偷0野 - 投資者日記 [曹仁超]

投資者日記 [曹仁超] 2008-05-02


爭住接火棒


5月1日，周四。玩股票者，最怕接火棒；呢次奧運，香港官商名流都爭住接火棒，反而運動界代表卻少得可憐。如果話係來自各界代表，點解嗰D每天為我地派信、風雨不改嘅郵差又冇代表？喺港九及新界服務嘅速遞員，佢地先至係香港正式嘅跑腿，點解唔見有代表參加？唔通接火棒都需要有錢或有面，冇錢冇面者冇得玩？2008年8月8日北京奧運，本應係中華民族光榮嘅事，點解會變成咁？奧運宣揚嘅唔係平等與博愛咩？唔係強調無論富貴與貧窮，都响同一起步點開始，憑個人努力而奪魁；無論你來自乜嘢國家，無論你膚色紅、黑、黃、白，响同一條件、同一天空下比賽而發揮人類博愛精神咩？但呢次奧運聖火傳遞卻好似古時保鏢咁，由鏢局派出龍虎武師去護送鏢銀上京，以防中途有人打劫。

ETF一直減持黃金

　　美國政府公布今年首季GDP增長率已降至只有0.6％。喺美國樓價回落及信貸壓縮環境下，美國GDP唔出現負增長已經係上上大吉，呢點有賴去年9月起至今減息3厘；但減息又令美元滙價急跌、CPI上升，因此本周三只能再減息四分一厘。5月份美國能否依賴退稅刺激而令消費額回升？據ADP報告，4月份非農業職位減少一萬（3月份改為五千，而非先前公布嘅三千；2月份減少一萬八千）。睇嚟美國就業情況在惡化中。油價因存量上升三百八十萬桶而回落2.17美元，成113.36美元。

　　技術上睇，油價回落至110美元甚至107美元，都只算正常獲利回吐；如107至110美元失守，才擔心先通脹、後通縮嘅情況出現。ETF所持黃金量周二宣布4月份減少十一噸，至五百八十噸。自今年3月17日金價見1032.7美元後，ETF（實金持有機構）便一直在減持黃金。技術上睇，今年1月22日嘅850.07美元係良好支持位，响未破850美元前，仍未肯定金價真正轉勢。

　　聯儲局公開市場委員會認為經濟活動仍弱，物業市場及企業開支在回落中，勞工市場亦軟化。呢次減息會議中，已有兩位成員反對減息（上次一位），以八比二通過。

　　同1989年6月日本銀行行長三重野康唔同，當年佢為咗對付日本地產泡沫而大幅加息到1990年6月。日本樓市泡沫爆破後，佢又無法阻止日圓再升值。到 1994年中，日圓最高見75兌1美元，帶來日本過去十三年半死不活期（日經平均指數出現長達十三年熊市）。貝南奇响去年8月已匆匆注資金融體系，9月開始減息至今共3.25厘，雖然令油價一度接近120美元一桶、金價見1032.7美元、歐羅見1.61美元，至於能否阻止九十年代日式經濟衰退响美國重演？仍有待觀察。

　　戰後日本透過低日圓滙價重建日本經濟（例如1美元兌360日圓，1971年起略為升值到1984年見250兌1美元，大幅升值係1988至94年7月嘅事）。

　　1989年六四事件後，中國政府亦利用人民幣貶值去令中國GDP進入高增長期。1971至80年美元貶值亦令美國經濟由1982年起全面復甦。呢次美元經過2002到08年貶值後，能否阻止美國經濟2008年後陷入九十年代日式衰退?!至今未有答案。

　　政府政策不能改變市場基本因素，但可支配短期股市方向。呢次政府利用股市回落50%後嘅超賣區公布減股票印花稅而引發A股反彈，代表去年5月開始中央政府欲冷卻股市嘅措施亦告一段落。

　　另一方面，去年8月開始聯儲局一連串行動，相信亦減少咗次按危機所帶來嘅殺傷力，但GDP增長率放緩卻無法避免。減息告一段落後，股市點樣反映美國GDP增長率放緩？相信5月份漸漸清晰。

　　由去年8月聯儲局注資美國金融體系而令美滙急速下滑所引發嘅通脹率上升，係咪已告一段落？亦值得注意。

　　2005年7月起人民幣由8.7兌1美元開始升值，依家略低於7元人民幣兌1美元（估計年底係6.5兌1美元）。今天人民幣滙價較2005年7月前兌美元只升值20％。不過，透過去年減少出口退稅政策、勞工成本上升、原材料價格上升及航運費上升，今年第一季中國出口增長率已見大幅萎縮。1971至84年日圓由360升上250兌1美元，升幅30.5％，對日本經濟並未帶來任何損害；其後由250日圓升至1994年年中嘅76日圓，十年內升幅達596％，才對日本經濟造成致命打擊，至今仍未復元。人民幣升值到七算，中國經濟能否利用內部消費替代部分出口增長，而保持GDP繼續高增長？任何事物都有臨界點，家吓人民幣滙價係咪亦已進入臨界點？1994年1月人民幣貶值到8.7兌1美元後穩定下來，加上1998年嘅退稅政策，帶動中國近十年出口高增長，但同時令中國經濟出現今天嘅過熱情況。如中國政府早一步（例如2002年）讓人民幣開始升值，或可避免今天過熱嘅情況亦唔定。不過，上述日子已成過去，講多無謂；讓人民幣有秩序地升值至七算，到呢個水平出口增長率已放緩，內部消費係咪真係可填補出口增長率萎縮？

A股仍大大偏高

　　滬深A股指數去年10月開始面對The party is over！資金泛濫所造成嘅股價偏高亦開始步入調整期。以1973年3月恒生指數為例，要到1987年6月才能再次打破1700點阻力；2007年10月滬深A股高點，真係唔知需時幾耐才能打破。由2006年1月到07年10月二十個月內，滬深A股共升六倍，响過去六個多月已跌咗50％。最近透過減股票買賣印花稅而反彈，但可反彈幾多？冇人可事前知道，只知反彈完成後仍要進一步回落。以中石油為例，2000年4月來港上市初期只值1.21元一股，2007年11月1日見 19.9元，升幅十五倍，理由係中石油去年11月5日回歸A股，以16.7元人民幣發行上市後更升至48.6元人民幣，然後回落到2008年4月24日 16.02元人民幣，跌破招股價。唔好以為16.02元人民幣一股中石油好便宜，其H股喺香港只值9.82元！中石油去年純利只升2％，如政府唔補貼，今年純利將走下坡。由此推論A股仍偏高，今天投資A股只可做trader，唔能夠做投資者，因為股價長遠而言仍大大偏高。

　　新興市場特色就係由偏低走向偏高，然後又大幅回落；只有經過大上大落，投資者才會成熟。七十年代香港、八十年代日本、九十年代台灣及東南亞國家，以至今天中國同印度，都必須經過大熊市洗禮，似乎冇一個新興市場可以例外。情況有如青春發育期，往往對前景充滿希望同幻想。高增長自然帶來高O，最後引發過度投機活動，直到財富歸於少數人擁有，股市才漸漸成熟。如以O計最高計，1973年3月恒生指數曾見二百倍O，然後係1990年日經平均指數O達一百多倍；2000年科網股亦好高。去年10月滬深A股O只有六十多倍，同上述泡沫期O比較，算係正常。不過，今天A股O仍較成熟股市O高，代表調整期仍未完成；反觀2003至05年滬深A股O較恒生指數O仲低！

新勞動法尚未嚴格執行

　　中國經濟正由出口帶動轉為內需推動，情況有如八十年代香港。可惜廠商對工人過去每周工作八十小時視為正常。雖然新勞工法已落實四個月，根據瑞信分析，大部分工廠仍未嚴格執行。中華全國總工會已接獲十九萬宗投訴，但中央政府仍未正式採取行動，聽講寬限期係今年6月，即今年7月起中國政府才真正執行新勞工法，到時衝擊才會表面化。瑞信估計，新法案可令內地勞工密集行業生產成本上升15-20％，尤其係部分工廠响旺季請工人、喺淡季解散工人，新勞工法下已唔容許咁做。以家吓內地勞工月入只有1000元人民幣左右，實在好難話新勞工法例太苛刻（尤其同全球其他國家比較）。但內地工廠產品大部分係OEM或 ODM，缺乏向買家討價還價嘅條件，因為大買家有更多選擇，結果令廠商有限嘅邊際利潤被擠掉；情況有如1980年後香港製造業或1990年後台灣本土製造業所面對嘅情況一樣。

　　唔少人引用香港成功例子（八十年代經濟轉型成功後香港更繁榮）而睇好中國未來，忘記亦有台灣嘅失敗例子（九十年代台灣製造業移去長江三角洲一帶生產後，台灣內需並冇急升，過去十六年GDP一直停滯不前）。

美減稅法案將自動失效

　　美股方面，2000年殊仔上台後提出減稅方案（股息稅由35％降至15％，資本升值稅由20％降到15％，2003年生效，到2009年12月31日後失效）。除非明年新總統上台後立即通過臨時減稅法案加以延長，不然2009年後美股將大受壓力，因上述減稅方案係令美股由2003年起上升嘅其中一項重要因素；上述法案卻喺二十個月後自動失效，將係2009年後美股另一威脅。响美國政府財政赤字咁龐大嘅情況下，又有邊位新總統有吉士一上台便要求將上述減稅法案延長而同時獲國會通過？2009年同2002年環境唔同，當年因發生2001年「九一一慘劇」，人人憂慮美國出現衰退。當年客觀環境有利通過減股息稅及資本升值稅法案（何況係臨時）；依家客觀環境卻大大唔同。

　　拉斯維加斯嘅金沙集團（全球最大賭業集團）宣布，今年首季虧損1120萬美元或每股3美仙（去年同期獲利9090萬美元或每股26美仙）。該公司投資120億美元喺澳門興建酒店及賭場。金沙今年首季收益雖然較去年同期上升 72％，達10.08億美元，但仍未符合分析員事前估計嘅12.2億美元。消息公布後金沙股價喺場外交易跌7.22美元，至69美元；今年金沙股價已回落 26％。

　　今年1月金沙集團响拉斯維加斯開業嘅Palazzo入住率只有79％，較拉斯維加斯另一酒店威尼斯人91％（一年前99％）為低，主要受高油價影響，令揸車去拉斯維加斯賭嘅人數較估計中少。

　　2004年响澳門開業嘅金沙酒店EBITDA亦跌36％，至6530萬元，主因係被去年8月開業嘅威尼斯人搶走部分VIP客戶，以及去年5月新濠國際（200）開業嘅Crown酒店影響。今年4月23日澳門政府宣布停發新賭牌，維持只有六個，因回歸後至今賭場數目已增加超過一倍，至二十九間，而且未來仍然在增加中。

　　金沙集團亦有投資新加坡聖淘沙嘅賭場，2009年開業，涉及資金40億美元。另喺美國賓州伯利恒城投資一間賭場，涉及投資8億美元，並有意用7500萬英鎊購入倫敦賭場Les Ambassadurs。

　　過去一般人認為生意淡薄，不離賭博。睇嚟世界性賭業一樣受經濟吹淡風所影響！

[ 本帖最後由 fat 於 2008-5-2 13:06 編輯 ]

Share this:

投資者日記 [曹仁超] 2008-05-03


美國先通脹後通縮?


5月2日，周五。恒生指數升485.67，收26241.02；成交890.63億元。5月期指升513點，收26248點。恒生指數已完成前跌幅50％反彈，至於能否完成最大反彈61.8％？只有耐心等候。

　　信置（083）升9.1％，見21.5元；恒隆地產（101）升6.5％，見33.75元；利豐（494）升3.4％，見33.35元；國泰（293）升4.4％，見16.98元，因油價回落1.3％；國航（753）升8.5％，見6.27元；中石化（386）升5.1％，見8.69元；聯想（992）升5.4％，見6.28元；永隆（096）跌3.1％，見136.1元，因首季虧損8250萬元，理由係為次按撥備4.767億元。

　　恒生指數已完成反彈前跌幅50％，投資者心中憂喜交集，十五十六。5月份到底應該靜靜地走開，所謂Sell in May and walk away，抑或勇敢地留下來，相信今年3月17日熊市結束論。當恒生指數响26000到27000點之間上落時，走還是留將令唔少投資者腦交戰兼無心睡眠。

　　自2002年起美元首次有較出色表現，RSI自3月開始回升，但下降軌仍未打破，美元係咪轉勢唔敢肯定。

　　花旗推介濰柴動力（2338），估計今年每股獲利3.755元，較去年減少3％，O十點五倍，目標價69.4元。維達國際（3331）估計今年每股獲利12仙，升15％，O二十點六倍，目標價3.3元。

恐慌性搶購導致恐慌性拋售　　美國經濟會否先通脹後通縮，而非類似七十年代嘅滯脹？雖然中國同印度等國家加入競爭原材料，但最終會否因美國GDP增長率放緩，而令原材料價格回落？過去十八至二十二個月隨着美國樓市放緩，投機者資金進行對沖活動引發各類市場出現「狗尾搖狗」現象，即資金流入推動價格上升，而非需求上升推動價格，此種反常現象由大量資金忽然流入一個市場所引發，其他投機者眼見價格上升而加入，將價格進一步推高，同供求因素無關。當大部分投機者入飽貨後發現冇人接，價格又暴跌。

　　上述情況不但喺股市出現，今年亦喺金市同油市方面出現，即先有恐慌性買入，然後又出現恐慌性拋售，令遲來嘅投機者紛紛被綁，例如去年10月股市、今年3月金市、今年4月油市。能源同食物價格上升，對窮人打擊好大，响政治上無法接受，因此各國政府或遲或早聯手壓低能源同食物價格。例如中國同印度已加息兼抽緊銀根，相信美國亦將停止減息，以免被全球指摘美國推高食物同能源價格！

　　以七十年代為例，食物價格早喺1974年受控制，而發電機則由燃油改為核能或煤。中國人同印度人今天食米唔係較三個月前多咗，點解米價短短三個月內上升超過一倍？唔係因為供應短缺，而係因為恐慌性搶購，上述情況由對沖基金引發，令全人類擔心未來供應短缺，但當米價狂升後，又因缺乏買家而急跌，情況有如小麥同大豆。我老曹相信，米價已見頂。3月4日起白金價急跌，然後係黃金……情況都係一樣。

　　1974、81、90及2001年美國經濟放緩，令原材料價格回落或無力再升，今年又能否例外？商品供應缺乏彈性，而需求未因價格上升而減少，此乃過去八年嘅現象，會否响今年下半年出現改變？

　　據Challenger, Gray & Christmas Inc.資料，4月份美國計劃裁員嘅公司較3月份增68％，係2006年9月以來新高；涉及職位九萬零一十五個，較3月份嘅五萬三千五百七十九個升68％（較一年前升27％）。其中大部分涉及裁員嘅公司係高薪金融業，共二萬三千一百零六個，包括花旗及美林；其次係電訊公司共八千零七個，第三係交通行業七千九百五十四個。今年首四個月消失嘅職位共二十九萬零六百七十一個，較去年同期二十六萬六千六百五十八個升9％。Challenger, Gray & Christmas發言人John A. Challenger估計，5月份油公司亦可能大裁員。

　　美國經濟在惡化中，但美股由3月17日起反彈，此乃典型熊市二期現象。

中國下半年CPI升幅或雙位數　　美國最大地主Sam Zell宣布出售旗下Equity Office Properties Trust，代價390億美元，買家係大投資銀行。大投資銀行响住宅市場損失慘重後轉向商業樓，因為呢類商業樓平均回報率有6.5％，派息5.3％，相較於十年期債券嘅3.8％吸引。不過，大業主點解肯出售？擔心美國商業樓價亦見頂。大地產商賺大錢嘅方法係賺價，投資機構（或散戶）蝕本理由係一味望收息。

　　今年首季美國GDP增長率0.6％，升幅的確少D，不過仍算有增長（去年第四季GDP仍升2.3％）。

　　中國國務院國資委主任李榮融、副主任邵甯和金陽响4月24日以國資委名義召開一次大規模視像會議。全國一百五十家央企嘅相關負責人參加會議，除咗同央企通報今年第一季度經濟形勢外，並要求央企至少要做好過兩年從緊嘅準備。

　　今年第一季央企收入2.6萬億元，升27.1％。一百三十八家實現營業收入上升，70％以上實現利潤同收入同步增長。一百五十二家央企利潤共2034億元，較2007年同期減少2.9％，利潤減少嘅行業主要係受石油影響面較大嘅行業，如石化、發電業，兩者因成品油及電價被政府宣布管制，但原油同煤炭價格卻一路上漲，兩大行業首季效益下降33％。今年首季煉油板塊虧損587億元，華能、大唐、華電、國電及中國電力共虧損28億元。除上述兩大行業外，央企效益增幅達30％，其中水運、商貿、通訊同冶金四個行業利潤增長2235億元；汽車工業利潤增長25.42％。但業內人士認為，油價上漲及鋼材價格上升、人工及財務成本上升仲未完全响汽車工業上反映，如呢D因素都到位，汽車工業就冇表面睇咁好賺矣。

　　4月份IMF再次調低世界經濟增長預測為3.7％（較去年放緩1.2％），美國只有1.5％，減慢0.7％。

　　今年第一季人民幣升值4％，對航運、物流業十分有利，三大航空公司盈利將近25億元，其中滙率收益佔36.8億元；但對造船業便有麻煩，因70-80％訂單來自海外，人民幣升值令造船業收入減少100億元。今年煤價再升近50％，澳洲對日本煤價132美元一噸，較去年同期上升一點四倍，國內發電企業面臨嚴峻形勢。今天鐵礦石價格再升65％；加上小麥價格較去年同期升一點五倍，大米價格亦升至每噸1000美元，令中國CPI下半年有機會出現雙位數字上升。

中央須再提高穀物收購價

　　家吓國際市場大米價格1000美元一噸，但响中國普通粳米批發價每噸唔到3000元人民幣，同國際市場價格相差近一倍！去年至今幾種主要糧食如小麥、玉米及大豆平均漲價80％，但响中國，糧價仍異乎尋常地平穩，因為加價必須國資委批准。去年至今年中國大米產量一億二千九百五十萬噸，同期消費一億二千七百萬噸，接近一比一供需，基本上係平衡，亦係中國大米唔漲價嘅理由。反而，植物油需求量60％靠進口油脂油料滿足，國際植物油漲價，國資委進行管制，形成市場供應短缺，最後國資委只有放寬，任由國內植物油漲價。中國政府對大米價格控制日子又可維持幾耐？何況化肥價格去年年底到今年4月已上升一倍，例如鉀肥由去年1900元一噸漲到依家4000元一噸；尿素去年4月1500元，今年4月2800元；磷肥亦漲近40％；複合肥由2800元一噸漲到4000元，形成種稻收益太低，唔少農民已唔種稻，改餵豬、養牛、養魚、種菜或出城打工，今天到城市建築工地當小工每日獲酬60元。中國政府3月27日決定繼上次2月8 日提升最低收購價後再提高4-10％，另提供直接補貼每畝提升135％。但農民仍認為，單純種植兩季水稻收益太低，睇嚟中央非進一步提高小麥、玉米同稻穀收購價不可。

　　2006年美國決定生物能源計劃，以減少對海外能源依賴，到2012年可再生能源達七十五億加侖，2022年三百六十億加侖，形成大量種植區改種玉米，推動全球糧食價格上升。

　　依家每蒲式耳玉米可生產二點七加侖乙醇，七十五億加侖乙醇需消耗二十八億蒲式耳玉米（七千萬噸），相等於2006╱07年玉米出口量及庫存量81％，或 2006╱07年玉米總產量25％。美國玉米50％以上用於飼料業，玉米漲價令肉食價格飛升，但所產生嘅乙醇只足夠美國汽車一年需求嘅2.8％，可以講微不足道，但已引發全球糧食大漲價，因美國玉米出口量佔全球總出口量70％。美國係全球最大農產品生產及出口國，農產品漲價令美國農業收入大幅上升，但全球卻要捱貴糧。

流動人口太多阻礙中產形成　　由於城鄉收入差距，內地鄉村居民湧入城市打工十分普通（尤其沿海城市），上述情況過去亦曾出現，响大部分工業化過程嘅國家，但中國和其他國家唔同嘅係有戶籍問題。鄉村人口無論入城幾耐，都無法獲得城市居民戶籍，因此無論喺申請廉租房、子女教育、醫療保障上皆冇份，形成中國大城市雖然到處都係人，但流動人口所佔比重好大，即有大量人口進進出出城市，每年春節便睇到幾千萬人口乘搭各種交通工具回鄉度歲。上述係其他國家响工業化發展過程中所冇，由於流動人口太多，令城市人口中嘅中產階級無法大量形成，因為有二億流動人口，佢地賺咗錢後便走。中國十三億零七百萬人口中，因為已有五億六千二百萬人住喺城市，但擁有城市戶口者只有二億五千萬至三億，形成中國城市存在大量低收入者。家吓政府努力擴大內需去抵銷出口進入低增長期，中國經濟轉型能否成功？2009年便知道。

[ 本帖最後由 fat 於 2008-5-3 13:30 編輯 ]

Share this:

投資者日記 [曹仁超] 2008-05-05


進入炒細價股期


　　5月4日，周日。响熊市二期，分析唔再係強調市場方向，而係將注意力集中响市場波幅（volatility）上。因為熊市二期往往有波幅冇升幅，例如3 月17日股市出現嚴重超賣，至今為止已反彈前跌幅50%（一般可做到）；至於能否反彈前跌幅61.8%？便見步行步。5月份二線股往往有較大升幅，主因係追落後心態。熊市二期贏家係time trader，例如Buy in March, Sell in May！但對散戶而言，做time trader較為困難，除咗要有分析股市嘅能力外，亦必須有嚴守紀律嘅性格，而大部分散戶往往高追低沽，毫無策略可言。

兩領袖股呈轉弱趨勢

　　4月21日至今上證指數升18.5%，見3693.11；恒生指數已升至三個半月高點26241點。中移動（941）由3月18日99.7元升至4月24日139元高位，上周五收市價136.1元已無力再升；國壽（2628）好D，由3月18日24.5元升至上周五35.15元，但已同成交額背馳。兩隻領袖股上周出現轉弱趨勢，由地產股如恒隆地產（101）接力，上周五升上33.75元，升6.5%；不過香港並冇追隨美國減息四分一厘。資源股亦睇唔到有幾大升幅……。估計5月份上證指數會挑戰4000點，恒生指數挑戰27200點阻力。

　　忽然之間好友大量湧現，令道指見13058點，重上200天移動平均線之上（喺熊市中，指數重返200天線之上乃常見現象，一如响牛市中指數低於200 天線亦係常見現象。美股200天線、恒指250天線從來唔係牛熊分界線；技術分析上亦無牛熊分界線呢回事）。有人甚至認為，由2002年10月開始嘅道指牛市至今仍未死亡，因為道指跌幅小於前升幅50%（50%理論係1940年代由E. George Schaefer推介）。部分人認為道指由去年10月9日14164點回落到今年3月10日11740點只係一次大調整而已。是耶非耶？不過，如果响去年 10月冇減持，到今年3月相信損失都幾大。

　　澳門賭場愈開愈多，社會亦變得愈來愈有賭性。例如炒樓花、期權、期指，賭博性之高唔見得較去澳門賭場細。股市散戶如過江之鯽，每當股市震盪往往傷亡慘重。去年10月幾多股民曾樂不可支，今年3月已有人燒炭自殺，點知3月17日起一個鯉魚大翻身，恒生指數又上升咗6000點！今天理財應由風險管理開始，例如估計自己可承受幾多風險，而非短期內恒生指數可漲幾多？

　　聯儲局將Term Auction Facility增加50%，至750億美元，亦同意與歐洲央行進行嘅外滙交換增加三分二，至500億美元；與瑞士央行增加一倍，至120億美元，以及接受其他三A級有資產支持證券作抵押品交換國庫券。上述做法目的係令倫敦銀行同業拆放利率回落，雖然美國聯邦基金利率已降至2厘，但倫敦三個月同業拆放利率仍高達2.815厘，甚至較3月18日聯邦基金利率企於3厘前仲高。去年面對次按危機時，貝南奇創造Term Auction Facility及兩種其他方式，目的係阻止市場突然之間流動性消失。佢認為，1929年華爾街危機演變成1930年代大蕭條，理由係股市突然崩潰令金融市場缺乏流動性所引發。反之，1987年10月股災冇變成重大災難，理由係聯儲局及時放寬銀根，2001年「九．一一慘劇」後情況亦一樣。呢次次按危機能否响聯儲局即時反應下轉危為安？

　　次按危機到底係一次全球股市巨大調整，定係金融市場生態一次劇變，從此扭轉過去放大槓桿比率嘅投資策略？上述爭論結果將主導5月份投資市場方向。睇好一方指出，自去年10月起道指所形成嘅下降軌上周四已打破；納指頭肩底走勢完成，並已向上突破，有機會補回去年12月裂口2052點，即後市上升將由大藍籌股擴散到二線股（尤其係納指成分股）。道指下一阻力位係13552點，即去年12月26日高點，技術上睇，短期股市可進一步向上，並進入炒細價股期。

　　分析之道在於運用非常規諗法。所謂自古成功在嘗試；如你只追隨前人足迹，你永遠不能跑喺別人前面。但嘗試過程中自然不斷犯錯，犯小錯無妨，犯大錯則無法挽回，因此要用方法將錯誤局限喺小錯之內。我老曹嘅方法就係止蝕唔止賺。投資亦須理性分析，但唔好以為真理一定在己方，真理可能喺別人嗰邊亦唔奇，只有透過實踐才可印證。例如3月17日起，我老曹同森池兄雖同時睇好股市，但理據唔同；我老曹認為只是熊市二期反彈，升幅可能只有31.8%到50%，最大升幅亦只係前跌幅61.8%，即恒指最大阻力區响27200點。進入5月份又係適量地減持日子。森池兄唔同意上述分析，佢認為3月17日恒生指數已見底，呢次跌市只係另一次短命熊市，牛市已由今年3月17日開始！最後時間老人會證明到底係我老曹啱定係森池兄啱；5月份相信係審判月。

　　4月30日聯儲局減息四分一厘後，係咪代表次按危機漸漸過去？我老曹仍未感覺到。最近數字仍證明美國樓價在回落中，只係美元進入負利率環境，但今年第一季GDP仍只升0.6%，代表進一步減息刺激作用唔大。至於5月份開始嘅退稅有冇用？有待證明。

　　去年8月至今美滙指數已下跌7%（美元兌歐羅跌13%）；油價今年升20%、金屬指數升24%、食物指數升18%，如再減息，擔心通脹率失控。呢次又減息四分一厘，若再減息副作用將極大，依家只有希望經濟本身能自動痊癒。最終結果到底係美國經濟踏入復甦期，抑或係完成反彈後又再下沉？睇嚟只有耐心觀察。

　　如參考英國情況，則叫人放不下心。過去十年英國樓價上升205%（同期美國樓價只升103%），今天英國家庭負債比率係稅後收入125%（美國 104%）。倫敦早於紐約成為國際金融中心，响倫敦嘅對沖基金及投資銀行活動佔英國GDP高達20%，一旦金融業員工收入走下坡或裁員，對房屋及零售業影響亦大於美國。過去十五年英國經濟繁榮有賴出售商業服務收入交換入口商品及消費品；過去商業服務收入不斷上升，反而商品及消費品入口成本卻不斷下降。但去年下半年起情況卻迅速改變，今年更加不容樂觀，金融業收入肯定走下坡，而商品及消費品入口成本卻上升。雖然英國樓價去年下半年才開始回落（較美國遲一年），次按危機受影響程度亦唔及美國，但英國金融業所佔GDP比重較美國大，萎縮速度亦較美國快！

接受批評挽回錯失

　　去年9月17日起美國開始減息至今，已減咗3.25厘，十年期債券息率如何？答案係由4.47厘降至3.76厘，跌0.71厘。三十年期債券息率又點？答案係由6.38厘跌至6厘，跌0.38厘。各位信唔信十年樓按因減息0.71厘、三十年樓按減息0.38厘，便可阻止美國樓價進一步下滑？上周四穆廸認為明年美國樓市復甦，已係最樂觀嘅估計；如明年下半年仍唔復甦，擔心將進一步下滑。

　　標普將Countrywide Financial Corp信貸降至垃圾級，睇嚟美國銀行只有全面收購Countrywide，才可阻止由該公司發行嘅972億美元債券價格下滑，其中40億美元債券更將在短期內到期，擔心新一輪信貸評級被降級行動又再開始。

　　不如意事十常八九，冇人能百戰百勝，能夠做到嘅只係盡量收窄虧損、擴大利潤而已。我老曹一向強調唔好信專家或名人，包括畢非德、索羅斯、香港四叔及《信報》曹仁超。因為佢地都只係人唔係神，佢地嘅意見只供參考，而不可不經思考地全盤接受。甚至戰無不勝嘅毛澤東亦經常犯錯，但我地較毛澤東幸運之處係因為我地肯接受批評，毛澤東唔肯。結果毛澤東一旦犯錯傷害便擴大，結果害咗中華民族足足十年。如果文革一開始發現係錯就立即停止，你話幾好呢！請記住，冇人可以唔犯錯，但有責任不讓小錯擴大成為不可挽回嘅大錯。對所有人嘅批評應虛心接受（無理取鬧者可以不理，但唔好動氣），只有咁樣才能更上一層樓。分析要理性，但不可以為自己擁抱真理，今天認為對嘅事，明天可能發現係錯亦唔奇（今是而昨非）。唔好因為怕犯錯而諗都唔敢諗，因為自古成功在嘗試。

資源稅改革料下半年推出

　　財政部稅政司司長史耀斌話，資源稅改革方案已基本成熟。國家稅務總局局長肖捷亦指出，下一步稅制改革重點之一係改革資源稅制度，加大保護資源力度。聽講資源稅改革方案今年下半年推出嘅可能性好大，徵收範圍也將較大，以配合宏觀政策下嘅節能減排。

　　家吓中國資源稅係按開採量確定徵稅幾多，例如一個油田或礦山係按每噸固定稅額來徵收，即開採量愈多，徵收資源稅愈多，而唔理會價格升降。如從量徵收改為從價徵收，便會令價格愈升徵稅愈多，價格下跌徵稅愈少，造成集中開採富礦，窮礦冇人開採。不但如此，例如污染較大嘅高琉煤價格較低，如改為價格徵收方法，高琉煤反而較價格更高嘅低琉煤多人開採。如果仍按量抽，由每噸10元左右提高到20元甚至30元，將會令加工企業成本壓力加大。

　　日前財政部決定對中石油（857）及中石化（386）部分成品油實行環節抽稅先徵後返，透過退稅，補貼價格管制下嘅成品油虧損，但補貼期６月底結束，下半年又點？屆時國際油價又會响咩水平？喺油價倒掛嘅背景下，政府不能要求中石油、中石化長期做蝕本生意，咁對兩間公司嘅股東唔公平。但內地CPI升幅已响8%以上，如下半年開放成品油價格，通脹壓力進一步增加。長期管制成品油價又講唔通，點解要犧牲兩大企業股東利益去補貼公共利益（低通脹）？响咁嘅情況下，兩大公司不如乾脆縮小業務，把損失減到最低，但咁樣一嚟便導致商品短缺，汽車大排長龍入油嘅情況又出現，對經濟損失更大。如只向低收入群眾提供補貼以紓解通脹壓力，結果更加強通脹預期心理……。換言之，最終內地成品油市場亦只有按市場規律辦事，服從國際油價升降，即下半年中國通脹率將進一步上升。

　　《新快報》引述中國人民大學教授黃衞平分析，勞動合同法喺落實中存在一D問題，應該修正。根據珠三角各地製造業協會提供數據顯示，今年珠三角有八千多家企業倒閉或轉移，與勞動合同法實施後企業成本大幅增加有關。今年上半年工業股純利又如何？

Share this:

投資者日記 [曹仁超] 2008-05-06


未來樓價呈膠著狀態


5月5日，周一。恒生指數跌57.07，收26183.95；成交740.3億元。5月期指低水，跌174點，收26074點。利豐（494）跌6.89％。

　　滬深三百指數升2.44％，見4055.78。南方航空升10％停板，國航、東方航空亦因油價下跌2.6％而上升，上海航空上升10％停板。原水股份升10％漲停，因第一季純利升一倍；西部礦業升7.1％，因同意收購澳洲採礦企業FerrAus 10％股權。

　　德國GDP低增長，令中產階級人口由八年前佔總人口62％，降至今年只佔54％，估計2020年將有一千萬人口脫離中產成為貧窮階級，令中產佔人口總數少於50％。

港中產階級人口或少於半數　　過去十年香港中產階級人口下滑嘅情況較德國有過之而無不及，恐怕今天香港中產階級人口已少於半數。

　　唔經唔覺，中原城市領先指數由2003年第三季至今已上升142％，重返73點水平（即1994年年初水平）【圖】；租金由每呎11元升至17元，上升 54.5％。香港中等入息家庭收入由2003年第三季15000元升至去年第四季18000元，已上升20％；私人屋苑家庭收入由2003年第三季 20000元升至2007年第四季24000元，升幅亦係20％。由於利率下跌，供樓支出佔香港家庭總支出由2003年第三季20％上升到今年3月40％（1994年佔總收入90％）。香港家庭面對依家嘅樓價，大部分人仍供得起。

　　家吓樓價會否回落？除非外來因素變化好大，不然機會唔大。至於喺負利率狀況下能否進一步推高樓價？响GDP增長率放緩及收入負增長（加薪幅度小於物價上升），機會亦唔大。估計未來樓價最大可能性係膠着狀態，即大升大跌機會皆唔大。

　　相較於滙率升降，利息只係peanuts而已。不過澳元利率高達7.25厘，日圓只有0.5厘，所以利差交易誘因亦幾大，何況近年利差交易唔少賺息兼賺價。去年9月至今美元利率由5.25厘降至2厘，令從事利差交易者都放棄美元，轉揸其他貨幣，引發去年9月至今美元回落潮。

　　不過，史丹福金融集團政治策略員Greg Valliere提醒大家，今年11月美國大選，民主黨應該勝出，並結束美國長達八年嘅減息及減稅期。民主黨已控制國會，令資本增值稅及股息稅延長減免機會唔大，小心明年出現美元回升、美股下跌嘅局面。仲有個人入息稅率依家最高係35％，唔排除到2010年升上39.6％（如民主黨拒絕再延長入息稅減免法案），2011年遺產稅減免亦可能由350萬美元降至100萬美元（香港近年已取消遺產稅）。

　　換言之，大選後美國投資環境將漸對投資者不利！

　　4月份歐羅區工廠活動指數50.7（3月份是52），極之接近前低點2005年5月嘅50.8。上述指數如低於50便視為萎縮期，而西班牙早已跌至45.2、意大利48.2、法國51.1，只有德國仍喺53.6。歐羅區亦已接近衰退邊緣。

　　雖然道指3月17日起上升，但哈佛大學經濟學家Kenneth Rogoff同馬里蘭大學Carmen Reinhart共同研究1300年到近代西方經濟，結果認為政府操作可能擴大及深化衰退，但從來唔係引發衰退者。經濟衰退嘅成因係消費、投資及資產價格之間唔平衡。1987年股災出現係股價相對純利偏高；1998年長期資本管理出事係對沖基金過分借貸。上述都係金融市場嘅災難，但對經濟影響極之有限，即使近年2000年科網股泡沫爆破情況亦一樣。但呢次唔同，唔係次按危機引發樓市泡沫爆破，而係人們已負擔唔起物業價格而出現斷供，引發次按危機。去年8月聯儲局插手令股市响去年10月創新高亦冇用，今年3月17日亦因聯儲局願出手協助JP摩根大通收購貝爾斯登而刺激美股上升，但冇解決樓市泡沫問題。擔心呢次美國衰退係深而長，而唔係淺而短，直到美國物業重新變得有吸引力為止。

內地零售業高增長未必能維持　　高達1170億美元嘅退稅，最後去咗沃爾瑪百貨，定係去咗產油國OPEC及食物方面？經濟學家期待5月份500億美元退稅可令第二季GDP增長率高DD（第一季GDP只升0.6％）。不過，2001年年中嘅退稅計劃未令當年GDP回升，今天美國家庭負債較2001年多85％，年入七萬五千美元嘅個人只收600美元支票，夫婦兩人將收 1200美元（如有孩子每個多300美元），能否刺激佢地增加消費？

　　美國兩大半官方按揭公司房利美及房貸美將宣布連續三季虧損而必須再集資，睇落情況仍未樂觀。

　　內地基金管理公司可以根據自身業務發展需要到香港設立機構，開展資產管理類相關業務，即內地基金已可投資香港（或香港以外地區），減少人民幣升值壓力。反之，港股直通車尚未開通，即個人投資者仍唔能夠直接投資港股。

　　响中國╱香港上市嘅內地消費股今年1月至4月共失去約380億美元市值，或下跌22％，同期恒生指數跌6％、國企指數跌11％、滬深三百指數跌30％。雖然跑贏滬深A股，但大大落後恒生指數及國企指數，令人質疑中國經濟能否順利由出口帶動轉為內需推動。

　　今年內地豬肉、牛奶及大麥分別升80％、40％及60％，因動物飼料價格升25％。果汁及蜂蜜市場面對國際品牌入侵，加幅只有15％，葡萄價格更下跌（因收成好），令葡萄酒生產成本下降，啤酒因大麥價上升60％而受影響。

　　3月份中國零售業銷量較去年同期升21.5％。中國人口55％响市區、45％响農村，大部分係農民及低技術勞工，因此對產品售價非常敏感。依家零售業嘅高增長到底能夠維持幾耐？安踏體育（2020）、百麗國際（1880）、蒙牛（2319）、華潤創業（291）、雨潤食品（1068）、佐丹奴（709）、國美電器（493）、海爾電器（1169）等，皆面對今年上半年高增長率能否一直維持落去嘅問題。

　　內地企業今年純利升幅面臨低增長，股價正把上述訊息反映出嚟。

　　中國船舶今年第一季獲利9.84億元人民幣，較去年同期上升135.91％，每股獲利1.485元人民幣，升69.33％，並透露兩大利好消息：一、中國船舶將整體上市，變成一個擁有造船、修船、造機三大業務嘅控股公司，令上半年純利可升800％以上。二、旗下江南長興造船剛獲工商營業執照。雖然喺咁，今年1月至4月中國船舶股價卻下跌超過70％。即使造船業正處於高漲期，但不安因素已累積，例如鋼鐵價飆升，6毫米、10毫米、20毫米船板價格分別升 35％、42％及30％；人民幣升值而中國船舶公司無法將滙率對沖；加上地方船企拚命擴張產能估計2012年進入另一個拐點，形成企業純利上升、股價急跌嘅局面。

　　中國股市一向係大戶嘅金礦、散戶嘅墳場。中國股市黑幕重重，不但黑箱作業，加上股評人無良，例如出書《銀廣夏──中國第一績優股》，令大量散戶買銀廣夏股票而損失慘重；其他如中科創業，黑莊呂梁捲款潛逃；億安科技「百元神話」被揭開後，黑莊雖然被即時拿獲，但9億元資金唔知去咗邊。中石油上市前，唔少股評人話50元唔貴，上市後卻直線下滑。喺內地做散戶必須罵不還口、打不還手，遍體鱗傷後還被批評「自作孽」。正是一人炒股、全家遭殃，中國散戶係蚊子最歡迎嘅品種，不但血多，而且唔會反抗，數千萬散戶連一個「投資者組織」都冇，畀人呃連聲都唔敢聲。只要將股票交易印花稅從0.3％降至0.1％，散戶又再好了傷口忘了痛。

　　今天內地人人魚翅撈飯，唔好以為內地人發達。無論响北京、濟南或青島酒家，魚翅撈飯20元起，木瓜魚翅每盅40元，參鮑翅亦只賣幾百元一大碟！由於鯊魚响中國列為瀕危物種，進出口中國必須通過海關批准才可。山東省海關話最近幾年並冇人申請魚翅進口，咁樣內地酒樓賣嘅魚翅何來？答案係先將雜魚邊角料打成粉，加入瓊脂等物料造成仿翅針，與真翅針形狀極為相似。依家真嘅翅針賣4000、5000元一公斤，魚鰭部位亦要賣500、600元一公斤，仿真翅卻只值幾十元一公斤，差唔多人人食得起。

魚翅撈飯大平賣

　　過去五十年全球鯊魚數量減少80％，魚翅貿易係鯊魚被捕殺嘅主因，家吓每年貿易量約一萬噸，香港及東南亞係最大進口及消費地。

　　中國政府尚未對魚翅制定相關標準，因此不能禁止仿翅出售，只係唔能夠話自己係真翅。大部分仿翅成粉絲狀一條條，而真翅係一疏疏，泡發後相互間冇膠着感；仿翅往往粘在一起。一D飯店為降低成本，往往將人造翅同仿翅混在一起做菜，如此一來一般消費者根本上無從分辨。

　　冇證據證明仿翅對人體有害，因成分主要係雜魚。其實20元一份魚翅撈飯，消費者亦心知肚明食緊乜嘢落肚。

Share this:

投資者日記 [曹仁超] 2008-05-08


商品價格肯定太貴


　　5月7日，周三。恒生指數跌651.92，報25610.21；成交一千零一十三億四千萬元。跌市成交多，技術表現轉差。5月期指低水，跌695點，收25485點，又係另一轉弱訊號。

　　唔少人對本港學生多彈少讚，但查實香江嘅莘莘學子，並唔係想像中咁不濟嘅。就好似剛剛就有四名香港大學生响紐倫港之紐約舉行嘅全球投資分析比賽中摘冠，攞咗全球總冠軍，港人今次可謂威番次也。皆因呢次係本港首次有學生贏得呢項比賽，證明香港唔少財經分析後進係有優秀實力，雖未必超英趕美，但質素達到國際水平可以肯定。

奧概股愈近奧運愈跌得急

　　今天恒隆地產（101）跌5.1%，見31元；中石油（857）跌 5.5%，見11.46元，JP摩根大通建議減持；平保（2318）跌4.6%，見72元。不過，ASM太平洋（522）升9.8%，見60.1元，因大摩推介。真樂發（1003）升127%，因公司以4.3億元收購21世紀地產代理公司；鈞濠（115）跌5.2%，見23.7仙，公司發行二億一千萬股，集資4250萬元；玖龍紙業（2689）跌9.1%，見9.04元。

　　滬深三百指數亦止升回挫，跌4.73%，收3821.32，令人擔心反彈市已完成。

　　花旗推介和記電訊（2332），估計今年每股獲利34仙，升16.1％，O三十二點七倍，目標價13.5元。

　　瑞銀宣布响倫敦及紐約投資銀行部門裁員二千六百名員工，全球裁員五千五百人，代表瑞銀決心收窄私人銀行業務，主因係連續兩季出現巨大虧損。睇嚟由1990年開始發展得如火如荼嘅私人銀行業務今年起進入萎縮期。

米價被美國人炒起

　　响真實世界，大部分資產泡沫好易分辨，但基於人類天生樂觀嘅性格，大部分人唔係避而不談就係視而不見，直到泡沫爆破之後；太早睇淡者則往往被冠以大淡友之名。只要明白呢種心理，各位不妨响泡沫形成初期加入，只要喺泡沫爆破前及時離開便可。要做到呢點，便必須時刻保持清醒，例如去年10月港股直通車計劃宣布後，保持眾人皆醉我獨醒。至於今年3月金價升穿1000美元係咪見頂？各位不可有賺盡嘅心態。新興市場泡沫一定不斷湧現，不過泡沫終歸係泡沫，有形成期、膨脹期及爆破期，各位不妨好好利用以壯大自己嘅財富。美國GDP已結束响1983年起平均每年扣除通脹率上升3.5％嘅時期，正步入低增長期，估計未來十年只有1.5％左右。從呢點睇，美股吸引力喺可見將來亦好有限。反之，新興市場卻因啤打系數大，上升之時升幅必大於美股，下跌時亦一樣。狂升暴跌乃新興市場特色，請好好把握其中韻律。

　　今年油價及食物價格上升，可令新興市場通脹率進一步惡化，米價忽然上升一倍引發社會壓力，油價升穿120美元一桶亦造成心理恐慌。今年金融市場會繼續亂七八糟落去，小心沙塵滾滾好易殺錯良民。由於對沖基金資金繼續搵嘢嚟炒，例如商品指數基金响 3月1日共控制四十五萬一千億蒲式耳嘅玉米、小麥及大豆，相當於全美年產量50％！真正嘅農夫卻好少用期貨合約去做對沖，因成本太貴。換言之，商品市場已由對沖基金資金所佔據（例如指數基金共持有九十萬二千一百零五張玉米、大豆及小麥合約，較2006年1月升66％；投入資金由去年11月250億美元升至今年4月650億美元。據美國農業部數字，去年全美國農產品價值只係925億美元）。去年8月起農產品成為咗另類投資，上述情況極唔正常，一如去年第四季起全球金飾銷量下跌而金價反而大幅上升一樣。今天唔係中國人或印度人大食食貴米，而係米價被美國人炒起。商品價格肯定太貴【圖】，幾時大調整則木宰羊。造成商品價格太貴嘅理由唔係中國或印度新需求，而係美國聯儲局嘅貨幣政策引發對沖活動。

　　八十年代雪茄伏利用高息擊退通脹呢頭猛獸，格蛇 1987年繼任時才可每逢有危機出現便放寬銀根，帶來美國史上最長嘅繁榮期。到貝南奇繼任就冇咁好彩矣，去年8月佢一放鬆銀根，便令美元滙價大跌，以及全球原材料、能源、食品價格大升。八十年代、九十年代嘅高GDP增長、低CPI已被格蛇用到盡，貝南奇依家面對嘅係低GDP增長及高CPI期。貝南奇正承受格蛇時代寬鬆貨幣政策嘅後果（一如格蛇承受咗雪茄伏成功控制通脹嘅優良果實一樣）。格蛇時代所造成嘅貨幣泛濫隨着美國樓價响2006年第三季見頂而進入退潮期，所造成嘅波濤極之洶湧。去年資金唔再流入樓市，改為流入股市，今年再流入商品市場；並喺股票市場造成海嘯。雷曼兄弟石油專家Michael Waldron警告，依家石油已供過於求，價格上升只係基於炒賣，小心日後出現急跌！

　　貝南奇周一要求國會協助減慢美國房屋被接管速度（去年共有一百五十萬間房屋被接管，較2006年升53％）。响大幅減息環境下，卻有咁大量物業被接管，喺美國史上亦屬少見。

　　房利美今年首季虧損21.9億美元，並計劃發行普通股及優先股集資60億美元（去年12月發行優先股已集資70億美元）．以便有能力承受更多房貸。今年第一季延期九十天未供款者佔總貸款人數1.15％（去年同期係0.62％）；估計今年美國樓價再跌7％到9％（年初估計跌5％到7％）。

　　聯儲局調查工商業貸款情況，今年5月不但未有改善，反而進一步惡化，尤其係小型企業更唔易獲得貸款。

　　中國國務院發展研究中心、國際技術經濟研究所研究員李思一擔心次按危機令人聯想起：一、美國三十年代大蕭條；二、美國1966到82年嘅滯脹；三、日式經濟衰退。其中最大可能性係出現日式經濟衰退。1989年6月日本央行行長三重野康對1990年危機降臨毫無準備，亦毫無應付能力。今天貝南奇係呢方面專家，兼可作出即時反應。2001年新潮嘅長毛泉出任日本首相，不但改變日本政治體制，亦解決經濟困局，令銀行同公司清理不良貸款解除負擔、重新恢復盈利，並削弱農民及建築公司及高官間嘅利益互相輸送（呢D勢力係自民黨五十多年來難以擺脫嘅制約），令2003年日本經濟復甦，人們普遍認為日本已建立起現代化經濟體制。不幸嘅事係去年7月至今日經平均指數已回落27％，今年首季已顯示衰退可能重臨！

　　2006年長毛泉辭職後，安倍首相响去年夏季選舉議會中讓反對黨民主黨獲過半數席位，獲上議院支配地位。隨後福田首相上台已係寸步難行，任何刺激經濟方案都無法通過。日本經濟一如九十年代一樣，又再次陷入衰落。

　　日本去年夏季開始，由於軟體問題，令一套審核建築物防震嘅資料庫系統未能及時運行，導致新建住房申請只有一半獲得審批，亦令新建築數量下降40％。經自我調整後，日本去年12月新建房屋仍然較2006年同期下降20％，令2007╱08年度日本GDP由原先估計嘅增長2.1％降至1.3％。

日本經濟典型外強中乾

　　因日本好少接納新移民，人口老化速度較其他OECD國家更快，家吓老人已佔總人口五分一，2015年達四分一或三千萬。去年日本人口由一億二千七百萬開始以年率0.6％速度下降，五十年後日本人口將少於一億。今天日本農村人口已經逐漸消失，令唔少鄉鎮沒落。日本政府過去十七年過度刺激經濟而令國債飆升，已冇能力提出新刺激方案啦。

　　福田上台後，黨內元老派又再掌權，由長毛泉推行嘅結構改革又中止。至於與外國降低貿易障礙談判又降溫，為減少財政赤字嘅稅務改革亦被擱置，日本又再次重現九十年代嘅情況，例如市場僵化、對婦女及老人不公、歧視臨時工及對外國投資者嘅敵視等。日本再次進入高投資、低回報期（今天日本投資回報率只及美國一半）。日本唔缺乏投資資金，至少日本出口公司仲一直獲利，但內需方面，工資自1990年起就一直冇加過，樓價自1990年起一直跌到2002年，2003年起微升五年，2008年起又再回落。內需企業一直無法上軌道，日本經濟仍過分依賴出口。外國食品進口仍壁壘重重，農民補貼仍十分大，外國公司收購日本企業面對不平等待遇及繁雜嘅商業補貼。日本國債高達GDP 180％，服務業冇進一步自由化，冇效率嘅企業繼續存在。日本經濟係典型外強中乾。

　　八十年代日本政府官員擔心日圓太強妨礙出口，而鼓勵銀行向房地產開發公司提供大量貸款，促進建築業發展、刺激消費來推動經濟，不僅寬容房價泡沫出現，甚至還助長其發展。九十年代又過分保護銀行而唔容許汰弱留強，再加上其他亞洲國家尤其係中國出口競爭力加強，令日本失去出口業呢個強大經濟增長引擎後，便一蹶不振至今！

　　根據麥格理集團研究所得，今年本港上市二十三隻奧運概念股平均跌幅22％，例如炒奧運概念嘅北京首都機場（694）跌幅便達34％，反而恒生國企指數只跌9.1％。雖然跌幅較大，但奧運概念股平均O仍高達三十倍，恒生國企指數平均O只有十九倍。估計完成4月反彈市後，5月份起愈接近奧運，奧運概念股下跌反而加快，投資者宜小心。

Share this:

投資者日記 [曹仁超] 2008-05-09


現代人趕住發達


5月8日，周四。恒生指數收25449.79，跌160.42；成交七百六十九億五千萬元。5月期指低水，跌177點，收報25308點，代表短期後市向淡。

第二次世界大戰結束後，全球以美蘇獨大。到1970年代美元崩潰期出現三頭馬車（美、日、德），到今天金磚四國。世界財富由集中

Share this: