發新話題
打印

大孖沙挾倉

大孖沙挾倉

恒大(3333)股價及相關新聞 的挾倉好戲演極唔完,最新一章係大劉出場。恒大昨日借消息大升11.8%,收25.5元。

華置昨收市後公佈,增持恒大至7.66億股,持股量為5.83%。同時,華置大股東劉鑾雄太太陳凱韻(甘比)個人持有3,500萬股恒大股份,佔恒大股份0.27%,即是華置加甘比被視為持有恒大共8.01億股,佔6.1%股權,總值204.3億元。

甘比買入恒大平均價每股約21.43元,現價已升了19%,帳面賺1.4億。華置買入恒大成本價約104億元,賬面已賺91.4億元,華置的恒大每股持貨價約13.57元,帳面賺88%!

過去有班外資沽家沽空恒大,呢場戲似帝國反擊戰,恒大老闆許家印朋友多,個個都係大孖沙,如今大劉的華置已經揸咁多,會唔會有其他大孖沙也揸重貨? 呢班大孖沙財力強橫,可以有入無出,街貨大量下降,自然會將股價挾上去了。

借貨沽空者見到恒大10元時已經覺得太高,俾人挾到好痛,且戰且走,倉底係淡,但間中跟炒佢上升,食的雞糊補下身,但說到底還是要沽。自由街貨越來越小,咁又可以向乜人借貨去再沽呢? 而家借恒大貨利息可能要10厘樓上啦,借完沽完,又俾人吸哂,股價不跌反升,仲要俾10幾厘息,真係肉痛到呢。

大劉華置買恒大成本價13.57元,甘比買到21.43元樓上還在買,可見華置當然也有一些20元以上入的貨,但更可能是大批貨在4、5元入,有平貨在手,才出現13.57元的平均價,佢入貨價咁平,沽家唔夠佢玩啦。呢個係大戶遊戲,散戶除非做即日鮮,否則只能睇戲。

北韓昨日淩晨發射導彈,首次飛越日本領空,跨過日本,跌落日本以西海域,嚇到日本仔腳軟,日本股市急插,亦拖累亞洲股市。歐洲股市亦受累,平均跌超過1%,其中德國DAX指跌1.5%,法國CAC指數跌0.9%。

在美股開市前,標普500指數期貨下跌,拖累美股早段下滑,杜指朝早最多跌超過130點,之後逐步反彈回升,午後收復所有失地,以全日最高位收市,倒升57點,收報21865點;標普500指數升2點,收報2446點,納指收市升19點至6302點。

資金湧入日圖、黃金及國債等避險市場,日圓兌美元朝早高見108.45日圓;黃金12月期貨升0.3%至每安士1318.9美元,係2016年9月以來最高,黃金上穿1300大關後,有點破位向上格局,要看它能否在1300樓上企穩;資金搶入美國國債,美國10年期國債收益率最低跌至2.086厘,係去年11月以來最低,收市報2.129厘。

北韓的肥仔金雖然面對各國口誅筆伐,但闊佬賴理,導彈照樣試射,今次仲飛越日本島,其實,2009年北韓發射疑似導彈也曾飛越日本,不過,北韓指係載運通訊衛星的火箭。有人問起北韓金發射導彈,目標不是美國關島嗎?為什麼會飛過日本?有分析解釋,這次是試射,射到日本以西海域,可以執番導彈殘骸同彈頭,順手嚇吓日本以及話俾大家聽,北韓的破有射飛彈到關島之能力。

有老美分析指美國與北韓目前關係,係1994年以來最惡劣。特朗普此前警告北韓,繼續試射導彈,肥仔金將要面對「火與怒」,肥仔金睬你都儍。昨日有記者問特朗普現在有何對策?他回應;「所有的選擇已經放在枱面上」,顯得有點束手無策。

事實上前白宮首席策略師班農月初接受雜誌《美國展望》(the American Prospect)時表示,美國對北韓沒有軍事解決方案(no military solution)。投資者對於美朝會開戰的機會十分細,對股市的衝擊不致好大,股票恐懼指標VIX指數維持在11點,這個很低的水平。


Share this:

TOP

發新話題