標題: 青心直說 - 胡孟青 [打印本頁]
作者: 火煋人 時間: 2010-11-10 09:24 標題: 青心直說 - 胡孟青
青心直說:淡友未就範港股難見頂
2010年11月10日
昨天撰文旨在鼓勵讀者多加留意公司資料,好多資訊根本係公開任大家參考,資產泡沫雖然危機處處,散戶卻未見出現瘋狂炒作,香港距離全民皆股仍遠。
索羅斯眼光銳利,年初已一早睇得起香港呢幅彈丸之地,明顯係計好晒數,咪以為佢家入嚟先至開始追貨,其實已準備食大茶飯。
港股上半年自 21872點跌至 20129點,雖然足足唔見成 8%,同一時期上證綜合指數由 3277跌至 2398點,就足足跌咗 26.8%,香港之所以跌唔足,明顯要拜開放型市場之賜,否則好似內地咁下下要社保基金出嚟頂,塘水滾塘魚嘅結果只會係悶局一場。上半年香港跌得少,絕對唔係單純本土資金可以托得起,邊路資金有咁嘅力量唔使多講啦!
睇市人多落盤卻少
明白到資金推動市背後,恒指原來自 6月初有足足 10個上升裂口未回嘅強橫走勢,股票行及銀行現場所見,睇市禁機嘅人就多,落盤卻少,反映大戶瘋狂唱好之下未有太多勇夫,相信在美國喪印銀紙之下錢財價值已如糞土( Cash is Pain)之高級專業散戶唔信邪對着幹,股滙商品貴金屬一路升一路沽,投行見反正有對手,亦唔介意一邊執錢落袋一邊繼續賭單邊買上,實行先要挾死淡友再算。
市場上實在錢太多,刀光劍影,散戶入市都只係啄啄貢,賺些少就回頭,唔肯落叠。
唔好奢望補晒裂口才入市,因為呢一輪升勢係每個月頭好似啱啱出糧咁挾上去,要回補所有裂口後患就要見番 19729點。
以現時大部份淡友開始投降信呢隻牛三可以繼續養到肥肥白白見三萬點, 2011年預測市盈率才 16.5倍嚟睇,短期守住 24000點龍門,中線 22880點不死,好戲仍在後頭,散戶心態係越高越唔肯買,待回頭覺得抵嘅就唔叫都乖乖上車。
胡孟青
作者為獨立股評人
作者: 火煋人 時間: 2010-11-11 09:42
青心直說:最緊要有 Yield
2010年11月11日
熱錢擋不住,藍籌地產股成功連環抽水,都要多得市場資金肯畀面,從同類板塊地產發展股股價表現反映,市場根據歷史有理由擔心下一隻輪到新鴻基地產( 016)亦無可厚非,配合股價見過高位 147元已相當於較資產淨值折讓只有 5%,亦解釋為何近日股價再上衝之際,反映資金承接力之成交已唔肯跟。
住宅樓寫字樓地舖頻現天價成交,令人好懷疑箇中究竟有幾多個「真」,香港呢個號稱「國際金融中心」,買賣樓舖都一樣淨係騷個成交價畀你睇到嘩嘩聲,之不過細節就唔容易畀你知,例如成交期有幾長、免租期又有幾耐,買方與賣方、業主與租戶之間有幾多關連,尤其用離岸公司嘅交易,都係無從稽考,外人得個估字,而好多人攞新高成交價嚟做指標追貨。
收租股價硬淨有原因
點解話佢哋儍?錢多未必人儍,俾經紀哄抬讚幾句就飄飄然簽約,連只得一厘甚至無 Yield咁滯嘅盤都乖乖落叠仲唔係儍?
樓如果唔係買嚟住就係買嚟投資,寫字樓與地舖如果唔係買嚟自用都好少人會情願丟空等升值,即係會攞去出租,咁即係 Yield大於一切,連租金回報率完全唔吸引嘅盤都搶,即係等於做生意不問回報,唔講回報嘅生意都肯做,不如順便當做善事!
唔好以為低息環境會直到永遠,樓價一旦下跌息口又一旦上升就隨時無得守,咁都視若無睹,仲唔係儍!不過講到儍,又儍唔得過銀行,銀行估價慣常按近期同類單位成交價行事,隨時俾揸住成倉貨嘅樓市莊家左手交右手舞高弄低嘅市場操控行為擾亂。
然而收租股股價表現硬淨係有原因,因為佢哋現價較地產發展股折讓更大,而且佢哋自己就唔愁無 Yield,分到畀小股東個袋就算點小都應該好過家仲跳入樓市追價買樓收租,投資者想食盡收租佬嘅 Yield又要擔保有租收,惟有買房地產信託基金( REITs),碰巧呢個禮拜有兩隻本地商場 REITs公佈業績,字數所限,先行預告,明天再談。
胡孟青
作者為獨立股評人
作者: 火煋人 時間: 2010-11-12 09:44
青心直說:房產信託基金有得諗
2010年11月12日
內地有錢人紛紛想投資移民海外,喺外國起碼唔使擔心細路食到毒奶粉,亦唔怕因為伸張正義由原告變被告,現時已北移內地嘅港人亦紛紛回流。
資金追逐實物資產,內地物價升得比香港更急勁,有報道指同樣 10蚊人仔在深圳可以買 3個蘋果,嚟香港可以買夠 5個;菜價升得更癲,菜心早已由 6蚊斤翻一番見 12、 13蚊,香港大學生呻買唔到樓女朋友唔肯嫁,內地港人連想生活都有困難,咁唔係仲慘過後生遙遙買唔起樓咩!
大學生收息儲首期
通脹肆虐、銀行息低,資金追逐實物,未能做業主者又無需自怨自艾,大半年前已撰文提示買可令你財息兼收嘅房產信託基金( REITs),今日再翻自己舊賬,皆因正值坊間有兩隻屋邨商場 REITs,長江實業( 001)旗下嘅置富產業信託基金( 778)及領匯( 823)均前後腳出業績。
擁有 14個私人屋苑商場收租物業組合嘅置富產業信託基金,零售物業加起有 200萬呎,車位 1660個,每單位基金資產淨值達 5.67元, 9月底止出租率達 98.6%,較領匯高好多,其中 5個商場更加係百分百租出,平均每平方呎呎租 27.7元,負債率 21.9%,息率回報有 6厘。
至於覆蓋全港 4成人口、零售物業組合達 180項之領匯,年物業租金收入淨額係 778嘅足足 5倍,每單位基金資產淨值達 18.73元,出租率 90.9%,商舖呎租 31.4元,續租租金調整率 22.2%,負債率 17.1%,市價較 NAV呈現溢價。但只係有無諗過領匯公屋商場加租與置富私人屋苑商場加租過程與遭遇分別可以好大,弱勢政府綁手綁腳,郁些少都會被抽水,息率回報得番 4厘鬆啲。
大學生買唔起樓唔緊要,反而可以諗下暫時做住商場基金持有人收收息儲首期提升資金回報。
胡孟青
作者為獨立股評人
作者: 火煋人 時間: 2010-11-15 09:32
青心直說:大行分析佢識你唔識
2010年11月15日
投資氣氛熾熱下,市場百家爭鳴,所謂專家被封「聖人」,江湖術士一旦懂得包裝,每每大受擁戴。小投資者不是行內人,手頭數據唔多,王牌明星分析師、大行報告意見,往往令他們如拾至寶。
要數最具影響力的大行,當非高盛莫屬。他們精於閃身快、懂轉軚,一不留神每每成為他們的點心。高盛近年對中國極牛, 4月時更將中國市場列入全球首席推介買入名單之中,而數周前又將恒指目標上調至 29000。當股民瘋癲之際,又是大鱷食指大動之時,高盛數日前公告客戶,撤銷對中資股淨長倉建議,原因簡單不過,就是內地收緊銀根。
報告過份樂觀有保留
政策有變,小心為上是問題不大,但言行要貫徹。剛發現原來上周五另一份同樣出自高盛的亞太區中資股策略研究報告內,又向客戶表明,收緊政策無礙中資股潛力,更建議客戶逢調整吸納。到底,我們要信那一份報告呢?
相比美資高盛的轉身快、識走位,瑞士幫屬樓市大好友,但報告內部份假設似乎過於樂觀:例如要證明樓市健康,就假設兩年內香港人均收入可升兩成多,相信唔少打緊工嘅香港人對這點很有保留;另外,報告內長實目標價是 207元,這點就值得商榷。長實是一隻地產股,旗下有和記黃埔( 013)、長江基建( 1038)、香港電燈( 006),所以長實本質亦是控股公司。
好了,既然長實是控股公司,其每股資產值中,大約 90元來自和黃,一旦扣除和黃貢獻,再參考瑞士幫預測,長實的目標價較每股資產值溢價將擴大至兩成,遠遠拋離新鴻基地產( 016)。如果再扣除長實其他資產,單是本港地產發展及地產投資業務,相當於每股資產值 60元,假設資產市場兩年內真的升 4成,長實本港地產業務約值 84元一股,再按瑞士幫目標價計,長實未來的地產業務溢價豈不是更多!
胡孟青
獨立股評人
作者: 火煋人 時間: 2010-11-16 09:52
青心直說:雙鬼拍門銀行搶閘
2010年11月16日
各大媒體近日鋪天蓋地,洗腦式告知大家重大訊息,就係你手上持有嘅港幣購買力將會嚴重縮水,齋擺銀行有齊存款保障都會唔見一截。
事關假如日日有兩萬蚊人仔限額你都唔好好利用,純粹揸港幣存款,咁過去 3年你肯定已經因人民幣升值而起碼唔見 12%。
炒樓兵團有男有女
只要再考慮埋通脹因素,手持現金腳踏實地存款入銀行原來有如「存款徵稅」,正正經經拒絕炒炒賣賣卻遭市場懲罰。在貶值與通脹雙重夾擊下,形同「雙鬼拍門」,可以預期今日揸得好實嘅一張紅底,兩、三年後就會得番唔夠 80蚊購買力。好多師奶仔有見及此,紛紛為私己謀出路,對冲雙鬼殺傷力。大有大玩細有細炒,所以不時聽到有師奶炒樓兵團出沒,甚至係全男班。
游資充裕、銀行息低,存款擺明無出息, ELN及阿 Q( Accumulator)呢類衍生投資產品又頓成市場寵兒。金融海嘯後,私人銀行銷售人員怕客戶再輸打贏要,打死都唔敢主動推銷。 ELN普通按 25%折讓價接貨嘅股票,又絕大多數係大藍籌如滙豐控股( 005)及香港交易所( 388),以一年到期 ELN計,更可以達到 19%年利率回報,單純與存款息率對比,個客會揀邊樣就真係唔使多講。
最大風險當然係未來 1年之內隻股跌足 25%至接貨位,而接貨後個市轉勢,揸隻正股又要望鄉。
至於阿 Q,今時今日做得嘅通通都肯定係個客做主動,而且都唔會再做 4倍咁多,頂晒籠都係做兩倍;風險當然又係來自要接貨加埋接完貨股價再跌。
然而好多有實力坐貨嘅阿 Q,兩年幾三年前介乎 180至 200蚊接晒港交所後,都紛紛叫做見得番家鄉,所以呢排隻股上到呢個阿 Q重災區好明顯暫難突圍,起碼要完成消化期才有望更上層樓。
胡孟青
獨立股評人
作者: 火煋人 時間: 2010-11-17 10:58
青心直說:香港投資者最弱一環
2010年11月17日
與中資上市公司老闆飯敍,兩家人都帶同家中大小孩互相認識,當話題扯到關於內地與本地小孩子分別時,其現時就讀於本地國際學校中學的大兒子說,內地孩較關心國家大事,相信這是從小培養出來,因為身邊多的是相關新聞資訊,反之港孩對世界政治的關注度顯然不足。然而內地男孩同學間廣為流傳的一段笑話,且看閣下睇完又能有多少體會:
世界 9國的軍力:
一、美國,想打誰就打誰;二、英國,美國打誰我打誰;三、俄羅斯,誰罵我我打誰;四、法國,誰打我我打誰;五、中國,誰打我我罵誰;六、日本,誰打我我讓美國打誰;七、韓國,誰打我我和美國一塊打誰;八、以色列,誰心裏想打我我就打誰;九、朝鮮,誰讓我心裏不痛快我就打韓國。
內地股民睇事好長遠
不得不佩服內地小朋友的水平和視野,期望港孩會攞國事天下事做日常話題,形同妄想。
一直唔明點解內地 A股市場買賣緊嘅同一家上市內銀股,同股同權卻唔同價, H股咁心雄, A股卻咁心慌,差價竟可達 3成之多,而且係 A股較 H股大折讓,內地大型保險公司老總分享其對內地投資者股民為何離棄內銀 A股嘅睇法,聽落甚有道理:內地股民對家事國事天下事睇得好長遠,佢哋已經為下一屆政府新班子經濟政策充滿預見力,眼見國家副主席習近平上月獲任命中央軍委副主席後中央即突然加息打通脹,新班子對嚴查腐敗保經濟嘅意圖甚明顯。
銀行盈利一定好,因為要分紅,只是未來將會因以前借落新增貸款而產生更多壞賬,有排搞,還未計國有股解禁可供減持的新增供應如排山倒海,縱使劃撥社保基金,有秩序回流市場只是遲早的事。大人細路都諗唔通嘅國情,睇怕香港有排都未得以成功與內地融合。
胡孟青
作者為獨立股評人
作者: 火煋人 時間: 2010-11-18 09:29
青心直說:有米精叻大炒家
2010年11月18日
人行行長周小川強調要嚴管流動性,增強貨幣政策之有效性、靈活性及針對性,嚟緊肯定要加息。
一邊打熱錢一邊加息趕游資回流銀行,似乎已成迫不得已手段,最低限度,內地已啟動工資上升配合醫改政策落實,社保基金出入市永遠快人一步,國企 IPO又話要上繳 10%股份予社保,只要政策真正能到位,根本唔需要該擔心因加息影響內需消費意欲。既然長痛不如短痛,人行快快加息吧!
觀察近日股、滙、債、商品期貨翻天覆地,明顯係炒作中國加息收水預期,大戶錢搵錢呼風喚雨之際,地球上更多咗個有米大炒家。
根據日本財務省公佈的國際收支報告,中國自今年年初連續 7個月累計增持日本國債達 2.3萬億日圓後,在 8月及 9月內卻打反手,累計減持 2.4萬億日圓,然而買得最多係 5月,當日圓仍處 93.80/99.79之時,縱要蝕息,淨賺滙水都賺到笑,賺幅隨時 1成有多,食住日圓走勢定揸沽策略,搞到日本仔估估下以為中國有咩陰謀,原來只係搵着數賺快錢,今年以來更加係沽多過買。
炒滙水低回報都肯買
美國財政部剛公佈 9月份世界各國及地區持有美國國債狀況報告,中國依然係美國嘅最大債主,持有美國國債總計 8835億美元。中國近 3個月來連環增持美債,再創今年 4月以來新高。繼 5月及 6月減持後, 7月及 8月分別增持 30億及 217億美元;日本繼續係阿二,第 3係英國,而石油輸出 15國位居第 4,揸住 2305億美元。
我國減持美債之時,剛好就係美滙指數處於 88.45今年最高位之時,近月 5大債主增持動作,好明顯就係預示美元見底回升嘅實際行動。
投資講回報,阿爺挑通眼眉,咁低回報都肯買,如果唔係炒滙水,唔通係出於對美國嘅同情心咩!
胡孟青
作者為獨立股評人
作者: 火煋人 時間: 2010-11-19 09:31
青心直說:瞄準內地新中產
2010年11月19日
即使係長期睇好盈利增長前景嘅行業,入市時機也極為重要,呢一點好老生常談,卻往往知易行難。
6月底至 9月初停牌超過兩個月嘅中國平安( 2318),股價雖然在 9月初後牌至今短短不足 3個月內反彈 56%,回顧金融海嘯以來過去表現,股價也曾經從歷史高位 124元跌過至 22.7元低谷,現價仍距離歷史高位達 26%,與中國財險( 2328)之 35%差距近磅;兩者表現已較中國人壽( 2628)之 36%差距理想。
單把壽險與產業業務擺埋一齊,投資者仍然會揀壽險,只有壽險保單才會出現 15、 20、甚至 25年期嘅長期保單,銀證保合一所體現之協同效益為保險公司發展下去之大方向。
壽險股近期跑出並非僥倖,歸功於市場對加息之預期將會為投資收益帶來提升之好處,息率回報上升將為新增保費收入無論在債券抑或存款均帶來 Yield Enhancement,保險業作為承保與投資並重嘅行業,因此本身透過平安信託持有平安銀行、現時再進一步合併深圳發展銀行的平保,先天優勢已明顯優於同業,股價表現反映市場認同銀保網絡擴張策略。
未來 15年保險業高峯期
現時內地保單持有人保費支出平均佔家庭總收入比重只為 5%, 5年前個人壽險保單平均年保費大約 5000至 6000元人民幣,隨着 GDP與工資水平上升,現時已提升至 7000元人民幣。
中國未來 15年仍未需要面對像成熟地區般人口老齡化問題,正好是發展保險業務嘅高峯期,擁有一支銷售能力極強、效率極高、平均年齡 18.5歲、人數達 2.5萬嘅電話銷售兵團。
2009年新增客戶達 700萬名,投保人平均年齡只有 35歲。每家保險公司均有其自身強項,平保強項就在於其吸客、守客及分銷能力,集中瞄準沿海城市中產階級,配合中國崛起中嘅高消費力新中產階層群體,新中產必需品自然成為投資標的所在。
胡孟青
作者為獨立股評人
作者: 火煋人 時間: 2010-11-22 09:26
青心直說:鱷口求生法
2010年11月22日
一年多的樓市大升勢,市場已變得麻木。明知政府迴避根本問題,市場早已不存厚望,所以相比三數月前,社會上其實已沒有很多聲音要求政府再次出招。
偏偏政府救世主上身,聲言針對炒風,不但要收緊按揭,更要向兩年內短期轉手的交易個案,徵收額外印花稅,但恐怕事情弄到尾,又變成「愛你變累你」。
樓市有起有跌,目前樓價偏高,總有一日會調整,但聰明的高官可能好心做壞事,造成物業市場有價無市,最後扭曲市場自然調節功能,更進一步拖長本應出現的樓市升跌周期韻律。
死守聯滙代價大
物業市場根本是市場重要部份,資金氾濫,硬將投資定義為炒賣,政府落閘隨時可能得不償失。為繼續奉行高地價政策,固執死守聯滙,代價實在太大。
無論股樓,在未能成功壓低通脹與熱錢流入兩個源頭之下,買升自然多過買跌。但港股可以升幾多,外界預測已由 28000至 38000點不等。推斷恒指走勢,往往依靠市盈率是否合理,但預測市盈率能否準確,卻建基於企業盈利前景。目前恒指在 23000點水平,撇開市盈率分析,簡單假設來年恒指成份股平均盈利增長兩成,其實恒指合理值頂多 27600點,再升破這個水平,又係錢作怪。
除非你揀好幾隻派息合理、行業穩定、又或者具備盈利增長潛力的股票長線持有,否則在目前複雜的市場環境下,股票市場短線搵大錢的黃金時間可能已經過去。
要在金融市場這個滿佈大鱷嘅賭場賺大錢,的確困難。行入中環,來來去去不外乎是「有錢人懶,無錢人慳」。針對這兩類人,不如趁明年初延長交易時間,大搞快餐外賣,怕且可以搵到三餐有餘。與其把錢放在大鱷市場擔驚受怕,不如揀呢個方向仲實際。
胡孟青
獨立股評人
作者: 火煋人 時間: 2010-11-23 09:37
青心直說:企業吝嗇有原因
2010年11月23日
年關將至,打工仔又要為來年加薪幅度忐忑不安。金融市場大旺,從業員要有雙位數薪酬加幅唔難,至於非金融界的一眾打工仔又應怎麼辦?按個別僱主團體建議,加幅上限為 3.5%,僅夠抵銷名義通脹率,實質工資已經再出現零增長。
站在企業立場,通脹導致經營成本上升,影響盈利,這亦是僱主不敢貿然大幅加薪的理由,順便理直氣壯說要向股東負責。論經濟,香港目前遠勝八九十年代,但論加薪,當年的雙位數加幅已一去不復返。解釋這個現象,要從企業經營角度,及工人生產力分析。
經營警覺性大為提高
企業經營最大問題是租金成本高企,但這不是近年才出現,最大問題反而是經營警覺性提高,令僱主過份偏重成本控制。經歷樓市泡沫爆破、金融風暴到沙士,能捱過這 8年的企業可說是「見過鬼都怕黑」,形成長期性的好天收埋落雨柴的守業心態。
至於本地工人生產力是否有所提升,足以令企業有條件大幅加薪,問題更值得研究。香港人優點在於拼搏、勤奮、靈活兼轉數高,造就八九十年代的社會繁華,現在部份已貴為精英管理層,部份更功成身退。時至今日,僱主大多埋怨青黃不接,請人容易但能者難求。
近月,企業部門主管忙於進行員工年終表現考核,有主管翻查年內員工病假紀錄,發現 20出頭佔最大比數, 30尾、 40頭的老鬼告病假數字則近乎零。逐一見員工,發現要求多抱怨多的,又是 20出頭的自認明日之星。舊一批員工生產力開始下降,新一代無以為繼,社會富裕教育普及,年輕一代未捱過,但手執學位自以為是,生產力不但沒有提升,更造成新舊兩代對立。
加薪幅度快將揭曉,自問付出努力卻不獲合理回報,理應爭取或早作部署,自認醒目但貢獻有限,又埋怨加薪不足,是時候好好檢討。
胡孟青
作者為獨立股評人
作者: 火煋人 時間: 2010-11-24 09:35
青心直說:圍堵中國旨在售武
2010年11月24日
俗語有話該死唔使病,近期中日關係受釣魚島事件困擾,俄日關係亦因北方四島變得緊張,南北韓就早已有主權之爭的延坪島再起禍端,震散亞洲投資市場,剛巧同一星期美國與南韓就在該島及黃海水域進行護國軍事演習晒冷,北韓乘機借題發揮絕唔出奇。
講到底都係錢作怪,堂堂美國總統,為製造就業職位,頻頻出去跑數已成份內事,可惜因為 QE印銀紙政策,令美國變成過街老鼠,好多新興市場如中國及巴西,都覺得美國擺明搵笨。
美國在大部份領域上唔係開到荼蘼就已是明日黃花,剩下來仍具優勢就只有軍工。 90年代初美國打波斯灣戰爭,出動最先進武器,擺明要向全球展示軍事實力,形同平時 IPO做路演,旨在從外國政府手上攞啲武器定單,只要美國成功攪屎棍,推銷武器話咁易。美國自 7月初已陸續同越南及日本進行聯合軍事演習,巧合的是,中國同日本就釣魚島主權爭議,同越南亦就南海海域有爭端,美國有見及此,當然想盡辦法撥火兼坐收漁人之利。
美國武器有市場
在國家領土安全的大前提上,睇唔到邊個會想慳。以日本為例,最近日本防 衞省正打算向美國 Lockheed Martin訂購 40台 F-35戰機成立下一代戰機群,單機造價已達 6300萬美元(下同)。
與此同時,美國又瞄準印度,早前兩國在冲繩進行聯合軍演,又係為武器進行路演之作。中印將於月底就邊界問題舉行第 14次會晤,奧巴馬早前乘 G20峯會之行出訪印度,獲高規格接待,雙方簽署總額值 100億元的貿易協定,代表創造超過 5萬個職位。印度呢張大單又係離唔開武器,包括 10架總值 41億元嘅 C-17軍用運輸機、 30架總值 24億元嘅波音 737-800型客機,仲有總值 8.2億元嘅 107台 F-414型發動機,用以組裝戰鬥機。
胡孟青
作者為獨立股評人
作者: 火煋人 時間: 2010-11-25 09:30
青心直說:享天時地利聯想雙線出擊
2010年11月25日
電腦,無可置疑係城市人生活一部份,中國內地個人電腦龍頭股聯想集團( 992),市佔率高達 28.8%,大大拋離 HP惠普( 9.9%)同 DELL( 9.1%);來自中國、新興及成熟市場嘅收入,分佔 47%、 16%及 37%。
在講求度身訂做嘅商用電腦硬件供應服務領域,聯想喺成熟地區嘅相關業務收入佔比高達 85%。而未來 10年最值得睇好嘅新興市場,離不開印度、俄羅斯及南美洲尤其係巴西同智利,聯想於當地市佔率為 9.2%、 8.3%及 4.8%。過去幾年,聯想致力於成本控制,未來將加強新興市場佈局,及在本土市場以農村包圍城市,以四、五線城市為主嘅擴張步伐。
轉戰智能手機
智能手機毛利遠高於個人電腦,重新進軍移動電話市場嘅聯想,明顯係預見未來 10年手機將成為比電腦更普及的生活必需品。
聯想同時替中移動( 941)生產 OPhone、同聯通( 762)合作生產樂 Phone,前者聯想只負責硬件部份,去年 8月開始發佈嘅 OPhone用中移動自主 OMS系統界面,支援 TD-SCDMA制式,被認為係中移動失落引進蘋果 iPhone,退而求其次轉戰 Android平台。
綜合網上用家對兩款智能手機的評語, OPhone外觀不俗、屏幕夠大,價格亦吸引,但致命傷係容易死機、機身過熱而且反應慢, TD網則稍嫌未夠穩定。樂 Phone最大問題反而係屏幕供應商韓國三星電子,對方新近推出 Galaxy智能手機,當然獲優先配合零部件,樂 Phone同 HTC智能手機就成為犧牲品。
總部位於美國嘅 ISI Group,上周日出咗一份 39頁嘅聯想研究報告,標題係「 Right Place, Right Time」,即係「天時、地利」,報告右上角例牌有目標價,定到上 7蚊,仲話埋畀你知個目標價點樣計出嚟,唔係憑空構想。
不過,個報告最值得參考嘅部份,反而係佢對競爭對手現狀、個人電腦、伺服器同智能手機嘅市場環境分析。
胡孟青
獨立股評人
作者: 火煋人 時間: 2010-11-26 09:32
青心直說:保增長忍通脹得不償失
2010年11月26日
內地 10月份通脹率高達 4.4%,超出 3%的目標,所以有疑似放風以收集反應嘅「消息」話,中央有意把明年通脹指標定為 4%,但似乎有違近期透過收緊信貸同管制物價以壓抑通脹嘅大方向。
10月份食品價格同比上升 10.1%係通脹元凶,嚴打操控農產品同商品價格,已成為調控主要手段,人行自 10月 19日出其不意宣佈加息後,遲遲未再出手,明眼人都知係要保住經濟增長。
調控政策要收效,就要擇善固執堅持到底,否則只會削弱政策功效,搞到唔湯唔水虎頭蛇尾。《人民日報》評論文章話到明「不會以犧牲經濟增長和打壓股市為代價」,要成效就要付出代價,股市內有咁多同農產品及商品市場血脈相連嘅資源同原材料股,難道可以不動如山?
拖累資源股難維穩
最佳例子要數近期內地嘅柴油荒,根源係因為發改委遲遲唔肯按成品油調價機制啟動加價。「石化雙雄」中石油( 857)同中石化( 386),既要面對人民又要面對股東,惟有惜售或放慢銷售速度以自保,尤其係當零售價低於批發價,邊個仲會肯為人民服務犧牲小我?
煤電聯動就係典型失敗中嘅失敗,只有電廠才會慣性就範,亦因為咁,國策變相幫投資者收窄選股範圍,可以睇少一瓣。做生意最忌唔加得價,冇議價能力且多做多蝕嘅生意,根本唔應該攞出嚟上市獻世搵小股東笨。
一支針無兩頭利,通脹本來就係被動嘅指標,高通脹更加係不能容忍嘅現象,原因係當經濟增速追唔上物價,利用加息呢個貨幣政策應對,至係最有效嘅打壓通脹手法。透過加息,資金熱錢會再衡量炒作風險同回報,喺唔同風險度嘅資產之間再進行分配,總好過俾機會成本極低嘅 Easy Money搞垮,經濟增長目標反而可以調低啲,應壓唔壓,唔應保卻保多咗。
胡孟青
作者為獨立股評人
作者: 火煋人 時間: 2010-11-29 09:33
青心直說:當 QE遇上飛彈豬
2010年11月29日
得悉東尼因病決定封筆,總帶點惋惜。多年來,閱讀老人家的每周觀點,成了生活的一部份。失去的,永遠是最好。祝願東尼早日康復,再為廣大投資者指點迷津。
東尼被封為亞洲第一股神,背負股神這個重擔,他從不為證明實力而改變原則追求短線回報。東尼從來堅持的是價值投資,按照由上而下的宏觀經濟分析,選出有潛力行業,再按估值選一隻好股,然後長期持有。
基於長期價值投資的理念,東尼從不推介二三線短炒股。環顧其組合,他的最大期望仍然是滙豐控股( 005)。去年初,滙控世紀供股令市場恐慌,東尼直認對此失望,但仍堅持供股作為對愛股的支持。後來,市況回穩,滙控股價仍落後大市,東尼繼續按前景、估值,深信滙控總有一天會重上 120元。可惜事隔近一年,滙控仍在 80元關前止步。東尼對滙控有情有義,但論股價表現就似乎欠他一個公道。
伯南克印鈔令 10月避過傳統跌市,衰就衰在錯估通脹預期,令 QE2暫失效,北韓飛彈事件,已證明伯南克敵不過金正日,數月前的資金市,已經變為飛彈市。
年宵攤位跌價惹憂
要數當今搵錢最易之人,非金氏父子莫屬,只要假裝太平盛世,趁市況上升,造一點淡倉,沽數張期指,然後㩒掣發射飛彈,製造恐慌,股市大跌,到時大地就在腳下。
飛彈以外,歐豬又怎能忽視?年初一輪升市, 8月另一次升市,均先後被希臘豬及愛爾蘭豬擊倒。歐債危機一旦稍為淡化,市況又如常熱炒。飛彈+豬似乎已成為抗衡印鈔機的最大殺傷力武器,亦是金融市場短期恐慌的源頭。將來投資者仍然要處於熱錢與歐債的狹縫中,缺乏東尼耐性的價值投資者,會有更多舉手投降。年宵攤位競投成績,往往成為來年經濟及市況的指標,偏偏今年競投跌價,難道是凶兆?
胡孟青
獨立股評人
作者: 火煋人 時間: 2010-11-30 09:31
青心直說:俄鋁誠意打動投資者
2010年11月30日
近期陸續有新股擱置上市計劃,最新打退堂鼓係來自俄羅斯嘅最大私營電企 ESE,大股東俄羅斯富豪 Oleg Deripaska旗下之俄鋁( 486)於今年年初上市以來,明白大家對俄羅斯國情所知有限,積極做好投資者關係,作為首家來自俄羅斯嘅上市企業,肩負要做好業務為其他同胞鋪路來港之重任,致力提高透明度。
公司旗下公關部門分為兩個部份,投資者關係及公共關係;前者主力面對機構投資者,主管係來自美國華裔資深律師,唔單止對公司業務瞭如指掌,更加成為我們香港交易所( 388)及港府高層前往俄羅斯打交道洽商時嘅盲公竹;後者專責處理對外關係,皆因兩者所面對之對象背景不同,問題也當然不一樣。
勝在擁有鋁土礦資源
上市公司為咗令本港投資者更了解俄羅斯,最近更在收費電視贊助咗一個專題節目,節目把當年亞洲金融風暴及俄羅斯債務危機下之風風雨雨及人民今天的生活與當年形成強烈對比。
當年不少對經濟前景感失望而遠走的國民,今天回流大展拳腳。節目反映上市公司對呢個市場嘅一份誠意。
俄鋁較中國鋁業( 2600)優勝之處,係前者擁鋁土礦資源,年產量超過一千萬噸,有調查報告指俄鋁之鋁土礦資源達 18.35億噸,雖然整體業績表現仍較反覆,投資價值將繫於中國在鋁土之對外依存度繼續高企,現時鋁釩土對外依存度仍超過 50%;只要中國一天仍然係淨進口國,主攻出口的俄鋁就唔使憂。
還有一點,俄鋁成本結構先天條件優於中鋁,前者用水力發電,後者則主要用火電,雖然俄鋁股價波幅短期仍未擺脫 10元 8塊區間,年初至今卻總算跑贏中鋁,尤其當每手股數由 2.4萬拆細至 6000後即將再拆細至每手 1000股,投資者在揀股時就多一個選擇。
胡孟青
獨立股評人
作者: 火煋人 時間: 2010-12-1 09:32
青心直說:股壇維基解密
2010年12月01日
股市小炒王身邊廣佈線眼,有如股壇維基解密,話近期市場上多咗好多失驚無神升到失魂嘅細價股,共通點係股價長期點穴而且欠成交,卻紛紛出現基因突變,升勢銳不可當。
偶爾會見有個別知情人士趁幕後大老闆收齊貨在適當時候配合,利用自己地盤推波助瀾,急 call散戶上車;更多股價突然變靚,平時唔多見有打手出嚟寫出嚟講,到食大茶飯時無升番一個 double唔會收手。
佢哋嘅散貨對象根本唔係我等平凡嘅人,而係近年在坊間增加嘅基金,這些基金多數係由出身唔錯嘅年輕「金融才俊」主理,共通點係出身於大中小型投資銀行,做過 M&A併購、 ECM甚至做過 Analyst寫過幾份研究報告就出嚟自立門戶。
散貨對象不是一般人
而散貨畀佢哋接嘅又係一眾簡稱 PE嘅私募基金,慣用伎倆係發掘一些缺乏照顧嘅「殭屍股」,首選條件係貨源歸邊,才容易先收集後挾上,橋唔怕舊,呢招趁市旺熱錢多之時最受落。
唔覺唔覺可以翻一番,時辰一到就再挾高,市場見升到唔信就以為係筍嘅,誰知只不過又係借資金炒作,再散畀按捺不住嘅基金,當缸邊散戶越升越唔敢追,基金以為可以唔計較估值,至緊要歸邊買些少傍身,因為佢哋明知再挾上去見過高位之後,落番嚟自然有散戶落搭。呢個如意算盤打唔打得響,好睇音樂係唔係繼續播放,熱錢繼唔繼續炒作。
有說近年不斷公開不利美國政治形象、衝擊美國核心價值機密文件嘅維基解密,背後除咗有 CIA外,更加有索羅斯潛伏其中。有消息更指,網站下一個要攻擊嘅目標就係美國一間大銀行,究竟會幾時爆破,且拭目以待。
陰謀論睇,好可能等大鱷成功在高位以唔同名目建立大量淡倉,現貨速逃後,再向市場放毒,把壞消息無限放大,配合歐洲明年到時到候銀行 call loan,咁就天衣無縫正中下懷。
胡孟青
作者為獨立股評人
作者: 火煋人 時間: 2010-12-2 09:26
青心直說:尋找港版 TPK宸鴻光電
2010年12月02日
觸控屏幕稱得上是與現代生活息息相關嘅朝陽產業, 10月底台灣有一家供應蘋果 iPhone及 iPad近 5成 Glass Type P-Cap觸控面板之設備供應商 TPK宸鴻光電掛牌,首日登場股價即飆升 1.3倍至當日收市 505元台幣,招股價 220元台幣。
上星期巴克萊研究報告更把目標價睇到 718元台幣。由於市場看好其正宗蘋果概念,加上觸控面板市場需求持續旺盛。 TPK現價 694元台幣,往績市盈率已達 58.7倍, 2010年市盈率則已降至 35.6倍,以公司收入單是 10月份已較 9月上升 20%, 2011年全年收入及盈利可分別再升 45%及 72%預算,現價只相當於 2011年市盈率 20.6倍。呢間公司於 06年已獲蘋果認證,獨家供應 iPhone及 iPad嘅觸控屏幕,無咗佢哋呢塊玻璃,兩件產品都會即時廢晒武功。去年蘋果佔 TPK營業收入之 45%,今年首 3季更達 70%,第二大客戶 HTC則佔其 20%營業額;作為蘋果 iPhone及 iPad觸控屏幕產品最大供應商,宸鴻營收主要動力預期繼續來自佔 iPhone出貨量 55至 60%及 iPad出貨量 40至 45%之面板需求。
指模辨認器需求增
檢查一下自己嘅手袋同埋屋企,包括智能手機、電子閱讀器及個人電腦在內,除咗觸控屏幕之外,加加埋埋究竟有幾多係已內置指模辨認器嘅產品,在私隱越嚟越重要嘅社會,相信利用指模鎖機開機嘅需求將越嚟越多,尤其是係較容易失竊嘅手機;還有充電之電子裝置,多用途無線充電裝置將會成為市場主流;還有去年港府推慳電燈膽無疾而終,當大家以為 LED燈價錢雖然較貴但勝在環保,符合國策節能減排之目標,原來市場上已出現咗製造成本較 LED燈更便宜的替代品。
以上幾類產品都係源於科技發明應用領域,本港市場就正好有一間堪稱 TPK宸鴻光電之影子股可供投資者選擇,還要係 TPK在整個觸控屏幕產業鏈上嘅夥伴,在其上再加送指模辨認、無線充電及照明技術幾個電腦周邊設備嘅企業,想知究竟係邊間?明天開估。
胡孟青
作者為獨立股評人
作者: 火煋人 時間: 2010-12-3 09:32
青心直說:世達科技諗得過
2010年12月03日
唔好以為電腦科技都在台灣,香港就有一家成立於 1996年嘅土炮世達科技( 1282)正在招股,招股價由 6月時 1.3至 1.7元,降至 0.85至 1.05元,相當於 11.9至 14.7倍備考全面攤薄預期市盈率,集資最多 9.04億元。
集團主要業務為筆記本型電腦之電容觸控板供應商,呢塊 Touch Pad已成為當今手提電腦必需品,冇咗佢乜嘢手寫辨識甚至當滑鼠嘅點擊功能都會即時報廢。集團主要為美國上市嘅電腦觸控板 ODM供應商 Synaptics( SYNA)生產觸控產品,客戶包括華碩、宏碁、戴爾、惠普、索尼、東芝及 Gateway。根據市場研究公司 iSuppli資料, 08年 SYNA佔全球 Touch Pad市場 59.1%, 06至 09年售出 2.45億塊。
世達自 1998年與 SYNA合作,過去 3個年度及今年上半年向 Synaptics銷售電容觸控板及其他產品(包括多媒體按鍵及電容觸控屏幕元件),收入分別佔集團年度收入約 93.4%、 98.9%、 79.4%及 57.9%。比重下降,係集團喺指紋辨識產品 ODMs/OEMs及無線充電器及等離子照明設備分銷領域收入上升,有助分散風險兼瓣瓣都係商機。
瓣瓣業務有商機
在觸控板產品供應鏈上,主要參與者包括:觸控板集成電路供應商、觸控板製造商及銷售商、筆記本電腦及電子產品 ODMs/OEMs,及消費電子品牌。世達屬於電容觸控板製造商,生產過程一直應用本身具領先市場優勢之 SMT及 COB相關生產技術及經驗。昨天提及嘅台灣宸鴻光電,都係世達其中一個主要合作夥伴。投資者將來要為集團做交叉參考非常方便,皆因只要佢哋生意好,世達唔衰得去邊。
有心唔怕遲,延遲招股對投資者好處係可以睇多一盤中期業績。今年上半年純利 1.04億元已相當於去年純利之 68%,手頭現金 9997萬元,總負債 3.11億元,負債率 41%,集團業務及盈利正處於高增長期,瓣瓣都係寶,加埋有非常熟悉了解行業前景嘅台資基金入股成為基石投資者,擺明係鳳凰無寶不落。
胡孟青
獨立股評人
作者: 火煋人 時間: 2010-12-6 09:20
青心直說:富貴收租佬
2010年12月06日
上周多個國家的採購經理指數異常突出,數字似乎顯示全球經濟活動未有減慢,但英國《金融時報》作出詳細分析,認為外界不宜對數據有過份樂觀結論。內地官方採購經理指數升至 7個月高位,未受內地收緊銀根影響,但細分數字組成部份,新增定單增長遠低於投入成本,反映企業經營正面對成本上漲蠶食。至於歐洲一邊,以英、法、德表現特別突出,英國採購經理指數更升至 17年高位,但存貨增長高於定單,而且在資金充斥下,數字可能有所扭曲。
萬邦或屬最貴收租股
如果相信租金及經營成本將爆升,近日熱炒的零售股其實最受影響。業主少則加租 5成,多則倍升,就算來貨價不變,零售商營業額要有相同升幅才可抵銷租金加幅。大如一間大家樂( 341),亦抵受不起成本上升的影響。分析員重視毛利,一旦發現毛利跌,整個零售板塊將進入預測下調周期。
事後證明,太古( A, 019)年初擱置分拆太古地產非常明智。金融機構相繼進駐香港,加上零售租金上升,收租股較地產股更具潛力已成為業界共識。收租股有價,一隻萬邦投資( 158)原來已升至較資產值有溢價水平,隨時是全港最貴收租股。萬邦主要資產為中環核心地段的萬邦行,及上環金利商業大廈,租金收入穩定兼有淨現金。
要搵質素價值兼備的收租股,其實非中環大地主置地莫屬,每股資產值 9美元,較之現價折讓兩成有突,估值吸引,但衰在再不是香港上市公司,業務在近股票卻在遠,惟有隔山買牛。
另一家擁有本地最貴重零售地段收租物業組合的百年老店九龍倉( 004),當中海港城佔香港零售業銷售總額近 6%,而自由行客購物勝地之海港城及時代廣場,更佔集團總營業資產 51%及經營利潤 63%,現價較每股資產值折讓近 3成。
胡孟青
獨立股評人
作者: 火煋人 時間: 2010-12-7 09:52
青心直說:難為了內銀
2010年12月07日
一如所料,內地正式結束歷時兩年的寬鬆貨幣政策。剩下來,最關鍵是來年的新增貸款額度,這不但能真正反映內地經濟政策及增長指標,更左右內銀股的表現。
從內地傳媒報道,明年新增貸款額度只會輕微減少,最後金額可能是介乎 6.5萬至 7萬億元,較之今年目標僅縮減最多 1萬億元,顯示中央政府背後盤算,仍然是繼續靠推動貸款,製造資金去帶動經濟增長。
內地口口聲聲要加快經濟結構轉型,推動內需。但骨子裏暫時仍然是以追求高增長為首要任務,因為高增長不但有助中國在現今大環境下增加話事權,而且更能盡快達到提高居民收入,達到建立小康社會目標。既要控制通脹,又要有高增長,是當今甚至可見將來的中國經濟政策矛盾。
加息成唯一出路
內地的確出現大量資金氾濫,但近期貨幣政策的舉動又反映當局進退失據,盤算錯誤。擔心熱錢流入及影響經濟增長,人行不願加息,卻選擇大幅上調存款準備金率。但目前出現的是,內地短期資金出現緊張,而且在加息預期升溫下,二手票據市場利率上漲。再運用增發票據收緊流動性的貨幣政策工具效能已大為失效。要抽走過剩資金,加息已成為唯一出路。
過去 10年,領導人聰明之處是學會運用銀行投放資金,及利用金融市場付鈔的遊戲。早年眼見銀行業大量壞賬,中央先來個大量向銀行注入資金抵銷壞賬,然後透過將銀行上市套回資金。
金融海嘯的出現,歐美不景氣更壯大了祖國問鼎經濟強國的野心。銀行業又再大派用場,谷大貸款基礎推動經濟,但造成銀行資本充足比率下降,最後銀行又被指令伸手集資。
所以,內地這兩年的高增長,並非來得必然,背後最終是要由銀行股東付鈔。
靠貸款增長推動經濟的方程式越是繼續,內銀股越會受政策不明朗因素影響。
胡孟青
獨立股評人
作者: 火煋人 時間: 2010-12-8 09:18
青心直說:最瀕危受保護板塊
2010年12月08日
中國要增加在全球經濟影響力是無可否認的事實,但要達到目標真正發揮在經濟及金融市場的影響力,似乎我們仍然欠缺一家具影響力的國際性金融機構,能有高盛般的能力可以左右市況。
現今全球 5大市值金融機構,最少工商銀行( 1398)及建設銀行( 939)名列 5強,但市值歸市值,無論工行及建行都仍然係受保護動物。上海金融辦主任方星海說得對,內地過份規範銀行業,兼且不由自主備受指指點點,其實就是中國經濟加強影響力的最大阻力。
應取消新增貸款目標
近期有中資機構亦學識招聘外援建立西人為班底的團隊,從而提高認受性。但招聘洋人只是權宜之計,中資企業文化不改,繼續故步自封,其實越難達到國際化的道路。
作為社會主義經濟體系,內地仍然沿用一套計劃為主、市場為次的制度,年年靠設定貸款額目標,以及分配貸款類別去配合計劃經濟運行。但演變出的問題卻是號稱商業銀行,但實際仍然由國家主導,無論貸款政策以至風險管理均由國家安排,凡事問國家,金融機構難以自主發揮本身優勢,當然難有進步。
政策性貸款好處係有助資金配合社會發展導向,避免因短視而過份把風險集中,只是大國已經崛起,銀行也應該表現出已長大成人,凡事從商業利益出發、按股東利益着想考慮。凡是不按常理出牌之決策,當中更會牽涉許多利益瓜葛,反而會增加金融風險。當投資者明白到所買的內銀股是如何不由自主,所謂現價仍然便宜究竟是真的咁大隻蛤乸隨街跳還是應有的折讓已不攻自破,好期望內銀有朝一日被重新放入樹林按森林法則打世界波,畀大家一睹其真正實力。
要創造真正國際級金融機構,當務之急是盡快取消每年新增貸款額度目標,放棄計劃指導貸款,這是一個最基本的開始。
胡孟青
作者為獨立股評人
作者: 火煋人 時間: 2010-12-9 09:37
青心直說: IPO大刁好睇唔好食
2010年12月09日
有做開財務融資嘅朋友爆料,話行內上市保薦人生意其實唔易做,大大隻嘅雖然早已成為大行囊中物,皆因資本唔夠大嘅行,根本食唔起,無資格接大刁。不過就算係大刁,淨係最大嘅幾家國際級班霸都隨時爭崩頭,個個咁高咁大,好似早前睇專門報道亞太區大小 IPO及債務融資市場大刁嘅 FinanceAsia雜誌,其中一篇專題報道,關於打造農業銀行( 1288)世紀 IPO故事。今年 7月 16日掛牌嘅農行,竟然在 4月復活節四日長假期前,才邀請一眾大型投資銀行 pitch for a mandate,呈交建議書推銷自己加入成為呢單世紀 IPO嘅全球賬簿管理人及包銷商一份子。
農行 IPO支出少過工行
當時正值復活節假期,班投行賓架紛紛取消晒所有外遊計劃,適逢當時大摩趁幾日長假期提升電腦系統,賓架們唔能夠直接由屋企發功隔空取物,結果要親自返公司搞建議書,好彩大家對農行呢單刁早已做晒功課,等佢上市獲批,即執齊料呈俾個客攞生意,到最後 4月 15日坐埋一枱開會時,打擂台勝出有份參與嘅投行就剩番九家,所以話機會永遠只係會留俾有準備嘅人。
有份一直參與農行艱巨而漫長重組任務之中金國際,獲委任一腳踏晒 A、 H兩邊嘅 IPO上市招股工作,其餘八家投行就以 3家中資對 5家外資分工,負責 A、 H股中港兩邊 IPO工作。
農行成單刁最終集資規模約 208億美元,但傳聞 IPO支出涉及承銷費用部份就只係 2.48億美元,付費比例係內地四大上市銀行中最低。根據消息人士話,支付香港 H股 IPO部份的承銷商費用係 1.4%,即相當於 1.47億美元。工行( 1398) 2006年上市時集資 219億美元時支付費用卻達 2%。由農行對投行嘅議價能力就可見中國有幾「崛起」,爭崩頭嘅項目原來可以好睇唔好食,卻擺到明要硬食。
胡孟青
作者為獨立股評人
作者: 火煋人 時間: 2010-12-10 09:34
青心直說:見慣劈炮市場已麻木
2010年12月10日
投行中人話,今年生意唔憂做,就係正因為市旺,眼見大行都肯紓尊降貴大小通吃,中小型行豈可唔加把勁;正因如此,唔少公司其實未夠班都搵人幫手搞上市,保薦人為唔想失客都會盡量想方法盡幫,投資銀行家入去協助整頓一番,有些甚至連投行中人都話有啲搞唔掂嘅話,就索性派埋會計師入去整靚埋盤數,總之過咗海就神仙。
對分析員而言,上市公司財務總監嘅去留與更換核數師同樣具特殊啟示性,值得高度關注。 2000年離開工作 7年嘅中資銀行時,走咗出去加入一本地華資券商,適逢該公司搞緊上市,需要一位合資格財務總監,呢家券商從第一日打開門做生意都未曾被證監會採取過任何譴責或執法行動事件,自己加入之前都做齊盡職審查,唔係貿貿然過檔。
財監去留 值得關注
根據聯交所公佈資料,今年 7月才上市嘅鉛酸電池產銷商超威動力( 951),財務總監就於上周辭職,呢位仁兄咁快就起身,擺明係純為公司上市; 8月底才上市嘅耀才證券( 1428),繼公司秘書於 10月初辭任後, 11月初再宣佈執董兼財監辭任; 5月初才上市嘅朗生醫藥( 503),集公司秘書、財務總監及銷售代表於一身嘅仁兄於 9月底辭任,共通點係位位辭任嘅理由都係一樣因為個人事務及發展,實情係因為水土不服?抑或有其他不可告人之原因?真係耐人尋味!去年 6月上市嘅中國金屬再生資源( 773), 11月時曾經因為財監辭職導致股價暴挫,今年 10月再有獨董請辭,股價卻唔只毫無反應,竟然越升越有,似為其贈興。今年 9月銀基( 886)嘅 CEO及 FC辭任,股價即時插水 1成,不過之後就反而節節上升屢創新高,唔通係有人唔走反而會阻住地球轉?
不知是否因為同類事件發生得越來越頻,所以大家嘅容忍尺度已經降低?我咁大個女真係未曾試過一份工做唔夠半年就劈炮。
胡孟青
作者為獨立股評人
作者: 火煋人 時間: 2010-12-13 09:48
青心直說︰經濟數據博弈論
2010年12月13日
多得維基解密,內地數據假及不可靠的公開秘密,終於有國家領導人親口承認,副總理李克強說明,內地數據只可參考,不能盡信。
既然如此,內地目前經濟過熱程度,可能遠比想像中大,至少通脹問題亦較 11月 5.1%的表面數據,來得嚴重。
發放數據速度驚人
大多數經濟學家都不相信由政府發佈的經濟數據,而內地情況更實在有太多值得商榷地方。祖國地大人多,但偏偏發佈國家層面的經濟數據效率奇快,近乎冠絕全球。
一個關於全國 13億人口物價指標的居民消費價格指數,涉及全國食品價格、生活必需品價錢、住屋租金等,竟能於每月完結後兩星期內發放;季度經濟增長數據,更能在季度完結後三周內發表,而且更唔會像人口僅 3億之美國般,因為部份例如來自零售層面提供的每月問卷調查未及回應計入,而把部份如指標之母 GDP經濟增長數據般分段公佈初始及經修訂數據。
中央聲言要保民生,在目前負利率超過兩厘環境下,資金為求保值不能再存放銀行,居民存款過去兩個月減少 5千億,本應就一早要加息。但當局情願上調存款準備金率,亦不願加息,再次說明在目前內地複雜大環境下,在太多糾纏不清之利益關係下,中央唯一只可向銀行業落手。作為銀行大股東,刺激經濟靠銀行貸款,調控經濟就收緊銀行貸款,已成為當局獨步單方。
內地不願意加息,大多數意見認為是當局擔心與美國息差進一步擴大造就更多熱錢流入,人民幣升值預期升溫;但其實這已是長期性問題,加息與否都不能改變。遲遲不加息,背後原因可能是反映一直存在的中央及地方政府長期博弈問題。由於債務重重,要加息增加債務負擔,地方政府當然要據理力爭。站在中央立場,借控制物價及保障民生為理由,放棄市場手段,改為行政主導向地方政府施壓,亦是奪回主導權的上佳策略。
滙控( 005)近日發表有關中國經濟的研究報告,報告詳細論述各省縣市的經濟現狀及前景,證明中國經濟實力可能遠比外界估計的大,並推斷 10年後內地最少有 6個省分,生產總值會超越 1萬億美元。
胡孟青
獨立股評人
作者: 火煋人 時間: 2010-12-14 10:07
青心直說:調控無從入手有原因
2010年12月14日
中國地大,不同省市具備不同優勢。 30年來,部份省市充份利用天然資源,部份利用低成本勞工發展工業,有些則主攻高科技,形成地方政府具備獨有不同優勢,「得上海得天下」已不再是事實。成為省領導當上中央權力核心、甚至最高領導人的入場券,在政治意識形態由黨主導的情況下,要搞好政績,惟有靠谷高經濟,形成地方政府之間不斷競爭。
中央之前要調控樓市,但影響到地方政府地價收入,執行固然困難。現在,中央強調要調整經濟結構轉型,由穩定增長取代追求平穩較快增長目標,但對追求政績的地方政府,要他們放棄高增長目標又是難上加難。
經濟要轉型,大部份內地經濟學者嫌「保八」目標過高,但大部份省市已制訂的未來 5年名義經濟增長目標,原來絕大部份均繼續以錄得雙位數經濟增長為首要任務。其中,遼寧定出未來 5年,每年增長目標 19%,屬於全國最高。較窮的貴州,亦將增長目標定於 13%至 18%。
政策對立增長失控
一個溫州,炒樓團聞名於世,這裏亦是全球最大的打火機及皮革用品生產地。常用的手提電腦,全球逾半數是來自江蘇的崑山,當地去年人均收入超過 3.8萬美元,屬全國最高而且遠超香港。遠至內蒙的鄂爾多斯,受惠 8成土地含有煤炭及天然氣,此處亦成為其中一個全國人均收入最高的城市,去年高達 2萬美元,直逼香港。試問形勢如此大好,又怎願奉命將經濟降溫。
上有政策、下有對策,這句說話正正套用於當今中國經濟發展情況。中央要搞經濟轉型,省市級地方政府要大搞政績,形成政策對立。過去 10年,內地經濟多次出現增長失控,調控無從入手的情況。
為應酬中央,地方政府上報經修飾的數據不難理解,遊戲規則不改變,內地經濟數據的確不可盡信。
胡孟青
獨立股評人
作者: 火煋人 時間: 2010-12-15 09:38
青心直說:明年大市會點走?
2010年12月15日
銀行利息低,連準大學畢業生也對手上資金貶值感到無奈,正想小試牛刀,學習穩健投資的學問,但眼看最近股票市場充滿炒作味道,又不太敢入市,請問如果想以半年為期作一些小投資,應該怎樣選擇?
以上係一個 Y世代的提問,假如要盲目地為投資而投資,那麼貶值也總要比輸錢好,小注慢慢一邊累積投資經驗當然無妨,記住小試牛刀可以,但千祈唔好用牛肉刀、斬骨刀,人人都知高風險高回報,但係我哋只會選擇可承受得起之風險。
另外,低風險卻未必就係低回報,因為只要揀啱投資對象,低風險投資嘅公用股息率較銀行活期存款息率高,問題在於點樣掌握入市時機,因為即使係高息股,當你入市時同樣係股價處於高位時,息率回報當然相對打折扣。
另外低風險唔等於低回報,情況亦會出現於投資者對投資類型或產品之誤解。自從金融海嘯後,投資者應該明白建立正確理財觀念及投資態度的重要性,例如對分散投資風險的考慮和要求會更強烈。獨立思考亦需要依賴基本預備功,才不致出現走火入魔,每當市況暢旺人人都想學番一招半式之時,坊間就會出現許多正宗王道甚至近乎怪力亂神的怪論課程,務求趁市旺人狂吸金。
港交所、和黃可小注吸
Y世代只要不是一出道即一心抱着不勞而獲心態,謹慎分析事物可信性,便會很容易識破伎倆避免受騙。擁有分析能力仍然不夠,也要有具理論基礎的批判精神。
現階段要在好股多半已被炒至估值不再吸引的水平入市,還要以半年為期,我只會小注分段考慮香港交易所( 388)及和記黃埔( 013),較穩健選擇係有高息率搭夠的房地產信託基金( REITs)或趁個別相對資產淨值折讓大及具加租能力的商場收租股。
雖然資金氾濫,但就算不加息,半年後市場應該要開始反映來自今年高基數及原材料價格上升,對不少已充份反映估值股份肯定係考驗,且看明年第 1季後如何好戲在後頭。
胡孟青
作者為獨立股評人
作者: 火煋人 時間: 2010-12-16 09:55
青心直說:港股後市考驗合唱團誠意
2010年12月16日
大戶嘅世界,邊個錢多邊個玩晒,要炒上炒落總有大把藉口。歐洲火頭處處,國債危機陰魂不散,就算自己國家好掂如德國、法國及英國,國內金融機構對歐豬國貸款規模分別超過五千、四千及三千億美元,炒家可以利用歐豬五國輪流發功,評級機構繼續做幫兇又或者反過來被炒家利用。點解內地 A股跌些少, H股指數可以跌超過 2%?何解亞太區股市唔使點跌,香港會跌成 500點?唔通亞太區只有香港一個市場同歐洲關係密切?對歐盟出口佔國家 GDP比重超過兩成嘅新加坡,都只係跌 0.94%咋!
近期大行紛紛發功話港股抵買,以 14.5倍 PE點計都唔貴,怪就怪過去幾年會計制度同稅制扭曲港股 PE,地產股要將投資物業公允值變動放入損益表,呢幾年資產價格水漲船高,盈利多少會有水份,仲有去年內銀利得稅由 33%降至 25%後,再有 4萬億元人民幣刺激經濟,一切都係由一次過效應得來,實質 PE究竟有幾高,天曉得!
要震散港股,關鍵係成交要夠薄,趁假期氣氛濃厚投資者無心戀戰,更有利放大低成交挾倉或震倉嘅殺傷力。
大行轉軚唱淡有因
既然市場唔理性,亞太區只有香港先玩點穴後玩儍跌,以為睇住內地 A股做頭跌得唔多香港就唔使跌,一向都係大錯特錯,好嘅時候就當然應驗高盛嗰句香港點只有中國概念咁簡單,衰嗰陣就只怪香港係開放型經濟體。投資者見呢兩日開始有大行出嚟轉軚唱淡港股,只係等於話俾大家知佢哋已經勝利大逃亡,甚至打咗反手球。
信今年年底恒指目標水平嘅投資者留意,向來最拿手吹奏魔笛嘅大摩,上周繼續好保守咁算到港股年底目標見 26193,希望呢家大行唔好忽然離年底不足兩個星期至轉軚甚至玩 Handbrake Turn,當然,衷心希望明星分析員睇年底見 27500會開口中,換言之恒指有近兩成升幅,唔該有份睇年底 26000目標而未轉軚嘅一眾大行同心協力出嚟幫個市托一托,發揮合唱團嘅團隊精神。
胡孟青
作者為獨立股評人
作者: 火煋人 時間: 2010-12-17 09:44
青心直說:內地樓價平=何不食肉糜?
2010年12月17日
大陸樓價唔單止唔貴,而且係平,呢句聽落去好豪氣,再者以「工資升幅高於樓價」作為單一指標,其實當中出現 3個好大謬誤。
第 1個就係呢位基金經理嘅明星分析員,未有提及所指大陸樓係邊種樓盤,抑或係所有嘅樓都咁平,當中又唔知是否包括每平方米十幾萬人民幣之上海最貴別墅世茂佘山莊園或者最貴樓盤湯臣一品;第 2個謬誤係工資水平,中國人均 GDP只有 3千幾美元,當中貧富懸殊,然則工資升幅究竟係由邊個水平起步,一線城市打工皇帝工資隨時較香港同級職能有過之而無不及,尤其是與品牌營銷相關的主管級職位,往往出現搶人情況,熟國情具營銷經驗者隨時月薪 4至 5萬元人民幣亦時有聽聞,勁過一個初入行分析員。
貧富懸殊差距擴大
可以咁睇,你買得起而又捨得買就唔叫做貴,或者可以好似女同胞掃袋咁豪掃樓盤,搵隻手指篤吓就一間,完全唔使睇價錢。有行家好早就標榜自己在大陸有幾個中山雅居樂單位,當年間間都係約 40萬元人仔,已經可以好豪咁吹俾人聽我在大陸有度假別墅,依家賣番出去都唔係賺好多,皆因位處郊區樓齡有番咁上下,還有中國地方大,周圍新盤繼續冒起,此可以引伸至第 3個謬誤,閣下所指樓價超級平,係唔係指幾十萬一間嘅中山星辰花園或者雅居樂呢?
人行發佈第 4季度調查報告及社科院發佈之《社會藍皮書》雙雙顯示通脹升溫導致經濟過熱風險累積,貧富懸殊差距擴大,反映社會總收入差距之堅尼系數一直擴大且已屆 0.5之危險水平。然則就用內地人均收入計及每月供款佔薪金水平及需要幾多年工資唔食唔着才買得起一層樓,咁就唔係咁簡單一條數一句話唔貴就「過骨」。明星之所以成為紅星,全賴有自己個電視台開劇力捧,電視台需要有紅得起嘅明星,廣告時段才有叫座。
胡孟青
作者為獨立股評人
作者: 火煋人 時間: 2010-12-20 09:19
青心直說:股市資金流向突變
2010年12月20日
單看恒指今年表現,簡直有如無事發生過,皆因指數較年初幾乎原地踏步。
相比之下,部份系數較高,受經濟或市況影響較大的高 Beta藍籌股(思捷( 330)除外),大部份均有雙位數回報。劉央掛在口中的炒股不炒市,早已發生。
近 10年,金融市場大致上每 3年出現一個周期。 08年金融海嘯引致屍橫遍野,去年央行集體放水,市況出現一個突如其來的大反彈,到今年消息好壞參半,投資者舉棋不定,股市轉為炒波幅。那麼來年會出現怎樣的情況?觀乎近期各市場表現,市況基本因素雖無出現明顯負面變化,但不能排除資金重新流入美國市場,較具規模的資金重新配置可能已經出現。
部份資金已重新調配
本港仍然充斥大量熱錢,但部份股票快錢似乎有外流情況,有人說港滙走勢對資金流向指標作用不大,但上兩周當恒指稍為反彈,港滙並無明顯轉強,部份日子更出現不升反跌,證明的確有資金正部署重新調配。
相比之下,美股表現來得更硬淨,無論納指及標普 500指數均見兩年高位,不能排除資金追逐完新興市場及區內高增長概念後,賺取回報後可能嫌估值過高不再吸引而回流美國再賭一鋪。
目前影響美國以至全球短線不明朗因素是美債上升引發的全球利率向上問題。一早表明債市牛市已死的債券大王格羅斯,亦修訂其所管理債券基金的投資準則,容許投資一成資金於股票相關產品。美國濫發債券導致財赤嚴重,債市基本因素已改變。
從另一角度看,正如英國《金融時報》主筆 Martin Wolf所講,只要美國能夠成功換取時間,證明經濟有改善,債息上升只是全球利率趨向正常化的過程,並不是太壞消息。
胡孟青
獨立股評人
作者: 火煋人 時間: 2010-12-21 09:14
青心直說:資金回流翻炒美股
2010年12月21日
延續昨天對資金流向改變帶來的啟示,上周美國 10年期國庫券孳息攀升至 3.568厘之半年高位,利率與美元之間的共振與互動,預期將成為 2011年焦點。
要強調兩點,首先債息不斷升肯定會影響股市,同時債市泡沫形成亦是鐵一般事實,但在游資充斥情況下,出現爆破情況仍時辰未到。歐美以至中國製造大量資金,這筆史無前例之多的熱錢仍然苦無出路,否則祖國亦不會一邊破口大罵,一邊大手增持美債。在整體市場層面,全球目前有無數基金,有的主動尋求更高回報,但仍然有部份是寧願被動式鎖定回報,資金極多的保險基金就是其中一種。
原來不少美國保單假設回報率只有 4厘,所以正當近日傳統債券基金將手持企業債券沽出離場之際,不少具備 4厘以上回報的企業債券,已全數由保險基金大手接貨。同一道理,就算指標性高的美國 10年長債價格不斷下跌,一旦息率升至 4厘 2、 3水平,很大機會會被這批保險基金接貨。換句話, 10年債息短期內可能會於 4厘半左右這個海嘯前正常水平封頂。
入市要留意資金去向
雖然債息上升對市場影響暫且有限,但資金重新調配的問題卻不能忽視。年多以來,股票基金由歐美轉投新興市場,以股市預測市盈率計,包括內地及本港股市仍然處於估值合理水平,但按個別股份比較,其實市場平貨所剩無幾。
單以一隻滙豐控股( 005),估值已較花旗、高盛貴。投資者是善忘,有延長減稅的短暫刺激,亦有伯南克大印銀紙,美國繼續寬鬆而區內開始收緊的政策分化情況下,部份流入區內的股票資金極有可能在明年上半年回流美國,轉炒美股。當要入市時,還要留意資金去向,道指、納指及覆蓋範圍更廣的羅素 2000指數已分別連升 3至 5周,資金回流美國絕非巧合。
胡孟青
作者為獨立股評人
作者: 火煋人 時間: 2010-12-22 10:03
青心直說: CFO當心變 UFO
2010年12月22日
老闆唔易做,通脹高企、成本上漲,經營環境起伏不定,作為公司把關及決策人的 CEO(行政總裁)當然難做。同樣,在市場環境劇變、資金氾濫,但原料及工資持續上升下,作為大掌櫃的 CFO(財務總監)亦不易為。
目前利息極低,資金缺乏出路,本應是高負債公司 CFO表演的好時機,但近日瑞安房地產( 272)一項票據融資計劃卻逆風而行。
瑞房在內地,特別是上海有很多好項目,但一場金融海嘯,公司因短債過多一度出現財務壓力,幸好主席羅康瑞底子厚,但瑞房雖不死卻未有學精。
瑞房融資計劃出人意表
內地地價不斷上升,建築成本隨之上漲,個別券商早於 8月已指出,瑞房出現負現金流,淨負債比率有機會由去年底 20%水平,急升至明年底逾 60%,相比其他內房股雖不算高,公司今年亦積極再融資,但方法倒值得商榷。
瑞房最新發行 30億元人民幣但以美元結算的票據,息率 6.875厘,在目前低息環境, 3年期融資要付上近 7厘息實在太貴。首先不明白公司為何千揀萬揀,選擇這項融資方式;其次是票據年期只得 3年,而公司扣除現金的過百億元總負債到期日正是兩年以上、 5年以下為主。瑞房債務集中於短債,不單沒有借低息環境降低債務成本,寧願繼續以新短債,還舊短債模式,自動放棄延長債務還款期的大好機會,實在奇怪。
不善於運用市場優勢,是 CFO功力未夠的常見例子,另一種是過份集中於成本控制,只識「慳」,到頭來守財奴心態阻礙了公司的發展。 CFO職責其實並非「睇數」或控制成本咁簡單,一間有淨現金流但開支高的公司,其實有好大發揮機會,但如果只顧控制開支,不理行業前景,運用現金流優勢,加一點負債換取拓展業務機會,最後公司發展亦只會停滯不前,甚至被對手趕過。
武功未到家的 CFO,到頭來只是 UFO( Unqualified Financial Officer)一名。
胡孟青
作者為獨立股評人
作者: 火煋人 時間: 2010-12-23 09:25
青心直說:延續中國獨特品牌
2010年12月23日
正所謂冬大過年,開唔開心都要開飯,連中環市面街頭氣氛都比平時寧靜,中環人個個好似慢咗半拍,提早放假。
長假期前股滙債市傾向淡靜,好淡雙方都傾向暫時停開新倉,費事一個唔覺意被殺個措手不及,人人按兵不動為上策,無謂左右兩邊面同時遭殃。
無得博倒不如索性提早放假去 Shopping。內地經濟高速發展造就富者越富,有錢人會更追求品牌。一旦收入改善,無理由不購買國際名牌而儍到堅持愛祖國用國貨。作為全球人口最多的市場,外商老早就學識運用本身的知名度及品牌優勢,企圖破冰。
進不能攻退不能守
舉個例,對內地人來說, 700元一條 Levi牛仔褲的確昂貴,但 Levi深明人類追求名牌的本性, 8月中推出平價版,針對內地市場的「單寧鎮」( Denizen)廉價系列,價錢較貴價版低 6成。有 Levi行先,其他國際品牌自然會有樣學樣,推出本身的廉價版,爭佔內地市場份額。而且,在大量老翻充斥下,內地品牌其實是進不能攻,退不能守。
中國慣於接來料加工,廠商及企業家慣性抄襲。有唔少國際大品牌成衣產品,一向都係交畀內地廠家生產,賺得最多仍然係品牌擁有者。最佳例子係蘋果, iPhone4基本上全在中國組裝,但替佢組裝之廠家賺唔到錢,反而蘋果自己毛利率有 5成幾,欠品牌優勢,肯定好難賺產業鏈上最大利潤部份。品牌係要靠經得起時間考驗的默默耕耘及質素與口碑建立起來,否則就只會淪為浪得虛名。
60、 70年代,上一輩提起日本貨每每都認定是質素低、化學唔襟用、兼無獨特性。但日本人痛定思痛,不斷研發及改良,令現時日本製造已是信心保證。
中國要搞內需,無兩三個中國品牌支撐,是我們的可悲!
愛祖國用國貨並非必然,中國需要的,是將舊日「大白兔」、「紅雙喜」、「菊花牌」等中國獨特民用品牌延續。
胡孟青
獨立股評人
作者: 火煋人 時間: 2010-12-28 09:16
青心直說:利率反間計
2010年12月28日
內地政策完全「估你唔到」,在市場加息預期降溫之際,人行卻選擇聖誕日加息 0.25厘。內地負利率問題嚴重,近日貨幣政策工具亦失效,本應一早要加息。單是 10和 11月兩個月內,住戶存款淨流出約 5千億元人民幣,顯示通脹預期升溫下,有更多資金流入資產市場。
人行突然加息,給予市場的教訓或是叫大家不要過份相信內地輿論及專家意見。記得月初人行僅上調存款準備金率,其後出現一面倒意見指年內甚至短期內加息機會大減。
內地報章及學者力數加息時機未到,上調準備金是最佳選擇,人大財經委副主任吳曉靈指,加息會引發熱錢,連央行內鷹派的李稻葵亦改口風,指加息或對經濟有影響。這是出於偶然,抑或有預謀降溫,操控市場對加息與否之預期,值得懷疑。
勿過份信專家意見
觸發今次加息,通脹並非主因。正如中投香港董事長劉遵義所指,內地通脹問題在於食品價格,單靠加息是不能扭轉。真正令人行、甚至中央更高層次決定加息,導火線是上周財政部 3個月期國債流拍,兼且市場利率持續上升, 7日期回購利率更升至 3年高位,即日回購利率亦一日內上升近 1厘,而且一、二手票據市場出現利率倒掛,二手市場息率較一手市場高,令當局終於明白,靠增發票據的公開市場操作工具已經失效。
加息無疑消除市場不明朗因素,但不能忽略的現實是內地已步入利率正常化周期。調高利率一直被視為內地大殺傷力重型武器,不同部委之間出現分歧及角力,現在證明中央沒有放棄運用市場價格工具去調控經濟過熱問題。
加息對內銀股本屬正面,但長期定存利率升幅大於貸款息率增幅,加上內地近日吹風,會加大差別準備金率的運用,對內銀股是一大不明朗因素。
個別部委堅持來年新增貸款維持 7萬億元左右,導致發改委、人行、銀監會的博弈。可見將來內地政策訊息將相當混亂!
胡孟青
作者為獨立股評人
作者: 火煋人 時間: 2010-12-29 09:23
青心直說:超錯往往在預測
2010年12月29日
每年到呢個時候,被坊間稱為「專家」嘅人,都會接到唔少對明年政治經濟以至股市指數水平預測之提問,眾人預測往往會被一字排開甚至列表比拼,究其目的好明顯係想大家剪存,以便來年年底可以秋後算賬。
對預測失準專家們,實在深表同情,皆因世事變幻無常,睇得開就一笑置之,唔需太介懷,自己就明顯對甚麼預測唔只提唔起興趣甚至厭倦不堪,唔係怕睇錯,因為一早就預會睇錯,只係一來市況每每會中途插入許多「估你唔到」因素,把整個預測基礎扭曲,隨機應變因時制宜唔係更好咩?
中一次當你明燈
正如年初有人已預測恒指會見 25000點,然則 11月 8日高位 24988.6點又算唔算數?年初預測港股表現反覆都唔會錯得去邊,年初預期大市原地踏步,家雖然距離年底倒數仲有唔夠 72小時,一樣冇乜點錯。
死硬派單邊睇跌遇上大旺市,好容易被打成「語不驚人死不休」嘅代表,先唔敢講製造話題之作能否令你揚名立萬,更重要係搵邊個講,講嘅人又有冇中過,預測跟貼股一樣,好睇往績 track record。旺市敢高調睇跌大唱反調,始終都係冒險家行為,就算唔擔心俾人噓都只怕未必有市場;然而只要 Call中一嘢,以後就有人當你係明燈。
做得預測就預咗隨時因為跌眼鏡, 2008年年底美國《商業週刊》公佈該年度最不準確預測排行榜,攞齊一眾財金官員及分析師評論出嚟翻舊賬,該年 3月 27日美國著名財經分析師理查.班德( RichardBand)預測「一次強而持久的反彈即將出現,但仍需等待數天。」同時叫大家「堅守陣地,保持信念!」云云。
記性唔使太好都記得當年標普 500指數跌咗 38%即係近 4成,由年初 1468點跌到 903點;道指亦由佢講嘅時候 12300點水平跌至該年年底時的 8500點。
其實旨在叫大家唔使對任何預測睇得太認真,順其自然 Take it Easy啦!
胡孟青
作者為獨立股評人
作者: 火煋人 時間: 2010-12-30 09:40
青心直說:死狗翻生現實版
2010年12月30日
望返轉頭, 2008年有許多預測都係得啖笑,形勢比人強,無論過去現在與未來,投資者應緊記一句至理名言: Trend is your friend, don't buck the trend。
曾經有分析師預期 AIG於 2008年第二季度將取得巨額收益,言猶在耳,結果集團該季度就虧損 50億美元,第三季度虧損更達 250億美元,之後華府要於 9月雷曼爆煲時將之接管,同時注資 1500億美元以避免公司破產。
AIG股價假後衝過上 60美元之上,如果唔記得隻股經過 20合 1,仲以為佢就嚟創新高。 AIG未合股前歷史高位為 72.97美元,合股後歷史高位原來係超過 1400美元,即係話家呢個價其實只相當於 3美元,令人不禁諗番起股價啱啱破咗頂嘅 8號仔。
8號仔嘅千禧年代歷史高位應該係 28.8元,唔係, 5合 1後應該係 144元,唔知股價又會否成為 AIG翻版,幫仍然有 holding power嘅小股東翻身,咁就功德無量喇!
不過發夢無咁早,再諗落去真係要唱埋薰妮隻名曲《每當變幻時》裏面幾句歌詞:「懷緬過去常陶醉,一半樂事,一半令人流淚,夢如人生,快樂永記取,悲苦深刻藏骨髓。」
金融界卧虎藏龍
英語諺語有一句「 Every dog has its day」,意思係死狗也有發圍時。
根據 CNN Money報道,管理基金資產 170億美元之 Fairholme原來係美國政府之外最大單一股東,擁有相當於 15億美元嘅 position,約為 AIG流動股份之 25%,基金創辦人 Bruce Berkowitz更加持有大量高盛、大摩、美銀及花旗集團之股份,看來賭注相當大,稱得上是押埋基金表現嘅前途;然而 AIG股價過去一年真係翻足一番!
呢個基金唔係太耳熟能詳,不過佢在過去 10年年度平均資金回報率就達 11.7%,跑贏晒標普 500指數之 0.7%回報。
地球上多的是真人不露相嘅卧虎藏龍。
胡孟青
作者為獨立股評人
作者: 火煋人 時間: 2010-12-31 09:21
青心直說:有錢就有快樂?
2010年12月31日
今年即將過去,回顧呢 365日,經歷苦與樂、起與跌,然而你快樂嗎?通脹升溫、銀紙貶值,不少人會答,有樓有股甚至手握金條,今年身家暴脹就會快樂! 1971年諾貝爾經濟學獎得主,來自當時蘇聯的經濟學家 Simon Kuznets早於 1934年就提出,生命中很多東西比金錢更重要!
的確,金錢在現今社會,很大程度決定一個人快樂與否。但只要沒有心存不合理的過份期望,就不會有不必要的失望。千揀萬揀買隻「妖」股,大跌收場,認命吧!因為投資有賺有蝕,最終要自我承擔。
控制個人快樂難,量度國家快樂與否更難。政界中人會以國家生產總值或經濟指標衡量,但如何解釋窮國不丹竟是全球最快樂國家?
量度指標難定
繼法國總統薩爾科齊計劃制訂一個量度全國經濟及社會進步的指標後,英國首相卡梅倫亦籌備制訂全國快樂指數。快樂指數怎樣制訂,考起各高官之餘,連經濟學者亦唔識答。 01年諾獎得主斯蒂格里茨建議按國民淨收益計算,包括量度城市基建、收入分配是否均等。
中國近年亦學會在收入分配問題上下工夫。「十二.五」規劃其中一個任務,就是改善國民收入分配,北京宣佈來年將最低工資上調至 1160元人民幣,加幅達 22%,簡直係大躍進兼恨死隔籬。
須知內地隱形富豪多,賺 1億實報稅 3千萬者大有人在。對祖國來說,反貪才是最重要的課題,否則反貪之星薄熙來管轄的重慶市,亦不會獲選為全國最快樂城市,足證快樂與否,另一指標是我們是否具備英明的領導。
尋求快樂難,量度快樂更是極不快樂的工作。當年香港財政司郭伯偉,據講對搜集數據並不熱衷,因為手上越多數據,從政者就越有意圖規劃經濟。說到尾,我快樂,因為我學曉管理自己的預期。
胡孟青
獨立股評人
作者: 火煋人 時間: 2011-1-3 09:08
青心直說:捕捉十年大運概念
2011年01月03日
一年之計在於春,新年新氣象,係時候檢討一下投資策略,十年可以係生死兩茫茫,亦可以係十年河東十年河西。早兩日與行內資深嘅高人傾開,佢猛話信不信由你,十年前 120蚊跌落嚟嘅和記黃埔( 013),十年過去,收成期將至,股價已率先發力。
好似黃金價格,唔經唔覺原來已又係升足十個年頭,用以引證「黃金十年」最貼切。引伸至更大範圍,自亞洲金融風暴後衰足十年嘅經濟體,已急不及待從金融海嘯中大翻身。香港奉行聯滙,死釘緊美元不放,高官可以理直氣壯,說擔心話憂慮,但最後仍然可袖手旁觀。區內央行行長去年底臨近倒數仍紛紛要疲於奔命為經濟降溫趕熱錢,擔心重蹈亞洲金融風暴覆轍。南韓、馬來西亞要干預,台灣急忙加息,兼審查外資銀行外滙交易。至於印尼,更要大幅上調外滙存款準備金率。
台幣升幅明顯
環看去年區內貨幣升勢,不少資深滙商形容十年難得一見。泰國、馬來西亞貨幣錄雙位數升幅,緊隨其後是新加坡及台灣貨幣。十多年前的金融風暴教訓區內要居安思危,大量資金流入,資產市場暴升,連二線的馬來西亞、泰國樓市亦可大炒特炒。
多個市場之中,台灣情況值得細看,其貨幣去年累積升幅約百分之 9。但若撇除央行多次干預,台幣升勢肯定是區內之冠。而臨近去年底,台幣異動情況亦越見明顯。
台灣糧食資源豐富,高科技工業猶勝香港,令中國內地及香港好生羨慕。中港股市勝在落後,皆因不少資金被新股吸收,台灣賣點是「平」,市盈率雖與香港市場相若,科技含量高企業盈利增幅卻跑贏香港,令市盈率增長率較香港吸引,資產價格因此相對仍落後。近年靠攏內地的寶島,對不少投資者來說,具備炒落後大中華概念,但唔好忘記,台股到今天仍未重上 10393點高峯,衰過中港股市,堪稱衰足十年,照咁睇隨時又係另一個轉運機會。
胡孟青
獨立股評人
作者: 火煋人 時間: 2011-1-4 09:33
青心直說:奉旨用完即棄的內需股
2011年01月04日
內需唔只衫褲鞋襪珠寶首飾,因應市場形勢應運而生嘅行業,一樣可以成為內需概念大贏家,衫褲鞋襪唔會着一次就掉,珠寶首飾更加只會越買越多,但有一類產品擺明係用完即棄,仲要掉得天公地道,木筷子?錯,係平時超市放喺香蕉蘋果橙附近,成卷任掹薄衣衣嘅可降解(即可於堆填區分解)膠袋,仲有醫護人員用嘅醫療耗用品如手套、圍裙及醫療用垃圾袋。
沙士帶動一次性醫療耗用品需求急升,隨着疫症類型急增,加上人口老化導致醫護服務業蓬勃,抗感染醫護裝備勢必加強。
根據人民網報道,中國已超越美國成為全球第一塑料消費國,每年超過 6000萬噸。塑料需求量隨經濟增長而產銷兩旺,人均收入上升,時間就是金錢,連食個飯盒都用一次性器具,塑料行業之可持續發展能力已成為市場關注焦點,市場關注行業如何完善國策中節能減排方向,剛好擊中三大領域:塑料如何無毒、無害化利用;可降解及循環再用;及在各行業中作為降耗能的替代品作用。
友川食正國策
招股中嘅友川集團( 1323),正正就係用更多可降解原料、更少石油副產品聚乙烯製成一次過使用物料,部份產品更按客戶要求以可氧化生物降解材料製造,原材料佔總成本 52%,由於業務已上軌道,生產高度自動化,屬資本密集型行業,加上成功掌握 18項產品專利,早已成功取得認證兼打入歐美市場。集團過去 3年純利率分別為 16%、 14%及 18%,招股書預期截至去年 9月底止,半年盈利不少於 4千萬元,即是假如以招股價上限每股 2.26元定價,往績市盈率 18.8倍。
隨着集團業務由出口轉內銷,目標對象為內地醫院,配合國家醫改及對醫療 衞生重視,與內地軍方醫院關係好,加上行業入行門檻較高,對經濟起落敏感度較低,既係內需品更加係必需品,屬近期新股中較具吸引之選。
胡孟青
作者為獨立股評人
作者: 火煋人 時間: 2011-1-5 09:29
青心直說:廠家唔係危言聳聽
2011年01月05日
三人行必有我師,聚會時與朋友閒談,不時係值得公諸同好嘅寫稿題材,又如阿仔冲凉嗰篇關於泡沫幾時爆嘅文,自己都覺得抵死,可見睇股可以好生活化。
一直從事金融領域工作,好多時道聽塗說題目都離不開本業,有專睇工商客嘅資深賓架,最近奔走相告,話經營產銷布料嘅客戶再三提醒佢趕快買定未來兩年要着嘅衫,尤其係棉質衫褲。原因唔難明,棉花漲價吖嘛,之不過棉質衣料加價,橫向會影響埋尼龍纖維質料價格,呢個冬天市場上又輕又暖嘅「仿絲棉」風衣,一睇英文就明解係 Polyester、 Rayon等石油副產品,通通都係棉花替代品,所以早排棉花漲價會令儀征化纖( 1033)股價急升。
雖然通常都係賓架畀意見,但當你個客係某行業專家,佢嘅睇法就絕對有意義,起碼傳到我耳朵就係好實用嘅資料。唔係危言聳聽,我已經開始趁歲晚大減價掃定多幾件長青款式嘅冬天 Top。
棉花漲價蠶食紡織股盈利
忽然好慶幸自己前年瘦身略有小成,一口氣買夠呢兩年要着嘅返工衫,反正自己唔係太在乎個 Look,冇料嘅先至整色整水,掛住搞個 Look盞唔得閒做功課。
全球 QE後遺症將會體現於惡性通脹,游資太多,由貴金屬炒落去,炒到冇嘢可以炒,炒到去農產品,明顯係要炒到底去到盡,炒家盡地一煲錢搵錢,連包住你層皮嗰塊布嘅上游工業股都係題材。
農產品如玉米等飼料漲價,最終會導致豬牛雞鴨漲價,對棉紡紗企業而言,棉花隨時佔總成本達 75%, 09年仲係每噸 1.4萬元人民幣,唔少前年年底低價大量囤積棉花嘅紡紗企業,今日都仲享受緊廉價庫存,然而一旦庫存用盡,按採購價高達每噸 2.5萬元人民幣嘅新棉,企業隨時轉盈為虧。至於布料批發價更有如溫水煮蛙,短短一季漲幅達兩成以上,如此下去,紡織股毛利率變化特別值得關注,皆因往績參考價值已大打折扣。
胡孟青
作者為獨立股評人
作者: 火煋人 時間: 2011-1-6 09:16
青心直說:此豬彼豬與市場小豬
2011年01月06日
內地供港活豬拍賣價過去一季漲了 20%,如此下去,唔使一年豬價就要累升一倍。但點升都唔及一幅 1998年以 34.5萬元買返嚟, 12年後轉手賣 1300萬元賺 37倍嘅徐悲鴻大作《雙豬圖》,真係同豬唔同命,此豬不同彼豬,年複合回報率高達 32%,勁過地球上大部份大師級基金。
賣家係平時成交水靜鵝飛、股價長期向下炒嘅實力建業( 519),果然唔打得都睇得(起碼有幅畫睇吓),公司嘅實力在哪裏?去年底出售深圳平湖物業,售價 1750萬元竟然蝕足 767萬元,蝕賣當然入公司數,變成虧損,高揸低沽,似乎公司睇大陸樓嘅眼光比唔上睇畫,有理由懷疑,上市公司係為咗粉飾財務報表而忍痛善價而沽。
八八卦卦用咗些少時間睇過佢份年報,從來冇提及過上市公司有咁珍貴嘅珍藏,真係好想知道究竟佢手上仲有幾多珍品,反正家游資氾濫,古董名畫美酒價格水漲船高,老闆咁有眼光,隨時屋企或者辦公室牆上都可以用手指篤中一幅勁嘢,炒家都有藉口對佢重新估值。市場挑通眼眉,未有為佢賣咗一幅畫而吶喊,難得仲有三幾隻小豬嘜落叠,祝佢哋出入平安啦!
秤實力建業測實力
集團全職員工得 16位,去年上半年才轉虧為盈, 4766.6萬元利潤中,有 6445.2萬元來自投資物業公平值增加淨額,即係話實際仲係蝕緊,連經營現金流都係負數。睇埋集團其他資產都係超豪級數,例如計劃喺 BVI(英屬處女群島)同巴拿馬投資五星級度假村及遊艇村項目,仲有高爾夫球場及豪宅,就知班老細幾識嘆世界。
至於手上最貴重而能見度最高嘅物業,係全資擁有山頂施勳道 3號施勳別墅,估值超過 2億元,剛好同公司市值相若。不過 BVI及巴拿馬項目未正式上馬,即係未有盈利貢獻,資產估值卻獲計入,未來就算獲批可按藍圖發展,然而錢從何來?上半年公司手頭現金只有 240萬元,隨時連日常營運資金都好緊張。
胡孟青
作者為獨立股評人
作者: 火煋人 時間: 2011-1-7 09:29
青心直說:傳聞不斷內險股凶險?
2011年01月07日
呢排內險股有啲險過剃頭,好似平安保險( 2318)繼早排無端端傳深圳發展銀行同平安銀行整合方案被銀監局退回,股價半個月內跌足 16%見番 80蚊。唔知係好事多磨抑或流年不利,近日又受巨額集資傳聞困擾,昨日中信證券向客戶發報告話平保或需售股集資 400億元人民幣,令每股盈利下降約 15%,觸發市場對平保醞釀巨額集資的關注。
外電更指內地市場有消息傳出,平保集資額可能高達 1000億元人民幣,而市場一直關注平保或需為去年收購的深發行補充資本。外電引述平保新聞發言人盛瑞生回應稱「不對市場傳言作評論」,只表示公司目前沒有再融資的訊息披露。會唔會係「呢一分鐘冇、下一分鐘有」嘅翻版呢?
銀行踩過界搶生意
以中港兩地股價表現而論,似乎 A股投資者感受較香港投資者更深,究竟係內地投資者太接近消息真相知驚,抑或係我等港人冇有識死未知驚?總之眼見大戶連半新股如中聯重科( 1157)及重農行( 3618)都隨便玩自出自入,吹得好大嘅中國聯塑( 2128),主席甫過禁售期即配股套現,個場有幾沙塵滾滾唔使我多講。總之,大戶無情、股票無義,暫時都係維持密食當三番策略。
好衰唔衰滙證又發表報告話對中資保險股審慎,同時一口氣調低晒國壽( 2628)及中國太平( 966)嘅評級及目標價。報告話係因為其業務估值被調低,元凶係銀行入侵保險業加劇競爭。
銀行同保險公司一向相安無事,因為銀行需要保險公司開發產品,保險公司亦好睇重銀行嘅龐大銷售渠道,不過隨着中保監對保險公司設計嘅高回報產品諸多規範,對掛單銀行數目亦諸多掣肘,反而埋下行業龍頭被生劏嘅伏線。
雖然現階段暫難評估哪一家保險公司可成為下一浪市場領導者,但隨着被視為最具潛力嘅稅務優惠保險產品推出市場,可以成功跑出嘅東宮正印已呼之欲出。
胡孟青
獨立股評人
作者: 火煋人 時間: 2011-1-10 09:57
青心直說:後市走勢難一帆風順
2011年01月10日
後市走勢?固然無可奉告。有幸言中,下次會成為「明燈」。去年第四季叫買香港交易所( 388),可能因為只係升咗區區 15%,所以連本報財經版也不屑一提。自己跟相熟之行家討論過,總覺得無必要再參加股份全年推介這個遊戲,但當新記者仍帶攝記不請自來,也惟有把中國太保( 2601)拿出來公告天下作年度推介。
有智慧與靈活的投資者絕對唔會孤注一擲求其瞓身於一隻股份或者只集中於一類投資產品。投資者專業好散戶好,都要為投資決定負責。輸打贏要從來不是應有的理性行為,可是非理性者又是何其多,有因必有果,可想而知,非理性輸家在最初投資時的行為態度也難免就是如出一轍。
電盈半年累升逾 5成
2011年港股走勢較預期好,從資金流角度看,港滙雖然稍為轉強,但跟兌換保證上限仍有距離,似乎資金未有大規模流入。況且,根據大和資本最新統計,區內多個市場中,港股仍有輕微資金外流。較早前已說內地政策不明朗因素,及港股估值偏高,今年至少上半年市況未必一帆風順。
提起港股估值,近期又出現一個有趣現象。事關純粹計及港股的 MSCI香港指數,預期市盈率已達大約 17倍水平,較過往平均數原來已出現一成溢價。但換角度看,恒生指數的估值,預測市盈率僅 12倍左右,較歷史平均數仍然有 14%折讓。出現這個一「貴」一「平」的情況,當然與恒指成份股內滙豐控股( 005)及大多數中資或國企股走勢落後有關。
國泰航空( 293)與利豐( 494)去年跑贏,多隻地產及收租股亦大幅炒上,零售股無懼加貴租亦可大炒特炒。若論升幅,本地電訊股也絕不失禮。數碼通電訊( 315)不知不覺升破 16元,電訊盈科( 008)半年內累積升幅亦超過 5成。本地電訊股升勢,外界盛傳即將有大型併購,又說有過江大戶大手增持。撇開市場揣測,支持本地電訊股升勢實有兩大原因,明天再談。
胡孟青
獨立股評人
作者: 火煋人 時間: 2011-1-11 09:34
青心直說:電訊商化夕陽為朝陽
2011年01月11日
香港 700多萬人口, 5大流動電話經營商,手機滲透率達 180%有多,全球排名第 8。本來市場競爭大兼飽和,本港電訊股應早已日落黃昏,成為夕陽行業;幸好蘋果有喬布斯,成為全球電訊服務營運商救世主,一部 iPhone的普及,全港 3G用戶比重升至近 4成,智能手機普及程度,似乎仍大有增長空間。兩、三年前,手機月費少則 60至 70元,多則 90元, iPhone熱令用戶願多付比以前倍增甚至更多月費,就算營運商提供手機補貼,手機月費升幅似乎可抵銷有餘,而且不少所謂零機價,其實也是取巧。
電訊股現金流增長穩定,高派息亦成為第二大賣點。好一隻數碼通電訊( 315),派息比率近乎百分百,令派息率高達 8厘。嫌貴要退而求其次,買電訊盈科( 008)息率回報亦不太低, 09年派足 20.3仙,現價仍有 5厘,當然,舊年嘅股息唔代表今年都一樣,不過都總會有個譜。投資者求利,與其買人民幣債券,但息率僅得 1至 2厘回報,本地電訊股無疑發揮更大吸引力。
市盈率低可吼中移動
相比區內電訊股接近 14倍平均市盈率,本地電訊股目前約 12倍左右市盈率仍較合理。但畢竟自 iPhone4出台以來,短期升幅太大,累積獲利盤亦多。高追要睇路,要揀倒不如選中國移動( 941),市場潛力更大,單是手機短訊收益,已多過不少本地電訊股一年總收入,更重要市盈率偏低,派息高兼股價橫行已久,恒指要升,中移動就要成為下一隻棋子。早前有資深電訊界老行尊講,話有人問佢有否聽講過金融大鱷索羅斯嚟香港就係想買本地電訊股,老行尊一聽到就話「 I quite like this rumor」。總之,穩定現金流加上高派息嘅股份,就係好多保守基金經理想要嚟平衡投資組合嘅理想對象,投資原來未必時時要諗得太複雜,還原基本步就可以,除咗電訊營運商,暫時諗唔到邊個行業可以忽然間左眼見夕陽右眼見朝陽。
胡孟青
作者為獨立股評人
作者: 火煋人 時間: 2011-1-12 09:53
青心直說:內險如何化險為夷
2011年01月12日
保監會主席吳定富早前在保險業情況通報會上說,過去 5年中國保險業保費收入年均增長達 24.2%,保險機構共實現投資收益 7201.2億元,年均投資收益率超過 6%,內地共有 146家保險公司,較 05年增加 53家,外資壽險及產險公司市佔率分別只有 5%及 1%。明顯反映,雖然中國加入世貿後保險業開放,外資保險公司在內地未具先天優勢,仍未可成氣候。
而內地居民儲蓄率仍在 37%,堪稱全球之冠;保守估算, 2011年中國經濟增長仍基本上可達 8.5%,與印度叮噹馬頭;人均年壽險保費支出只有 700元人民幣,與全球壽險滲透率第二高之國家英國,人均年壽險保費支出 3500美元仍有很大距離。
加息可抵銷部份負面因素
根據上述種種數據,反映內險股走勢無理由持續如此落後,只是上周滙證乘勢出報告所論理據,又真不可掉以輕心。滙證把中國人壽( 2628)的投資評級降至「中性」,並指出國壽十分依賴銀行作分銷,所以最受中銀監新例影響;滙證同時把中國太平( 966)的投資評級降至「中性」,主要原因是調低對公司新業務價值的預測,該行估計中國太平新業務於未來 15年複合年增長率約為 9.2%,續低於過往的 10.2%。
事實上,內地保險企業正面對相同問題。以保險產品為例,屬投資類保險產品的變額年金險( Variable annuity)將被限制至僅被一家本土保險公司泰康人壽及 7家中外合資企業發售。另中銀監亦表明,會限制保險公司銷售高利潤保險產品。而保監會又將討論引入基本的風險資本金制度,令保險公司的償付能力充足比率受到考驗;再者,取消傳統保險產品的預定利率上限,將產生負面心理影響。最後,稍後連串的保險公司上市活動,技術上亦對現時的保險上市公司帶來不明朗因素。基於上述因素,滙證對中資保險股仍然審慎。唯一化危為機之變數,就係除非人行突如其來加息,或者能抵銷部份困擾中資保險股的負面因素。
胡孟青
作者為獨立股評人
作者: 火煋人 時間: 2011-1-13 09:24
青心直說:全方位應用囤積居奇
2011年01月13日
當基本因素唔會日日更新,炒家挾巨資入市,掠水竅門離不開中國商人最擅長嘅手法──囤積居奇炒供求。運用得出神入化,財富隨時可以幾何級數增長。撇開感情因素,股票同蒜頭、辣椒、薑、奶粉都一樣淪為炒供求嘅商品。早前市場傳出摩根大通控制晒全球八成嘅現貨銅,銅價即借消息發癲, 12月升超過 10%兼創新高後,開年至今唔見近 4%,證明有呢類消息傳出,多數代表價格見頂,去年 7月可可豆期貨見頂前,同樣出現過類似消息,話倫敦對冲基金 Armajaro商品交易員係歐洲可可豆庫存被搶購一空嘅幕後黑手,囤積量大到可以左右市價。橋唔怕舊,以後見同類消息一出,每每就係見頂先兆。
有剛為人父嘅中資券商朋友話,坊間嘅美贊臣同美素佳兒奶粉賣斷市,聽講呢兩隻係最受內地媽媽歡迎嘅奶粉,有龐大 Demand,唔怪得 11月初寫過嘅 MJN上月中創晒新高升破 61美元,當時提及生產奶粉必備嘅 DHA生產商 MATK,原來股價都升到上 31美元,兩個月升足 34%,睇嚟呢位新爹哋真係要諗諗點樣對冲奶粉錢。
奶粉的士牌乜都炒
佢仲收到相熟藥房嘅消息,話有人用咗成億銀喺上水租咗個貨倉囤積奶粉喎。根據罐裝 BB奶粉由製造日至到期日足足有兩年,炒家係有足夠時間趁下一批奶粉登場前,再一邊收集將市場貨源歸邊,製造供求失衡,再進行提價散貨行動大發 BB財。
都係熱錢惹的禍,既然錢搵錢咁易,大家信唔信溫州人會攞資金嚟香港做實業?就算唔准炒股炒樓,市場仲有大把嘢炒,話唔定下次來港搶的士牌,早排有個炒到上 450萬元嘅的士牌,有說資金來自大陸,仲費事煩冇租出去賺錢,升值當然好,唔升都無所謂,總之供求因素足以保證牌價,關鍵係最緊要有個價,尤其係市場公價。
呢幾日股輪齊發有如雙龍出海,離唔開錢作怪,只係大戶興風作浪手法同奶粉的士牌原來如出一轍,欲知詳情,明天請早。
胡孟青
獨立股評人
作者: 火煋人 時間: 2011-1-14 09:21
青心直說:缸湖大撼大
2011年01月14日
放眼世界, AAPL係美國蘋果公司嘅股票代號究竟有幾多人知?不過好多人唔識 AAPL,照樣揸住部 iPhone或 iPad係咁捽。自由市場有供有求,當香港終於出現高溢價、高引伸波幅仍然大把人吼嘅蘋果認購輪,就唔好呻蘋果股價升你冇份喇!
隻蘋果輪係獨市生意只此一家,加上明知市場磨拳擦掌等 18日公佈業績,當然冇人會咁儍將隻輪長揸等到期,所以根本唔怕佢溢價高,去年底才 321美元嘅蘋果正股,股價已經升到 344蚊,連正股都爆上炒業績炒 iPad2,隻輪引伸波幅又點會低呢。
街外錢,搵唔晒,資金禾雀亂飛,上市公司間間都講到所向無敵,其實講到底又係睇究竟貨源有否歸邊。新股 IPO最緊要係睇邊個揸晒手貨,雖然通常離唔開嗰幾個個體戶同機構投資者,弊在坊間多咗好多專為抽 IPO而設嘅小型基金,個個唔睇基本因素,只係睇邊個攞 Placement就埋位瞓身,令小型新股出現大戶也被挾貨嘅現象,佢哋嘅盡職審查唔係按上市公司本身因素而做,而係睇國際配售承配人來歷同往績。
揭新股易潛水因由
正因為唔少人識睇頭,搞到一隻二隻新股唔理好醜鬼咁熱,結果大部份都喺掛牌後衝高回落,股價受壓一段時間完成消化收集後才獲釋放動力。
有行家話純靠基本因素根本就撐唔晒,因為基本面變化唔夠快,股價要坐穿梭機就要靠發盈喜、玩併購、送紅股,有政策甚至管理層吹多兩嘴搭夠,甚至要加埋大行出報告嚟個雙劍合璧。
噚日話隻 MATK去年年底前兩個月開車,到家足足升咗 34%,本來喺上年 11月 4日有介紹,但因字數太多成段被鏟走,累讀者捉少隻好股真係嘥晒,惟有將當日嗰段原文翻炒如下:「假如你自問唔識分好人壞人係因為細個食唔夠 DHA,咁都有一隻選擇,就係納斯達克上市嘅 Martek Biosciences( MATK),佢喺全球嬰幼兒奶粉 DHA市佔率 76%,美國更達 96%。」
胡孟青
獨立股評人
作者: 火煋人 時間: 2011-1-17 09:33
青心直說:投行獵頭潮一觸即發
2011年01月17日
以為投資銀行界一片好景,原來據稱近年銳意擴張的英國第二大銀行巴克萊卻全球裁減數百名員工,本港亦有數十人被迫食無情雞,年終花紅能否保住,仍不得而知。巴克萊當然並非看淡前景,旺市炒人說穿了,其實是自食其果。
從業員薪酬福利現泡沫
這間英資大行,憑 2008年奮勇買入雷曼部份業務,海嘯後四出高薪挖角,現時英國業務只佔三分之一。雖則大規模裁員,但聞說巴克萊暗中又計劃大規模招兵買馬,這種做法,又豈止巴克萊。有經驗的 Banker人工大升,瑞銀眼見勢色唔對更公開指出,行內從業員薪酬福利已經出現泡沫化,這無非是投資銀行自作孽。
諱於公眾不滿,大行雖已減少現金花紅比重,兼遞延至少兩、三年分期發放,但員工底薪仍然高得驚人。為求搶閘盡快開單,有經驗有網絡的從業員常被加一倍底薪挖走。行業重視主從關係,請一個部門主管,或交易枱「阿頭」,就要連同其手下一同聘用,變相出現買豬肉搭豬骨,變相把競爭對手成張枱甚至係成個部門撬走。
又據聞某大投行去年由中環遷往九龍站,為照顧居於港島區的天之驕子,特意安排穿梭巴士由中環接載過海返工,一日幾班往返港九方便開會,西隧真係要錫晒佢。今年稍後進駐九龍站的另一大行,據報亦會有樣學樣。
大行買員工怕,他們最擔心是具備本港加埋內地客戶關係網絡嘅私人銀行家被挖走。間間銀行都話要擴展私人銀行業務,巴克萊 1個三至五年經驗嘅私人銀行中層,每星期至少收到兩、三個來自獵頭公司來電,底薪大加之餘,部份更願意提供對分佣金條款。獵頭族長老告知,呢種情況在內地有過之而無不及,中資內銀在貸款政策被迫收緊下,更積極拓展非利息收入尤其個人及富人理財業務,長老更話人才市場起碼旺埋成個春天,即係傳統攞完花紅較腳旺季。
胡孟青
獨立股評人
作者: 火煋人 時間: 2011-1-18 09:31
青心直說:最叻唔等於搵得最多
2011年01月18日
以往純做股票買賣之經紀行,近年紛紛拓展資產管理業務( IFA),即係賣基金,金融海嘯後又多咗一批新晉對冲基金,利用 OPM入市,賣基金好過賣股票;至於做外滙,就勝在 24小時有得炒,又有槓桿,一樣賺錢。不過關鍵係最緊要有客,同埋要係大客,但係以大客要求就只有私人銀行基建才可加以配合。
金融機構已視私人銀行為肥肉,事關內地有錢人多潛力大。某大美資行擔心挖角潮影響業務,更改員工聘用條款,辭職由 1個月通知改為 3個月,這間美資行更列明,員工不簽署同意,將影響其仕途。但高薪挖角的遊戲規則不改,私人銀行員工最多「東家唔打,打西家」。
高人酒後道出真理
私人銀行競爭大,員工成本高,你會問,他們怎圖利?有幸與行內高人把酒暢談,數杯過後道出「客人輸錢,就是公司賺錢」的真理。只要有能力找一個新客,又那怕舊客戶因輸錢不悅而離場。
商業社會最現實,以零售銀行客戶為例,銀行職員眼見你戶口多錢,就會力勸你投資增值,見你戶口無錢,亦會以低息作招徠,叫你借錢。大行高薪挖角,固然自食其果。客戶本身亦要務加防範,以免成為行業高薪挖角的最後受害者。
奉行「做嘢唔講嘢,講嘢唔做嘢」,手口並用隨時出事志不在此,早已洞悉邊瓣最實際。其實表面風光,反而退居幕後才能領略搵真銀滋味。搵到大客隨時發達都無人知,「身痕幻覺」嘅 Top Sales每個月平均賺緊成球返屋企,「打鑊你」嘅大經紀隨時開兩個月工已搵到一個上車盤嘅錢,搵得最多錢嘅人其實唔係最叻而係最狠最狼嘅人,學股票經紀朋友話齋,慘得過你累佢輸咗錢,佢仲要打電話問長問短,兼唔覺意落個大盤一掃掃幾檔返嚟,賭性強注碼大,唔使識股票,好多大經紀執住幾件大陸客搵得仲多過私人銀行家(底薪 1球美金未計花紅),你吹咩!
胡孟青
作者為獨立股評人
作者: 火煋人 時間: 2011-1-19 09:56
青心直說:香港迪士尼極具金磚概念
2011年01月19日
香港迪士尼樂園人均消費升 7%,雖然當中未計及 CPI上升因素,只係見 EBITDA轉虧為盈已先飲得杯落,一年 520萬人次入園唔係嘢少,香港納稅人唔需要擔心再為項目揹飛,庫房止血,只係仲未重新長肉。
迪士尼樂園最值錢當然係佢塊填海地,絕對有地產概念,如果拆咗佢,阿 B就少個發洩精力嘅地方;既然米已成炊,港人係唔係應該學習接受現實,一齊幫佢諗諗搵錢大計,例如與美贊臣合作生產專為香港迪士尼樂園而設嘅奶粉,抄足海洋公園招數,實行有樣學樣最緊要受,令自由行家庭更有被關愛感覺之餘又有多一個賣點。
其實唔止內地自由行客,連印度客都應吸嚟玩埋一份,雖然印度接近 11億人口比唔上中國 13億(有說 14.9億更近磅),社會發展水平亦較中國落後,但人口結構卻較中國年輕,生育率一向高,皆因沒有一孩政策;直至 09年,印度供養老人比例只有 8%,中位年齡 25歲,中國則為 34.1歲。
印度人口普遍年輕
想不到香港原來有個極具金磚國概念嘅樂園;至於東面靠攏東京迪士尼,西面靠攏巴黎迪士尼嘅俄羅斯,常住人口原來只有約 1.5億,少年兒童比例約為 15.6%,食盡金磚四國中最勁揪嘅兩個國家。根據德國世界人口基金會去年底發佈數字顯示,估計指今年全球人口將超過 70億,香港迪士尼已成功盡攬當中超過 3成人口,而且細路要嚟玩都肯定要有大人陪同,捉到鹿識唔識脫角好睇管理層嘅腦袋。香港政府前年把 62.5億元壞賬資本化,兼要以債換股擴建迪士尼,被指洗濕咗個頭被美國佬搵笨實,增加三分之一面積起多 3個主題區,多啲刺激機動遊戲當然會增加吸引力。
作為一個號稱國際金融中心,既然腸衣、拖鞋、膠喉都可以成功上市,點解透明度咁高,日日俾你數到人流嘅迪士尼唔可以?內地連榨菜股都炒上 100倍 PE嘅小散,又點會抗拒呢隻金磚概念股呢!
胡孟青
作者為獨立股評人
作者: 火煋人 時間: 2011-1-20 09:39
青心直說:超級拖鞋王踩入香江
2011年01月20日
江蘇省東台市有位仁兄孫曉平,於 98年亞洲金融風暴期間同新婚太太雙雙失業下崗,窮則變變則通, 01年隻身由北京去非洲塞內加爾闖天下,打工一年,發覺當地工業極落後,生活物資全賴進口,又因天氣炎熱,居民喜歡着拖鞋多過皮鞋,於是把心一橫借錢兼賣埋鄉下間屋,由溫州進口廉價拖鞋做起生意,漸漸擴展到有足底穴位按摩功能嘅保健拖鞋,仲諗到喺鞋底加防滑、耐磨同吸麈力功能嘅品種,又開拓室外休閒拖鞋同可襯時裝嘅拖鞋,每年生意額 800萬元人民幣,被喻為非洲拖鞋王。
唔好睇小一盤小生意,肯動腦肯創新隨時搵到商機,做得夠大夠強上埋市都得。相信唔少人都見過,自己踢緊街邊賣 128蚊稍有設計嘅拖鞋,同款喺名店竟然標價 800幾蚊。成立於 1999年嘅寶峰時尚( 1121)係內地出口拖鞋龍頭,亦係 Walmart全球 200家供應廠商之一,而拖鞋就更係獨家,每年超過 1000款設計,亦係 GUESS、迪士尼、 H&M、 POLO等品牌嘅 OEM。
寶峰都算內需股
集團自 07年起,年均複合銷售及盈利增長分別為 17.1%及 0.9%,截至 2010年 9月底, 9個月營業額按年增長 48.9%至 6.34億元(人民幣.下同),純利更增 1.3倍至 1.04億元,自有品牌為寶人牌及寶峰牌,其餘為 OEM產品。寶人牌專攻中高檔市場,平均每對鞋出廠價 47元;寶峰牌則主攻中低檔市場,出廠價平均 13元,因毛利較 OEM高,雖以 3折售予經銷商,毛利仍達 42.2%及 38.1%,至於 OEM出廠價平均每對 14元,毛利只有 29.6%,自有品牌佔盈利比重由 07年 6.3%,升至去年 9月底 45%;寶人、寶峰及 OEM分佔整體營業收入 26.8%、 10.7%及 62.5%。
假如能以 15倍 PE定價,相信又係經一番收集後可以突圍嘅新股,唔好忘記,拖鞋都係內需,亞洲仲有好多新興市場如熱辣辣有 1億人口嘅菲律賓同 4億人口嘅印尼,都係佢嘅目標市場。
胡孟青
作者為獨立股評人
作者: 火煋人 時間: 2011-1-21 11:19
青心直說:內險面對核心難題
2011年01月21日
內地三大保險企業 2010年保費收入相繼出爐,中國人壽( 2628)實現保費收入 3182億元(人民幣.下同),按年增長 7.9%;中國平安( 2318)為 2265.63億元,增 30.97%;中國太保( 2601)為 1435億元,以 41%增長蟬聯第一位。但三大內險去年 12月份保費收入增速卻明顯下降,國壽按年只增 1.94%、平安人壽增 11.07%,太保更負增長 3.3%。
有說出現負增長是保險公司刻意壓低 12月份增速,造就新年首 10日的「開門紅」;亦有說去年 11月中銀監下發《關於進一步加強商業銀行代理保險業務合規銷售與風險管理的通知》,引起行業震動,最大影響在於叫停銀保駐點銷售,及商業銀行每個經營網點只能與不超過 3家保險公司合作。
新政甫出台,除了對銀行代理銷售管道依賴較小的平安人壽之外,國壽、太保壽險和新華人壽 11月保費收入均出現按月負增長。其中正醞釀上市,而受制於償付準備金偏低之新華人壽,更大跌 24%。
收緊銀行銷售管道打擊大
市場普遍看好保險股今年在加息周期中之表現,散戶至愛的國壽,雖貴為市佔率最高之內險股,但無論新業務價值及市佔率趨勢皆倒退;平保因有較高之新業務價值,備受資金眷顧,可惜近期亦因收購深發行及荷包水緊預期之困擾,股價難升。至於去年市場份額穩居壽險三甲之新華人壽,總規模保費已達 826億元,按年增近 50%,然而大部份增長來自銀保業務,銀行銷售管道政策收緊,對保費收入增長影響明顯。
窮則變變則通,保險公司惟有積極擴大銷售隊伍應對,但全國保險行銷人員去年中雖達 302萬人之歷史新高,對保費收入的貢獻度卻降至 5年新低,從 05年的 43.2%降至 2010年上半年的 28.83%。投資者不難從財報中發現,各大保險公司均出現代理人數下降,加緊培訓銷售人員以提升人均保費收入效率,或推行無責任底薪制甚至代理員工制,可能是為今權宜之計。
胡孟青
作者為獨立股評人
作者: 火煋人 時間: 2011-1-24 09:17
青心直說:沃爾克才是金融巨人
2011年01月24日
金融市場喜歡玩標籤化,只要賺大錢,不論是否實至名歸,皆被封王稱神。相比股神或者甚麼大王,從未被冠以甚麼浮誇綽號的沃爾克( Paul Volcker)雪茄伏,才是劃時代當今代表人物。
沃爾克見盡美國由衰轉盛,再由盛變衰。上世紀 70年代,受命於尼克遜,沃爾克一手策劃將金本位瓦解,奠定美元成為全球儲備貨幣的基礎。 79年獲卡特總統任命為聯儲局主席,其時經濟不景通脹高企。
經濟雖一團糟,但沃爾克眼中,聯儲局工作是穩定物價多於一切,於是他二話不說,令利率兩年間升至 20厘的高水平。這場仗,沃爾克打得不易,他成功重建聯儲局獨立性,但大幅加息引來太多不滿聲音。美國通脹由 81年的 13%高位,回落至 83年的 3.2%,沃爾克成功,但列根對其不信任, 87年送他一隻無情雞。
董建華最「識貨」
沒有沃爾克,美國沒有 90年代的強美元、經濟欣欣向榮的黃金 10年。沃爾克直言,不理解現代金融機構的運作。在他眼中,金融機構最大發明是自動櫃員機,其他的都是一無是處。沃爾克認為,金融機構越簡單越好,太複雜的業務,承受過高的風險最終會埋下另一次危機。重返白宮這兩年,沃爾克承認投閒置散,成為奧巴馬的公關機器。
他推動的沃爾克規則( Volcker Rule),改革金融業老早就不為當權者受落。誰不知,民主黨輸掉已故愛德華甘迺迪的參議院議席,從這一天起,改寫整個華爾街的發展,沃爾克法規大派用場,證明歷史發展在於一個契機。
靠坐盤交易,利用客戶資金炒盤製造盈利的法寶不再。華爾街中傲慢如高盛,亦不得不承認沃爾克的影響力。沃爾克貴為金融巨人,他信奉的是化繁為簡,處事先後有序,更重要是不賣賬。還記得 97金融危機,特區組上一個國際顧問團,成員中正正有一個沃爾克,證明董建華最「識貨」。
胡孟青
獨立股評人
作者: 火煋人 時間: 2011-1-25 09:38
青心直說: Fund佬心海底針
2011年01月25日
中美兩大國在現今經濟及金融環境下,本應是最佳拍檔。但美國大量印鈔,量化寬鬆政策被中國不斷批評,祖國為求抗衡,兩年多以來靠投資、靠信貸,推高經濟。美國一邊輸出熱錢,中國一邊輸出購買力,相互抵銷,當然這並非一場零和遊戲,誰勝誰負,好戲仍在後頭。
身處香港,早已領教過內地同胞的強勁購買力,無論名牌珠寶、鐘錶或日用品店舖,早晚均擠滿內地人,內地人買得起更買得「豪」,寶馬亦因為要應付大量中國定單,德國生產線今年要破例取消冬天休假。
內地城鎮居民收入去年增長 10%,但仍僅得 2萬多塊人民幣,證明中國數據不能反映經濟及居民購買力實況,更不能低估內地人的隱藏財富實力。從經濟規模而言,中國已超越日本,外界共識是不消十年,祖國勢將成為全球經濟大國。
盲目跟買易損手
中國冒起引來無數憧憬,但西方社會對中國增長模式仍有保留。英國傳媒指,前滙豐主席葛霖近日以官員身份,向商界演講指中國商機無限,但座上客卻提出不少疑問。更甚者,有對冲基金經理對中國前景由樂觀變為關注,擔心泡沫爆破,部份更部署造淡以對冲風險。
觀乎近期港滙回軟,適逢內需消費股跌到四腳朝天,說真的,就算你問上市公司昨日和今日有乜唔同,相信佢都未必答得出。股價變天,只因投資者也善變,對同一家上市公司之睇法,今天與昨天可以差天共地,源於對估值之感覺與認同程度,當中更涉及人為比較因素,總之,一家上市公司股價可以由年初水平翻近兩番,而業績盈利卻沒有同時翻兩番,撇開其他因素,好大程度係炒過龍。
唔好以為見有大行增持就去搶貨,有冇諗過佢利用股權披露公告天下時持股已過咗 5%,咁早前未夠 5%要披露前,入市價又喺乜水平呢?好多投資者冇考慮過呢點就盲目跟風,隨時「是你手損」!
胡孟青
獨立股評人
作者: 火煋人 時間: 2011-1-26 09:32
青心直說:資金輪流轉豬仔也曉飛
2011年01月26日
唔經唔覺開年就快一個月,舊年贏盡全球之泰國及印尼股市,卻分別唔見咗 6.41%及 9.65%,睇嚟唔使半年就會輸突。風水輪流轉,年初至今廿幾日,全球表現最標青股市三甲竟然係西班牙、希臘及意大利幾隻歐豬,分別錄得 10.13%、 9.53%及 8.78%升幅,真係估佢唔到!
散戶入市慣性只睇自己一家牌,隨時出銃都唔知咩事,打電話問股,淨係問個冧巴而唔係上市公司本身嘅盈利前景。其實股票分析員都唔可以單一咁睇公司本身,既要睇宏觀經濟大氣候,又要睇公司盤數,更加要關注管理層質素,其次至輪到股價走勢中所揭示嘅大戶手影。今日點解升?因為噚日跌得多囉!太多點解,點解唔關心吓資金點解要回流歐美?早知今日何必當初!
水電燃氣股宜炒不宜揸
假如要睇較另類或複雜行業如石油股,基於其作為商品及具備期貨概念,不得不看油價、金價及美元三者之互動力量,最近有大行話炒家沽黃金炒期油,唔知係咪反間計。若要炒中資油股,就更加要睇政府面色,天然氣期貨價由去年 11月初 3.62美元/百萬英熱單位樓下,反覆升至現時 4.55美元,累升逾 25%,地方物價部門準備上調水價、天然氣價嘅決定都可以臨時叫停,相關燃氣股股價自然動彈不得。
收緊之年,中央明顯對通脹充滿憂慮,因人民收入差距大,低收入者對通脹承受能力最弱。 CPI一向被視為窮人指數,社會財富分配結構影響人民所受壓力, 1994年中國經歷過 24%嘅惡性通脹,都未及現時嚴峻,主要由於當時 M1貨幣供應與 GDP比率為 0.43,現時卻高近 0.6。
M1狹義貨幣供應,即居民手上持有嘅貨幣,加埋銀行活期存款,係最直接嘅真正流動性所在,同 CPI具高度關連性,與 M2同時支撐價格上漲趨勢,醞釀多年的資源價格改革措施至今仍只聞樓梯響,看來未等到有關措施出台、資金未回轉前,水、電、天然氣相關股份只宜炒不宜揸。
胡孟青
作者為獨立股評人
作者: 火煋人 時間: 2011-1-27 09:32
青心直說:拆解中國式併購死因
2011年01月27日
中國外滙儲備規模達 2.85萬億美元,國家有必要分散投資平衡滙率風險,人民幣升值屬滙改必然進程,企業趁機尋求更多海外併購,變相執平貨之同時,增加錢生錢機會。過去 20年,中國企業海外併購年均增幅 17%,過去 10年中國在海外完成併購個案超過 100宗,但失敗率亦高達 67%,最經典失敗個案要數 05年中海油以 185億美元收購 Unocal,及 06年中移動 53億美元收購 Millicom,都基於國家安全理由被否決。較近期例子有 09年中鋁集團收購澳洲力拓、四川騰中收購悍馬,及去年上海光明食品收購澳洲原糖生產商 CSR,全部以失敗告終。
收購失敗,無論談判費與管理層時間都浪費不少。中國主權基金中投入股黑石,賬面損失不在話下,招股價 31美元,家得番 15.76美元,賬面唔見一半,滿以為搵到支盲公竹,又唔見得喺曲線借力海外併購優質資產上有大作為。還好今年 6月 22日將擺脫 4年禁售期束縛,又睇吓到時中投 7人小組點樣看待呢件蝕本貨。
買得到也未必好
走出去一向不容易,尤其是出海併購,即使成功過程亦難免險象環生,看早年本港兆峰陶瓷收購德國陶瓷廠,後因擴張過急資金周轉失靈而沒頂,仲有 TCL收購法國 Thomson損手爛腳、聯想收購 IBM個人電腦業務捱鑊甘可知。
中國人收購觸礁,係咪擔心國家政治安全或中國資源領域戰略擴張就不得而知,然而因怕搞衰品牌格調, Prada債台高築都唔肯賣俾上海富客斯。中國企業海外併購失敗,往往不在於作價,而係企業形象不及競爭對手, CSR最終以 17.5億澳元售予新加坡豐益國際,唔止因出價較光明高 6%,而係賣方對新加坡信心較大。
中國式豪氣往往在收購對象所在地引起同業恐慌,往往對方肯點頭而又順利得過份的併購個案,隨時會係 Sucker,縱非不良資產也幾可肯定是雞肋。
胡孟青
作者為獨立股評人
作者: 火煋人 時間: 2011-1-28 09:42
青心直說:礦業板塊新篇章
2011年01月28日
每個股票市場都有本身特色,能夠主導指數走勢之板塊,特點係市值大、流通量高。香港股市向以金融地產主導,內地則有上游資源即煤炭石油,台灣係金融及科技,俄羅斯股市就當然係石油股主導。
全球進入通脹年代,資金追逐供應緊張的農產品及商品資源,港股已成為中國經濟一面鏡,中國需要甚麼,甚麼就有運行。例子唔只有本地名店,內地產婦鍾意嚟香港生 BB所衍生嘅商機亦不容忽視,聽公關大姐講,近期本地婦產科醫生已由「月球人」升呢為「星球人」,即係收入由每月一球( 100萬元),變成每星期一球,真係賺到笑。
擴大至國家層面,現時全球最吃香係上游資源,中國對上游資源礦產之渴求程度,同新興經濟體與工業大國爭奪資源已路人皆見。香港投資者經歷過連年被真真假假一大堆號稱經營礦業,質素卻良莠不齊的殼股洗禮後,應已交足學費,甚至具備足夠知識水平掌握這個板塊的投資方法。
提高上市門檻汰弱留強
現時不少擁有龐大礦產的企業,多選澳洲、加拿大及倫敦上市,去年港交所( 388)就涉及礦務之上市規則 18及 18A,經諮詢後作出修訂並於 6月 3日生效,有關修訂雖然要求高層與董事須擁有礦務經驗,並提高對專家技術報告編制方式要求,反而令礦業公司質素因上市門檻提高而得以提升。
假如修訂早半年完成,證監對俄鋁( 486)的上市要求限制,反而不必過於嚴苛,散戶也不必因為過份疑慮引起監管機構作出過份保護措施,喪失趁 IPO入市之機會,要待上市後睇完一大輪,等到股份拆細再拆細才有機會入市小試牛刀,最可惜係當股份買賣股數拆細時,技術上又已出現頂背馳與沽貨訊號。點都好,多啲真正礦業股登陸香江呢個礦產資源需求大國嘅南大門,對投資者點都係好事,相信大家也樂見市場有多啲實事求是嘅好股,驅逐整色整水蒙混過關嘅劣股。
胡孟青
作者為獨立股評人
作者: 火煋人 時間: 2011-1-31 09:28
青心直說:保爾森揸重金對冲通脹
2011年01月31日
很難想像,約翰保爾森竟然會與滙控( 005)扯上關係。約翰保爾森 09年買入花旗大賺 10億美元,他不選擇滙控,當然有其原因,但偏偏他近年大部份賭注,正正押於滙控身上。約翰保爾森透過全球最大黃金 ETF SPDR變相持有黃金, SPDR黃金持倉約 1200多公噸,這批實金存量正正存放於滙控倫敦的金庫。約翰保爾森的黃金投資,的而且確全數押於滙控內。
約翰保爾森憑黃金及大量股票好倉,基金盈利破紀錄超過 50億美元,單是收取管理費,已高達 10億美元。在他給予投資者的信亦表明,對冲通脹是未來兩、三年的投資策略。對於黃金投資,他仍然具備自信,表明未來五年均有信心提供理想回報。
金價數星期來明顯異動,去年 12月起,長倉比重大幅減少,全球利率走勢向上,亦左右黃金走勢。華爾街日報近日一篇報道,原來近日有美國炒家因為被多次追收孖展,結果爆倉最後要將黃金基金清盤,導致金價波動加劇。這故事說明,在炒家主導的商品市場,買紙上黃金或相關衍生產品承受的風險,遠較持實金高,而且要有一份能耐才不會被人為因素左右決定。
投資主題隨時 180度改變
一而再能賺大錢,不得承認約翰保爾森至少在此一刻是高手一名。高手當然不願公開分享投資心得,但看其給予客戶的信,自 07年起至今,他的投資策略已出現四大轉變。 07年看淡樓市,他決定大手買入對冲產品跟好友對賭。
到 08年泡沫快將爆破,他二話不說大手沽空,換來沽神稱號。金融海嘯後,他的投資主題又 180度改為持大手長倉,而至近年,投資策略奉行以抗通脹為首任。
物價高企,今日當然有十萬個理由睇好投資市場前景。但環境不斷變,炒家今日以抗通脹為名大造好倉,但他們轉身快兼不動聲色,難保明日又有另一理據再次造淡。去年的投資往績及策略已成歷史,投資高手刻下的盤算,才是關鍵。
胡孟青
作者為獨立股評人
作者: 火煋人 時間: 2011-2-1 09:54
青心直說:出得嚟玩預咗要還
2011年02月01日
上海銀行同業拆息( SHIBOR)終於喺逆向回購啟動下回順, 7日拆息由 8厘樓上跌返落 4厘鬆啲,短息一度高過長息,反映市場極水緊。美國上次出現長、短息倒掛,係 06同 07年市場氣氛未變壞時,維持兩年後終於出現衰退。中國今天出現經濟過熱,要多得因振興經濟之名推行過度寬鬆嘅貨幣政策,後遺症係過去兩年貸款急增 17.54萬億元(人民幣.下同),銀行借出去嘅錢等於之前 5年總和。
內地有阿爺頂住,債仔很大程度唔係國企就係背景非同小可,十幾萬億錢假如真係切實經營實業支持基建創造就業當然係好事,只是去年原來委託貸款之銀信理財產品規模又係另外 7萬億元,風險由投資者替銀行孭起,相關貸款今年將要按季納入負債表,更能確實反映銀行的信貸風險規模。假如信貸泡沫爆破,骨牌效應會由首當其衝嘅房地產蔓延至各行各業。
內地 IPO殺雞取卵
過去兩年內地經濟欣欣向榮,要拜量寬所賜,市場資金太多,企業趁勢搞 IPO,投資者資金紛紛向中小板與創業板靠攏。然而上市公司大股東、創投基金、高層紛紛搶灘減持,短短半個月, 28家公司透過二級市場套現 45億元,令股民意識到股市似係一個融資多於投資嘅地方。
唔好以為上市「骨水」係中小板創業板專利,主板 A股一樣有隻華銳風電( 601558)甫上市即插水,佢上市前利用價格競爭搶爛市成為內地風電霸主,可惜股價終遭天譴,反映股民被當羊牯已忍無可忍,尤其係眼見一眾私募同創投基金頻頻勝利大逃亡,散戶卻被綁死。投資者對 A股信心不足唔只擔心市場有欠公平,亦唔相信監管機構可以幫佢哋斬妖除魔,索性以腳投票拒絕上當。內地 IPO明顯係殺雞取卵,當音樂停下來,要還錢嘅還唔起,借新錢還舊債又隨時俾高息壓死,想 IPO又遇冷風,企業正常融資渠道路路不通,情況會點?出得嚟玩、預咗要還。
胡孟青
獨立股評人
作者: 火煋人 時間: 2011-2-2 09:46
青心直說:另類希望工程
2011年02月02日
自從廿幾年前香港經濟起飛,更重視物質,名牌袋就成為好多少女 OL名人嘅奮鬥目標。 1988年第一次隻身去巴黎旅行,首次買下一個折合 180鎊兼有離境退稅優惠嘅名牌袋,目的只係作為旅程紀念,返到英國讀書嘅埠仔,拎出街都冇人識得個袋,反而之前喺香港銀行工作時,有位細過自己學歷亦較遜嘅女同事,日日拎住同一牌子男朋友送當時極流行嘅魚籮款式。
03年獲邀往倫敦參觀展覽,一夥人順道去巴黎,既然下一站就係巴黎,唔使急於喺倫敦掃貨,反而同行人士卻喺倫敦買爆 Quota,何解?手上有大量在港接落嘅柯打囉。畢竟曾長居異地,對名牌感覺不太強烈,同行嘅黃師傅亦行過萬里路,結果我哋到咗巴黎就勇敢地消費,佢仲喺茶花標記買咗個相當於 5000港銀嘅粉藍色經典款式手袋畀老婆大人。當年歐元仲平過家,兌美元只係 1.06水平,招呼仲好過香港。
抽米蘭站博賺名牌袋
後嚟去城中名人最流行拎住嘅 H記,不過我唔係買 B仔款,而係我個人覺得靚得嚟冇咁 Common且送多一個布袋替換嘅 Herbag,感覺好似買一送一,因為唔係買嚟炒,當然按喜好行事。雖然至今都好少拎出嚟,一來唔忍心擺佢落地磨;二來裝唔落我所有開工要用嘅手提電腦同報紙等必需品,呢類袋除咗拎出嚟睇戲食飯行街揚威,真係唔多實用。
最難得仲係坊間土炮賣十元八塊一本嘅八卦時尚雜誌,都將 Price Tag掛喺相中名人身上,由頭到腳每件身外物都掛上價錢牌,觸發讀者好奇心虛榮感爭相仿效,名牌就是這樣打造煉成的。鋪天蓋地無處不在嘅廣告攻勢,仲有真人騷配合,定力低啲都幾難抗拒,錢多嘅可以跟自由行搶買真貨,唔夠錢都可以去乜乜站入貨,再冇錢就入去揹嚟「埋鏡併併」。
只有些少錢到喉唔到肺嘅,倒不如睇睇有冇耐性留住利是錢,等埋隻米蘭站過完年搶閘招股,希望可以賺番個名牌袋。
胡孟青
作者為獨立股評人
作者: 火煋人 時間: 2011-2-7 09:07
青心直說:唔理好醜只要有樓
2011年02月07日
市民求簽,望樓價回落,讓多些人能負擔得起,買一層樓。可是,在現今瘋癲大環境下,普羅市民的宏願,至少一段時間內,恐怕事與願違。
政府出招,阻不了樓價升勢,樓價只升不跌嘅預期令業主心雄。與代理短談,旺區黃埔,一個四百多呎單位,原叫價 368萬,本身已超出銀行估值,最後因隔鄰業主叫價 400萬,於是決定封盤。樓價指標太古城, 675呎則王單位, 7月 520萬成交,及至 1月份市價已升至 620萬。試想,半年賺 100萬,炒樓及買物業保值的引誘怎能抵擋。一線屋苑升至天價,資金轉移至二線新界區,元朗、天水圍再有價有市。樓市現況,與地產股表現相似。 70蚊無買長江實業( 001), 90蚊無買新鴻基地產( 016),結果兩大地產股王升破 130元,每手 13萬元有多。莫說買樓,想買一手藍籌地產股亦難以負擔。
資金轉炒三線地產股
一線地產股太貴,資產卻仍然有價,今年起資金轉炒二、三或三、四線地產股最為明顯。嘉華國際( 173)、香港興業( 480)、九龍建業( 034),甚至大昌( 088)、泛海( 129)、莊士機構( 367)等等滄海遺珠紛紛起錨。這批中小型發展商被看上不令人意外,連帶好一隻金朝陽( 878),具備銅鑼灣旺區收租概念,亦由低位不足 5元,升至近日調整後仍在 12元之上,翻足一番有多。樓價股價均一字記之曰:「癲」。
如果從估值衡量,藍籌地產股已升至股價對賬面值平均 1.2倍水平,令到二、三線地產股至少單憑估值唔計其他因素就已相當吸引。泛海現價對賬面值僅 0.28倍,永泰地產( 369)也只有 0.48倍,金朝陽、香港興業以至遠東發展( 035)均處於 0.6倍賬面值樓下。無錯,目前是有樓有磚頭「大晒」的大時代,引用鄧小平講法,不理黑貓白貓,捉到老鼠就是好貓。家……不理好公司壞公司,總之有物業、有地皮就是一間好公司。
胡孟青
獨立股評人
作者: 火煋人 時間: 2011-2-8 09:38
青心直說:守株待兔揀盈信
2011年02月08日
建築股一向予人雞肋嘅印象,皆因屬於揼石仔生意,承造政府工程,收錢找數唔係問題,利潤率至係關鍵,以新昌營造( 404)為例,包括物業管理及機電安裝工程與土木工程及樓宇建造等綜合毛利才 9.9%,而且係 73.4%合約來自私人發展商,才可達到勉強接近一成利潤,而較大比重來自承接政府工程嘅盈信控股( 015),即使持續努力控制成本,工程部份嘅毛利率仍只能從 09年嘅 5.1%,改善至 6.9%。
有見及此,加上管理層深明要把握利潤最大化的關鍵,就是要掌握整個產業鏈,早幾年由建築轉型物業發展的俊和( 711)就係好例子,但俊和在港物業項目只有清水灣道八號,近年更將重點放喺內地。
自 07年積極收集貴重物業嘅盈信,手頭擁有過百億合約工程項目,足夠未來兩三年提供穩定現金流之餘,資產仲包括窩打老道 155及 157號共 1.6萬方呎極具重建價值嘅大屋連地、薄扶林道 92A及 92C將重建為獨立洋房嘅地盤、通菜街 123至 127號舖位加酒店項目、彌敦道 688號旺角中心 17個相連舖位,內地則有天津濱海區 CBD嘅 31層總樓面 7.6萬方米嘅甲級寫字樓。
土儲豐厚重建有價
物業發展首重 Landbank,睇完以上資產組合就知夠料,配合物業統統喺 2012年落成,資金已急不及待撈定嚟守株待兔。
港府奉行高地價政策,連大型發展商都慨嘆市區靚地難求,焗住要收舊樓,配合強拍門檻降低,小型發展商直接受惠,因為收舊樓好考耐性同技巧,盈信上月成功以 2.41億元,收購灣仔活道 1號舊樓項目 84.4%業權,成另一重建項目寶藏。
發掘滄海遺珠先要秤一秤身家,篇幅所限,明天再做 Sum of the parts為資產估值。股價行先一步,係因為年三十晚早上《港股王》已事先張揚,配合 2011年之選太保( 2601)之外嘅兔年之選,期望守住 1蚊雞反覆向上,起碼兩隻股都唔係通街唱到爛之作,少一重風險。
胡孟青
作者為獨立股評人
作者: 火煋人 時間: 2011-2-8 09:40
青心直說:守株待兔揀盈信
2011年02月08日
建築股一向予人雞肋嘅印象,皆因屬於揼石仔生意,承造政府工程,收錢找數唔係問題,利潤率至係關鍵,以新昌營造( 404)為例,包括物業管理及機電安裝工程與土木工程及樓宇建造等綜合毛利才 9.9%,而且係 73.4%合約來自私人發展商,才可達到勉強接近一成利潤,而較大比重來自承接政府工程嘅盈信控股( 015),即使持續努力控制成本,工程部份嘅毛利率仍只能從 09年嘅 5.1%,改善至 6.9%。
有見及此,加上管理層深明要把握利潤最大化的關鍵,就是要掌握整個產業鏈,早幾年由建築轉型物業發展的俊和( 711)就係好例子,但俊和在港物業項目只有清水灣道八號,近年更將重點放喺內地。
自 07年積極收集貴重物業嘅盈信,手頭擁有過百億合約工程項目,足夠未來兩三年提供穩定現金流之餘,資產仲包括窩打老道 155及 157號共 1.6萬方呎極具重建價值嘅大屋連地、薄扶林道 92A及 92C將重建為獨立洋房嘅地盤、通菜街 123至 127號舖位加酒店項目、彌敦道 688號旺角中心 17個相連舖位,內地則有天津濱海區 CBD嘅 31層總樓面 7.6萬方米嘅甲級寫字樓。
土儲豐厚重建有價
物業發展首重 Landbank,睇完以上資產組合就知夠料,配合物業統統喺 2012年落成,資金已急不及待撈定嚟守株待兔。
港府奉行高地價政策,連大型發展商都慨嘆市區靚地難求,焗住要收舊樓,配合強拍門檻降低,小型發展商直接受惠,因為收舊樓好考耐性同技巧,盈信上月成功以 2.41億元,收購灣仔活道 1號舊樓項目 84.4%業權,成另一重建項目寶藏。
發掘滄海遺珠先要秤一秤身家,篇幅所限,明天再做 Sum of the parts為資產估值。股價行先一步,係因為年三十晚早上《港股王》已事先張揚,配合 2011年之選太保( 2601)之外嘅兔年之選,期望守住 1蚊雞反覆向上,起碼兩隻股都唔係通街唱到爛之作,少一重風險。
胡孟青
作者為獨立股評人
作者: 火煋人 時間: 2011-2-9 09:23
青心直說:無聲兔隨時反高潮
2011年02月09日
山雨欲來風滿樓,港股連續兩日先紅後黑「嘔兔」大作,未有應驗各媒體嘅紅盤高收預測,驚還驚,最大 Fear Factor離不開唔知節前定係節後嘅加息行動,結果喺香港節後而內地 A股開市前夕出手。你話出其不意,我就話預期之內。
人行貨幣政策委員會委員李稻葵上月底打晒開口牌,叫大家有心理準備,首季度要加息以抑制通脹。李先生嘅預言準過大行,佢話中國 2010年 GDP增長起碼 10%,最終出嚟就係 10.3%;佢認為傳聞中徵收 1%房產稅太高,結果上海、重慶稅率都有如痕。
阿爺繼續玩漸進式加息,脆脆地加 0.25厘,為股市暫時消除不明朗因素,內地投資者流行講「利空盡頭是利好」,隨時挾到癲有咩咁奇,無聲兔挾死人,分別只係挾上定挾落,兔仔係無聲帶動物,轉頭個市隨時變咗臉你都未來得及反應,但炒嘢都要搵個理由,天馬行空到連歐洲都可成「概念」,磚頭就自然嚟得更實在更理直氣壯。
人行加息股市或反升
唔係乜公司都可以斷斤秤,有能力將手上磚頭變現,「每股資產淨值」至有價有市。資產淨值在會計上,係指上市公司總資產減去總負債,即償還所有負債後股東應佔嘅資產價值,再除以已發行普通股數目,係公司投資價值其中一面鏡。
至於 SOTP,即分類加總估值法( Sum of the Parts Valuation),適用於業務較綜合同多元化的控股公司,由於盈信控股( 015)手持物業項目只按未計及重建價值之購進成本入賬,即以 6.1億元淨資產計,每股賬面值折合僅 0.41元,根本唔能夠反映資產重估及物業重建後的可實現銷售增值部份;土木工程核心業務現金流給予資產以外的最基本應有估值,也可按該部份業務盈利能力嚟合併運算更合理估值目標。
唔睇資產純考慮核心業務,往績 PE唔夠 10倍,以現市值衡量,盈信每股資產淨值喺乜水平?篇幅所限,明天再算。
胡孟青
作者為獨立股評人
作者: 火煋人 時間: 2011-2-10 09:26
青心直說:價細股•架勢股
2011年02月10日
有人以為一向唔寫細價股嘅人突然破戒,就認定有人終於同流合污,呢種諗法當然係心地唔好嘅表現。前年海爾電器( 1169)咪又係一隻「細價股」,今日股價已去到 8蚊,即使佢仲係一隻炒股,都肯定唔再係「細價股」。
唔通有人認為,海爾會請食飯或派片畀股評至有人貼?講真,我連佢管理層都未見過,佢盤數又唔係靚,毛利又唔係高過人,推介原因離不開 08年 11月 30日國家推出家電下鄉政策振興經濟,配合後來連揸住佢 CB嘅投行,都終於肯投降嘔番手貨出嚟,國策加供求兩個誘發股價爆升嘅因素,集齊印花換禮物啫,唔係真係搵鬼推咩!只係好多人就算睇到都唔識捉路,成日以為單靠內幕消息炒作,難免錯過機會。
早幾日提及幾隻從未講過嘅細細粒四五線本地地主股,旨在為兔年之選開路。事實上,股價長期出現極大折讓嘅地主股,原因只有幾個,假如唔係因為人家唔知佢係乜水,就肯定係因為大家太了解佢,就算資產豐厚、股價大折讓,卻因擔心其話事人蠱惑而唔敢落叠,唔係就唔會炒到冇得揀先至揀佢,而呢類炒落後通常唔會持久。
講多無謂睇業績
假如一間上咗市十年嘅公司,未曾行過蠱惑而又大部份時間賺錢,縱使冇點派過息,起碼都未為非作歹打爛齋砵,總好過要搵公關出嚟喪 Sell,又或者頻頻搞搞震變身兼改名換姓令人難以捉摸。今時今日至寫,你又點知過去十年佢不在我雷達偵測範圍,話晒佢跟我一手一腳搞過上市嘅 7號仔,都同場搶過上市代號搞到要抽籤決勝負,當然個冧巴夾在老牌地產股希慎( 014)同新地( 016)中間,絕對唔失禮。
有好多上市公司,識佢十年都停留喺觀察名單之上,十年前夠冇人諗到張家輝會成為影帝喇,你點敢斷定今日嘅細價股,明天唔會變成架勢股!總之,聽其言、觀其行、看其業績,呃得一時都唔呃得一世,唔掂嘅始終都會露底,話之你點幫佢吹水!
胡孟青
獨立股評人
作者: 火煋人 時間: 2011-2-11 09:24
青心直說:投行叛逆與股仔護法?
2011年02月11日
投行分析師的叛逆宣言,係近期讀之再三回味的著作,作者張化橋打正旗號來自大型投資銀行,偏偏又要玩踢爆,拆穿好多形象上比股評人高幾班嘅分析師,背後嘅無奈與整色整水,終日徘徊在抵賴、修正、狡辯、再修正的惡性循環,甚至揭示連基金經理也常犯的七宗罪,頗有今是而昨非嘅氣概。
作者今日當然已升呢,昔日嘅「民企之父」,曾因踢爆內地在港上市民企西洋鏡,激怒上市公司惹上麻煩,後來時間與事實戰勝一切,該兩家內地民企掌舵人亦相繼身陷囹圄。作者運用自己對國情的了解及分析事物的獨到眼光,不畏孤獨、不怕強權地發揮敢言精神,肯講真話,提醒坊間盲毛前面有陷阱,唔係人人得,要有條件資質膽識良心至做得到。當然,假如有人屢勸無效仍要玩自殘,就真係邊個都幫佢唔到。
聽咗就信自食其果
實不相瞞,以前未被舊老闆推出嚟講股之前,從無睇或聽股評節目嘅習慣,人在缸湖,到自己誤墮塵網之時,惟有多加留意別人言行,好嘅就參考借鏡,壞嘅亦可作為反面教材引以為戒。
近年所見,唔少散戶沉迷於隨便扭開電視機、收音機或者睇完人寫一寫講一講某隻股份,就當人家係嗰隻股票嘅護法,冇理由聽完睇完第三者講自己對某行業某公司嘅睇法,就囫圇吞棗照單全收啫。
覺得值得一寫,原因只係見到別人忽略的角度,不吐不快,寫篇關於新上市拖鞋股嘅古仔,唔係叫你去入飛,只係話你知有間咁嘅公司申請上市,買佢嘅產品同與買佢嘅股票,結果可以很不一樣。睇完聽完就玩條件反射,用人家第三者嘅睇法去指揮你嘅腦袋,橫睇掂睇都只可以用衝動鹵莽 4個字去形容。
講真,連幾百字都寫唔出,而故事又極犯駁嘅上市公司比比皆是,好多連較具說服力嘅理由亦欠奉嘅股份,每每卻成為大龍鳳合唱團主角,呢個世界就係咁荒謬。
胡孟青
獨立股評人
歡迎光臨 喜市股票討論區 (http://hei-market.com/) |
Powered by Discuz! 6.1.0F |