曹仁超 - 投資者日記

曹仁超 - 投資者日記 (16/06/2008) - 拋空者成代罪羔羊 6月15日，周日。父親節快樂。去年今日油價65美元1桶，今天油價已超過130美元1桶！去年股市欣欣向榮，今年股市身處熊市二期。或者你已失去唔少蚊年，但呢D係冇辦法之事，只要唔影響日常生活，仍有一個幸福家，父親節係應該快樂。 美金融股進入超賣區 標普金融分類指數200天SARSI指標說明，美國金融股已進入超賣區，一次反彈不久將來可出現，你博唔博？ 彭博報道：一份最新報告指出，華爾街最佳分析員過去一年買賣銀行及金融股平均損失17%，同期標普五百指數只回落8.5%。點解有上述結果？三十八位一流分析員中，有三十一位過去十八個月推介金融及銀行股上皆損手，平均損失17%。如用人性分析，九十年代後期唔少科技股分析員自己亦損手。理由好簡單，因為太接近，產生當局者迷結果。1974年7月至12月點解我老曹將50萬元變成10萬元？理由一樣，因自己投資公司做投資顧問，心底裏希望投資市場情況唔係咁差形成當局者迷。結果1974年12月我老曹服務投資公司宣布自動清盤，1975年1月到《信報》上班。銀行及金融機構打工一流分析員，心理上自然希望銀行同金融業冇想像咁差，呢個主觀願望影響客觀分析，形成上述結果。因此，當銀行同大行分析員向閣下推介銀行或金融股時，請考慮上述因素。 周一雷曼兄弟公布業績，估計每股虧損4.18美元到5.14美元，雷曼股價會點樣反應？標普金融指數由最高點回落40.65%，係1940年以來第三大跌幅（前兩大係1987年8月12日至12月16日45.556%，以及1989年10月9日至1990年10月29日45.576%），估計未來仍要再跌8.6%至10%才真正見底，最大可性能係今年第四季或明年第一季。 5月份美國被接管住房約七萬三千間，睇美國樓市情況未見改善。如欲低價撈歐美金融股，仍需一份耐性。 英國金融市場被視為全球最開放市場之一。但英國金融服務管理局認為，皇家蘇格蘭銀行及英國最大房貸公司HOB供股集資期間，受拋空者干擾，影響皇家對蘇格蘭銀行160英鎊集資行動及HOB 40億英鎊集資行動，因此宣布6月20日起對拋空有所限制，以免被濫用。 記得1973年3月港股狂跌時，拋空者亦成為眾矢之的，當年新鴻基證券創辦人馮景禧亦受到不必要指摘。原來全球亦皆如此，連英國亦唔例外，拋空者往往成為代罪羔羊（但從來冇人指摘買空者）。 一般人慣稱大行為「超級大鱷」，但呢次熊市中損失最巨反而係跨國大行！我老曹認為，投資市場冇大戶散戶之分，只有輸家同贏家。股價下跌唔係有人拋空，而係形勢有變。

Share this:

投資者日記 (16/06/2008) - 續 上周五油價跌2.4%，令道指升1.4%。部分分析界上周建議沽出資源股、吸納金融股，實行逆市投資法。相反理論係一門易學難精技巧，能夠運用得出神入化者都係充滿智慧之士，並非一般常人。我老曹唔敢妄加意見。 美元上周表現不俗，兌歐羅升2.5%，見1.538美元（最高見1.53美元）；兌日圓見108.38日圓；人民幣破紀錄，上升至6.902兌1美元；澳元則回落2.6%，係近三個月內最大跌幅；紐元跌2.4%，因8月份美元加息機會達60%。美國總統、財長以至聯儲局主席均放話支持美元，發出加息訊號及指必要時會入市干預價，到底係真心或假意？抑或目的只係阻嚇歐洲央行7月加息（一向緊隨美國政策加拿大並冇宣布加息，仍維持利率3厘）。所謂強勢美元政策有如狼來了，美國總統、財長已講過好多次，過去信佢人無一不中招，呢次聽佢地講話必須「加一把鹽」才可（鬼佬方言，即「係咁先」）。 1971年8月14日已故總統尼克遜宣布物管制時，美國CPI升幅只有4%；1974年10月福特接手時，美國通脹率已達10%。 美國歷史上，能夠成功控制通脹率只有雪茄伏，1980至81年佢將利率推高至22厘，令1982至83年美國失業率一度達10%。 今天美國CPI升幅4.2%、失業率5.5%。貝南奇面對選擇有：一、將利率推高至CPI升幅2厘或以上，將令失業率升至8%，引發衰退。二、維持家利率不變，明年CPI進一步上升。今天美國食品項目佔CPI成分14%，能源佔9%，美國CPI唔會再升至10%；反之，印度同中國則令人擔心。何況北美洲已連續十八年天氣良好，農產品大豐收；今年天氣對玉米生長卻極之不利。 貝南奇會作乜選擇？接受衰退抑或任由CPI升幅進一步惡化？ 價格上升罪不在投機者 今年5月越南CPI上升25%，加上越南盾貶值，令越南人生活費上升40%，問你點頂？換言之，通脹壓力亞太區，唔歐美。香港《文匯報》報道，出席GMS經濟走廊論壇新聞發布會亞洲開發銀行駐泰國首席代表Jean Pierre Verbiest答問題時話，越南通脹率係經濟發展過熱所引發，越南政府已開出藥方，包括控制貨幣流通、調高利率等。越南總理阮晉勇亦承認，今年越南CPI升幅平均達22%，未來兩三年將難以降至10%以下。 越南河內計劃投資局副局長阮庭陽表示，政府已推出四項措施：收縮金融。加強財政及公共投資管理。加大金融監管及反投機資金力度。協助企業加大生產量及鼓勵民眾節約。 Verbiest表示，未見大量外來直接投資撤出越南，但新投資有所減少，尤其建築業方面。聽講胡志明市某D地區房價較去年底一下子跌50%。 面對通脹率上升、GDP增長率下降，美國聯儲局必須兩面作戰（歷史上拿破崙及希特拉都曾兩面作戰，結果均慘敗）。華盛頓又搵代罪羔羊，例如指摘D炒賣商品者為投機分子，要求美國CFCT懲罰佢地。毛澤東曾將中國貧窮責任歸咎於資本家剝削；1950至78年中國再冇資本家剝削，結果中國人卻更窮！價格升降中，投機者扮演角色只係推波助瀾，而非真正理由，真正理由係政治家政策上出錯（例如美國攻打伊拉克，才係油價上升真正理由）！

Share this:

投資者日記 (16/06/2008) - 續 中印通脹壓力令人憂心 由於通脹壓力對美國家庭影響唔大，加上最近四季美國工人工資只上升1%（過去二十季升2%），而樓價回落（美國樓價佔CPI比重42%），睇美國加息動機唔大。 令人擔心反而係印度同中國，正步入七十年代美國、歐洲及日本式通脹（由工資推動物價上升），如兩國貨幣政策抽得太緊，可令股市、樓價回落而觸發衰退（中國同印度，GDP升幅小於6%已係衰退）。通脹壓力已令滬深三百指數3000點失守，後市令人擔心。 2004年9月受伊拉克戰爭影響，國際油價突破50美元；2005年8月，卡特里娜颶風使國際油價一舉突破70美元；去年9月12日，伊朗問題導致油價突破80美元。最近半年時間裏，油價更不斷改寫新歷史紀錄，讓我地回顧一下。 2008年第二天，紐約市場原油期貨價格歷史上首度突破每桶100美元大關。到3月12日，紐約市場油價再創歷史新高，一度突破每桶110美元。5月5日紐約商品交易所6月份交貨的輕質原油期貨價格盤中創下每桶120.36美元歷史新高。5月21日紐約商品交易所7月份交貨輕質原油期貨價格大幅攀升，並突破每桶130美元大關，收於每桶133.17美元。6月6日紐約商品交易所7月份交貨輕質原油期貨價格每桶上漲10.75美元，收於每桶138.54美元，創歷史最高單日漲幅。很多分析人士都表示，原油將一段長時間內維持高位運行。 兩岸海運直航提上議程 海協會與海基會十年來首次會晤，總算敲定7月4日包機直航，之後兩岸貨運包機直航及擴大客運包機。兩岸海運直航已提上議事日程。 今天寧波、大連、廣州南沙、深圳蛇口等港口已建成大型貨櫃碼頭，福建省貨物係咪仍須經福州港、廈門港運到台灣高雄做接駁，再由高雄運到世界各地？ 大陸同台灣之間海上航運早已存在小三通！甲、貨通船不通。即福建省將貨運去金門、馬祖、澎湖放低，由台灣方面派船去收貨。二、船通貨不通。兩岸船隻掛「第三國家旗」，香港轉一轉。但大陸船只載貨去台灣，唔台灣港口上貨；台灣船只載貨去大陸，唔大陸港口載貨。唔似香港同大陸，只要過關後便可將貨「門到門」運送。由依家小三通到真正直航，中國社科院台灣研究所研究員王建民認為問題唔少，仲有排傾。甚至已公布包機，仍需繞道直航（即先飛到香港上空打個轉才去台灣，只係唔使香港或澳門降落），而非真正直航（由大陸直飛台灣，或台灣直飛大陸）。 台灣高雄港早被邊緣化 台灣物流協會秘書長鍾榮欽認為，台灣唔少生產商早已轉移陣地到大陸。1990到2008年過去十八年都唔直航，結果令台商大陸生產出口貨，不能利用高雄港出口，令高雄港使用率不足。2000年南韓釜山港貨運量已超過高雄，2002年上海港超越高雄港，今年1月廣州南沙亦超越高雄，到3月寧波港超越高雄；台灣高雄港早已被邊緣化！ 中遠集團董事長魏家福認為，若兩岸直航，高雄係國際商港，設備已達國際航商要求，可令中國貨出口多一條有效渠道。透過重新調配貨運航線，可令航運界節省15%至30%成本，整個中國貨運業每年可節省200億美元。

Share this:

曹仁超 - 投資者日記 (17/06/2008) -對沖基金挑戰畢非德 　　6月16日，周一。恒生指數上升437.39，收23029.69；成交566.79億元。6月期指升592點，收23038點。招商局國際（3968）升4.4%，見32.4元；中遠太平洋（1199）升4%，見12.88元；中國海外（688）升3.8%，見13.54元；中石化（386）升3.4%，見7.51元；國泰航空（293）升2.1%，見15.6元；國航（753）升2.2%，見5.01元；太平洋航運（2343）升5.6%，見11.4元；中海集運（2866）升6.7%，見3.36元。 越南唔會令中國引起併發症 　　花旗推介復星國際（656），因公司宣布以38億元人民幣購入天津鋼鐵47.5％股權，估計今年每股獲利52.3仙，上升46％，O九點九倍；明年每股獲利76.3仙，上升45.8％，O六點八倍。 　　玉米價格升至近8美元一蒲式耳，因美國存貨減少53%，降至十三年內低位。過去兩星期玉米價格升33%，見7.915美元；過去一年升85%。米價亦升2.2%，見20.74美元一百磅，仍較4月24日高價25.07美元有一段距離。 　　大豆亦升1.2%，見15.79美元一蒲式耳；小麥升1.8%，見8.9775美元一蒲式耳。 　　大豆亦升1.2%，見15.79美元一蒲式耳；小麥升1.8%，見8.9775美元一蒲式耳。 　　歐洲5月份通脹率升上3.7%（4月份3.3%），係1992年6月以來升幅最大；食物價格升6.4%（4月份升6%）；能源價格升13.7%（4月份升10.8%）；勞工成本第一季升3.3%。歐洲央行總裁揚言加息。 英國四大市值銀行柏克萊股價升13%（過去一年跌32%），該行計劃兩星期內宣布出售40億英鎊市值的股份畀主權基金；今年撥備的17億英鎊，比較皇家蘇格蘭的59億英鎊及HBO的28億英鎊為少。 　　全球最大保險集團AIG將由惠林斯特出任CEO取代沙利文，因6月6日美國證監會宣布調查該集團一直低估次按危機所帶來的損失。 　　滬深三百跌0.9%，收2952.24。 　　越南危機爆破以來，越南股市由去年10月10日的1110點回落到今天378點，跌幅66%，同期滬深三百A股指數跌幅也超過50%，同屬今年全球最差的股市之一，但專家紛紛表示睇唔到越南會令中國引起併發症。 　　越南盾危機產生成因係過度使用外資（1987年越南實施外國投資法，採取極為寬鬆的引資政策，提供四免四減的稅收優惠），並引發通脹。「趕印超中」的鼓聲中，國際熱錢去年紛紛湧入越南，增長幅度達40%以上，形成極大流動性，引致股市樓市大漲。 [ 本帖最後由 羊仔 於 2008-6-17 13:31 編輯 ]

Share this:

投資者日記 (17/06/2008) - 續 　　雖然A股同越南市場基本上並唔同，雖然中國A股亦在下跌，跌幅好大，而且中國同越南都係新興市場國家，但兩者模式有相似地方，亦有唔同地方。中國經濟處於開放過程中，但同時存在自我封閉性，例如外資不能投資A股，經濟仲有好強的計劃經濟模式。 　　此外，越南盾在貶值，人民幣在升值。越南6月10日將利率調升至14厘，6月11日仍將越南盾兌美元貶值2%；反而人民幣面對升值壓力，人行提升存款保證金率目的係打擊通脹，唔係保持人民幣匯價。何況中國板塊較越南大得多。 　　內地經濟學家譚雅玲認為，越南股市大跌的主因，唔係國際資金逐利所造成，因為流入越南的外資唔會好大；當然亦不能完全把熱錢因素排除掉，只係其他因素佔更重要的比重。例如越南資源匱乏，容易受到資源進口價格的衝擊，加上經濟快速發展的企業生產鏈相互需求，貿易逆差、管理唔夠嚴謹、節奏速度把握得唔好等，再加上股市快上快落，才造成今天的尷尬局面。 　　不過，越南板塊同中國、印度板塊相比仲細好多，影響十分有限。 　　日圓已跌至四個月內低位，利差交易活動能力大增，支持住英鎊及紐元匯價，同時亦支持日經平均指數上升。 關公都有對頭人 　　對沖基金大淡友Doug Kass揚言拋空巴郡股份，理由係畢非德稱霸股市五十年，人人當佢係投資界「莎士比亞」，但Kass相信「畢非德永遠是對的」日子已成過去，佢旗下Seabreeze Partners（只做拋空）2005年1月成立，到今年4月上升40.7％，同期標普五百升15％。依家每股巴郡132,990美元係咪太貴及值得拋空？Kass分析巴郡主力可口可樂、富國銀行、卡夫、美國運通、華盛頓郵報等，表現唔見得特別出色；今天巴郡股價最少已偏高10％（因可口可樂已跌7％、富國銀行回落12％、卡夫跌2.3％、美國運通跌超過12％，冇理由巴郡股價只跌5.5％）。呢回真係曹操亦有知心友，關公都有對頭人。Kass挑戰畢非德，結果一定精彩。 　　美國出現次按危機時，金融市場宣揚「decouple」（分道揚鑣）論；去年10月我老曹一再反駁此說法。八個月過去，道指由去年10月11日14198點跌至今天12307點，跌幅13.3％；滬深三百指數由去年10月17日5891點跌到2952點，跌幅超過50％！《信報》另一作者畢老林話，decouple論已徹底粉碎，而且跌幅更大。 　　點解去年10月我老曹反駁decouple論？因為美國經濟係成熟型，如油價、食物價格上升，對美國CPI影響唔大（例如今年5月CPI升幅亦不外4％）；反之，中國、印度係新興市場，油價、食物價格上升可令兩者CPI升幅達8％以上……。由於美國CPI壓力唔大，所以聯儲局仍可採寬鬆貨幣政策去緩和美股跌幅；而中國同印度卻須採取從緊政策，自然放大股市跌幅。 成年人的割禮 　　本港貨幣政策受制於美國，而H股及內地股份交投已佔港股50％以上，故恒生指數跌幅由去年10月30日31958點跌到最近的23029點，跌幅28％，略大於美股，卻較滬深三百跌幅細好多。一如去年分析，呢次跌市，H股同內地股份跌幅較本港股份大好多。 　　一旦全球股市下跌，新興市場跌幅必較成熟市場大；一旦上升，新興市場股市亦必較成熟市場為大。任何國家或地區經濟由新興市場走向成熟市場，都難以避免一大跌，有人戲言此乃「成年人的割禮」（猶太教儀式）。滬深A股正進行「成年人的割禮」，經此一役，內地股民心智才成熟，一如1973至74年香港。至於滬深A股的底在邊度？事前冇人可預知，例如1973年3月恒生指數1774點時，有邊個諗過O可由一百零二倍跌至八倍，見150點？呢方面人人只能做事後孔明，因為股市買賣70％係理性分析時段，30％係非理性行為。 　　在非理性期，貴貴都有人追、賤賤都有人沽，都係莫估底罷啦。1974年7月我老曹事前以為恒指由1774點跌至450點，應該見底！結果恒指跌至150點，令我老曹損失慘重。寧買當頭起，莫買當頭跌，一天股市未出現當頭起，仍應持盈保泰，因為「溝淡溝淡，愈溝愈淡」。 　　一百五十年前，當第一口油井開始噴油，至今人類向地球抽走一萬億桶石油，估計仍有一萬億桶存量。反之，美國政府負債由一百五十年前的7500萬美元上升到2007年54萬億美元。油價即使升上139美元一桶，仍未睇到美國人真正節省用油！照依家趨勢睇，五十年後石油世紀結束，到時人類又點？甚至煤及天然氣亦唔係取之不盡，一百年內人類如無法搵到新能源，到時才係真正能源危機。人類又能否重新適應十九世紀式生活？ 　　我地呢一代人十分幸運，生於「能源充足期」；我地下一代差一D，將生於「能源短缺期」（第一次石油危機1973年出現）。最悲慘係我地的孫仔，佢地必須面對「冇能源期」（除非五十年內科技有新突破）。 [ 本帖最後由 羊仔 於 2008-6-17 13:40 編輯 ]

Share this:

曹仁超 - 投資者日記 (18/06/2008) - 等爆破唔走頭冇得救 　　6月17日，周二。恒生指數升28.3，收23057.99；成交482.65億元。6月期指高水，升116點，收23154點。金威啤酒（124）跌10.3％，見1.04元，今年內共跌52％。 　　四十三隻恒指成分股中，二十隻升、十八隻跌，五隻冇變化。5月份香港失業率3.3％，維持十年最低。 壓低成品油價防染上越南病　　英國5月份CPI升3.3%，按月升0.6%。面對上述通脹，英倫銀行總裁須向財政部作出說明。依家英倫銀行利率係G7中最高，通脹率則最低（美國CPI升幅4.2%、歐羅區3.7%），因此最快7月份才會加息。 　　滬深三百A股跌3.71％，收2842.68。市場超賣無反彈，主因係能源價格上升，導致內地投資者信心再度受挫，出現內地罕見連續十個交易天下跌。航空股、中小企業、軍工、紡織機械板塊跌幅較細，資源、水泥、石油、有色、金融、奧運概念、商業百貨、節能環保等跌幅都在5％以上；過去十個交易天股價下跌20％股份比比皆是。摩根大通亞洲董事總經理首席經濟學家龔方雄話，A股已進入合理估值區，能否企穩關鍵在於通脹同油價。 　　《證券時報》報道，去年6月16日至今年6月16日止，跌破增發認購價基金共二十三隻，出現賬面損失基金十九隻，總額62億元人民幣。 　　專家認為，油氣價奧運後將上調10-20％。以江蘇省為例，省內共六千二百多家加油站，中石化、中石油佔三千家左右，另外三千二百家民營。二千多家因冇貨源或貨價太高，去年第四季度起陸續暫時歇業。國際油價每桶110美元時，加油站每售出一噸成品油便虧損2000元人民幣，因成品油價「批零倒掛」（零售價較批發價便宜）。國家唔批准零售油價加價，只要維持到今年年底，相信全國大部分民營加油站都會倒閉。 　　中國銀河證券研究所所長滕泰認為，雖然依家國內要求開放油價呼聲此起彼落，但政府短期內都唔會開放。 中石油中石化承擔國企責任　　越南經濟問題同中國經濟問題相似點，就係CPI上升都由成本推動，例如原材料、石油、鐵、銅、食品等。泰國大米風暴可令越南CPI大漲，而中國食品方面壓力唔大，多年來CPI壓力就係來自成品油，所以要管制成品油唔漲價，此舉令中石化、中石油煉油部分虧損，政府已給予一定補貼，而且佢地依家仲蝕得起。 　　中石油中石化正承擔國企責任──默默地為中國物價穩定作出貢獻，讓大家享受較便宜成品油，令化工產品生產仍然旺盛，唔少行業亦因此受惠。一旦成品油價格開放，首先係中國CPI控制唔住，政府必須進一步抽緊銀根，經濟所受壓力可能更大。 　　當然，中國成品油價唔能夠長期同全球油價脫節，最後中國亦會頂唔順，但眼前情況未有咁嚴重，中國成品油價仍然唔漲價。 　　呢D叫做有中國特色社會主義市場經濟，非我地資本主義地方長大香港人所能了解。滕泰認為，中國政府唔准成品油價上升，就係防止中國染上越南病！

Share this:

投資者日記 (18/06/2008) - 續 荷包先於經濟「衰退」 　　衰退就係衰退，唔理係官方定義定係個人感覺。如果你去年10月冇做好防範衰退措施，今時今日雖然專家仍唔認為出現衰退，但閣下港股投資方面損失已接近資本四分一！未來經濟會否陷入衰退仍在爭拗中，但閣下財政狀況早已「衰退」！2000年3月至02年年底，官方定義美國冇衰退（美國GDP只有2001年第三季係負增長），但作為投資者如不幸重科網股，早已衰到唔清唔楚！我老曹對官方定義唔太注重，只希望投資者可避開任何跌幅超過三分一股市！ 　　去年越南係中國生產基地轉移主要目標之一，隨今年越南經濟動盪，好多企業重新考慮投資策略。 　　越南盾貶值，市場人士認為越南盾未來十二個月仍須貶值30%，大摩警告越南可能重蹈1997年泰國覆轍，而引發新亞洲金融風暴。 　　家越南投資中國企業以紡織、家電、飼料等依賴低勞工生產成本行業為主，隨越南經濟動盪，反而減慢中國企業向越南投資，估計唔影響中國經濟。 　　美國金融股連升三天，雷曼兄弟、高盛、大摩股價表現不俗，高盛重組70億美元SIV計劃快完成。另一理由係過去一年（去年第二季至今）美國金融股跌幅接近50％，極度超賣下出現反彈。 　　泡沫期如何？結束期如何？倫敦法興James Montier認為，除實際分析外，睇睇分析者心態亦好有趣。 　　泡沫期，人人大叫泡沫爆破，例如去年首三季；反之，在泡沫爆破時，佢地反而認為一切正常（business as usual）。踏入今年幾多分析員講多少次最惡劣日子已過去（the worst is behind us）？證明泡沫在一片悲觀中膨脹，在一片樂觀中爆破。擔心3月18日至5月5日升市只係典型Sucker's rally。 泡沫冇流動性過剩漲不起來　　去年10月內地股市泡沫爆破，唔係乜「黑天鵝」，而係另一次可預測人類集體行為（我老曹同天文台長睇最大分歧係，佢認為天氣易測、人心難測。我老曹認為天氣難測、人類集體行為易測）。每一個泡沫由形成、脹大到爆破皆大同小異。面對第一個泡沫爆破而不曉逃避係悲劇，因人人不知（例如1973－74年香港或呢次內地A股泡沫）；第二個泡沫爆破仍唔曉逃避係鬧劇（例如1981－82年香港）。面對第三個石油泡沫已形成，等候爆破而唔願走頭，投資者仍然盲目睇好，可以講冇得救。 　　火冇氧氣便無法燃燒，泡沫冇流動性過剩亦脹唔起。金融信貸市場膨脹，大量信用被創造出來，支持泡沫一個接一個形成、膨脹及爆破，此乃格蛇上台後金融市場現象。 　　其次係「非理性亢奮」（Euphoria）出現，例如1989年「日本第一」論（日本人以為自己係全球第一）。去年10月港股直通車消息，將內地2008年8月北京奧運前過度樂觀、過分自信、過分高估前景而低估風險氣氛引入香港，即俗語所講「high high地！」都係泡沫爆破前現象，產生過度槓桿（over-leverage），一旦爆破，短期回落趨勢無法阻止。結束期，往往係投資者唔肯再參與而令成交萎縮。先「寧靜」才能「致遠」，即泡沫結束期股市將十分寧靜，進入寧靜期之前則必然有多次反彈，叫做牛陷阱（Bull traps）。狂牛往往極度熱鬧時死亡，而巨熊死前則好寧靜。 　　技術上睇，美國今年第二季GDP增長率進入穩定期（略有升幅），但唔代表股市可重返歡樂時光，我老曹繼續擔心熊市其中一個反彈已於5月5日結束。全球CPI上升壓力在加強中，美國極有可能今年8月宣布加息，但加幅唔會大，估計一次起兩次止。美國經濟雖然唔會出現官方定義衰退，但亦絕對唔會出現V形反彈。

Share this:

投資者日記 (18/06/2008) - 續 美消費業仍係廉價貨天下 　　美國5月份消費表現最好公司係Costco，營業額升9％；第二係沃爾瑪，升6％；GAP、K-Mart、美斯百貨、JC Penney跌6％、Bed Bath & Beyond跌7％，最多係Sears跌9％。換言之，美國消費業仍係廉價貨天下，相信同5月退稅刺激有關。 　　今年夏季，假期屋如距離城市超過二百哩者，訂房情況好差。睇今年美國人車度假亦係短途為主。 　　石油現代經濟中佔太重要地位啦，油價升降影響力僅次於樓價及科網股泡沫。今天油價高於140美元一桶，如不回落，足以威脅中國同印度明年GDP增長率及其他新興國家市場命運。 　　7月7日日本北海道舉行G8會議決定如何？雖然OECD國家經濟唔會重演七十年代滯脹情況，但新興經濟國卻冇上述優惠。例如生產鋁，40％成本係電力，30％係運輸成本，原材料只佔30％。當煤價、油價大升，對金屬價影響力如何？ 　　Ohio Northern大學教授A.F. Alhajji認為，2004至07年美國經濟可利用種種方法去減低油價上升所帶來影響，今年美國同時面對太多問題，已無力量化解高油價壓力，經濟開始受影響。 　　外傳以色列打算進軍伊朗以阻止其發展核武，如果係，應該美國大選前，以免奧巴馬上台後加以阻止，此亦係近期油價上升理由。 以軍若攻伊朗料揀美大選前　　油價上升對股市構成壓力，尤其係航空股。IATA估計，今年全球航空公司虧損23億美元，唔少甚至破產（新加坡航油每桶170美元）。由於油價上升吃掉大部分人民幣升值利潤，花旗建議沽出國航（753），目標價3.4元、南方航空（1055）目標價3.2元；國泰（293）目標價13元，估計今年每股獲利41仙，減少77％，因此亦影響太古（019）及中信泰富（267）業績。中信泰富今年估計每股獲利2.17元，較去年減少4.2％，O十四倍，目標價40元；太古每股獲利4.43元，較去年減少23％，目標價81元。今年上市公司物業重估升幅唔及去年，亦令地產股今年純利走下坡。 　　人民幣2005年7月至今三年共升值20％，而且愈升愈有，今天見6.8925兌1美元（即今年已升5.97％，去年全年升7％，睇今年升速加快），內地製造業點頂？人民幣十二個月期貨成6.4兌1美元，即未來仍可再升6.4％。至於美元又再回落，因為6月份加息機會下降。

Share this:

曹仁超 - 投資者日記 (19/06/2008) - 投資需要寧靜的心 　　6月18日，周三。恒生指數升267.81，收23325.8；成交712.1億元。6月期指低水，跌2點，收23152點。相信反彈又已完成。 　　今天新地（016）升4.1元，見118.4元，因美國6月加息機會下降。 逾75%內地股民冀政府救市　　滬深三百指數經過十天回落後，今天大升5.23％，收2991.27。前十個交易天下跌22％，令14天RSI低於20才出現反彈。招商銀行升4.1％、浦發銀行升4.7％、中信證券升6.1％；三一重工升10％停板，公司宣布延長所持公司52％股票鑑定期兩年。中央電視台與新浪網、搜狐、和訊、東方財富網合作向投資者進行調查，發現超過90％投資者蒙受虧損，超過80％投資者認為股市大幅下挫理由係市場監管有問題，超過75％投資者期望政府出手救市。 　　人民幣再升0.14％，見6.8821兌1美元，最高見6.8809。周小川美國認同人民幣須加快升值去減低中國CPI升幅。人民幣十年期債券息率見4.32厘，拆息由6月10日4.995厘回落到3.19厘。 　　林吉特回落到3.261兌1美元。自3月8日執政黨二百二十二個議席中只取得一百四十個後，馬來西亞政治變得動盪，影響林吉特價。反對黨人民聯盟5月12日要求政府9月中舉行大選，令前景唔明朗。 　　英倫銀行以八票對一票維持利率5厘。分析界擔心明年CPI可升上4.3％，而5月份英國食物價格上升8.7％；睇英倫銀行已無意維持目標通脹率吐巴仙矣。 　　日圓兌歐羅跌至十一個月新低，成168.04兌1歐羅。日本亦面對通脹壓力。 　　歐洲最大銀行瑞銀股價跌2.1％，見25.26瑞郎。JP摩根大通估計瑞銀今年仍須撥備50億瑞郎（48億美元），估計全年每股虧損4.55瑞郎。 　　歐洲第二大造紙廠UPM-Kymmene Oyj跌3.3％，成11.15歐羅，因木漿價上升，令生產紙成本大增。香港白報紙9月份又再加價900多元一噸，較去年同期升40％，但報紙零售價自1994年至今已十四年未有調整。各位諗十四年內營運成本升幾多？由於免費報紙大量湧現，令過去銷量大報紙銷量下跌，因此佢地反對報紙加價去維持銷量，你說怎麼辦？

Share this:

投資者日記 (19/06/2008) - 續 　　美國最大玉米產區愛華達州水浸，中國南部亦出現水災，百幾萬人必須疏散，估計將進一步推高全球糧食價。食物價格中，19％同農產品成本有關（例如種籽、肥料、農地租金、勞工成本等），81％係交通費、包裝費、廣告費、批發及零售費、超市上架費等等。食物加價，農民受惠有限，反而食物供應商及零售商等得益更大。 油價與商品價已偏高30%　　我老曹母親係農家女出身，佢認為務農人世世窮。共產黨打倒大地主，其實係赤貧之人對冇咁窮人患上眼紅症。母親十四歲前從未穿過一件冇釘釘補補衣服，雖然外祖父係地主，但要養十二個子女，你可以怎麼辦？母親九歲已學曉燒飯畀一百多個耕夫食，十二歲已幫手曬穀，十六歲已成「小管家」（因父親去世），不但管理百多名耕夫，仲要照顧兄弟姊妹。反觀今天香港十六歲女孩子，部分仲未知世界艱難。幸好我老曹一家1951年已離開故鄉，不然……。改革開放政策後，中國農民一直係被忽略一群，直到小胡上台後落實三農政策，農民才受到應得重視。 　　食物價格上升，責不在農民，而係包裝費、廣告費、交通費、超市上架費等太貴，農民所得只係雞碎咁多。美國經濟問題亦唔係食物價格貴，而係樓市及金融業；美國物業市場佔總GDP由兩年前6.5％降至3.5％，但仍影響一億美國家庭財富；金融業人口只佔就業人口5.9％，卻佔接近20％ GDP，係今天美國最高薪行業。上述兩大行業係八十年代美國經濟環球化下最大受惠者，亦係2002年至今美元弱勢下受惠行業。當上述兩大行業出現不景氣，全美國經濟展望又如何？ 　　沙地阿拉伯話願意第二次增產，每天增加三十萬桶，令7月期油回落至133.16美元。市場表現有如鐘擺，唔係偏向左邊就係偏向右邊。從歷史角度睇，今年油價及商品價格已進入偏高期（但非極高期）【圖】，因此睇好油價、商品價甚至食品價格者宜小心謹慎，因為已經偏高30％，呢次會否因加入中國、印度因素後而變得唔同？我老曹木宰羊。過去四十年（至於更早前我老曹仲未加入投資界），只有兩次商品價格較依家更偏高，就係1974及90年。七十年代首次引發西方國家滯脹，九十年代令香港房地產價格狂升。呢次商品價格偏高，我老曹唔認為美國等OECD國家會出現滯脹（反而擔心中國同印度出現滯脹機會極大），亦唔相信本港樓價會出現類似1990至97年升幅。至於會否好似1981或1999年，即商品價格偏高引發股市大幅調整？機會好大，投資者宜小心。 令你唔投資宜賣掉 　　高盛估計未來銀行業仍須集資650億美元，美國金融股結束三日反彈。恒指牛市去年10月結束，熊市一期今年3月完成，我地已進入漫長熊市二期。呢段日子利率保持低水平（或會上升四分一厘到半厘，得咁多，多D都冇），經濟數據時好時壞，恒生指數20000至26500點之間上上落落。 　　熊市二期，除非你係老練投資者，普通散戶都係多做多錯、少做少錯、唔做唔錯。熊市二期中，散戶經常不應出貨時出貨、不應入貨時入貨；不應賣出項目賣掉、不應買入對象卻買入。人非聖賢，有誰無錯？我老曹亦經常犯錯，為阻止自己犯大錯，熊市二期我老曹投資策略係三七分（即只動用30％本金，其餘70％以外幣存款為主），既能滿足自己投資欲，亦可證明自己眼光原來同大部分散戶差唔多。熊市二期投資策略，記住要分散、分散再分散。 　　至於time the market，除牛轉熊或熊轉牛，捕捉熊市二期上上落落，往往心大心細。熊市二期中做market-timing並唔容易。五窮、六絕、七翻身，睇6月份似乎諸事不宜。

Share this:

投資者日記 (19/06/2008) - 續 　　《信報》三十五周年口號係「順理致遠」，強調「理」性分析、講「道理」唔講「感性」。上述口號改自孔明句「非寧靜無以致遠」。投資亦需要一顆寧靜之心，即既不樂觀亦不悲觀，處事冷靜，才能理性分析。近日香港天氣既唔係陽光普照亦唔係山崩地裂，而係滂沱大雨。有地方水浸，有地方山坭傾瀉，因此更要寧靜心情去做理性分析。如果你投資令你晚上睡得唔好便賣掉它吧，因你已過分投資！ 　　今時今日投資戒條：一、唔好投資長期債券，擔心債券大牛市2000年開始，2003年中已結束。二、細價股只宜細細注大大聲，除非你有內幕消息，不然只宜淺嘗即止。三、強調股息率。邊D業務穩定、派息穩定股份可以多D作收息用。四、如閣下3月到5月表現不俗，Stop！今天我地面對係綿綿不絕熊市二期，唔係綿綿不絕牛市二期。賺到錢不妨慶祝母親節、父親節……到郊野看花有多美、草有多綠。唔好以為6月到8月可重演3月到5月情況。食有時、睡有時，熊市二期能夠唔蝕本成績已不俗。為避免「荒於戲」，仍可將30％本金用作投資，以免他日牛市來臨時自己仍懵盛盛。熊市二期仍投資，理由係keep your feet wet（不然你可能冇興趣再落水）。 　　光大證券房地產行業分析師趙強表示，中國房價被高估30-40％，但唔存在嚴重泡沫。作為衡量房價其中一個標準係租金收益率，從2006年開始持續走低。中國，租金仍以每年雙位數以上速度上升，而租金收益率仍持續走低，代表房價升幅大於租金升幅。 　　其次係供樓能力，無可否認當前中國房價存在明顯高估，但高估程度並唔嚴重！ 　　再以國際經驗睇，房地產市場長周期平均為十八年，周期見頂前，往往出現嚴重投機。例如香港最近一個地產周期由1984年年中開始，到2003年年中結束，為期十九年（本應2002年年中結束，受沙士疫症加上二十三條立法影響，延遲一年），上升十三年、回落六年。依家內地房產仍處上升周期，正面對其中一個短期調整，香港對上一個地產周期由1967年起步、84年結束共十七年；由1967年上升到73年後，因股市下跌，樓價亦曾出現20％調整，到1975年再上升。家內地樓價亦面對相同情況，而非乜硬陸。 越南面對輸入型通脹 　　越南投資計劃部外國投資中心副主任接受中國《羊城晚報》訪問時強調，今年1月至5月越南接受外國投資總額為150億美元，較去年同期上升20％，即至今為止並冇顯示投資者大舉撤出。至於熱錢好難統計，但規模唔會太大，越南已率浮動區間上予以應對。 　　越南經濟出現今天狀況，除內部因素外，好大程度受客觀原因影響，可以講係輸入型通貨膨脹。例如美國次按危機波及面很廣，依家全球股市普遍都在跌、油價都在漲，越南一樣無法獨善其身。 　　越南農產品及礦產方面擁有豐富資源，政府依家首要任務係控制通脹，令出口數量減少而出口價上升，兩相抵銷，對外資影響唔會好大。 　　外商投資越南要以美元計，越南盾貶值後，對過去以美元計投資者不利。為增加吸引力，越南今年5月通過減稅法案，2009年1月1日起所得稅由原來28％降至25％，內外資企業一視同仁。依家投資最多行業仲係工業生產，而房地產亦開始崛起。外資當中，中國今年1月至5月只佔9100萬美元，仍非主流。

Share this:

曹仁超 - 投資者日記 (20/06/2008) - 內地股蟻經歷血的洗禮 6月19日，周四。恒生指數跌528.19，收22797.61；成交590.3億元。6月期指跌340點，收22812點，高水，唔排除周五港股反彈。 今天新濠（200）跌7.8％，見8.11元，此乃2005年11月以來最低。《南華早報》估計，未來五年澳門賭博業每年升幅只有18.7％。麥格理下調中國鋁業（2600）今年純利13％，因生產成本上升將導致鋁價下跌；今天中國鋁業股價跌5.86％，報10.6元。 信心盡失一片慘綠 滬深三百A股反彈一天後又跌7.29％，見2773.08，創今年內第三大單日跌幅。除三隻新股外，只有四隻股份上升，其餘皆一片綠。跌停個別股份近一百五十家，佔中小企總數六成。新上市步步高升62.19％、聯化科技升25％、大洋電機升7.66％。內地股市一片「綠光」，將周三近150點升幅跌突！出現「日蝕」（陰吞陽）走勢，對內地投資者信心打擊十分巨大。 日經平均指數跌2.23％，台股跌2％，令MSCI亞太指數亦跌2％。 紐約對沖基金經理John Paulson接受《金融時報》訪問時認為，次按危機虧損可能達13000億美元，佢係少數次按危機中獲利數十億美元對沖基金。 花旗認為，中國對公用事業、能源價格調整較一般人估計來得更早及幅度更大（依家中國公用事業收費及能源價格較國際價格最少低50％），因此推介中石化（386），估計今年每股獲利56.7仙，減少13％，O十二點六倍；明年每股獲利68.6仙，升20.9％，O十點四倍。並推介騰訊控股（700），估計今年每股獲利1.218元，升34.2％，O四十五點六倍，因投資印度社會網絡公司，進軍印度互聯網市場。 A股經過十面埋伏（連跌十個交易天）後出現一陽指（大升一天），當救市預期又再落空後，股市恢復下跌。中石油、中國人壽、招商銀行、寶鋼皆下跌，跌幅超過5％股份佔上市股份三分一，造紙、地產、金屬、建築、機械等行業均跌幅居前，唔少都將周三升幅完全抹掉。 人民幣愈升愈有壓力下，不但珠三角一帶六萬多家香港廠商嗌救命，溫州六萬家企業亦命懸一線，企業已處於停工或半停工狀態。溫州人工廠較香港廠商細，一般只有幾十個工人，一家大細加上同鄉為主。例如典型例子倪雲，佢生產磁光片原料價係6000元一噸、成品賣6500元；依家原料價升到8000元一噸，佢只能賣8300元一噸，一家大細連同幾十個工人工廠，每月營運結果只付工人工資，自己則係白做。壓力下，佢一些親戚已主動離開，佢白做仍願意捱落去。但今年新勞工法生效，令總生產成本再上升8-12％，連白做亦唔掂，經常處於半停工狀態。 溫州中小企業促進會會長周德文發表一份調查報告──《關於溫州中小企業目前存在狀況的初步報告》指出──目前三十多萬家溫州中小企中，20％約六萬家已處停工或半停工狀況，情況在惡化。真正宣布破產倒閉並唔多，大家都在等，希望有轉機。以打火機企業為例，過去一年間倒閉八、九成，依家仲有三幾十家度死，上述情況五金、服裝、製鞋等行業同時上演。報告指出，近半數當地中小企業存活時間唔到四年。佢地資本薄弱，唔少連營業記錄都冇，過去以一家大細為主要骨幹，情況有如香港以前山寨廠。企業主要職務由家庭成員擔任，決策權一般父親手中，因大部分文化程度低，冇經過現代管理知識培訓，天生排斥外來人才，過去生存只靠個捱字，家大部分已陷入資金短缺，估計倒閉潮快將開始。 控制貨幣供應如手握小鳥 中國同印度通脹壓力下，已採取收緊銀根措施，為壓抑CPI升幅，會否出現過緊貨幣政策而令股市頂唔順？因為兩國央行官員經驗唔及美國聯儲局及英倫銀行，有時為急於求成而作出過激決定。唔明白控制貨幣供應如手握小鳥（過鬆小鳥飛走，過緊又將小鳥握死）。 中國4月23日將交易印花稅由0.3％降至0.1％所引發反彈，人行進一步抽緊存款準備金率後，上證指數3000點心理關口亦失守，人們仍寄望政府救市。內地散戶缺乏投資知識，真係好可憐，好多人連「淡市莫估底」都唔知道，更加唔知「溝上唔溝落」格言。佢地一如1974年曹仁超，正面對「血」的洗禮。希望日後內地投資者經一事、長一智。投資或trading需要係紀律及自省，而非資金及消息。你係咪一個嚴守紀律投資者（例如止蝕唔止賺？），控制你情緒。順理而致遠則更難做到，點樣manage a position？好多所謂專家都做唔好。請將自尊收落床下底，經常承認自己睇錯市。相信我老曹分析界中係最「厚顏無恥」（當別人批評我老曹睇錯市，我老曹仲笑騎騎話「人誰無錯？」）！Talk is cheap, profits are the only thing that counts（投資市場講到天花龍鳳都冇用，最緊要係能否賺到錢。我老曹強調係賺100％回報，而非濕濕碎）。去年唔少人賺到大錢，問題在於能否留得住，千萬不可水過鴨背。

Share this:

投資者日記 (20/06/2008) - 續 熊二係意志消磨期 熊市二期係投資意志消磨期。當熊市二期投資者經過無數次失望後終於「絕望地」離開，到時才進入熊三。 四十年前，香港環境係「發達容易、搵食艱難」。今日香港變成「搵食容易、發達艱難」。隨中國經濟日漸上軌道，過去十年本港人均GDP只有波幅而無升幅（唔少人收入扣除通脹後仲唔及1997年）。過去十年港人已經歷兩個crash，第一個係1997年8月亞洲金融風暴，第二個係2000年3月科網股泡沫爆破，唔排除已進入第三個，即去年8月開始次按危機。 美國CDS（credit-default-swaps）平靜一段日子後，似乎又再開始回落。Fifth Third Bancorp呢間中型中西地區銀行宣布集資20億美元，令股價一天內下跌27％，見9.26美元；該公司第一季要撥備7億到7.25億美元。上述宣布令其他金融股股價又再受壓，另一細價股買賣ETF全球最大經紀行MF Global Ltd.股價一天之內下跌41％，見7.83美元，因公司計劃發股減債。皇家蘇格蘭銀行信貸分析員Bob Janjuah預測，今年10月前標普五百指數將再跌22％。 美國第三大煤礦公司Consol Energy Inc.升7.3％，見117.34元。美國最大鐵路股Union Pacific上升4.6％，見75.82美元，因大摩推介。 十九世紀發明蒸氣機，有人話係「煤」革命。蒸氣機發明引發英國工業革命，令英國國力雄霸天下。二十世紀發明內燃氣，有人話係「石油」革命。內燃機不但推動汽車，同時發展出飛機噴射引擎，甚至火箭動力，令美國國力雄霸天下。二十一世紀又如何？有人擔心係「能源危機」。冇人知道地底下石油仍可支持幾耐？1979年沙地阿拉伯突然宣布蘊藏量多五百億桶，八年後又再宣布增加一千億桶，九年後宣布二千六百億桶才正確。沙地到底係咪真係仍擁有二千六百億桶？美國Aramco 1979年離開沙地前，佢地向美國國會證明沙地蘊藏量一千一百億桶應係正確，至今已用去50％，相信仍可供應多二十年（如照沙地所公布二千六百億桶，則可用多五十年）。整個OPEC石油蘊藏量由1980年三千五百三十億桶上升到今天六千四百三十億桶，但冇一個國家在過去二十八年有重大新發現，擔心只係人人報大數爭配額。例如科威特1985年突然宣布蘊藏量上升50％，1987年委內瑞拉宣布蘊藏量多一倍，然後伊拉克及伊朗亦宣布蘊藏量較原先估計多一倍……。如照1980年估計，OPEC石油生產只可維持多二十五年，如照佢地自己宣布蘊藏量仍可維持多五十年。國際能源組織IEA發現，2004年起沙地每次宣布增產，事後都冇向市場供應更多油，估計沙地生產石油能力已到極限。不過，西方政治家寧可相信OPEC提供資料係真而不深究，以免引發世界性能源大恐慌。 1973年石油危機引發全球經濟大衰退，1981年石油危機亦唔例外，2008年又點？呢次唔同？但願如此。不過我老曹唔會將辛苦賺番來蚊年賭呢次唔同。 中國對入口原油依賴度已達50％，印度達75％。兩國家正迅速城市化、工業化，情況有如七十年代OECD國家。即使美國、歐洲及日本經濟可避過衰退（連續兩季GDP負增長），中國同印度CPI上升壓力下，亦不得不收緊貨幣供應，其影響正股市及樓市浮現（根據1973至74年香港經驗，股市所受打擊較樓市大好多；當年恒生指數跌91.5％、樓價跌30％）。由於中央一早開始宏調去減少壓力，今滬深A股跌幅及內地樓價跌幅一定較1973至74年香港細。基於淡市莫估底教訓，我地只能做事後孔明。 最令人擔心係通用汽車及福特汽車，競爭激烈環境下，利潤已薄如剃刀。由於生產基地美國大選區（選民人數眾多），政治理由令佢地繼續經營下去。呢場為生存而戰戰爭，令全球汽車股純利皆抬唔起頭！ 油價高企令煤轉油大有可為。每桶液化煤成本30美元。美國、中國、澳洲及加拿大係四大煤蘊藏量最多國家，足夠未來一百五十年用。單係美國已擁有二千五百四十億噸煤，佔全球存量25％，中國排第二。未來煤礦股吸引力肯定超過石油股。踏入6月瑞銀已大力推介煤礦股，估計未來煤價可升至350美元一噸；依家需要係興建鐵路網絡及港口，將煤運到需要地方（運送困難係煤唔及石油理由）；其次係污染空氣問題令煤價始終無法同油價比較。不過，如油價升上150美元一桶，人類被迫採用液化煤。 人類另一浪費係天然氣，大部分係採油時產物，由於難以處理，大部分油井只建一條導管將天然氣燃燒掉（此乃採油區常見火燄）。人類為開採石油，每年白白燒掉天然氣二萬五千億立方呎，相等於十七億桶石油。近年新油井大部分深海，點樣由油井將天然氣輸送到使用地區？最佳方法係將之液化再用船運走，即係鑽油台上建立液化天然氣設施，然後用液化船將之運走（過去四十五年一直未出事，證明安全度較運油輪更高）。但上述涉及大量資金投資，因為鑽油台上建液化設施投資好大。 當然仲有核能。法國77％電力來自核能，日本及南韓佔39％，跟住係比利時、瑞典、芬蘭；中國未來來自核能電力將較依家增加500％。過去四十年事實證明，核電不但較便宜、更環保，而且亦安全，尤其係新一代核電，已冇當年蘇聯核電廠毛病，出現核溶解機會極微，甚至唔可能。至今亦冇洩漏輻射報告，冇污染空氣及水源，甚至唔怕恐怖分子襲擊。 油價上升打擊油輪需求，卻同時令乾貨輪需求上升，因運煤需要增加。乾貨輪租金2004年起狂升；反之，油輪市場卻死氣沉沉。未來液化輪需求好大，因唔少深海鑽油台將附加壓縮天然氣設施，將液化天然氣運走而非燃燒掉，為造船廠帶來另一商機。 如油價見140美元，我老曹擔心Boom or Bust重演，因墨西哥灣進入颶風季節。天有不測之風雲，呢方面連香港天文台台長亦幫你唔到。例如2004年颶風卡特里娜及2005年麗塔，雖然破壞力唔大，亦可令油價急升10％後再急跌10％。美國國家海洋大氣局（National Oceanic and Atmospheric Administration）估計，今年大西洋有九個颶風，較往年多，隨時可將油價推高10％。

Share this:

投資者日記 (20/06/2008) - 續 超級颶風破壞力相當十個核彈 今年一場風災，令緬甸七萬七千七百三十八人死亡、五萬五千九百一十七人失蹤、十三萬三千人受傷。由於當地軍政府封鎖消息，加上拒絕外國救援人員進入；四川汶川地震後，國際注意力去中國，人們漸漸不再注意緬甸。早2004年美國新奧爾良，卡特里娜破壞力大家有目共睹，令人擔心「超級颶風」已經出現！ 颱風（typhoons）、颶風（hurricanes）、旋風或龍捲風（cyclones）產生方法一樣。一、氣壓唔平衡而產生暴風雨（storm）。上述大海洋上每天都發生。二、海水溫度二十七度以上產生上升氣流而水深達一百五十呎以上。三、風向正確（地球自轉而產生季候風，因此只有6月至8月才有巨大颶風，其餘月份極少）。 海洋上每天都出現暴風雨。如海水溫度二十七度以上便可產生上升氣流，令暴風雨開始旋轉，令更多潮濕空氣向上升；到上空遇冷收縮，變成雨點落下。上空因熱空氣上升產生類似吸管狀態，吸入更多海上熱空氣，並以更快速度上升，形成旋風，一個颱風初步形成。 各位唔使怕，呢個颱風威力唔大。如果颱風移動過程中巧遇季候風，力量便不斷加強，此乃點解北半球颶風係順時針方向旋轉、南半球逆時針方向理由。熱空氣上升所產生電力係10X2026W，大家對上述數字冇感覺？一個超級颱風所產生電力相等於2000年全人類一年用電量十倍！可見數字幾咁驚人！其產生風力又有幾大？相等於十個一百萬噸級核彈同時爆炸，足以同時摧毀十個廣島或長崎威力！ 季候風愈近赤道，風力愈弱。所以赤道附近好難形成颶風，最強反而係熱帶與亞熱帶之間。幸好呢一帶颶風較少產生，因此形成超級颶風機會亦唔大。但隨地球暖化，情況在改變中，吹襲緬甸就係另一個超級颶風（通常發在春夏交替之間，因季候風而加強風力；另一危險日子係夏秋交替期）。過去極少出現超級颶風，2004年發生墨西哥灣，直撲美國新奧爾良；今年呢個直撲緬甸；情況開始令人擔心。唔好以為緬甸因為落後才有咁多人傷亡，呢類超級颶風破壞力，甚至對現代化都市建築物亦可造成嚴重破壞。

Share this:

曹仁超 - 投資者日記 (21/06/2008) - 中印越股市殊途同歸　　 6月20日，周五。恒指跌52.01，收22745.6；成交726.87億元。6月期指跌102點，收22710點，低水。 　　5月CPI上升5.7％，港元兌人民幣貶值6％，令食品價格上升11.2％，加上公用事業費上升6.9％同租金上升6％，香港通脹壓力仍在上升中。 　　雖然金融市場已知6月聯儲局唔加息，但美國金融股反彈未能繼續。8月5日加息0.25厘機會亦由周一估計高達90％，跌至周四估計得57％；10月28、29日加息到2.5厘機會仍有58％。 　　中國政府同意將汽油價格提升17％，至6980元人民幣一噸；柴油價格升18％；航空油升25％。電費升4.7％，每千瓦時25仙人民幣。 　　中國股市高收，滬深三百升2.76％，收2849.67。中石油升4.6％，報15.86元；華能國電升10％，漲停板，報8.79元；國電電力亦漲停報6.97元；中信證券升9.8％，報25.95元；海通升10％漲停，報22.17元；國航跌2.7％；南方航空跌3.7％；上海汽車跌4.6％。 泡沫五大過程 　　2008年上半年就快結束，恒生指數由1月2日27853.6起步計，任何投資者今年上半年損失少過18％都叫跑贏大市。下半年情況又點？唔見得有太大改變。 　　過去五年畢非德大量持有可口可樂，股價共上升23％，同期另一飲品股Hansen Natural卻上升6150％。五年前購入一萬股代價係44000美元，今天市值275萬美元，上述先叫牛眼投資法。Hansen Natural名都未聽過？佢產品Red Bull已成為年輕人至愛，未來又有邊一隻係Hansen Natural？過去Crocs Guess及Autodeck都係充滿創意，並五年內股價狂升。投資係揀未來之星，而非過氣明星。例如七十年代華資地產股冒起、八十年代紅籌股上升、九十年代國企股提供機會，以及2000年資源股。投資就係點樣用1萬元，十年內變成100萬元。方法係每年找尋能夠令本金升值50％至100％機會。上述先係牛眼投資法精粹。 　　Hyman Minsky曾經係Brown、U C Berkeley及聖路易華盛頓大學教授，1996年逝世。佢1986年出版《凱恩斯及Stabilizing and Unstable Economy》，曾深入分析泡沫由開始到最後，由泡沫期成因到爆破大致可分五期：displacement（改變）、boom（繁榮期）、euphoria（莫名其妙亢奮）、profit-taking（獲利回吐）及panic（惡性拋售）。引發改變可能係一項新發明或新科技，甚至係投資者新評估方式或一個項目成為新焦點，便可令繁榮期開始，然後進入莫名其妙亢奮，最終離唔開獲利回吐及以惡性拋售。 　　明白泡沫五個階段投資者便可以displacement（改變剛開始期）加入，好好咁享受boom，直到其他人進入莫名其妙亢奮時便獲利回吐，而逃過惡性拋售潮。以最近A股為例，2007年仍處繁榮期（boom），點解唔沖個泡泡浴？2007年10月大部分人已進入莫名其妙亢奮期獲利回吐，今天面對恐慌性拋售。對牛眼投資法投資者而言早預計中，呢段日子最好少說話，因為受傷投資者正在找尋代罪羔羊，因佢地唔會認為自己分析錯誤而係……。 　　Minsky理論既可用作解釋過去科網股泡沫，又可解釋近期滬深A股泡沫，令自己清楚知道依家處於邊一段Minsky Moments。佢研究亦證明泡沫唔係唔可以減輕痛苦（alleviate），甚至清除痛苦（eliminate）。就係當它進入莫名其妙亢奮期前政府進行限制（modified），甚至係管制（controlled）作出反方向措施；惡性拋售期作出減稅或放寬銀根措施。當然操作相當複雜。以今次內地A股為例，2007年中國政府已使用Minsky理論去減低群眾莫名其妙亢奮，近期減印花稅等亦係對抗惡性拋售。以免股市由一個極端，走向另一極端。

Share this: