內銀陸續公布業績，除了盈利有無增長外，資產質素亦是業績焦點，四大國有銀行之一建行（939）率先公布中期業績，上半年盈利按年升1.15%至1,334.1億元，和估計相若，比較值得注意的是第二季度貸款減值損失按季下跌26.8%至197.73億元（人民幣），次季末不良貸款率維持首季末的1.63%水平。建行資產質素明顯有改善。
若單計第二季盈利，建行按年增長0.88%至654.6億元。老實講，大家都預咗四大銀行保持到盈利增長都偷笑，但估計間間都有大約1%增長，若然有間盈利下跌就會俾人沽。
投資者關注內銀的貸款減值損失，若然失控上升，意味災難未完。但建行卻有好消息，上半年度建行貸款減值損失按年增加15.72%至467.98億元，但按季計卻罕有錄得下跌1.15%，第二季建行新形成不良貸款僅約171億元，比首季度的204億元明顯減少。以上半年計，建行新形成不良貸款金額由去年同期的620億元，大減至375億元，和已公佈業績的招行（3968）接近。
外界估計內銀會將有間題貸款賣走，令新形成不良貸款率下降，但出售問題貸款理論上要打折，會影響盈利，但佢保持到盈利有1.2%增長，即是情況可控。我估若然阿爺想幫手，可以用折讓不大的方式買走問題貸款或壞帳，有無咁做就無人知啦。無論如何，建行新形成不良貸款下降，顯示壞帳高峰可能已過，有利吸引外資買它的股票。
另外，昨日全世界股市都唔係幾得，但跌幅又唔大。美股微跌大約0.1%，杜指跌33點，收報18448點；聯儲局主席耶倫美國時間今日朝早（即香港晚上）將於全球央行行長年會上發言，投資者都在等待耶倫的發言會唔會對美國加息動向有啲啟示，搞到美股近排都處於一個「睇下會點」（wait-and-see）的模式。
當然，美股升上歷史高位，股市咁貴，已經比較難吸引投資者入市，但由於市場上已經無更加好的投資選擇，投資者又唔願意沽出股票套現，亦係做成大市唔上唔落的原因。
至於耶倫今日的發言，分析普遍認為，以為會有料到的投資者大概會大失所望啦。例如保誠金融的首席市場策略師Quincy Krosby相信，耶倫唔會提出有關加息的具體動向，尤其是在8月非農就業數據公布之前，所以耶倫好大可能會重申聯儲局近期對加息的睇法，就係依據經濟數據而定。
不過，睇近日公布的美國經數又的確不錯，周二公布的7月新屋銷售較上月大幅增長12%，而8月Markit製造業PMI為52.1，好過預期；昨日公布的首次申領失業救濟人數連跌3周至26.1萬，7月份耐用品訂單亦增長4.4%，好過市場預期。Think Markets的首席市場分析師Naeem Aslam昨日提醒投資者，美國耐用品數據理想，將會增強耶倫今日發放比較「鷹派」言論的信心，不可不防。
睇昨日聯邦利率期貨交易，市場對聯儲局9月加息的機率的確有所增加，由日前的18%提高至24%，12月加息的機率則維持不變，仍是一半半。對聯儲局加息比較敏感的美國2年期國債收益率亦由上日的0.75厘升上0.79厘。
Share this: 
