希拉里及特朗普昨日舉行了第一輪電視辯論，由於希拉里由於較有準備，表現明顯好過對手特朗普，美國杜指期貨即時造好，較周一收市升超過100點，另外，墨西哥披索兌美元反彈，特朗普一直對墨西哥非常不友善，他近日的支持度上升，令到披索匯價跌落新低，特朗普辯論麻麻贏面減低，披索即時反彈。亞洲股市在辯論會係亦跟著造好，反映市場屬意希拉里當總統多過特朗普。
歐洲股市繼續受到德意志銀行大冧拖累，連續第二日向下，德國股市跌0.3%。雖然油價下跌，拖累能源股向下，但仍未阻攔美股升勢，杜指收市升133點至18228點，升幅0.7%；標普500指數升14點，收報2160點，升幅0.6%。
昨日公布的美國經濟數據不俗，亦幫了美股一把，美國9月消費者信心指數報104.1，略差個8月的101.8，但明顯好過市場預期的99；而7月標普/Case-Shiller美國20大城市樓價綜合指數，較去年同期上升5%，只係略差過市場預期的5.1%；另外，美國9月markit服務業採購經理指數（PMI）初值為51.9，亦高過預期的51.1以及8月的51。
杜指期貨在周一晚總統選舉電視辯論結束後，曾一度跳升100點，但之後逐步回落，周二朝早開市時更由升轉跌，後來才回升，顯示市場對總統選舉辯論的看法，仍然心大心細。
美國總統寶座究竟鹿死誰手，還是看往後兩輪電視辯論及選情發展，第二場辯論將於10月9日舉行。對於投資者而言，11月舉行的美國總統大選，係今年最大的風險，有分析指出，相信投資者目前最熱切期待的兩件事情，第一是選舉和利息的明確性，第二是牛市的催化劑，在未有確定的答案之前，預計大市仍會牛皮沒有方向。
值得注意的是特朗普昨天開炮轟擊聯儲局，點名批評聯儲局主席耶倫，基於政治考慮，遲遲不願加息，為市場製造了問題，助長市場泡沫的擴大。這令市場人士擔心，一旦特朗普入主白宮，他將逼使聯儲局加息，威脅了央行的獨立性。Horizontal Investment的環球分析員Greg Valliere表示，像如此接近總統寶座的人這樣狠批聯儲局主席，是前所未有的。市場應該對此有所警惕，因為如果特朗普真當選，他可能會聯合國會議員，大力減低聯儲局的獨立性。
另一方面，網友dominique 問:「我真心想問一下,如果有筆錢想增值, 可以買細單位收租定 買匯豐收息好呢? 我未到40歲,都可以受風險. 謝」。
投資分長期和中短期，長期投資我叫作「投資的我」，中短期炒作我叫作「投機的我」。用「投資的我」的角度比較易答，若是一二十年唔郁的投資，可以扮晒股神巴菲特，唔平唔買，唔優質亦唔買。所以而家啲樓買唔過，佢只有2厘租金收益，要知道租金比正常升咗50至70%都只有2厘，回報很低，顯示價格好高。唔買香港樓，仲有好多其他選擇，例如我經常講的越秀房託(405)股價及相關新聞 ，佢現價4.74元都唔平(要買最好等回吐)，但現價息率6.5厘，比香港樓平好多。
投資的我買了貴樓，一衰起上來，要捱10年以上才見家鄉，買樓出三成本金可入場，有槓桿，贏得大也輸得大，樓市逆走時十分痛苦。如今買樓要長線都贏，要央行永續放水，但如今央行如此印錢，我估結局是衰退或爆煲，而不是永續放水。我因為見過幾次樓市暴跌有人輸到跳樓，觀點會保守啲，或許阻住大家發達也未可知。
另一類人是樓宇自用者，dominique不屬此類，他們本屬「投資的我」，但不買樓也要捱貴租，耐性有限。更有甚至是不買樓用了錢亂炒股輸埋，自控力差者買貴樓死供可能好過亂炒股輸清。
投資的我二選一我會選匯控(若不是二選一還有很多分散投資的選擇)，雖然佢由58元可以跌番落40元，但睇10年，我估佢都會去番58元樓上，期間每年可以收5、6厘息。匯控的好壞部份樓市相反，要利息上，佢先至有運行，但遇上衰退，它和樓一樣死，但它已跌了唔少，無咁傷。即係二十樓跌落地和三樓跌落地的分別，一個係死，一個可能只係斷腳。
另一方面，講「投機的我」，若無辣招稅，我會一早叫人順勢炒樓，因為買入升10%、20%就沽，遇上升市好爽，但如今有重稅，揸一年多升20%沽出都可能只係打個和，即係買樓炒要預佢再升3年，風險好大。dominique若是有錢仔，攞一半錢去博，我唔敢阻你，若你只得一注，輸咗無老豆可以救你，就要諗真，咁貴的樓睇兩三年，想炒都要好有實力至好去。
所以中短線二選一又是匯控好一些。但匯控最近升咗咁多，要買都等回吐啦，唔回深啲就入，小心一入就迎上當頭跌。
Share this: 
