美股連跌四日之後，昨日反彈。杜指早市表現都係麻麻，曾再度失守10000點關口，大跌103點。其後反覆回升，尾市更收復所有失地，輕微倒升20點，收10060點；標普500指數漲3點，報1055點；納指升18點，造2142點。杜指期貨最新報10050點，比現貨低水10點。
港股在美國預託證券則繼續偏軟，ADR港比指數收報20552點，比香港收市低83點。匯控收76.09元，比香港低0.3%。中移動就重上80元水平，收80.13元，比香港高0.4%。
美國昨日公布嘅經濟數據都好差，繼上日公布的7月份二手房銷售數字前所未見的鋭減27.2%，昨日出爐的同期新屋銷售亦不濟，較上月下降12.4%至27.6萬幢，遠低於市場平均預期的上升至33.3萬幢。創下1963年以來最低水平，而屋價也降至2003年以來的最低值。
另外，商務部又宣布，雖然飛機的需求強勁，但7月的耐用品訂單增幅只比上月高0.3%，差過預期的2.7%好多。若不計大幅增長13%的運輸設備訂單，7月的耐用品訂單較上月大降3.8%，創了自2009年1月以來月降幅新高。唯一嘅好消息係，這是三個月來首次出現正數。
美國經濟唔掂，美股兩周累積跌幅接近7%，昨日有番啲敢死隊撈底博反彈，頂住大市跌勢。不過，Fort Pitt Capital Group資深分析師Kim Caughey就話，「很多人都在試圖抓住股市的底部機會，願上帝保佑他們。我們已經預料到銷售數字會下降，但未曾想到會降到如此之低。房地産市場的庫存量正在攀升，需要一年多的時間才能將其售罄，這實在令人擔心，因為它將導致房價繼續下跌。」房地產市場唔好，股市仲有運行？
美國房地産市場尤其唔掂，但地產股及相關股受豪華住宅建築商Toll Brothers第三季業績近三年來意外地扭虧為盈、收入超出市場預期的刺激，昨日普遍大幅造好。Toll Brothers上漲4%，佢嘅競爭對手D.R. Horton上漲了4.7%，KB Home漲5.2%，Lennar Corp升3.6%。道指成分股、房屋裝修用品零售商Home Depot及Lowe's都齊漲約2%。
網友myself昨日講到，「咩叫弱勢股，睇宏利就知，市升佢呆，市呆佢跌，市跌佢跌更多。」真係講得好啱。
宏利真係好弱勢，自公布業績後未好過，當時一公布業績，我話佢跌穿110元重大支持位，唔好再掂啦，千祈唔好諗溝貨。結果真係不斷跌，昨日跌到86.9元，已經比110元跌多21%，一隻大股短短兩個星期唔見咗咁多，真係嚇死人。
昨日有個朋友氣急敗壞打電話俾我，話佢揸咗「好多」宏利，問我點算。或者佢唔記得咗已經問過我。隻股在7月中再跌穿115元的大位向下時，佢曾經打電話來，話佢自己在160元入咗唔少貨，想溝淡，話呢啲價值股可唔可以愈跌愈買。我當時已經制止佢，話輸開啲股唔好溝淡，最好減一半貨仲好。但後來隻股反彈，8月2日曾經彈番上125元，佢當然唔信，恐怕佢唔止無減倉，仲加注溝咗貨，所以由「唔少」，變成「好多」。
我真係唔識點建議佢。第一，我唔係幾知道宏利盤數有無大問題。我雖然明白保險公司做生意的原理，明白宏利呢一期因為股票跌、利率跌，佢變成「雙失股票」，所以要蝕錢，但佢係金融股，經過去年美國金融海嘯一役，我變得好有戒心，唔敢斷言金融股會點會點。只能話表面講如股市升番上去，或者債券利息升番，宏利業績應會改善，但亦唔敢包佢有無新問題。
第二，市場走勢亦唔易估。我識一個好高的金融高人，問佢點睇美債，佢都係講不同的可能。而家美債債價好高、孳息好低，係一種可能，但另一種可能是某一天市場不再信天天加印的美債，債價急跌孳息上升，市場利率可以不受控地急升。若出現這種情況，宏利咪好掂囉，唔出現，長期低息，佢咪唔掂囉。
第三，跌得多反彈唔奇。而家宏利已跌到出哂血，再跌20元和升30元的機會一樣有，你早唔斬跌到今天才斬，又好似遲咗啲。
所以我對那個朋友的建議是，我雖然唔係好識睇，但如果我自己揸咗宏利，第一唔會加注溝淡，第二若唔等錢使，都跌到咁，唯有死守等吓下一期業績再睇睇，正所謂黃台之瓜，何堪再摘。唔知呢個算唔算一個建議？
Share this: 
