火煋人

中國地產代理拍烏蠅 2008年08月27日（星期三） 8月26日，周二。恒生指數跌48.13，收21056.66；成交479.57億元。8月期指跌104點，收21086點；9月期指跌102點，收21015點。 中國聯通（762）跌7.1％，收13.12元，今年內或跌27％，瑞信及麥格里降公司評級；網通（906）跌5.2％，收19.9元，里昂降公司評級。 奧運後效應倒果為因 花旗推介中石化（386），估計今年每股獲利40.9仙，減少37.2％，P/E十六點七倍，目標價11.28元；國壽（2628）估計今年每股獲利87.8仙，減少36％，P/E二十七點八倍，目標價30元；中國鐵建（1186）估計今年每股獲利36.2仙，升91.3％，P/E二十七點三倍，目標價15.05元；中通服（552）估計今年每股獲利28.6仙，升33.3％，P/E十七點五倍，目標價7.4元；建行（939）估計今年每股獲利45.6仙，升50％，P/E十一點五倍，目標價6.6元；復星國際（656）估計今年每股獲利60.3仙，升80.7％，P/E六點三倍，目標價5.83元；合生（754）估計今年每股獲利1.36元，減少3.7％，P/E五倍，目標價18.84元；江蘇寧滬（177）估計今年每股獲利35仙，升8％，P/E十四點九倍，目標價7元；建滔化工（148）估計今年每股獲利4元，升24％，P/E八點二倍，目標價50.7元；建滔積層板（1888）估計今年每股獲利66仙，升8.9％，P/E六點七倍，目標價6.3元；金界控股（3918）估計今年每股獲利2.8美仙，升16％，P/E八點二倍，目標價2.7元；創科實業（669）估計今年每股獲利25仙，升232％，P/E二十八點五倍，目標價7.8元；兗州煤業（1171）估計今年每股獲利1.655元，升132.3％，P/E六點五倍，目標價17.1元。 滬深三百指數下跌2.88％，收2331.53，出現連續第四天下跌。海通證券跌7.8％，市場擔心成交額下降導致收入減少；中信證券跌4.3％、國金證券跌8.6％及宏源證券下挫5％；國航重挫7.9％、南方航空重挫7.2％及東方航空大跌8.8％，因人民幣貶值；寶鋼下挫5.8％、武鋼大挫7.5％及馬鋼下跌6.1％。滬深三百指數今年已大挫56％，跌幅係彭博報道全球八十九個主要股市中最大。 中國證監會宣布考慮發行可換股債券交換大小非流通股，去減輕超過十萬億元人民幣的大小非流通股流入市場壓力。在2010年前約有八十七萬億元人民幣大小非流通股變成全流通。家陣滬深A股市場全流通股總市值不過二十二萬九千億元人民幣，擔心市場無法消化新增那八十七萬億元人民幣市值股票；透過轉為可換股債券可令股票有秩序咁流入市場。 7月份美國Single-Family住房供應量係十點六個月，較6月份十一個月減少。如果連同Condos係十一點二個月（6月份係十一點一個月）；估計存量最高峰係明年首季。瑞信分析員認為Case-Shiller房屋價格指數必需再跌14％，美國樓價先跌到一般人可負擔的水平（雖然去年5月至今已跌了15.8％）。如供樓利率由6.32厘降至5.5厘，未來樓價跌幅約7％；反之，如樓按利率見7.5厘，未來樓價可再跌24％，如再跌24％不但次按出事，連銀行樓按都會出事。 46％美國經濟學家認為金融危機係美國經濟最大威脅（3月份係52％）、16％認為高油價（較3月份11％大升）及15％認為通脹率（3月份10％）。 英倫銀行將減息0.25厘，至4.75厘，因為今年第二季GDP增長率係零，估計今年GDP增長率只得1.4%，係1992年來最低。 日本Asahi Homes再跌24％，見44日圓，創五年新低，已好接近牛市起步價（2003年3月20日）。因持有85.25％Asahi Homes的大股東Sebon Corp申請破產，但唔會影響Asahi Homes財政。 去年瑞銀減少二千六百名員工，佔總員工人數12％。今年第二季止又再減少一千七百名員工，至一萬九千四百七十五人，好接近一萬九千人的目標。由於49％薪酬係以花紅方式發放，估計今年人工開支較去年慳番三分一及下半年完成重組。 北京奧運圓滿結束。大家在度講緊奧運後效應可以話係完全倒果為因；2001年點解北京成功申辦奧運？理由係1978年開放改革政策落實，國力日漸興盛；而唔係因為舉辦奧運而令中國國力上升。換言之，係中國國力支持一個成功奧運，而唔係奧運支持中國國力。因此既冇奧運前效應，亦應該冇奧運後效應。例如1984年起所有舉辦奧運的國家，在奧運後冇經濟衰退，理由係全球經濟向上。去年美國次按危機襲擊全球，北京雖有奧運護體，滬深三百指數亦在去年10月至今仲係回落。 三種因素決定股價 中國國務院發展研究中心宏觀經濟研究部研究員張立群分析，北京GDP佔全國唔足4%，把幾個協辦城市經濟總量加埋，份額仲係好少，對全國GDP影響好有限。 中國今年上半年GDP增速10.4%，較去年同期回落1.8個百分點，理由係世界經濟去年下半年開始下行及中國宏觀政策漸收效果，同奧運無關。 國家發改委宏觀經濟研究院研究員王小廣認為，世界經濟減速、外貿形勢嚴峻、內部政策調整及自然災害等，都係令經濟出現困難的原因。受到資源及環境約束，中國經濟無法長期高速擴張，過去三十年中國依賴廉價勞動力及資源大量投入令經濟迅速崛起，總體係成功的，但可唔可以長此落去？家陣出現減速唔一定係壞事，反而可睇成係一個機會，畀中國依靠自主創新及擴大內需，通過產業升級建立資本及技術密集型產業競爭力。只需GDP保持在9%增長，產業就出唔到大問題，經濟調整只係短期陣痛，下半年物價壓力將減少。 奧運之後，宏觀調整政策唔會出現重大改變，至於微調早已開始，例如紡織行業出口退稅提高、銀行貸款額增加及汽車消費稅調整；至於大調整依家冇必要，尤其係地產調整政策唔可以放鬆，因中國經濟唔可以再依賴房地產的炒賣，呢種方式對金融、消費、產業升級及資金有效配置都係一種妨害。 中國經濟進入下行係宏觀調控的結果，亦係政府成功阻止泡沫化經濟進一步擴大，刻意畀GDP增長率放緩。除了股市所受影響較大（來自大小非）外，其他方面影響唔算大。從另一角度睇反而係國家兩防政策（防通脹、防經濟過熱）的成功。 依家問題係點樣減慢中小企業下滑速度而唔影響就業。其次係防止能源及原材料價格再一次向上。去年10月不肯減持股票的投資者家陣又怪得邊個（牛市三期平均P/E二十二倍以上，滬深A股P/E炒到四十六倍仍唔沽貨，家陣可怨邊個?!）？小心熊市三期平均P/E十二倍或以下來臨。A股遲早由供求因素決定股價，進入評估企業業績期，只有完成上述過渡期，A股先至可以正常發展。 未來三大因素決定股價：一、企業業績最基本；二、貨幣供應周期，即銀根緊或寬鬆；三、短期升降先係人心趨向。到依家都未見人行放寬銀根或減息，理論上股市只有繼續尋底。 去年11月中天置業被爆出賬面蝕了1.7億元人民幣，向深圳樓市投下一個重磅炸彈。今年1月創輝中介地產公司執了廣州三百幾間店舖，二手樓成交慘淡局面由深圳開始，然後擴散到廣東省大城市；跟住係北京及上海等城市內一D中小型中介行相繼執笠。 半年內20單生意都冇 深圳房地產研究中心發布〈關於當前中國樓市形勢分析報告〉。今年1至7月該市開發投資較去年同期減少3.63％；商品房空置面積升29.08％；新建商品房銷售中住宅面積賣了一百七十九萬九千八百方米，較去年同期減少53.17％；該市商品住宅平均售價每平方米13276.58元人民幣，較去年同期升5.75％。今年6及7月房價每方米11159元人民幣及12387元人民幣；二手房交易規模面積二百萬一千二百方米，下降69％；住房不良貸款17.35億元人民幣，該市戶籍人口住房自有率75.6％。 中原地產住宅部副總經理張建也認為，家陣廣州市部分中介公司有唔少地舖7月份出現零成交，中原地產已算唔錯，上半年平均一個月成交仲有十幾單，但7月份就好吃力，因成交量仲在度跌緊。 滿堂紅廣州在今年上半年成交量較去年同期跌了35％左右，集團已改變策略，由專攻二手樓改為同開發商合作，向客戶提供一手樓房源（類似1997至2003年本港地產代理商做法）。 北京多間大型房產中介機構7月份二手樓成交較去年同期下跌近六成，跌幅好大。以中大恒基為例，去年五百幾間分店，依家已減至三百二十二間，今年上半年有一半以上的二手樓交易由中大恒基等三大中介機構完成，即係話其他中介機構每間上半年做唔到二十單的生意。 上海中介機構近半執笠，其中澳洲資本的Ray White Real Estate Co（澳洲最大中介公司）在去年5月進入上海，計劃最少開一百間品牌店。家陣已減少到只有四至五間作為日後「後路」之用。根據官方數字，兩年前上海二手房中介門店約一萬六千間，依家已減少至七千間，跌幅達一半以上。 內地樓市後市點睇，木宰羊，但內地中介公司已步入寒冬。 中國工業及信息化部產業政策司副司長侯世國在8月26日表示，中國經濟宏觀調控已改為「有保有壓」；引導資金向「三農」、結構調整、節能減排、自主創新及社會事業等五個重點領域傾斜，同時壓制「兩高」行業生產能力盲目擴張、促進市場經濟機制發展、糾正市場機制缺陷和不足，促進產業結構優化，形成以農業為基礎，高科技術產業為先導，基礎產業和製造業為支持，服務業全面發展格局；產業政策唔係替代市場而係規範市場經濟秩序，糾正和彌補市場的缺陷。 幾時有得加電費？ 改革開放以來中國經濟雖然高增長，但產業結構唔合理令資源消耗多、環境污染重及素質唔高的產業不斷取得新進展，依家國家政策就係糾正上述缺陷。家陣停產關閉企業中，好大部分係生產水平低下、資源消耗高、排放污染重及職工保障條件唔完善的企業，由於佢地難以承受高標準社會公益規範而被市場淘汰。 有一定生產水平及較好發展基礎的中小企業，由於原材料價格上升及市場放緩影響只屬暫時，在政府加大對中小企業財稅扶持、信貸金融支持及減輕企業負擔政策落實後，可以好快渡過難關。 電力企業限產及其他企業限電，加上今夏高溫，長三角地區又再次出現電荒。呢次唔係裝機容量不足，而係煤電價格唔聯動，形成了電廠多勞少得。電力生產愈多，虧損反而愈大，因此索性限產。2003及04年每噸煤價300至400元人民幣，加埋政府補貼一度電獲利15分左右，家陣煤價每噸超過1100元人民幣，每度電蝕17分甚至更多，點解要增產？ 2005年發電設備累計平均利用小時為五千四百一十一小時，較2004年減少四十四小時；2006年又減少二百零三小時；去年再減少一百八十四小時。主要原因係「市場煤、計劃電」。生產電愈多、虧蝕愈大。長三角地區電廠亦「按章工作」，部分更出現資金周轉困難、存煤不足及煤質差，影響機組發電能力。幾時再批准加電費？ [ 本帖最後由 羊仔 於 2008-8-27 09:39 編輯 ]

Share this:

火煋人

內地房產Game Over 2008年8月28日 (星期四) 8月27日，周三。恆生指數升408.06，收21464.72；成交609.8億元。8月期指升325點，收21411點；9月期指升350點，收21363點，期指倒掛現象又再出現。江銅（358）升9.5%，因上半年獲利增加32%；中移動（941）升3.5%，因半年獲利上升44.7%；中國遠洋（1919）升8.2%，因半年純利升一倍；中鋁（2600）升6.3%，因澳洲力拓公司與中鋁母公司組成公司；大昌行（1828）升8.4%，因半年獲利升38%；中化化肥（297）升6.4%，因半年獲利升一倍。 花旗推介江銅，估計今年每股獲利1.708元，升21.7%，P/E五點九倍，目標價24.1元。 人行夥銀監落指令 今年有唔少人估信貸壓碎（credit crunch）的結束點，甚至反彈點，而佢地忘記了淡市莫估底的教訓，因此愈買愈低、愈低愈買，結果損失慘重。有讀者打電話來問反彈同當頭起有咩分別？一、當頭起升幅最少20%；二、一浪高於一浪（即在次低點才入市）；三、50天移動平均線重返250天線之上；四、當頭起在熊三出現後先出現（熊三P/E在八至十二倍之間）。 利用上述幾點分析依家的形勢仍係熊二（因恆指P/E在十二倍之上），理論上只有反彈而冇上升。客觀形勢係美國房地產狀況在度轉壞緊。去年係防危機年，今年係小心謹慎年。 今年5月開始的熊市二期，家陣仲睇唔到盡頭，剔除港股直通車影響，我地只係返番去消息公布前的20000點水平；今年8月前景展望肯定較去年8月差，驚恆指20000點遲早失守。 我老曹唔信美國樓價復甦前美股可出現牛市，港股有40%受美股影響，即係呢方面唔使諗，另外40%係受中國因素影響，中國GDP正進入增長放緩期；剩番20%先係本地因素。 如9月恆指再唔大升，恐怕第四季恆指20000點將失守。 新加坡淡馬錫基金宣布進一步增持美林到13%至14%（去年12月24日共吸納9.4%美林，其後美林股價跌55%，最近宣布再增持）。淡馬錫同時係渣打（2888）及新加坡星展銀行最大股東，亦係克萊銀行、印度ICICI銀行，以及印尼、南韓和巴基斯坦等地區銀行小股東，淡馬錫投資組合中40%係銀行股。 繼國務院指示「救經濟唔救股市」後，央行同銀監會聯合下發〈關於金融促進節約集約用地通知〉，要求各金融機構嚴格商業性房地產信貸管理。各大商業銀行已接此通知並對房產信貸作緊急調整，禁止向房地產開發企業發放專門用於繳交土地出讓價款的貸款。銀行唔可以籌借資金買地；禁止銀行參與房企購地而增加銀行連帶風險；嚴格限制農村集體建設用地項目貸款管理；對利用農村集體土地開發商業性房地產，唔可以發放任何形式貸款；對購買農村集體土地上建設住房城鎮居民，唔可以發放住房貸款。 招商銀行研究發展中心研究董事王瓊表示：「該通知說明政府要求銀行收縮房貸資金，對房地產市場來講，肯定係壞消息。政府政策係保證銀行免受地產下跌影響，而犧牲房地產！」 中國人唔好自大 呢次北京奧運令全球中國人都感到自豪！一吐自鴉片戰爭以來中國人受列強侵略時的忍氣吞聲。呢次奧運盛況未必絕後但肯定係空前；作為中國人自豪無妨，但千祈唔好自大，過去中國人被人地睇唔起，變成家陣中國人睇唔起人地！ 末日博士麥嘉華近期分析能力唔錯；去年10月股市回落後，佢估計原材料價格今年下半年起回落，理由係全球流動性收緊，依家已證明佢的分析係對。本周一佢再估計唔少商品價格跌幅約50％，部分跌幅家陣已超過50％，但商品牛市未死，經大幅下調後牛市持續。近日調整只係1980至99年或2001年商品熊市結束後出現七年牛市的中期性調整，估計明年起再上升。 Mohamed El-Erian之前協助管理哈佛大學350億美元捐贈基金，去年上升23％（賺了57億美元）。今年佢專心寫When Markets Collide:Investment Strategies for the Age of Global Economic Change，呢本書主張在新興市場股票投資最多唔超過總資本10％、其他OECD國家15％、美股15％（新興市場股票必須在美國掛牌，代表該公司會計制度被一般性接納。P/E更要較過去五年P/E G為低，以免過度高估）。佢今年對新興市場股市睇得幾淡。 反而對地產及商品睇得幾好，佢認為最少應各佔總投資25％。 滬深三百指數跌0.27％，收2325.29。在下跌過程中能量有所放大，令人擔心2284點低位又再失守，令跌幅擴大；小心黎明前的黑暗先係最黑暗。 標普�Case-Shiller指數代表美國二十個大城市房價今年第二季下跌15.4％。另一份OFHEO（Office Of Federal Housing Enterprise Oversight）報告顯示樓價過去一年只跌5％，第二季只較第一季下跌1.4％。 非地產公司鳴金收兵 美元因德國商業信心指數回落而上升。高盛報告認為，政府注資可挽救房利美及房貸美令美匯指數見77.5，如再升少少（例如78點），便可確認美元轉弱為強。7月15日至家陣美元兌歐羅升8％、兌英鎊升9％及兌日圓升5％。自2005年起人民幣兌美元升值，去年7月16日見頂；短短一個月人民幣匯率回落近300個基點，見6.84元兌1美元。今年6月中國外匯儲備增加了119億美元，當月貿易順差213.5億美元及直接投資資金96.1億美元，即6月份出現190.6億美元資金淨流出，係中國資本流動首次為負數，為新近出爐的熱錢係未正選擇流出中國？提供了有力的證據。人行副行長蘇寧在接受最新一期《中國金融》雜誌專訪時亦明確指出，外匯資金大量流入，導致外匯存款大幅上升，不但加劇流動性過剩矛盾，亦加大通貨膨脹及資產價格上升壓力，唔排除未來可能出現集中流出而衝擊經濟的風險。從蘇寧的講話，市場普遍理解為決策層已高度關注熱錢開始流出所帶來的風險。 由8月8日奧運開幕起計，內地AB股雙雙直線下挫；出現連續五天淨賣出八億股A股，B股跌幅更達16.6％。業內人士認為，8月外資正加速退出中國股市。過去熱錢大規模流入，隨住內地股市及樓市逐步冷卻，熱錢正逐步撤離呢兩大市場，轉而存入銀行賬戶，賺取升值收益。一旦人民幣升幅放緩甚至停止升值，呢D所謂熱錢就好快咁離開中國。 人民幣持續兩年多以來升值，加上滬深股市兩年牛市，內地房價走高，2005及06年流入熱錢已有相當豐厚的賬面利潤，面對趨勢判斷出現分歧的今年，選擇離開中國係一個明智選擇。一位外資銀行界人士亦表示，外資在中國的投資利潤早已超過了預期，係時候撤退矣。 從外匯賬上今年6月起已出現負增長，代表國際熱錢自今年6月開始由中國境內撤退！7月中旬人民幣兌美元更進入下跌通道，進一步證明外資離開中國。8月8日起連續多天AB股回落，代表8月份熱錢撤離速度在度加快。不過，亦有利好一面，就係有利出口，幫助中小出口企業擺脫困境及令中國通脹率加快回落。 內地樓價一再下跌，成交量日益萎縮，若干份由地產行業協會組織撰寫的建議書亦被送達國務院。一位國家發改委官員最近向媒體表示，中央調子已經定下來，要保持經濟穩定增長，同時繼續採取緊縮政策。因此單獨對房地產領域鬆綁，至少依家唔符合中央整體思路。 過去上市公司熱衷進軍房地產，隨著房地產市場景氣下滑，一D公司開始將資金撤離房地產，例如五洲明珠宣布轉讓2006年設立的濰坊五洲明珠房地產有限公司股權；6月份中遠股份公司亦宣布將持有三家房地產公司的51％股權轉讓。天相投顧地產行業分析師周炯認為，今年製造業資本退出地產現象愈來愈多。過去有三百多家上市製造業公司涉足房地產，今年來唔少在度撤資。五洲明珠表示，如果公司地產項目繼續開發下去，至少仲要1億元資金，家陣將其轉讓不但日後唔使繼續投入，仲可以取番一D資金去投資主業。 據了解，大多數涉足房地產的製造業企業係中小規模，難與實力規模相對較大的上市房企相比，形成融資難度大。唔少資金來回拆借，一旦房地產業務出了問題，上市公司成個資金鏈就發生斷裂。加上地產業務下滑亦令公司業績出現大滑坡影響了股價，例如紅豆股份本業係紡織服務，去年上半年來自房地產業務收入1.87億元，佔總收入27％；今年上半年來自房地產業務收入跌到5549.83萬元，令公司業績好難睇。若房地產市場景氣繼續下滑，將有更多非房地產上市公司撤軍。中國監管機構周一宣布更改國家保險條例，准許保險公司投資房地產。 明年商品價再升 鎳價今年跌了30％，去年年中至依家跌了60％已令鎳礦無錢賺。世界經濟進入增長放緩期。受美國次按危機影響，歐洲、英國同日本齊齊出現GDP增長率放緩或負增長，估計可令油價短期回落。雖然係咁，由2001年起廉價石油時代已結束，2004年廉價資金時代亦結束；由1971年美元同黃金脫勾開始，因貨幣供應上升及信貸大幅增長，令全球資產價格大升期宣布結束。呢個泡沫長達三十五年，帶來Anglo-Saxon地區房地產狂潮。呢個狂潮自去年8月次按危機出現而正式結束，美國、歐洲及英國家庭開始勒緊褲頭過日子及減債；好似1990年後日本或1997年第三季起的香港人。全球進入一段低GDP增長期及OECD國家資產減值期。 以金價去劃道指，可見道指由1980年起步到2000年見頂，即上升四十倍後回落！商品股超級牛市在2000年開始，ASX200Resources Index 在今年5月見頂，至今跌幅達25％，情況有D似2006年5至9月跌幅達24％或去年7及8月跌幅達19％。回落相信係受次按危機影響，令全球GDP增長率放緩（2006年5至9月那次係受制於美元利率見5.25厘），尤其係中國GDP增長率由去年高峰期11％逐步跌到只得8％，對商品價格產生一定壓抑作用。估計明年首季開始，商品價格又再止跌回升；反之，美股回落期相信只完成一半，估計在明年年中前改變唔到方向。美股熊市在2000年已開始，透過減息在2003年再回升；去年10月以指數計見新高，如扣除美元購買力，高位仲唔及2000年；情況有D似1966至82年，美股牛市由1982至2000年長達十八年；調整九至十二年係好正常的事。從信貸周期睇，儲蓄率要回升到佔收入8％，美股先見底（今年第二季儲蓄率佔收入2.6％）。 2006年美國證券公司透過銀行發行大量浮息票據（floating-rate notes）作為購買股票之用。摩通分析員Alex Roever估計，明年年底前到期票據共7870億美元，較過去十六個月到期者多出43％。只係9月到期已達950億美元，代表證券公司要大量拋售證券還錢。 [ 本帖最後由 羊仔 於 2008-8-28 09:51 編輯 ]

Share this:

火煋人

藝人點解難剩錢？ 2008年08月29日（星期五） 8月28日，周四。恆生指數跌492.43，收20972.29；成交667.2億元。8月期指跌280點，收21131點，由於結算日在即所以唔可以作準；9月期指跌423點，收20940點，仍較現貨指數略低。 中移動（941）跌6.3％，因摩通降該公司評級；聯通（762）跌7.3％；思捷環球（330）跌18％，係近十年內最大跌幅，最少三間證券行同時降該 公司評級；中石油（857）因煉油事業虧損，股價跌3.3％；內地銀監會再次收緊房貸，令北辰實業（588）跌4.57％，報1.67元；上海復地 （2337）跌7.18％，收1.55元；華潤置地（1109）跌3.2％，收8.9元。 日本地產都唔掂 《上海證券報》報道，土地係房地產源頭，2006及07年上海公開招拍掛批出的大批土地，唔少至今仲未投入市場。部分理由係開發商無法借到資金去開發土 地，只有將D土地閒置。呢次中國人民銀行及銀監會共同發布的通知，令商業銀行唔可以發放貸款，對好多中小型開發商來講係「不可承受的重」。原來被視為香餑 餑的土地，忽然間變成燙手山芋，最後結果可能係賤價拋售。 英國8月份平均樓價較去年同期跌10.5％，係近二十年內最大跌幅（較7月份跌1.9％），亦係1990年以來首次出現雙位數字下跌。在倫敦的德銀分析員 George Buckley估計全年跌幅可達15％，再加埋英鎊由去年11月兌2.1162美元，回落到家陣1.8377美元，跌幅達7％，即係除了樓價下跌外仲要加 埋匯率損失，所以都幾傷。法國第三大銀行Credit Agricole 今年第二季純利較去年同期跌94％，今年第一季次按撥備達55億歐羅，5月份主管換人，第二季進一步撥備；今年內股價已下跌34％。7月15日起美元匯價 回升的理由唔係美國情況好轉，而係歐洲同英國情況惡化，令投資者覺得持美金反而安全D。 滬深三百指數今天上升0.45％，收2335.86。美邦服飾首日上市仍升36.13％，見到在內地申請發行新股仲係穩賺唔蝕的行為。 Daiwa House Industry Co.（日本第二大地產建築商）主席Takeo Higuchi估計，未來有更多日本地產公司破產，Topix Property Index過去十二個月已跌了38％，係三十三個行業中表現最差那行，同期Topix只回落17％。 菲律賓第二季GDP只上升4.6％，今天宣布加息0.25厘，至6厘，因7月份通脹率達12.2％。 技術表現睇7月15日至家陣係「熊徘徊」區，而唔係「牛收集」期。 去年10月起因抵押品跌價而引發的次按危機，令現金日漸變得稀少，Dow Theory Letter作者李察羅素（我老曹的道氏理論，亦係由佢的每月通訊中學習）警告，世界上大部分地區正步入通縮期，而唔係通脹期。巴西批發物價指數7月份出 現負0.44％（6月仍升2.28％）。在倫敦Lombard Street Research的Gabriel Stein指出，美國7月份MZM減少500億美元，係1959年以來最大跌幅（雖然一個月唔代表趨勢，但三個月平均升幅只得2.1％、六個月6.3％及 十二個月11.5％），理由係房價下跌緊。 颶風古斯塔夫好似吹向墨西哥灣，油公司已開始疏散油井上的工作人員，上述因素令油價止跌回升，估計影響只係暫時，颶風過後相信油價又再回落。 現金又成皇帝 玉米自6月27日見每蒲式耳7.9925美元後，至今跌了26％；大豆7月3日見16.3675美元後，至今跌了18％；小麥由3月12日13.4925美元後，至今跌幅37％，再次證明農產品受天氣影響大過一切。 摩通環球天然資源基金的Ian Henderson同意，長遠來講商品價格仲可以睇好，但去年8月次按危機後，礦業股平均跌幅20％，令呢類公司好難集資；加上鎳、鋅及白金等價格已較最 高峰回落50％以上，令唔少投資者出現財政困難，被迫套現。甚至環球天然資源基金亦由今年2月至今跌了30％。金屬價格可唔可以在家陣的水平穩定落來，唔 再進一步下跌？就算係咁，下半年礦業股利潤已大減，唔少投資者等唔到下一個上升浪矣。 今年11月美國大選，大選後如通脹率仲未大幅回落，12月份美元加息機會好大。如12月唔加息，明年第一季亦需加息，因為長遠而言利率必需維持在CPI升 幅2厘或以上，除非通脹率跌到零，先可以阻止今年12月或明年第一季聯儲局加息。上述加息行動可扼殺任何經濟開始復甦時的萌芽，情況好似九十年代的日本銀 行。 隨住更多銀行被接管，美國FDIC手上那452億美元基金已唔夠應付，需向財政部借錢去支持接管銀行；上述又係另一令利率上升的因素。 過去七年對沖基金大量拋空美元去買股票、物業、商品及藝術品，今年7月引發美元大平倉至家陣已回升7％。Cash becomes King again（現金由7月份起，又再次成為皇帝），美元情況係咁，歐羅又點？代表十五個國家及三億五千萬人口的歐羅區，踏入今年亦減少發債，令歐羅供應上升 速度下降；至於世界第五大經濟體系英國N，今年6月止仲在度高速上升，但恐怕亦快見頂矣。因俄羅斯的有錢人正離開倫敦，例如Viktor Vekselberg、Mikhail Fridman及Leonard Blavatnik等，佢地每人持住400億美元以上。根據《福布斯》資料，1998至2004年由俄羅斯流向倫敦房地產市場的資金超過1000億美元， 超過三十萬俄羅斯人在倫敦置業，係倫敦樓價暴升部分理由，至今超過一百間俄羅斯公司的倫敦交易所上市，佢地選擇倫敦理由係因為接近莫斯科及國際化，今年開 始俄羅斯人從倫敦搬走。 A股散戶血流成河 今年第二季全球售出三億零四百七十萬部手提電話，較去年同期升12％（主要來自新興市場），相較去年第二季升幅21％，增長率已大幅放緩。估計今年全年升 幅11％，至十二億八千萬部（去年升幅16％），升幅主要來自印度、中東及非洲，明年進入單位數升幅，流動電訊的高潮漸過去。 隨住OECD國家的GDP增長率放緩甚至負增長，對中國產品需求自然放緩，令中國出口業進入低增長期。今年1至7月中國外貿盈餘減少9.6％，上述因素引 發去年10月至今滬深三百指數大幅回落，而且跌幅相當大。不過，中國經濟唔係英國、歐洲及美國，上述國家係成熟型經濟，GDP增長率好容易消失；反之，中 國仍係新興國家，GDP增長只會下降到8％至9％之間，而唔係負增長，因政府以驚人速度投資基建項目。上述資金來自外匯儲備，所以唔使擔心因出口增長放 緩，最終中國股市必出現V形反彈，問題係呢次急降幾時完成？參考1973�74年恆指在二十二個月內回落91.5％；反之，內地人行一早已將利率上調、收 緊存款保證金率及畀人民幣升值等，減低滬深A股升幅。令去年10月起下調幅度一定唔及1973�74年的恆指，至於時間要幾耐，往往事後先知，至今為止下 調日子只得十個月，理論上仲未夠。1974年石油危機打擊肯定較呢次大（因為係第一次），加上恆生指數由1973年3月接近一百倍P/E回落到1974年 12月六倍P/E。反觀去年10月滬深A股P/E不足五十倍便回落，至於到底要跌至幾多倍P/E先見底？亦要事後才知。不過，可以肯定滬深A股已漸進入冬 季，能夠捱過冬季者，便可迎接春天的來臨。到時春回大地，一切又改觀。 去年10月至今跌幅十大A股，依次係雲南銅業（88.3％）、澳洋科技（87.1％）、石油濟柴（87.1％）、中色股份（86.9％）、ST金泰 （86.4％）、株治集團（86.2％）、西部礦業（86.1％）、ST中鎢（85.9％）、鋅業股份（85.56％）、ST東盛（85.53％）。A股 散戶在過去十個月內，已血流成河，幾時先止血（有人認為流血不止、麻煩開始，內地股市係未進入麻煩開始期）？ 力不到不為財 中國平安保險（2318）總裁馬明哲年薪超過6000萬元，反而中國人壽（2628）總裁楊超只有199萬元；研究兩間公司最近業績公布，冇證據證明高層人士高薪，可令公司業績表現出色。 大部分藝人缺點係「賺錢容易、剩錢難」。唔少成名藝人過身之時，家財都唔豐厚，理由係不善理財。例如屋企有幾百件服飾、幾十個手袋，隨住季節與流行要汰舊 換新，未夠一年全部換晒。其次係自己冇時間，卻學人地做生意，忘記了力不到不為財的道理。除非係大企業一切上晒軌道，一般小生意要做老闆者，分分鐘都要睇 實。結果係蝕本者多賺錢者少；如再加上在唔適當的時刻買樓或投資股票，便又多一位賺錢容易剩錢難的藝人。1987年10月股災後，明星麥嘉曾搵我老曹問： 「點解佢在期指市場蝕得咁大？」其實道理好簡單，因為做明星唔可以二十四小時都睇住個市，往往在最唔適當入市時入市，咁就真係dido。何況二十年後今 天，金融市場已變成鬥獸場，有錢冇時間的藝人請唔好入市。仲有一點要記住，係曉教書者唔代表曉經營學校、曉著衫唔代表識做時裝生意、曉食野唔代表可以做飲 食業、曉寫文章者唔代表可以開報館，以及曉做戲者唔代表可以投資拍戲。 作為投資者應同政治保持一定距離，除非政治對經濟造成重大影響，我老曹先會評論，例如1982年中國收番香港主權、1984年中英聯合聲明、1989年六 四事件、1997年7月1日八萬五及2003年7月的二十三條。作為投資者，最驚聽到政治人物用應該呢個字，即英文Should！除了上帝十誡外，其他都 唔係應該，以免犯上好心做壞事。例如為全民提供住宅、提供大學教育及提供優質醫療服務等，往往造成市民對政府有過高的期望，最後卻係極大的失望。 過去指出大學教授最唔適宜做聯儲局主席。呢次令人擔心的事係牧師身份競選美國總統；加上本周三奧巴馬宣布拜登做佢助手，上述決定令希拉莉感到好冇癮，有人 甚至認為民主黨可能因此分裂。拜登來自特拉華州，1973年起已做參議員，依家主管美國外交關係委員會；佢亦曾支持殊仔出兵伊拉克。由一個今年六十五歲議 員去做一個四十七歲未來總統的副手，上述配搭係未有D搞笑？由過去表現睇，拜登幾自滿，經常認為自己高人一等，例如吹噓自己係Syracuse College of Law的高才生，事實佢只係全班八十五人中考第七十六，1988年曾競選總統失敗，今年欲東山復出只因選票唔足而在初選中退出。佢主張把伊拉克一分為三 （類似過去將韓國及越南一分為二。由佢地自己打自己，唔使威脅他人）。1979年亦曾支持卡達的伊朗政策，令伊朗皇朝倒台由家陣的政權取代，伊朗成為美國 的敵人。拜登對奧巴馬的吸引力係支持打工仔階級，呢點同奧巴馬理念相同。將來如由佢主管美國外交，相信美國將重返卡達時代（被人當佢冇到）。假設未來美國 總統係奧巴馬同拜登雙結合，睇怕美國唔單止係經濟上走下坡，在外交方面亦走姑息路線，正好配合2000年起美國開始走下坡的大趨勢，或者呢個係國運，實在 無可奈何。

Share this:

火煋人

美國經濟停滯 2008年08月30日（星期六） 8月29日，周五。恆生指數升289.6，收21261.89；成交634.4億元。9月期指升320點，收21260點。中國銀行（3988）升2.1％，收3.39元，因半年盈利升43％，見422億元人民幣；中銀香港（2388）跌3.3％，見17.5元；新世界（017）升5.5％，見12元；信置（083）升6％，見13.82元；恆地（012）升2.3％，見47.5元；裕元（551）升4.1％，見21.75元；中海油田（2883）升5.9％，見10.5元；中電（002）跌3.6％，見63.5元；數碼通（315）跌2.9％，見7.28元，因里昂降該公司評級。 恆指反彈力恐好弱 滬深三百指數升2.39％，收2391.64。太鋼不銹升4.7％，報7.8元；晨鳴紙業升3.3％，報9.05元，因上半年利潤升一倍；寶鋼升4％，收6.52元。 交銀施羅德基金管理公司基金經紀認為，家陣大舉買入A股可能仲係早，經過今年下挫後，日後的下跌空間已有限。 熊市二期有好多隻腳，今年3月18日恆指20572點應係熊市二期第一隻腳，如無意外今年8月21日恆指20350點係熊市二期中第二隻腳。一旦腳出現，便有反彈，例如3月18日起到5月5日26387點係熊市二期中最大一次反彈。至於8月21日起的反彈，擔心力量好弱。 花旗推介中信泰富（267），估計今年每股獲利2.65元，升16.9％，P/E十點二倍，目標價40元；SOHO中國（410）估計今年每股獲利26.3仙，減少45.3％，P/E十三點二倍，目標價5.49元；中國鐵建（1186）估計今年每股獲利36.9仙，升95％，P/E二十六點三倍，目標價14.2元；達芙妮（210）估計今年每股獲利31仙，升31.2％，P/E十二點四倍，目標價6.3元；新濠國際（200）估計明年恢復獲利每股73仙，P/E六點二倍，目標價6元；民安控股（1389）估計今年每股獲利3仙，減少89.5％，P/E三十七點九倍，目標價2.27元；中化化肥（297）估計今年每股獲利35仙，升62.9％，P/E十一點一倍，目標價7.6元。 澳洲Centro 2007�08年6月蝕了21億澳元，為投資美國商場減值；Allco Finance蝕了16億澳元及裁減半數員工。兩者今年股價跌幅超過90％及宣布換CEO。Centro在美國、澳洲及紐西蘭擁有超過七百五十個商場，家陣Centro市值只得1.65億澳元（去年5月係85億澳元），呢間公司在美國有六百六十五個商場，一年前估值係139億美元，今年得128億美元，收租股如借貸比率太高亦好危險。澳元8月出現二十二年內最大跌幅，見86.42美仙，較7月16日回落12％，係1986年7月以來最大跌幅。 南韓收支赤字7月達24.5億美元，見六個月內新高，南韓圜收1087兌1美元，央行估計今年全年收支赤字達90億美元。 投資對象難搵 英國樓價連跌十個月，8月下跌1.9％或較去年同期下跌10.5％，如以去年10月最高價計，下跌11.5％。九十年代初期，英國樓價曾下跌20％（實際跌幅40％）；估計在2010年前英國樓價下跌35％（實際跌幅41％，因近期通脹率唔高）。英國豪宅較去年8月回落1.6％，係連續第四個月下跌，呢次豪宅（市值1000萬英鎊或以上）下跌係1990年以來首次，主因係三十多萬從事金融服務業的高薪人士今年不但花紅收入大減，同時佢地的職位亦可能不保。 周二美國FDIC公布，6月被接管的Indy Mac可能需注資89億美元，而唔係事前估計的40億元。依家美國有問題的銀行共一百一十七間，超過九十天未還貸款增加了267億美元，較第一季升19.6％，係1993年以來首次有問題貸款佔總貸款2.04％。FDIC手上那452億美元資金已唔足夠應付未來的需要。 過去二十四小時美國種植區落了一吋高的雨，令玉米價格由6月27日7.9925美元下跌26％；大豆由6月3日16.3675美元下跌19％。估計今年全球產量減少6％（較事前估計略多）。 衰退係繁榮後的Counterbalance，即經濟愈繁榮接住而來的衰退愈長愈深；美國呢次信貸擴張期由1982年開始，到去年先結束，長達二十五年，令呢次衰退期更長更深。金融係經濟脊骨，九十年代起的日本衰退點解會咁深及長？就係因為傷了脊骨。呢次美國情況就類似係咁，估計唔係滯脹而係停滯；去年9月至今年4月聯儲局已好重手，利用低利率及低美元去阻止經濟下滑，依家聯儲局手上已冇晒殺著。滯脹係一方面停滯不前，另一方面係通脹；即係仲有投資項目。 如果只係停滯不前，就好難搵投資對象，恐怕由今年7月起，美國經濟進入停滯不前期而唔係滯脹。 股市唔會年年有錢賺 去年應防危機，今年要小心謹慎。活著就係硬道理。1974年死唔去先可以活著享受1975年開始的繁榮；1982年死唔去先可以享受1984年開始的復甦；2003年4月前死唔去先可以……。作為投資者，今年活著就係硬道理，只有大難不死，才有後福。 後生一代可能唔知Bernie Cornfeld係邊個？佢由一位紐約市布魯克林區送貨員做起，其後成立IOS基金（Investors Overseas Services），並以保證回報去sell基金，然後將資金投資在歐洲股票。初期都好成功（因股價升幅大過佢的保證回報）。隨住1967年起股市回落，1968年開始出問題，1970年另一壞蛋Robert Vesco出手挽救IOS，並將IOS所持的歐洲股份出售，集資5億美元後購入佢自己的投資。1971年IOS宣布破產，Cornfeld因此在瑞士入獄，反而Robert Vesco卻返番美國，持住2億美元資金過住多姿多彩的生活，到去年先過身。 Cornfeld自己唔係存心呃D投資者，只係佢唔知股市冇可能只升唔跌而向IOS基金持有人作保證。佢以為一定可以在股市中賺番合理回報，點知熊市來到，能夠唔蝕錢已好本事；由於無法支持IOS基金持有人的股息而請了Robert Vesco入局，但後者卻存心呃IOS基金持有人，將自己的失敗投資高價注入IOS後再拎走現金，但在法律上佢反而冇犯罪。IOS事件話畀我地知，在股市中唔可能年年賺錢；同時小心D高層偷龍轉鳳，將唔好的投資高價注入，搞到股東當災而當事人逍遙法外。 Ibbotson Associates研究得出，每二十年標普五百指數便有一次或以上下跌兩年及跌幅達35％或以上。例如1973�74年跌幅係37.25％；2000至02年更達41.65％，去年10月開始的回落係未另一次下跌兩年及跌幅35％或以上的日子（以港股計已達上述幅度）？ 香港窮人點算窮？ 印度今年第二季GDP升幅只得7.9%（第一季8.8%），但通脹率卻達12.4%，6月至家陣央行已加了息三次，印度股市今年已跌了三分一，十年期債券息率8.66%，世界銀行估計今年印度GDP可升7%。 去年4月世界銀行估計全球極之貧窮人口高達九億八千六百萬，今年8月26日公布數字已經接近十四億，主要係過去一年糧食價及燃料費上升，令更多人跌落貧窮線。其中二億七百七十萬係中國人、四億五千五百萬係印度人、三億八千四百萬係非洲人及一億三千萬係東南亞及太平洋地區的人，其餘的就分布世界各地。中國同印度仲有大量極之貧窮人口每天生活開支少過十港元，佔總人口15%；印度更佔40%。其他好似印尼、柬甫寨、越南及孟加拉等都有大量貧窮人口。 同佢地比，香港窮人唔算窮。 [ 本帖最後由 羊仔 於 2008-8-30 09:31 編輯 ]

Share this:

火煋人

奧巴馬是禍是福？ 2008年09月01日（星期一） 8月31日，周日。受古斯塔夫颶風可能升級為五級颶風影響，美國新奧爾良約一百萬居民被強制疏散，本周一颶風將在得克薩斯州東北及密西西比州西部之間登陸。古斯塔夫可能係美國史上威力最大的颶風，對墨西哥灣石油設施造成幾大破壞？事前無法預計。 中國四川南部攀枝花及涼山交界地震達六點一級，災民四十四萬、房屋倒塌十三萬間，其中學校佔六百五十六間，情況亦幾令人惆悵。 保本愈來愈難 上周房利美及房貸美因成功賣出40億美元短期債券，令佢地的股價急升。家陣兩房已換了管理層，如政府肯支持佢地的優先股（有15厘息）自然好吸引，結果引發上周美股急升，可惜周五已晚節不保。 1987至97年係貪心的十年。只要你貪心便可發達；例如本港樓價由每呎2000元升到12000元，升幅500％；恆指由1987年12月1894點升到1997年8月16820點，升幅788％；真係幾貪都得，最終令港人貪得無厭。 1997至2007年可以話係冇回報的十年。恆生指數要到2006年8月先升穿1997年8月的高位（16820點）。如將去年8月至10月呢三個月升幅 剔除，即由恆指低於20000點升上31958點，然後又跌到上周五21261點呢段日子唔計，近十年內恆指升幅其實好有限（而且升幅集中在國企股身 上）。本港一般樓價由1997年每呎12000元跌至2003年3600元，然後升到近日的7200元，除極少數（例如20％人口）財富在過去十年仍上升 外，大多數人（佔香港人口80％）手上財富反而唔及1997年第三季。 未來十年又點？恐怕由去年10月起，本港已進入持盈保泰期。除拋空者或投資黃金及石油期貨者外，連股聖畢非德的投資由去年10月至今亦減值20％。如閣下 由去年10月至今唔使蝕本，你真係威過股聖。我老曹認為去年10月開始本港已進入小心謹慎期。保本變成愈來愈困難的事，更加唔好妄想增值。甚至CRB商品 指數今年7月初見頂至今已回落20％。 Hester Capital Management主席Craig Hester接受彭博訪問，預言明年上半年美國經濟增幅好小或冇增長，雖然今年第二季GDP上升3.3％。 房貸、信用卡貸款及汽車貸款都在度惡化。紐約大學教授Edward Altman認為企業貸款亦開始惡化。末日博士麥嘉華更認為去年信貸泡沫爆破威力勁過1981�82年；1980年美國負債只係GDP 130％，去年已達350％，其影響將以年為單位。 歐羅今年4月兌1.6美元至今已回落5.8％，係歐羅匯價最差的8月。因IG Metal（歐盟最大工會）要求加人工7%至8％，分析家估計未來四季歐羅區GDP升幅只得1.25％；加上俄羅斯出兵格魯吉亞，以及美國計劃在波蘭部署愛國者導彈令歐盟前景唔明朗。 加元去年升17％，但過去三星期跌幅相當快，在8月12日見1.072加元兌1美元，上周五收市係1.0633加元兌1美元，估計明年見1.1加元兌1美元，即再跌10％左右。 8月份印度CPI升幅達12.4％、利率高達9厘、第二季GDP只上升7.9％（第一季8.8％）。印度經濟亦迅速放緩緊。 好多人唔滿意 根據Bill Bishop資料，1977至79年美國四百三十五個國會議員中，40％係溫和派；2003至05年已急速下降至10％。根據賓州大學政治科學Diana Mutz調查，有23％美國人對政治好不滿，最不滿的階級係教育程度中學或以下，最少不滿係博士。即美國中下層社會對依家的政治狀況好不滿，呢個就係點解 奧巴馬提出改變後，受到咁熱烈反應的理由。可以話2000年至今美國中產及下層社會對依家的社會狀況極之不滿，相信呢個同經濟表現有關。美國人口統計局公 布，美國中產家庭年收入由2000至07年從58500美元下降到56000美元。呢個係美國戰後首次經濟循環周期完畢時（2000年係科網股高潮、去年 係道指另一高潮），美國中產家庭收入唔及上一次！過去八年美國中產家庭收入在度下跌緊，財富向1％人口集中；去年美國1％人口收入係近八十年內最高（只有 1929較2007年高）。美國GDP過去八年仍按3％年度速度上升，但去年美國中產家庭收入反而唔及2000年，唔怪之得大部分人希望改變。 香港雖然冇類似數字，但我老曹覺得去年香港中產家庭收入普遍唔及1997年！過去十年香港中產窮了；但香港1％人口卻更富有（呢個係今年豪宅售價能超過1997年的理由）。 美國7月份CPI上升5.6％，係十七年內最大的升幅，相信同政府6月份退稅有關。7月寄出支票較6月少一半，相信8月份CPI升幅將少過7月份，唔排除 CPI升幅在7月見頂。Hyun Song Shin係普林斯頓大學經濟系教授，佢認為美國金融危機正進入第二階段（第一階段係撥備5000幾億美元時）。第二階段將公布信貸蝕了1萬億美元，開始影 響日常經濟。未來十二個月美國GDP增長率將受呢D因素影響。 美國物業市場由2006年第三季至家陣唔見了17000億美元市值；加上油價由7月至今已回落25％、金價今年3月至今亦回落20％，大部分商品價格亦在度回落緊，通縮壓力正逐漸浮現。 Business Week分析員James Cooper認為，美國物業情況令金融市場受損傷，搞到美國經濟長時期好唔起來，因為由房地產過度興建到消化完成所需時間好長。去年9月至今年4月透過減 息一度令美國樓市前景轉好，但今年3月出現貝爾斯登事件，之後係房利美及房貸美事件，令一度曾穩定落來的美國樓價又再下跌。今年6月至今按揭利率上升半厘 又再打擊買樓人士的信心；7月份未賣出的房屋相等於十點一個月的需求（五個月先係正常）。6月份標普Case Shiller房屋指數較一年前跌了15.9％。其中拉斯維加斯、邁亞密及鳳凰城跌幅近30％，表現較好有沙羅特、達拉斯及丹佛。 OECD曾研究稅與經濟增長（Taxes and Economic Growth），證明稅率愈高，愈不利經濟增長。過去十八個月三十個OECD國家中有九個減稅，全球三十個國家減稅。八十年代英國同美國經濟開始復甦部分 理由亦係減稅。今年參議員Dorgan主張向油公司抽重稅不幸畀奧巴馬支持，並計劃擴展到美國企業海外收益上（美國企業海外收益只要唔匯返美國，係唔使畀 美國稅，令美國企業可將海外利潤再投資。如匯返美國就要抽39.03％稅。未來唔理係未匯返去一律要抽39.03％稅。擔心美國企業將減少海外投資，將資 金調返美國）。7月15日起美元匯價回升係未美國企業開始擔心奧巴馬當選；向大企業加重稅務負擔短期有利（例如資金回流、美元匯價上升），長期不利（因未 來企業純利升幅下降）。 1980年列根上台為美國經濟帶來重大改變；引發了1982至2007年美股超級大牛市。明年奧巴馬如上台同樣帶來重大改變，令美國經濟返番去六十、七十 年代。改變唔係次次都向好的方向改變，有時係向壞的方向改變。奧巴馬主張的改變可令美元匯價短期上升，但對美股則回落，六十五天後如果佢當選，明年美股冇 眼睇。 六十年代後期美國國會通過Alternative Minimum Tax法案，向有錢人抽重稅。隨住通貨膨脹上升令愈來愈多美國人進入上述法案的範圍。在六十年代擁有25萬美元就算係有錢人，到八十年代擁有25萬美元的 人又點算係有錢人？結果美國人將大量資金流向海外避稅，令美國經濟由六十年代後期開始停滯不前；明年起美國將重蹈覆轍。2000年起美國中產階級收入唔升 反跌，1％有錢人財富卻大幅上升，的確幾令群眾氣憤。奧巴馬提出改變深得中產階級的心；站在投資者立場，上述的改變幾令人擔心。 美改變會計制度有疑慮 另一改變係美國會計制度依家係GAAP（Generally Accepted Accounting Principles）而唔係IFRS（International Financial Reporting Standard）。超過一百個國家已採用IFRS，呢個制度已成國際標準；美國最遲2014年亦要加入。美國證監要求最大那一百一十間上市公司（佔總市 值14％）在2010年前先行加入，即明年起美國會計制度將由GAAP過渡到IFRS；雖然二者大同小異，採用IFRS後對投資者而言可增加透明度，但過 渡期會唔會好似去年美國會計公會要求美國金融機構按市值將債券入賬而引發次按危機？ 去年全球私人消費32萬億美元，較2006年上升11％，今年估計升幅只得2%到4％（2001至07年信貸寬鬆期內，全球私人消費上升63％。環球化、 低通脹、低入口成本、樓價上升及股市上升，都係令全球消費上升的部分理由。中國、印度及東歐新中產階級形成，中東、非洲及南美洲受惠於油價及糧食價格上 升，令新興國家私人消費由2000年的45000億美元上升至去年90000億美元）。隨住美國次按危機出現不但影響歐洲，同時更向全球擴散，消費信心受 油價及食物價格上升打擊；加上全球樓價及股市回落同商品價格高企，今年起全球消費進入低增長期。 MSCI新興市場指數去年共上升40％（雖然晚節不保）。今年滬深A股已跌52％、印度跌37％、俄羅斯跌27％、巴西跌5％、美國、歐洲、英國及日本亦唔見得好好。 據東方網消息，滬深兩地一千六百一十九家上市公司，今年中期業績平均每股盈利23.25分，較去年同期上升7.12％（去年同期每股盈利升幅達 52.6％）。賺錢有一千四百家，蝕錢有二百一十九家，虧損面達13.5％。盈利中41.7％由十四家上市銀行貢獻；電力企業賺錢空間極度萎縮，毛利率倒 數第二，唔少更陷入虧損。以純利升幅計，A股已唔再係高增長股，呢個係過去十個月A股市場急跌的真正理由。 展望明年，中國CPI平均升幅6.8％、巴西5.3％、印度8.4％及俄羅斯14.6％，即在可見將來新興國家經濟形勢未能轉好。少數受惠國只剩番能源及 資源出口國，但佢地亦同時受通脹打擊，好似巴西及俄羅斯係資源出口國，明年所受打擊較少。反之，中國同印度係資源入口國，所受打擊較大。俄羅斯產品只有 5％出口美國、巴西14％、印度15％及中國20％，即中國受美國經濟放緩影響最大。 IMF估計2000年全球GDP增長率少於50％來自新興市場，到今年全球GDP增長率超過80％來自新興市場。今年佢地佔全球GDP 30％，估計到2013年達35％或28.85億美元。即新興市場加起來影響力漸超過美國，但明年金磚四國GDP亦進入增長放緩期。中國由去年11.9％ 下降至明年9.2％、巴西由5.4％下降至3.8％、俄羅斯由8.1％下降至7％，以及印度由9％下降至7.7％……。去年美國次按危機引發經濟放緩期， 今明兩年向外擴散；那D相信Decouple者過去十個月早已損失慘重。Nigel Rendell係來自RBC Capital Markets分析員，認為隨住經濟此消彼長，新興國家遲早有一天同OECD國家經濟Decouple，只係時間上以年為單位，而唔係以月。 去年英國金融服務佔GDP 12％，反而批發項目只佔少於4％ GDP，可以話極之唔平衡。上述趨勢由1992年開始至去年係英國金融業直線擴充的結果。到去年英國經濟形成金融業獨大，但踏入今年金融業開始萎縮，估計 明年繼續萎縮，令英國經濟重返平衡期，呢個調整短期帶來災難。英國首相白高敦上周六認為英國正面對六十年內最嚴重的經濟危機。英國7月份獲批樓按申請只有 二萬二千四百四十八單，較一年前減少65％，平均每單138000英鎊，較一年前減少11.9％，反映英國物業買家持保守態度。 液晶面板業步入寒冬 南非蘭特匯價因白金及黃金價格回落，8月份回落5.1％，見7.6845兌1美元。南非出產全球80％白金及10％黃金，8月份金價回落8％，白金回落17％，引發南非蘭特在8月份大跌。 日本Nisson Rinkai建築公司上周五申請破產。受地產回落影響，令該公司資不抵債629億日圓（5.785億美元），係今年日本最大的申請破產公司，虧損已超過Magara建築公司。 日本政府上周五宣布提供11.5萬億日圓（1058億美元）刺激經濟計劃，包括減入息稅及增加燃料補貼，向中小企業提供貸款及政府增加開支10萬億日圓。因為今年第二季日本GDP又再出現0.6％收縮。 過去十六年日本政府共提供十五個刺激經濟計劃，作用有幾大？由1992年第一個刺激經濟計劃至家陣，效果都係短期有幫助，長期反而拖慢經濟調整。做政府亦 要狠心D，例如1973�74年香港政府完全袖手旁觀，令香港經濟在1973�74年死去活來，但1975年又春回大地。1997年那次，因1998年入 市干預股市及不斷為經濟提供支持，香港經濟卻一直衰到2003年年中先有轉機，衰足六年半。 上周五馬來西亞政府宣布減稅及增加開支去對付反對黨。今年馬來西亞財赤相等於GDP 4.8％（去年3.2％），未來最高入息稅由28％減至27％；為一百一十萬個家庭提供免費電力；其次係答應明年公務員加人工；減低住宅買賣稅及增加福利 開支，令明年財赤進一步上升。林吉特今年已回落2.6％，但馬來西亞股市上周五卻大升，代表投資者歡迎政府減稅措施。今年用在補貼麵包、煮食用油、燃料及 唔少食物支出達341億林吉特，明年將進一步增加。 南韓7月份收支赤字擴大，令8月南韓圜下跌7.1％，成為亞洲區表現最差貨幣；其次係林吉特跌4.1％、新台幣跌2.6％及泰珠跌2.1％。8月份唔少資金由東南亞流出返回美國，美元相信可進一步轉強。 今年起本港地產代理從業員可到內地執業，其中最熱門自然係廣州及深圳一帶，但執業前必需考內地執業資格試並在三年內必須執業，唔係就要重考。首次課程今年年底前由本港地產代理監管局與廣州市房地產中介服務管理所聯合舉辦，歡迎本港地產代理從業員報名參加。 依家合廣州資格的香港代理從業員只得一百多人。廣州有三萬八千名地產代理從業員，約一千一百間中介公司，每年成交量二千萬方米，其中九百萬方米係二手樓，市場好大。本港地產代理監管局亦同佛山方面協調，將協助本港地產代理執業者獲取當地執業資格。 以本港地產代理從業員的搏殺精神，相信在內地中介行業大有發揮空間；亦係本港樓市淡靜下，地產代理從業員最好的出路。 去年液晶面板供不應求，今年第一季達高潮，唔少生產商大量投資生產設施去應付需求；今年6月大廠商聯手降低庫存，零售價開始下跌，而且愈跌愈急，估計二十 座玻璃基板爐今年投產，令總數由去年第四季一百一十七座上升到家陣一百三十七座，令今年產量上升25％。另有五至七條第五代生產線明年投產，令第五代產 能一下子上升40％，呢類生產小液晶屏為主的第五代生產線在明年將面對很大衝擊，令明年液晶面板市場並唔樂觀。至於第六代或七點五代生產線壓力比較細D， 唔少人期望聖誕節訂單可以大增。 9月銷售旺季未到，液晶面板價格已跌到接近成本價。從6月開始連續三個月下跌已令生產商努力減產費事跌破成本價；睇來液晶面板價格前景唔多樂觀。 奧運並冇為液晶面板帶來井噴，6月開始售價係咁跌，估計第三季部分公司已出現虧損，第四季更令人擔心。根據市場調查機構Display Search首席代表張兵資料，十九吋售價由6月122美元跌至8月88美元，跌幅28％；二十二吋由153美元降至118美元，跌幅23％，主要零組件 亦下跌20％左右。估計年底跌幅係30％至45％，液晶面板行業的寒冬，今年又再次來到。 [ 本帖最後由 羊仔 於 2008-9-3 10:03 編輯 ]

Share this:

火煋人

唔再信價值投資法 2008年09月02日（星期二） 9月1日，周一。恆生指數跌355.58，收20906.31；成交411億元。9月期指跌386點，收20874點，期指倒掛現象又再出現矣。 富士康（2038）下挫4.6％、思捷環球（330）跌6％，即三個交易天大跌24％，可見基金洗倉的威力；聯想（992）跌6.4％，收4.96元，因美國銀行、花旗及德銀等齊齊降評級。 未來十年股市係點？ 滬深三百指數跌3.45％，招商銀行跌6.6％；韓國Kospi指數跌4％，LG電子跌9.6％；台股跌3.3％，鴻海精密下跌6.9％停版；MSCI亞太指數跌8％。可見成個亞太區股市受壓。 英國7月份批出物業貸款只得三萬三千單，係九年內最少；銀碼32.3億英鎊，較6月上升2.86％；同去年7月93.5億英鎊比較跌幅好大。 格魯吉亞共拋售1.872億美元外匯（佔總儲備12.8％），去支持該國Lari匯價保持在1.4099美元兌1Lari。 Pictet Asset Management Ltd.及Aberdeen Asset Management Plc.聯手拋售南韓圜。繼8月回落7％後，今天再跌3.2％，韓國外匯儲備連跌四個月，今年外國投資者淨拋售220億美元韓國股票（即拋售大於買入）。 今年股市下跌25％。6月同7月再拋售42億美元債券，估計未來三至六個月南韓圜將進一步回落；因資金正從亞太區流失，重返美國。 利差交易於九十年代開始，因日本政府為刺激經濟不斷減息，但九十年代日本無論股市或房地產卻冇吸引力，1994年起不斷有資金由日本流向高息貨幣好似澳元等。2001年起美國為刺激經濟亦將美元利率不斷壓低，2003年6月見1厘，資金亦從美國流向其他的高息貨幣。 澳元�日圓利差交易，2003至去年獲利高達62%，上述未計匯價收益。美元利差交易主要對象係歐羅及英鎊，利潤亦唔錯。 不過，好似黑社會話齋「出得來行，就預了要還！」今年7月15日起美元匯價急升8%，將今年上半年利差交易的利潤完全抵銷，係未利差交易進入Unwind時段？ 高盛證券過去幾年係美元大淡友，最近改為睇好，O'Neill上周五認為，未來兩年歐羅見1.2美元機會大過見1.6美元（今年7月15日歐羅見 1.604美元）。歐洲央行9月4日相信會維持利率不變，四十七位分析員中估計減息者只佔5％，理由係歐洲CPI升至十六年高位；歐洲央行認為打擊通脹係 首要任務，家陣通脹仍遠離目標通脹率2％；加上9月8日IG Metall要求加人工大過去年6.5％，呢那時候減息唔係畀IG Metall加人工要求更振振有詞咩？ 成思危認為，人民幣兌美元升值速度將減慢，因為美元開始對其他貨幣升值及今年兌美元已上升7％。 美國監管機構上周五接管今年第十間出事的Integrity銀行。呢間銀行2000年成立，今年早已資不抵債。估計FDIC要用2.5億到3.5億美元去救番佢。 花旗推介中保國際（966），估計今年每股獲利36仙，較去年減少67％，P/E四十五點五倍，目標價20.4元；中海油田服務（2883），估計今年每 股獲利66.5仙，升22.8％，P/E十三點八倍，目標價16.9元；中海石化（3983），估計今年每股獲利36.6仙，升16.1％，P/E十一點 八倍，目標價6.2元。 1987至97年係貪婪的十年，呢十年內愈大貪者賺到的錢愈大；到1997年唔少人變成貪得無厭，最終部分人變成負資產。1997至2007年係危機四伏 十年。1997年有亞洲金融風暴，亦有本港特產「八萬五房屋政策」；1998年有淡水大鱷衝擊港匯指數，後因俄羅斯債務危機令特區政府執身彩；1999年 有「千年蟲」事件，最終引發2000年科網股泡沫爆破；2001年有「九一一．慘劇」事件；2002年有英隆事件；2003年本港出現沙士事件；到 2003年下半年起港人先再有安樂日子。跟住去年10月美國次按危機，以及港股直通車計劃無法落實；今年內地有雪災及四川大地震。1997到2007年呢 十年金融市場真係多災多難。去年10月起計，未來十年又會點？十個月過去矣，大贏家係小心謹慎的投資者。當然亦有極成功的對沖基金，好似拋空金融股去買期 油者（呢個係極少數，何況一般投資者做唔到）。 信趨勢好過 過去十個月係價值投資法的重災區，好似Davis Advisors去年購入Ambac，後者至今回落95％；Legg Mason Value Fund揀了K B Home及Centex，今年3月雖已止蝕，仍要蝕2.15億美元，呢個基金今年下跌28％；Third Avenue Value Fund因揀了MBIA，令基金跌價16％。仲有美林、花旗、房利美及房貸美等。只要買入任何一隻，損失都會好大。 本港基金揀錯股而招至損失的亦有好多。我老曹1974年經歷和記一役後，對價值投資法早已冇晒信心。當年我老曹將和記年報睇完又睇，先決定由每股7元開始 買D，一直至2元，一共買了十萬股，用晒手上那50萬元資金；最後和記股價跌落1元。1975年呢間公司宣布，有一間叫Alltrack的公司在印尼經營 出租Caterpillar建築用機械業務蝕了3000萬美元，要匯豐注資1.5億港元挽救。印尼Alltrack公司係和記旗下三百多間子公司之一，呢 間公司資產負債表亦冇在年報刊出！叫一般投資者事前點知一間小小的子公司竟可整死成個和記集團。從今以後我老曹再唔信上市公司年報，改為相信趨勢。因為一 粒老鼠屎可將一煲靚湯完全毀掉；在未出事前，有邊個會留意呢粒老鼠屎？價值投資法實在有太多漏洞，點去叫人信？過去十個月係價值投資法信徒的大災難（中外 都係咁）。 11月期油今天再升2.54美元，見118美元。墨西哥灣石油設施員工70％已疏散，令每日減產一百二十五萬桶石油，以及六十億九千立方呎天然氣，佔離岸 石油產量96％及天然氣產量82％。今天係美國勞動節，市場成交好少所以作唔到準，最新消息係颶風對採油設施破壞有限，油價又再回落。商品市場牛市係未結 束？近月金價、油價及CRB商品指數的回落，到底係牛市結束定係中期性調整？如伊朗真係遭遇空襲，將考慮封鎖霍爾木茲海峽令中東石油運唔倒出去，如果係 真，咁就大件事。家陣油價中最少有25至30美元係反映伊朗危機，如中東局勢緩和，家陣油價只值70到80美元，如伊朗封鎖霍爾木茲海峽，油價就算見 147美元後亦阻唔住個升勢。 至於礦產價格，上半年受中國雪災及四川大地震影響，投資者擔心供應受阻而炒上。昨天四川攀枝花地震擔心又令礦產價格上升。另一方面，全球GDP增長率進入 放緩期，需求壓力在度下降中。中國奧運之後油電價格改革問題，再次被推上前台，國家發改委宏觀經濟研究院副院長王一鳴表示，趁下半年其他資源性產品價格回 落，創造相對寬鬆環境，應盡快調整能源資源生產同消費價格體系，不應單靠壓低能源價格去控制CPI水平。如無意外電費及燃料費上調快將出台，因中國唔似印 度同周邊國家，CPI已進入雙位數上升；中國應有條件承受水、電及燃料費上升，何況中國工人今年獲大幅度加人工。 一家內地上市地產服務公司董事長在接受《理財周報》訪問時表示，自去年11月13日深圳中天置業評估有限公司總裁蔣飛涉嫌捲巨款走佬，令公司倒閉後，創輝 租售、中大恆基、北京信一天及深圳長河地產等房地產仲介公司大量減少經營門店；加上今年1至8月全國住宅銷售面積減少11％及銷售金額減少7％，令交易規 模萎縮。以深圳房地產仲介公司為例，依家90％處於蝕錢狀態，有賴往年利潤支持。成個地產服務業今年業績下滑30%至40％。面對股市不景氣、產業調整、 次按危機及出口萎縮，再加上政府打壓需求，估計呢次地產仲介業寒冬起碼要到明年5月。 內地房價剎車漸見效 美聯物業每周樓市第十二期報告指出，央行及銀監會聯合下達關於金融促進節約集約用地通知，要求各銀行緊急限貸。另一方面，千億保險資金將進入不動產。建行 行長張建國在中期業績發布會上表示，只對地產價格增長過快的八個城市地產開發貸款進行嚴格控制，但冇公布八大城市名單。一般人估計廣州、深圳及東莞好可能 進入八大銀貸城市。瀋陽市政府在「中國．瀋陽2008秋季地產展示交易會」上宣布，重新啟動購房補貼政策，提高住房供會貸款年限及限額及降低首付款比例。 杭州市住房制度改革辦公室宣布，杭州市將放寬對經濟適用房申請者年齡限制，凡1985年前出生的年輕夫妻已可申請經濟適用房。另一方面，監察部、國土資源 部、財政部、住房及城鄉建設部及審計署五大部門聯合印發通知，要求各地繼續組織開展國有土地使用權出售情況的專項清理和檢查工作。 換言之，內地政府已明白唔好將孩子連同沖涼水一起倒掉的危險，在執行緊急限貸政策下，一樣有保有壓。內地房地產經過2003至08年年初房價瘋漲後，政府 正通過一連串政策為內地房價進行剎車，以免持續走低的股票市場資金轉向地產市場投機。由於內地資本市場落後，房地產企業缺乏直接融資渠道，只要限制銀行貸 款，便可阻止炒房地產者造成泡沫（中國房地產企業資金70%至80％來自銀行貸款，相反西方國家房地產企業資金60％來自直接融資，例如發行房地產基 金）。在中國只要限制銀行向房地產貸款已可剎車，令房價逐漸返去理性水平。由於中國人儲蓄率一直好高，畀樓價消化一段日子將泡沫擠掉，日後再畀銀行擴大房 地產放貸規模，便可令內地房地產逃過一次泡沫化現象。好似1998至2000年經歷三年調整後，2001至03年內地房價進入理性上升期；其後北京成功獲 得今年奧運主辦權，上海獲2010年世博會舉辦權，均刺激樓價瘋漲，今年年初已進入非理性階段。由2003至07年樓價上漲一倍或以上，今年第二季開始漸 漸穩定落來；加上政府一連串抑制、打擊投機行為及擠壓泡沫政策出籠，並已漸見成效。至於調整期係未好似1998至2000年要三年時間？要事後先知道。 9月1日廣州成為全國第一個正式實施綜合性供用電地方規章。地產開發商唔可以隱瞞小區內電力規劃，禁止違法停電行為，家陣類似項目有一百六十三個，受影響 居民四萬五千戶。主要原因係不良地產商為慳番D錢而唔按規定投資永久用電工程及辦理一戶一表手續，將臨時基建用電轉供住宅用電，住戶不但承受高額電費支出 而且面對隨時停電之苦，例如遠峰大廈及大塘小區等。新規定下地產開發商必需按照規劃，先行建設配套變電設施，令居民用電合法化。符合上述的規定，國家才發 完工驗收完畢紙，依家只係規定先行實施一年，然後立法，確保用戶對供電可靠性及品質特殊要求，唔會無故停電。 做人要識分享 上周某教授透過森池兄話畀我老曹知「佢較我老曹叻，因為佢較我老曹有錢」；我老曹聽後微笑不語。對我老曹而言，追求財富只係人生目標其中一項。我老曹一向 將健康放在第一位、家庭放在第二位、子女放在第三位、事業放在第四位。對財富的睇法好以屋企的自來水喉，只要夠使就算，我老曹從來唔會在屋內貯水；何況我 老曹呢D中產階級的財富，在超級富豪眼中真係九牛一毛。 我老曹能夠在解決衣食住行之餘，仲有餘錢幫陣朋友及捐獻公益事業，已好滿足。今天到銀行為農家女職業訓練學校匯上24萬港元，作為資助四川大地震後的孤兒 入讀農家女學校一年學費兼食宿費之用（平均每人每月需1000元人民幣）。上述款項係兩本書的版稅，因此亦要多謝讀者大力支持。另有一位讀者來電話，佢個 仔最近結了婚，願意將自己的快樂同人地分享，將佢結婚所收的10萬元禮金，全數存入我老曹的戶口，捐贈畀農家女學校，為四川地震的孤兒提供一年免費食宿及 教育，上述的行為令人尊敬，我老曹以有呢類讀者為榮。今天我老曹一把年紀，應該學習捨得，反而你又捨唔捨得將自己財產的一少部分與別人分享？唔好因小善而 不為；人生最大快樂唔係你擁有幾多，而係能夠同人地分享。雖天地不仁，但人間有情；捐助唔係為乜，只係為求心中快樂。有份損款畀苗圃的讀者本周日請來分享 第四季經濟展望，並希望大家有所得著，家陣風高浪急，好易做錯決定。

Share this:

火煋人

對沖基金經理重新執位 2008年09月03日（星期三） 9月2日，周二。恆生指數升136.15，收21042.46；成交493億元。9月期指升287點，收21160點，呢個係熊市二期典型走勢（似好非好、似淡非淡）；滬深三百指數跌1.03％，收2285.41。 上交所及深交所至8月30日止，有一千六百一十九間上市公司半年純利5533.03億元，較去年同期上升16.04%，中期加權平均每股收益23.3分， 升幅好細。如再計算兩稅合併增加了上半年企業純利，睇到內地企業純利已由去年上半年高增長期，進入了今年上半年低增長期。 日本人面對問題擺埋一邊 美國對沖基金到今年7月止平均蝕了3.43％，仍跑贏標普五百指數（同期回落12.65％），但跑輸畀債券指數（同期升1.05％）。呢個1.9萬億美元 市值的對沖基金行業，今年首兩季新流入資金只得300億美元（去年同期1190億美元）；由於今年較難借錢作對沖用途，因此今年難有出色表現。因為基金經 理主要的收入來自分紅。因此今年佢地收入大減，唔少最一流分析員及Trader可能因此離開所屬的基金。相信9月結後，對沖基金經理出現重新執位情況。 今年愈來愈多投資者放棄基礎分析（即價值投資法）。自信貸壓碎（credit crunch）出現後，大大挑戰成個金融行業的運作模式！例如較高商品價格及較低GDP增長率，改變了投資者對證券價值的睇法。例如航空及汽車製造股，紛 紛跌穿過去被認為的合理價；通用汽車由30美元跌至10美元，跌幅超過66％；花旗銀行股價在一個月內波幅可以達到70％；房利美及房貸美亦打破人們對政 府支持企業（GSE）的睇法。對沖基金雖然今年上半年大部分蝕錢，但已漸成投資市場的主流思想，即同時睇好及睇淡唔同行業股份，投資策略引用對沖概念。 家陣七十二歲、上任唔夠一年的日本首相福田康夫，本周一宣布辭職，因今年第二季日本GDP收縮2.4％，上周五佢提出刺激經濟方案被認為「老餅」唔獲國會 支持，其職位或將由今年六十七歲、一向以能言善辯出名的麻生太郎繼任；佢計劃增加政府開支去刺激經濟，暫時唔理會國家巨大負債。日本政府今年總負債係 GDP 148％（美國政府係62％）。雖然日圓利率咁低，日本政府每年財務負擔仍佔去稅收四分一。日本銀行面對0.5厘利率，以後減唔減息對經濟分別唔大。加上 7月份CPI上升2.4％，日本政府可以話係無晒計。 一個國家經濟前景好多時同佢地的民族性格有關。日本人喜歡鑽研，好似花道及茶道等可見到日本人的一絲不茍精神，每一細節代代相傳達到最精緻境界。呢個係日本產品無論汽車到電子產品，品質皆能達致世界一流水平的理由；呢個係日本經濟能從戰後廢墟中崛起的理由。 1971年我老曹曾跟一位日本人學習陰陽燭走勢。佢係日本國家商品期貨公司港區副主席，那時已發現佢服務緊那間公司財政方面有問題，佢自己亦知道，我老曹 問佢點解唔即刻將佢糾正？佢話畀我老曹知，日本人認為問題可以隨時間過去而消失；積極去糾正問題反而引起公司員工之間不和。換言之，日本人當面對問題時常 用擺埋一邊的方法而唔去解決，除非到了非解決不可的地步為止。1974年呢間期貨公司宣布破產，那位日本人亦回國去矣。日本人呢種性格令佢地的經濟自 1990年至今仲係咁，因佢地相信隨時間過去問題會自動消失，除非無法忍受先改變。 最近南韓情況都幾令人擔心。KOSPI指數由去年11月1日2085點回落到近日1400點，跌幅32％。匯價已好接近2004年11月3日1116南韓圜兌1美元（當時外資開始大量湧入），一旦失守可以加速南韓圜回落。 今天泰銖繼續下跌，泰國股市跌至十九個月內低位，主因係政局動盪。今年海外投資者淨沽出31億美元泰國股票；不過，8月份CPI升幅已下降至6.4％（7月9.2％），情況冇表面睇咁差。 印度股市亦令人擔心。家陣五十九歲的蘇巴勞出任儲備銀行新主席，佢主張加息去對付通脹，以便將十六年內最高CPI升幅壓落來。明年5月印度大選，上月通脹 率12.6％，因政府減少燃油補貼及宣布公務員加薪21％。面對12.6％ CPI升幅，9厘息係無法壓抑通脹率。今年第二季印度GDP升幅已降至7.9％，加上超過一半人口每日生活費只得2美元，如GDP進一步下滑，明年5月執 政黨亦需落台。 鳥巢水立方大轉型 南非股市8月份下跌3.1％，主因係白金價格大跌，令白金礦股大幅回落；其他好似銅礦及煤礦等亦下滑。如商品價格進入熊市，南非前景將轉為暗淡。 巴西股市周一跌幅係全拉丁美洲中最大，因金屬價同油價回落令礦務及能源股大跌。 美匯指數升至六個月內新高【圖】，加上50天移動平均線（74.23）重返200天線（74.22）之上，確認美元進入牛市。英鎊見1.7863美元。係 2006年4月以來最低；歐羅見1.4557美元係今年2月14日以來最低；澳元見84.69美仙，係今年9月以來最低，估計澳洲將減息。 奧運之後鳥巢、水立方及奧運村點轉型？鳥巢業主北京中信聯合體體育場運營公司計劃將佢改建為購物、餐飲及演出場所，改動主要集中在下層看台，但保留整個鳥 巢形狀畀遊客參觀。水立方分為七大運營板塊，包括商業樓、網球場、熱身廳、戲水樂園及商業區，成為全北京最大水上遊樂中心，將於年底動工。一萬七千個座椅 將拆掉其中一萬一千個及保留21.4％總面積，作日後大型游泳賽事用；其餘大部分面積改為水上樂園，如人造衝浪海灘、健身、培訓及水上娛樂。至於奧運村內 今年10月起部分改為會展、商業、酒店及寫字樓；奧運村住房70％已預售，家陣在度加建廚房設施、明年上半年交房後成為住宅區；至於五棵松場館則保留畀遊 客參觀。 奧運之後中國基建全速上馬去減慢經濟下滑速度。9月1日人行要求各銀行落實「區別對待，有保有壓」方針。向三農及小企業增加信貸、支持災後重建，以及對出口型中小企業信貸放鬆，但整體信貸仍然從緊。 北京和上海之間新高速鐵路2012年通車，時速由三百五十公里提升到三百八十公里，全長一千三百一十八公里，日後北京到上海只需五小時；由中國自己生產時速三百八十公里列車，最先用在京滬高鐵。 京津快速今年8月已運營，時速可達三百九十四點三公里，未來中國各大城市交通主力係高鐵。 內地一線城市政府為配合中央政府政策忙於擠走泡沫，反而二三線城鎮政府卻趁機製造泡沫。7月份銀川、烏魯木齊及太原樓價仍較去年同期上升14.3％、13.9％及12.4％，其他如海口、寧波、蚌埠、蘭州、長春及無錫亦有唔錯的升幅。 在OECD國家，普通住房售價係中產階級家庭年收入六倍便算合理，超過便視為有泡沫成分。家陣北京、深圳及廣州係十三倍，上海係十一倍，你話點算?! 中國須搵出經濟平衡點 面對「金九銀十」萬科上海八個樓盤以減價促銷，新盤未賣出卻引發前期買樓的人退房呼聲。例如金色雅築今年3月至今已減價三次，最先購房者賬面冇了幾十萬 元，因呎價由最高18000元一平方米跌至家陣14000元（促銷價係12000元），引致已買樓的人要求退房。萬科冇正面回應，退房團表示將訴諸法律， 如照香港法律係冇得退。 中國經濟經過三十年高增長後擔心將進入下行經濟。如中國GDP增長率由去年第二季12.5％下降到今年第四季9.6％，滬深A股P/E將由去年高P/E進 入明年低P/E；未來調整壓力仲好大。今年內珠三角一帶超過二萬間中小型工廠執笠，中國每年新增勞動力二千萬人，點樣在咁的經濟過度期，利用政府基建開支 去吸收新增勞動人口對工作崗位的需求？ 根據菲利普斯曲線理論（Philip's Curve），GDP過快增長必然導致高通脹，因此雙位數字GDP增長率通常只能出現在經濟起飛期（例如1978至2007年），而唔可以長期維持。理由 係工業化帶動能源及原材料需求上升，而城市化亦推動糧食價格及城市樓價上升，需求大過供應便可將價格推上。過去三十年中國GDP能夠急升理由係建基於壓低 工人的工資及犧牲了環境資源，把全國資源用在出口方面而壓抑中國人本身需求。換言之，過去三十年GDP高增長建基在扭曲價格方式進行（包括人民幣匯價偏 低），呢個情況必然造成資源浪費及環境污染，長期壓抑人民福利改進及盲目追求GDP高增長係唔可能長期化，而且國際間亦唔容許。奧運之後，中國經濟必需在 通脹率與GDP增長率之間搵出平衡點。過去低通脹高GDP增長率的時段將一去不返，如處理唔好中國經濟下滑速度將加快。一般人認為CPI增長率7％已係極 限。唔適宜超過；GDP增長率8％亦係極限不應低過。如何達到「壓七保八」？何況政府目標通脹係4％，即CPI升幅少於4％政府才會放鬆銀根，估計要到明 年5月先有機會。 人口紅利消失 第二次世界大戰後自由世界國家亦曾以GDP年率9％速度增長，令1973年出現石油危機。中國過去三十年保持GDP平均年率9.8％，自然都唔例外。根據 林毅夫等人估算結果，2004至2014年中國增長率應為8.56％，2014至2024年應為7.08％；王小魯等人較悲觀，認為2011至2020年 中國GDP年增長率只有6.21％。雖然兩位知名人士估算結果唔同，但原因卻一樣，即中國人由資本積累及高儲蓄率轉為擴大消費及農村勞動力完成轉移到城 市，令人口紅利冇晒。 無論全世界邊一個國家，GDP維持三十年左右高增長後（有D長D，例如三十三年；有D短D，例如二十七年），必然出現GDP由高增長轉向低增長；由資本積 累轉向擴大消費，令股市由高P/E（因資本大量積累結果）走向低P/E（進入擴大消費期）。例如1992年台灣及2007年中國股市。中國股市更有大小非 問題，過去因限制大小非流通股流入市場，造成去年10月前非理性上升，近期又因大小非流通股逐步轉為全流通而加大股市下跌速度。 今年共有一千五百四十九億三千九百萬股大小非股解禁，相等於去年年底滬深兩市總流通股33％；明年更達逾六千八百九十億股，相等於去年年率總流通率一點五 倍；2010年仍相等於去年年底總股本76％。即三年後A股流通量上升二點六倍，理論上，A股P/E應同本港H股P/E睇齊，家陣仍高出13%；到時A股 股價將反映公司業績而唔係供求。

Share this:

火煋人

股聖買蝕本公司 2008年09月04日（星期四） 9月3日，周三。恆指跌457.4，收20585.06；成交560億元。9月期指收20544點，跌616點；10月收20530點，跌645點。恆指倒掛現象又出現，睇來大市繼續向20000點支持位挑戰。 中國鋁業（2600）跌6.4％，收6.46元；紫金礦業（2899）重挫6.8％，收4.52元；江銅（358）跌6.5％，收11.16元；中國海洋石油（883）大挫6％，收10.7元；路透�Jeffries CRB商品指數創3月19日以來最大跌幅。 買股票都要靠運 匯源果汁（1886）升164％，收10.94元，較停牌前升二倍。我老曹去年曾買入多少，今天在11.08元出貨，收市10.94元，因可口可樂公布以每股12.2元收購；安德利果汁（8259）亦升7.4％，收0.58元。買股票有時「運氣」都幾重要。 可口可樂以24億美元收購匯源果汁66％股權，但必需經中國反壟斷審查認批才可。以收購價12.2元計，今年預測P/E四十一倍，依家匯源佔中國100%果汁市場42.6％及中濃度果汁市場39.6％。 周二油價及金價大跌部分理由係38億美元的Ospraie Management宣布結業，理由係表現唔理想（全年下跌38％，淨係8月下跌27％），過去三星期在度大量拋售能源、原材料及礦務股，將D資金還畀基 金持有人（唔少基金有呢個限制，例如蝕到某一水平便自動結業將D錢還畀基金持有人）。 UBS的John Reade認為不應係單獨事件，因唔少資源基金今年7、8月份損失好大，需要執笠的資源基金數目唔少，令9月份能源及礦務股面對的壓力好大。 油價第四天下跌，見107.32美元，估計100美元左右先有支持。 金融體系的麻煩漸變成環球經濟增長放緩，造成商品價格急跌。唔少商品價格跌幅已達30％，反而7月15日起美國金融股唔少反彈16％。亞太區股市卻成為重 災區，例如南韓跌26％、印度跌25.8％及日本跌17.6％；而滬深三百指數更加不值一提，今天再跌1.73％，收2245.96。今年中國外部需求放 緩，令出口型中小企業在央行緊縮信貸調控、人民幣升值及工資上升壓力下，處境變得好艱難。6月份已有數字證明熱錢由中國股市流出，今年A股總市值縮水 14.66萬億元人民幣。政府希望擴大內需去支持經濟，但市場人氣唔夠及內房股集體跳水；加上7月15日起全球商品價格下跌令西山煤電及中國神華等煤炭能 源股亦不保；其他資源股就更加No Eye See。市場傳出央行或出新政策打擊貸款違規進入股市及房地產，令今天金融股及地產股亦加入跳水行列，例如中國海外（688）跌6％、雅居樂（3383） 跌6.5％、首創置業（2868）跌5.8％及世茂房地產（813）跌5.35％；甚至酒店股如香格里拉（069）亦難逃厄運。 花旗推介華潤電力（836），估計今年每股獲利64仙，減少18.5％，P/E三十點一倍，目標價23元；第一太平（142）估計今年每股獲利7美仙，升 21.6％，P/E八點六倍，目標價6.1元；深高速（548）估計今年每股獲利29.6分人民幣，減少9.5％，P/E十一點一倍，目標價4.7元。我 老曹亦幾睇好第一太平，理由係睇好棕櫚油前景。 信貸壓碎有誤導 截至6月30日止，中國上市四大銀行共持有232.8億美元兩房保證（或發行）債券。7月底止中國銀行（3988）表示已減持46億美元，至173億美 元；建行（939）表示已減持20億美元；交通銀行（3328）出售2700萬美元；工商銀行（1398）由於只持有27億美元所以仍未處理；估計內地銀 行仍會進一步減持兩房保證（或發行）債券。 9月15日Commodity Futures Trading Commission（CFTC）將在美國國會上回應點樣增加商品買賣市場透明度。上述係今年6月指令，目的係證明油價上升唔係因需求急升而係炒家入市。 有足夠證據後，國會將立法制止；打算12月18日通過向代替能源提供稅務優惠，藉此打擊油價，最遲12月31日。呢個法例影響未來油價走勢。雖然近日油價 回落，仍較一年前高出55％。DJ-AIG商品指數7月中至今回落20％，令三角航空升17％及洲際航空升16％。 金價今年3月最高見1030.7美元，最低係8月15日見772.98美元。技術上睇金價跌穿772.98美元先有機會完成調整，因為底部通常都係高低腳或低高腳，金價必需再次下試772.98美元先完成調整。 古斯塔夫颶風轉弱，油價同金價已立即急跌，係未代表商品市場牛市今年已結束？依家客觀環境仍係負利率3厘（利率低於CPI升幅），情況仲係咁，一旦由負利率環境轉為正利率，商品市場會點？ 自從去年8月出現次按危機後，本欄常用信貸壓碎（credit crunch）去形容，似乎有D誤導；正確D來講係另一大趨勢開始！在長波中（Long cycles），利率時高時低，有時有實質利率、亦有時係負利率。由1980至2004年利率大方向係向下，理由係經濟環球化，來自新興經濟國家產品入 口，壓抑OECD國家的CPI升幅，令OECD國家可採取寬鬆貨幣政策刺激抵押品如房地產、股票及債券紛紛升值，令OECD國家人民可以借更多，因此增加 消費，令更多新興經濟國家產品入口。二十五年（1982至2007年）後，借錢的人漸無能力還債，引發次按危機。財務機構開始收緊貸款條件，令抵押品無論 物業、股票及債券皆跌價，上述先係大趨勢！各國央行面對信貸壓碎紛紛注資；美國更大幅減息，不惜出現負利率（CPI升幅5.6％，利率只有2厘）。不過， 利率大方向係加息，因為來自環球化的紅利已派完，無論中國或印度亦面對通脹壓力，無法廉價出口產品矣。家陣美國的負利率環境只可短期維持，最終仲係重返 CPI升幅2厘或以上。加上抵押品不斷跌價，邊度在放寬信貸條件？最終因資產價格下跌引發通縮（例如1990年至今，日本企業唔再擴張、工作崗位愈來愈難 搵，甚至物價上升，人人亦只有減少消費，因為佢地感到窮了而唔係富有了）。 穆 唔敢降評級 過去兩年美國物業市場冇了17000億美元市值；加上過去一年美國金融市場無論股票及次級債券亦以驚人速度下跌。上述壓力部分被去年9月至今年4月利率由 5.25厘降至2厘，以及美元匯價下跌8％所抵銷；不過，今年3月至今金價下跌20％；今年7月至今油價下跌25％；即係代表信貸收縮壓力漸漸令通縮打贏 通脹。今年7月美國CPI升幅5.6％，唔係見頂都相信距離見頂日唔遠。再睇美國M2（因政府已唔再公布M3），增幅最大係2001年「九一一．慘劇」 後，當年達10％，但其後增幅已減少至5％，近三年又再上升到7％，最近又再減少，因此亦唔會出現類似七十年代CPI的升幅。 在咁的情況下投資市場已變成戰場，經濟在mumbo-jumbo。一陣間農產品吃香、一陣間係金屬產品、一陣間係石油。從第二次世界大戰結束至今過去六十 多年，無論農產品、金屬甚至石油都係boom & bust行業；高潮在1974、1980及今年出現；明年係點，木宰羊。 股價短期由投資者情緒決定、長期由基本因素決定、大趨勢由基本因素決定方向，投資者情緒只可令股市P/E由六倍到五十倍之間波動（OECD國家P/E由六 倍到三十倍之間波動）。去年10月標普五百P/E上升到二十五點八倍，肯定進入牛市第三期，分析員估計最少跌幅26％，即家陣仍未完成最少跌幅。 股聖畢非德的成功就係六十、七十年代持住現金。當年大把平靚正美股可供選擇，家陣的佢亦持住280億美元現金，亦有大把平貨可供選擇。例如近期入股 HomeServices of America Inc.（美國第二大地產代理公司），呢間公司2005年賺1.45億美元見頂，去年利潤已回落到4200萬美元，今年上半年稅前利潤200萬美元，恐怕 今年下半年進入虧損，但穆 公司唔敢降佢信用評級，因為佢的主席Ron Peltier搵到巴郡入股，有咁勁的現金作後盾。你又有冇膽量投資短期蝕本的公司？ 中國產品以質取勝保GDP 中國經濟已結束高GDP增長及CPI低增長時代。GDP增長率因出口增幅由去年第二季12.5％將回落到今年第四季9.6％。中國製造業由1993年佔全 球製造業比重3.5％上升到2006年14％，排名僅次於美國。和美國唔同的係美國製造業係高附加值產品，中國產品只係價廉物美。隨住2005年7月至今 人民幣升值20％，中國工資大幅上升及環保條例逐漸嚴格後，中國製造的優點漸減少。以聯想（992）為例，去年營業額係美國惠普公司16.1％，利潤水平 係美國惠普4.1％。因聯想產品仍以薄利多銷取勝。 中國裝備業佔整個製造業比重少於30％，德國係46.6％、日本係43.6％及美國係41.9％。中國工廠裝備仍以入口外國裝備為主，仍未中國化，其中發 電設備90％入口；集成電路芯片製造設備85％入口；石化設備80％入口；汽車、紡織機及印刷70％入口。換言之，中國工業仍以加工產業為主，而唔係裝備 工業。因此只能微中取利，因市場競爭大。例如聯想電腦內的芯片及軟件都以入口為主，結果電腦售價中30％用來畀知識產權，聯想自己只能微中取利。 未來中國GDP能否保持高速增長？便看中國製造業可唔可以由低成本競爭策略轉為以產品質量取勝。提供高附加值產品，由加工產業走向裝備產業（工廠中的工 廠），唔係就會好似東南亞國家九十年代面對中國人民幣大幅貶值後，訂單去了中國而出現1997年亞洲金融風暴而結束東南亞GDP高增長期。明年中國政府將 全力八保；通脹率依家最高係今年5月8.7％，呢個已遠離人行目標通脹4％，正努力將佢壓低到7％或以下。由於中國汽油價、糧食價、水費及電費同全球脫 節，一旦放鬆，中國CPI升幅高出7％係好容易的事。當前宏調政策基本思路仍係堅持貨幣政策從緊，只對個別行業及個別地區放寬。調高存款利率及存款準備金 率係雙刃劍，一方面可壓抑需求、另一方面亦提高資金成本，最終可成功壓抑通脹率，但同時帶來GDP增長率大幅下滑。 另一可行方法係減稅，例如提高個人入息稅；取消利息稅、增值稅、營業稅及增加福利開支。咁樣可刺激消費、降低儲蓄率及加強內需動力，步入OECD國家式經濟，即國窮民富，而唔係家陣的國富民窮。加快第三產業發展速度。 今年起中國經濟下行形勢已出現，製造業信貸風險及房地產信貸風險在度上升，形成內地銀行在貸款方面自動收緊，進一步影響GDP增長率。 [ 本帖最後由 羊仔 於 2008-9-5 09:41 編輯 ]

Share this:

火煋人

人生中三次好機會 2008年09月05日（星期五） 9月4日，周四。恆生指數跌195.58，收20389.48；成交564.61億元。9月期指跌303點，收20240點。富士康（2038）跌3％，收5.12元；裕元（551）跌2.8％，收20.8元；中國遠洋（1919）挫6.2％，收12.4元；中國交通建設（1800）大跌14％，收10.74元，因花旗集團建議賣出。 滬深三百指數升0.23％，收2251.15。 英國樓價8月份較去年同期下跌12.7％，係1983年以來最大跌幅，較7月份跌1.8％。英倫銀行唔減息，英鎊企穩1.7821美元；英國物業前景展望繼續下滑。我老曹最後一間英國樓賣了大半年，終於忍痛照買家價賣掉，9月3日成交矣。 德國工廠訂單7月份較6月份回落1.7％，德國第二季GDP已收縮0.5％，如第三季仍收縮就確認衰退。歐羅進一步回落至1.449美元，估計短期內失守1.4美元。德國汽車銷售8月份下降10％，零售業連跌兩個月；歐羅區CPI升幅已回落到3.8％（7月份4％）。 油價回落到109.34美元，9月9日OPEC開會，相信仍無意減產，估計年底前可見100美元一桶。 花旗推介中國電力（2380），估計今年每股獲利12.9仙，減21.4％，P/E十五點一倍，目標價2.9元；中材股份（1893）估計今年每股獲利20.8仙，升6.3％，P/E二十二點九倍，目標價7.35元。 二線股尋寶遊戲開始 花旗認為全球信貸收緊，令大部分商品及製造業股回落，情況仲會繼續六至九個月。農產品全球仍有大量未使用的Capacity，俄羅斯仍有八千六百萬英畝的集體農莊，生產力好差；只要農產品有價，私人企業可把呢D接近被荒置的農莊企業化，產量可以在家陣的四倍及令大量被荒置的土地恢復生產。俄羅斯擁有全球7％可耕地，甚至超過全中國，人口只有一億四千二百萬，得中國11％。中國糧食可自足自給，如俄羅斯全力發展農業，甚至以沙皇時代的生產力，佢的農產品仍可養活全球五分一人口。如以先進技術去管理呢D農莊，應可養活全球二十億人口，只係在共產政權下，先令呢個一百年前的農產品出口大國，變成民不聊生。俄羅斯亦有豐富的石油資源同礦藏量好驚人，只係一直以來冇好好開採。當然仲有非洲呢個仍未被大量開發的大洲。 地球出現糧食、能源及礦產唔夠，只係因為一般國家政府無能，令國民無法達到溫飽。例如三十年前的中國。 7月份仲有唔少人睇油價可見200美元，呢種分析令油價在7月15日見147.27美元，其後回落27％，在本周三見108美元。沙地阿拉伯在7月份仲增產，美國消耗量在今年上半年每天減少八十萬桶，係二十六年來首次。結果令7月15日至今對沖基金及石油Traders在期油市場蝕了超過200億美元，呢個係近日油價下跌的理由，過去七星期係石油好友大屠殺期。 7月15日起美元開始「帝國反擊戰」並迅速收回失地。商品價格大幅回落，反而金融股上升超過16％。 摩通認為印度快進入嫁娶月，估計未來金價可回升11％，即由8月15日772.98美元升上850美元。 繼匯源果汁（1886）後，金威啤酒（124）股價一度急升，睇來二線股尋寶遊戲在今個月開始。今年5月我老曹建議大家Sell in May and walk away。9月份建議參加尋寶遊戲，因為二線股經過十個月大跌後，未來下跌空間唔大。 1984年11月19日Amgen Inc.（在納指上市）每股3.63美元，2005年每股85美元；加上過去二十三年五次拆細，即1984年每股股價只有9美仙；今天呢間公司已成為市值1000億美元的藥物股（生產香港風濕痛症、關節炎、貧血及牛皮癬等藥物），二十三年內股價升幅接近一千倍！在1984年1萬美元投資可變成1000萬美元；呢個就係二線股吸引力。 科網股泡沫？Done！滬深A股？Done！石油泡沫？Done！玉米及小麥泡沫？Done！過去八年幾多人連件T恤都輸埋？但有一點可以肯定，在世界上遲早又有另一泡沫出現，只係唔再係CDO、金磚四國或房地產（一個泡沫之後，二十年內好難在同一行業出現另一個泡沫）。有人認為繼金磚四國後係FIG（法國、意大利及德國）；因為中國及印度中產階級冒起，佢地鍾意法國時裝、意大利手袋及德國汽車，令法國、意大利及德國品牌公司利潤暴升！ 印尼計劃將利率提升0.25厘至9.25厘，去支持印尼盧比。上月CPI上升11.85％（7月份升11.9％），6月份批發物價升34.7％，係九年內最高，政府目標通脹率只係6.5％至7.5％；加上棕櫚油由3月份至今回落44％，至1303美元一噸，7月份出口升25.5％（6月份出口升34.9％）。 刺激經濟計劃長遠有害 中國計劃明年採用新VAT系統，令八百萬間零售公司可用固定資產投資代替畀VAT稅，呢個目的係刺激零售業投資固定資產，協助零售業拓展市場。 繼日本8月26日將經濟刺激計劃提上議程後，9月1日韓國政府亦宣布總額190億美元減稅措施。英國政府9月2日推出一籃子計劃拯救低迷的樓市。白高敦計劃向石油公司抽稅去補貼英國房地產，可惜暴利稅仍未在國會通過，油價已大跌。計劃中向貧窮家庭提供一次過100英鎊燃油補貼資金唔知由邊度來？其次油公司批評石油暴利稅打擊計劃中的1000億英鎊能源工業投資，可能棄英國而移到別國（家陣英國係對外國能源公司最開放國家之一，呢個稅項未必令石油公司離英國而去，但打擊投資欲就幾肯定）。佢提出用10億英鎊去協助第一次買樓者及挽救負資產者亦唔獲好評。自由民主黨領袖貝萊格認為政府係行賄市民在跌市中置業，結果可能害死佢地！睇落白高敦幾麻煩。 法國亦向歐盟各成員國提出一項應對經濟下滑計劃，主張歐盟採取擴張性財政政策同減息；9月12至13日在尼斯舉行的歐盟財長會議上提出；加上今年6月份美國政府為刺激經濟，而寄出780億美元支票的1680億美元刺激經濟計劃，似乎刺激經濟方案已成為西方政府的「白花油」（能醫百病）。西方經濟（尤其係美國）最大問題係消費太多，儲蓄太少；在咁的失衡經濟結構下，政府繼續刺激消費，只能推高一、兩季GDP增長率，時間一長，政府赤字進一步上升，令利率上升，對長期經濟負面影響仲大。日本政府在過去十五年刺激經濟方案一再推出，結果只令日本政府負債纍纍。 依家連中國亦有刺激經濟方案，作用又點？依家中國GDP增長率咁高仲去刺激經濟，又係未對呢？ 上周萬科上海樓盤促銷好成功。8月30及31日共賣出一百七十六套房屋，收入2.68億元，但已唔及今年元宵節時，上海九五折賣樓，八小時內共賣了一百七十幾套，金額2.57億元。 萬科在上海的金色雅築，去年9月14日開售至今已係第三次減價。結果不但引來退房糾紛，亦令其他買家擔心；一D開發商被迫發「保證宣言」。以1997至2003年香港樓市經驗，在樓市調整初期應先下手為強，最先減價的發展商，最後反而成為最強，唔減價的發展商最後被迫賤價拋售。 GDP依賴股樓好危險 上海中原研究諮詢部經理馬冀表示，近期市場冷淡局面係受到上海政府決定在五年內建四千萬方米經濟適用房同廉租房的政策影響，令中下價樓面對好大競爭。呢個政策去年9月27日已宣布，令普通老百姓開始觀望。醒目的發展商在上述項目未推出市場前，就提早減價賣樓；估計明年經濟適用房推出後，上海樓市好似香港咁出現兩極化（即豪宅繼續升值中下價樓下跌或停滯不前）。 衛明不動產智庫負責人蔡為民更悲觀，認為上海樓價未來跌幅達到20%至25％。復旦大學房地產研究中心主任尹伯成比較樂觀D，認為跌幅只有15%至20％。 萬科在上海八個樓盤進行中秋促銷後，9月3日把杭州旗下四個項目共二百二十六套房源價格下調，推出為期十二天的青年置業計劃，最低達七五折。包括白鷺郡東、白鷺郡南、魅力之城及逸品閣。由9月3至14日止，大部分係九十方米以下，折扣係七五至八折。9月3日一天內售出一百零五套，佔全部推出套房46％。 南京兩個項目亦減價，最低折扣達到八折，即金域緹香七十方米型及萬科紅郡五十方米型，前者由11500元一方米降至9200元；紅郡一套五十平方米房子賣45萬元。 萬科係內地房地產業界領軍大佬，一舉一動對中國房地產發展影響好大，內地房地產老總唔少平時口口聲聲話要學習「萬科好榜樣」。點知去年房價狂飆時，王石提出「拐點論」卻冇人聽，因接受唔來；呢次萬科在全國大幅調整樓價，其他地產老總卻認為萬科點會咁樣？所謂學習萬科只係一句空話；內地房產老總仍唔接受樓價可升可跌！仲希望「九金十銀」，反而萬科卻搵機會大量套現。 去年上海市發言人表示，上海證券業及房地產業等全市GDP增長貢獻係19％，今年上半年對GDP增長貢獻就係零，地產更係負0.4％。 任何大城市GDP如過分依賴股市及樓市係好危險的事，好似1990年日本東京、1997年7月香港、2007年紐約及倫敦。如把樓市泡沫吹得太大、投機太嚴重，一下子將樓價炒得太高，經濟繁榮完全依賴股市及樓價上升拉動。一旦呢個泡沫被刺破，往往係好難醫番，日本就係一個最好例子，甚至香港到2003年依賴自由行、CEPA及內地公司大舉來港上市。去年香港經濟繁榮仍唔及1997年，家陣又再面對港股直通車泡沫，內地經濟基礎未穩，更加唔應該畀股市及樓市泡沫過分吹大，以免尾大不掉。 日夜磨練累積財富 中國經濟增長三大引擎係出口、消費及投資。依家出口放緩已好明顯，中國採購經理指數7月份係48.4，係2005年1月份面世以來首次低過50，代表中國製造業已陷入衰退，工業生產增長可能降至14％。明年中國GDP增長率有可能低過8％，因出口新訂單指數三個月內由58.9跌至46.7。北京及周邊城市GDP佔全國8.4％，為了奧運其中三分一生產停頓兩個月，令中國全年GDP少0.2％至0.4％。航空乘客流量亦出現負增長、汽車銷售不景及家用電器滯銷，令中國境內消費出現下滑，內需新訂單由4月份65點急降至7月份46.2，相信同財富效應消失有關。家陣增長有賴政府投資，最近推出「一保一控」政策，採取「反周期性措施」，即中國三大增長引擎只有一個仲如常運作。 2001至06年美國樓市泡沫超過1990至2000年科網股泡沫，令美國經濟衰退不致出現，樓價上升所產生的財富效應，令美國經濟一直保持繁榮。2006年7月起樓價回落後第一個利淡訊號係Countrywide Financial在去年8月6日申請第十一章（破產保護令），那時股價已回落85％。其後Lennar Homes宣布由2005�06年獲利5.937億美元，轉為2006�07年蝕19億美元。銀行手上CDO出事，令貝爾斯登利潤下降89％、花旗回落83％，同埋美林蝕了80億美元。今年7月15日美國證監宣布唔准十八隻金融股「裸空」，令金融股出現反彈。相信下跌第一浪完成，進入一段日子平靜期，但唔代表危機已過去。 哥倫比亞商業學院教授Bruce Greenwald認為，投資理論鼻祖格拉咸及多德的理論，寫在1934年美國經濟大蕭條之後，呢類大蕭條好似洪水（千年難得一見），股聖畢非德用佢的理論在六十及七十年代投資美股，正好趕上美股1982至2007年的超級大牛市。家陣泡沫一個接一個出現，甚至股聖亦只有持住280億美元現金而無處落手；家陣的世界已係對沖基金天下，投資係點樣估計未來而唔係賤價買入優質股（依家仲有幾多優質股賤價出售？）。如賤價買了優質股，持住十年八年一樣可以唔升反跌。格拉咸及多德生活的時代，股票市場仲係散戶天下，基金接近唔存在，所以較易搵到滄海遺珠。 今天股市已係基金天下，佢地每天二十四小時去留意全球股市找尋投資項目，一般散戶搵到滄海遺珠的機會有幾大？另一理論由Barpost Group負責人Seth Klarman提出，點解云云眾生中只有股聖能充分掌握價值投資法，大學入面咁多教授反而唔得？如人人能夠掌握，股市唔係變成有效率市場，結果你持咩都冇分別？ 日本股神是川銀藏話，每個人終其一生，都會碰到三次大好機會，只要把握其中一個已可衣食無憂；如能把握其中兩個可成為小富；能三個亦把握到，便可大富大貴。可唔可以及時把握，就要睇平時努力與身心磨練矣。 磨練係咩意思？就係學習理論然後與實踐結合；加上日夜思考的訓練，形成在重大決斷時只憑直覺便可決勝（呢個直覺唔係天生就有，而係日夜磨練的結果。一如奧運跳水員，跳水姿勢咁優美背後係日夜咁訓練）。唔係在股票賺錢時快樂、股票跌價時沮喪。我老曹1969至73年曾快快樂樂地在股市賺錢，以為在股市中賺錢好易，面對1974年超級大熊市，差一D被淹沒。好彩當年後生，從此痛下苦工，明白股票的錢唔係咁易賺。過去三十三年學曉在牛市中累積財富，在熊市中持盈保泰。1981�82、87、97及2007年10月熊市，都算我老曹幾好彩。 跌市要睇開D先有健康 累積財富三大層面；一、匯市；二、股市；三、房地產，背後都係日夜磨練。 1967到74年對我老曹來講係水過鴨背（賺得快、蝕得快）；1975到2007年係財富累積期。可唔可以好似是川銀藏咁面對人生第三個大好機會時，再將財富翻兩番。 一生人有三次大好機會，因此唔好因一次跌倒而放棄未來兩個。 許多人認為健康的人先至快樂。根據Mohammad Siahpush博士領導的俄馬哈市內Nebraska大學醫療中心，向一萬個成年人由2001至04年追查結果卻相反。唔係健康令人快樂。而係快樂令人健康。研究報告在9月份American Journal of Health Promotion發表。過去佢地每四星期向接受調查一干人等問過去日子健康情況及係未快樂。發現佢地快樂之時健康狀況最佳；情緒低落時易病。因此Siahpush建議，經常保持自己處於快樂心態可長保健康，咁樣較食保健產品仲有用。朋友，在跌市中你快樂嗎？其實只要一切睇開D，做人就快樂D，健康亦好D。 [ 本帖最後由 羊仔 於 2008-9-5 09:56 編輯 ]

Share this:

火煋人

可口可樂「以華制華」 2008年09月06日（星期六） 9月5日，周五。恆生指數跌456.2，收19933.28；成交652億元。9月期指跌547點，收19693點，低水。恆指20000點失守，向去年 8月17日低位19386點進軍。呢個水平係港股直通車計劃未傳出前水平，技術上睇有強大支持。過去唔少年份，5月份都係股市高潮，因此有Sell in May之說；9月份係一年股市的低潮，所以有Buy in September。9月通常都係入貨月。 今天新鴻基地產（016）跌6.1％，收95.1元，因高盛降其評級及將香港GDP增長率由5.2％降至4.2％、明年由5％降至4％；長江實業 （001）亦跌5.7％，收105.1元；信置（083）跌5.5％，收12.28元；其他好似鞍鋼（347）跌7.4％，收8.56元；馬鋼（323） 跌3.5％，收3.01元。因淡水河谷（世界最大鐵礦砂生產商）要求加價13％，以便同澳洲鐵礦砂售價睇齊。 金威啤酒（124）跌16％，收0.88元，因半年蝕了2470萬元。 滬深三百指數跌3.01％，收2183.43；日經平均指數亦跌2.8％。MSCI亞太區股市指數跌2.1％。 今年MSCI亞太區股市指數跌26％，跌幅係標普五百的一倍。去年10月至今全球股市冇了15萬億美元市值。 代表一百一十四隻亞洲區原材料股的指數本周跌12％，係1995年以來最大跌幅；唔知羅傑斯呢位商品市場大好友有咩感想？ 匯源果汁（1886）成為可口可樂併購對象，對業界來講有D意料之外。雖然匯源品牌在中國果汁市場佔第一位，100％果汁佔中國純果汁市場46％，以及中 濃度果汁佔市場39.8％，但以可口可樂國際品牌旗下的「果粒橙」和「酷兒」兩大品牌，也佔果汁飲料25.3％，拋離統一（220）在內地包裝果汁市場的 22.1％佔有率。呢兩年原材料和經營成本上漲對整個企業帶來好大壓力，呢刻可口可樂如發動攻勢贏取市場佔有率第一位根本冇難度。點解可口可樂唔發動攻 勢？一來怕8月份出台的《反壟斷法》，但更怕逼虎跳牆，令匯源與統一聯手對付可口可樂攻勢，咁就有排搞。 好多對沖基金就快玩完 入股66％匯源令佢絕唔會同統一聯手；反而同可口可樂「果粒橙」和「酷兒」兩大品牌合作，令統一心慌慌，甚至大大削弱統一在內地的市場佔有率。咁樣一來中 國果汁市場便由可口可樂旗下三大品牌（匯源、「果粒橙」和「酷兒」）分享，其他品牌再無法入侵中國純果汁市場矣。由於可口可樂只佔匯源66％，令中國《反 壟斷法》鞭長莫及，佢花百多億元便可壟斷中國果汁市場，你話抵唔抵先？ 最慘係其他經營者好似統一及康師傅（322）等，佢地未來在中國果汁市場的佔有率，將進一步下降，甚至被迫退出；可口可樂呢一招「以華制華」用得極之巧妙，不愧係國際的巨無霸。 中國8月份CPI估計在6％或以下，相信今年4月份CPI升幅8.5％已係高峰；估計8月份CPI升幅為5.6％，漸接近人行目標4.8％。 美國作家理查．奈在《華爾街美林》一書內話，在牛市中投資股票，既唔使艱苦工作，亦唔使用太多智慧，對別無所長的群體來講，係幾吸引的賺錢手段，而唔知道投資行業摧毀性原因，一如良家婦女淪為娼妓原因一樣。一旦熊市來臨，投資市場露出猙獰面目時，佢地就恨錯難返。 過去百幾年華爾街內的炒手都係極其聰明的人，在牛市中呼風喚雨，卻在熊市中一敗塗地。只有嚴守止蝕唔止賺的人先會在自己蝕了15％至20％時退出，呢D仲算聰明，但自以為好叻的人往往聰明反被聰明誤；不過，止蝕講就易、做就難，家陣有幾多人已止蝕?! 次按危機後20％華爾街員工已冇了份工，但轉行並唔易，因為有邊一行好似金融業咁高薪厚職？過去年薪數百萬美元的人點搵工？唔少人從此長期失業。 日本經濟自1990年起日落西山，政府多次推出刺激經濟方案仍未見效，令政府財赤成為OECD國家中最高。證明透過增加政府開支去刺激經濟反而扼殺了公眾人士的消費，最終搞到經濟半生不死。 八十年代日本政府抗拒日圓升值而濫發鈔票，造成股市同房地產泡沫至今仲無法完全復元。 美國經濟2000年科網股泡沫爆破，聯儲局聯同白宮利用減息、壓低美元匯率及退稅，令美國經濟2003年復甦，方法同八十年代日本政府同日本銀行有咩分 別？去年次按危機後至今已一年，一樣冇妥善的方法去處理。今年第二季GDP上升3.3％，擔心呢個只係回光反照，係政府寄出支票最後一次鼓勵消費，踏入8 月份已疲態畢露。疲弱勞工市場已令零售業增長放緩，引發美股大幅回落。 歐洲雖然第二季GDP收縮0.2％，但央行堅持唔減息保持4.25厘，央行估計今年GDP升幅只有1％及明年1.2％。通脹率3.8％仍距離目標2％好遠。歐羅見1.4385美元係1月22日以來最低。 由於估計美國經濟停滯不前及歐洲進入衰退，美國未來GDP增長率得2％，而歐洲可能唔足1％，令歐羅今天跌至十一個月最低，同時令商品價格全面回落。 道指周四回落3％，見11188.23，美國銀行一天之內下跌7.2％，Caterpillar下跌5.6％。大藍籌股下跌速度幾可追及二線股。市值 140億美元的紐約對沖基金Atticus Capital被傳玩完，但呢間公司CEO否認。更多對沖基金玩完相信只係時間問題，依家只係捱得一時得一時。 油價由7月11日147.27美元回落到家陣105美元，跌幅達27％，其中超過6％在本周回落。OPEC上月估計明年全球石油需求升幅只有1％，因為歐 洲經濟放緩緊。1986年初油價每桶26美元，1986年3月已跌至每桶10.25美元；1997年10月油價每桶23美元，亞洲金融風暴後1998年 10月油價每桶11美元。油價在極短時間內跌50％係唔令人奇怪的事；Thomson路透社估計年底油價見91美元，以及在2010年前見82美元。今年 7月份我地見到的應係另一個泡沫。 標普GSCI指數（代表二十四種原材料）7月3日由893.86至今回落25％；代表商品熊市7月份出現，十分相信我地見到的又係一個泡沫。 鋁價由2月至今回落44％；米價由4月至今回落24％；大豆由7月至今回落26％。 上述一切都在度話畀大家知，商品價格如唔係見頂相信亦已進入中期性調整。 英國樓價可以有序回落 Mitsui OSK（日本最大運鐵礦砂船隊）跌至七個月新低（今天再跌5.7％）；Nippon Yusen KK（日本最大船隊）今天跌4.2％；Kawasaki Kisen Kaisha（日本第三大船隊）跌5.4％。波羅的海指數5月份至今跌幅接近一半。東京Okasan Securities認為投資者應避開航運股。 南韓政府在度努力支持南韓圜匯價。周三及周四兩天中央銀行已用了210億美元，佔總外匯儲備8％（7月份動用100億美元、8月份動用40億美元）。今年 南韓圜回落20％，見1130兌1美元，美林證券估計今年GDP增長率只有4.3％及明年3.8％。今年外資已拋售300億美元南韓股票，下周大量債券到 期，估計央行會加息去支持，因為手上外匯儲備漸跌至危險水平。南韓短期外債約1700億美元，點樣去應付外債到期？真係令人費煞思量。 美國8月份連續八個月失業率上升，家陣失業率已達5.7％。消費（佔美國GDP三分二）在7月份扣除通脹後出現四年內最大跌幅。美國消費者開始減少消費。呢個訊號好壞。 日本企業第二季減少資本開支6.5％。Fitch計劃把今年日本GDP增長率降至1％。日本企業第二季純利下跌5.2％（製造業跌11.7％，非製造業跌0.2％）。 歐洲央行主席認為歐洲經濟活動減弱，相信到2010年才能穩定落來。歐洲央行收緊銀行條款以免銀行濫用借貸，引發歐洲同英國銀行股大跌。條款收緊後金融機 構比較上難從銀行方面取得廉價資金（以證券作抵押成本上升）。英國HBO跌7％、柏克萊跌7％、萊斯銀行跌5.7％、UBS及其他地區性銀行股價亦出現較 大幅度回落。 Fifth Third Asset Management接受彭博訪問時說：「資本主義的齒輪已面臨停頓。」2005至07年上半年大量短期貸款令資本市場出現泛濫。隨住次按危機出現，資本 市場出現退潮。各金融機構除了為CDO等大幅撥備5000億美元呆壞賬外，摩通分析員Alex Roever認為未來十六個月，有最少7870億美元浮動利率債券到期並要求兌現，令明年銀根緊上加緊。 英國白高敦希望透過為首次置業者提供16億英鎊協助去頂住市值4萬億英鎊的樓市唔跌，可以咩？英鎊過去一年已回落15％，最近一個月回落5％，樓價過去一 年已回落11％。最近英國財政大臣戴理德更認為英國將進入六十年內最差的經濟環境，相信佢言過其詞。戰後英國推行每周三個工作天制，結果到了七十年代通脹 率達25％，1980年代初期失業人口達三百萬人，成為歐洲經濟病夫。鐵娘子上台後加上北海油田投產，八十年代開始英國經濟享受了二十多年繁榮期。 今天不但英國樓價超貴（去年最高峰時係1995年200％），英鎊匯價偏高，令後生的英國夫婦根本買唔起樓，漸漸演變成政治問題，但唔係冇得救。例如畀樓 價有秩序咁回落，以及畀英鎊匯價逐步回落，講到尾英國至今仲係歐盟中表現最好的經濟體系，亦係東歐人、俄羅斯人及中東人最鍾意居住的歐洲國家之一，情況較 家陣的日本樂觀。 內地房地產市場低迷，價格下行，斷供風波不絕於耳。國泰君安梁紅麗指出，家陣破產只係小型房地產，即使牽涉銀行融資，銀行收回的土地資產價格亦唔會大幅縮 水。加上銀行風險管理體系趨完善，對房產商發放貸款時已更嚴格，最多係呆壞賬增加，但唔會影響整體銀行業績，更加唔會影響內地金融安全性。近年商業銀行風 險管理水平已大為提高。以招商銀行為例，房地產貸款只佔全部貸款比率5.81％；興業銀行房地產貸款只佔總貸款14.01％，可以講係好安全。資料顯示日 本1992年地產貸款佔銀行總貸款35％；1996年印尼地產危機前，地產貸款佔總貸款20％；1998年新加坡地產貸款佔總貸款30％至40％。認為上 述問題大家唔使操心。 上海市中心最大經濟適用房項目在徐匯區華涇地區8月15日已開工，並計劃今年年底完工，吸引唔少低收入的困難家庭關注。估不到我老曹亦有條件入住呢塊交通 方便的寶地。成個專案佔地十三萬七千九百方米，地積比率二點五倍，提供住宅三十一萬方米，其中60％係經濟適用房、40％為商品房、綠化率35％及可建三 千四百套經濟適用房，其中四十五方米者佔18％、六十方米者佔77％及七十五方米者佔5％。據了解，楊浦江灣、松江泗涇、寶山顧村、南匯周浦及閔行浦江等 交通比較方便，生活配套設備相對完善的地區今年內動工。上海市首批一百六十萬方米經濟適用房將全面開工啦！ 最先起源在十七世紀荷蘭。十八及十九世紀由英國發揚光大，到二十世紀由美國繼承的體系係：一、航運方面能力；二、環球化發展；三、商業與專業力量相結合而 稱霸全球。英國那時再加入良好的公務員制度去維持商業上的操守。維護個人利己主義，唔受利他主義所影響。同時有良好的社會組織，畀人們發揮創新精神，對良 好事物的保留，畀人們可以擁抱理想。 改造利己主義 過去幾百年上述體系曾面對西班牙帝國的興起，其後係法國拿破崙式帝皇主義，跟住係德國的納粹思想、日本的軍國主義、印度的Mughal帝國及中國滿清皇 朝。第二次世界大戰後自由、民主及開放體系又面對馬克思主義的重大挑戰，人們一度質疑呢個制度；近年伊斯蘭教的挑戰，甚至中國的和平崛起，又令呢個制度面 對考驗。 進入二十一世紀，呢股源自十七世紀荷蘭的體系，由英國同美國發揚光大，係未到了窮途末路，最後被取代或改造？睇番人類歷史上有幾多文化及制度最後被取代。 源自荷蘭的市場經濟加自由民主制度，會唔會有一天被近年冒起的中國同印度文化所改變，再無法保持科技上的優勢，繼續成為全球最有創見的經濟？例如第二次世 界大戰時的德國納粹精神（強調紀律及服從，令整個社會井井有條）及日本的軍國主義（全國人民服從日本天皇而建立強大的軍事帝國）？過去三十年中國的一黨統 治反令市場經濟獲得更良好發揮機會。伊斯蘭教派支持下的新民主獨裁制度，似乎亦較目前西方的自由民主制度更能適應現代社會。 近年日本及台灣，因全盤接受美式自由民主制度，令經濟停滯不前；反之中國的一黨專政加市場經濟制度卻令經濟欣欣向榮。令人質疑英美的維護個人利己主義制度 是否有被改造必要？由伊斯蘭教國家或中國的新民主獨裁制度所取代？又或者上述只係暫時性，最終仲係源自十七世紀荷蘭，依家英美實施的自由民主市場經濟制度 先最適合人類？但過分維護個人利己主義，正漸漸將人類社會推向兩極化。今天英美兩國經濟面臨走下坡，美國未來總統如係麥凱恩已年紀太大而且不獲中產階級支 持，奧巴馬不但經驗唔夠，其政治主張更似半個馬克思，好似向富人抽稅可令美國經濟重返1982年之前的六十及七十年代咁，明年英美實在幾令人擔心。

Share this:

火煋人

兩房被「託管」而非「接管」 2008年09月08日（星期一） 9月7日，周日。是日開Show。美國宣布計劃「託管」兩房，形成周一港股好亂。商品價格繼續面對unwind，資金繼續流向美國政府債券，令上周CRB指數跌5.2％，除豬肉同鈀金外，其餘接近全面下跌。10月期油見104.09美元，周二OPEC開會，如果唔減產，估計油價可見100美元一桶。銅價跌8.2％，見6895美元一噸；鉛跌9.1％、白銀跌8.6％、大豆跌11％、小麥跌5.4％。商品價格習慣boom &bust周期，由boom走向bust，真係眼都唔使眨一下。從MACD睇商品價格走勢7月中起進入回落期，起碼中期睇淡（長期睇好係他日之事）。美匯指數長期下降軌已被打破，中期睇好（長期係未睇好又是另一回事）。 兩房普通股股東損失慘重 美國樓按危機未來兩年將繼續傷害美國就業率，進而影響消費市場。各位應知道，油價回落唔係治經濟良方（2001至07年油價上升而非回落，因油價回落而睇好經濟者係冇做功課）。甚至通脹率受控制亦唔係乜野好消息，仲記得1997年至2003年香港出現賤物鬥窮人的時期嗎？ 兩房事件將令本周美股大幅波動，投資者仍未能搞清楚「託管」和「接管」有乜分別？我老曹意見係大家只宜觀望，不宜沾手。呢個美股熊市至今只有十個月，跌幅25％，只係所有熊市跌幅的平均數，未到認真抵買水平。 標普及穆 再降低「兩房」優先股評級至最低投資級，因為政府唔肯「接管」兩房，令不穩定因素繼續存在。9月6日美國眾議院金融服務委員會主席證實財長保爾森計劃本周行使7月國會授予佢的一項特別權力——「託管」房利美和房貸美。如唔挽救兩房，將令國際投資者對「準國有企業」失信心，而引發兩房保證的美債面對大拋售潮。呢次美國政府係「託管」而非「接管」兩房，普通股股東權益將蒙受嚴重損失；至於優先股及債券的情況本周一公布詳情，估計政府以可換股優先股方式向兩家公司注資，並要求其他大型機構亦跟隨注資，透過增加資本去阻止兩房破產。此舉對兩房債券持家有利、普通股股東不利，目的係希望日本同中國等兩房債券大持家停止拋售。兩房優先股最大持家係美國各大銀行及保險公司；房利美優先股市值已由去年217.3億美元急跌64％，至最近的78.7億美元；房貸美則由141億美元回落61％，至54.4億美元，虧損已十分大；普通股價值更可能所剩無幾，估計虧損最小係兩房債券投資者。兩房事件後，未來兩年美國人借錢買樓更倍感困難，例如ARM（只畀利息唔供樓計劃）未來將很難再實施矣。 好多人認為，今天美國經濟類似1967至82年。我老曹1967年出來做事，當年全球經濟正由低通脹期走向高通脹期，利率一步步升到1981年22厘。1981年起利率及通脹率開始回落，最低係2003年6月1厘，2003年CPI升幅似有若無，利率2006年4月又回升到5.25厘，近期再跌到2厘；通脹率在今年8月見頂機會十分大。 翻查歷史，2007年10月同1907年1月十分相似。1906年三藩市大地震及大火令唔少建築物受破壞，令美國人唔再相信房地產投資，房地產價下跌引發金融危機。1907年由JP摩根組成的財團去阻止美國銀行體系崩潰（當年美國有一萬六千多間銀行），可惜一次又一次因房價回落而令銀行繼續倒閉。1907年10月當Westinghouse宣布破產，令Knickbocker信託面對擠提，銀行同業拆息升上125厘，令道指由1907年1月的96.37一直滑落至1907年11月的53點，為期共十一個月，跌幅45％【圖】。1908年5月30日國會通過《Aldrich -Vreeland Act》，協助銀行組成National Currency Associations，股市才大幅回升。1914年歐洲發生戰爭，美國股市停市，再由JP摩根出面協助政府組成聯邦儲備局，以應付類似事件。 如將1907年改為2007年、JP摩根改為聯儲局，呢次道指會否由2007年10月11日14198.1回落到2008年9月（共十一個月）？今年9月會否係美股最黑暗時刻，同時係光明的開始？美國今天有聯儲局，估計跌幅唔再係45％，極有可能在10000點至11000點之間出現支持。 壞消息足夠支持Buy In September 美國唔同日本。過去日本經濟十三年無起色，理由係1990年日本政府無即時處理問題；美國2007年8月起已開始處理次按危機，問題總有解決的一天。 今年3月18日恆生指數由20572.92回升，當時我老曹認為係熊市二期中最大一次反彈而非牛市開始，5月建議「Sell In May」。9月5日恆指跌至19708點，已證明上述分析正確。技術上睇，2007年8月17日低位19386點有支持，目前已有足夠壞消息去支持「Buy In September」論。估計恆生指數在19386點附近出現另一次反彈，上阻力在21600點，如19386點失守才止蝕。今時今日千萬不可在漫天風雨中等待黎明，以免死了都未天光。從Libor（倫敦銀行同業拆息）睇，全球金融業仍在惡化，無論歐羅或美元拆息均在上升而非回落。去年10月至今參加「bargain-hunting」行動的投資者，結果發現愈買愈低，如今年5月唔出貨，依家回望又係另一個頂；今年7月不出貨，今天回望又變成另一個頂。博反彈目的係訓練自己的膽量同分析能力，尋找對象是「動力股」（momentum stock），而非優質股。 股票市場內80％係輸家，只有20％係贏家。成功投資策略係：一、何時買入？二、買乜野？三、評估自己承受風險的能力。四、訂下止蝕位。五、目標達到立即回吐。上述係牛眼投資法。 美國8月份失業率6.1％，係四年半內最高，因製造業失去六萬一千個職位，證明製造業是頂唔住美國經濟回落的壓力。 格蛇認為聯儲局唔係「魔術銀行」，不能變走美國次按危機！我老曹相信，9月16日聯儲局唔會加息，因美國並無條件加息（上述唔係好消息也）。 去年次按危機，前為大學教授的聯儲局主席（佢有理論卻冇實際經驗）將美國金融市場搞到一塌糊塗，目前情況較2000年科網股泡沫爆破時更甚。貝南奇因缺乏經驗，太急於減息，結果令美元匯價回落，令金融市場出現另一泡沫（原材料、黃金同石油泡沫）。可惜呢個泡沫太細，無法抵銷房地產泡沫爆破，最後連自己呢個泡沫亦爆破，金價及油價分別在今年3月及7月見頂。俄羅斯派兵入侵格魯吉亞，令210億美元資金離開俄羅斯，引致盧布匯價不穩，9月3日同4日回落2％；早在8月8日至15日俄羅斯已拋售35億至40億美元黃金同外幣去支持匯價。俄羅斯股市今年狂瀉30％。俄羅斯8月份通脹率升上15％，Alpha銀行認為9月份CPI升幅13％已係最樂觀估計。為打擊通脹，俄羅斯在國際市場狂拋資源換取外幣，近日令資源對沖基金出事，例如Fortescue Metals Group上周再跌7.3％。 貝南奇處理失當，令今年加添埋資源股泡沫爆破、能源股泡沫爆破……米價、大豆、玉米、小麥價格紛紛急跌，我老曹估計中的「通縮」今年下半年開始降臨，全球則面對失業率上升及資產大幅貶值（賤物鬥窮人日子又再來臨）。 債券大王格羅斯上周五話，「去槓桿化」（deleveraging）線環球金融市場十分罕見，稀少程度有如在沙堆中的鑽石（萬中無一），但今年8月卻已出現！ 日本人在減少利差交易，佢地拋售澳元、紐元同歐羅，買回日圓。過去六星期日圓成為少數跑贏美元者。 全球萎縮效應剛剛開始 摩根大通估計，美國明年第四季才會加息（過去估計係明年第一季）。今年2月美國政府的1680億美元刺激經濟計劃，只能令每年第二季GDP上升3.3％，再無威力了。 連FDIC亦好快不能擔當救火隊啦。上周六美國內華達州Silver State Bank of Henderson成為今年內第十一間被接管的銀行；該行有20億美元資產及17億美元存款，7月份核數委員會董事（麥凱恩個仔）宣布辭職。因FDIC只保證10萬美元以下的存款或退休人士25萬美元以下的存款，估計該行約2000萬美元存款不獲保證。該股股價去年至今已跌了97％，停牌前56美仙。再多幾間銀行出事，便連FDIC自己亦冇晒蚊年矣。 我老曹同意大摩羅奇的睇法：全球性萎縮效應只係剛剛開始或只完成三分一，仍有三分二衰野在後面，因美國GDP 72％來自私人消費。呢個市場今年8月開始回落，我地正進入信貸危機第二階段，未來一年將有愈來愈多金融機構出問題。過去一年政府仍可制定政策協助，或藉中央銀行出手干預或推出刺激經濟計劃。隨著去槓桿化出現，一般人開始感受到槓桿的殺傷力，衍生工具市場進入萎縮期。艱難歲月依家才開始，雖然唔係世界末日卻有排捱。FDIC已用去7.89％資金，未來接管銀行的能力愈來愈弱，加上兩房被「託管」，線冇兩房協助下，美國人置業更困難，即美國樓市在可見將來都不能止跌回升。前大摩策略員碧斯目前管理Trascis Partners今年亦虧損10％，因3月份佢睇好美股。佢相信美國房地產會線未來三至六個月轉好，意見同羅奇相反。 美國今年首季為收購合併而提供的資金約500億美元，較去年同期少75％。金融機構不但須為修補資產負債表而大舉集資，同時亦面對生意大幅減少，令損益賬亦極之唔好睇。金融股前景如何？ 美國兩房一直為5萬億美元樓按提供貸款或保險，到今年第一季美國已有八百萬業主陷入負資產，而且數字在上升中。8月份美國失業率已升上6.1％。你說怎麼辦？雪茄伏估計，兩房次按虧損將超過5000億美元，令美國未來GDP增長率進入大蕭條後的最慢期。問題已唔再局限於CDS，而係兩房所保證的樓按債券亦出事。 根據wind數據統計，8月30日止內地共一千六百零九家上市公司已公布今年上半年業績，實質利潤5517.3億元人民幣，上升19.66％，較去年同期升幅減少93.83％。國金證券統計，線剔除非經常性損益後，上市公司來自本業純利增幅只有5.53％。上述增幅有賴稅率由去年同期平均27％下降到今年20.7％。中信證券測算，如今年冇減稅，企業上半年實質純利升幅唔係19.66％而是9.7％。 A股純利明年進入低增長 海通證券報告指出，今年上半年銀行業一枝獨秀，全部A股銀行股利潤達934.93億元，在A股純利所佔比重由去年上半年29.58％上升到今年同期的41.07％。二十八家金融股中，有二十七家獲利，唯一一家虧損係太平洋。天相投顧統計公司話，若剔除金融性企業，上市公司今年上半年純利根本上係負增長。金融公司今年上半年利潤大升來自「高利差」因素（貸款利率升幅遠遠大於存款利率），明年上市銀行利潤升幅唔可能再高出30％，即金融業呢條「利潤牛」亦筋疲力竭。今年表現最差係石油天然氣開採及提煉業、電力業，理由係管制油價及電價。其次係原材料價格上升，令A股上市公司整體毛利率下降。 換言之，A股崩瀉的理由係內地上市公司純利由去年高增長期進入今年低增長期，股市P/E由今年1月最高五十一倍回落到目前十七點三倍。由於明年純利升幅展望有可能進一步下滑，擔心A股股市目前十七點三倍P/E仍未見底。 除業績增幅下降外，今年上半年上市公司資金淨流入只有7023.97億元，較去年同期下降44.29％。八百三十五家公司經常性資金流較去年同期下降，六百二十五家出現負值，即出現資金流吃緊。但上市公司今年分紅卻較去年同期為高（派高息）；擔心今年部分公司面對資金不足問題，都幾大劑。8月30日止一千六百零九家上市公司共派出資金301.7億元，較去年同期的77.46億元上升366.95％。投資者已感到問題嚴重，再唔似過去咁分紅多的公司股價回升，反而變成分紅多的股份被拋售。 北京各城區九個限價房項目在10月底前全部完成公開搖號配售，共二萬七千套住房十六個項目，最低房價4500元一方米，較非限價房最少低三成，供市民認購。第一批石景山共一千七百八十四套限價房，9月1日起供市民認購。接著係西城區、豐台區、海淀區。今年北京制定八百萬方米限價房，今年內推出四百五十萬方米；最高均價6250元一方米，較周邊二手房8500元仲要便宜。睇來北京房價亦要回落了。 天津限價房亦加一把火，今年計劃供應二萬套，其中一萬七千套已進入施工期，10月底前可部分上市出售。其七個地塊，即東麗區昆俞北路建築面積十九萬零九百方米、西青區十萬零八百方米、北辰區建築面積十七萬四千五百方米、東麗區張貴莊路建築面積十七萬一千六百方米、東麗津濱大道建築面積十二萬六千四百方米、東麗區華明新家園建築面積三十二萬一千方米。 去年萬科曾提出「拐點論」，好多人唔信。今年萬科帶頭減價，令那D希望「九金十銀」者又一次失望。睇來潘朵拉的盒子已打開，內房進入多米諾效應；第一張骨牌已倒下，各位投資內房股者宜小心。內地九金十銀期已成為政府大量供應限價房的日子！ 投資係一種信仰 1979年獲得諾貝爾獎的Arthur Lewis研究英國工業革命，開始時首五十年實質工資保持不變，令工廠利潤暴升；其後工資上升，工廠利潤則不前（甚至回落）。上述就係著名的「露易斯拐點」論。內地經濟學家十分擔心中國製造業已進入「露易斯拐點」？中國二十至二十九歲最有勞動力的工人人口已由1990年二億三千三百萬降至2005年一億六千五百萬，令紡織廠、製衣廠及電子廠請唔足二十多歲的女工，建築業亦感覺到年輕力壯男工漸漸不足。擔心中國「廉價勞動力」呢項紅利漸漸失去，未來中國GDP能否繼續保持過去幾十年高速增長將成疑問。 1979年中國政府宣布一孩政策，令中國人口年增長率由1.3％逐步下降至2005年0.7％，估計到2015年進入零增長，然後負增長。過去農村過剩生產力流入城市，支持工業生產，成為中國擁有廉價勞動力的主因。上述資源將因國家推出三農政策而減慢流入城市。 丹麥思想家、存在主義先驅克爾凱郭爾認為：「你信乜野，你就點樣生活。」假如你相信明天會更好，你便堅定不移地投資，而睇唔到日益激烈的市場競爭環境。投資其實亦係一種信仰而非理性分析。2006年第三季美國樓價見頂回落，因擔心倫敦樓價步其後塵，我老曹開始賣出，今年9月3日終於賣出最後一間，結束在倫敦的物業投資。又例如2001年1月起美國減息，我老曹估計美元跌價而大手吸納黃金，然後係資源股。再加入簡單的博弈論和群眾心理，學會如何處理危機及如何在逆境中減少虧損（活著是唯一真理）。今天的投資，其實係反映你對明天的睇法，例如去年10月我老曹大量減持港股，理由就係唔信「港股直通車計劃」可以咁順利推行。今年9月係未另一入市時機？好快便知道。

Share this:

火煋人

睇清楚反彈背後玄機 2008年09月09日 (星期二) 9月8日，周一。恆生指數升860.99，收20794.27，成交684億元。9月期貨升1033點，收20726點，仍係低水。 美國財長呢次「託管」兩房的策略，只係保持兩公司在2009年12月前唔出事，將責任交畀下屆新總統，係典型鋸箭法。今天在歐洲房利美已回落59%，見2.98美元，房貸美跌至2.24美元。 至於港股反彈，「兩房」只係藉口，真正理由係嚴重超賣，上阻力21650點恐怕唔易衝破。 花旗推介恆隆（010），估計2008�09年度每股獲利2.23元，升16.4％，P/E九點四倍，目標價40.52元。興達國際（1899）估計今年每股獲利25.6仙，升6.3％，P/E五點六倍，目標價2.1元。 滬深三百指數跌2.61%，收2126.52。 人民幣投資價值回落 《廣州日報》報道，廣東省民營加外資中小企業上一百萬家，潛在資金需求2萬億元人民幣，銀行只能滿足40％資金需求，資金缺口高達1.2萬億元人民幣，95％以上中小企業仍缺乏資金，如無法獲得，擔心倒閉潮進一步惡化。中小企業唔少係勞動密集型，加上效率低，設備較大企業落後，本身財政又唔健全；睇來唔少過唔到2008年12月。 人民幣在7、8月升幅唔到0.4％，說明人民幣升值在減速中，主因係美元止跌回升。市場估計今年9月至明年8月人民幣升幅少於2％，估計一年後1美元兌6.65-6.7元人民幣，即人民幣投資價值在大幅回落中。 國家發改委在網站上發出《關於加強煤製油專案管理有關問題通知》，除神華集團煤炭直接液化專案及與南非薩索爾公司合作間接液化專案外，其他煤製油專案一律停批。一噸油要三到五噸優質煤生產，加上今年已形成一百三十二萬噸年產能，未來用於製油的煤每年消耗四百萬至六百萬噸，形成發電廠及鋼鐵廠供應不足，因此叫停煤製油專案，相信有助壓制煤價上升。 上周歐羅跌至十一個月低位1.4196美元後反彈，英鎊跌至兩年半內低位1.7549美元，上周五已止跌回升，周一借兩房事件再升多少，尤其係英鎊8月至今跌幅已超過10％，反彈係估計中事，但無損美元強勢，宜利用反彈減持。 俄羅斯股市已跌至兩年內最低水平，上周五在一天之內下跌4％，較2006年9月的1500點仲低，今年5月至今跌幅超過40％。克羅地亞五日戰爭，加上資源、能源價格下跌，令俄羅斯央行需大量拋售外幣去支持盧布（7月至今已回落9％），8月已拋售140億美元，係近十年內最大沽售。 今年波斯灣股市跌幅亦唔細，尤其係杜拜及阿布扎比上市的地產股，過去幾年該區豪宅售價狂升，今年已有人擔心過剩危機出現，加上近月油價回落，情況在惡化之中。 9月5日中國證監發布《上市公司股東發行可交換公司債券規定》徵求意見，上周六唔少人認為新政策可穩定A股市場，從周一A股表現睇來，似乎作用唔大。 上周四協助Washington Mutual Inc.長大的CEO Kerry Killinger，因決定投資WaMu項目而虧損190億美元，職位將由現任Meridian Capital Group主席Alan Fishman取代。WaMu去年至今股價跌了85％，因持了500億美元option adjustable-rate貸款（即只供利息唔供樓價的次按）。依家供款者連利息亦供唔起，WaMu急需新資金，今年4月Texas Pacific Group已泵了70億美元仍未足夠，因為加州住宅樓價跌幅在擴大。傳JP摩根大通可能有興趣收購WaMu，該股由一年前40美元到今年7月跌至3.03美元，上周五收4.27美元，較TPG 4月入股價每股8.75美元低50％以上。TPG在1990年年初曾低價購入American Savings銀行，1996年高價賣畀WaMu同時入股WaMu，呢一次似乎冇咁好彩。 港股另一隻熊腳 港股進入熊市今天相信已冇人異議。今天恆指上升只係熊市二期中另一隻熊腳，反彈之後仍將創新低，因為全球信貸危機未過去反而惡化中。兩房被「託管」事件引發股市短期反彈，但冇改變美國樓市大方向，何況美國次按危機正向歐洲同日本擴散，連新興經濟國亦受影響。今年3月18日JP摩根大通收購貝爾斯登亦曾引發股市一次大反彈，反彈之後，9月5日恆指創再今年新低。 7月至今油價已跌27％、銅價跌23％、玉米價跌30％，道指由去年10月14164點跌到今年7月15日10962點，跌幅超過20％才反彈，或遲或早道指再次失守10962點，引發更大拋售。德國股市跌幅24％、巴西29％、印度31％、香港37％、中國……都係唔好再數落去矣。 呢次財政部只動用10億美元購入兩房優先股，當佢地出現虧損時，可動用最多2000億美元去彌補損失。上述做法叫做「conservator ship」，唔係「接管」。 政府動用20億美元購入兩房優先股，如行使將佔兩房79.9％而且有10厘息（較其他優先股更優先獲派息），代表餘下普通股價值已唔多，其他優先股價值亦大幅回落。Office of Thrift Supervision監管的八百二十九間機構中，約2％因過分持有兩房普通股及優先股，其中十七間銀行資本唔符合Tier 1資本比率，必須注資。 財政部局限兩房貸款組合在明年年底不得超過8500億美元（家陣房利美7580億美元、房貸美7980億美元），2010年起每年減少10％。從上述安排可見到，保爾森認為GSE時代已過去，應該淡出市場。兩房被託管只係維持GSE聲譽，以免5萬億美元債券被拋售。另為兩房成立Federal Home Loan Banks成為終極資金提供者，令兩房在明年12月前唔使被清盤威脅。 美國樓市淡市不出三年？ 美國FDIC提供保證的八千四百五十間銀行中，約有二千五百間過度借貸，其中四百六十四間係上市公司、一百八十四間已失去貸款能力、五十六間處境好危險。周一為接管Silver State銀行需資金4.5億美元；Downgrade Downey涉及資產126億美元，依家市值已低於1億美元，以；Bank United涉及資產142億元，市值亦不足1億美元。Downey一年前股價63美元，現價3.1美元；Bank United 2006年5月股價32美元，家陣1.19美元。 次按危機出現後，其他金融機構已唔敢再為樓市提供「低」首期貸款，兩房成為少數仍大量提供「低」首期貸款者。過去十二個月，共有四分三新樓按資金由兩房提供。上述乃投資大忌！ 兩房信貸出問題，主要係美國樓市轉弱，第二季已有9.2％貸款人最少遲供樓一個月，係三十九年內最高比例（上述由Mortgage Bankers Association所作調查）。Leesburg分析員Thomas Lawler（前為房利美工作）認為，一年前好多人已睇到問題在惡化，Countrywide Financial出事後（現已被美國銀行收購）已響起警告訊號，IndyMac Financial係第二次（已由FDIC接管）響警鐘，依家係第三次。 整個挽救計劃建基於假設2010年起美國經濟復甦，再次支起美國樓價，即相信淡市不出三年？National Council of Real Estate Investment Fiduciaries Property Index（簡稱NPI）以美國五千多個商業物業為基礎，在1978年制訂，證明過去三十年美國樓市「淡市不出三年」。但麻省理工大學地產研究部在2006年已出「paper」認為，NPI指數低估了市場波幅。Watson Wyatt Worldwide分析員Mark Puloff指出，在全世界各國樓市中，樓市淡超過三年的例子好多。 在跌市中唔好魯莽，如果你已將30％資金投入股市，依家可以做的事已很少；如果你持股量超過30％，不妨利用反彈減持；如果你過分持有資源股同能源股，咁就真係唔知點教你好。漫天風雨待黎明的滋味最唔好受（1974年7月至12月我老曹已捱過），畀人係咁踩，一次已足夠。 油價200天線111.5美元失守，支持位在88.74美元，金價亦下試750.7美元支持位。長線睇好係一回事，中期性調整如冇採取行動，已可令唔少對沖基金爆煲。 內地地產行業風向標萬科，在京、滬、穗、杭等率先發起降價風暴，大多數仍採觀望態度的房地產企業才恍然醒覺！樓市已進入寒冬，問題係會否出現雪災。房地產行業一向視作暴利行業，在長達十年的房價上漲潮中，樓價由1998至2007年樓價的升幅都超過人均收入升幅。 房地產同時亦係一個資本密集型行業，唔似工廠投資十億八億元已係「大廠」，投資房地產動輒一百幾十億元。 有能者搶錢度寒冬 房地產更係一個極之依賴國家宏觀政策的行業（以香港為例，1985年4月1日起規定每年賣地五十公頃，樓價便漲完可以再漲；1997年7月1日取而代之係八萬五房屋政策，樓價跌完可以再跌。2003年9月孫九招透過勾地表，減少土地供應，樓價又止跌回升）。去年下半年，人行、銀監會出台多次加息及提高存款儲備金率政策，向開發商同購房者兩頭收緊信貸，抑制投機需求，已代表國家宏調政策「方向」，只係去年大部分人唔為意。今年1月國務院下發《關於促進節約集約用地通知》，土地閑置兩年將無償收回，以及今年上半年五次上調人民幣存款準備金率，加上股市低迷，房地產企業融資渠道除了出售房產令資金回流外，其他渠道如上市融資、發債、向銀行借錢早已此路不通。至於地下錢莊近日利率已高至60厘；今時今日唔借高利貸係等死，借高利貸係找死。 今年1月至8月仍有本港地產商回內地搵地，內地地產商則計劃來港上市招股。今年3月中國內地「地王」恆大集團IPO計劃擱置，加上近期港股急跌，連本港地產股亦被人downgrade。今時今日內房股已唔再高價搶地，變成人人搶錢．能夠搶到錢者才能度過寒冬；手上資金不足者，有可能就在一場雪災中從此倒下。去年高價搶地者，唔少企業寧可損失保證金，有D找尋合作夥伴，更多在二手市場低價易手。繼萬科之後，金地、招商等在二線城市賣樓亦大幅降價，降幅30至40％左右；亦有人搵UBS、ING、HI、大摩、麥格理等地產基金合作，向佢地轉讓50％土地權益換取資金。例如雅居樂（3383）將冠金公司30％向摩根士丹利變現2.8億元資金。 國家發改委宏觀經濟研究院副院長王一鳴認為，中國經濟面對的困難係工業化仲未完成，科技佔唔到主導地位時，已面臨生產成本大幅提高壓力。在收入水平仍離OECD國家很遠情況下，好快就遇上人口年齡老化問題，即「未富先老」。 2001到07年中國GDP以平均年增率10.5％，較過去三十年平均數9.8％仲快，踏入今年卻面對減速！外貿出口增長下降，中國仍未完成工業化及城市化，人均收入只有2500美元一年，只及OECD國家人均收入十分一；農村仲好落後，卻已面對產業轉型問題，由低檔工業走向高檔工業，由依賴製造業轉向服務業推動為主。但中國冇自主技術、冇品牌，連原料亦唔夠，點樣完成經濟轉型？ 「七年」係一個令人擔心數字，2001年7月13日北京獲奧運主辦權，到2008年8月8日奧運開幕，中國GDP剛完成一個翻（上升一倍），之後又點？ 日本首相福田康夫9月1日辭職，自民黨9月10日宣布選舉，22日開始投票（民主黨9月8日宣布選舉，21日開始投票），兩黨選舉日子咁接近係日本政治一大特色。日本兩大黨議員唔少係世襲，以自民黨在眾議院中，二百四十四個議員中，世襲議員佔一百二十六位，佔總數51.6％，形成世襲議員在黨內佔好重要優勢，由公民選出進入議會的議員反而勢孤力弱，極難同世襲政治家抗衡。在野民主黨情況好D，只有27.3％議員係世襲。 由於執政黨內51％以上議員係世襲，差唔多由幾個家族控制，如非幾大家族的子弟，很難出任首相；甚至出任首相亦無法擺脫幾大家族的影響力，結果令執政黨毫無生氣。日本駒澤大學副教授飯田泰之認為，家陣由幾個家族子弟輪流執政的黨、選舉流於形式的日本，正從「失落的十年」走向「失落的二十年」。 [ 本帖最後由 羊仔 於 2008-9-9 09:30 編輯 ]

Share this:

火煋人

拜拜，FANNIE 拜拜，FREDDIE 2008年09月10日（星期三） 9月9日，周二。恒生指數跌303.16，收20491.11；成交479億元。9月期指跌304點，收20422點。中國海外發展（688）跌3.2％，因瑞信下調其評級，預期內地房價下跌；中國遠洋（1919）跌7.6％，因波羅的海乾貨輪指數第十四天下跌。 油價因沙地石油部長認為供應可應付需求，分析家估OPEC不會改變石油供應量，10月期油見104.77美元，即較7月11日147.27美元回落29％。 滬深三百指數微升0.59％，收2139.15。周三公布CPI，估計升幅6％以下。 潛伏2500億美元虧損隱憂 在熊市中做投資者極之唔容易，在熊市中進行「bargain hunting」難上加難。能夠在今年內賺錢者更少之又少（雖然唔少分析員仍在吹噓自己點威水）。 隨住美國樓市回落（2006年第三季開始），逐漸影響英國（去年第三季開始）及擴散到香港（今年第二季開始）。美國8月份失業率已係五年內新高，會唔會一樣向其他地區擴散？ 花旗推介中國通信（552）估計今年每股獲利27.1仙，升26.3％，P/E十七點六倍，目標價7元；華潤電力（836）估計今年每股獲利64仙，減少 18.5％，P/E三十倍，目標價23元；方興地產（817）估計今年每股獲利23仙，升36.8％，P/E十二點二倍，目標價4.98元；東風 （489）估計今年每股獲利44.7仙人民幣，升2.2％，P/E六點三倍，目標價4.2元；安徽皖通（995）估計今年每股獲利40.4仙，升 22.2％，P/E九點八倍，目標價6元；東亞（023）估計今年每股獲利1.81元，減少31％，P/E十六點四倍，目標價32元。 「兩房」只係被conservatorship而非被接管，希望投資者搞清楚呢點。財政部向每間公司只認購10億美元高級優先股可換股債券，有10厘息 （即比起優先股更優先）。未來不但普通股有排冇息派，優先股亦有排冇息派，那D中型及小型銀行如持有太多「兩房」優先股者，在失去收息後，已面對資本充足 比率唔足問題，可能被FDIA接管。 聖路易聯儲銀行前行長普爾接受彭博訪問時話，「兩房」所擔保5萬億美元樓按債券中，如其中5％出事，佢唔會感到奇怪。即係未來「兩房」虧損將超過2500 億美元（即2000億美元備用資金仍唔足夠。）！尋日保爾森亦對國會話，「兩房」前景仍未清晰，不過2009年12月前唔會破產。至於將來「兩房」命運會 點樣，就留待新一屆總統去決定！呢次挽救計劃有如打了一支強力嗎啡針，在未來十五個月都唔感覺痛（但病情仍在惡化）。保爾森今年7月已獲國會批准上述事 件，點解留到9月7日先公布？理由係畀投資者在過去七個星期內大量減持「兩房」股份，令今日「兩房」股價跌到唔值1美元時所面對壓力大減。過去四季「兩 房」虧損接近140億美元，財政部注入20億美元後頂得幾耐？「兩房」負債16000億美元，如其中5％變成呆壞賬可以食了800億美元資金；另外又幫4 萬億美元樓按貸款做擔保，只要其中5％出問題，數字已係2000億美元。美國總統大選後，首要任務就係向國會申請額外撥款。 今年3月18日那次挽救貝爾斯登計劃，美股反彈兩個月，7月16日那次利用禁止「裸空」，美股又反彈一個月；9月8日呢次美股又可以反彈幾耐？至今為 止，credit crunch並冇停止，無論投資市場、物業市場、消費市場都面對信貸供應減少。大部分銀行已失去貸款能力，理由係資本儲備不足，除非再集資，否則只有唔貸 款（或需收回貸款）。例如雷曼兄弟、「兩房」、通用金融（GM）、福特汽車等……。甚至著名大金融機構都要發行優先股集資，利率亦高達13至18厘（包括 花旗銀行，GM更高達20厘）。別國主權基金例如淡馬錫等亦面對重大虧損，有D無以為繼。根據聯儲局數字，商業票據市場（CP market）過去一年萎縮5000億美元，或由去年次按危機到依家的12200億美元，減少40％，係歷史性大萎縮！ 「兩房」面臨停牌命運 債王批評保爾森時話，如你真係希望投資者去購買美國樓按債券，你必須跳落水而唔係搵一個救生員番來！今年第二季美國已有一百二十萬宗樓按被接管及有二百九 十萬宗樓按延期供款，估計第三季數字更大。周一房利美股價再跌89.6％、房貸美跌82.6％，對「兩房」股東而言，後市點樣已經唔重要，反正手上的股票 已經可以做牆紙。 上周五房利美市值75億元、房貸美市值32億元，睇來投資者好快就會同房利美及房貸美講拜拜！前者由去年8月22日的70.57美元回落到73美仙，跌幅 98.96%；後者由去年8月17日67.2美元回落到88美仙，跌幅98.7%。經過周一終極一跌後，兩隻股份加起來市值20億美元都唔夠（兩年前值 1000億美元，由此可見止蝕的重要性）。紐約交易所規定任何股份如果有一段日子內市價低於1美元，將被迫停牌。換言之「兩房」明年命運應該係停牌也！ 「兩房」被託管後，唔單止冇阻止信貸收縮，反而加快信貸收縮，因為唔少槓桿貸款及其他資產支持證券亦面對unwind。唔少金融機構要公布自己虧損幾多，結果令信貸供應進一步萎縮。 JP摩根大通已公布為手上12億美元的「兩房」優先股撥備6億美元，即減值50％。「兩房」優先股約值360億美元，即係各持有者必須撥備180億美元。 1990至2003年日本進入失落十年，理由係受八十年代樓市泡沫爆破後，日資銀行失去貸款能力。最後由日本政府向各銀行購入那D呆壞賬，恢復日資銀行貸 款能力（2001年由小泉首相決定），2003年4月起日本經濟先至復甦，但日本政府就負債纍纍，今天日本政府稅收有一半用來支付負債利息用（雖然只有半 厘息）。 日本缺乏支持改革群眾 1990年美國Saving & Loan機構危機後，格蛇利用壓低短息，令各銀行借短息買長債賺息差去恢復銀行資本。但今年長債利率唔高，息差利潤唔足夠填補金融機構在次按危機中的虧損，你話點算？ GMAC（主力住宅樓貸款）對對宣布關閉二百間分行，裁員五千（佔總人數60％）去節省開支。 福特汽車宣布8月份本土銷量下跌27％，係過去二十二個月內第二十一個月下跌；決定下半年產量減少一半（或五萬輛）。 投資市場超級巨星Mario Gabelli認為，美國消費市場正進入一潭死水時期；7月份實質個人消費（扣除通脹）下跌0.4％，係四年內最大跌幅，亦係過去十個月內第五個月回落。 有人認為海外市場有幫助，作為管理Gamco海外280億美元市場的Gabelli認為中國、俄羅斯、印度、巴西加起來的市場都唔及一個美國本土市場，而 美國市場舊年11月起進入萎縮期。 大摩羅奇更挑戰中國通脹率，認為所謂CPI增長率回落只係政府限制產品加價，結果家陣中國市場仍係負利率，如取消價格管制，實質通脹率可達8至9％，而非官方將公布的數字。 日本首相福田康夫係1990年後第十二位首相。十八年內十二位首相上台落台，但日本經濟仍乏起色。理由係呢段日子日本缺乏強人領導，或者可以說缺乏一個全心全意支持改革的國會，甚至可以說日本缺乏一班全力支持改革的群眾。 1978年中國改革開放背後係鄧小平，在佢強勢領導下，中國經濟終於扭轉乾坤。 1979年的鐵娘子、1980年的列根總統背後，係一個全心全意支持改革的黨。理由係英國人同美國人在七十年代已討厭社會福利制度，將國家經濟搞到半死不活。 1867年美國軍艦開到日本海，要求日本開放市場，當年掌握統治權係日本的大將軍，在外國軍艦炮火下，可以話係不堪一擊，結束日本幕府時代，加上日本當時 出了一位明君叫明治，佢親身到德國學藝製作軍艦，學成後回國，再派出七百多位大臣周遊歐洲列國，吸收西方優點。在明治天皇領導下，管治日本大權漸漸由大將 軍手中移到呢七百位大臣手中，此乃著名的明治維新。能夠成功理由係因為明治本身係一位強人，整個維新計劃事前十分周詳。反觀中國光緒皇本身卻係弱者，加上 當年所謂七君子，雖有強國之心，卻無周詳計劃，典型書生論政，居然搵袁世凱牚腰，自然搞到一塌糊塗。 政經孖寶絕對血脈相連 明治維新後，日本人咁尊重天皇的背後歷史，可惜日本亦漸走上德國之老路（富國強兵，然後侵略別國，發動第一次世界大戰）。1930年代，日本漸漸走上軍國主義，直到1945年被美國打敗（唔係中國，我地中國人唔好自認打勝日本）。 在麥克阿瑟將軍管治下，計劃將日本推上美式政治（即兩黨輪流執政），可惜培植了自民黨後，韓戰爆發，麥克阿瑟將軍重上戰場，日本自民黨與戰前執政的文官（即係今日黨內世襲議員）再次結合，形成今天一黨獨大局面，佢地努力將日本經濟從戰後廢墟中重建起來。 日本兩次大改革都係在兵臨城下、非改革不可環境下出現，第一次結束幕府時代（即大將軍割據，天皇有名無實權），第二次結束天皇高高在上，國家改成文武百官 管治的君主立憲制。戰後日本政府係焗了一半的民主餅（half-baked），因自民黨議員一半來自民選，另一半係戰前文武百官的子弟出任。因此欲扭轉日 本1990年後的經濟模式，非另一次劇變不可，唔係換換首相就可以出現。 再睇睇香港今天政府的組成，可以用三不像去形容，既有政府委派的官守議員，亦有來自功能團體選出來的代表，再加上由地區選舉出來的民選議員（佢地並唔係代 表全港市民，只代表一個地區）。咁的組合，除了可以在立法會內吵吵鬧鬧之外，可做的事實在太少，因為特區政府無法產生強勢領導。因為官守議員缺乏民意支 持，不能聲大大；功能團體以個別行業利益為依歸，唔代表全港市民；甚至民選議員來自地方，支持的選民人數極之有限，何來強政勵治？ 香港代議士有如走馬燈，換來換去都係換湯唔換藥，漸漸最後令市民連投票的興趣都失去，即使有為之士，亦連做議員的興趣都冇埋。 [ 本帖最後由 羊仔 於 2008-9-11 09:58 編輯 ]

Share this:

火煋人

美國樓市有排衰 2008年09月11日（星期四） 9月10日，周三。恒生指數跌491.33，收19999.78；成交653億元。9月期指跌502點，收19920點，低水。 世茂房地產（813）跌5.7％，收6.35元；中國海外（688）跌11％，見10.2元；8月份物業銷量較7月份下跌41％，只有11.3億港元，新 鴻基地產（016）跌5.2％，成92.75元；雅居樂（3383）跌7.4％，見4.26元；中國遠洋（1919）跌13％，見10.18元。 將出現熊市另一次反彈 白金價今年4月至依家回跌44％，今日在東京再跌停板或6.8％，成4140日圓一克（1210美元一盎斯）；鈀金亦跌停板，成780日圓一克，係2005年10月25日以來最低；黃金跌9.6美元，見767.65美元，係2007年10月以來最低。 原材料股跌幅相當大，好似鋼鐵股Strata跌8％、油股Cairn Energy跌7.8％。紫金礦業（2899）跌9.3％，見3.89元；江西銅（358）跌8.4％，見9.34元；中國神華（1088）跌5.4％，見23.5元。 花旗推介騰訊控股（700），估計今年每股獲利1.348元，升48.5％，P/E四十一倍，目標價75元；AAC（2018）估計今年每股獲利56.9 仙，升28.3％，P/E八點八倍，目標價9元；國浩（053）料今年每股獲利3.38元，升49.4％，P/E二十三點五倍，目標價88.9元。 恒生指數已接近2007年8月17日低點19386.72，到底應繼續小心抑或謹慎樂觀？今年3月，聯儲局為JP摩根大通提供290億美元貸款協助收購貝 爾斯登後，股市連升了兩個月；呢次動用2000億元，冇理由升市只係一日貨仔；何況港股已由5月5日26387點回落到9月5日19708點，跌幅達到 25％，反彈前跌幅三分一亦可以見21930點。我老曹對9月短期大市睇好，止蝕位訂在19386點，估計係熊市二期內另一次的反彈。 今年8月日本利率保持0.5厘，9月歐洲央行保持4.25厘，英倫銀行保持5厘，8、9月份美元卻出現強勢；估計11月大選前美元仍然係好強。 「兩房」優點係因為GSE，因此可以低息獲得資金，只要美國樓價不斷上升，佢地利潤亦可不斷上升（因資金成本夠平，其他金融機構唔夠佢爭），加上所發債券 唔使在證監會註冊登記，亦唔使公布，因此可以「亂借」，而且唔使向聯邦政府畀盈利稅同物業稅（佔用物業），形成佢地可佔去樓按貸款50％市場。到2006 年，房利美每1元資本有80.55美元負債，房貸美每1元資本有64.7美元負債，咁高負債比率碰上美國樓價開始回落。舊年畢非德已沽清手上「兩房」股 份，到今年「兩房」出事。畢非德可以避過呢次災難，理由係充分掌握「兩房」優點同缺點（優點係可以亂借，而缺點係一旦樓價下跌就會遭殃）。 房利美同房貸美已步入死亡期（最後命運由2009年新任總統決定）。我老曹係相信美國正進入大蕭條後最長的一次樓價調整期。保爾森用「inherent conflict and flawed business model」去形容「兩房」，同埋宣布呢次政府係被迫出手，以免引發骨牌效應。 過去我老曹批評香港政府房屋政策：作為政府，有責任解決港人居住問題，但冇責任協助居民置業。今年10月香港最後一批居屋出售之後，特區政府結束長達三十 年荒謬的居屋政策。相信「兩房」事件之後，美國政府亦逐步淡出協助美國人置業呢一個方案。因為樓價有升有跌，協助冇能力置業的人去置業，一旦樓價回落 20％或以上便變成負資產，咁上述的政策唔單止害人，而且仲害了社會。瑞信倫敦分析員Andrew Garthwaite認為，未來兩年半內美國樓價仍須回落10至15％。「兩房」機構唔單止冇協助美國窮人置業，反而陷佢地入財政困難。如未來兩年半美國 樓價再跌10至15％，政府注資2000億美元亦唔夠蝕，呢次美國樓價調整期在2011年前唔可能結束。美國公布預售房今年7月份銷售對比6月份少了 3.2％，較去年7月份則減少了6.8％。 美股後市頭痛又頭痕 過去兩日雷曼兄弟公司失去了60億美元市值，呢間證券行今年已集資120億美元，因虧損好大，所以仍未足夠。雷曼兄弟作為美國第四大證券公司，就快公布策 略性主動（key strategic initiative）去解決問題，佢地今年股價已回落88％。Oppenheimier & Co.的Meredith Whitney估計，雷曼要為手頭上商、住按揭撥備40億美元。AIG股價亦跌19％，收18.37美元。在標普指數內的建屋股指數回落 8.6％；National Association of Realtors（代表二手樓）指數跌3.2％；KBW銀行股指數回落6％。Washington Mutual Inc.再跌20％，收3.3美元。能源股回落6.4％，Massey Energy回落19％，收39.9美元；Valero跌12％，收30.51美元；Freeport-McMoRan Copper & Gold Inc.回落10％，見65.16美元；AK Steel Holdings回落16％，見34.72美元。睇來美股後市幾麻煩。 財長保爾森的鋸箭法（外國人叫佢做在傷口上面貼膠布）。從雷曼兄弟股價下跌44％及唔少中小銀行發現自己資本減少30％（因「兩房」普通股及優先股大跌 價），令金融分類指數回落6.3％。「兩房」發債共15000億美元，另外又要幫4萬億美元樓按債券做擔保，上述銀碼同CDS市場比較仍然只係冰山一角。 國會財政預算局估計為了「託管兩房」，2008�09年度政府財赤會高達4380億美元。財赤擴大將令美國GDP增長率由今年1.5％降至2009年 1.1％，失業率上升到6.2％。八十年代開始美國GDP平均每年上升3％日子一去就冇回頭。由2007�08年度財赤1615億美元，一下子就升到 4380億美元，數字都幾得人驚。假設殊仔減稅政策唔再獲延長，2010年財赤估計可減少到3250億美元，如果延長2010年財赤將會係4000億美 元。為了攻打阿富汗同埋伊拉克，2001年到家陣美國共用了8580億美元。 我老曹唔知11月後邊個做美國總統；如麥凱恩獲選，因共和黨唔能夠控制國會，麥凱恩需要好努力先至可以延長殊仔的減稅方案；反之，奧巴馬上台，佢唔使做任 何野，殊仔減稅方案2009年12月31日到期，2010年稅率自動上升。例如股息稅及資本增值稅由2003至07年只有15％，其後延長兩年，2009 年12月到期後，股息稅重返35％，資本升值稅20％（實際上2009年1月1日起已生效，因為2009年收入在2010年要畀稅）。至於年收入 102000美元以上的美國家庭，奧巴馬希望增加入息稅7％，向富人抽稅補貼窮人，結果只令經濟停滯不前，並唔係解決社會唔公平的良方。 OPEC無法控制油價 10月期油見104.18美元一桶，原油見101.19美元一桶。我老曹入行四十年，真係明白世事冇絕對，任何人保證乜野乜野，都唔好信佢。股市極之難預測，冇人亦冇任何方法可以每測皆準。 1973年石油危機後有幾多人預測石油會出現短缺？過去三十五年油價有上升日子亦有回落日子，卻冇短缺日子。1973年至今石油產量以每年平均2％速度上 升，好穩定但係油價卻大上大落。以美元購買力計，今年7月最高價牚陣，石油仍對比1947年平，換言之過去六十年油價基本上穩定（只係美元購買力不斷下 降）。1947年全球油價由七大石油公司控制（俗稱七姊妹），今日全球七大石油公司只控制全球12％產量，相反由十二個重要產油國組成的OPEC在舊年控 制全球36.7％的石油產量，其中沙地控制全球12.1％的石油產量。不過，由1996年起，連OPEC都無法控制油價，油價唔係跌至10美元一桶就係漲 到147美元一桶；只要伊拉克恢復正常產油，估計可令油價重返80美元以下。 英國第二季GDP出現負增長0.2％，National Institute for Economic and Social Research估計，第三季GDP極有可能亦係負增長，成為OECD國家中首個進入衰退的國家，亦係1991年以來另一次經濟衰退期。 9月10日止滬深A股累計跌幅已達65％，好多人將責任推到「大小非」減持身上，真係咩？真正理由：第一、去年市場估值過高，一旦純利增長率放緩，股市由 高P/E走向低P/E，股價自然大幅回落。例如舊年10月16日P/E一度見六十七點六二倍，情況有如2001年6月13日滬深A股P/E見六十七點六九 倍後，亦出現四年熊市。估值過高，一旦純利升幅減少必然帶來大跌。第二、存款準備金率上升（即抽緊銀根）及加息（經營成本上升），加上企業發展前景唔明 朗，唔係「大小非」減持。 清華大學中國經濟研究中心常務副主任寧向東認為，中央同時進行「一保一控」係好難兩全其美。CPI連續四個月下降只係政府控制物價結果，而非真正反映物價；在加強控制通脹下，又點樣同時保持GDP高增長？ 南京大學商學院金融系教授杜亞斌認為，對通脹及經濟面臨下滑危機，先決定誰先誰後。今年上半年目標係抑制經濟過熱，從依家形勢睇，已漸取得成功，要維持落 去，自然會抑制通脹。反而因擔心美國經濟衰退令中國經濟增長速度超慢而放棄宏調，就會功虧一簣。中國居民消費只佔GDP 35％，如拚命刺激消費去拉動GDP增長，一定令通脹率上升；反之讓GDP增長率慢慢降落來，CPI升幅亦自動減慢。 Jeremy Grantham係GMO主腦，佢對二十一世紀作出以下的預測：世上第二次工業革命在中國同印度出現，由於大量廉價勞動力加上豐富資源投入生產，引發八十 年代全球經濟向上及信貸寬鬆期。漸漸對資源造成壓力；新興經濟國仍可透過技術改進同埋企業邊際利潤下降而保持出口增長，家陣上述咁的日子已經完成，油價格 上升，原材料價上升，最終令OECD國家的CPI加快上升，信貸開始收緊，引發資產價格下跌，令OECD國家對新興經濟因為貨品需求而下降，上述情況我地 正在面對。下一步係中國同印度人漸漸由產品生產者，轉為爭取同OECD國家人民同檯食飯（你地有的野、我地都想有）。更多人去分享現有的資源，結果連地下 水都抽乾，湖泊河流亦染污。原材料價格同能源價格或會回落多少，但因太多人希望分享資源而無法大幅回落，全球GDP重返低增長期……。 另類解讀金融名詞 今年股市都幾悶，唯有苦中作樂。何謂「基礎分析」？其實係分析員用盡方法去解釋個市點解唔會跌，但個市仍然係咁跌。 機構投資者：就係在跌市中仍大手拋售的人，我地叫佢地做機構投資者。 衍生產品：就係你唔識，但係就可以令你輸錢的工具。 Market report：係大經紀行向客戶解釋點解你會輸錢的報告。 財務管理：輸了錢後，三個月先至話你知。 P/E：係用舊年純利幾吸引去呃你入局，然後明年純利大跌，P/E大升。 止蝕沽盤：通常都唔記得做的事。 技術分析員：講就頭頭是道、做就損失慘重的人。 股神：只在牛市出現、熊市消失的人。 上升軌：通常在「過去」走勢中先至搵到的趨勢。 對沖：自己都唔知應該睇好、睇淡牚陣；同時沽出牚隻已升股，買入隻日後大跌股的行為。 專家：累你輸錢後，仍有好多理由解釋的人。 相反理論：即係我唔同意你的睇法，又唔知點駁你牚陣的借口。 本周日研討會因冇時間回答觀眾問題，依家解答如下：一、手上基金同埋股票都有損失，仲有三分一現金問點樣投資？在熊市中，只應動用30％資金而非三分二， 閣下已過量投資，手上現金不宜再投資。二、牛熊證在熊市二期點玩？牛、熊證只適宜炒短線，我老曹好少研究。三、股市短期到底未？答：依家只係熊市二期，應 該有好多隻腳，但係捕捉熊腳要非常之專業，散戶唔係好對。匯控（005）應否增持？答案係9月同10月唔少Accumulator到期（舊年9月、10月 簽落），等到11月再研究啦。四、內地銀行股點睇？短期有壓力，因內地樓市進入減價潮，留到2009年上半年業績公布後先至再決定啦。五、我老曹唔會代森 池兄回答中移動（941）同國壽（2628）點睇，應向佢本人請教。六、舊年曾推介的冠捷（903），公布上半年溢利上升36％，證明係優質股。但在熊市 中甚至連優質股股價一樣下跌，呢個就係點解需要「止蝕盤」保護的理由。七、「止蝕唔止賺」無論在熊市一期、二期或三期都必須遵守，唔好畀理由自己唔做。 八、今年環境肯定較8月差，19300點估計只係技術上有支持，唔代表股市見底。我老曹已在會上說明，大市反彈後再見新低，下一站係17400點。另外熊 市三期唔應該係今年9月或10月，最快係2009年，甚至更長。九、我老曹唔信美股短期見底。十、應該睇H股同A股關係（因H股係理性股市，A股係非理性 股市），而唔係睇A股點樣影響H股睇法（上述係舊年10月投資H股者輸大錢的理由）。十一、熊市二期反彈一浪唔及一浪，相信呢個反彈浪亦好短同埋好細（上 阻力21600點）。如能忍手最好唔玩。十二、我老曹個人認為A股P/E同H股睇齊先至出現較大型反彈，唔係現水平。十三、我老曹唔對個別股份作評論。十 四、點樣揀有前景二線股？需要一本書去解釋，從略。十五、電力股同煉油股估計10月過後中央會放寬管制，反之鋼鐵股中央仍在度打壓。十六、我老曹同意呢次 熊市會好長，至於有幾長？事前冇人知道。十七、我老曹無法話畀大家知熊三在邊度（因熊二仲未完成）。十八、內房股已進入戰國時期，強者為王，大屠殺對對開 始，最後邊個係「秦始皇」統一天下？明年或有分曉。十九、「兩房」優先股仍然係股票，因此可全部蝕晒；債券係債權人，唔係股東，兩者身份有唔同。在託管情 況下，優先股所獲保障極之有限，債券就好好多，債券大王已因此獲利17億美元。二十、提升存款準備金率就係抽緊銀根，在美國如果短息高出長息就係抽緊銀 根，家陣短息2厘、長期3.5厘，即係政府仍在度放寬銀根，但抵押品跌價就令銀行自動抽緊銀根。兩股力量在度鬥爭梗，呢方面由L增長率就分出邊個贏邊個輸 （可惜公布數字時已太遲）。二十一、在接受電台訪問時曾睇好東涌樓價已經係2004年的事（地運二十年、2004年起香港行「八運」，利東涌及數碼港，因 此在2004年牚年曾推介兩區物業。現水平相信樓價已差唔多，應獲利回吐）。 擔心能源股牛市結束 二十二、我老曹對香港未來樓市睇法係「上落波幅唔大」，牛皮市。二十三、世上冇合理樓價，買得起就係合理價，太勉強就係唔合理（聯合國標準係全家人收入三 倍至六倍就係合理價）。二十四、經濟轉型期十分痛苦，香港1981至84年用了三年，日本至家陣都未成功，中國要幾多年？木宰羊。二十五、美元上升利淡港 股。二十六、我老曹由7月15日起全面睇好美元，至今年11月止。二十七、我老曹相信香港加息周期到2009年下半年才開始，加幅有限。二十八、我老曹睇 歐羅見1.32美元。美國次按危機下唔應沾手美股，道指下望幾多就木宰羊。二線股唔易揀，2009年邊一季入市？明年先答。二十九、假若黃金仍係牛 市，735美元附近可買入，止蝕位係690美元。三十、依家假若美元係大反彈。三十一、我老曹擔心原材料及能源股牛市已完成。三十二、睇好黃金同埋睇好白 銀係兩回事。黃金係貨幣、白銀係工業原料。三十三、明年有邊行可睇好？唔知道。三十四、投資比例係一百減年歲，三十幾歲即65%資金用來投資股票或者基 金，35%存款或黃金。三十五、ELI 亦有一定信貸風險，主要睇發行商係邊個而定。三十六、Sell in May卻唔肯Walk away，你必須有我老曹一樣的定力，即過去三個月只做旁觀者而冇手多多。三十七、澳元、紐元前景睇淡。三十八、未來美元仍可以大跌，相信係2009年的 事。三十九、我老曹從來唔分析日圓，因為主要受日本人的利差交易影響，而唔係客觀因素。四十、人民幣升值幅度已由快行轉為慢行（即未來升幅極慢）。四十 一、美元短期走勢睇好。四十二、讀者問匯源果汁（1886）舊年點解我老曹冇止蝕？因呢隻股份係透過大行認購的新股（例如用一千萬元去認購大額新股）獲 配，因此存在大證券行入面，自己冇管理（即牚D一百萬美元開戶牚種）。上述戶口主要用來認購新股玩ELI（我老曹從不沾手Accumulator）。其次 係買賣外國同股票為主，由於涉及金額唔大，所以冇訂止蝕位，呢個就係我老曹認為賺到匯源果汁D錢真係好彩，唔係眼光（理論上係唔守紀律，應該蝕本先至 對）。 各位問題實在太多，大量問題日後才答。 [ 本帖最後由 羊仔 於 2008-9-11 10:05 編輯 ]

Share this:

火煋人

2009低潮 2010再開車 2008年09月12日（星期五） 9月11日，周四。恒生指數跌611.06，收19388.72，成交695.9億元。9月期指跌578點，收19342點。 冠捷科技（903）跌13％，因下調出貨量預測。中移動（941）跌5.3％，報77元，《南方日報》披露，政府計劃限制中移動在移動電信市場主導的地位。國壽（2628）跌1.05元，收27.7元。 另外國家電監會負責人話，近期電煤供應緊張狀況緩和，同埋8月的CPI上升只有4.9%，國家下一步可能會上調包括居民生活用電價格在內的銷售電價。 滬深三百指數跌3.31％，收2072.13，擔心2000點短期內保唔住。 花旗推介遠洋地產（3377）估計今年每股獲利38.7仙，減少29.2％，P/E六點五倍，目標價7.34元。領匯房產基金（823）估計 2008�09年度每股獲利1.85元，減少22.8％，P/E九點六倍，目標價20.92元。天津港（3382）今年每股獲利18仙，升32％，P/E 十五點四倍，目標價4.5元。 大跌之後必有反彈，好似今年3月10日到5月19日；小跌市後必有小反彈，好似今年7月15日到8月11日。博反彈從來唔係易玩的遊戲。 內地人買樓輸打贏要 過去三個月由新興市場淨流出（即流入減流出）的資金共295億美元，踏入9月更加好快咁流走，主因係原材料價格回落、美元強勢加上地緣政治。今個禮拜一 EPFR Global的數字，投資者一日內就抽走10億美元（上個禮拜共抽走了16億美元，或6月4日至今抽走295億美元）。 Washington Mutual繼禮拜二跌了19.9％後，禮拜三再跌26％，收2.45美元，擔心成為繼雷曼兄弟之後另一間出事的機構。 最近一期《瞭望新聞周刊》認為，大陸樓市以前那種「儲地生財」的增長模式，在未來好長一段時間內再無法出現。過去供給數量同埋節奏幾乎都係由開發商掌握，只要買入土地，利用巨大的金融槓桿效應，就可以坐享土地升值帶來的利潤。 隨住銀行信貸收緊，買樓的人抱住觀望心態，銷售反應自然比較冷淡，再加上廉價資金時代已經結束；儲地生財的方法已行唔通。 復旦大學經濟學院的教授、房地產研究中心主任尹伯成認為，「快速銷售，推升資金周轉率」的模式，可能成為未來中國房地產市場的主流。即係由過去囤地唔賣，變成今後快買快賣。 樓價有升有跌係天公地道的事；但係內地買樓的人就輸打贏要，唔少買樓的人去地產發展公司示威要求賠錢，甚至引發騷動，企圖透過群眾力量要地產發展商「就 範」，大大咁削弱國際間對中國人「守法」精神的信心。中國廠商已經面對出口貨加唔到價，生產成本日日係咁漲的問題而陷入水深火熱。如內地地產發展商唔能夠 按市場供求而調整樓價，地產商只有暫停地盤發展（高價賣樓冇人要，低價賣樓又唔敢），將加快未來中國GDP增長率下滑。 投資中國有政策風險，理由就係唔知幾時係市場經濟、幾時係社會主義。 據美國CFTC的報告講，機構投資者共持有2200億美元商品（2003年只係持有130億美元），7月中機構投資者開始大撤，其中一個商品基金共拋售了 一億二千七百萬桶期油，令油價一天之內急跌20%或29美元。美國民主黨國會成員認為有足夠根據，證明呢次油價上升係機構投資者在背後興風作浪，而唔係來 自真正的需求，以1月至5月為例，投入期油市場的資金超過600億美元，因此有人建議政府立法管制。 舊年11月股市開始回落，今年3月係金價、7月係油價，跌市背後係2006年第三季開始的美國房地產大崩潰！今年上半年被接管的住宅對比舊年同期上升了 112％，上述的一切正正係「金融資產價格回落之母」，索羅斯認為最惡劣情況仍未出現。出現災難時只要搵到避難所（Take shelter）或者搵「掩蓋」（Cover up）就問題唔大。相反，十號風球高掛，你仲去玩滑浪風帆又可以怪邊個？在災難發生時應該決定what to do? What not to do？呢次美國樓市回落期有幾長？木宰羊。1997年唔少香港精仔以為本港樓市衰三年，結果在2000年入市，到2003年已苦不堪言。做人千祈唔可以漫 天風雨待黎明，應付災難的方法係去避難所或者搵「掩蓋」。 緊記順勢者昌逆勢者亡 「兩房」股東在過去十四個月內失去了1000億美元市值，問你點頂？甚至以四叔的財力（2000億到3000億元）亦頂唔住，你又係邊個呀?!金價見 1030美元後大調整，連羅傑斯亦頂唔住；油價見147美元後，雖然OPEC宣布今個禮拜三起每日減產五十二萬桶，但油價居然跌穿100美元一桶，10月 期油報99.04美元；換言之，連OPEC亦都頂唔住。市場力量就係：順勢者昌、逆勢者亡。 南非蘭特成8.1819兌1美元，係今年3月31日以來最低。 紐元宣布減息半厘至7.5厘，7月24日到依家回落13％，報65.16美仙，係2006年10月2日以來最低。 商品惡夢今年已經開始，對「熊」而言，各種商品市場只係一個又一個的蜜糖罐，為了取入面的蜜糖，在熊掌之下一個又一個的「罐」被打破！ 美國政府9月8日宣布託管「兩房」之後，「兩房」優先股報69.8美仙（票面1美元），即係失去了超過30％市值。雷曼兄弟股價兩天內下跌52％，並以 7.25美元收市。公司在兩季內虧損了70億美元，必需出售物業資產同埋一半資金管理業務先至有機會生存落去。手上物業計劃以40億美元賣畀私募基金百仕 通，另外賣55％資金管理業務，估計可以套現約30億美元，明年再將326億美元的商業物業中的250億美元上市集資（活著係唯一真理？）。公布後美國國 庫券利率由3.596厘升至3.6258厘，因為又需美國政府出手挽救。Primary Dealer Credit Facility（PDCF）已經開始為雷曼提供資金；PDCF過去只係向商業銀行提供短期貸款，息率2.25厘，家陣已經向雷曼提供短期貸款；畀雷曼有 時間出售手上的資產，但係仲未度過危險期。 美國政府財赤自2003年殊仔減稅後變成bigger and bigger！2007�08年度財赤估計成4070億美元（今年9月結），2008�09年度財赤估計達4380億美元，不過都只係佔GDP 3％，問題仍然唔大，但係雷曼兄弟唔會係最後一間需要挽救的公司。 Ladenburg Thalmann銀行的分析員Richard Bove認為，Washington Mutual未來三年虧損可達400億美元，上述呢D問題唔係換一位CEO就可解決，因為由那間S&L銀行提供的520億美元Option ARM樓按開始出問題，其中330億美元係加州同埋佛州的物業，260億美元係次按，另加600億美元係樓按核心（部分係Option ARM樓按），WaMu股價今年內已經跌了70％，相信正在度搵買家收購；禮拜三股價見2.32美元，係1990年11月27日起的低位。 美國經濟早在2000年見頂，透過2001年1月至03年6月，將利率由5.25厘減到1厘，引發再膨脹（Reflation），令到經濟由2003年復 甦。跟住就係減息、美元匯價下跌再加上超過7000億美元財政赤字，換來五年的繁榮期。舊年8月次按危機表面化之後，未來調整期要幾耐？上一次的美股調整 期係由1966年開始到1982年結束，需時16年；呢一次由2000年開始到依家已經快九年，如果2015年先至結束就仲需等七年。日本衰退1990年 開始，2003年4月結束，需時十三年多D；如果美股亦需要十三年即2013年上半年結束，仲需要等四年半。上述呢個講法只係假設，唔可以作準，亦都唔係 理性分析。 最近幫黃毅力所寫的書《上位七式CEO》實戰手冊（已賣出了二萬幾冊）做推介，提及點樣協助年輕人上位？自從工業革命在英國發生之後，最易上位方法係順勢 而行（事半功倍）。英國工業革命初期，有五十年勞工成本十分穩定，呢段日子最好開廠；然後有五十年勞工成本上升期同埋英國都市化，呢段日子最好投資房地產 同內需行業。由工業化開始到繁榮期見頂前後共一百年。美國工業化由1900年開始，直到2000年。但係戰後日本時間減少一半，由1945到90年共四十 五年（因戰後日本早已經有一定的工業基礎）。好似香港工業化由1950年起步，1980年見頂共三十年，呢段日子廠家發大財。由1967年開始，香港迅速 都市化又係三十年，直到1997年本港房地產見頂。至於2003至07年只係再膨脹，發財的係金融業同埋令到香港人收入兩極化（只有金融業薪金大幅上升， 各行各業跟唔上，出現了兩個社會）。 成功投資者似山又似風 我老曹的幸運係由1967年出來社會做野，正好趕上香港三十年都市化的快車。呢架快車在1997年7月到站。黃毅力兄能夠上位，係趕上1978至2007 年內地工業化快車，可惜呢架快車亦已經在2007年10月到站。中國「都市化快車」通常在工業化後第十五年開出，相信係1994年或者95年，理論上要到 2024或者2025年才到站，依家只係到了中途站（類似香港1981至84年的三年調整期）。在呢個中途站有人落車有人上車，然後再開出。如果又係調整 三年，即係呢架快車到2010年才開出，低潮應在2009年。 在投資策略上，大家唔該唔好做Chicken Littles，要「膽大、心細同時嚴守紀律」。如你冇膽就只有做普通人，如你膽大但就心思唔細，仲慘。如兩者兼備必需學習嚴守紀律。做到不動如山、動如 風；平常則靜如水。成功投資者必需要具有山的性格（經分析後所建立的信念，第二D人改變唔到）。風的速度（形勢有利、攻城掠地快如風），平時則靜如止水。 8月份馬來西亞種植的跌幅都幾大，約18%因棕梠油跌價，加上下個禮拜五反對派挑戰執政黨接力，令股市創今年的新低，收報1041點。 下個禮拜二馬來西亞反對派領導人安華希望有三十名國會議員加入佢的行列向執政黨進行挑戰，一場權力爭奪戰展開。 如果由西方政治發展史來睇，國家最好由兩黨管治，相反一黨獨大（好似1990年前台灣同埋依家的日本）政府官員好易走向腐敗。如果走向多黨制，好易令政府走向聯合政府，無法形成強勢領導。美國因兩黨勢均力敵、互相監視對方，形成良好的管治。 好似今年台灣新上台的國民黨已較落台的民進黨廉潔好多，將來如果民進黨再次上台，相信亦一定比阿扁廉潔……。 舊年馬來西亞出口中23％係原材料，電子同埋電器就佔43.4％。 馬來西亞政治上仍然係比較穩定，英語區、行英國法律、教育水平、房屋等不俗。稅率由舊年的27％降至今年的26％，2009年係25％。 馬來西亞獨立已經五十年，仲進入第九個經濟計劃，希望在2020年成為世界一級的經濟國，希望人均收入由舊年7097美元，每年以6％速度上升（舊年新加坡人係27150美元一年），漸漸拉近兩地的經濟差距，一如過去三十年中國同香港差距漸接近一樣。 馬來西亞過去缺點係政府過分偏幫巫人，呢個政策唔單止導致新加坡獨立，亦在過去四十幾年令兩地人民收入由本身十分接近，到今日新加坡人收入係馬來人的四 倍。根據IMD World Competitiveness Year Book 2008：馬來西亞在2005年全球一百二十五個國家中的競爭力排名二十六，今年在一百三十一個國家中排名已升到十九，香港就排名第四。 近年馬來西亞正由勞工密集工業走向資本密集同埋知識含量高的工業，同時大力推動服務業；希望成為國際製造業地區總部同埋集散中心、IT服務中心，計劃令服務業在2020年佔GDP 60％（舊年就佔42.6％）。 大馬隔山買牛有因由 馬來西亞人口二千七百萬，1997年亞洲金融風暴後外資撤走，馬來西亞經濟大受打擊。其後政府決心由傳統工業走向高新科技同埋服務業，整個計劃叫做 MSC（Multimedia Super Corridor），即係將馬來西亞分成五大發展走廊，各以本身優勢去吸引外資同埋人才，由石油化工到農產品工業、電子工業、旅遊業、金融業、物流同埋醫 療服務，透過互相支持，希望用三十年時間將馬來西亞的人均收入推入世界一流國家水平。其中最重要一項係致力成為回教國家金融中心，包括銀行、股票市場、會 計、離岸金融服務等、法律、稅制、監管。今年7月止已有六千五百三十八間離岸公司、五十八間銀行（資產值240億美元）、一百三十六家保險公司（6億美元 以上資本）、一百一十三間租賃公司（每年有150億美元合約）、二十一間基金管理公司、三十四間掛牌基金同埋伊斯蘭債券每年發行161億美元。雖然規模仲 唔可以同其他金融中心比較，但已經形成初部規模。 十年後馬來西亞會唔會拉近同新加坡人均收入差距（過去三十年深圳、上海等大城市人均收入同香港差距接近好多；最近十年香港人均收入就停滯不前，深圳同上海過去十年卻翻兩番）？ 舊年新加坡人均收入已達27000美元一年；1990年日本人均收入30000美元（舊年35000美元，因為日圓升值），同埋1997年香港人均收入 27000美元（舊年25400美元）。新加坡人均收入未來十年有可能停滯不前（一如香港過去十年），而馬來西亞未來十年翻一番機會就十分之大，即係由舊 年7000美元上升到14000美元，相等於家陣新加坡人均收入50％。 經驗話畀我老曹知，任何地區人均收入由5000美元上升到25000美元期限，住宅樓價升幅可以好驚人。舊年4月馬來西亞政府宣布取消物業增值稅，我老曹 在吉隆坡作出第一項的物業投資，打算短期內自己去睇睇；初步感覺馬來西亞銀行制度對比香港落後，好似匯錢冇法即時提供林吉特報價；買賣物業律師費用都幾貴 （比香港、倫敦及加拿大仲貴），同時效率仍然差好多。上半年小女已經去吉隆坡睇過，認為那度的物業建築材料幾好，但街上的的士好難搭（仲要講價）。受美國 次按危機影響，馬來西亞股市由今年1月14日的1524點回落到最近1062點，跌幅30％，舊年上半年買入的豪宅物業，今年就升值20％。即係一如今年 香港，出現豪宅價升、股市價跌的現象。後市點睇？日後再同大家研究。 [ 本帖最後由 羊仔 於 2008-9-16 09:49 編輯 ]

Share this: