好市的時候，壞消息無乜影響力。國基會（IMF）發放全球經濟負面睇法，標普調降西班牙評級，但歐洲股市無事，法國升1.4%，德國升1.1%，只係美股軟少少。
美國首次申請失業人數跌至四年新低，市場以為美股連跌三日後，會有番一個似樣的反彈。杜指朝早係威係勢，彈升83點至全日最高，之後馬上變臉，一路下滑超過100點，至全日最低位收市，收13326點，倒跌19點。四連跌。
電訊股Print Nettel傳出被收購消息，Print Nettel及相關公司大炒特炒，Shutterstock及Realogy Holdings等新股上市表現強勁，刺激炒賣氣氛，標普500指數靠穩，跑贏杜指。收1433點，力保不失。
美國最新一周首次申請失業救濟人數較上周大幅下降3萬至33.9萬人，創了4年多以來新低，明顯好於市場預期；近4周移動均值亦較上周減少1.15萬人，至36.4萬，係今年3月末以來新低。
另外，市傳歐盟領導人可能將引入那監管銀行比較嚴格的巴塞爾銀行資本規則時間，推遲一年。主要原因係歐債危機搞極都唔掂，全球經濟活力又放慢，好多歐洲銀行周身唔掂，強行巴塞爾銀行資本規則，只會推升銀行運作成本，加大其出售資産、減少放貸、以及發行股份等壓力，受消息刺激，銀行股反彈。
就業數據理想，加上金融股造好，花旗集團更加上調美股的預期，話美股股估相對較低，聯儲局又採取寬鬆措施，預測從現在到2013年底，全球股市將走出上漲行情。但杜指彈一彈就跌番下來。除了美股近日的確升得太多，需要轁轁氣外，投資者開始憂慮羅姆尼勝出總統候大選，會導致大市下跌，原因係羅姆尼做總統，聯儲局主席伯南克就要執包袱。市傳羅姆尼已訂出取代伯南克的人選，該位人選比較傾向於加息，將對大市做成壓力。
環球大市還在一個大反彈浪中，對壞消息有抗疫力，對好消息反應大。過住可以隊低美股200點的標普調降西班牙評級消息，而家無乜人講。但我同中環茶友都係咁睇，在反彈浪中唔好睇淡，在下跌潮中唔好睇好，如今在反彈浪中，唱好無乜壞，但又唔好睇得太長遠，以為天下太平，抱一個半炒作心態，睇佢幾個月好啦。
Share this: 
