一個人就話三歲定八十啫，一份報紙其實三日已經可以定生死。淫賤黎推出《爽報》短短三日，街坊街里不妨仰天長嘯：爽啊！爽啊！爽死了！
冇錯，爽死了，事關有一個叫阿爽嘅傻仔死了。嗱，有數得計o架。自從阿爽出世以來，鬼打鬼嘅結果就係《蘋果日報》係咁跌紙，跌到簡直趴街嗰隻，每日實銷數量劇減約五萬份。你知啦，爛果報係負責餵料嘅奶媽，萬一奶媽慘遭敗家仔陰乾，乳臭未乾嘅阿爽想唔死都唔得啦！
反觀《東方日報》同《太陽報》，自從減價回饋讀者以來，前者升紙三萬五千份，後者升紙四萬幾份。此消彼長之下，爛果報隨時連銷量第二位都不保，呢家嘢叫做「被爽死了」。
當然啦，淫賤黎嘅如意算盤係最終一日靠阿爽生生性性賺錢養家，即使累到爛果報蝕大本都在所不惜。問題係如意算盤好難打得響，關鍵在於讀者人數完全靠唔住，廣告客戶未必會戇居居受騙。喂，《爽報》自稱發行量八十萬份，先唔講有冇吹水成分，試問有幾多直接送去堆填區？試問又有幾多落到拾荒婆婆手上拎去當廢紙賣？真正去到讀者眼前嘅《爽報》，一個屈尾十攞去包狗屎o架咋！
撇除未派已經變廢紙唔計，不妨又睇睇實際操作情況。壹淫媒係另一份免費報《AM730》嘅承印商，印刷廠每晚先印爛果報，再印《AM730》，最後先至印《爽報》，印完都天光啦，運到市區已經過咗返工返學嘅繁忙時段，派畀邊個阿茂睇呢？天橋底流浪漢都唔夠人手幫你消化啦！
爛果報家陣只有三個選擇：一係減價促銷，不過勢必大出血；二係企硬唔減價，不過會繼續跌紙；三係單方面違約唔再印《AM730》，不過可能要賠償，仲會減少收入。亦即係話，淫賤黎做咗一隻「金翅捉蟲鳥」，橫又係死，掂都係死。
唉，講真，功夫茶覺得爛果報員工係最可憐嘅一群。呢班員工捱生捱死幫淫賤黎打天下，滿心歡喜以為捱出頭來，點不知竟然要養起一大班敗家仔，台灣壹電視又蝕錢，台灣《爽報》又倒米，香港《爽報》燒銀紙之餘更加搶自己飯碗，隨時搞到轉盈為虧，你話係咪可憐蟲吖？
咦咦咦，咪住先，爽死了嘅訃聞有可能提早出現，因為《爽報》宣淫販賤，影視處已經接獲近百宗關於不雅嘅投訴。嗱，影視處唔好又玩包庇縱容呀，唔想子女受到荼毒嘅家長憤怒o架。
點都好啦，東方紅，太陽升，《東方日報》同《太陽報》齊齊升紙，多謝讀者鼎力支持，兩報必定更加努力做到最好！
Share this: 
