發新話題
打印

陸羽仁'選舉月'

陸羽仁'選舉月'

美國總統選舉月真係唔好造淡,美股升完可以再升,美企公佈的季度業績令市場有驚喜,歐洲局勢靠穩歐股大升,推動美股第二日向上,杜指昨日再大幅抽高128點至13552點,係上月底以來最大單日升幅,又再朝10月5日高位13661點進發。標普500指數表現更好,升超過1%至1455點。



美國9月消費者價格指數(CPI) 較上月升0.6%,與上月持平,通脹平穩,符合預期。而9月份的工業産出環比增0.4%,好市場預期,更遠好過上月的下降1.2%。第三季工業産出則下降0.4%,當中工廠産出下降0.9%,係2009年第二季度以來首次。唔知點解總統選舉前出的經濟數字,靚得咁交關,通脹低,增長高,兼儲局放水,好事一齊來。



至於企業業績,如前所料,由於普遍分析預期第三季美企業績唔會靚仔,期望好低,結果出成績表唔係非常差已經好過預期。昨日開市前發布成績表杜指成分公司強生、UnitedHealth Group及可口可樂等,業績都好好。而強生及UnitedHealth調高全年盈利預測。



高盛集團第三季盈利扭虧為盈,主要原因係此前因歐洲主權債務危機和市場對全球經濟前景的擔心,已導致相關有風險領域的客戶活躍度大幅下降。而第三季歐洲局勢趨於穩定,令債務承銷和固定收益類別生意額較去年大幅攀升,推動高盛的業績增長。高盛第三季的債務承銷營收增至4.66億美元,遠比去年同期的1.68億美元高,可見債市高升令高盛亦向這方面的生意轉移。金融股繼續係推動大市向上的主要動力,杜瓊斯金融指數漲1.3%。



美國市場昨日的talk of the town(熱話)係全美最大銀行花旗集團的CEO潘偉迪(Vikram Pandit) 突然辭職。有報導指佢係因為花旗次級房貸投資虧損,辭職以示負責,不過普遍認為潘偉迪走得太突然,未到花紅的時節,係花旗內部權力鬥爭爆大鑊所致,相信潘偉迪係同董事局鬥氣敗走。



歐洲方面,西班牙繼續係市場焦點。據《華爾街日報》報導,一位政府官員向記者表示,西班牙正考慮向歐洲穩定基金申請信用額度,隨著國債收益率降至危險區域以下,西班牙已不急於借錢求助,提出有個信用額度,可以隨時周轉就可以。西班牙距離正式求援又進一步,更重要的是德國採取支持態度,消息刺激歐洲金融股全铫大漲,泛歐斯托克600指數上漲1.3%,其中德國股市漲1.6%,法國大漲2.4%,歐元兌美元升上1.31美元水平上方。



整個世界都由避險投資轉向炒風險投資,美國在下月初選總統,今早進行第二場辯論,今個月都係選舉月,我估美股在總統選舉前,杜指有機會衝破14000點,整番個歷史新高睇纒,同奧巴馬助纒選。只要大陸股市唔太差,港股暫時都係朝好的方向炒。


Share this:

TOP

發新話題