期待以久的希臘國會通過緊縮方案的日子，終於出現兼結朿，方案順利通過，街頭並無意外地失控，一場大事後，有點失落。歐元一如所料地上升，但高位有阻力，風險資產上揚，股市上升，但歐洲股市強過美股，美國銀行與抵押貸款債券投資者達成巨額和解協議，信用卡公司收費上限獲得提升，金融股大幅造好；5月二手房簽銷增幅遠超預期，多重利好消息推動下，美股連續第三日向上。
杜指收市報12261點，升73點；標普500指數升11點，造1307點，杜指期貨最新報12217點，較現貨低水44點。
港股美國預托證券造好，ADR港股比例指數報22270點，比香港收市高209點或0.9%。匯控收76.74元，比香港收市高1%，中移動收72.18元，比香港高0.9%。
盡管希臘首都雅典示威騷亂持續升級，希臘國會昨日以155票贊成對138票反對，通過了財政緊縮計劃。內容包括大幅削減支出、提高稅收和出售國有資産等。昨日的表決其實只係通過方案程序的第一步，希臘國會將於今日就方案每項內容投票，當中涉及以超低價出售包括郵政、碼頭等國有資產，要睇睇係唔係所有議案都可以通過。
即使所有細節都獲個通過，唔代表事件往後天下太平。由於呢個五年緊縮計畫實在太苛刻，例如公務員減15%工資、關閉2000間學校、大幅削減福利、大幅增加原油、煙酒稅、物業稅、公司利得稅和增值稅。咁環境私人企業一定會緊縮投資，失業率高企，國家將面對國民此起彼落的抗爭，勢必對希臘的經濟造成漫長的影響。
無論如何，希臘危機暫得緩解，全球投資者可算鬆一口氣，投資信心得以恢復。歐元上升及歐洲股市昨日大幅向上，歐元兌美元升上1.44美元水平，油價及金價亦轉強，紐約原油升至每桶95美元上方，黃金每安士升上1512美元。推動油股及金屬資源股造好。當中表現最好的是金融股。杜瓊斯金融指數勁升3.7%，係推動大市向上的主要火車頭。
假設一切順利，歐債危機暫時緩解，我估下個星期要睇下歐洲央行係唔係一如市場所料加息，估計會將歐元推高，順帶風險資產都有個小高潮，不過高潮過後，並不是一帆風順。以匯市計，美國QE2結朿，非美元外匯推高後，是否有能力再試高位，我看未必，接著又會回到一個上落市的形態居多，觀察8月美國是否通過債務上限，及聯儲局往後會唔會顯露再QE的苖頭。
至於以美國為首的環球股市，渡過希臘債務危機呢一浪衝擊後，亦唔係無風無浪，市場目標將轉到企業業績上，正如昨天所講，今年第1季市場預計標普500指數公司有13%盈利增長，結果有20%，遠超市場預期，對股市有推動作用，但今季市場預期有16%盈利增長，係唔係咁易做到呢?
市場暫時唔係好樂觀，所以美股自4月尾的高位跌鰦6%，而家不少分析員預計美股未來只是上落市，標普500指數只是在1250點至1350點之間上落，如今標普500指數在1307點，差不多在中間位。咁樣市道，要多花精神去揀股，現時有個睇法係落後的金融股可以留意。
若然美股大勢唔係咁爆，港股要造好，只能望紅色股好，因為紅色股跟大陸多過跟環球股市大勢。
Share this: 
