轉機,呢種想法其實並唔理性,因為今天暴跌係一個還原過程,既然係還原過程,即股市重新返回高位幾乎唔可能。呢次炒股的主力軍主要係1990年工作的一代人,佢地從未見過大熊市,可能係睇金庸小說長大,思維方式「太浪漫」,影響佢地的投資行為。 證監會責任非指導股市升降  再者,政府政策無論去年上調印花稅或今年下降印花稅,都改不了大市方向。隨市場經濟的力量愈來愈大,政府干預能力相對下降,政策效果愈來愈有限。作為一個監管機構,跟市場關係應係監管,而非指導股市方向,不然證監機構同股市的關係永遠發展唔好(呢點我老曹完全同意。股市升降與證監會無關,證監會責任係制訂法規及執行紀律,而非指導股市升降。你於股市賺錢係你本事,蝕本亦係你自己的事,與證監會無關)。   中國股市出現泡沫因素好多,其中一個就係人人想發財(最好不勞而獲),但咁係唔可能的。股市永遠走唔出20╱80定律,即20%投資者獲利、80%投資者虧損。經此一役,內地投資者有如1973至74年香港投資者(older, wiser but poorer)。香港1973至74年超級大熊市時間長達二十二個月,相信滬深A股大熊市時間短D,但真正有幾長?事後才知道。雖然好痛苦,但係必須經歷過後,投資者才會長大。我老曹1974年役之後,才能刻骨銘記於心。冇失敗的教訓,何來成功的喜悅?!   唔好同趨勢作對,每當群眾走向極端時最好避開!去年10月投資者情緒唔係極度樂觀咩?近日逐漸悲觀,但未到極度悲觀境界。恒生指數仍的20000點以上、26500點以下牛皮,代表仍處熊市二期。   1973年第一次石油危機後,全球進入工資與物價競賽期,即物價上升,打工仔要求加薪;加薪後物價又升,打工仔要求再加薪,兩者互相追逐。1980年第二次石油危機後,西方國家打工仔工資已無法大幅上升,因為製造業工序外判到新興工業國,更變成利率回落,刺激樓價同股市上升。股樓上升產生財富效應,增加中產階級消費能力,新興工業國入口產品令全球貿易大幅上升,引發另一次繁榮。2008年第三次石油危機,西方國家打工仔不但工資無法上升,連中產階級亦面對大裁員;利率早已好低,減無可減,樓價及股市回落,加上美元匯價回落,由於負財富效應,遲早連入口新興國家產品的能力亦被削弱。 中印步入七十年代西方通脹  聯儲局副局長科恩上周話,通脹率上升、失業率上升,最終令痛苦指數(Misery Index)上升。但今天唔係七十年代(物價上升推動工資上升),更加唔係八十年代(利率下降推高股價同樓價),而係資產通縮年代(asset price deflation)、工資負增長年代(金錢購買力不斷萎縮)、投資負回報時代(negative returns)。   去年7月至今大金融機構已裁員八萬三千人,估計未來仍將裁員十七萬五千人,情況較2000到2003年更差。例如花旗已公布全球裁員一萬三千人,佔總員工人數4%,另投資銀行裁員10%。今年至今收購合併總額僅15000億美元,比較去年同期減少33%(2000至03年紐約金融業共裁員17%)。金融業興旺之時風光、低潮之時悽慘,真係有咁耐風流有咁耐折墮。別人風光時唔使羨慕,別人落難時亦不應幸災樂禍。   至於中國同印度等國家,正進入七十年代西方通脹期(工資與物價競賽)。   全球最大財富管理者瑞銀去年所管理財富只升8.8%,至19000億美元(2006年升13%)。全球第三大財富管理者美林去年所管理財富升8.3%,達13100億美元(2006年升10%)。美林去年次按危機虧損達274億美元、瑞銀虧損191億美元。全球第四大財富管理者瑞信去年所管理財富只升6.9%。   不過全球第二大財富管理者花旗去年所管理財富仍升24%,其他如大摩、法巴等去年管理財富仍升20%。估計全球仍有9萬億美元財富未由呢類大機構管理,意味呢類大金融機構前景長線仍然睇好。 [ 本帖最後由 羊仔 於 2008-6-25 14:04 編輯 ]


Share this:

TOP

投資者日記 (2008-06-26) - 滬深股市呈B浪反彈   6月25日,周三。受颱風影響,香港半日市,收市升179.14,報22635.16;成交378億元。6月期指升187點,收22650點;7月期指高水,升207點,收22687點。   今天中國網通(906)升3.1%,報21.55元;中海油(883)升3.4%,報13.44元;建行(939)升2.6%,報6.43元;交通銀行(3328)升2.1%,報9.19元。 A股有機會重返3000點  人民幣升至6.8653兌1美元;南韓圜回落,因南韓5月份CPI升幅達4.9%。林吉特表現亦差,因只有3.5厘息,冇加息,成3.263兌1美元。泰銖表現亦差,因泰國5月份CPI升7.6%;泰銖本季跌幅已達6.3%。印尼盧比微升,成9255兌1美元。新台幣亦微升,成30.38兌1美元。菲律賓披索亦十分弱,成44.59兌1美元;越南盾在16615兌1美元水平穩定下來。   滬深三百指數出現一個月內首次連升兩天。貴州茅台升5.8%,成144.51元;國壽升4.4%,成26.92元;國航升6.8%,成8.7元;但錦州港跌10%至8.13元,停牌一個月今天復牌,因宣布發行19億元股份給香港上市的大連港(2880)母公司。   下跌浪由A、B、C組成,分析界擔心呢兩天上升只係B浪大反彈。滬深A股指數由6月20日低點2691點反彈,有機會重返3000點或以上,一旦完成浪B反彈後,將繼續回落去完成浪C。   渣打銀行經濟學家王志浩認為,中國人行高估左熱錢。由於冇確切數據,冇人知道中國的熱錢有幾多,有人話係5000億到10000億元,佔外匯儲備90%;亦有人認為貿易順差10-15%係熱錢。   係熱錢流入帶動股市、房地產上升,還是後者上升吸引熱錢流入?王志浩認為兩邊都會,但人民幣升值係吸引熱錢流入的最重要因素。假如人民幣一年升值10%左右,加上目前中國利率4%,套利空間達14厘,自然吸引資金流入,因此加息不但不能阻止熱錢流入,反而會吸引更多熱錢。流入的方法好多,例如貿易、地下錢莊、直接到深圳開戶存入……。熱錢在外國十分容易流入股票市場、物業市場,但中國情況唔同,熱錢流入只會增加流動性,因為外資進入A股市場或內地物業市場仍有一定困難。   王志浩認為,中國依家唔係管理熱錢的風險,而係高估或低估左熱錢所帶來的風險!例如過分高估而金融政策上作出過緊的安排,或低估熱錢而讓人民幣升值太快,例如明天就讓人民幣升值10%。如熱錢認為已差唔多而大量流走,咁便麻煩。   由於對熱錢了解唔深,才造成內地股市去年首十個月過度上升及近期大量拋售,對內地投資者已構 成極大損傷。   伊朗總統艾哈邁迪賈內德在電視上話,石油供應十分充足,最近高油價係炒賣的結果,包括將美元人為地壓低。事實上,石油供應量早已超過需求,只係有形及無形之手在人為操控油價,以便獲取經濟及政治利益(伊朗係全球第四大石油出口國)。佢認為,只要以歐羅而非美元計油價,油價自然回落(除委內瑞拉外,其他OPEC成員並唔支持伊朗上述提議),因為問題不在於油價不斷上升,而在於美元購買力不斷下降。   世界銀行全球趨勢主管漢斯.蒂莫及國際金融主管曼索爾.戴拉米發布「2008年全球發展金融報告」時認為,中國同印度、越南唔同,運行狀況比較樂觀,但必須嚴防第二輪通貨膨脹。 中國切忌引發螺旋式通脹   漢斯.蒂莫認為,全球經濟的最主要威脅唔係美國經濟減速,亦唔係美元貶值,而係全球糧食、石油價格上升所引發的高通脹正威脅經濟發展。中國更加要提防進入石油、糧食價格上升產生工資水平「溢出效應」,而引發螺旋式通脹(即工資、物價互相追逐)。佢認為,油價上升主因唔係投機行為,而係石油供給受到限制。   世界銀行高級經濟學家高路易話,商品價格上升極易產生「溢出效應」(即刺激工資上漲),引發第二輪通脹,中國現階段必須嚴防。如因商品價格上升而大幅提升工資水平,可進一步推高物價,持續落去便引發惡性通脹,上述才是中國家陣最大威脅。反之,印、越危機唔會在中國重演,因為經濟基礎面大不相同。印度通脹已由經濟問題演變成政治問題,令印度政府決策方面受到制約;中國並冇上述問題。   格蛇周二又再提出警告,話美國經濟已在衰退邊緣,機會已超過50%。   分析員開始修訂對今年下半年的企業純利評估。自4月開始,分析員已修訂今年第二季企業純利平均較一年前下跌10%,其中跌幅最大係金融機構,估計跌幅達56%(全年跌16%)。上述修訂令今年下半年美股冇運行。   英倫銀行行長金格認為,英國人的生活水平將開始下降,過去十二個月英國CPI升幅4.9%,而非央行估計的2%,工資升幅卻不及CPI升幅。依家美國人亦面對相同處境。美國二十個主要大城市樓價由高峰至今已回落17.8%,即重返2004年水平。其中拉斯維加斯、邁阿密及鳳凰城跌幅最大,超過25%。分析員認為在真正見底前,美國樓價應回落20-30%而非17.8%,即係話仍有下跌空間(今年4月美國樓價較去年同期回落15.3%,較今年3月回落1.4%)。   印度面對6月份生產價格指數上升11.05%,本周二宣布今年內第二次加息半厘,再回購利率為8.5厘;另存款準備金率升0.5個基點,至8.75%;原本下一個利率會議應在7月29日舉行。 北京再度收緊傳媒控制   歐洲央行總裁特里謝在6月5日揚言歐羅在7月份加息四分一厘,至4.25厘。歐洲央行通脹率目標水平係低於2%,而上月係3.7%(估計今年全年3.4%)。自1999年至今歐洲央行冇一年成功控制通脹率,雖然過去十二個月歐羅兌美元上升16%,仍大大影響歐洲央行的威信。   泰國最近拒絕加息,令泰銖6月份跌3%。泰國5月份CPI升幅達7.6%,4月份出現近二十一個月來首月出現赤字。海外投資者6月份淨賣出300億泰銖(8.95億美元)股票,係最近五個月內最多的一次;下次利率會議在7月16日舉行。   柏克萊集資45億英鎊(88.6億美元),包括配售一億六千九百萬股,每股296便士,集資5億英鎊;另十四股供三股,每股282便士,集資40億英鎊。此乃繼皇家蘇格蘭銀行、HBOS及Bradford & Bingley之後第四間集資的大金融機構;消息公布後柏克萊股價上升5.6%。   四川汶川大地震後,北京又再下令收緊對傳媒控制。小胡認為,唔少報章尤其係網上媒體報道必須加強管制,尤其係D重要、敏感及熱門的話題。汶川地震之後,西方傳媒一度對中共放寬新聞自由抱有期望,依家證明中央只放寬「類似災難」事件的報道,而非全面放寬採訪自由。大家不可誤會,以免踩地雷亦不自知。   中國今年第一季GDP升10.6%,較去年全年升幅11.9%的增速回落1.3個百分點。中國經濟係咪進入「增長拐點」?首都經貿大學經濟學院院長張連成認為,資源短缺所產生的制約,令中國經濟再不能以11.9%的速度增長,今年經濟必定掉頭向下。中國經濟將在今年進入收縮期,谷底在明年出現,但仍有望保持8.5%以上速度增長。拉動增長的三頭馬車,例如高通脹降低左居民實際收入水平和消費需求;投資環境惡化降低左投資者的信心;加上發達國家經濟衰退必然對中國出口形成負面影響,在在令中國經濟增長受到制約,令GDP增長率下降。   國家發改委宏觀經濟研究院常務副院長林兆木話,中國明年GDP增長率可能回落到8%左右,再往下可能性唔大。   國家統計局綜合司副司長萬東華認為,目前增長速度係適度的。中國2003年到2006年第一季增長速度分別為10.8%、10.4%、10.5%和11.4%,今年第一季為10.6%,仍算增長較快。再同過去三十年基數對比,1991年到2007年平均增長速度係10.2%,目前仍在平均數之上。今年首季GDP增長率回落係政策主動調整的結果,主要針對高耗能、鋼鐵、有色、化工等行業。高耗能行業出現負5.7個百分點增長,其他行業亦只有1.7%到1.8%增長;反之,零售業1月至5月較去年同期升21.1%,較去年同期增長率仲快5.96個百分點。   中國社科院經濟研究所所長劉樹成認為,經濟增長係咪出現拐點,涉及經濟周期波形問題。過去中國經濟結構較簡單,形成一起一落,只有一個高峰,稱為單峰型波動。反觀美國,1990年至今經濟周期卻是多峰型波動,正是一波未平一波又起,共出現四個波峰。四個波峰以不同時間起落,例如2001年起科網波峰進入回落期,同時地產波峰進入上升期,令2001年全年美國GDP仍有3.7%增長。但最近地產波峰回落卻冇另一行業波峰進入上升期,令美國今年第一季GDP升幅只有0.8%,美國經濟有機會出現1982年以來首次衰退。反觀中國經濟正由單峰型經濟進入多峰型經濟,不同行業同時出現此起彼落,而非齊升齊降,出現類似1991至2007年美國情況的機會甚大。在咁情況下,就冇乜拐點唔拐點的問題。 內地股民及基民比例續降   今年5月人行在全國四十九個大、中、小城市進行城鎮儲蓄戶問卷調查,回收有效問卷一萬九千六百份。調查顯示:一、51.6%居民相信第三季CPI較第二季高。二、居民認為投資股票或基金最合算者在較上一季跌8.5個百分點的基礎上,再跌10.8個百分點,即人數只佔16.8%,恢復到2006年中股市低潮水平。認為購買人壽保險最合算者佔7.5%,較上一季提高1.7個百分點,亦係近兩年最高(相信受四川地震影響)。三、打算在未來三個月購買住房居民由上一季歷史最低的14.6%,至本季略為回升至15.1%。除北京外,其他城市居民購買意願仍較上一季低。四、儲蓄願望大幅上升至38.1%(上一季25.4%),認為儲蓄係最主要金融資產的家庭佔59.8%(較上一季提升2.8個百分點)。五、認為未來收入穩定者佔65.7%,較上一季提高6.8個百分點;認為未來收入可上升者佔25.2%,較上一季下降2.2個百分點。由此可見,內地市民受A股下跌打擊後,投資趨向變得保守。 [ 本帖最後由 羊仔 於 2008-6-26 10:49 編輯 ]


Share this:

TOP

投資者日記 (27/06/2008) 相反理論專家通街都係   6月26日,周四。恒生指數先升後跌179.49,收22455.67;成交594.6億元。6月期指跌224點,收22426點,7月期指跌231點,收22456點、平水,代表周五股市下跌機會仍然較大。睇機構投資者無意為6月結粉飾櫥窗,索性放棄第二季,到第三季才努力。富士康(2038)跌5.3%,收8.72元,係2005年11月9日以來最低,因大摩將其評級降低。高盛將工行(1398)降級,令股價跌1.3%,成5.46元。 中國或須加息兩次   東莞港企計劃關閉二萬多間工廠(依家共有七萬間),理由係柴油價上升17%、勞工成本升30%、人民幣今年內升值6.4%,再加上出口退稅減少及兩稅合併為25%。1978至2006年港企內地共投資2800億美元,佔中國所有FDI 39%,如今生產成本日漲壓力下,亦不得不撤資。   花旗推介洛陽鉬業(3993),估計今年每股獲利67.2仙,升34.3%,O八點七倍,目標價9.1元。亦推介港交所(388),估計今年每股獲利4.68元,減少19.1%,O二十四點六倍,目標價137.8元。   滬深三百指數今天企穩,升0.38%,見2980.91。   中國政府三十年期債券價格回落,因為擔心人行周末將加息0.27個基點!三十年期債券息率已升上4.91厘,一百元票面債券依家只賣93.61元人民幣,估計6月份CPI升幅較5月份7.7%更大。高盛中國區首席經濟學家梁紅估計,中國仍然須加息兩次。   近年愈來愈多專業投資者成為相反理論專家,令利淡消息公布時大市往往上升而非下跌,愈來愈多人放棄買入後持有策略,改為壞消息入貨。太多相反理論專家,會令相反理論漸漸失效。各位唔好自以為自己係相反理論者,因近年信奉相反理論投資者漸成市場主流,太多人利用此理論搵食。   2003年殊仔下令攻打伊拉克,表面理由係伸張人權、宣揚民主制度,真正理由係利用伊拉克存油控制油價。可惜誓師日(2003年3月12日)油價37.83美元一桶,近期一度接近140美元。至於有冇伸張人權、宣揚民主制度?人們認為今天伊拉克較2003年3月前更唔安全。當年美國副國防部長沃爾福威茨保證,來自伊拉克出口原油收入,足夠重建伊拉克之用……。今天大家都知道係廢話連篇。   今天美國人須學習係謙卑(humble),唔好以為蘇聯解體後,軍力雄霸天下便好巴閉,因為美國經濟力量早已進入萎縮期。油價升上138美元,即每桶多付100美元,相等於每個美國人每年支付多2500美元能源稅(或每一家庭1萬美元,美國每年額外負擔約1萬億美元)。唔單止咁,高油價正在改變美國人生活方式,令近郊物業價格大幅回落(車返工成為難以負擔行為)。隨近郊住宅樓價下跌,美國人消費信心亦下降。自從二十年代開始美國人由城市移向近郊大方向,2007年起開始改變、美國人開始由近郊搬番城市居住,因為再負擔唔起高昂油價及大屋取暖用燃油開支。可憐美國中產階級雖然更加努力工作,但收入升幅追唔上油價升幅;更加可憐係美國退休人士,更面對低利率、高通脹威脅,漸漸變成貧窮階級。二十世紀美國生活方式,進入二十一世紀後已迅速改變,未來美國人再唔係住大屋、靚車,而係愈來愈多家庭陷入負資產行列。通用汽車已被迫結束SUV工廠,福特汽車亦宣布大裁員;未來工種來自石油鑽探或採煤工業……美國航空公司亦面對重大虧損甚至破產。美國人正努力為紐約佳士拿大廈找尋國際買家。美元國際間購買力過去五年失去50%(港元亦追隨),今天美國金融機構有賴油元或別國主權資金去支持! 太陽能被視為「花瓶」能源   根據專家研究,以去年12月多晶硅價格每公斤400美元計,每度太陽能發電成本4美元;反之,用石油發電每度電成本(140美元一桶計)1.5美元,因此太陽能發電仍未有競爭力,依家被視為「花瓶」能源。以成本計最便宜仍係用煤發電(但對空氣產生污染),並以石油作為飛機、汽車及船隻動力來源。上述情況可見未來仍唔可能有大改變。   想唔想做億萬富翁?6月25日津巴布韋(位於非洲中南部)總統穆加貝為延長佢已做二十八年任期而引發暴力浪潮,令該國貨幣一夜之間貶值80%,由200億兌1美元跌至1000億兌1美元!津巴布韋經濟已第十年衰退,因通脹率達355000%。3月29日第一輪投票,反對派領袖茨萬吉拉伊獲得更多選票後,佢支持者中有八名已被人暗殺,令人民逃向南非(有錢者則去英國),依家四分一人口(約三百萬人)自2000年起離開津巴布韋……。睇津巴布韋經濟已全面崩潰。唔好以為自己有「1000億元」便好富有,一個金融風暴可以變成只值1美元。狡兔三窟,請記住郭得勝前輩所教「三七分」。香港形勢有利時,70%財產放香港、30%海外;一旦形勢不利,70%財產移到海外、30%財產留香港。前景變化之大、變化之快,往往令人措手不及。請記住安全第一命長久。 No News Isn't Good News!   美國聯儲局一如估計,只提供「口部服務」,利率維持2厘不變,因為美國今年首季GDP升幅只有0.9%。第二季金融機構撥備數字仍十分大,美國住宅價格仍在回落,美元根本上冇加息條件。一如格蛇所講,加息四分一厘先至係好消息,代表美國次按危機最惡劣日子已過;反之,呢次唔加息卻係「No News Isn't Good News!」,代表美國經濟連承受加息四分一厘能力都冇。去年8月至今年4月,貝南奇以近二十年內最進取金融政策去阻止次按危機擴散,成功令油價上升100%、小麥、大豆、玉米價格創新高,消費信心則跌至十六年新低,銀行及大證券公司撥備4000億美元……。專家警告,第二輪銀行及大證券公司集資及撥備潮又再開始。   比利時最大金融機構Fortis銀行宣布取消派息及計劃出售新股集資80億歐羅及出售非核心資產去增加銀行資本,令Fortis布魯塞爾股市急跌12%,創五年內新低。Fortis股價今年內已經跌37%(同期歐洲銀行及金融指數回落30%),去年10月已集資134億歐羅,呢次係第二次集資。睇歐美各大金融機構紛紛需要第二輪集資;Fortis今年3月已將管理一半資產出售畀中國平安保險(2318),收番21.5億歐羅。   意大利最大銀行UniCredit Spa宣布裁員九千,佔員工總數5%,因今年首季純利下降51%。   法國6月份消費信心跌至新低;睇歐洲經濟同美國比較五十步笑百步。   歐洲央行總裁曾揚言7月份加息到4.25厘,因歐洲CPI升幅已達3.7%;如歐羅加息,美元面對壓力係點?   畢非德擔心美國經濟進入滯脹期。我老曹認為只有中國、印度經濟才會進入滯脹期,美國經濟極有可能進入九十年代日式衰退期;越南、印尼、菲律賓等國家極有可能陷入惡性通脹期。   美國蘭德公司(Rand Corp)係一家著名研究機構,最近公布一份對中國現狀分析報告,值得國人反省。中國低價出口貨物,令低收入美國人生活水平最少提高5-10%;但中國金融體系唔合理,導致中國出現巨大生產力過剩;中國過度投資基建,亦對鐵、鋁、水泥及其他原材料產生巨大需求,情況有D似日本人九十年代陷入同樣一個黑洞,至今仲度努力地爬番出來。好多年後中國回顧,將對家無節制地擴充生產力及投資基建項目行為感到心痛! 中國人不乏智慧但欠缺創新  依家中國進入迅速工業化同城市化,每年有一千二百萬到一千三百萬新工人由農村湧入城市,加入就業大軍。為解決就業問題及應付每年不斷湧進城市新工人,中國過分擴充生產力及投資基建項目,形成產品大量廉價出口及原材料高價入口,令中國成為廉價勞動力輸出國。中國大規模生產便宜產品,加上中國製造過程中單位能耗較發達國家如日本、美國高出好多,形成嚴重污染環境及扯高國際原材料價格。中國最欠缺係高技術人才及管理人才,因為中國教育體系好大程度上係培訓知識分子。中國知識分子並非高級技術人才或管理人才,服務於一間公司或社會,能夠掌握一定技術,都只係一名技師而已,因為中國文化唔鼓勵敢於冒險精神,中國人冇足夠勇氣及膽量去領導創新,亦冇領導才能去管好一個企業。中國人不乏智慧,欠缺係創新勇氣及領導才能,雖經百年,如今依舊。   日本智庫PHP綜合研究所(由松下公司前總裁松下幸之助設立),與日本政界淵源頗深。6月24日亦發表中期報告,撰寫人都係日本頂尖中國問題專家,相信對未來中日關係影響極大。   東京大學教授高原明生表示,中國確實在崛起,日本必須在此基礎上看待和思考日中關係。從呢次中國國家主席胡錦濤訪日及日本軍艦訪華群眾反應睇,所謂中國反日和日本反華,都不過係表面現象。   中國已經唔係過去種單純廉價勞動力提供基地,而係世界各國都搶佔巨大市場。中國GDP五年內將超過日本,到2020年兩國經濟差距就會更大。如果日本政府仍然執行小泉執政時期政策,對日中雙方都係一個損失。中國市場有助日本經濟由2003年起復甦,來自中國觀光客更促進日本經濟發展。日本政府應設立專門地區戰略部門,促進日中相互理解近代史全貌,進一步加強兩國各個領域民間交流,只有咁樣日本企業才能贏得呢個市場,形成雙贏局面。如果仍站維持日本人利益立場、制訂對華政策,日本企業將因失去呢個巨大市場而受害。 中日應發揮相互合作精神   上述兩份都係極具影響力報告,前者反映美國人心目中中國,後者係日本企業討論如何面對中國崛起。作為中國人,了解別人點樣睇自己亦好重要。   我老曹認同美國蘭德公司的指控:中國人欠缺唔係智慧,而係冒險創新行為及管理一大班人性格。至於中日關係,我老曹亦反對宣揚反日情緒或日本人宣揚毒餃子事件。中、日文化相同點極多,我地唔應該再宣揚反日或反華事件,而係發展相互合作精神,共存共榮,唔係較反日、反華仲好咩?


Share this:

TOP

投資者日記 - (30/06/2008) 螞蟻搬家唔好睇小   6月29日,周日。油價見143美元一桶,道指由去年10月高位回落20%,確認熊市(最近兩星期跌7.8%、6月份跌10.2%)。美國消費信心跌至二十六年新低。一切一切,代表熊仍在張牙舞爪。過去熊市,道指平均跌幅30%。2000年1月14日道指由11750點回落到2002年10月10日7197點,跌幅38.7%;1981年4月27日道指由1024點回落到1982年8月12日776.92,跌幅更加高達46.9%。任你點計,2008年下半年美股熊市仍然持續。   繼富通銀行之後,法國Natixis又須集資10億歐羅(15.8億美元);加上美股VIX仍23.93%,較今年3月低潮時,有26%高,代表短期美股繼續下跌,未能支持一次反彈。   格蛇認為,金融市場重返正常訊號,需要隆巴特利率(Libor)即倫敦銀行同業拆息與美國隔夜錢拆息(OIS)差距只有0.25厘(即去年8月8日次按危機前水平);今年4月兩者差距達0.9厘,6月13日已縮窄為0.69厘。未重返差距0.25厘水平前,「The worst is over」都只係一句安慰說話。 煤礦股調整難免   美國5月零售數字升1%,理由係政府退稅,相信6月份數字亦唔差。樓價下跌壓力相信7、8月份將在消費市場重新出現。格蛇認為美國或遲或早必須加息。   今年煤礦股表現不俗。煤主要用於煉鋼及發電,但煤礦股股價已拋離250天移動平均線,出現一次技術調整無可避免。   今年9月神華集團煤直接液化項目試產。由2004年9月啟動興建兩座大型煤液化反應器,第一期共三條生產線每年可將三百五十萬噸煤轉為一百零八萬噸柴油,石油氣及石脂油今年9月啟用。第二期2010年建成另外兩條生產線,到時可處理五百萬噸一年。解決中國「富煤、少油、有氣」狀況。合成一噸油需要三點五噸煤及十至十二噸水;能源利用效率只有30%至50%。   上周美國國會已通過402-19法案,限制持有石油股期貨合約量,去減少過分投機活動。依家每張期油合約孖展8750美元,相等於全部價值6.25%(炒股票要50%孖展),7月2日起將大幅提升孖展。上述措施1980年1月曾用作對付期銀炒賣(當時50美元一盎斯),引發期銀一天之內下跌12美元。當舊合約到期、新合約(孖展大幅提升到50%)開始時,銀價已跌50%。   7月3日歐洲央行可能加息四分一厘,對美元價構成壓力。7月7日至9日日本北海道召開G7會議,商討點樣阻止商品價格上升。   今年上半年環球股市係近二十六年內最差上半年,MSCI世界指數下跌11.7%,僅次於1982年上半年下跌13.8%,下半年方向未見改變。CRB商品指數卻係近三十五年內升幅最大,上半年升30%(1973年上半年升30.2%)。   上周密西西比河泛濫,令美國中西部水浸,四萬英畝玉米及大豆被淹沒、擔心威脅其餘五百萬英畝農地,令玉米及大豆價格進一步上升。   泰國100% B級大米價格由每噸1000美元回落到810美元(約人民幣6元一市斤,中國境內米價仍係每市斤1.8元),形成中國走私大米活動激增(由中國走私去鄰近國家)。過去一年內地豬肉價格上升71%、食用油升40%、蔬菜升23%,但米價唔准升。今天香港及澳門人士返內地,順便帶幾十斤米回港澳,可以賺幾十蚊。唔好睇小呢D螞蟻搬家行動,每天回內地帶幾十斤米回港,已賺夠唔少家庭一天開支,令到愈來愈多人咁做(本港米價較內地貴200%)。 美金融機構拋售證券或催化熊三  五窮六絕已完成,7月能否翻身?由於道指及滬深三百上半年低位失守,恒指能否守住3月18日20572.92十分關鍵。上半年股市仲有貝南奇幫手(一再減息),下半年股市唯有靠自己。畢非德認為,美國將出現滯脹(stagflation);我老曹更悲觀,擔心美國進入通縮性衰退(類似日式經濟。高盛主席布蘭克菲恩則幾樂觀,最近收購SIV組合,認為股市快將見底,並認為美國衰退壓力好快會令商品價格回落。高盛係呢次次按危機中少數贏家之一,其言論值得思考。穆計劃將大摩評級降低,高盛估計花旗及美林須進一步撥備;加上MBIA情況幾令人擔心,該公司需要進一步拋售證券去集資,會否引發道指加快進入熊市三期?木宰羊。長痛不如短痛,有時痛痛快快地大跌一次,較日本股市分十三年下跌更好。   1980年雪茄伏已搵到控制通脹率上升之法,就係將利率長期維持CPI升幅2厘以上。2001年「九.一一慘劇」後,格蛇為阻止衰退美國出現而瘋狂減息,結果將通脹率呢隻猛獸再放出來。2004至07年初美元利率已由1厘重上5.25厘,本來可重新控制通脹率,受次按危機影響,美元利率又降至2厘,依家美國CPI係4%,又點可以控制未來通脹率?密歇根大學估計,明年美國CPI升幅將超過5%,理論上美國需要超過7厘息才能重新控制CPI升幅,會出現咩?為阻止美國樓價大幅回落,美國只有長期維持負利率(即利率低於CPI升幅)。   中國情況亦接近。過去為抗拒人民幣升值、中國利率長期低於CPI升幅,造成過去內地股樓狂升。近期CPI升幅有機會出現雙位數,先至緊張起。今天中國政府欲重新控制CPI升幅,便一如1981至82年美國,必須付出衰退作代價。換言之,美國同中國如要重新控制通脹率,皆必須大幅加息。但上述行為政治唔正確,因此唔知點算好。 中國三頭馬車速度放緩   中國GDP經過八年高增長後,增長高峰相信舊年出現,今年起逐步回落,本來好正常。今年首五個月出口增長率22.9%,較去年同期減少4.9個百分點;貿易盈餘減少8.6%。第一季GDP升10.6%,亦較去年同期減少1.1個百分點。各種各樣壓力不斷增大,內地企業日子愈來愈唔好過。過去三頭馬車拉動中國經濟,正面對奔跑速度放緩,因為世界經濟狀況對中國出口前景好不利。股市、樓價回落,對消費前景亦不利。只餘下基建方面投資,今年首五個月仍較去年同期升25.6%,只回落0.3個百分點(但考慮到CPI升幅8%,即投資亦在回落中)。 日資頻收購風水輪流轉   中國股票投資者過去從未考慮過經濟降溫問題,令90%以上內地投資者過去八個月被套住,動彈不得。人行為阻止CPI進一步上升,下半年貨幣政策必須從緊,但中國CPI升幅唔可能下半年回落到4.8%人行目標位。中國投資者點樣度過呢段金融政策從緊期?下半年高油價及高糧食價格將內地CPI內顯示出來(依家內地汽油價格只及外國40%、米價只及泰國三分一),你說怎麼辦?   中國正面對類似七十年代美國情況,即工資與物價互相追逐。美國卻冇人因油價大升而獲加薪(甚至運油工人)。油價上升令股市、樓價下跌,情況類似九十年代日本,出現信貸收縮而引發衰退。   大摩研究所得,依家差唔多所有國家都實施負利率(利率低於CPI升幅),家已有超過五十個國家(代表三十億人口)面對雙位數字通脹率。2002年美國政府實施負利率,令2003年道指上升,美國重返經濟繁榮期。因2002年負利率引發美國信貸膨脹,但依家負利率卻令信貸收縮,因數以萬億美元價值從樓市及股市消失。金融資產收縮,最終可引致美國消費減少,令美國明年CPI升幅少於2%,進入日式衰退。反之,中國通脹可引致工資上升,工資上升可產生新需求,轉過來又推高物價。過程中,企業純利則走下坡而令股價回落(估計內地樓價跌幅有限,因為新需求不斷產生)。   1990年全球十大銀行中,有七間係日本;日經平均指數下跌及日本樓價下沉後,透過合併形成三大,到今年才叫恢復過來。2003年美林曾投資10億美元協助UFJ處理呆壞賬,高盛投資13億美元協助三井住友金融集團。今年日本最大銀行東京三菱計劃投資海外大金融機構,今年1月瑞穗金融集團亦向美林投資12億美元,6月25日三井住友金融集團投資5億英鎊英國克萊銀行。日本家庭擁有15萬億美元金融資產,超過一半係銀行存款(接近冇利息),日本銀行正好利用機會收購海外金融機構,一如2003年外資入股日本金融機構道理一樣。世界真係風水輪流轉。 有知識產權才有首富蓋茨   蓋茨三十三年前創立微軟,出售佢MS╱DOS(年紀大一D讀者,相信都用過佢所編寫DOS去操作個人電腦)。蓋茨最成功地方係預見個人電腦好快取代IBM所提供巨無霸式電腦,亦預見電腦硬件愈來愈唔值錢,將可以令到每個家庭都擁有一部……。但當年佢所編寫DOS,卻充滿bugs及crashes,居然可以游說到當年仲係巨無霸IBM發展個人電腦業務時,將佢DOS預先安裝IBM個人電腦硬件內。如此一來,任何人購買IBM個人電腦硬件,便同時接受埋微軟操作系統(DOS),令其他操作系統較少人用。透過IBM個人電腦市場令微軟DOS成為編寫電腦軟件主流。反觀今天IBM已將個人電腦業務出售畀聯想(992)。由此可見,遠見如何重要!   蓋茨哈佛大學讀書時,極受哈佛教授克里斯坦森(Clayton Christensen)影響。佢認為,一項科技要成功必須便宜,令人人可用;必須靈活,因此人人都可應用做其他工作;必須易用,因此人人都願用。佢DOS未符合上述要求。蓋茨另一成功點係用一個商人角度去考慮重新編寫自己DOS,而非由一個電腦程式編寫員。當蓋茨推出視窗(Windows)後,奠定微軟軟件界地位!視窗完全符合便宜、靈活及易用三大要求,令蓋茨成為全球首富。   蓋茨成功其實同洛克菲勒一樣(因發明石油新提煉法,令汽油安全、唔再容易爆炸而銷量大增);又或福特發明流水作業法,每一工人只生產汽車其中一小部分而非整架車,令汽車生產成本大降。   點解上述事件只美國發生,而唔中國出現?理由係美國才擁有知識產權法,佢保護洛克菲勒發明,別人不得抄襲佢方法,而令標準石油公司迅速壟斷全球煉油業。知識產權法同樣保護福特汽車廠流水作業方式,令福特一度成為全球最大汽車公司(通用汽車只由多間汽車公司合併而成);並保護微軟視窗,成為全球大部分個人電腦操作系統。佢地成功,亦鼓勵其他美國人去思考、發明,因此我地有雅虎、Google、Facebook、YouTube……。中國人社會卻抄襲成風,咁環境下,誰去思考、誰去發明?咁樣意識形態,可令中國由工業社會走向知識產權型社會咩?環顧整個東南亞及拉丁美洲經濟,發展到某一水平便不能更上一層樓,理由就係佢地政府並唔保護知識產權!


Share this:

TOP

投資者日記 - (01/07/2008) A股須解決堰塞湖   6月30日,周一。恒生指數升59.66,收22102.01;成交530.6億元;典型輸家食尾糊。7月期指高水,升110點,收22120點。   南方航空(1055)宣布內陸航線燃油附加費調升50%,即超過八百公里者收150元(前為100元),7月1日生效,今天股價跌2.5%,收3.1元;國航(753)跌2%,收3.84元,因擔心加燃油附加費進一步打擊內地航空事業。   今天滬深A股冇港股咁好彩,仍微跌0.86%,收2791.82。 汽油需求下半年料急跌   花旗集團推介電盈(008),估計今年每股獲利25仙,升13.8%,O十八點六倍,目標價5.6元。   國家統計局6月29日發表報告,首五個月電力行業、化纖行業利潤出現大幅下降,石油加工及煉焦業由去年同期獲利352億元,轉為今年同期淨虧損443億元人民幣。能源價格瘋漲對中國經濟影響漸漸浮現。美元貶值及人民幣升值,令化纖行業利潤下降26.8%。工業亦大受影響,只係無法計算。   今年上半年係路透CRB商品價格指數近三十五年來表現最出色半年,升幅達29%,為1973年以來從未見過。金價上升後,令全球最大買家印度今年上半年黃金入口減少50%。油價6月27日見142.60美元一桶,各國政府只有放棄補貼汽油,估計今年下半年全球需求急跌。銅價5月5日見14.2605美元一磅,上升28%,中國6月10日宣布5月份入口減少19%。原材料及能源價格係咪盛極而衰?下半年將有決定。 羅傑斯同我老曹都係人一個  羅傑斯6月29日表示,A股市場今年年底時候可能見底,到時就係可以中國購入大量股票時機。此外,商品價格將有一個很大調整,幅度50%以上,令通脹率得到緩解,但只係中期現象。中國房價五到十年之內仍然好貴,佢預測中國房價將逐步下跌。至於人民幣則係最安全投資。越南已遭受金融危機,泰國亦受壓,但唔會重演亞洲金融危機,只係個別國家事件,例如美國已面對一次好嚴重危機,成為歷史上最危險國家之一。   2006年3月羅傑斯瑞信亞洲投資年會上表示睇好農產品如棉、糖、咖啡……,特別強調糖正處於牛市,可惜糖價2006年6月起一直回落,到舊年10月才止跌回升【圖】。   去年1月24日羅傑斯第一次來到中國,接受內地電視台採訪。佢警告所有投資者,中國A股已出現危險象。幾天後佢離開中國去澳洲,佢糾正內地電視台報道,只稱「現階段我唔買入,我想等一D事情發生,使股票下跌後才買入。」。事後證明,呢個「等」係等九個月,內地A股去年10月17日才開始大幅回落。   唔單止咁,羅杰斯今年年初出版《中國牛市》一書,到今天佢又認為年底先至係入市時機?   我老曹無意貶低任何人,只係強調金融市場既無先知亦無專家,只有輸家同贏家。外來和尚未必會念經。羅傑斯同我老曹一樣都係人一個,並冇預測能力,只有分析能力。呢點希望大家明白,唔好盲信「專家」(無論係洋專家或土炮專家,金融市場無專家)。   今年上半年由於遭原油綁架,全球股市大部分下跌。道指跌14.46%、歐洲股市跌17.8%、日經平均指數跌6.7%、恒生指數跌20.6%、越南跌59%、馬來西亞跌17%、印度跌37%;少數上升股市有巴西升12%、墨西哥升5.2%。下半年又點?去年開始美國次按危機到目前為止,不能說已經完全過去,未來仍會有大量餘震出現。原油價格係咪見頂仲未能肯定。全球加息周期已開始,至於美元則繼續底部震盪,唔升唔降。由於美國唔加息,全球流動性依舊過剩,形成商品價格此起彼落。   下半年美國大選,共和黨麥凱恩民意調查中落後,即以石油集團為首財團極有可能2009年失勢。民主黨奧巴馬呼聲愈來愈高,民主黨主張政府經濟活動中扮演重要角色,包括限制大財團壟斷行為。如奧巴馬勝出,美國石油集團將面對沉重打擊,有機會結束長達八年石油牛市!所謂物極必反。   次按危機發生美國,道指由去年10月11日14198點回落到今年6月27日11297點,跌幅20.4%;滬深三百A股指數卻由去年10月17日5891.72回落到家2791.82,跌幅52.6%。點解發生次按危機美國,美股只跌兩成,而冇次按危機中國A股跌幅卻達52.6%?越南金融動盪、越南盾貶值、通脹率達26%,加上外國抽資,越南股市亦只跌60%多D;中國金融穩定、人民幣升值、通脹率仍係單位數,點解股市跌幅接近越南?俄羅斯、印度、巴西股市2002年10月至今狂升五倍多,跌幅亦只有15%、35%及8%;同期A股只上升二點九五倍,卻暴跌52.6%,成為金磚四國中跌幅最大?!有人認為中國股市缺乏類似股指期貨,令中國股市冇拋空存在,一旦下跌便冇相反力量。   我老曹認為,問題出在大小非方面。上述問題美國冇,俄羅斯、印度、巴西甚至越南都冇,係中國A股市場所獨有。過去因大小非流通股不准市場流通而造成股價偏高,近期卻因恐怕大小非變成流通股而引發拋售。   中國股市由大小非流通股走向全流通市場轉型,係唔成熟市場變身為成熟市場前陣痛期。巨量大小非流通股有如堰塞湖一樣,隨時有可能沖垮所有金融資本防堤風險,過去幾個月就係希望透過有秩序疏導,令日後唔再成為威脅。解決大小非流通後,中國股市才可向海外市場開放,而唔會產生堰塞湖現象。   人望高處,水向低流。去年10月如中央一下子批准港股直通車計劃,相信連港股亦會被沖塌(水向低流結果,內地高O必流向低O);如兩地股市O接近才開放港股直通車,就唔會產生問題。 泡沫係可以確認   至於A股前景?因去年10月高價並非反映A股真正價值,而係反映供求失衡情況,有如1973年3月前港股。當年唔少大企業宣布一股送六股,造成投資者手上股票量大減。例如一百股怡和洋行,一送六後手上仍係一百股,另外六百股紅股要三個月後才會送出;送股前怡和每股市值100元計,一送六後每股應值14.28元。但因市場上缺貨,令怡和股價暴升到每股36元。但三個月後新股登場時,怡和又被人擲落至每股10元。1973年3月前香港股市股價唔係反映公司實際價值,而係反映當時流通量,令1973年3月恒生指數平均O曾超過一百倍。上述錯誤近年內地A股市場重演,2007年10月前A股流通股唔多,供應有限,形成股價愈炒愈高,O曾高達六十倍。隨大小非流通股解禁,股價再唔能夠由供求因素決定,走向反映公司價值,引發2007年10月至今大熊市。今後三年陸續解禁大小非流通股總額超過10萬億元人民幣,最終可令A股O同全球股市平均O接軌,到時A股熊市才有望完成。   至於由政府成立特項基金托市,作用如何?台灣政府由1992年至今已做唔少,成績係點?日本政府1994年至今亦做唔少,成績又點樣?唯一成功者係香港特區政府,理由係1998年8、9月恒生指數平均O已十倍以下(即熊市見底O水平)。大家請記住,股市短期而言係投票機器(由供求決定股價),長期而言係評估機器(由公司業績決定股價)。以今天A股O水平,未能吸引長線投資者入市吸納。跌市中,投資者當然希望政府托市,以便自己能脫身,因此好難接受理性分析。但事實證明,泡沫係可以確認,而非格蛇所講難以辨認。一、去年A股水平,人人皆知係泡沫,點解投資者仍大舉入市?道理好簡單,鬥傻而已!二、泡沬形成背後理由,係寬鬆貨幣政策產生大量信貸,形成資金到處流竄結果。三、高速GDP增長率一樣可以出現股市大熊市。例如七十年代香港及2008年中國皆證明呢點。四、政府冇能力阻止股市下跌,呢點早由日本政府及台灣政府證明。希望內地投資者見一事、長一智。   中國消費市場如何?根據CSM環球公司資料,4月份起內地汽車銷量開始下跌。根據國航公布,5月份內地航線載客量減少11%,上海及深圳機場數字分別減少11%及8%。根據麥格里報告,今年內地人實質收入(即扣除通脹)上升10%,購買力仍十分強,只係更明智地消費,而非只買新汽車。至5月航空乘客減少,相信同取消五一黃金周假期有關,唔使大驚小怪。 人行本周可能加息   消息傳人行本周將一年貸款利率加至7.4厘、一年定期存款加至4.14厘;上周五2018年到期十年債券息率已由4.07厘升上4.49厘。   印尼央行7月3日亦可能加息至8.5厘,因傳6月份CPI上升12.6%,政府逐步減少燃油補貼,令汽油價格大幅上升。央行亦將市場上拋售美元,去支持印尼盧布價。   南非5月份貿赤估計高達67億蘭特(4月份為100億蘭特),情況已在改善。蘭特上半年價回落15%,但5月份信貸增長率仍係19.8%(4月份19.6%)。最近蘭特價為7.99兌1美元,即6月份共跌3.8%。南非儲備銀行6月12日已宣布加息半厘,至12厘,因5月份生產物價指數升16.4%(4月份升12.4%),並且估計今年GDP只升3.4%(2007年升5.1%)。   1978年起中國實施改革開放政策,勞動力充沛中國逐漸成為全球製造業中心;資源充沛巴西、俄羅斯成為世界原材料供應基地;美國、歐洲等國家成為資金、技術供應國,成就1982至2007年世界經濟大繁榮。   到今天,中國再唔係勞動力資源充沛國家,中國勞工成本自2003年起不斷大幅上升;巴西及俄羅斯亦再唔係廉價原材料供應基地……。   一D經濟學家高呼中國紡織、玩具方面全球凱旋,美國、歐洲等國家毫無還手之力,下一步汽車工業上亦可打敗美國,然後係歐洲。君不見美國通用汽車、福特汽車已一敗塗地咩?因此2050年中國GDP就可超過美國矣……云云。   請各位冷靜分析:歐洲同美國真係咁唔掂咩?佢地缺點只係勞動成本太高,形成勞動密集型製造業無法同中國競爭。美國工人年薪幾萬美元,較中國一個廠長仲要高,點樣競爭?但中國除勞動成本便宜外,仲有乜優點?反觀日本勞動成本同美國看齊,但日本汽車仍橫掃全球。汽車製造業係資本密集行業,大量投資後由機械人進行組裝,工人只負責重要項目(例如設計款式、產品改良等),一樣可以有競爭力。豐田汽車生產電油混合型節能汽車,已打敗美國SUV等耗油量大美國汽車……。美國汽車工業唔係敗中國汽車製造業手中,呢點要搞清楚。   除汽車外,美國企業仍掌握唔少先進技術,連日本企業亦唔係對手。反觀中國製造業只紡織品、玩具、消費性電子產品上全球凱旋,就自以為了不起,未免夜郎自大。中國連汽車工業仍唔及人家,更加唔好話其他高科技項目。令人擔心係中國正面對廉價勞動力資源漸感不足,中國GDP會否由高增長跌回低增長,情況有如九十年代東南亞國家?


Share this:

TOP

投資者日記 - (02/07/2008) 小心!熊出沒! 7月1日,周二。6月份英國住房樓價較一年前跌6.3%,平均每單位售172415英鎊,跌幅係1992年11月以來最大,較5月份回落0.9%。根據英國全國建築協會資料,英國樓價已連跌八個月,擔心因此將英國經濟推向衰退。 英倫銀行本周一宣布5月份獲批樓按只有四萬二千宗(4月份五萬八千宗),較一年前減少64%,係1993年英倫銀行開始每月公布樓按數字中最低,令英國出現衰退機會進一步上升。 歐羅區6月份CPI 升幅4%,已超過歐洲央行目標通脹率2%一倍,令周四加息四分一厘,見4.25厘機會極大。 美經濟復甦遙遙無期 美國億萬富翁Eli Broad(今年七十五歲)認為,美國經濟係佢成年後最差 時段,佢擔心美國樓市距離復甦期須以年計。佢作為美國最大房屋建築公司KB Home 創辦人,佢唔認為美國經濟 大選前可改善,但唔會重演1930年代大蕭條,因為安全網好多,只係距離下一次經濟復甦則遙遙無期。 7月1日滬深三百A股指數跌3.35%,收2698.35。人行行長周小川表示,儘管投機資本流入令人擔憂,提高利率仍然不失為對抗通脹 一種選擇。美國次按危機令全球經濟增長率下滑,中國周邊國家經濟惡化,加上高油價壓力,中國經濟亦面對前所未有 困難。《中國證券報》估計,今年中國GDP增長率將放緩到10.3%(去年11.9%),今年第一季GDP增長率只有10.5%。依家A股P/E已接近二十倍水平,因機構投資者對市場前景悲觀,未見入市支持。 日本短觀發表6月份日本製造商情緒指數跌至5點(3月份11點),係連續第三季下跌。美國製造業6月份進入第五個月收縮,指數見48.5(5月份49.6)。佢地估計,雖然6月27日政府發放783億美元退稅支票,面對油價上升,但對其他項目消費刺激唔大。 國際結算銀行組織(BIS)要求各國政府提高利率,協助打擊全球通脹。通脹壓力對新興市場影響較OECD國家大,令滬深三百A股6月份跌幅高達25.15%,印度Sensex指數亦跌19.88%;反之,美國道指只跌10.19%,日經平均指數只跌6.5%(恒指6月份跌11.3%)。 今年5月市場上仲充斥住信貸危機最壞時期已過去 樂觀論調。自從道指由5月19日13136點再次回落後,上述言論又漸漸靜下來。當油價屢創新高及道指跌穿3月10日低點11736後,市場參與者及學術界對美國經濟前景看法轉向悲觀和現實得多,認為全球經濟及金融市場面對太多不確定因素。美林首席美國經濟學家羅森伯格上周再次提出:我地仍處於一個泡沫後期 去槓桿化初期,並認為美股早已由去年11月就開始進入熊市,接下來 一段時間,市場唔可能亦唔容許樂觀,因企業盈利持續下降!投資者已意識到今年下半年企業盈利大漲已唔可能(原先估計第三季度企業盈利可上升25%)……;上述分析成為華爾街主流。6月30日道指以11350點即上半年接近最低價收市,由於道指由去年10月高峰回落,跌幅已超過20%,技術分析證實係熊市。 花旗周一發布報告指出,隨著全球經濟降溫衝擊企業盈利,亞洲股市今年下半年仍將持續下跌;MSCI亞洲指數可能跌至420點,即較家水平再跌13%。跟蹤2150億美元離岸亞洲基金 研究機構EPFR提供最近數據顯示,一直支持亞洲股市 全球基金,上周出現資金淨流出(即賣出多於買入),擔心亞洲股市面臨新一輪沽壓。上述基金仍增持原材料股、能源股及半導體股,但大幅減持中國及韓國股市。機構投資者糾正今年5、6月份對下半年過分樂觀 分析,擔心恒生指數 7月份有機會測試3月18日20572點低點。 雷曼兄弟美國首席經濟學家哈里斯表示,依家認為股市已開始尋底似乎太早,未來一段時間市場仍會劇烈波動及缺乏明顯方向,因商品價格高企情況可能長期化,令整體經濟大環境不容樂觀。 金融機構已變成恐龍 《巴隆氏》周刊指出,由於VIX指數只有24%,唔似今年1月及3月見30%以上,即美股短期反彈乏力。 大摩6月29日發布名為「計算熱錢」 報告中指出,今年5月前熱錢流入中國 影響被誇大,6月認為熱錢外逃而動搖內地銀行系統 擔心亦毫無根據。大摩估計,2005年至今熱錢流入中國只有3109億美元(其中1476億美元 今年1月至5月流入)。中國政府有高達1.8萬億美元 外匯儲備,完全可以應付熱錢一旦流走所造成 負面影響。不過,海通證券高級宏觀經濟分析師陳勇唔同意上述睇法,佢認為,熱錢數量好難準確量度,一個偶發事件可引發熱錢外逃,越南就係最好例子,中國應該以此為戒(1998年香港特區政府亦坐擁巨額外匯,但國際熱錢一樣離港股而去,造成恒生指數 1998年1月至8月急跌)。 今年上半年恒指下跌20.5%,好多公司上市計劃被取消 ,香港股民哭了,因為股神死了、基金病了,大行推介冇人信了。所謂股市專家,原來十之八九都係「大隻廣」(big mouth)。今年上半年已過去,但所有麻煩事仍未開始退潮,睇落冇quick fix之法。過去二十多年美國透過信貸膨脹製造出虛假繁榮,令美國人生活水平遠離現實太耐,叫佢地重新腳踏實地接近唔可能。一如高盛證券所講,歐美銀行業 變壞情況遠較一般人估計為差,而轉角點肯定唔會係不久將來 事。花旗亦話金融機構計劃出售 項目有水蛇咁長……。今天 金融機構係咪已變成恐龍,晒士太大以至難以生存?未來經濟肯定冇V形反彈,甚至U形反彈機會亦唔大。至於尋底日子要幾耐?事後才知道。過去每次油價高企皆引發衰退,1973至74年係咁、1981至82年亦係咁,甚至1990至91年亦出現軟著陸,呢次又點可例外?經濟繁榮太耐矣,我地已忘記 「lean and mean」兩個字。 祝印度投資者好運 香港股民請唔好喊,比起內地股民,我地仍算幸福,佢地剛剛先玩完過山車!滬深三百A股由2006年8月7日1221點升上2007年10月17日5891點, 十四個月內股市上升382%,然後A股 一片歡呼聲中往下衝,至今已回落54%。內地股民首次嘗到泡沫經濟。不過,內地投資者似乎十分富有,起碼有人願畀200萬美元同畢非德食飯!如此豪花,香港投資者自愧不如,連美國投資者亦咋舌。 仲有,印度投資者至今亦虧損36%,加上印度股市2005年開始 上升軌失守,下望10000點【圖】。我老曹 度只有禱告,祝印度投資者好運。事前我老曹已作出警告,印度股市如3月低點14700點失守便好麻煩,要見10000點才完成前升幅50%調整,而且已係好低要求。5月份我老曹曾去日本北海道幾天, 參觀日本熊時順手買 個牌返來,可能岩各位用——「小心!熊出沒!」。 我地早已進入瘋狂世界。股價隨時上升100%或回落超過50%亦好少人理會。 電視機前 分析員,只用技術性調整輕輕帶過就算,而唔知道任何人如買入跌幅50% 股份而冇及時止蝕,已係慘痛經驗。今天距離高價50%股份已唔局限於二線股,同時包括唔少熱門股。油價一年前低於70美元一桶,依家超過140美元,上述亦唔係加DD燃油附加費便可抵銷。以美國為例,每年用油六十六億桶須多付4000億美元一年,上述或遲或早 消費市場反映出來。今天仍冇人相信美國將進入深而長 衰退期,一如1990年日本,有邊個相信下一復甦期係2003年4月一樣!又或1966年 美國,有邊個相信下一復甦期係1982年8月?唔少人甚至相信今年3月熊市已結束,而唔相信今年3月到5月上升只係熊市中反彈。舊年8月貝南奇利用再膨脹(reflation)去對抗次按危機,結果只令油價上升100%及美元匯價大跌;到 今天,貝南奇亦束手無策。如通脹率再上升多少,可引發美國長期債券大熊市。衰退對整個經濟發展而言有其需要,一如夏季中 暴雨為驕陽降降溫一樣。但聯儲局自1982年8月起一再阻止衰退出現,令人擔心下一個衰退除非唔出現,一旦出現便再唔係驕陽中 暴雨,而係十號風球! 散戶不宜沾手乾貨輪股 寶鋼集團與澳洲力拓達成2008年度鐵礦石價格協議:PB粉礦及楊迪粉礦上漲79.88%、PB塊礦上漲96.5%,加上乾貨輪租金大上升(海運費用佔入口鐵礦石成本50%,令煉鋼生產製造成本上升26%左右),即入口海外鐵礦石加上運費高漲,令煉鋼廠製造成本升55%。5月內地熱軋、冷軋及熱鍍鋅鋼調高 200元一噸,6月1日起再調高300至600元一噸(因焦炭漲價令生產成本上升200元一噸)。由於中國經濟增長面對減速,鋼鐵廠未必能將成本上升完全轉嫁畀消費者,即今年下半年內地鋼鐵廠面對邊際利潤壓力。波羅的海乾貨輪指數去年10月見10800點後急跌至今年2月5500點,跌幅相當大,然後又再急升到今年5月11800點新高,最近回落又令上升軌失守,今年5月似乎只係一次假突破,乾貨輪指數係咪已見頂?機會存在。我老曹認為,散戶不宜再沾手乾貨輪股票,小心駛得萬年船。美國個人電腦亦進入滯銷期,因此亦要小心電腦生產股。 唔好同趨勢作對,唔好追隨群眾走向極端,仍係今時今日要遵守 格言。 熊市中,保本為首重項目,因為我地仍唔清楚油價到底會升上170美元抑或重返80美元。 本周一開始,巴基斯坦宣布取消汽油補貼(上年度補貼用掉240億美元)。上周日巴基斯坦話,油價已上升至75.69盧比一公升(相等約1.11美元),官方估計取消補貼後,油價可再升20%,但油渣卻會上升55%至58%,火水上升75%至80%。 周二見報圖中 貨幣單位應為美元,合此更正。 [ 本帖最後由 羊仔 於 2008-7-3 09:54 編輯 ]


Share this:

TOP

投資者日記 - (03/07/2008) 學習黑暗中見光明 7月2日,周三。恒生指數跌397.56,收21704.45;成交762.7億元。後市展望,恒指仍然20500至26500點之間上落,熊市二期通常好長。7月期指跌345點,收21775點,高水,相信周四港股可出現反彈。 今天平安保險(2318)急跌7.76%,收53.5元。《上海證券報》引述安信證券分析員楊建海指出,A股急瀉令平保及太平洋保險賬面盈利所餘無幾,甚至開始出現虧損現象,只有國壽(2628)仍有微利。國泰(293)發出盈警,令股價跌5.9%,收13.98元。廣船(317)亦大跌8.9%,收18.22元,Sinopac Securities Co.駐上海分析師Jack Xu表示,廣船可能較原計劃付出更高代價去收購廣州文 船廠(原計劃30.4億元人民幣);廣船已宣布配售一億零一百萬股A股及四千七百二十萬股H股,集資收購廣州文 船廠。 國壽減持中信證券整靚D盤數 金元比聯基金首席投資官凡樂德認為,雖然滬深三百指數已重挫,但係是否已有足夠吸引力?仍然好難回答。 德銀及瑞銀宣布毋須再集資,令德銀股價歐洲急升5.2%,見2.45歐羅;瑞銀升3.8%,成21.08瑞郎(德銀今年股價回落39%、瑞銀回落55%)【圖】。我老曹亦認為瑞銀股價已吸引,近日已在吸納。 巴郡股價去年12月至今回落20%,跌幅大於標普五百(跌15%),因巴郡持有富國銀行、美國運通、US Bancorp等銀行股。跌市中,連畢非德表現亦唔見得出色。 花旗推介聯想(992),估計今年每股獲利4.9美仙,升164.4%,P/E十三點九倍,目標價8元。 國壽宣布上海證券交易所減持二千二百八十一萬五千七百一十股中信證券,平均每股24.55元,套現5.6億元;仍持有3.3億股,比重由5.32%降至4.97%。上述股份係 2006年6月以每股9.29元購入共一億五千萬股,代價13.94億元;2007年十股送十股變成三億股,加上從市場吸納及2006年每十股分紅2元、2007年十股分紅5元, 呢批股份較當初購入時增值近五倍,上述出售獲利5.6億元。由於持股量少於5%,日後減持唔使再宣布,上述出售目的估計係令上半年國壽損益賬好睇D。 美國政府否認以色列會攻打伊朗,令道指由急跌轉為急升。攻打伊朗 謠傳由ABC報道,引述自美國五角大樓 消息指出,因俄羅斯計劃向伊朗提供SA-20空中防系統,一旦安裝完成,空襲成功率將大減。前以色列空軍將令Isaac Ben-Israel家仲係執政黨議員,佢亦告訴德國 《明鏡》,如聯合國制裁伊朗 行動失效,以色列會準備執行轟炸行動。 Ben-Israel 1981年曾策劃轟炸伊拉克核反應爐,據了解內情人士透露,伊朗 核設施由於深入地底,轟炸能夠造成 破壞十分有限,反而可能引發報復行動,美國政府計過條數,可能臨時縮沙。消息人士亦透露,如今年7月到8月唔採取行動,伊朗完成安裝俄羅斯所提供 SA-20空中防系統後,到時再空襲困難增加十倍。所謂兵不厭詐,伊朗局勢瞬息萬變,情況有如到澳門買大細。 去年十大升幅股市,中國同印度都有份。今年滬深三百指數跌54%、印度Sensex指數跌36%,依家兩者趨勢仍然向下,方向未見改變。上述情況唔代表中國同印度經濟從此死火,只代表兩國股市進入熊市。以1973至74年恒生指數經驗──淡市莫估底,因為事前冇人知道恒生指數可下跌足足93%,今天亦冇人知道滬深三百指數及Sensex指數可以跌幾多。 股票市場,耐性好重要。當散戶情緒走向極端時,老練及資深投資者必須避開(摸頂及撈底乃愚蠢行動)。 今年上半年除巴西、墨西哥外,全球股市皆下跌,透過投資賺錢愈來愈唔容易。大摩認為信貸危機將一直伸延到明年,而今年下半年金融機構須為次按進行新一輪撥備。 對房地產有極深入研究 Fred Harrison指出,地產周期長達十八至二十二年,上升日子可長達十四至十六年,回落日子係四至六年。美國樓價至今只回落兩年、英國樓價至今只回落一年,代表未來兩至三年英國同美國樓價仍無法睇好(上次香港樓價上升期由1984至97年,共十四年;回落到2003年共六年)。 七十年代美國經濟進入滯脹期(stagflation),前因係越戰令美國政府濫發美鈔,後果係工資與物價互相追逐,形成「狗追狗尾」現象。近年美國通脹,前因係2000年科網股泡沫爆破後,2001年起減息,再加上「九.一一慘劇」及2003年攻打伊拉克,呢次並冇濫發美鈔,但信貸卻泛濫,產生流動性過剩,炒爆 美國房地產,引發次按危機,情況同1990年日本相似,而非同七十年代美國相似。因此,我老曹唔相信美國經濟進入滯脹期,反而認為出現類似九十年代日式經濟衰退 機會更大。今天美國工人已欠缺討價還價能力,因此唔可能出現工資與物價互相追逐 情況。過去一年油價飆升100%,美國工人 爭取加薪方面成績有限,理由包括環球化(globalization)及北美洲自由貿易協議等等,令美國工序大量外判,美國資金及高科技大量出口,留 美國本土者只有無法外判 服務業。美國勞工成本自八十年代起一直走下坡,服務業(尤其金融業)薪金卻保持上升。2000年科網股泡沫爆破後,連電腦軟件人才薪金亦走下坡,次按危機後金融業更大裁員。至於油價同食品價格經過今年上升後,相信明年將走下坡,即明年美國CPI升幅應會回落。上述亦係美元加息壓力唔大 理由。 滯脹不利股市利樓市 反而中國同印度經濟正進入滯脹期,工資同物價開始互相追逐。例如越南CPI升幅已超過26%,但GDP仍可上升6.5%;印尼CPI升幅11.03%;印度CPI升幅進入雙位數,GDP表現亦不俗。中國透過管制物價去壓抑CPI升幅,同時GDP升幅仍 雙位數。 滯脹不利股市,卻有利房地產。以七十年代香港例子,恒生指數由1973年3月1774點急跌到150點,到1981年仍無法高出1774點;反之,1973年3月本港樓價300元一呎,1974年12月200元一呎,到1981年已升上1100元一呎。 當前世界經濟增長面對兩大風險: 一、美國房地產低迷以及美元持續走軟,令美國消費需求增長率下降,無力再令美國GDP保持良好增長率,進入接近停滯 水平,上述情況預期持續到明年年底。美元匯價回落,令美元持有者變相損失35%購買力,不但抑制美國對世界產品需求,亦令美元玩家對美元信心大打折扣,隨時出現資產轉移,以免蒙受更大損失。 美國難擔當世界經濟火車頭 二、原油、糧食價格並駕齊驅。無論小麥、棕櫚油、大豆、玉米、水稻,價格漲幅由53%至113%不等,預計今年繼續暴升,到明年才會回落。油價上升令財富由OECD國家流向中東,而中東國家對其他國家產品需求唔大。預計今年 情況將延續到明年,悲觀者估計美國今年GDP增長率只有0.8%,明年才恢復到1.4%,即美國再冇能力擔當世界經濟火車頭 能力。 中國工人工資正在快速增長。根據大摩研究,約五十個國家通脹率處於雙位數,呢D國家人口佔全球人口42%,即全球廉價工資供應漸漸短缺。1980年起輕工業產品售價加入中國因素後進入回落期,但到2007年已結束。沃爾瑪去年5月二十三件商品價格為106.92美元,到今年5月係108.79美元,出現自1990年起首次回升,理由係沃爾瑪自九十年代開始,不斷搵到售價更廉宜 產品供應商及供應來源,但2007年起此計再也難施。雖然印度工資成本較中國便宜,但因缺乏基建,難以迅速增加產品出口。油價破紀錄上升,亦令遠離消費市場 生產基地缺乏競爭力,令產品不得不提價去對抗成本上升。 俄羅斯天然氣公司Gazprom CEO米勒(Alexey Miller) 《金融時報》發表一番談話:人類正生活於油、氣價格飆升 時代,廉價能源時代已結束,未來幾十年係人類必須適應高能源價格 時代。國際能源機構(IEA)首席經濟學家比羅爾(Fatih Birol) Foreign Policy雜誌撰文指出,未來幾年油價將 一個高水平起伏,如能重返三、四年前 水平,他將會非常吃驚。過去二十年,中國同印度正以汽車取代單車,形成對能源需求翻幾番。反之,北海油田、挪威離岸石油產量進入下降期,加上日本、美國同歐洲唔會減少用油,何來新來源供應畀新興工業國? 七年前,一篇名為〈華為的冬天〉 文章 內地IT業界廣泛流傳,作者就係華為公司精神領袖任正非。呢篇文章刊出時,正值科網股熱潮高峰,係華為業績十分好 年份,任正非卻大談「冬天」來臨!正因為該公司居安思危 作風,華為 冬天並冇出現,反而度過科網股泡沫爆破期,近年日益壯大。 企業 成敗,外來環境很重要,更重要係公司治理能力,例如有冇吸引優秀人才 磁力、自主創新能力,以及良好 領導班子。 有秋收哪怕冬寒 中國經濟正由出口帶動轉為內需帶動,製造業管治班子2003年應該睇見此趨勢日漸明顯,但有冇人提出「製造業的冬天」?今天內地工業已面對冬天,做好準備 企業不但唔會凍死,反而日益壯大。去年滬深A股熱火朝天,投資者有冇想到「金融業的冬天」?外來環境非人力可左右,但管理效率、提升產品附加值卻係任何企業領導班子都可以做 事。如有「秋收」,哪怕「冬寒」? 1989年六四事件之後至1994年1月2日,人民幣大幅貶值,引發中國出口大增。美元2002年起至今亦大幅貶值,面對房地產回落及次按危機影響,美國能否產生火鳳凰現象?一如1989年中國面對西方國家杯葛(因六四事件),卻透過人民幣貶值而出現突破? 上一次美元貶值係1971至78年,由4.3瑞郎跌至1.3瑞郎;再加上惡性通脹,令美元利率 1981年見21厘,結果引發1982年美國經濟重生。 日本戰後將日圓大幅貶值至360兌1美元,亦令日本經濟重生。1994年日圓升至78兌1美元,日本經濟由1990年至今仍死氣沉沉(1984年日圓仍保持250兌1美元,1987年G7會議後各國逼日圓升值,日本政府企圖透過減息力抗升值,結果引發泡沫經濟)。 1994年起8.7元人民幣兌1美元,雖然略為上升,到2005年仍只有8.28兌1美元。最近卻係6.8兌1美元,兩年多時間內人民幣升值18%,並唔算大,但2006年8月至去年10月中國股市出現泡沫經濟,至去年10月爆破。相信今年年底人民幣將見6.5兌1美元,大大削弱中國貨 出口競爭力! 2002年起美元大幅貶值,再加上2006年8月起美國樓價回落、去年8月次按危機,令美國經濟一步步陷入水深火熱之中。火鳳凰現象明年(最遲2010年)會否 美國發生? 我地既要學習居安思危,亦應學曉從黑暗中見到光明。 [ 本帖最後由 羊仔 於 2008-7-3 10:01 編輯 ]


Share this:

TOP

投資者日記 (05/07/2008) 心中富貴 7月4日,周五。恒生指數升181.04,收21423.82,成交501億元;7月期指升248點,收21515點,高水;工商銀行(1398)升2%,收5.11元,因發盈喜;中國建設銀行(939)升1.4%,收5.92元;交通銀行(3328)升1.1%,收8.66元;平安保險(2318)升3.8%,收50.75元;山水水泥(691)首日掛牌升7.1%,收3元(招股價2.8元)。 台灣股市指數卻以今年最低價收市,跌165.69,收7228.41,並已跌穿今年1月低點,出現一浪低於一浪走勢,確認係熊市(台灣牛市在2007年10月30日9858.65結束)。今天開始直航班機對台灣經濟幫助有幾大?台股由馬英九獲選至今已回落 22.35%。證明大氣候與小氣候唔會因人主觀願望而轉移。台灣出口業以電子高科技項目為主,主要市場係美國,上述至係主導台灣經濟。依家高科技項目前景睇淡,台股又可以好得去邊呢? 投資四大謬論 依家內地汽油及柴油價格唔及日本同德國一半;米價唔及泰國四分一。用管制物價而令內地CPI升幅下降,只係自欺欺人遊戲。其他如小麥及玉米平均每噸收購價1582元,較去年上升7.5%(但國際小麥價格上升 197%,玉米上升 70%)。食物危機及燃料危機已在全球出現,中國政府卻採取駝鳥政策,咁到底可維持幾耐?以及中國公布CPI可信性又有幾多? 通脹係債券死敵,股票同CPI關係卻糾纏不清,通脹初期對股市係有利,但後期就不利。匯豐策略研究員Kevin Gardiner研究美股在1973至81年高通脹期,平均每年回報係負1.3%。黃金反而係對抗通脹有效工具,1966至81年平均每年上升10.9%;相反,1982至2000年通脹回落期美股表現出色,黃金表現就好失色;2003至07年美股同黃金表現都好出色。匯豐策略員結論係CPI在2%到4%對股市有利,一旦高過4%股市就大幅回落。1973至81年工資大幅上升,食 企業利潤增長率,係對股市不利理由;2003至07年上述情況冇出現而企業純利升幅很大。忽然間成個形勢又較為對股市不利。油價及食物價格上升壓力下,消費者能夠用其他項目錢減少,企業純利又再走下坡;次按危機令銀行唔肯借貸又係另一個理由。擔心最終引發經濟衰退。技術上睇,美股未見底只係進入超賣區。 雖然技術指標指出股市係極度超賣,短期出現反彈,但唔代表熊市已結束。極有可能只係出現夏日戀情(即無花果)。在熊市中大部分投資者皆做出錯誤決定,唔理你係高學歷或大人物,一樣犯相同錯誤。例如在升市中有過高期望;在跌市中又怕得要死。好多人誤會大戶係股市贏家,在2007年10月至今股市最大輸家係服務大戶大金融機構,例如UBS、美林、花旗、雷曼兄弟及貝爾斯登等。證明股市內無大戶或散戶之分,只有贏家同輸家。點解股市咁多輸家?因為太多謬論。 一、P/E係反映過去業績結果而唔係預測未來工具。P/E四十倍股份應睇好定睇淡?如未來一年純利可上升100%,P/E四十倍點解唔買?相反.P/E十倍股份係唔係抵買?如果未來一年公司出現虧損,咁P/E十倍股份一D吸引力都冇。P/E高低由G(增長率)所管轄,投資者應買增長股份(Growth Stocks),而唔係低P/E股份。只講P/E唔講G者,係唔懂P/E理論,人云亦云,可能佢連P/E理論亦未睇過。其次係行業周期,例如2001年資源股P/E雖然高但唔怕買,因為資源業正進入上升周期(由1980年起,一直衰到2000年,衰足二十年)。相反,今年資源股低P/E都唔好買,因為佢地可能見頂。 二、太早止賺可令你破產。2007年上半年,唔少人呱呱叫泡沫經濟,在恒生指數22000點前早已放晒貨止賺。點知恒指去年8月只回落到20000點就止跌回升,9月份便到處問人好唔好高追?人地叫佢睇睇,佢就唔敢入貨。到 10月份,股市實在太燦爛,人地叫佢唔好高追,佢亦聽唔入耳(心諗9月份你地叫我唔好高追,累我賺唔到錢)。在10月份入飽貨後,股市卻大幅回落,由於在30000點水平先入貨,自然唔肯止蝕。到今年3月嚇死先止蝕(50天線跌穿250天線)。4月時又心大心細,5月又再高追……。請記住投資市場只有止蝕唔止賺,從來冇止賺呢回事。相信止賺盤者永遠唔會係股市內大贏家!甚至10%到15%止蝕盤亦不宜機械式運用,例如一旦確認行業進入上升周期,或確認牛市已開始時,買入後甚至股價回落10%到15%亦唔駛止蝕。只係一般人唔知咩叫當頭起。因此,對幾時應放棄止蝕盤並唔係容易掌握。 三、投資宜集中,不宜分散。專業投資者最多亦只可持有十隻股票,一般投資者最多只可住五隻股票。超過上述數目係自找麻煩;五隻股票中總有一、二隻跑出,那時更應該進一步集中(因溝上唔溝落),請賣晒蝕本貨,增持賺錢貨,而唔係賣晒賺錢貨而去買蝕本貨(平冇好,好冇平)。投資同生仔一樣,貴精唔貴多。 四、名氣無用論。今年上半年巴郡股價跌 19%(同期標普五百只跌14%),連畢非德都跑輸大市。證明過去成功,唔保證未來成功;名氣愈大,未來成功機會愈小。 《信報》三十五周年酒會上,到賀的嘉賓絕大部分都係成功人士。回望我老曹,過去一直追求成功人生,到底咩係成功人生?有朋友話擁有靚車就代表成功。因此,佢車房內有六、七架名貴房車,喜歡


Share this:

TOP

投資者日記 (17/07/2008) - 兩房變成植物人 2008年07月17日(星期四) 7月16日,周三。恒指低開後回升,收市21223.5,升48.73;成交598億元。7月期指升150點,收21210點。 滬深三百指數跌3.76%,收2745.6。利好預期落空,市場又再進入漫長尋底過程。投資者除去繼續耐心等待之外,可以做的 唔多。地產板塊跌幅超過 6%,有接近十家地產股跌停,包括北辰、上實發展、華業地產等,金融、鋼鐵、有色及煤炭亦成為跌市主力。據上海交易所數據顯示,7月1日至8日的六個交易 天內,機構投資者資金淨流出104億元人民幣。基金同散戶唔同,近日利用滬深A股反彈減持,理由係外圍股市甚差;反之,散戶仍信北京奧運可帶來沖喜。 外資擬撤出中國股份 換言之,8月份如內地股市不升,擔心將引發散戶大舉拋售。JP摩根私人銀行(管理4000億美元)認為,依家在美國發生的事冇可能唔在亞洲區出現。睇來外資正由中國股份身上流走。 英國6月份CPI可能升3.8%,係1992年以來最高(其中食物價格升幅超過10%,汽油價格較5月份上升5%),代表六十萬公務員可能發動四十八小時罷工行動去爭取加薪,並傳出英鎊將加息。 日本銀行估計,日本2008�09年度(3月結)GDP增長率只有1.2%,通脹率1.8%,日本人工資及企業純利仍走下坡。睇來日本2003年4月開始的溫和繁榮期又再結束。 格蛇唔認為美國經濟下半年會出現回升,信貸危機可能會拖到明年。標普首席經濟學家戴維.懷斯認為,最糟糕的時候仲未到臨!美國財政部寄出退稅支票後,消費者兌現呢D支票的速度較預期要快,呢D錢一用完後,衰退便來,估計最糟糕時候係明年第一季。 索羅斯認為,2008年係超級大泡沫破裂的日子,情況有如1930年,實際上人們剛剛開始感受到呢場危機對實際經濟所造成的影響,未來痛苦日子仲好長。房 利美及房貸美事件唔係最後,而係開始咋,美國進入清還負債能力危機期(Solvency crisis),而非流動性危機(Liquidity crisis)。上述兩間公司短期內並唔缺乏資金,只係投資者質疑兩公司貸款人的未來還債能力。 因此,由聯儲局提供短期資金作用唔大,因為兩公司並唔需要,只有美國樓價止跌回升,才可大大提升貸款者未來還債能力。呢方面無論財長抑或聯儲局均無能為力 (1990至2003年日本政府無法改變日本樓價方向,1997年8月至2003年4月本港特區政府亦改變不了香港樓價方向;未來美國政府得咩?) 《華爾街日報》引述美國聯儲局委員意見認為,貝南奇已江郎才盡,佢估計下半年美國經濟擴張速度略低於趨勢增長率,主因係房地產繼續不景氣、能源價格節節上升以及信貸狀況欠佳等。佢話今後兩年經濟增長率會逐漸加快腳步,但信徒已經唔多。 美國勞工部宣布,6月份生產商價格指數升9.2%,係1981年以來最大的年度漲幅。 投資者對美國整個金融體系缺乏信心,銀行股遭受十年來最大損失。繼加州IndyMac之後,National City股票交易一度被中止。Oppenheimer & Co.分析員Meredith Whitney過去曾正確預測花旗減派息,佢依家認為Wachovia Corp.前景暗淡,令該股股價急跌13%;估計今年每股虧損1.35美元,明年每股虧損35美仙。Wachovia今年內股價已下跌74%,周二再跌 1.2美元,成8.64美元。 冇阿媽生任由自生自滅 財長保爾森要求國會畀房利美及房貸美「絕對保證」及短期無上限貸款,但共和黨議員認為對納稅人負擔太大,睇來上述申請短期內不獲國會通過機會好大。 Uncle Sam已決定收養房利美及房貸美,因為佢地係「GSE」(政府資助機構)。至於其他金融機構,由於冇阿媽生,任由自生自滅。美國證監會宣布唔准淨拋空房利 美、房貸美及雷曼兄弟、高盛、美林或大摩等十九間金融機構的股份,若拋空必須先借貨,務求支持金融公司股價(美國政府已愈來愈唔尊重自由市場矣)。房利美 在1938年、房貸美在1970年由國會製造出來,有阿媽生的確唔同D,不過救番又點?兩隻股份現已跌價80%,擔心已失去派息能力(房貸美去年派息 15.5億美元、房利美24.8億美元,依家可能已變成植物人,因過去二十八年來的利率回落期已結束)。 2000年科網股泡沫破裂後,2002年10月股市才見底;2007年8月次按危機後,需時幾耐?次按危機估計最終會拖垮油價,依家似乎已開始。如無意 外,油價好快會由146美元回落到100美元,引發原材料價格崩潰。2009年我地面對的壓力唔係通脹,而係「信貸崩潰」(credit crash)!美國油股ETF周二跌幅達到5.2%,成111.36美元。早在油價下跌前,美國石油股已率先回落。 唔好以為中東油佬好掂 唔好以為中東油佬好掂,唔信請睇睇沙地阿拉伯股市指數,早由2006年2月26日回落,去年出現反彈,今年又再跌過,並在7月15日再跌穿今年3月低點,繼續尋底【圖】。願天下股民皆同聲一哭! 溝上唔溝落,有邊個諗過以每股30美仙吸納IndyMac,結果係全軍盡墨?1973至74年和記由每股43元跌至7元,我老曹開始溝落,7元、6元、5 元……最後係1蚊,自己50萬元投資在半年內變成10萬元!好彩和記冇破產,不然你地今日一定冇曹仁超日記睇,亦冇人再聲嘶力歇叫人唔好「溝落」。在熊市 中,只能動用30%資金去玩(唔好希望自己能跑贏大市!呢點連畢非德亦做唔到),記住保存70%資金(Keep your powder dry)!有智慧不如趁勢,「人」的力量永遠唔及「熊」,只有乖乖地度過嚴冬,留番D種子春天時播種用。如果你唔在秋天收成、冬天藏糧,春天來到又點? 人民幣自2005年7月21日起升值,至今已漸漸抑制中國產品的出口能力,而增加去入口產品的能力。如今製鞋、製衣、玩具加工、電子加工等低利潤行業已面 對工廠外移(或內移)甚至倒閉,進入青黃不接期;高技術產品仍未發展起來,但依賴密集勞動的工業卻在加速淘汰,最惡劣日子相信係今年下半年或明年上半年, 能夠捱過者可生存,否則便淘汰。 下半年中國汽油相信進入上調期(上一次係6月20日)。中國成品油由去年10月31日起至今只上調過一次,形成每加工一噸成品油要虧損1000元人民幣, 加工及進口石油都出現嚴重虧損,引致大部分地方煉油廠停工或半停工。汽油短缺由廣東、廣西、雲南、浙江、上海……從南向北蔓延。今年6月20日上調成品油 價後,由於國際油價進一步上升,令加工一噸成品油要虧損2000多元人民幣;加上地方煉油廠已停工(或半停工),變成大部分成品油由國營企業供應,到處都 出現短缺。相信奧運過後,有很大需要大幅調整成品油價格。 糧價又點?舊年12月泰國大米每噸376美元,今年4月17日升至1000美元,引發埃及、喀麥隆、科特迪瓦、塞內加爾、布基那法索、埃塞俄比亞、印尼、 馬達加斯加、菲律賓、海地等地區發生騷亂;海地總理愛德華因此下台。反而中國糧價十分穩定,除去去年12月20日取消小麥、玉米等出口退稅,今年1月1日 宣布上述產品出口關稅,以及今年1月19日宣布出口配給制外,內地糧價基本上穩定。理由係中國糧食自給率達95%,加上過去四年豐收,政府有能力阻力內地 糧價上升,形成同國際糧價脫節;只係農夫面對化肥漲價,農產品價格唔漲的日子可維持幾耐? 日前報道有600萬美元先至可退休,呢個數字唔係我老曹計算出來,而係由《巴隆氏》呢份金融財經界權威計算所得,數字都幾嚇人(或令大部分中產階級心碎)。 1967年剛離開學校時,我老曹已想發達,目標係賺100萬元(當年百萬已係富翁)。1980年,我老曹已賺到100萬元,當年同森池兄遠足,同行者有位 係森池兄口頭上叫「契爺」的公務員,佢1964年五十五歲已退休,退休時拿住幾十萬元,到1980年七十一歲仍身壯力健,但已唔夠錢使。佢教我地要有 1000萬元才好退休。在1980年,1000萬元已係唔少 ;1994年森池兄賺到1億元才退休,今時今日仍然豐衣足食。 每年失去5%購買力 自1971年美元唔再同黃金掛勾後,美元購買力以每年5%速度失去。今天600萬美元的購買力,二十五年後只餘下166萬美元。除非你係理財專家,否則冇 人能保證每年投資收益都係正回報。點樣每年皆跑贏失去的5%購買力?並唔容易。1997至2007年恒生指數每年平均只升2.5%,而過去十年樓價除豪宅 外都係負回報。 何況人到最後三年的醫療支出,係佔去一生人中的50%。今天養和醫院二等房(包括醫生費)一天開支大約1.5萬元;如住在法國醫院,上述開支減半,即7500元一天。以兩夫婦計,最後三年醫療費用(如住私家醫院)大大話話至少500萬元。 退休並唔係一般人想像咁輕鬆。請睇 D在1978年前退休的港人今天生活點樣?今天佢地的情況,三十年後將在閣下身上發生。請唔好忘記金錢購買力正以每年5%的速度減少。 今年5月五卡鑽石可以100萬美元售出,較一年前升值76.5%。粉紅色鑽石升幅達75%、湖水藍鑽石升幅超過100%。五年前十卡或以上完美鑽石每卡可 售7萬美元,今年非20萬美元以上一卡不可,因為每年新發現五卡或以上完美鑽石少於二百粒,粉紅色或湖水藍者更少,好多時有錢亦未必買得到。三個月前一顆 D無瑕二百四十三點九六卡鑽石以5000萬英鎊售出(買家係亞洲人,身份通常唔透露),打破1995年5月在日內瓦蘇富比拍賣的一顆一百點一卡梨形鑽石售 價1650萬美元。睇來鑽石較股票及房地產更有投資價值(少於一卡者則冇投資價值)。 [ 本帖最後由 羊仔 於 2008-7-17 10:32 編輯 ]


Share this:

TOP

投資者日記 (18/07/2008): 政府責任唔係派糖 7月17日,周四。恒指升511.22,收21734.72;成交634.6億元。7月期指升579點,收21789點,主因係受美股上升、油價報跌刺激。 美國證監會禁止十六隻金融股淨拋空,令道指升276.74或2.5%。美國銀行升22.4%,JP摩根大通升15.9%;富國銀行宣布第二季淨收入減少 21%,但派息多10%,令股價升32.8%。雷曼兄弟升20.6%、美林升12%、大摩升11.7%、房利美及房貸美升超過29%,地區性銀行如 National City及Zions Bancorp皆升22%。聯合航空升42%、美國航空升32%、三角航空升30%。連通用汽車亦升14.9%;通用汽車自1922年起第一次宣布唔派 息。 美國債或失三A地位 自從貝南奇、保爾森及JP摩根大通戴蒙挽救 貝爾斯登後,美國聯儲局同財政部已將自己的信用作為賭注。上周再出手挽救房利美及房貸美,市場反應好唔到十五 分鐘。呢次連美國證監會亦出手挾淡倉,禁止房利美、房貸美及十六間金融機構股份淨拋空(只可借貨拋空),外傳殊仔亦搵友好幫手推跌油價同金價......。我老曹 擔心,大反彈之後情況將更差,咁落去連美國政府債券最終亦將失去三A評級,因為美國政府將須承擔房利美及房貸美5萬億美元的擔保責任(信貸分析員 Nikola Swann認為,美國政府仍可承擔5萬億美元擔保,短期內唔會因此而被降低信貸評級)。1998年日本政府為協助當地金融業,亦曾擔保77萬億日圓債券 (相等於5790億美元);1998年9月惠譽將日本政府債券降為AA級,同年11月穆 亦將日本政府信貸降級。 美國政府債券一旦承擔5萬億美元房貸擔保,其三A級地位可維持幾耐?木宰羊。 去年8月開始,美國金融業進入「慢動作熔毀」期(Slow-motion meltdown)。初期政府仍相當理智,但漸漸失去理性,甚至直接干預市場機制,例如限制石油期貨合約拋空,呢次則限制金融股拋空。好友只佔27.4% (上周五為31.9%,5月份為44.8%),係1994年7月以來最少人睇好;淡友佔47.3%(上周五為44.7%,5月略低於30%),係1998 年9月以來最多。在咁超賣局面下宣布限制拋空,自然引發道指升276點,睇來只係一次大補倉行動,完成平倉後又點?標普銀行分類指數已跌穿今年3月貝爾斯 登危機前的水平,技術表現極差。再睇睇道指美國銀行股指數跌足一年,早已出現大拋售!至於油價,道指石油股指數早在去年10月見頂(石油股份走在油價之 前),道指原材料股亦在今年6月見頂,美國鋼鐵股指數今年5月見頂。我老曹再強調一次,我地面對的唔係滯脹前景,而係信貸萎縮,情況有如1990年代日 本!美國政府依家正努力對付,一如九十年代日本政府。但大家都知道,「有形之手」短期力大無窮,長期無能為力;市場呢隻「無形之手」短期軟弱無力,長期卻 無人能左右。政府短期內可任意妄為,但長期付出代價卻極大(例如1949至78年中國政府曾不按經濟規律辦事,結果如何?)。1990年起日本政府同市場 鬥 十八年,結果又點? 華盛頓方面,估計次按虧損達4000億美元;上述係計得到的損失,至於無法計的損失,例如2006年7月至今過去兩年美國住宅價值減少5.2萬億美元,因 此而令全球信貸減少3.3萬億美元,即過去兩年內計唔到的損失已達8.5萬億美元,上述未計衍生市場(市值800萬億美元)虧損。相對全球GDP只有50 萬億美元一年,過去兩年金融市場虧損數字幾咁驚人! 國際熱錢的「四高」特徵 1982年10月起因金融市場膨脹而帶動全球經濟繁榮期,將因2007年10月起金融市場萎縮而陷入一次幾長的衰退期。但全球分析界人士大部分仲懵盛盛, 繼續希望浮在水面的禾桿草可以救佢一命而不致浸死。例如紐約曼哈頓區寫字樓空置率已升至7.1%,但貪得無厭的業主仍加租21%,至71.59美元一平方 呎,就係例子之一。 歐、美、日三大世界經濟火車頭呢次集體減速,全球化推進到今時今日,有邊個國家可以decouple?美國已進入漫長的「去槓桿化」信貸收縮期,去年第四 季及今年上半年仍可引入中東、新加坡、中國主權基金頂住,今天連呢D主權基金亦輸到怕(既輸股價亦輸匯率),「兩房」危機下,政府都唔知點算。7月15日 貝南奇在國會作供時已改口,轉為承認美國經濟下行風險極大(6月25日議息前仍然認為下行風險有所緩解)。日本央行總裁白川方明7月15日亦改口,日本 2008年財政年度GDP只能升1.2%,較4月份估計減少0.3個百分點。歐洲方面,丹麥成為第一個陷入技術性衰退的歐盟國,GDP連續兩季負增長,西 班牙、愛爾蘭將步後塵,英國亦好唔到去邊。 [ 本帖最後由 羊仔 於 2008-7-18 10:14 編輯 ]


Share this:

TOP

投資者日記 (19/07/2008): 投資策略要睇時機 7月18日,周五。恒生指數升139.47,收21874.19;成交595.7億元;7月期指升184點,收21974點,高水。 滬深三百指數升3.58%,收2815.46。 花旗推介港交所(388),估計2008年每股獲利4.68元,減少19.1%,P/E二十三點一倍,目標價137.8元;至於內房股,內地樓價較去年6 月仍升9.2%,長三角一帶表現好過珠三角一帶。依家下跌只有廣州(跌0.3%)、深圳(跌3.8%),以及武漢(跌0.2%),跌幅最大係深圳,二手樓平均跌6.9%。不過,十七隻成交較多內房股股價跌幅卻十分大,或可考慮吸納,例如方興地產(817),估計2008年每股獲利27仙,減少 64.6%,P/E十點六倍,未來目標價5.32元。 美林再蝕錢美林第二季蝕了46.5億美元或每股4.97美元,係美林歷史上最大虧損。過去三季美林已為次按撥備了300億美元,2008年第二季仍需撥備97億美元,為增加資本而出售佔20%彭博LP畀彭博母公司,代價係44億美元;另出售Financial Data Services Inc.,代價係35億美元。 Oppenheimer & Co. Meredith Whitney認為,營業額大減而開支減少速度追唔上,係所有大企業面對問題。只有出售Winner,因為仍有買家;卻要留下Loser,因為冇人要,最後連食飯餐桌亦被迫賣埋。新領導層Thain去年12月接手後必需為美林找尋155億美元新資金,至今仍未籌夠。穆公司將美林長債評級由A1降為A2,令籌錢成本進一步上升。 美國參議員德明特話,「兩房」利用GSE品牌從事私人公司方式運作,有銀賺時由股東分享,行政人員亦獲私人公司優厚酬勞;在時勢差時就要納稅人負責,實在係太唔公平。說來有道理,睇來財長保爾森要求國會以不設上限貸款去支持「兩房」有一定困難。 貝南奇已挽救了貝爾斯登,接管埋Indy Mac,以及注資房利美及房貸美,情況好似1991年日本銀行總裁三重野康(1990年7月三重野康開始減息,希望日本人再借錢頂住日本樓價)忘記了八十年代日本經濟繁榮建基於負債、槓桿比率及投機活動,上述活動只能製造紙上富貴而唔係真正興隆昌盛。1990年日股下跌令日本投機者收斂,雖然開始減息,但佢地仍設法減債及降低槓桿比率,結果引發了一場financial meltdown!1990年起,日本唔係通脹而係通縮(deflation)。1990年前日本因海外投資甚大,企業把海外投資調回,令1990至94 年日圓升值,加快了日本經濟陷入通縮;相反,外資在美國投資很大,2007年9月起資金調離美國令美元貶值,美國出現冰火二重天(房地產及股市係冰天雪地;油價及食品價格係熱火朝天),次按令美國虧損超過1萬億美元,而令整個借貸市場萎縮,同時令美國財赤上升,推高長期利率引發大量破產潮,情況都幾令人擔心。 全球分析員都希望在家陣亂七八糟股市中搵到方向,有人利用利率、失業率、通脹率或GDP增長率,甚至求神問卜;事實上都係猜測遊戲,有時準有時唔準(甚至大機構投資者或超級大戶都係咁)。 價值投資法須搵牛市起點投資策略最大主流可分為價值投資法。例如譚甫屯在1939年起步,其後佢將譚甫屯基金以44億美元出售,並只為自己投資,估計死時身家超過200億美元;最出名係畢非德,佢1964年起步而成為全球數一數二富翁。其理論基礎係低價買入後一直持有,直到極高價時才賣出。各位應留意譚甫屯起步點係 1939年,畢非德係1964年;美國超級大牛市由1982年先起步至2007年10月結束。情況好似香港房地產由1967年起步,1997年結束;最大升幅係1984至97年。任何人在1984年前投資香港房地產都可賺到盤滿缽滿;如果你係價值投資法支持者,自然賺得更多。任何策略都離唔開時機(例如超級大牛市開始前投入,結束前離開,係價值投資法賺大錢背後理由);相反,在1990年至今用同樣方法投資日本成績會點?各位問問王增祥便知。七十年代佢係香港大投資家之一,當年家財同唔少今天香港地產富翁差唔多,由於佢在戰前留學日本,於日本大學第二商業學校畢業,在七十年代佢決定賣出香港物業,投資日本王子製紙,並佔該公司13%,另一家係片倉工業,佔該公司23%……,三十年過去了,佢好朋友例如李超人及彤哥等無不富甲一方,至於佢本人就連新一代香港投資者都好少人認識。佢都係用價值投資法,可惜佢選擇地方係日本,唔係香港或美國,過去十八年日本股市不前,令佢在1978年日股投資,由當年日經平均指數5000點,升到2008年7月13000點,升幅得160%;同期恒生指數卻由1978年330點,上升到2008年7月 22000點,升幅係六十五點五倍。 [ 本帖最後由 羊仔 於 2008-7-21 09:26 編輯 ]


Share this:

TOP

投資者日記 (21/07/2008) : 阿駝落樓梯 2008年07月21日(星期一) 7月20日,周日。美國6月份住房銷售續跌,睇來已進入連續第三年回落。新屋及二手樓加起來跌1.3%,理由係信貸收縮及金融資產出現虧損,再加上原材料 價格上升及油價高企。6月份買賣合約只有四百九十三萬間(5月份四百九十九萬間),係1999年以來最少。其中新屋佔五十萬三千間(5月份五十一萬二千 間),較2005年7月最高峰時少35%;被接收住宅增171%、未能償還貸款者增53%。 7月25日將公布的密歇根大學信心指數估計將跌至二十八年內新低。十年期債券息率升上4.09厘,係6月13日以來最高;兩年債券息率2.64厘,亦升4個基點。 7月22日政府將出售60億美元通脹掛勾債券(TIPS),睇睇市場反應如何?三十年期樓按息率升上6.17厘,係去年8月16日以來最高,令人擔心由美國證監會限制拋空所引發的反彈市係未就快完成? 投資要朝秦暮楚 今年上半年美國股票投資回報率,係美國1930年以來最差的半年,甚至畢非德的巴郡亦令人失望。美國銀行、花旗、瑞銀等股價跌幅皆超過50%,更加唔好話 地區性銀行,跌幅超過90%者比比皆是,令所謂「價值投資法」極受投資界質疑,在股市愈來愈有效率的環境下,一般投資者能否再搵到物超所值的項目? 入行四十年,我老曹學到的 唔多。第一項:投資市場係最好的僕人、最嚴厲的老闆(較林行止兄更嚴厲)。如你做對,它會獎勵你很多;如你做錯,佢會令你傾家蕩產。 第二項:溝上唔溝落。持有winner,讓利潤往前跑;沽出losser,請快快止蝕,記住止蝕唔止賺。 第三項:價值投資法只適合牛市起步時,唔適合牛市結束期(唔信?請試 在去年10月入市的滋味)。你最大敵人係你自己的感情,例如自大、睇唔起別人、戀上 你的投資等等。在愛情路上,我老曹主張尊一;在投資路上,我老曹主張朝三暮四、朝秦暮楚、見異思遷。請永遠唔好同投資項目談戀愛。 第四項:唔好預測。1990年我老曹曾預測日股將衰足十六年(靈感來自美股1966至82年),結果只衰足十三年,所以話千萬不可「亂測」。2007年 10月,長達二十五年的美股超級牛市已結束,相信有排衰,投資者宜朝秦暮楚,以及將投資重心由歐、美轉向中、印。相信中、印股市進入V形走勢(即跌得快、 跌得重,但日後升得急、升幅大,極有可能係2009年)。有如我老曹在1997年棄港往英一樣,唔好再留戀歐、美矣。 信任只能贏取 高盛估計,2030年新興工業國將有七千萬人口成為中產階級,有二十億人口生活水平較依家更好。未來世界大趨勢係此消(歐美國家)彼長(新興工業國)。初 期因歐美需求下降而令新興工業國出口增長率減慢,引發股市急跌;最後新興工業國成功轉型為內部消費為主,進入經濟繁榮第二浪(情況有如1984至97年香 港)。到2030年,中國住在城市人口達十億,佔當時總人口三分二,一個現代化新中國正式誕生。反之,歐美國家人口進入退休潮,愈來愈多人放棄股票及物 業,改買債券,情況有如1990年起的日本。 雖然我老曹主張有智慧不如趁勢,但亦相信以人類的智慧及創意,係冇解決唔到的困難,需要的只係時間,因此唔信能源危機論。唔好扮大師(去年我老曹在匯豐贊 助的《富爸爸、笑爸爸》舞台劇中扮大師,就係嘲笑大師的說話:唔係語無倫次就一味扮高深),做一個普通人,以平常心睇投資市場瞬息萬變。在困難的日子裏, 唔好對自己失去信心;在瘋狂的時候,請保持頭腦冷靜。 1954年諾貝爾和平獎得主史懷哲話,對任何企業、國家、個人而言,信心係最重要的資產,一旦失去信心,根本上再無法繼續工作。2005年美國 Unilever CEO Patrick Cescau計劃為公司裁員半數,約五萬人,但同時保持員工及外界對公司的信心。佢的方法就係向所有員工坦白,讓佢地知道裁員行動係必需的。英國哲學家 Onora O'Neil警告:當樹生長得唔好,通常問題在根部。Schering-Plough Corp主席Fred Hassan認為,我地不能要求別人信任,只能贏取別人信任! 上述都係智慧所在,但貝南奇及保爾森似乎都冇,結果令全人類對美元出現信心危機。此根基一旦動搖,樹又點能生長得好?保爾森一再要求各國對美元有信心,卻 冇能力贏取別國信任!信心呢樣 ,要贏取十分艱難,但失去卻好容易。八十年代列根與雪茄伏努力了八年,才恢復世人對美元信心,自2001年「九.一一慘 劇」後,殊仔及格蛇(加埋今天的貝南奇)卻一再破壞。依家美元已經陷入信心危機,擔心一發不可收拾。 展望未來,美國經濟進入長期的低增長期。由1982年開始的信貸膨脹期已於去年8月結束,明年GDP增長估計只有0.8%、歐盟只有1.2%(英國 1.7%)、日本1.5%;反而中國仍有9.8%。美國同歐洲進入財富毀壞期(Wealth Destruction),一如阿駝落樓梯(鍾 鍾 ),英文叫做Capitulation,即只有跌得多才出現反彈,反彈完成後又再下跌。 美國兩大住房抵押貸款融資機構出問題後,令12萬億美元的樓按市場無法繼續擴大落去(因其中5.2萬億美元抵押貸款由兩公司擔保),如處理得唔好,將拖垮 美國境內三百多間銀行,相信美國政府唔可能讓兩家機構倒閉,不過即使救得番亦已殘廢(一如中風後的病人)。中國、日本、俄羅斯、開曼群島、盧森堡、比利時 等主權基金共買了兩間公司1.5萬億美元債券,佔總數25%,未來會否進一步增持?換言之,無論兩房的結果如何,美國由1982年起的信貸泡沫在去年8月 已經爆破。美國雖未進入「下行經濟」(即GDP極低增長),但只係時間問題。 上周油價雖然大跌17美元,但上升軌仍未失守,未能肯定轉勢,如在130美元附近牛皮,後市仍有創新高的能力,可以講其勢未變,唔好高興得太早,小心另一上升潮隨時出現。 「Buy and Hold」投資策略,過去令譚甫屯賺取超過200億美元身家,亦令畢非德一度成為世界首富。隨著2007年10月美股大牛市結束,上述策略風光日子不再, 應改為利用VIX去捉熊腳(7月15日極有可能係熊市二期內的第二隻腳)。但捉熊腳唔係人人對玩,各位要小心。 物超所值項目愈來愈難搵 畢非德認真好彩,佢持有的百威啤酒因有人收購,又袋7.7億美元利潤。巴郡約持有三千五百五十六萬股百威啤酒,以每股70美元被收購,巴郡17.2億美元 投資(原先蝕錢)變成值24.9億美元(賺錢)。雖然係咁,巴郡股價仍由去年12月11日的151650美元跌至最近115850美元,回落22.5%, 因為持有7.5%的M&T銀行宣布第二季純利下跌25%,令股價跌16%,至58.82美元;M&T亦持有房利美及房貸美1.9億美元無 抵押債券。世上愈來愈多「價值投資法」信徒,在咁情況下,要搵到物超所值的投資項目機會愈來愈細,除非擁有超人智慧(但大部分人都冇)。 犬儒學派者(Cynic)永遠只知道所有事物的價格,卻唔知道所有事物的價值。例如6月份美國CPI升1.1%(或年率5%),係1992年以來升幅最 高,便呱呱叫要求政府去壓抑通脹率,而唔明白呢次OECD國家的通脹率上升,係貨幣供應急升推動油價及食品價格上升所造成,而非七十年代由工資物價互相追 逐的結果,只有新興經濟國家才進入工資與物價互相追逐式通脹期。OECD國家面對的環境係有D東西售價上升10%或以上,有D東西售價則下跌逾 10%……。OECD國家人民擁有的最大資產係房屋,但售價進入回落期,加上OECD國家人民作為小業主的比重相當高;反之,汽油同食物佔日常開支唔多, 影響輕微……。 換言之,美國6月份CPI雖然上升5%,但人民面對的係「通縮」!曾經歷過1997到2003年的香港人應該最明白,每年樓價回落10%合共六年的滋味, 消費力自然萎縮,相若環境將在美國重演,再加上金融業大裁員(金融業係OECD國家人口中最高收入的行業),美國人將面對收入下降。所以我老曹擔心的係美 國同歐洲進入九十年代日式衰退,最終拖垮油價甚至金價,而毋須再要聯儲局加息,只有新興經濟國先至係進入滯脹。 VIX會否因普及而失效? 上周由美國證監限制拋空而引發三天補倉潮,如客觀形勢未改善,完成補倉後,美股成交將十分靜。五窮、六絕、七翻身,到7月份股市已累積唔少淡倉(7月15日VIX一度見30),引發平倉潮並唔奇。問題係7月完成平倉後,8月及9月業績公布期股市又點? VIX(在美國CBOE交易)已愈來愈普及,當佢上升,代表投資者驚慌;當佢回落,代表投資者信心十足。職業投機者便反其道而行,今年5月在孟買股票交易 所更引入印度VIX。CBOE同台灣交易所、德國的Eurex及Euronext達成協議,引入上述股市VIX。市場亦開始計算原油、黃金、外匯及利率的 VIX,形成全球一片VIX熱。VIX最後命運會否一如其他分析工具,因太普及而漸漸失效? [ 本帖最後由 羊仔 於 2008-7-22 09:24 編輯 ]


Share this:

TOP

發新話題