「今天我跌倒，不應放棄。」
唔經唔覺，18年喇，今日係Beyond日。
有幾多人係o個個年代？Beyond係其中一樣80後童年回憶。
例如64事件、馬勒當拿稱霸、公牛皇朝，都令我地既童年變得豐富。
其實呢，我個人覺得永遠等待、不再猶疑、喜歡你 呢Ｄ就的確好重80年代味，
即係咁，只要你聽到首歌既旋律：「喜歡你……那雙眼迷人……笑聲更動人……」
都會不自覺諗到黃貫中個diehard長髮Look、黃家駒個油頭粉面中間分界，係幾老土下。
不過，更有一大堆作品對我黎講，係歷久常新，到依家Beyond三子繼續食老本20年都仍然好聽，
或者童年陰影，四人時代既佢地已經深深印響我既腦中冇辦法沖走，
就算黃貫中唱既海闊天空有幾煽動，獨奏有幾精彩，我都仍然覺得新，真係不如舊。
十八年後聽番黃家駒，你都會覺得呢條友把聲真係好X正，、高音夠衝、低音夠感情，講既故事勵志，
根本同依家班濕鳩唔同層次。(至於邊Ｄ濕鳩，就唔好深究喇！)
你話，呢家有邊隊Band會咁大膽搬阿媽出黎講？而成件事仲要唔肉麻，依然有型，依然Rock，
當年真係多左有好多好多年青人因為呢首歌而意識到母愛既偉大同親情既可貴。
佢地雖然為左上地面而有段時間好鬼POP，o個堆POP野又真係好成功，
不再猶疑、光輝歲月、海闊天空、真的愛你、灰色軌跡等，真係Intro第二個音已經知係邊首。
不過，POP還POP，佢地又有另外既作品叫做綠葉，去挑戰一下個社會，個機制，
刺激一下POP Culture同埋廣大聽開POP野既歌迷，點知又紅左，而呢堆，係我地Band仔至愛，
例如金屬狂人，真係好過癮！或者唔算progressive，不過好多變化，cover黎玩都好開心！
例如俾面派對，充滿怒火，夠哂力，歌詞唔使依家D粗口左屌右屌都聽到佢地有幾忿世！
例如長城，當年佢地真係年輕，冇諗過會番內地發展！
例如早班火車，天天清早最歡喜，在這火車中再重逢你，迎著你那似花氣味 難定下夢醒日期……
每次介紹俾未聽過既朋友聽，都會加一句：喂！呢D咪生活囉！寫得幾中point！林振強好野。
(相信佢兩個依家響下面同羅文黃沾打緊牌)
可能當年錄音風格問題，玩音樂既朋友不妨用依家既Style去cover番佢地Ｄ歌一次，
你會覺得，其實一Ｄ都唔老土，拿！純個人睇法！黃貫中手野都算係勁 (一定有人走出黎話佢手野唔得)
傳說黃家駒手野仲勁，不過佢鐘意彈木結他，彈Classical，
佢可以忍住手唔爭solo，專心唱歌其實要好抑制，黃貫中的確做得好好，有火又夠力度，
我又諗，如果彈結他o個個係黃家駒 (好似第二代早期)，D結他風格會唔會唔同哂？
會唔會勁左？佢會唔會玩得太極端而唔受歡迎？
佢死左，問唔到佢，不過佢一定係個好兄弟。
唔怕得罪講句，黃家強係佢細佬，帶住佢出黎都無可口非，
Beyond根本就可以搵一個更好既鼓手，都應該唔止我一咁諗，
當年都應該有唔少人同佢講過呢個問題，拖住一個又一個唔夠水準既人，係好攰架！
到依家仲有佢份，我諗呢D或者就係人情味，夾Band難，夾人仲難，
搵一個相處好既人其實唔易，咁你會知道葉世榮其實係一個超善良既人，
或者黃家駒本來可以更好，以佢既質素，解散Beyond出黎單飛仲有發圍機會啦！
起碼唔使分四份錢、起碼唔使一齊扮亞拉伯人、唔使Beyond放暑假，而係黃家駒陪你放暑假。
一個有能力既人，為左理想，可以堅持到底，憑住自己既能力扶持他人，
呢Ｄ，就係永遠既英雄。
或者我鐘意Beyond係因為一種精神，一種黃家駒帶俾童年既我既信念，
雖然我仍然覺得不再猶疑真係好老土，不過由佢把口同你講夢想有日達成找到心底夢想的世界，
我真係會覺得係真。
p.s. 黃貫中繼承左佢既信念，將Beyond精神繼續延續，其實係一件好感動既事。
by 小姓奴 大世界
Share this: 
